Manipur Express

zogam thupuak_logoMinister in Zocuvos-te bawlkhiak Video Album thak hongkhia

Health Minister kipahpihna leh vaidawnna om

Lamka, Oct-2: Dr. HL Liensang, CMO/CCpur leh Dr. VC Pau, DFWO makaihna in tuni zinglam dak 10.30 apan CMO office campus ah Phungzathang Tonsing, Minister(Health & FW, GAD & CADA) kipahpihna leh vaidawnna kithuah programme om a, huai ah CCpur dist. sunga sem doctor leh nurse-te banah ASHA worker tamtak tel uhi. Minister in scheme thak ‘Janani Shishu Suraksha Karyakram(JSSK)’ kichi CCpur dist. adia masapen dingin  hongkhia hi. Health Minister in huaizawh sunnung dak 2.00 in Rayburn College Hall ah

Zogam Culture & Vocal School (ZOCUVOS) te’n music album thak a bawl uh “Kiphel hawm tiautiau” kichi Chief Guest a pang in hongkhia a, Pastor S.Thanglian in Pathian kiang ah thumna in lan(dedidate)   hi.

         Minister(Health & FW, GAD & CADA) in amah vaidawntu Doctor, Nurse leh Health worker paikhawmte tunga kipahthu genkhawm in nasepna khatpeuh ah uniform bawl ahihleh poimawhna nei a, adiakin health worker-te adingin uniform in poimawhna liantak nei a, damlou te’n a theihkhen theihna ding un poimawh ahi chi hi. Galdou dinga kisa sepaihte’n uniform a silh bang un health worker-te’n leng silh gige dingin hasuan a, huchibangte etmai in leng kilawm hi’n Minister in gen hi. Aman CCpur dist ah JSSK scheme honkhiak theih ahih kipahhuai hi’n gen a, naungek piangtungte’n nasataka phattuampih ding uh hi’n gen hi. Minister in Dist. sunga naungek piangte naubawm piak suak ding tup hi’n gen a, govt. employee-te’n damlouh ni khua in govt. apan sumsen teng ditkik theihna dingin huhna ngah mahle uh sepna neilou te’n huchibang hamphatna ngahlou uh ahihman in miteng in hamphatna a ngah theihna ding un State Illness fund tungtawn in medical re-imbursement a dingin Rs. 4 crores bikhiah hi’n gen a, damloute’n huai fund hamphatpih ding uh ahihdan gen hi.

     CCpur dist. A mun 2 beek ah Community Health Centre(CHC)honkhiak dingdan ngaihtuah hi’n Health Minister in gen a, tulelin Parbung kia a om ahihman in 2 honbeh hileh 3 om ding hi’n gen hi. Aman health worker-te kiang ah hospital ward sungah damloute etkol ahihchiang un Mizoram leh Nagaland banga Nurse leh Doctor-te’n maitaina leh nelhuaina(hospitality) nei din hasuan a, nuihmai tawh damloute’ enkol dingin hasuan hi.

Tuni a Minister   pahpihna leh vaidonna hunah Minister in ASHA worker-te’n vuahzu-daikai nuaia asilh ding un rain coat a puak pekhia a, CMO leh a staff te’n Minister kiangah memento leh pakkhi pia leng pia uhi. Thanlon PHC telin Saikot, Sinzawl, Senvon,  Sagang, Singngat, Henglep, Behiang, Sinzawl leh Parbung CHC apan health worker tamtak paikhawm uhi

       Rayburn College a Video Album honna ah Chief Host in Ms Jacintha Lazarus, IAS, DC/CCpur & ED/DRDA pang a, Functional President in S. Khaikhopau Ngaihte, Jr MCS pang hi. Chief Guest in ZOCUVOS kichi tunung in nam adia gou(asset) hoihtak ahih uh deihsakthu gen a, nu-le-pa te’n kithuahpih chiat dia ngen kawm in ZOCUVOS a tel naupang te pahtakthu gen hi. Aman a genbehna ah DC/CCpur in i gam uh it taktak kawm in comunity tuamtuam teng akibang vek in koih a, tuni tan a deihlou a complain kuamah om nailou ahihbanah thathou taka nasem zel ahihman in pahtak huai sakthu gen hi. Health Mininister in ZOCUVOS te’ kithuahpihna in sum leng pia hi.


