Olympic Games atel Manipur mi 4te vaidawnna leh pahtawina

Imphal, Aug-20: Manipur govt nuaia Deptt of Youth Affairs & Sports leh Manipur Ameteur Boxing Association vaisaina in zan in Khuman Lampak a Indoor Stadium ah England khawpi London a Olympic Games,2012 ah Manipur apan vatel numei boxing kidemna a bronze medal la MC Mary Kom leh midang 3te Manipur govt in kipahpihna leh pahtawina in function neihpih hi. Huai ah Chief Minister O. Ibobi in Mary Kom kipahpihna in cheque in Rs. 75 lakhs pia a,Olympic Games atel L. Bombayala(Archery),Ng. Soniya(Weightlifting) leh L. Devendro(Boxing) leng kipahpihna in Rs. 20 lakhs chiat cheque in piahi.

     Chief Minister in a thugenna ah Manipur gam neuchik himahleh London Olympic Games ah Mary Kom in Bronze Madal a ngah ziakin leitung pumpi ah theihphak a om hi’n gen a,huaiin Manipur a kimawlmite thathousak tuan mahmah ding hi’n gen hi. Rio Ja neirio ah kum 2016 a Olympic Games om hunchiangin Manipur apan kimawlmite’n medal tamsem lathei ding a panla din CM in hasuan a, a poimawh leh sinsaktu(coach) leng gamdangmi tanpha lak hiding chi’n gen hi.Olympic Games atel Manipur mi 3 state danga sepna neite’n Manipur govt nuaia sep a lunglut ua leh a laisiamna utawh kituak in sepna piak hidin chiam hi.

   Mary Kom in amaute vaidonna hun ah Olympic Games ah Manipur apan mi 4 vatel mahle uh Medal 1 lel lak ziakin kipahna bukim zoulou hi’n gen a, “kei nupi ta neisa in leng medal a lak zawh leh kimawlmi tamzawsem in leng bang dia la zoulou ding i hiam, panla thak nihang” chi’n gen a,bronze medal tana lungkimhuai salou in kum 2016 a Olympic Games om hun ah Gold Medal lazou dia panlak sawm ahihdan gen hi.

     Khuman Lampak a function om madeuh in Delhi apan hongtung Mary Kom  vaidonna thupitak Imphal Airport ah om a, Airport akipan mipi tamtak tawh kizui in procession pai uh a,Keishampat-Mayailambi-Pishumthong-Singjamei-Moirangkhom-Secretariat-Wahengbam Leikai-Dingku Road-Telepati tawn in Khuman Lamnpak complex tung uhi.

     Manipur govt in Mary Kom pahtakna in Rs. 75 lakhs a piak banah Police deptt ah Dy SP apan Supdt of Police in kaisang sak a, ‘SP(Sports)’minvuah hidin kigen hi.Mary Kom in Boxing Academy a patkhiak adin govt in Meitei Langol village, Imphal ah gam hectares 0.8355 alian pia hi. Mary Kom bel Olympic Games a numeri boxing kidemna ‘women flyweight 51 kg category’   ah India numei laka Medal la masapen hi a,aman international level ah Gold medal 19 leh national level ah Gold medal 12 la hi.

Central team te’n Lamka pha

Lamka, Aug-20: Ministry of Rural Development apan A. Majumdar, IBS, Deputy Director(Media) leh SP Arya, Under Secretary, IEC, Division te’n Delhi apan tuni’n Lamka hongpha uhi. Amau development nasepna enkhia uh a, C.Hangshing, ED/DRDA & Addl DC/CCpur banah Puii, SDO/CCpur leh Rachel N.Guite, SDO/Singngat in kithuahpih uhi. Central team in New Lamka Zogam Road a Self Help Group te’ nasepdan enkhia uh a, huai zawh in Gangpimual ah IAY tungtawn a inn kibawlte enkhia uhi. Huai apan Tangpizawl khua a MGNREGS nasepna, Singngat ah PMGSY tungtawna lampi kibawl leh S.Geltui ah MGNREGS nasepna enkhia uh a, Old Age Pension scheme ngahte leng houlimpih uhi. Central teamte nitaklam in Imphal ah kiknawn uhi.

MC Mary Kom vaidawnna om ding

Lamka, Aug-20: London Olympic 2012 a numei boxing a Bronze Medalist leh 5vei World Champion hihna la Mary Kom vaidawnna Aug 26, 2012 sunnung dak 1:00 in Lamka Public Ground ah District Council/CCpur inntekna in om ding hi. Zinglam dak 11:00 in Kangvai ah Organisation tuamtuam in Mary Kom na vaidawnna ding uh a, huai apan athupi theipen in Lamka khawpi sung lutpih hiding a, khawpi sung fansuakpih nung sunnung dak 1:00 in Lamka Public Ground ah ‘Home reception program’ neihpih hiding hi.

