Manipur Express

zogam thupuak_logoTem a kidawt om: YPA in mawhpaih

Lamka, Aug 6: Pauzagin (37) s/o Thangzalian Samte of D Phailien tuni zinglam dak 11:30 velin Bungmual’ Lamlian veng ah amah leh amah tem in kidawt hi. Thu kizadan in Pauzagin tuni’n Phailien lam apan paitou in Bungmual’ Lamlian veng a Pi Goihniang Pan Dukan ah khawl a, tui dawn zual ding hi a genkawm in anhuan-inn (kitchen) ah luut suak in huai ah temta kikhepthei(Shillong temta) khat lazok in a diip ah amah leh amah vakidawt hi’n kigen hi.Amah akidawt phetin kikou a, dawr ngak a om Pi Goihniang leh innkim innkiangte’n delh uh a, aman a temta lakhe utlou in taikhiak sawm a, mi phatuam ngaite’n pummat in YPA Bungmual unit makaite’n Dist Hospital tun uhi. Thiltung tawh kisai YPA, Bungmual Unit in ngaihsiamlouh thu taklangkawm in mawhthu puang uh a, bang ziak leh bang thiltup(motive) nei a Bungmual khua minsiatsak sawm hiam chih dotna bawl uhi.

Tualouin YPA Bungmual-te mahin tuni’n Bungmual ah gawtuai gu tangvalnou khat mankhia uh a, amah Henlalson s/o Khaikhothang of Gangte Veng hi’n gen uhi. Amah a kipuandan in heroine addict hi a, amau innsung akipan leng van tamtak guta ahihdan gen hi. YPA makaite’n hibanga gamtang nawnlou dia thuhilhna a neihnung un a innkuante kiangah pekhia uhi.

 tem a kidawtpa-new

Henlalson gawtuai gu-new

 


Khuga Dam a Right-side Canal chimse nawn

Lamka, Aug-6: IFC deptt te’n tuma deuh akipan Khuga Dam Right side Canal ah tui khah uh a, zan zingsang baihtak dak 3:00 velin Khuga Dam apan km 3 vel agamla M.Semuol khaw gei ah tui in Canal phusia in kichim nawn hi. Canal apan tui leh buannawi luangkhiate’n a khanga tuilou (paddy field) nawksuk a, tuilou pari bangzahhiam ah tui leh buannawi pumdim hi. Zan zingsang in M.Semoul khawgei a canal chimsia tawh sim in kum 2008 apan tuni tanin Khuga Dam canal 7 vei tui in phusia in chim hi.Ginsuanhau,MLA (Singngat A/C) in zan zinglam dak 9:00 in canal chipsiatna mun vapha in thil omdan enkhia a, amun a a omlai mah in IFCD Minister Ngamthang Haokip houpih in thil omdan theisak hi.

     Canal jula omte gendan in Khuga Dam Right side canal tungtawn a tui ngahthei ding lou pari 2000-3000 velah tui omlouh ziakin buh suan theilou uh Khuga Dam tui tungtawn a buh suanthei dian kinem taka omlai hibanga canal kichim sia a theih un poisak thu gen uhi. Misao Lhahvom hausa-pu in a gendan in CCpur mipite kinepna omsun Khuga Dam himahleh Canal kingakna tak chinglou in kise pahpah a, IFCD in ni 3 sunga a bawl kei ualeh CCpur district mipite temlou a ngawng tansak banga ngaih hiding a, anngawl a kiphinna leng pat hiding chi’n gen hi.

     Ginsuanhau,MLA in zana Canal chipsiatna mun a phaklai in ex-Minister T. Gouzadou, Minboi Vaiphei, MDC(Haopi Range) Hrila, MDC(Saikot) leh IFCD official khenkhat in zui uhi. Aman Canal kichim chih a theih phet in IFC deptt-te kiang ah canal a tui a khah uh khak phot din theisak mahleh, Spillway a tui khaktanna machine kisiat ziak in zan nitaklam in tui khahkhiakna khawlsak(block) theipan uhi. MLA in a genna ah sepna nei i hihngal leh, i nasepna dan maha sep ding ahihdan gen hi. Aman a genzelna ah huai canal amah sai leh a mawhpuakna hikei mahleh CCpur mipite a khualna ziak in Canal siatna mun enkhia hi’n gen a, Contractor-te leh IFC deptt tawh pangkhawm in canal siatna mun a pucca abawlpah hidin hi.

     MLA in a genbehna ah Dam apan km 20 tan thak 2013) sungin pucca a bawl hidin gen a,

Khuga Dam zattheihna omsun canal ah tui hoihtaka luansak a, tuilou neitte’n kum 1 sung in buh 2 vei a piansak theihna ding un double cropping chiin ngai ahihman in

Chief Minister leh IFCD Minister kimuhpih in genpih ding hi’n gen hi. Dam a Right side Canal chimsia ziaka tui leh buannawi in tuilou ahihsiat teng govt in panpihna (compensation) pe apiakna ding a lading hi’n gen hi. Canal chipsiatna mun ah tuni apan nasep kipan hi’n thutut kingah hi.

 

IFCD Minister in enkhia

Lamka, Aug-6: Ngamthang Haokip, Minister(IFCD) in tuni zinglam in Lamka hongpha a, Khuga Dam Right Side canal chipsiatna mun enkhia a, nitaklam in Imphal ah kiknawn hi. Ginsuanhau, MLA (Singngat) leh IFCD official hunkhop in Minister vazui uhi. Minister in Khuga Right side Canal chipsiatna mun kal 1(ni 6) sunga zahsiang nawn hiding chi’n gen hi.

 

DC makaih in Public hearing

Lamka, Aug-6: Parbung Community Hall ah Aug 8, 2012 in DC/CCpur makaihna Tipaimukh sub-division sung ah leinuai apan thautui om hiam chih zonna ding tawh kisdai a mipi ngaihdan ngaihkhiakna(Public Hearing) om a, huai ding ziakin DC/CCpur in Aug 7,2012 zingsang in Parbung tungsuak dingin zinkhe ding hi. Tuni in deptt tuamtuam apan official khenkhat in Parbung zuan in zinkhia uhi. India govt, Manipur state govt leh Jubilant Oil&Gas Private Ltd pangkhawm te’n Tamenglong district leh CCpur district ah leinuai apan thautui laihkhiak sawm in panla uhi.

New Bazar ah Coin Mela om

Lamka, Aug-6: HDFC/CCpur branch leh RBI/Guwahati kigawm a saina nuai ah tuni’n New Bazar a Bus Parking mun ah CCpur district adia masapen dingin 'Coin Mela' om hi. Huai ah Re 1, Rs 2 leh Rs 5 sik(coins)deihte adin khektheih a, mi tamtak in khek uhi. Mipi sumnen deih a tamluat ziakin Coin Mela in hun sawt daih zoulou khop in lun hi.

 

Mi vaulau kawma sumkhon mankhia

Lamka, Aug-6: Police te’n zan sunnung in Khuga Dam IB leh Khuga Dam a Assam Rifles te’ gate kikal a gari taite leh civilian-te lak ah hiamhei zanga sumkhon mi 3 mankhia uhi. Police apan kizadan in mi 3te New Mata village ngen hi uh a, amaute Chinkhansuan (19) s/o Kamneimang; Thienmuanmang(20) s/.o Khupkhomang leh Lianlallem(18) s/o (late) Tuankhanpau hi uhi. Police-te’n mi 3te CJM court ah dingsak uh a, CJM in Aug 8, 2012 tan Police custody a omding in phalsak hi. Police te’n huai mi 3te tung ah FIR No. 80 (8)2012 CCP PS U/S 384/400/34 IPC & 25 (1-B) A.Act registered uhi.