Rev Sangkunga inn apan naupang 6 hutkhiak in om

Shillong, Oct-2: Saptuam makai banah Pastor apang Rev Sangkunga Miller in numei naupang a ompihte abawl gentheih banah kipolhpih sek chih report om ziakin Shillong a a tenna inn ah Sept 28, 2012 in matkhiak in om a, mat ahihni apan ni 4 tan in leng court ah produced hinailou in kigen hi. East Khasi Hills a Supdt of Police M Kharkrang in News saite kianga a gendanin Pastor tutan court ah dinsak hinailou a, mat ahihni in natna tuamtuam nei ahihdan leh a damlouhthu gen a, tuni dong Shillong Civil Hospital ah etkol in om chi hi. Police-te leh Civil Society Women Organisation (CSWO) banah Childline te pangkhawmin Pastor pa inn luh hi a, naupang 6 (pasal 2 leh numei 4) hutkhiakin hi uhi.

Rev Sangkunga in Nongrimmaw, Laitumkhrah, Shillong ah New Life Home kichi hong a huai a om naupang 6te Sept 29 in naupang 6 hutkhiak ahi uhi. Numei naupang 4 te’n a gendan un Pastor-pa’n na tuamtuam semsak a, a changchiangin sawk zel a, a taksa utna hih pichinna din leng kipolhpih sek chi’n puang uhi. Numei 2te ngial thagum in a ut hunhun in sualsek hidanin ngawhna om hi.

Aman hostel leh school hong a, naupang 6 te suak-le-sal tukin zang a, hostel a omte’ puan nin sawptu ding a azat banah tuitawi, inn hah leh zattheihna tuamtuam ah zang chi uhi. Tualou in aman saptuam/biakinn khat phutkhia a, New Life Church kichi minvuah hi. Hutkhiak a om naupang 6te khawsak haksatak innkuan apan hi uh a, atangpi in kum 7-14 kikal mi hi ua, a nulepa te uh kiang ah ‘na tate uh lehkha hoihtakin ka simsak nuam’ a chih chiangin a nulepate un leng a kepdingin ana pekhe zel uh hi’n kigen hi.

Naupang hutkhiaka omte Meghalaya–Assam border laka teng hi uh a, zan in naupangte’ innkuante khenkhat Shillong tungta uh chihthu kiza hi. Naupangte tu’n Meghalaya Social Welfare deptt nuai a om Child Welfare Committee (CWC) te’n enkol lel uhi.


Pastor pa khoihsek naupang 4 te 

National Cleanliness Day kizang

Lamka, Oct-2: India gamsung pumpi ah tuni’n Mahatma Gandhi’ pianni ‘National Cleanliness Day’ kizang a, CCpur district ah leng tuni’n govt office tuamtuam, institution-te banah khua leh tuamtuam in National Cleanliness zatna kawm in social work nei uhi. DC/CCpur office ah leng DC makaihna in staff-te’n office campus hahsiang in social work nei uh a, govt office tuamtuam leh institution tamtak ah leng staff te’n social work nei uhi.

 

BSF te’n thaukap sunzom ding uh  

Lamka, Oct-2: STC BSF CCpur a training te’n Sept 16,2012 zingsang dak 5.00 akipan in nitak zansawt tanpha Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah long/short/grenade leh 51-mm mortar a kap(firing ) uh Sept 30, 2012 tan ding himahleh Oct 15,2011 tan sutzop ding in   ahun behlap uhi. Huai hunsung in a kimnai a khua omte apan mihing kuamah huai area a lutlou ding leh ganvulh leng huaimun a lut dia kuama’n khahzanlou ding in DIG, STC/BSF in theisak   hi.