DI Tata khat in gari 3 phu

Lamka, Aug-20: New Lamka Hebron EBCC biakinn kong ah tuni zingsang dak 7.40 velin DI Tata(No. MN-01X/0432) in lamlian nawla khawl Yamaha Bike(No. JK-02C/2744) leh Maruti Car (No. DL-2C/7112) banah 407 Truck(No. MN-2A/3405) phukha hi. DI Tata pen a pei(tyre) khat athep ziakin pump dinga khawllai free gear a koihkhak ziakin thakhat in tai a, gamlalou a om Yahama Bike phuphei in huaizawh in Maruti Car phu a, car pen a phut kawmin tuah a, Truck omna tan atun in Truck in ana dal hi’n kigen hi. Car leh Yamaha bike mun bangzah hiam kisia a, DI Tata mailam leng kisia in Truck ahihleh kise nasalou hi’n kigen hi.

CT Scan vanzat teng thuah uh

Lamka, Aug-20: Dist Hospital a CT scan vanzat tuamtuam -CT scan monitor, endoscopy monitor, key board leh dry cell battery 7 kigumang muhzawh nawnlouh ahih ziakin Toshiba campany te kiang ah order hi a, Aug 17, 2012 in hongtung a, company apan mi 2 hong kuante’n , Electricity deptt leh Hospital a staff-te kithuah in Aug 18, 2012 in thuah uh a, nasep zousiang kei mahle uh test a bawl ua leh hoih mahmah hi’n kigen hi. Zan (Aug 19, 2012) in machine part teng fitting zousiang uhi. Med Suptt in a gendan in Aug 21, 2012 in CT Scan test hiding a, tunung a zat dingdan routine bel electricity deptt tawh kithuzak ngai ding chi’n gen hi.

District Level blood donation campaign

Lamka, Aug-20: National Student’s Union of India(NSUI) CCpur dist. saina in tuni in CCpur Govt College a Multipurpose Hall ah ‘Dist. Level Voluntary Blood Donation-cum-Awareness campaign’ programme om a, Chairman, ADC/CCpur in hong hi. Resource person in Dr. Paulunmang Vaiphei(MO, i/c Blood Bank) leh Dr. Benjamin (DAPCU) CCpur pang uhi. Chairman/ADC in a genna ah damlou khenkhat hiding khop a buaisia leng sisan piak ziaka damthei ahihman in panpih ngaite sisan piak zel ding ahihdan gen gen hi. Blood donation campaign hun ah mi 11 in sisan 350 ml chiat a thawhkhawm uh kigawm unit 11 pha hi.

Company-te’ van tamtak mang

Lamka, Aug-20: Tipaimukh bial leikawm a thautui zon sawm a kisa Jubilant Oil &Gas Private Ltd te’n Parbung ah vanzat tamtak a koihte uh Aug 4, 2012 in kuatehiam in gumang hi’n Police- te kiang ah Vijay Gurung, Manager, Adminitration, Oilfied Service in report bawl hi. Police apan kizadan in Parbung camp ah Company te van Ram Bearing 3, sum atuat in Rs. 8,28,300/- 10-Seismic cable 4, a sum a tuat in Rs. 2,04,000/- SM24 Geophone String 17, sum atuat in Rs 2,04,000/-Back to Back connector 5, sum a tuat in Rs. 18,428/-leh Ram Battery 41, a sum a tuat in Rs. 49,200/- kigu mang a, vanzat kigumang teng Rs. 1,303,928 vel man hi’n gen uhi. Huai tawh kisai in Police te’n FIR No. 9(8)2012 PBG PS U/S 379 IPC registered uhi.

Bolero in pasal khat phukha

Lamka, Aug-20: Zorunlian(57) h/o Zamkhoman of College veng, New Lamka tuni sunnung dak 1.00 velin a inn ua lut dinga kisalai Gate kiang ah Bolero(No. MN-02A/4475) in phukha a, dist. hospital puaktung in om hi. Bolero nuaiah Zorunlian lutkha mahleh gari in gawi khalou a, himahleh a nungzang leh veilam khukguh liam a, nak theilou in sawttak om hi’n kigen hi.

2nd CoPTAM Intellectual Conclave

Lamka, Aug-20: Sauliim Restaurant ah zanin ‘2nd CoPTAM Intellectual Conclave 2012’ om a, intellectual circle apan ahunkhop tel uh a, tribal issue tawh kisai genkhawm uhi. Huai ah Jiribam bial district tuam piak ahih leleng singtangam a tel khaklouh ding, singtanggam survey bawl ding leh leinuai apan thautui lakkhiak ding chihthu om leng dal ding chi’n genkhawm uh a, Hill/village recognition twh kisai Act dungzui in Council(ADC) lam in leng a theihpih ding uh chih ban ah tribal issue tawh kisai mipite kithutuak a pankhawm poimawhthu gen uhi.