 

Parade a tel dingte submit ngai

Lamka, Aug-6: Lamka Public Ground ah Aug 15, 2012 a Independence Day lopna om ding ah school tuamtuam apan Parade a tel ding   -Parade commander leh leh flag bearer ding mi’n banah contingent a teldingte min/list kimtak Aug 7, 2012 tan in ZEO office a DI of schools/HQ ah submit ngai hi’n kigen hi.

 

MLA nominee in antang pekhia

Lamka, Aug-6: Tipaimukh MLA’ nomineeSamson in tuni zinglam apan HQ Veng, Lamka West a FCS Godown ah August, 2012 quota PDS antang BPL leh AAY kigawm matric tonnes 370 vel PDS agent-te lak ah pekhia hi. Huai antang teng tuni mahin Parbung area ading in Gari 7 in pawkhia uhi.

 

Systematic voters’ education campaign

Lamka, Aug-6: Election deptt saina in Aug 7, 2012 zinglam dak 11:00 in Tuibuong a District Council Office ah “Systematic Voters' Education & Electoral Participation, (SVEEP) Campaign” om ding hi. Huai ah District Council Member-te tel ding uhi. August 9 2012 in Bishnupur ah huchibang campaign om nawn ding a, August 11, 2012 in Tamenglong ah om ding hi.

 

Suunna

T. Pauzalian(61) s/o (late) T. Vungsiam of Lamphelpat tuni zingsang baihtak dak 1:15 velin RIMS ah cancer in si a, tuni in Chingmeirong Christian Cemetry ah kivui hi. T. Pauzalian bel MTDC a driver semlel lai ahi hi.

 

Mary Kom tuni’n Semi-final ah

Imphal, Aug-6: London Olympic, 2012 ah zan(Aug 5, 2012) nitak dak 6.30 in Boxing beihna 51 kg category ah MC Mary Kom in 19-14 in Poland mi Karolina Michalczuk zou in Quarter-final kai a, tuni nitak dfak 6.30 in Tunisia mi Maroua Rahali tawh Quarter-final ah a kibaihna uah 15-6 azou in Semi-final kai hi. Aug 8, 2012 nitak in h Britain mi Nicola Adams tawh kibei ding uh a, MC Mary Kom in a zawh leh FINAL kai ding chihna hi.

Tuni’n Cabinet meeting om

Imphal, Aug-6: Chief Minister’ Cabinet Secretariat ah tuni nitaklam dak 3:00 apan in Cabinet meeting om a, huai ah Manipur ah vuahtui tawm ziak a, lou bawlmite’n haksatna a tuah uh panpih ding tungtang genkhawm uhi.Tui taksapna ziaka buh chiin theihlouhna loumunte ah tui piakna dingin pump set 400 hawmkhiak ding in thupuk uhi. Buh chiin haksatna ding loumun acres 35,500 vel ah havai,vaimin,ankam leh rabi crop chituamtuam chiin ding in genkhawm uh a, huai nasep khiakna dia Action Plan ah Rs. 11.05 crores bei ding in tuat uhi.Huai ding RAVY apan sum ngaihtuah hidin leng thupuk uhi.

         Cabinet meeting ah Aug 9,2012 in Manipur govt leh India govt in KCP(MC Lallumba) te pawl tawh peace talk nei ding uh ahihdan genkhawm uh a, SoO group atel UPF leh KNO a pan palaite’n Union Home Ministry makaihna in state govt official te tawh Delhi ah tunung in meeting nei ding uh chihthu leng gentyel uhi. KNO/UPF in Manipur govt leh India govt tawh SoO a puan uh Aug 20, 2012 tan daih ding hi a,tunung a meeting ah ahun behlap ahih gintak huai hi’n kigen hi.

 

Chief Minister in kipahthu puang

Imphal, Aug-6: England khawpi London a Olympic Games ah India team atel Manipur mi MC Mary Kom in tuni’n kg 31 category Boxing kidemna ah Tunisia mi Maroua Rahali nuamtak in 15-6 in zou a, semi-final kai hi. Huai tungtang ah Manipur Chief Minister O. Ibobi in Mary Kom kipahpihna thu puang a, a lawhchinna in Manipur mipi taiwsang hi’n puang hi. Aman MC Mary Kom maban a kidemna omlai dingte ah vualzawhna tang in Gold Medal tawh hong tungkik ding a vualzawlna thuthak kawm in amah ah kinepna sangtak nei ahihdan leng O.Ibobi puang hi.

Nomination paper-te scrutiny om

Imphal, Aug-6 : Imphal East, Imphal West, Thoubal, Bishnupur district leh Jiribam Sub-Division ah Sept. 13, 2012 a Panchayat election om ding tawh kisai in tuni in nomination paper-te etchetna(scrutiny) om a, huai zawh in candidate omzah anuai abang in paisuak uhi.        Sawombung ah Zila Parishad a candidate din 33, Pradhan adin 75 leh Ward Dev member adingin 494 paisuak uhi. Keirao Bitra ah Zila Parishad adin 22, Pradhan adin 60, member dingin 313 paisuak uh a, Jiribam ah Zila Parishad adin 9, Pradhan adin 23, member din 168 paisuak uhi. Lamshang ah Zila Parishad adin 13, Pradhan adin 36, member dingin 258 paisuak uh a, Patsoi ah Zila Parishad adin 20, Pradhan adin 54, member din 301 paisuak uhi. Wangoi ah Zila Parishad adin 24, Pradhan adin 61, member dingin 384 paisuak uh a, Lilong ah Zila Parishad adin 17, Pradhan adin 38, member dingin 313 paisuak uhi. Thoubal ah Zila Parishad adin 30, Pradhan adin 80, member dingin 590 paisuak uh a, Kakching ah Zila Parishad adin 21, Pradhan adin 70, members dingin 426 paisuak uhi. Nambol ah Zila Parishad adin 11, Pradhan adin 32, member dingin 132 paisuak uh a, Bishnupur ah Zila Parishad adin 13, Pradhan adin 26, members dingin 135 a paisuak uhi. Moirang ah Zila Parishad dingin 19, Pradhan din 47 leh member dingin candidate 284 paisuak uhi.

 

Tuni’n Hiroshima Day zang uh

Imphal, Aug-6: Kidoupi 2na(2nd World war) hunlai in US in Japan gama Hiroshima khawpi ah Atom Bomb a khiak ziakun mihing tamtak si a, thil mulkimhuai tamtak om theihgige kawm in tuni’n Indo-Japan Friendship Association Manipur-te saina in Manipur Press Club ah ‘67th Hiroshima Day, 2012’ zang uh a, huai ah Chief Guest in I. Hemochandra Singh,Minister(PHED) pang hi. Huailou in Nambol apan gamlalou a om Maibam Lokpa tang a Japanese Memorial mun ah leng Hiroshima Day zang pawl om uhi.

 

Meltheihlouhte’ bomb paih puak

Imphal, Aug-6: Imphal East a Lamlai PS huamsung a Lamlai Awang Leikai a om Chongtham Zila(55) tenna inn ah zan nitak dak 11:30 in meltheihlouhte’n hand grenade khat a paih uh a Gate bul uah puakzak a, himahleh asi leh liam bel omlou uhi. Chongtham Zila bel Agriculture department a Extension Officer sem hi a, a inn jula bomb paih puakzakte mawhpaihna in tuni in Lamlai bazar ah mipi tamtak sit-in-protest tu uh a, Lamlai a bazar teng leng kikhak hi.