 

Electric leh Internet(broadband)

Lamka,Sept-2: Manipur adia khawpi 2na chih hisek Lamka khawpi ah electric la(consumer) tam mahmah a, consumer tamzaw in electric meivak muh hoihzawkna ding ahih khak leh chihna ziakin electric fee piak leng taima mahmah uhi. Himahleh electric meivak gina taktak thei tuanlou a, a vak sun chiang in leng a minpu maimai a vak in hat zoulou a, electric a kinga a nasemte adin kingakna tak chingthei tuanlou hi. Huchi kala telephone(BSNL) tungtawn a internet(broadband) la mi 2,000 val om a, hileleng internet a vangkim in kise zawmah a,huaiziakin mi tamtak in ‘Photon plus’ kichi private company-te a tawh neithuah lemlum uhi.

 

SDC’ suaigu Jail ah koih

Lamka, Oct-2: SDO/CCpur office gei a Deed writter Thianchinmang Gualnam (64) s/o (late) Jamgin Gualnam of Mission Compound in Sept 29, 2012 sun dak 12:00 velin SDO/CCpur office a SDC suai(signature) a gukziak in Police te'n mankhia uh a, official seal hunkhop leh document tamtak mukhia uhi. Police te’n tuni’n CJM court ah dingsak uh a, CJM in Judicial custory (jail) a omdi’n a thutan khum ziakin Police te’n Jail ah koih uh a, FIR No.105 (9) 2012 CCP-PS U/S 468/471/420 IPC registered uhi.

 

JSY sum kihawm ding

Lamka, Oct-2: District Hospital campus ah Oct 3-6, 2012 sungin District Hospital ah Feb 2012 akipan May 2012 sunga nau 1na leh 2na tan neite lakah JSY incentive sum hawmkhiak hiding a, sum ngahthei dingte’n document poimawhte tawikawma la dingin Med Supdt Dr Paul Ginthang in theisak hi.

 

Singngat Vision-2020 in kipahpih

Lamka, Oct-2: Singngat khua in kum tawn in tui haksatna tuak gige uh a, bialtu MLA Ginsuanhau panlak ziak in Sept 28, 2012 in Singngat khua ah tui pump khiakna ding in machine zang in nasep kipan a, Singngat Vision 2020 makaite’n MLA tung ah kipahthu gen kawm in kuapeuh in nasemte kithuahpih dingin ngen uhi.

UCC emergency meeting

Lamka, Oct-2: United Chiefs Committee member te’n tuni in Red Cross Road a UCC office ah emergency meeting nei uhi. Huai hun ah Block wise a President/Secy tamtak tel uh a, UCC fund tungtang telin thutuamtuam genkhawm uhi. Tuni a meeting ah Oct 3, 2012 apan UCC hih hatsemna ding in Block 10 ah tour paisawm uh hi’n kigen hi.

 

Khawmpi leh Belampu camp kipan

Lamka, Oct-2: EBC Bungmual ah tuni nitak apanin Lamka North Divn EBC kumsim khawmpi leh Belampu camp kithuah kipana, Oct 5, 2012 tan sunzom ding uhi. Huai hunah Rev K Kamchinkhup, Director (Min) EBC in Pathian thu gen ding hi. Upa M Ginzalian Business Chairman in tuni nitak in khawmpi leh camp kithuah hongkhia a, Upa V Ginchinpau, Chairman Divn Working Committee in vaidawnna thu gen a, BYF Zenhang Lamka, BYF Immanuel Hqtrs leh BYF Pearsonmun te’n lapawl sa uhi. Niteng in session 3 om gige dinga, nitak hun ah mipi kikhopna om zel dinga, Oct 5 zing dak 10 apan nitaklam dak 3 tan palai vaihawmna om ding hi.

 

Malaria positive 2 mukhia

Lamka, Oct-2: District Malaria deptt. te’n September 2012 khasung in damlou mi tuamtuam 1404 sisan test uh a, huailak ah malaria vei(positive) 2 mukhia uh a, huaite a vekin PF hi’n gen hi.