Mun bangzah hiam ah frisking om

Lamka, Aug-20: Khawpi sung leh pawlam mun khenkhat ah tuailaite zalen taka omte ziakin muanna leh bitna dinmun awlmawhhuai sak ziakin SP/CCpur apan thupiak dungzui in Police ten tuni’n Tedim Road a Lanva lei banah Foundation school kianga Pearsonmun  lutna ding ah frisking bawl uhi. Police te’n a gendan un zudawn nunga zalentaka omte ziaka siatna om khak ding venna in frisking bawl uh hi’n gen uh a, maban ah leng sunzom zel ding uh hi’n gen uhi.

Workshop on Acting & Filming kipan

Lamka, Aug-20: SSPP Gen HQ saina in tuni’n Bungmual a SSPP complex ah Lemchiin leh Film bawldan sinsakna (Workshop on Acting&Filming) kipan hi. Huai ah Marathi actor leh director Alok Rajwande in sinsak hi. Aug 21, 2012 in sunzom ding uh a, sunnung in zou ding uhi. Alok Rajwande ahihleh Marathi actor leh director ahih banah play leh drama tuamtuam gelh a minthang hi a, aman tuma lam in Sawai Abhineta Puraskar award sang ngei a, tulel in Bollywood a lutin mite theihphak khat in om hi.

Football siam Nengkam si

Lamka, Aug-20: Nagaland Armed Police (NAP) asem singtangmite laka Football peksiam minthang Hony Captain Nengkam Vaiphei (65) s/o (late) Zamkham Vaiphei of Jakulie, Nagaland tuni zingsang baihtak dak 3:00 velin si a, tuni mah in Nagaland ah kivui hi. Amah CCpur district apan Nagaland a pemlut hi a, NAP a Football team a telin state tuamtuam ah leng kuansek a, Lamka a Independence Day tournament om lai in leng NAP min in hong kuan zel hi'n kigen hi. Amah Th Khamneithang Vaiphei, Gen Secy VPC Gen HQ pa neu (uncle) ahi hi.

Rajiv Gandhi pian kum 68 chinni kizang

Imphal, Aug-20: India Prime Minister-lui Rajiv Gandhi pian kum 68 chinna tuni’n Manipur Renewable Energy Agency (MANIREDA)-te inntekna in ‘Rajiv Gandhi Akshay Urja Diwas’

chih minvuah in Manipur Public School ah zat hi a, huai ah Chief Guest in Chief Minister O. Ibobi pang a, Functional President in Education Minister M. Okendro Singh pang hi.

Chief Minister in a thugenna ah MANIREDA in singtanggam leh mun kilkoi(interior areas) tanpha ah na thupitak semkhia hi’n gen a, khua(village) 200 ah meivak a piak ban ah hospital, police station leh district administration office tuamtuam ah power back-up system koih hi’n gen hi. MANIREDA in solar, small hydel, wind, biomass leh adangdang kigawm 3 Mega Watt koih(installed) khin uh a, maban ah solar water heater 3340 vel mah install sawm in panla lel uh a, huai zawhsiang hun chiang in Manipur in electric power 5 Mega Watt vel save thei ding chi’n Chief Minister in gen hi. Chief Miniter in BSEM leh CBSE nuaia examna a lawhching meritorious student-te lak ah Solar Home Light 98 hawmkhia hi.

UNC in bandh ding khawlsak

Imphal, Aug-20: United Naga Council(UNC) in Manipur a Naga mite ading Alternative Arrangment phutna in tuni zankim apan dakkal 96 sung ‘bandh’om ding chi’n puang mahle uh Ministry of Home Affairs, Govt of India in Manipur a Naga mite atuam a kivaihawmna ding ‘Alternative Arrangement’ a phut uh tungtang India govt, Manipur govt leh UNC makaite’n Aug 2012 kha sungin genkhawmna ‘tripartite talks’ nei ding chi’n UNC makaite a theihsak ziakin tuni a UNC pawlin tuni a emergency meeting ah bandh ding khawlsak thak uh chi’n thusuah bawl uhi. Tripartite talk ahihleh New Delhi ah Aug 29 akipan Aug 31 kikal UNC adia lemchan dandan a om ding hi’n Home Ministry in theisak a,UNC lam in Aug 31, 2012 deih uh hidan in kigen hi.

 Siluang 4 kimukhia:Manipur mi 1 tel

Imphal, Aug-20: Bangalore apan Guwahati zuan Train atuang passenger khenkhat zan in West Bengal state sung New Jalpaiguri apan gamlalou Belakoba lak ah meltheihlouh pawlkhat in suam in a soisak zawh un train apan sawnkhia uh a, zan in siluang 2 muhkhiak banah mi 7 liam muhkhiak hi uhi.Tuni’n New Jalpaiguri Railway station kiang ah siluang 2 muhkhiak hinawn a, zan misi luang 2 tawh gawm in misi 4 pha hi. Tuni a siluang 2 kimukhiate laka khat Manipur-mi hi a, min Md Sarif s/o Md Jonamuddin of Lilong( Thoubal district) hi’n kigen a, Bangalore a Cotton College ah M.Sc Geography(first semester) sin lel lai hi’n kigen hi.