 


Electric ginatlouh ziakin mi tamtak in en theilou

Mary Kom in Tunisia apan Rahali zou in semi-final lut

Indian Boxer MC Mary Kom in London a Olympics Games,2012 a( 51kg category ah) Aug. 5 nitak in Poland mi Karolina Michalczuk tawh a kibeihna uah India mipite kinepna bangin bangin 19-14 a zou in quarter-final lut hi. Aug. 5 nitak in Olympic ah MC Mary Kom atel masaknapen Lamka khawpi ah leng mi tamtak in en nuam in ngak khiukheu ua, nitak dak 6:30 a Mary Kom tel huntak in Starsport ah numei dangte kidemna suak deuh hinapi Mary Kom a telkhak ziak adiam ah Starsport channel ah   khahlou chitchiat uh a, India in medal lakna chance a neih nawnlouhna Hockey kidemna suahna hideih sek ESPN ah suaksak mawk uhi. Huaiziakin, Mary Kom telna boxing pen India in leng thupi ngaih vaklou ahi diam chih theih hial din om hi. Huai mai hilou in Lamka khawpi ah electricity department ten numei boxing kidemna round khat a minute 2 lel leh round 4 tan kia kimawlna om sungin electric meivak 4 vei mahmah mitsak uh a, Deptt te’n Lamka mipite bangmah a mulou uh ahihdan langsak uhi. Huaiziakin, Lamka khawpi mipite pil hun mahmahta ahihdan leng kichian huntawk hi. A khawl hun uh tawh tela minute 10 sung lel a mei 4 vei mitsak chihpen kisimmawhna tawpkhawk ahi a, bangchibang a panlak hoih hita hiam ?

            Aug. 5 nitak a Mary Kom in vualzawhna a tan tawh kiton in tuni (Aug. 6) nitak in quarter-final ah Tunisia apan Maroua Rahali kibeihpih a, Mary Kom in akibeihpih ding a theih ngeilouh ahihziakin round masa ah enkhe phot a, round 2 apan in hoihtak in pang hi. Gintak mah bangin aman 15-6 in nuamtakin zoukhia a, semi-final ah lut hi. Tua tawh kiton in aniampen in leng bronze medal ngah ding chihna hi. Aug 8, 2012 nitak in Semi-final ah Britain mi Nicola Adams tawh kibei ding hi. Mary Kom in 1st round ah Poland mi Karolina Machalczuk a zawh ni (Aug. 5) bel ata phikte’ birthday hi a, tua tawh kiton in a ta phikte birthday ni a a vualzawh kipak petmah hi’n leng puang hial hi. Tua ziakin amah a tate’ kiangah om kei mahleh amah adin ni poimawh mahmah ahi, chi hi.

 

LAMKA MIPI'N LENG MARY KOM KIPAHPIH PETMAH ZAW AHI DING A, HIAI ANUAI ABANGIN MANIPUR EXPRESS TUNGTAWNIN COMMENT BAWL UHI.

 

** Mary Kom khatvei Lamka mipi’n dawr tengteng khak in vaidawn in flag kaipalh sak lehang la. En i vaidawn kei leh kua a vaidawn ding ? Lungliap lou aw Mary Kom, Pathian in hon panpihna ding ahi. -9774747525

 

** May, just go, bite your gold, i’ll click it. Smile ! We wish you from our town, Lamka, you are not forget at all. You are the pride of the people. –BJM MTJ

 

**     MC Mary Kom in Olympic Games a boxing ah gold medal lah di kinem tah in kangah uve. All the best! –Fans of Mary Kom

** Mary Kom et hun phat a light mit…electric dept. te nou zong Olympic a pang ve ua le, na thang siat ule. -8794283597

** Editor, Sir, ME, Mary Kom kichep nil hah light a kichem ho chu lhan kilai san um uhen. Mi jouse lungthum a suh nat jiah uvin. -8974995853

 

** Mary Kom boxing suh et ding kingahla laitah a Manipur Govt. in electric hoih deu a apiahlou uchu ST te adia ki simmawhna liantah ahi. Mary, you never are alone, the whole tribals of your home district pray for you even though the govt. don’t bestowed you the due honour you deserve. –Crazy fans of Mary Kom

 

** MC Mary Kom in tutung London Olympics ah semi-final lut ta hi. Hong lawhching touh zel a Gold medal honglak deihsakthu puak ung. Mary nang ziakin   kisathei ung. Sianin hong vualzawl henla na lungtup mualsuah in chih ka thumna uh ahi. Longlive MC Mary Kom ! –Lun Munluah

** Hip..hip..hurray. Semi-final alut tawh kiton in nulun Mary Kom, bangol a hatna sanatum to Pa Pasian in hing gualjol hen. -8014066472

** Congratulations, MC Mary Kom, we are very pleased to know that you are entering London Olympics semi-final match. We are really proud of you, keep it up! We wish you to come back alongwith Gold medal and flying colours, so that we would be known to the world wide. O Lord, please help MC Mary Kom and take care of her. – M. Lun, T. Muan

 

** Thousand cheers to Mary Kom, you are best of the best.. May God bless you..our best wish is always with you till you return. –Kampu

 

** MC Mary Kom aw na hih hoihlua, 19-14 a azawh nungin 15-6 in na zou nawn a, gold medal honla lai niteh. A hon siamtu Pathian in khawvel ah mite theihphak din hon domsang ahita. Na maban ah hong lawhching tou zel in. Pathian phat in om hen! –Jimmy Tonsing

** Kareisei..MC Mary Kom, thupi in hat leh siamna mahmah chia maw…Na kibeihpihnu Karolina nangsang in adin a sang zawna a, nuamtak in na zou thou voi (na hatlua a, light inle honlau hinteh), 2vei, 3vei bang hong mit mantel, TV akonna et sung inle). Well done..Gold medal honla lai in. Na chi, na sa ten inn nongtun kal honna ngaklah lua ung, hon vaidawn nuamlaw zok ka hi uh. –Joy Lalbawi

 

** Ash! A langnu alien gengon thimna a chu Mary Kom afel ie ka star bontop. -9615186133

 

** MC Mary Kom akisak chet leh electric nuoi kipan. Eiloi hi bang in ei gel ta puou Manipur ten. LST-Lamka standard Time in ahun diktak hun sulang zel un, inverter a et di himai, electric let them di what ever they like. -9856379926

 

** MC Mary Kom mahmah, na kibeihpih nu sang in neu zaw le chin le na siit huai hetkei aw. Na khut lah kingang, TV a konna et leh zou chin a, na kibeihpihnu kha, ka kipaklua a ka khasiat thabang asuak top’s. Gold medal is for you. – Annie, Sawmii

 

** Manipur govt. jumlou e…India numei boxer Manipur mi MC Mary Kom boxing sukna a home govt. in electric 15 minute nasan piakna chang helou. India mi aki play lebon advertisement hon cancel sek a, gold medal ahonla thouthou di. –LMS Th.