 

GM Hall ah Gandhi Jayanti kizang

Imphal, Oct-2: Tuni’n GM Hall ah Gandhi Jayanti kizang a, huai ah Chief Guest in Chief Minister O. Ibobi pang a, Functional President in Phungzathang Tonsing, Minister(Health,FW, GAD, CADA) pang hi. Minister tuamtuam, MLA hunkhop, Chief Secretary banah police leh high ranking official tamtak tel uhi. Huai hun ah Gandhi in a zat non-violence enton chiat ding leh kuamah kikhen tuamlou a ki-it tuah chiat a khawsa ding in CM in kuapeuh hasuan hi.Tuni mah in Congress Bahavan ah MPCC President Gaikhangam makaihna in ‘International day of Non-Violence’ chih thupi zang in programme zang uh a, huai hun ah Gandhi’ lim ah pakkhi piak hi a, Minister leh MLA tamtak tel uhi.

 

Indefinite economic blockade
Imphal, Oct- 2:Manipur govt in TET kisai a thilnget uh limsaklou chih ziakin Joint Committee of Hill District Student Orgns (JCHDO) pawlin National Highway 2 –NH No. 37 leh NH No. 2 ah hunchiam omlou ding in economic blockade patsawm uhi.
State government in Oct 15, 2012 ma in singtanggam a District HQ tuamtuam ah
Teachers’ Eligibility Text (TET) centres a puan kei leh National Highway 2 ah indefinite economic blockade kipan ding chi’n YS Yangmi Khapai, President of TKS(Tangkhul Kantamnaolong Saklong) leh JCHDO thupuangtu in gen hi
       Tuni a meeting zawh in YS Yangmi in Media-te kiang ah genna ah
‘govt in singtanggam ah TET centre hon ding bang haksatna nei hiam ? singtangmite Manipur mi hilou uh a chihna uhiam?’ chih dotna bawl hi.

 

UG group 2 kikapna ah midang 1 si

Imphal, Oct-2: Police thusuak in a gendan in Tamenglong district HQ ah tuni’n NSCN(IM) leh NSCN(K) kikaptuahna kala thautang leng in mistry(carpenter) khat kha in si a, NSCN(IM) 1 leng liam hi. Carpenter sem misi amin Jaikanglung( 43) of Tamenglong part-III hi’n kigen hi. Tuni sunning dak 1.30 velin Tamenglong district HQ ah NSCN(IM) leh NSCN(K) kal ah buaina piang in kikaptuah uh a, huai kala thautang leng in civilian om maimau khat a khak ziakin si a,kikaptuahna a tel NSCN(IM) khat liam hi. (UNA Agency)

 

Kaplup ahihdan ginlelh huaisa

Imphal,Oct-2:Imphal West Commando pawlin tuni zingsang dak 5.30 in Lamdeng Khunou Makha Leikai ah helpawl(UG) khat kaplum uh a, 9mm pistol 1, atang 5 leh hand-grenade 2 mukhia uh chi’n kigen mahleh misi innkuante’n phuahtom(fake encounter) hidan in a gen ziakun vengsung mipite lungkimlou in sit-in-protest tu uh a, public meeting nei in JAC leng bawlkhia uhi. UG hidia ginlelh ziaka kaplup a om amin Th Romen Kumar(42) s/o (late) Th. Mani of Irom Meijrou Mamang Leikai(Imphal West district) hi’n kigen hi.