Semkholen Haokip innlam pai ding Imphal khawpi ah gammang

Imphal, Aug-20: Semkholen Haokip(14) s/o Dongsei Haokip of Molphei village(Leimatak) tuni’n Lamka apan a khua uh pha dinga zinkhia paisuak theilou in Imphal a Naharolgi Thoudang office a security omte’n awlmawhhuaisa in kem uh a, a innkuanpih leh tanaute’n Thoudsang office phone 0385-2449086 contact in pikhe din thupuan bawl uhi. Imphal apan thutut kingahdan in Semkholen Haokip bel Tuibuong a Grace Academy a kai hi a, HQ Veng a om ani(apa’ sanggamnu) Lhailhing w/o Seigin te’ inn  pansan a om hi’n gen uhi.

Manipur in Rs. 11.45 crores ngah

Imphal, Aug-20: Centre in National Food Security Mission(NFSM) nuai ah state tuamtuam ading in a kigawm in Rs. 1,800 crores bikhiah a, huai lakah Manipur ading Rs. 11.45 crores telkha hi’n kigen hi. Uttar Pradesh state ading in Rs. 276.6 crores bikhiah hi a, state teng laka tampen hi’n kigen hi. Uttar Pradesh zomin Madhya Pradesh in Rs. 22.87 crores ngah a, Maharashtra state 3na a pang in Rs. 196 crores ngah hi’n kigen hi.

BSF-te ma ah Manipur helpawl mi 2 kipekhia

Silchar, Aug-20: Manipur phaizang helpawl United National Liberation Front (UNLF) leh People’s United Liberation Front (PULF-MA Laskar group) apan cadre mi 2 zanin Koirengei(Imphal) a BSF CI(Ops) Sectoral HQ ah kipia(surrender) uh chihthu om hi.

BSF (Mizoram and Cachar Frontier) thupuangtu in a gendanin BSF-te panlakna ziakin mi 2 te kipekhia uh chi’n gen a, amaute UNLF a self-styled Surgeant Major Boinao Simte @Mangboi Simte(28) leh PULF(MA Laskar group) apan Private Hasan Ali @Rojer @R K (24) hi uhi. Amaute ki-surrender hun ah ML Batham, Inspector General, BSF(Mizoram & Cachar Frontier) banah DIG, Sector HQ, BSF CI (Ops) Manipur leh BSF & police top official tamtak tel uh chi hi.

       BSF thusuak in a gendan in Boinao ahihleh CCpur district sunga om Thanlon khawmi hi a, Hasan ahihleh Imphal East district sunga Keirao Awang Leikai village apan ahi hi. Boinao in December 2001 in UNLF zom a, Hasan in Nov 2007 in PULF (MA Laskar) zom chi hi. Mi 2 te’n 9mm pistol 2 leh magazine 2 banah atang 5 pekhia chi uhi. ML Batham, Inspector General,BSF in mi 2te’n galvantawi tawpsan a mainstream zom dia a kipiak uh pakta mahmah ahihdan puang hi.

Siluang 4 kimukhia:Manipur mi 1 tel

Imphal, Aug-20: Bangalore apan Guwahati zuan Train atuang passenger khenkhat zan in West Bengal state sung New Jalpaiguri apan gamlalou Belakoba lak ah meltheihlouh pawlkhat in suam in a soisak zawh un train apan sawnkhia uh a, zan in siluang 2 muhkhiak banah mi 7 liam muhkhiak hi uhi.Tuni’n New Jalpaiguri Railway station kiang ah siluang 2 muhkhiak hinawn a, zan misi luang 2 tawh gawm in misi 4 pha hi. Tuni a siluang 2 kimukhiate laka khat Manipur-mi hi a, min Md Sarif s/o Md Jonamuddin of Lilong( Thoubal district) hi’n kigen a, Bangalore a Cotton College ah M.Sc Geography(first semester) sin lel lai hi’n kigen hi.

Truck 1 in electric post phutan

Lamka, Aug-16: Tedim Road a Ciruit house kong lak ah tuni sunnung in Truck (No. MN-01-4804) siklawng(pipe) pawkawm a Lamka apan Imphal zuanlai Activa gari tawh a kipelhna lam uah electrict post(khuam) khat phutan hi’n kigen hi. Truck atuang te aliam omkei mahleh gari mailam kise nasa sim a, Police te’n gari pikhia in PS ah koih uhi. Truck driver in a gendan in Activa gari pel lou hileh activa pen a siatgawp kia hilou in a tuangte siding uh hi’n gen a, huai pelhna ding a electrict post bawhkha hi'n gen hi. Huainung  minutes 20 vel in Transports office kong ah Yamaha RX-100 (No. MN 01B-6784) leh Yamaha RX 100 mah(No. MN-02-8294) kihetkha a, Yamana (No.MN 01B-6784) atuang pen lamlian ah kithal seh a, Alto Car (No. MN 02A-5786) in bike a accident pe'n hetkha nawn a, akiang nai a omte'n tui buak in halh khethei hi.