** Congrats, MC Mary Kom, i thumnate Toupa’n hon ngaikhia a, anawn chiah le nong vualzawh touh zel a gold medal tawh inlum nong kik ka thumna ahi. Mary i biak Pathian in hon ompih den hen. –MC Silva Mangte

 

** Mary Kom in gold medal la ding ahihmanin eiten a vaidawnna ding program na bawlta le, akimawl chiah mei hoih loupen poilua. -9401644540

 

** Mary Kom kimawl hun akimawlpih ding nu leh a tanchinte uh a chiang semin hong tuang zel le maw, Sports column longlive. –K. Ngaihte

** Atom bomb in Hiroshima a den poi kasa kei, Twin tower kisia le nna kasa kei, singtangmi Olympic akimawl thei ineihsun Mary Kom Manipur Govt. in a phawklouh luat uh nna kasa zaw. But, lunglel ken Mary, we are on your side. –Goulal te pata

 

** Mary Kom mahmah vualzou zel din ka deihsak lua. –MCK

 

** Mary Kom mahmah, semi-final kaita, lets pray for her that she came back with a gold medal. The Lady with the golden fist, longlive Mary Kom. -8014066472

 

** Pathian in i thumnate uh hon dawng a quarter-final apan semi-final ah i lutta uhi. Halleluiah! Nu MC Mary Kom aw, i maching uah Sian in hambang hon huai ding a vualtung vabang i tuang ngei ding uhi. Takheh! –Sang

 

** Euro khawng ah i panpihten a zawh chiang ua i kikou vakvak sang un i sanggamnu uh Mary Kom a vualzawhna ah kikou zaw le maw ? Euro a ten la chu hon nakphok phaklouh-louh di uh tawh maw ? All India gam su min liansak tu, ei ten i neih uh nak kipahhuai hilou? Come lets join and cheer our Angel Lady. Longlive Mary Kom, may God bless her. –Goloxog-12

.

zogam thupuak_logoThautui zonkhiakna dia leivuh tungtang genkhawm

Lamka, Aug-4: India govt, Manipur state govt leh Jubilant Oil & Gas Private Ltd pangkhawm a panlakna nuai ah Tamenglong district leh CCpur district ah leinuai apan thautui lakkhiak sawmna tawh kisai in tuni’n DC office a BRGF Resource Centre ah DC/CCpur inntekna in joint discussion om hi. Huai ah Dr Chaltonlien Amo, Chairman, Hill Areas Committee(HAC); T.Manga Vaiphei,Chairman/MTDC; Vungzagin Valte, MLA banah Public leader-te leh student organisation tuamtuam apan makaite tel uhi.

     Joint discussion hunsung a thugen tamzaw inManipur singtanggam a leinuai apan thautui lakkhiat ding deihlou in gam leh leitang kepbit poimawhzaw sakthu gen uhi. DC/CCpur in a genna ah CCpur district apan thautui lakkhiat ding thu kigen nailou a, thautui omleh omlouh theihkhiat ding chihthu hizaw chi’n gen a, thautui omleh omlouh theihsuahna din bel maban kum 4 apan kum 8 sung bang hunlut theilai ding chi’n gen hi. CCpur district gam leitang akipan thautui laihkhiakna ding tawh kisai ahihleh mipi’ phalna tellou in thil hitheilou ding hi’n leng gen hi.

     Tuni a discussion ah Jubilant Oil and Gas Private Ltd. te’n presentation pia uh a, huai zawh in thil omdan genkhawmna in zui hi. Civil Society tuamtuam apan makai paikhawmte’n Oil exploration tawh kisai tualsuak mite a ma a hilhkholhna, theihsakna leh lemsakna tellou a exploration process kipan dek lungkimlouh thu leng taklang uhi. ATSUM President lui John Pulamte in a genna ah discussion a paikhawmte nangawn in a thu theichian lou ahihna ah Parbung ah Aug 8, 2012 a Public Hearing om ding ah Manipur Pollution Control Board te a kuan uh bang ahia a poimawhna chi hi.

       Chairman, HAC in a genna ah a thu kuamah kiminlou leh Chief/Village Authority/Council/ Public leader-te tanpha donglou a Jubilant Oil and Gas Private Ltd in a nasepna uah lungkim huailou sakthu genkawm in awlawl athu mipite theihsiamsak poimawh lai ahihdan gen hi. Jubilant Private Ltd-te’ thil paipihdan pen a Oil exploration technical lam hizaw a, Civil Society- te ngaihtuahna pen gam leitang humbit hizaw chi’n gen hi. T. Manga Vaiphei in Henglep bial mun khat ah Oil explore theih ding om a, tuamun ah kuamah omlou ahihman in huaitan lampi tunna ding company in bawl ding hia ahihkei leh govt in bawl ding hiam chih dotna pia hi.       

     Vungzagin Valte, MLA in a genna ah tualsuak singtangmite’n a leitang tung ua thunei ahihdan uh a gen a, Lalhmangpui MDC in kou gam ah bangchidan a hibang a na hongsem na hi ua chi’n dotna bawl hi.DC/CCpur in dotna a dawnna ah hausate’n gam khelh aphal kei ua leh govt in ngaihtuah ding chi’n dawng hi.

     ZHRF Chairman Siamzading Valte in Manipur Hill Areas Regulation Act, 1947 dungzui in Hausate’ gam neihdan leh Indian Constitution 371(C) dungzui in singtanggam ah state govt in thil banghiam a sai aleh Hill Areas Committee apan theihpihna leh phalna omloupi a thil hih a sawm aleh huai thil diklou ahi chi hi.

 

AC to DC in NFCH sum pekhia        

Lamka, Aug-4:National Foundation for Communal Harmomy(NFCH) te’n namkal buaina ziaka tagahte’ laizilna dingin panpihna sum a piak uh sutzopna in verification kizouthak student 36te lak ah Maniram Sharma, IAS, AC to DC/CCpur in tuni zinglam dak 11:00 in DC office ah cheque in sum pekhia hi. NFCH tungtawn a panpihna ngahding verification zawh nailouh student 25 te’n DC/CCpur kimuhpih ngai ding hi’n thusuak kingah hi.

 

DC apan phalna lak ngai    

Lamka, Aug-4: 80-RCC BRTF te’n CCpur Govt College kong a IB Road-Tipaimukh Road junction mun Tipaimukh Road lam ah Culvert bawl thak uh a, DC/CCpur in huai Culvert nuai ah tuilong (pipe) leh cable gui kuaman paisaklou ding in theihsakna bawl hi. Huai culvert nuai a tuilong leh cable gui paisak nuam govt agency leh mimal te’n DC/CCpur kiang ah phalna (permit) lak ngai ding hi’n DC in order suah hi.

 

Addl SP/CCpur kisuan ding      

Lamka, Aug-4: Y.Ashok Kumar Singh, MPS tulela Addl SP/CCpur in i/c CO, Home Guard (VA) lending in govt in order suah a, aman Imphal ah joining report pia a, Aug 5, 2012 in SP/CCpur kiang ah charge pekhe ding a, huai zawhin Imphal zuanding hi’n thusuak kingah hi.

 

Magazine thak honna om              

Lamka, Aug-4: Gangte-pau leh English kithuah ‘Huihchiim (Bi-lingual) magazine thak tuni in Chiengkonpang Community Hall ah Ng Joseph Gangte, IRS, Dy Commissioner, Income Tax in khuallian hikawm in hong a, Rev. K.Mawia, Executive Secretary, GBA in Pathian kiang ah lan hi. Chief Guest in ‘Huihchiim’ magazine pankhetute pahtak thu gen a, huai tungtawn in midangte’n Gangte pau zilding ahihdan leh magazine tungtawn a literature khangtou in nam tawisang ding hi’n gen hi. Editorial board te’n maban kum tamtak daihdia panla ding leh gam tuamtuam a omte’ ettheih ding in internet a khahkhe din hasuan hi.