     Misi innkuanpihte’n a gendan un tuni zingsang baihtak in uniform silh banah galvan tawi mi bangzah hiam Romen Kumar te’ inn a lut in Romen leh a tapa kum 10 mi lumlai Romen pikhia uhi. Huai hunlaitak in Romen’ zi leh a tanu in Shumang Leela en in a omlouh laitak uh hi’n gen hi. Siluang muhkhiak ahih hun ah a puansilh omdan apan leng ginlelhhuai hi’n kigen a, amah pikhiate Police Commandos hidin a innkuante’n gen uhi. Roman in KCP(MC) tawh kizopna a neih ziakun kum 2010 in mat hi a, hileleng huainung in helpawl tawh kizopna neilou hi’n a innkuante’n gen uhi. (UNA Agency)

 

Vai gama teacher sem sisa in kimukhia

Imphal, Oct-2: Amon Rajen(46) s/o (late) Angouba of Kumbi Terakhong Makha Leikai ( Bishnupur dist) sisa in vaigam ah muhkhiak in om hi. Amon ahihleh Chattisgarh a Paradise School a teacher sem, suti zang a innlam hong pai hi a, Sept 23 in atanu Caroline(6) tawh a sepna mun zuan in zinkhia uh a, Sept 24 in Dimapur tung uhi. Sept 25 zinglam in Howrah Railway station apan Chattisgarh zuandia rail ticket lakna counter kong ah a tanu nusia in amah va lut a, a pawt khiak hakluat ziak n a tanu kap a, Meitei khatin vatuak kha in BSF te kiang ah vakoih hi. BSF te’n Sept 26 in Amon innkuante phone in hil;h uh a, Sept 27 in Amon’ zi Binata leh a tanaute 1 in delh uh a, a tanu leng BSFte kiang apan lakhia uhi.

         Kossipur Old Howrah Police station ah Binata in Sept 29 in FIR bawl a, huai a police omte’n Sept 27 ni’n rail station kiangah misi khat mukhia uh ahihdan gen uh a, a va et ua leh Amon ahihdan theikhia uhi.Amon in Sept 25 in a tanaute 1 Jabalpur a Army sem A. Romeo kiang ah phone tungtawn in uniform silh Muslim mite’n vau uh ahihdan hilh hi.

 

SC in Central leh Manipur theisak

New Delhi, Oct 2: Supreme Court in zan in central leh Manipur state govt kiangah security force te’n 1978 apan tunitanin nautang a sang asim that uh chi a hekna om ahihdan theisak a, huai tawh kisai ngentel taka enzui dingin theisak hi. Manipur ah security force-te gamtatna uang khengval leh amau khutlum ah mi tamtak si hidanin Supreme Court ah hekna om hi.

Justice Aftab Alam leh Justice Ranjana Prakash Desai in Manipur govt leh centre govt kiangah thil omdan enzui dingin theisak uh a, hekna bawlte sik-le-tangin court ah senior counsel Colin Gonsalves ding hi. Lawyer minthang Colin in court a theihsak danin security force te’n Manipur ah 1978 apan tuni tanin mi nautang 1,528 that uh chi hi. Supreme Court in panlakpih dia ngetna leh thiltung suiding a ngetna Manipur apan Extrajudicial Executions Victims’ Families Association te’n a bawl uh ahi hi. Amau ngawhna a bawlna uah police leh security force-te khut ah mi nautang 1,528 sita chi uhi.

 

KSO pawlin lamlian repair uh  

Imphal, Oct 2:Kuki Students’ Orgn(KSO) Saikul branch pawl in tuni’n govt in kum tamtak a limsaklouh Imphal-Saikul road repair bawl uhi. KSO te’n lamlian hoihlouhna munte ah feet 2 a sah in lei vuk uhi. Govt in thil omdan a theihna ding uleh student-te lungsim a

‘spirit of voluntarism’ omsak tupna a nasem uh hi’n KSO Saikul branch president Thongzalun Mate in gen hi. Tuni a lamlian repair-na ah KSO makaite’n Model English Higher Secondary School, Thangtong Government higher Secondary School leh VM Nazareth English Higher Secondary School akai student-te chial in na seppih uh a, Saikul post a om 43-Assam Rifles te’n vanzat poimawhte puaksak uh hi’n kigen hi. (UNA Agency)

 

 

 

 

 

 

 

 