ICI Central Choir -Bangalore Concert Tour

Lamka, Aug-16: ICI Central Choir in Bangalore a Concert Tour a neih uh patna ding in zan nitak dak 6.30 on St. Andrews Chapel ah concert zang uh a, mipi tamtak kikhawmte mah ah HT Sangliana,IPS(retd) & ex-MP in ‘Souvenir’ honna nei a, huchi’n n Concert in zui hi. La a sak masapen uh Thangngur in a phuah “Siar Chunga Singin Remtu” leh ladang khenkhat zawh in English la leng sa uh a, English leh Hmar la kigawm 14 sa uhi. Tour organiser Dr. Micky Morton choir teamte ‘performance’ hoihsa in lasak siam a sakthu leng gen a, ngaikhetu tamtak in mundanga concert om hun ah leng va ngaikhe ding uh hi’n gen uh chihthu om hi. Choir Chairman L. Hmingsang Joute in Pathien zar leh deihsaktute thumpihna ziaka lawhching hi’n gen hi. ICI Central choir te’n Aug 17(Friday) nitakin AG biakinn ah concert sunzom ding uh a, August 19(Sunday) nitak in Kothanura a Church of South India biakinn ah concert nei ding uhi.

Permanent Affiliation ngah

Lamka, Aug-16: Rayburn College in Manipur University(MU) nuai ah permanent affiliation ngah ahihdan MU a College Development Council Director in theisak hi. Huai dungzui in Rayburn College ah English, Geography, Sociology, Pol Sc leh History subject ah Honours laktheih ding hi. MU a Inspection team in Rayburn College a phak nung un Aug 2, 2012 in recommendation pelut uh a, huai dungzui in MU a Vice Chancellor in Rayburn College adin permanent affiliation pia a, huai College a subject sinsak a om 5-te leng Honours course honkhiak ding lemsakna piak tawh thuah chihthu om hi.

ALTOS pawl sit-in protest  

Lamka, Aug-16: Tulai in galvantawi pawl tuamtuam in Lamka -Imphal kala passenger service atai Tata Winger neitu All Lamka Taxi Owners Society(ALTOS) pawlte lak ah sum a demand uh lungkimlouh latsakna in Aug 17, 2012 zinglam dak 10.00 akipan nitaklam dak 3.00 tan Tuibuong Peace Ground ah sit-in protest nei ding uhi. Huai ziakin Aug 17 in ALTOS nuaia Tata Winger-te service lou in gari teng leng dharna mun ah om ding hi’n kigen hi.

Raising Day 24veina lopna

Lamka, Aug-16: Khawvaiphei Film Company Ltd kiphuhkhiak(Raising day) kum 24 chin lopna Aug 18, 2012 zinglam dak 10.00 in Lamka Community Hall ah om ding a, Langkhanpau Guite, Chairman, ADC/CCpur khuallian hiding hi. Huai ah Functional President in Lalhossan, EM/ADC pang ding a, Guests of Honour in Genneikhup, EM/ADC; Sianzadong, Chairman(Finance Comm)ADC; Suanchinpau,MDC leh Tongkai Baite,MDC pang ding uh a, Chief Host in Khattong Baite,President,VPC pang ding hi.

Army te’n kidnap a om hunkhia

Lamka, Aug-16: Police apan kizadan in 46-Assam Rifles te'n Aug 14, 2012 zingsang in Bijang area gamlak ah KNO member 2 in a kidnap uh govt a ki-surrender-sa PULF cadres (No. 381) Md Atajuddin @ Manoj s/o Md Abdul Helin of Kwakta Ward No.2 hunkhia in a innkuante khut ah pekhia uh chihthu om hi. A/R te’n KNO member Lunkhosei Touthang (39) s/o (late) Hemkhong Touthang of Bijang leh Th Haokip @ Alen (33) s/o Tongjam Haokip of D.Phailian mankhia in amau apan 9mm pistol 1 leh atang 8 mukhia uh a, Imphal Police ah pekhia uh chih hi. CCpur Police te'n a case lasawn in mi 2te CJM court ah dingsak uh a, CJM in Aug 18, 2012 tan Police custody a omdin phalsak a, Police te'n FIR No.84 (8) 2012 CCP-PS U/S 364-A/400 IPC & 25 (1-C) A.Act registered uhi. Md Atajuddin @ Manoj kidnaptute’n a innkuante kiang ah sum a tatkhiak ding in thupia uh chi’n Police apan thutut kingah hi.

Student makai thak ding telna om

Lamka, Aug-16:Lailam Veng a Blue Star Academy ah zan in kum 2012-15 sung a Tedim Chin Student Association Gen HQ makai thak ding telna om hi. President din Zam Lian Thang; Vice President din Thang Za Khup, General Secy din D.S Mang, Joint Secy din Khawl Kim, Finance Secy din Kimboi leh Treasurer din Ching Lam Mang telching uhi.