 

Kuki Black Day ading flag

Lamka, Aug-4:Tuibuong a KIC office ah tuni zing dak 8:00 in Sept 13 ‘Kuki Black Day’ a zatding flag honna om hi. Huai ah Atong, President KIC in flag hongkhia in Rev Thangkhomang Vaiphei, KCC in Pathian kiang ah thumna in lan hi. Kuki namsung a inn om tengin huai flag a neih uleh zatvek ding a kibawl hi’n kigen a, inn 1 in flag 1 zel Rs 100 in leitheih ding hi’n kigen hi.

 

Food business operator-te’n form lak ngai

Lamka, Aug-4: CCpur dist sunga food business operator adiak in Hotel leh dawr a nektheih zuak te’n Supreme Court thusuak dungzui in ‘Food safety and standards Act, 2006(34 of 2006)’ tawh kisai in CMO office ah form la in fill-up banah registration bawl dingin Dr HL Liensang,Designated Officer(food safety)/CMO CCpur in food business operator te’ theisak hi.

 

Sumkuang kg. 14 agik mankhia

Lamka, Aug-4: Thanlon sub-divn a Saichang khawnuai a Loupum khua apan pasal 1 in Aug 1, 2012 in ‘Tuipi-lui’ ah Sumkuang chi khat ‘Tuisumkuang’ ahihkei leh Kawlnem (turtle) kichite khat kg 14 agik mankhia a Khawmawi ah zuak hi. Lunkhokap of Chiengkonpang in huai Kawlnem kg 1 ah Rs 100 rate in leikhia a, zan nitak in Lamka tunpih hi. Huai Kawlnem naupangte’n mu ut in deihthawh mahmah uh a, khawpi sung mun tuamtuam ah mipi’ muh dinn kai vialvial uhi. Lunkhokap in a gendan in ‘Kawlnem’ pen zuaksawn dia alei hilou in mehdinga a leikhiat hi’n gen a, ngasa(fish) sangin Kawlnem sa limzaw ahihdan gen hi.

 

Gari in Bazar shed phusia  

Lamka, Aug-4:Tuni zinglam dak 8.00 velin Damkam Bazar ah Police Gari khat lutdia kisalai tazoulou in a lutna bul a marketing shed phusia chihthu om hi. Bazar nupite gendan in Police Truck rong dum(blue) atuang te’n Damkam bazar ah tailut sawm uh a, alut zawhlouh ziakin asung atuang Police personnel-te’n lutlou dingin driver khou mahle uh driver in tailut teitei sawm in bazar shed phusia hi’n gen uhi. Bazar neitu B. Kamkhanthang Ngaihte in hibanga Police-te gamtatna haihuai sakthu gen a, thil omdan hoihtak a enchian a, ngaihdam a ngetkei ua leh Dan tawh kituaka panla ding hi’n gen hi.

 

Punjab & Sind Bank ah PO ngahthak  

Lamka, Aug-4: Lalsuanmang Naulak s/o N. Chalthang of Zoar veng, Bungmual tulel a New Delhi a om leh Paodoulien Singsit in zan a Punjab & Sind Bank Probationary Officer(PO) lakna ding result suak ah lawhching uhi. Lalsuanmang in tulelin Gurgaon a IBM ah sem hi’n kigen hi.

 

Imphal West Police te’n drive sunzom

Imphal, Aug-4 : Imphal West Police te’n Gari( 4 wheeler) a film vom(tinted glass ) kithuah beisak sawm in special drive a pat uh sunzom touzel uh a, tuni in leng huchibang garite check uhi. Gari a glass vom thuahte man(detained) in sum liausak uh a, tuban kuaman Gari glass ah rong vom thuah nawnlou ding in vauhilh tawh thuah uhi.

 

MPCC in MDC 2 suspend

Imphal, Aug-4: Manipur Pradesh Congress Committee(MPCC) thusuak dungzui in Minboi Vaiphei,ADC Member(Haopi Range Dist Council Constituency) leh Sumlianthang,ADC Member(Lanva Dist Council Constituency) in tumalama Manipur Assembly election omlai in party kalh a gamtat ziakun Congress party a member ahihna apan suspend in om uh chi’n MPCC in order suah uhi. Huai order ah Victor Keishing, Gen. Secretary i/c District Council, MPCC in suaikai hi.

 

Commdando te’n Prepak 1 man

Imphal, Aug-4: Thoubal Commando te’n zan in Naranseina bazar lak operation bawl in Prepak (PRO) atel K. Anand Meitei (43) of Khumujamba Meitei Leikai mankhia uh chih Police thusuak in gen hi. Commando pawlin amah akipan in 9mm pistol 1 leh atang 4 mukhia uhi.Huailouin Thoubal Commando leh 42-A/R ten zan in Pallel bazar lak operation a bawlna uah Prepak(PRO) atel self styled 2nd Lt K. Surchandra of Kakmayai Leikai mankhia ua, amah akipan in 9mm pistol 1, atang 5 leh Chinese hand-grenade 1 mukhia uhi. K. Surchandra in Bishnupur leh CCpur dist enkol hidanin Police thusuak in taklang hi.

 

Taxi tuahsia ah mi 3 si, 6 liam

A tanu sih atheih sawtlou in amah leng si

Aizawl, Aug 3: Aizawl’ Bungbangla a suanglakna mun bul ah zanin Taxi accident om in mi 3 si in passenger 3 mah liam uhi. Misite leh liamte Aizawl Civil Hospital tut hi ua, a thu zakphetin Chief Minister Lal Thanhawla in hospital vapha ngal hi. Accident a sihna tuak ahihleh Upa Zorammuana (60), atapa Zosangliana (driver) leh Vansangzuali (50) te hi uhi. Zorammuana leh atapa ahihleh a mun ah si ua, Vansangzuali ahihleh hospital tut ahihnungin tu nitaklam in si hi.

Zorammuana leh a tapa luang ahihleh a tenna mun uh Serchhip P&E Veng tan tutna dingin Chief Minister in siluang puaknang gari pe ngal hidanin kigen a, lusunna tuakte CM in sunpih mahmah ahihdan puang hi. Vansangzuali luang akhua uh Thingsul tan puaknangin R.Lalzirliana, Home Minister in gari pia hi. Liamna tuakte ahihleh Serchhip khaw mi ngen Nicky Vanlalhriata (6), Lalhlimpuii(17) leh Vanlalmawipuii (36) te hi ua, hospital ah etkol hilel uhi. Lalrinmawia Ralte, Parliamentary Secretary in leng tunitaklam in liamna tuakte damdawi inn ah vehna va nei hi.

Zan a Aizawl a Bungbangla gamsunga menchim ziaka taxi accident om ah mi 3 si in midang 3 liam ua, misite ahihleh pa leh atapa banah Vansangzuali (53) d/o Lalinpuii of Thingsulthiah Diakkawn hi uhi. Vansangzuali sihthu anu Lalinpuii (84) in azakphet in khawphawk lou in kipuk a, kintak a Thingsulthliah damdawi inn tut himahleh zan nitak dak 10 velin si hi. Vansangzuali in tapa kum 30 a upa Malsawma kichi nei a, a pi uh Lalinpuii in a nuta ua a etkol hi a, pharmacy nei in huai ah kivak uh chi hi. Lalinpuii in taksa hatlouhna tuamtuam aneih ziakin Aizawl ah damdawi la dingin a tanu Vansangzuali kuan a, huchih lai a hibang vangtahna va tuakkha hidanin kigen hi.