LFS ah Text book sikin tablet tawi ding uh

zogam thupuak logoLamka, Oct-1: Bungmual a Lalpuithluaii Foundation School a Pilot Project nuaiah Pearson Book Publishing te’n student-te ading in siamsinna lama masawnna hidingin kum thak 2013 apan electronic vanzat zangkhai mahmah Tablets kichi a zat theihna ding ua sinsakna tuni’n zou uh a, student-te’ leh nu leh pate banah mi poimawh tuamtuam samkhawm in Text book sangin tablets vanzat manphatdan telin tulai technology sangtak hunah hibang vanzat pen student-te’n a hamphat pih theih dingdan uh genkhawm pih uh hi’n kigen hi.

Tablets ahihleh full touch screen hi a, a sungah data a sing a sim koih theih a, student te’n text book giktak a tawi sang un hiai vanzat neuchik tawi le uh limlak leh thil a sinte uh mit mahmah in muthei ding uh a, subject leng huai tablet sungah kimvek dinga, English telin Hindi, Social Science leh Science om kimtak in om hi’n kigen hi.

Thutut kingahdan in tulelin Pearson Book Publishing nuai a Pilot Project te’n Northeast a school 2 ah Text Book tanga tawi dingin Tablets pia uh a, India khawpi tuamtuam a school 75 kia ah huai vanzat kizang pan hi’n kigen hi. Tuma in China a Sichuan Province ah leng school naupang te’n book giktak tawi a school a kai nawnlouhna ding un hibang vanzat hawmkhiak in om hi.

LFS ah kal masa sungin student-te lakah Tablet khoihdan sinsak hi uh a, huaiah Rajiv Singh, Regional Manager, Pearson Longman; Sushi Mita Bose, Editor, Longman Books;Kanhaiya, Engineer te’n sinsak uh hi’n kigen hi.

 

Planning Board Secy di’n Haukhum Hauzel guang

Haukhum-HauzelLamka, Oct-1: Mizoram government in Chief Secretary lui Haukhum Hauzel, IAS (retd) mawhpuakna poimawhtak khat pia a, huai dungzui in Mizoram government nuai a Planning Commission ah Member Secretary dingin guan hi a, tunung sawtlou in huai mawhpuakna la ding hi’n kigen hi. Haukhum Hauzel ahihleh 1974 batch IAS officer hi a, AGMUT cadre ahi hi. Aman Mizoram state govt ah kum 3 val Chief Secretary hihna len hi

Haukhum Hauzel in a nasep(career) patna dingin Delhi government nuai ah Sub-Divisional Magistrate len a, tua zawhin promotion mu in Additional District Magistrate len hi. Huaizawh in Director of Vigilance/Delhi Administration; Additional Sales Tax Commissioner/Delhi leh dinmun poimawh tuamtuam len hi.

March 3, 1981 in Haukhum in Daman District, Goa ah Deputy Commissioner/Collector hihna len a, Union Territory of Dadra & Nagar Haveli ah leng dinmun poimawh tuamtuam alet nungin April 1985 in Mizoram ah suan hi a, department hunkhop ah Secretary hihna len hi. Delhi administration nuai ah hunsawtkuam tak a om nawn nungin June, 1995 in Mizoram ah lutkik nawnin department tuamtuam a Commissioner/ Principal Secretary in om a, hun bangtanhiam Chief Electoral Officer alet nungin August 2005 in Mizoram Chief Secretary dingin appointment piakin om hi. January 21, 2009 in Delhi ah kiknawn a,Delhi govt nuaiah Financial Commissioner len a, April 8, 2012 in Goa ah Chief Secretary dingin suankhiak hinawn a, July 21, 2009 apan in Delhi govt nuai mah ah Financial Commissioner mawhpuakna piak hinawn in Feb 28, 2011 in Financial Commissioner hihna apan service khawlsan(retired) hi.