Solar plate 1 kimu mang

Lamka, Aug-16: Lamka Sports Club(LSC) te’n govt apan Automatic Solar Street Light System khenkhat khawpi sung mun tuamtuam a a thuah uh SA Road-Tedim road junction a pen a Plate kigumang a, LSC te’n a gutute mawhpaih thu puang kawm in agutu leh aleitu in tuban ni 2 sung in LSC khu a pekik ding in L Paukhanthang, President LSC in theisak hi.

PTC Unit thak hongkhia

Lamka, Aug-16: L.Tualkhanhau, President, PTC Gen HQ in zan in V.Munhoih PTC Unit thak hongkhia a, V.Tualzakhup, President, PTC New Lamka block in vaipaw thak dingte mipi ma ah puklak hi. Unit President thak M.Pauzagin, Vice President -Tualkhanneng, Secy - T.Thangliansiam, Asst Secy -T.Pauzakham, Finance Secy-Pausuanmang, Treasurer - Tualzathang hi uhi.

BSF te’n thaukap hun ding behlap

Lamka, Aug-16: STC BSF CCpur a training te’n Aug 0l, 2012 akipan zingsang dak 5.00 apan in nitak zansawt tanpha Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah long/short/grenade leh 51-mm mortar   kap(firing nei) uh a, Aug 13, 2012 akipan ahun behlap in Aug 31, 2012 tan hidin ahun behlap uhi. Huai hunsung in a kimnai a khua omte apan mihing kuamah huai area a lutlou ding leh ganvulh leng huaimun a lut dia kuama’n khahzanlou ding in DIG, STC/BSF in theisak   hi.

Mission Conference kipan

Lamka, Aug-16: EBC Lamka North Divn saina in tuni’n Lailam Veng a Bethel Baptist Church ah ‘Mission Joint Prayer Fellowship-cum-Annual Planning Conference’ kipan a, Rev T.Lalzagin, DS, Lamka North Divn. in hongkhia hi. Huai ah S. Vungminthang, Director of Missions, EBC in Pathian thugen a, EBC Lamka North Divn, nuai a khua tamzaw akipan Tualsung Missions Committee (TMC) member-te tel uhi.

‘Workshop on acting & filming’

Lamka, Aug-16: SSPP Gen HQ saina in Aug 17&18, 2012 in Bungmual a SSPP complex ah Lemchiin leh Film bawldan kisinsakna ‘Workshop on Acting & Filming’ om ding hi. Huai ah Resource person in Marathi actor & director Alok Rajwande pang ding a, camera maituahdan ding , lemchiin ding dan, film a Director-te adia theihtuak leh pau gelhdan leh paukhiakdan tawh kisai in sinsakna om ding hi. Alok Rajwande ahihleh play leh drama tuamtuam gelh ah leng minthang mahmah a, aman tumalam in Sawai Abhineta Puraskar Award a ngah banah tulel in Bollywood a lut in popular mahmah hi’n kigen hi.

External Affairs Secretary hongzin

Imphal, Aug-14: Ranjan Mathai,IAS, Secretary, Ministry of External Affairs in tuni’n Imphal hongpha a, Ministry of External Affairs a Special Secretary leh Director FD in hongzui uhi. Amau tuni zinglam dak 11:30 Imphal Airport tung uh a, huai akipan Raj Bhavan ah Manipur Governor kimuhpih uh a, huaizawh in Chief Minister O. Ibobi tawh kimu uhi. Nitaklam in Classic Hotel ah Chief Secretary DS Poonia,IAS makaihna in Central official 3te vaidonna   om hi. Aug. 17 zinglam dak 9:30 in Manipur University Central Hall ah ‘International Conference on India and her neighbour’ kichi Conference ah External Affairs Secretary leh a nungzuite tel ding uhi.Huai apan Imphal War Cemetery, Chingmeirong a Assembly Secretariat thak leh High Court complex banah Palace compound a City Convention Centre leh Manipur Film Development Auditorium enkhe ding uh a, nitaklam in New Delhi ah kiknawn ding uhi.

Mun tuamtuam 4 ah bomb puakzak

Imphal, Aug-16: Zan a Independence Day lopni in Imphal khawpi leh akimlak mun tuamtuam 4 ah bomb puak a, hileleng misi leh a liam nasalua omlou hi’n kigen hi.Zan zingsang dak 7.30 velin Thoubal Mela ground ah leilaka kiphumgu hidia gintak bomb 1 puakzak a,bomb hal kithehdalh ziakin akiangnai a paikha mi 4- N Manisana (65) w/o (late) Kalijao of Thoubal Ningombam, AK (O) Sanajaobi (55) w/o O. Ibochouba of Thoubal Wangmataba, Samakanta Das (28) s/o Saiping Das of Silchar Kamraghat tulel a Thoubal a om leh W. Manao (33) s/o Yaima of Thoubal Athokpam Khunou liamzek uhi. Huaizawh zinglam dak 8.30 in Imphal a Sagolband Meinuthong mun ah bomb khat puakzak a, zinglam dak 9.00 velin Khurai Telapati mun a Godown kiang ah bomb khat puakzak nawn hi. Zinglam dak 10.35 velin Yaiskul a Mahabali mun ah bomb khat puakzak a, bomb puakna masapen chihlouh mundang 3 ah a liam kuamah omlou chihthu kiza hi. Thiltung tawh kisai in helpawl tuamtuam 7 kigawmna CorCom te’n Independent boycott a puan dungzui un amau thilhih hi’n puang uh chihthu om hi.