Vansangzuali sihthu akithan phet in a inn uah mi va pawtkhawm ua, inn te hem a nna asep lai un a a pi uh Lalinpuii buaisia in kipuk ngal hi’n gen uhi. Vansangzuali luang zan nitak dak 6:15 velin a khua uh tung a, a pi uh Lallinpuii nitak dak 10 vel in si zawmah hi. Tuni in nutate hankuang khat ah sialkhop ahihnungin vui in om hi. Nutate’n a tapa/tupa neihsun uh a sihsan ziak un Malsawma in amah chauh in hinkhua zangding chihna suak hi.

 

Re-allocation of Works &

Transfer/posting

  1. 1.B. John Tlangtinkhuma,IAS, ADC/Ukhrul & SDO/BDO Ukhrul and SDO/Jessami in addition as ADC/Ukhrul & SDO/Jessami in addition.
  2. 2.W. Bhaktaraj Singh,MCS, Joint Director(MAHUD) & i/c Director(RD & PR) and District Co-ordinator(MAHUD) in addition as Joint Director(MAHUD) & District Co-ordinator(MAHUD) in addition.
  3. 3.Varhlirsang Varte,MSS, Joint Secretary(Finance deptt/GAD) as Joint Secretary(Finance deptt/GAD) & i/c Director(Small Savings).
  4. 4.Hopeson Chothe,MCS, ADC/Moreh, ADC/Chandel & Executive Director,DRDA/Chandel and Chief Executive Officer/Chandel as ADC/Moreh, ADC/Chandel & Executive Director,DRDA/Chandel.
  5. 5.Joseph Pauline Kamson,MCS, Director(Small Savings) as ADC/Tamenglong.
  6. 6.Neeta Arambam,MCS, OSD/LRC & ex-officio Deputy Secretary(RD & PR/CADA) as OSD/LRC & ex-officio Deputy Secretary(RD & PR/CADA) and i/c Director(RD & PR) in addition.
  7. 7.Kh. Ibotombi Singh,MCS, SDO/BDO Tadubi as SDO/BDO Saikul.
  8. 8.Yumnam Robita,MCS, Under Secretary(DP/Vigilance) as Under Secretary(DP/ACR/Vigilance).
  9. 9.Arambam Valentina,MCS, Deputy Director(SAT) & ex-officio Under Secretary(AR/Eco & Statistics) as Deputy Director(SAT) & ex-officio Under Secretary(AR/Tourism).
  10. 10. Ng. Roben Singh,MCS, Under Secretary(IT/Planning/ACR) & Staff Officer to Chief Secretary as Deputy Director(Tourism) & Staff Officer to Chief Secretary in addition.
  11. 11.Dr K. Shyam Sunder Singh,MCS, Deputy Director(Tourism) as Under Secretary(Health/Eco & Statistics).
  12. 12.Rangnamei Rang Peter,MCS, AC to DC/Ukhrul as SDO/BDO Tadubi.
  13. 13.Kimjalhai Kipgen,MCS, Under Secretary(Tourism) as Under Secretary(Art & Culture/IT/Planning).
  14. 14.DK Thangboi,MCS, SDO/BDO Saikul as CEO, ADC/Chandel.
  15. 15.Kajaigai Gangmei,MCS,SDO/BDO Henglep as SDO/BDO Nungba.
  16. 16.K.H. Leiyaphy Rita,MCS, AC to DC/Ukhrul as SDO/BDO Ukhrul.
  17. 17.S. Kunjakishore Singh, Jr MCS, SDO/BDO Nungba as i/c SDO/BDO Henglep.
  18. 18.Polly Makhan, Jr MCS, SDO(Branch Officer), DC/Ukhrul office & i/c BDO LM Block,Ukhrul as SDC(Branch Officer), DC/Ukhrul office.
  19. 19.Stiff Khapudang, Jr MCS, SDC/LM Block as SDC LM Block & i/c BDO/LM Block, Ukhrul.
  20. 20.Puny Tao Ronai, Jr MCS, SDC(HQ), DC/Senapati office as i/c SDO/Paomata.
  21. 21.KG Daigong, Jr MCS, SDC(HQ), DC/Tamenglong office as SDC9HQ) Tamenglong & i/c SDO/BDO Khoupum in addition.

MBBS/BDS select list suak

Manipur state nominee a MBBS/BDS course sinding lakna ding in June 10, 2012 a Entrance test om July 11, 2012 in merit list puankhiak hi a, tu’n select list leh wait list puankhiak in om hi. Huai dungzui in General category ah mi 60, ST 37, OBC(Meitei) 14, OBC(Meitei-Pangal) 5, SC 2 leh Physical handicaped(ST) 1 telkhiak hi uhi. ‘Eimi’ chihtheihte laka telkha tutan kitheipha leh wait list anuai bang hi uhi.

 

Sl. No.             Roll No.           Name

119                  1889                Hauzakap Singson

212                  3346                Mangvung Thangzalal Haokip

217                  3237                M. Manbiaknem

269                  1825                Grace Chinghoihkim

281                  2163                Jenifer Z. Ngaihlian

291                  5482                Thangniang Thanggoulian Vaiphei

 

Waiting List

Roll No.           Name

5759                Veihoivah

3867                Niengnouchong Kipgen

1431                Chiinhoihniang

3242                M. Philip Gangte

2210                Josiah Mate

 

.

Zogam-ThupuakDLCC leh Social Welfare tawh kisai meeting om

Lamka, Aug-3: DC/CCpur office a BRGF Resource Centre ah tuni zinglam dak 11.00 in Ms Jacintha Lazarus, IAS, DC/CCpur makaihna in District Level Co-ordination Committee (DLCC) meeting om a, huai ah Aug 15, 2012 a Independence Day lopna ding tawh kisai genkhawm uh a, huaizawh sunnung dak 2.00 in DC/CCpur makaihna mah in Social Welfare deptt nuai tungtawna nasepna chi tuamtuamte etzuina leh genkhawmna om hi’n thutut kingah hi.

DLCC-01     Tuni a DLCC meeting ah Indian Independence Day lopna ding tawh kisai a genkhawmna uah CCpur district sunga Sub- divisional HQ teng ah leng Independence Day lopna om ding in thukim uhi. Nehru Yuva Kendra(NYK)/CCpur leh Dist Youth Affairs & Sports office/CCpur saina in Independence Day lopni Aug 15, 2012 zingsang dak 7:00 in Tuibuong Peace Ground apan Cycle rally kipankhe ding a, huaite’ nung ah flagship programme tuamtuam tabluex a kibawl Gari in zuiding hi. Programme zatzawh in kum 35 tunglam a upa public leader- te leh District Level officer(DLO) teamte football kimawl ding uh a, badminton ah leng men’s double leh mix double kimawlna om ding hi.

       Kumdang bangin mun tuamtuam ah Gate bawl hiding a, District Council in Main gate bsawl ding uhi. IFCD te’n Tedim Road-Nehru Marg junction ah bawl ding uh a, PWD te’n Police Station kong a Tedim Road ah bawl ding uh a, Forest deptt te’n Tuibuong Forest gate leh Employment deptt & TD deptt te’n Lanva ah gate bawlding in thupuk uhi. Tukum a Independence Day lopdan kumdang tawh kibanglou in August 14, 2012 nitak in fire-work (kap vak) om ding hi’n thusuak kingah hi.

     DLCC meeting zawh in Social Welfare tawh kisai meeting khat om nawn a, huai ah Old Age Pension Scheme tungtang leh Social Welfare deptt tungtawn a nasep chituamtuam leng genkhawm uh hi’n kigen hi. Huai ah SDO teng, Dist.Social Welfare Officer, CCpur district sunga Bank Manager-te leh business community apan mi tuamtuam tel uhi.

