Singngat ah Independence Day lopna om

Singngat Public ground ah zanhal August 15, 2012 in Independence Day lopna om a, huai ah Ginsuanhau, MLA(Singngat A/C ) khuallian in pang hi. Rachel N. Guite, MCS, SDO/ Singngat in National Flag a kaihpalh zawh in student contingent hunkhop March Past pai uhi. SDO/Singngat in Independence Day message a simkhiak zawh in Chief Guest in thugen a, Independence Day tungtawn in ki-it tuahna leh kituahna a om deihthu gen hi. Aman Singngat Vision 2020 panlakna pahtakthu gen a, gam puahna dingin kituak taka pankhawm hunta ahihdan leng gen hi. Centre apan NREGS mipite’n phattuampih mahmah a, kuapeuh in ahoihlam a phattuampih sawm chiat dingin hausa(village chief)te tungtawn in ngetna bawl hi.

     Chief Guest in khaw tuamtuam apan hausate puansan pia a, March Past a siampen hihna late kiangah prize pekhia a, Hill Model H/S, Standard H/S, St. Joseph H/S student te’n kipahman la uhi. Sunnung dak 1.30 in SAFA saina in football final kimawlna om a, huai ah MLA khuallian hi a, Guest of Honour in SDO pang a, Functional President in Thangminlien Gangte, OC/Singngat leh Chief Host in Haukholian, Chief of Singngat pang uhi. Huai tournament SCOV in goal 5-1 in S. Vengnuam zou uh a, 1^st Prize Rs. 20,000+trophy sang uh a, S. Vengnuam team in 2^nd prize Rs. 10,000 la uhi. Special Guest Tongkai Baite, MDC in SAFA panpihna Rs. 4,000 pia a, MLA in kidemna atel team teng football pia hi.