Bus leh Pulsar kiphukha: mi 1 si

Imphal, Aug-16: Sugnu apan Imphal zuan passenger Bus (No. MNS/8027) leh Pulsar khat tuni sunnung dak 1:30 velin Waikhong PS huamsung Lamjao Mayai Leikai mun ah kiphukha ua, huai ah Pulsar atuang mikhat a mun ah si a, midang 1 liam hi. Thusuak kingah dan in misi amin Amos Nula Anal (43) of Khusung Khullen, Chakpikarong PS hi a, aliam pen L. Angku Anal (26) hi a, Kakching Community Health Centre ah etkol in om hi.

MPCC office ah I-day zatna om

Imphal, Aug-16: BT Road a Congress Bhavan ah zan in Manipur Pradesh Congress Committee(MPCC) pawlin Independence Day zang uh a, huai ah MPCC President banah Home Minister Gaikhangam in a thugenna ah Manipur a singtangmite leh phaijang mite ki-it tuahna taktak a om hun ah khantouhna leh muanna om ding ahihdan genkawm in pankhawm hunta ahihdan gen hi. Singtangmite leh phaijang mite kalna ki-itna leh kipumkhatna a om hunhun in Manipur ah masawnna leh khantouhna piching piangthei ding chi’n leng gen hi.

Combined team in 3 mankhia

Imphal, Aug-16 Thoubal Commando leh 15-Assam Rifles kithuah combined team in Aug. 14, 2012 nitak dak 9:30 velin Thoubal Okram area lak search operation a bawlna uah Prepak (PRO) atel 2- L. Anand Singh(30) of Thoubal Keiraobithong Mathak leh Thangminlen @ Abung (30) of Taphou Canan veng, Senapati district mankhia uhi. Amau akipan in Chinese handgrenade khat leh mobile phone 2 mukhia uhi.Mi 2te thudotna apan khat kipuanna dungzui in Lilong Tural Ahanbi Makhong a om Md. Shaukhat Ali inn apan 9mm pistol khat leh atang 5 banah mobile 1, Honda Activa 2, Yamaha 1 muhkhiak hi’n kigen hi. Thudang kizadan in Thoubal Commando te’n zan nitak dak 9:30 in Wangoo Mamang Sabal lak operation a bawlna uah KYKL atel Kh. Raju @ Naobi (25) of Wangoo Mamang Sabal Mapal mankhia uh chihthu om hi.

District HQ tuamtuam ah Independence Day lopna om

State level a I-day lopna ah CM khuallian in pang

Imphal/Lamka, Aug-16: India in suahtakna(Independence) a ngah kum 65 chinna zan in India gamsung pumpi ah kizang a,Imphal a 1^st Bn M/R Parade Ground a state-level a lopna ah Chief Minister O. Ibobi khuallian a pangin India flag a kaihpalh banah March Past apai contingent 30-te apan salute la hi. Chief Minister in Police personnel 6 kiangah Police Medal for Gallantry pia a,Police Medal for Meritorious leng mi 6 mah a piak ban ah Police personnel 1 leng President’s Police Medal for Distinguished Services pia hi. Lamka Public Ground ah leng Independence Day lopna kumdangte sanga thupizaw in zat hi a, huai ah Ms Jacintha Lazarus,IAS, DC/CCpur khuallian in pang a,aman India flag a kaihpalh banah Parade Commander David Piaklian, MPS, SDPO/CCpur makaihna in March Past atel contingent tuamtuam 55te apan salute la hi. Manipur a district HQ tuamtuam Imphal East, Thoubal, Tamenglong,Ukhrul, Senapati,Bishnupur leh Chandel district HQ ah leng   Independence Day lopna om hi.

     Chief Minister in a thugenna ah hibang ni poimawh zatna hun ah India zalenna dia panlate leh martyr-te zahna pia a,huaikawm in amah makaihna Manipur govt in kum 5 vaihawm nawn dinga mipi in a telching uh kipahthu leng gen hi.Kum 10 paisa apan state govt in Centre apan kithuahpihna ziakin development scheme/project tamtak sem hi’n gen a,mipi adia phatuam ding nasep(service) leh vanzat(infrastructure) tamtheipen bawlkhiak state govt in a thiltup poimawhpen hi’n leng gen hi. State Capitol Project atel Assembly Secretariat complex leh High Court complex honkhiak hita a, Civil Secretariat leng kum 2014 sunga zawhsiang dinga ngim hi’n gen hi.Huailou in District HQ 7 banah Jiribam, Kangpokpi leh Moreh a Mini-Secretariat bawl hi a,Mega Project atel City Convention Centre a nasep tamzaw zawh hi a, adang INA Memorial complex leh Khongjom War memorial complex leng bawl hiding chi’n CM in gen hi.