DLCC-02

 

UPA-II term beima in Naga issue hihveng ahih kinem

Innpi thupukna mipite’n gum chiat ni –Nagaland Home Minister

Dimapur, Aug- 3: Nagaland home Minister Imkong L Imchen in Nagate’ adia festival poimawh mahmah Tsungremmong festival zatna ah khuallian hikawm in uap a, mipi ma a a gendanin tutung a Indo-Naga peace talks ah ‘total independence ahihkei leh sovereignty’ tawh kisai agenda himhim genkhawm ahikei a, thil hitheilou ding ahihziak a genkhawm louh a om hi a, himahleh thil hithei ding constitutional agreement bawl ahih ding ziakin Nagaland Assembly in thupukna poimawhtak kila ahi” chi hi. “Mipi’n palai ding a atelching tengin issue poimawhtak ziaka kitawp a sawm leh mipite’n leng i zui diamdiam ding uh” chi’n chial hi.

     Imchen in agen zelna ah Naga political issue tawh kisai in kum 2003 a DAN govt dinkhiak akipan gentouh ngitnget hi a, hiai issue hih vaiveng ahihding deihna ziakin Nagaland a MLA tengin kitawp ding in lemsakna la uh ahihdan leng gen hi. Imkong in a genbehna ah tulel dinmun et in 16 point agreement omsate pansan in constitutional amendment bawl hiding chi’n gen hi. Solution piching a om ding deihna ziakin Nagaland MLA tengin August 6, 2012(Monday) chiangin Delhi zuan ding hi’n gen hi.

       India govt leh NSCN(IM) in kilemna suai akaih hun chiang un tulel a Nagaland MLA om zah 60 sangin tamzaw ding a, Lok Sabha seat leng behlap ahihding banah Chief Minister leh Governor chi a minlawh a om sekte leng mindang piak hita ding uh chi hi. UPA-II govt dinglel term beima ngeiin final settlement omta ding a lam-et hi a, Prime Minister Dr Manmohan Singh in Naga issue hih ven a lunggulhdan leh pan alakdante Nagaland govt in thei in kipahpih mahmah chi hi. Indo-Naga peace talks pailel ah kilemna a om theih ngeingei leh Union Cabinet in huai thu genkhawm in pom(pass) ding a, Parliament ah piaktouh hiding chi’n Imchen in gen a, Parliament in a pass zawhchiangin a min dingin “Naga Political Issue Settlement Law” chih hiding chi’n gen hi.

 

Indian Bank ah PO muthak  

Lamka, Aug-3: Indian Bank a Probationary Officer(PO) lakna ding zan a result suak ah tunitana kitheipha danin Ginthanlian Valte @Lianmawi s/o (late) V. Ngulkhanthang of Vengnuam, New Lamka tulela New Delhi a om banah Phunggoutan Guite @ Tanpu s/o Damsomthang leh Nemngaihlun d/o (late) H. Tunzathang of Vengnuam, New Lamka lawhching uhi. Ginthanlian Valte bel tuma a Indian Overseas Bank a PO lakna ding result suak ah leng lawhching hi.

 

CDSU in Mami CD mei in haltum  

Lamka, Aug-3:Nongja Film Production in Manipuri film ‘Mami’(the Image ) kichi ah CCpur district hihminsiat ahih ziak in CDSU pawl in tuni sunnung in New Bazar a CDSU Administrative building ah Mami CD hunkhop haltum uhi. CDSU te’n khawpi sunga cassette zuakna munte phakual in Mami film dics om teng kaikhawm uhi. CDSU thusuak in a taklatdan in Mami film in CCpur dist nasatakin min sesak chi’n film bawlkhetute mohpaihthu puang uhi. Huai film a numei kizuak(prostitute) in CCpur akipana hi’n a gen ban ah kizuakte’n singtangmite’ puan aten ziakun CCpur district kia hilou in singtangmite teng mualphousak hi’n taklang uhi. CCpur district min mualphousak uh ahihman in Nongja film a producer /director in mipite lakah ngaihdam ngen ding in CDSU thupia uh a, maban ah CCpur district ah film shooting bawlthei nawnlou ding chi’n ‘ban’ puankhum uhi.

Mami-ban-1

 

Mam--ban-2

 

Tuikulh sungah sisa in kimukhia  

Lamka, Aug-3: T. Vunglal (30) s/o (late) T. Khatgin of Zellang veng, Hiangtam Lamka     zan sunnung dak 1.30 velin daileng dinga pawtkhia inn a tunkik nawnlouh ziakin hahtaka zon himahleh nitak zansat nung tanpha in leng muhkhiak hilou hi.Tuni nitaklam dak 5.30 velin naupang khat in Vunglal-te’ huangsung a tuikulh(well) ah tuitung a kilam(floating) thil khat mu a, huai hoihtaka etchet nungin tuikulh sung Vunglal sisa a om aluang kilaam hi’n mukhia uhi. T. Vunglal in hun bangtanhiam apan kingaisia(depression) nei hi’n kigen a, aluang Aug 4, 2012 in kivui ding hi.

 

IWMP training paitou lel

Lamka, Aug-3: DRDA/CCpur saina in zan apan IWMP tawh kisai training om tuni’n leng sunzom uhi. Tuni’n Tuibuong a District Training Centre(DTC) ah Vangai block-te training uh a, K.Hnunliansang, AE/DRDA leh Joycee Lalrinpuii, APO, DRDA te’n sinsak uhi. Aug 4, 2012 in DTC mah ah block teng in joint training nei ding uhi.

 

Private school-te inspection

Lamka, Aug-3: ZEO/CCpur in CCpur district sung block tuamtuam a DI of Schools om teng in amau bial a Private School om teng inspection bawlding in theisak hi. Inspection bawl hun ah building structure omdan zinling(earth quake) hun ah muanhuai hiam, fire-safety hoihtak om hiam, student-te adin numei-pasal zun buk atuam om hiam chih telin thil omdan enkhe ding uh a, ni 10 sunga report pe dingin theisak hi.

 

SSC adi'n Study Group bawlkhia    

Lamka, Aug-2: Mun tuamtuama om Zillai Netizens kichite panlakna nuai ah Zillai (Vaiphei Students' Assn) CCpur Block, Zahawnggroup, Khawvaiphei.com leh Thuhiltu kithuahin July 30, 2012 in Rostad Memorial H/S ah Zillai Study Group kichi pankhia uh a, lawhchingtak in paitouzel chihthu kiza hi. Huai ah SSC saina a Combined Hr Sec Level exam 2012 leh competitive examna tuamtuam adia kisakkholhna dingin Coaching, Sharing leh Discussion neikhawm zel uh a, Study Group a member din tamtak ki-register hi'n kigen hi. Huai Study Group saitu Zillai Netizens-te apan kizadan in SSC exam Centre dia CCpur koih ahih kipahpihna leh huai tungtawn in tamtak in sepna mu a a phattuampih uh lam-etna ziaka a sai uh hi’n gen uhi.

 

NFCH sum hawmkhe ding  

Lamka, Aug-3: National Foundation for Communal Harmomy(NFCH) te’n namkal buaina ziaka tagahte’ laizilna dingin panpihna sum a piak uh sutzopna in verification kizouthak student 36te lak ah Aug 4, 2012 zinglam dak 11:00 in cheque in sum pekhe ding uhi. Huai ah cheque ngah ding student-te’n amau taksa chiat vakuan in a lak uh ngai ding a, midang in laksak theilou ding hi’n thutut kingah hi.