 

Thanlon A/C ah Christmas ma in meivak tunsak sawm

Lamka, Oct-1: Thanlon Sub-divn HQ tan electric gui zansuak sawm banah Thanlon ah 33/11-KV sub station koihsawmin power dept apan Nanda Kishore, SE(Civil), Hijam Shantikumar EE(Sub station constn Div-I), Th Kamini Mohan Singh EE/TCD-I, T Kaizasong EE (Civil Div 1), Th Bimla Singh AE (Electrical) leh L Nehthang SO (civil) te’n amun va enkhia in zan in Lamka hong tungkik uhi.

            Power dept teamte leh media-te’ kimuhna ah Engineering teamte’n a gendan un  Thanlon A/C ah electric a tunsuak banah hoihtaka meivak paitheihna dingin bialtu MLA Vungzagin Valte hahpan mahmah a,huaiziakin tuni maha nasep kipan ding hi’n leng gen uhi. Pherjawl ah leng 132/133-KV koih theih hiding hiam chi’n enkhia uh a, a lungtunhuai ziakin govt ah recommend ding uh chi’n leng gen uhi. Thanlon leh Pherjawl a zawhsiang hunchiang in Sinzawl leh Henglep ah leng 132/133-KV power sub-station bawl hiding in r official te’n gen uhi. Tulelin Tipaimukh road line ah Chiangpi tan electric tung a, High tension line ahihleh Thingkeu/S Kholian vel apan zan pat hiding a, Christmas ma ngei in Thanlon tan zan tung banah eeelectic vaksak hidin gen uhi.

 

Minister in Album hong ding

Lamka, Oct-1: ZOCUVOS in music album thak a bawl uh “Kiphel hawm tiautiau” kichi Oct 2, 2012 sunnung dak 2:00 in Health Minister Phungzathang Tonsing in khuallian a pang in Rayburn College Hall ah hongkhe ding a, Pastor S.Thanglian in Pathian kiang ah lan ding hi. Huai hun Chief Host in Ms Jacintha Lazarus, IAS, DC/CCpur & ED/DRDA pang ding a, Functional President in S. Khaikhopau Ngaihte, Jr MCS pang ding hi.  

 

MDC leh BDO teng tawh meeting

Lamka, Oct-1: Tuibuong a District Training Centre ah tuni in Langkhanpau Guite, Chairman ADC/CCpur leh Ms Jacintha Lazarus, IAS, DC/CCpur & ED/DRDA makaihna in meeting om a, huai ah MDC teng leh BDO teng banah DRDA staff-te tel uhi. Huai meeting ah MGNREGS tawh kisai MDC te'n 25 % work proposal a piak ding tungtang thu genkhawm uh a, work proposal akintheilam a submit din ED/DRDA in theisak hi. Huai ban ah BRGF leh MSDP thu leng genkhawm uh a, MSDP nasepna BRGF tawh kibanglou ahihman in work proposal piak hun ah side selection tungtang a pilvang chiat ding in DC/CCpur in MDC leh BDO te theisak hi.

DC-Meeting

 

JAC te’n General strike call-off

Lamka, Oct-1: Henkhothang Haokip, Chief of S.Nabil thah ahih lungkimlouh ziaka JAC kibawlkhia pawlin tualthatte mankhe ding a govt phutna in Sept 29, 2012 akipan hunchiam omlou ding in General Strike puang uh a, ngetna tamtak om ziakin tuni apan General strike khawlsak(suspend) uh a, govt in tualthatte a matkhiak tuan kei leh kiphinna chiklai peuh a sunzom thei dia om uh hi’n puang uhi.

 

SBI officer khenkhat kaisang

Lamka, Oct-1: State Bank of India (SBI) nuai a sem officer khenkhat tunai chin in kaisang uhi. Thutut kingahdan in Scale III apan IV a kaisangte Thiankholian Guite, Luaizamang, Shothang Haokip, Henry Tungnung leh Luaihnun hi uh a, Scale II apan III a kaisang Khailun Haokip hi a, Scale I apan II a kaisang T Vumzagin hi’n thutut kingah hi.