     CM in Manipur gam leitang neuchik himahleh Olympic a telpha International player hunkhop om ahihdan genkawm in Mary Kom’ lawhchinna in India tanpha minthangsak hi’n gen hi. Education, Medical,Electricity, Agri, Irrigation telin deptt tuamtuamte nasep khiak hunkhop leng CM in taklang hi.Huai function ah Minister-te, MLA-te,civil & police a top official-te banah army leh para-military a official tamtak tel uhi. Independence Day lopna tawh kiton in Manipur govt in Sajiwa a Central Jail atang mi 3 khah(release)khia hi.

     Lamka Public Ground a lopna a khuallian apang DC/CCpur in a hinna uh pia tamtakte ziaka independence ngah ahihdan genin amaute zahna pia hi.Olympic Games a medal la Mary Kom in CCpur district mai hilou in India gam pumpi minthangsak a,amah tungtawn in sinlai(lesson) manphatak om hi’n leng gen hi.District khantouhna dingin tupna leh muhkholhna(vision) poimawh a, masawnna ding leh khantouhna dingin mimal’ ngaihtuahna leh thilhih ah leng kinga hi’n gen hi.District sung ah thautui zonna(oil exploration) tawh kisai mipi apan ngaihdan lakkhawmna leng om a,hihna(indigenous culture) mansuah tuanlou in khantouhna phatuam ding ah kihon leng ngai hi’n DC in gen hi. Govt in development scheme tuamtuam sunzom zel a, huai dungzui in village level committee-te leng nasepkhiakna a thuneihna piak ahihdan uh gen hi.

     Education tawh kisai in SSA nuaia SMDC leh village education committee-te nasepna enzui din mawhpuakna piak hi uhi. Govt & aided school a class VII tan free text book leh free uniform piak hi uh a,school 200 ah kumlui tan in toilet bawl hi’n leng DC in gen hi. Singtangdawn tanpha a PHC omte tanpha leng hoihtaka function hi’n gen a, tukum sungin

Thanlon ah Health Mela om din gen hi.Dist Aids Control programme,Malaria control programme,PHED, Electricity leh PWD deptt in leng ahithei tana tam nasem din bituk hi uh a, tukum sungin khua 52 ah solar project piak dia ngim hi’n leng gen hi.

MGNREGS nuai ah kumlui 2012 sungin job-card holder-te ni 100 sung sepna piak hi uh a,IAY nuai ah inn 700 bawlna ding santioned hi’n leng gen hi.BRGF leh BADP nasepna leng paitou zel a, IWMP proeject leng khua 156 huam in project 11 nasepna ding santioned hi’n DC in gen hi. National Social Assistance Programme leh Civil supplies item tuamtuamte Sub-divn HQ leh khaw chih a tunsak ngim ahihdan leng gen hi.CCpur, Singngat leh Henglep sub’divn a Socio-Economic Census pat hi a, huai lawhchinna dingin kuapeuh in information diktak mah ana pechiat din leng DC in ngen hi.

       DC in thu agen zawh in musical performance, STC/BSF-te apan thil tuamtuam lahna, cultural performance banah state tuamtuam a traditional dress kicheidan lahna om a, CCpur district sunga nam tuamtuamte traditional dress a kichei   naupang te'n parade nei uhi. Huai teng zawh in Prizes & Awards hawmna hun ah appreciation certificate 35, red blanket 13, bravary award 2. execellence in sports 2 leh excellence in education ah award 7 hawmkhiak in om hi. Parade kidemna ah NCC ah Bethany Christion H/S Jr Wing, Rayburn H/S Jr Wing leh Rayburn H/S Sr Div. te'n 1^st, 2nd leh 3 rd la uhi. Educational institution a Boys group ah AG H/S, Ebenezar Academy leh Donbosco Hr Sec School in 1^st , 2^nd leh 3^rd la uhi. Girls group ah St Mary H/S, Don Bosco Hr Sec School leh Savior Public school te’n 1^st, 2^nd leh 3^rd la uhi. Stall & Gate bawl ah Sericulture dept, SGSY leh District Council in 1st, 2^nd leh 3^rd la uhi. Tableau competition ah PMGSY, DRDA leh Hort & SC te'n 1st, 2nd leh 3^rd la uhi.

     Programme tangpi zawh in DC-XI team leh Public Leader-te football kimawl uh a, DC-XI team in zou uhi.Lamka a I-day lopna kumdang sangin mipi tam zawtham hi’n kigen a, mipi adia lunglut-huai leh etnop-huai banah flagship programme tuamtuam lahna leng om hi.