 

SSC exam adin free coaching  

Lamka, Aug-3: Thado Kuki Students’ Union(TKSU) CCpur Govt. College Branch pawlin Staff Selection Commission(SSC) saina a exam om huna telding TKSU member-te khualna in CCpur college ah July 31, 2012 apan kha 1 sung daih ding in free coaching a neih uh paitou zel hi. Huai ah Ministry of External Affairs, Govt of India nuaia Assistant Grade semlel Lalthuoisang Pangamte leh Mark Ngamthangrum te’n sinsak uh a, free coaching ah TKSU member mi 130 vel tel uh hi’n kigen hi.

 

Magazine thak honna hiding

Lamka, Aug-3: Gangte-pau leh English kithuah ‘Huihchiim (Bi-lingual) magazine thak khat Aug 4,2012 sunung dak 2.00 in Chiengkonpang Community Hall ah Rev. K.Mawia, Executive Secretary, GBA in honna leh Pathian kiang a latna nei ding hi.

 

KLA/KNO in mawhpaih  

Lamka, Aug-3:Armstrong Kuki,Secy(Info & Pub), KLA/KNO in thusuah a bawl kimu in a taklat danin Maj Kiran, 46-Assam Rifles (27-Sector, Tuibuong Hq post) makaihna in Aug 2, 2012 sunnung dak 2.00 in KNO/KLA a C-in-C TK Stephen Kuki leh a PSO a potkhiakna mun uah aziak theihlouh in mipi muh a a matkhiak ziakun mawhpaihthu puang hi. Huai hun a ana panpih Kuki Human Rights(women wing) KNO armed wing teng leh top leader teng tung ah kipahthu puang hi.

 

Suunna          

Thangminlian(27) s/o (late) Pumkhup of Colony, Bungmual tuni zingsang dak 7.15 in Chennai a Kilpuak Medical College(KMC) Hospital ah si a, ZYA Chennai region panlakna in siluang buaipih uh a, inn-mun a vui din hong kipaw ding hi’n kigen hi.

 

Tuni’n nomination file hun bei

Imphal, Aug-3: Manipur phaijang biala Imphal East, Imphal West, Thoubal, Bishnupur district leh Jiribam sub-divn ah Sept 13,2012 a Panchayat election om dinga candidate nuamte adin tuni nomination paper file theihna ding hun tawpni hi a, Zilla Parishad seat 60 adin nomination file mi 282 pha a, Pradhan seat 161 telna ding ah mi 713 in nomination file uh a, Ward Development seat 1514 adin mi 4558 in nomination file uhi. Aug 4, 2012 in nomination paper-te scrutiny om ding a,candidate kizukkik nuamte Aug 7 in kizukkik thei ding uhi. Sept 13 in zingsang dak 7.00 akipan nitaklam dak 4.00 tan vote khiak hiding a,repoll a poimawhna munte ah Sept 15 in vote khiakthak hiding hi.Sept 17 in vote sim kipan ding a, election process teng Sept 22,2012 in zawhsiang hiding hi.

 

Minister in pensionte khakna nei

Imphal, Aug-3: M. Okendro Singh,Minister(Education/CAF & PD) in tuni’n a office ah Education deptt a ZEO Zone-1 nuaia teacher sem tunai chin a pension(retired)-te khakna(fare-well) neihpih hi.Huai hun ah Minister in July 2012 khasung a pension mi 27 te khakna hun zatpih a, pension ma a lehkha hihfel nailouh a om mi 8te kiang ah lehkha poimawh teng hihfelsa in pekhia hi.

 

Gas leak ziakin innkang zek man

Imphal, Aug-3 : Keishampat a Sega Road Thouda Babok Leikai a Hueiyen Lanpao office kianga om Electricity dept. a Executive Engineer (retd.) K. Ranjit (62) s/o K. Gunindro inn ah tuni nitak dak 6:30 velin gas leak ziakin a inn uh kang a, Fire brigade-te kintaka sap ahih ziakin inn kangse nasa manlou in meikuang phelhmit thei uhi. Akigendan in gas leak mahleh gas cylinder pen puakzak manlou hi’n kigen hi.

 

Numei sualtu matkhiak in om

Imphal, Aug-3:Pheigakchao Ikhai Maning Leikai Ward No. 4 a om Ksh. Ongbi Devi(28) apaisa June 17, 2012 in Ng. Abothe @ Thapa (25) in anhuanna inn ah sual(raped) a, huaizawh in Thapa taimang hi’n kigen hi. Police ah report himahleh pan a lak pahlouh ziakun numei innkuanpihte’n Young Women Help Volunteer-te kiangah panpih ding in ngen uh a, Young Women Help Volunteer-te panlakna ziakin Aug 1, 2012 in Ukhril district a Poi khua ah Thapa matkhiak in om hi.

            Young Women Help Volunteer te’n tuni’n a office uh Keishampat ah press-te ma ah Thapa kilangsak uhi. Secretary A. Sobila in a gendan in police a report nung ni 3 tan aleng Police in pan alaklouh ziakun June 28 akipan in Young Women Help Volunteer pawlin buaipih uh a, July 29 in Abothe innkuante akipan in amah Ukhrul a om ahihdan theikhia uh a, DSP(Traffic) leh SP/Ukhrul-te apan huhna ngah in Aug. 1, 2012 in mankhia uh hi’n gen hi. Mat a om Abothe ahihleh Moirang police ah piakkhiak in om hi.

Lok Sabha House leader di’n Shinde

New Delhi, Aug-3: Lok Sabha a house leader hihna len Pranab Mukherjee in India President dia telching ahih nungin amun awng a, Congress leader leh MP tamtakte’n AICC Gen Secy Rahul Gandhi in House leader dinmun luah dia a nget lai un Union Home Minister thak Sushilkumar Shinde kiangah huai mawhpuakna piak in om hi. Parliamentary Affairs Minister Pawan Kumar Bansal in a gendan in Prime Minister in tuni’n Lok Sabha a House leader dingin Sushilkumar Shinde guang chi’n puang hi. Kum 73 a upa Sushilkumar Shinde ahihleh Power Minister hilai tuma a Cabinet minor reshuffle ah Home Affairs tanvou piak hi a, amah Maharashtra state a Solapur Parliamentary Constituency apan MP(Lok Sabha) dia telching ahi hi. Amah Dalit(namniam) mi hi a, Maharashtra ah Chief Minister-lui ahih banah MLA in a kizom in term 7 hial ching hi.

 

Transfer/posting &

allocation of works


1.Smt Rothangvung,MSS, Under Secretary as Under Secretary(GAD/Co-opn).

2.Smt E. Binodini Devi,MSS, Under Secretary as Under Secretary(SCERT/Adult Edn).

3.Smt B. Jamuna Devi,MSS, Under Secretary as Under Secretary(Fishery).

4.Smt Saichhingpuii,MSS, Under Secretary as Under Secretary(Vety & AH).

5. Smt K. Subadani Devi,MSS, Under Secretary as Under Secretary(Family Welfare).

6.VS Ramthing,MSS, Under Secretary as Under Secretary(Home).

7.Ramlei Shinglai,MSS, Under Secretary(Adult Edn) as Under Secretary(Relief & Disaster

   Management)

8.P. Anand Devi,MSS, Under Secretary(SCERT/Pension Cell) as Under Secretary(Pension

   Cell).

.
  1. Tipaimukh Road’ Chiangpi ah gari tuahsia
  2. Zogam Thupuak | 03 August, 2012
  3. Zogam Thupuak | 02 August, 2012
  4. Zogam Thupuak | 01 August, 2012

Page 36 of 42

© Copyright 2024 - ZOGAM.COM. Designed by NemaGraphy.