 

SDC’ suaigu pasal 1 mankhia  

Lamka, Oct-1: SDO/CCpur office gei a Deed writter Thianchinmang Gualnam (64) s/o (late) Jamgin Gualnam of Mission Compound in Sept 29, 2012 sun dak 12:00 velin SDC, SDO/CCpur office’s signature a gukziak in Police te'n mankhia uh a, amah akipan in official seal hunkhop- DC/CCpur; Executive Magistrate/CCpur, SDO/Henglep; SDO/Thanlon; SDC/Singngat; SDO/SDC Tipaimukh; SDO/CCpur; SDC/CCpur; Lambu DC’s office leh OC/Thanlon muhkhiak in om hi. Suai kaihsa leh blank certificate- birth/dealth certificate 11, distance certificate 16, domicile/residencial certificate 4, study break ceritificate 15, divorce certificate 5, legal wife certificate 6 ban ah document tuamtuam leh file tamtak iron box 1 sunga kikoih mukhia uhi. Zan in Police te'n CJM court ah dingsak uh a, CJM in Oct 4, 2012 tan Police custody ah omdin phalsak a, Police te'n FIR No.105(9) 2012 CCP-PS U/S 468/471/420 IPC registered uhi.

SDC-Suai gu


Mi 6 tuni’n PCG pia uh

Lamka, Oct-1:New Bazar, Phunchawng Road a CCpur district Teachers Assn(CDTA) office ah tuni zingsang dak 6.30 in CDTA pawlin pensioner mi 6te PCG pekhia uh chihthu om hi.PCG piaka om mi 6te 1) Phalkhoching, 2) Denghnun, 3)Lalmalsawmi, 4)Nangkhanpau, 5) Khupchinpau leh 5) Ginzalian hi uhi.

 

Accident ziakin mi 2 liam

Lamka, Oct-1:Tedim Road in a totkhak New Lamka area ah zanhal nitak dak 6.30 velin Pulsar bike leh DI-Tata kipel deklai kihet kha uh a, huai ah Pulsar hektu Lianlalsiam(28) s/o K. Ginkhanpau of G. Mualkawi kipuk in a phepi guh kitan hi’n kigen hi. Huailou in Bungmual Zoar veng ah zan in Auto khat accident a, Kimsangmuan(16) d/o Paukhanlian of Siloam veng, Bungmual akhe leh khut liam hi. Accident ziaka liam mi 2te liam Dist. hospital ah etkol hi uhi.

 

Army te’n HNA 5 mankhia

Lamka, Oct-1: 1/11 Gorkha Rifles leh 46-Assam Rifles kigawm in Sept 28, 2012 nitaklam in Hmar Veng ah Hmar National Army(HNA) 5 mankhia in Imphal Police ah pekhia uh a, CCpur Police te'n a case lasawn uhi. Police te'n zan in mi 5te CJM court ah dingsak uh a, CJM in Oct 2, 2012 tan Police custody a om din phalsak a, Police te'n FIR No.106(9) 2012 CCP-PS U/S 400 IPC registered uhi. Matkhiak a om mi 5te David Lalthangsei (35) s/o Thunrui Hmar of Tinsuong; Robert Lalzarlien (26) s/o Lalzam of Molzuol (Jiribam); Laljadin Hmar (36) s/o (late) Songlienthang of Khawmawi; Solomon Malsawmthang (20) s/o Ralneithang of Khawmawi leh Daniel Lalrochang(22) s/o Moia Zote of Maulien hi uh chi’n Police apan kiza hi.

 

ZOGENE INC. in kipahpih

Lamka, Oct-1: T.Lungzamung s/o T.Gouzadou, ex-Minister in MPSC saina a Manipur Civil Services examna ah a lawhchin ziakin ZOGENE INC. @ John C.Manlun in kipahpih thu puang a, maban ah Pathian pina ziaka lawhchingtou zel ding in leng deihsakthu puang hi.

 

D.Lianminthang hizaw

Lamka, Oct-1: Sim Veng a SYO Hall ah   ZYA Rengkai Unit election om ni a Vice President dia telching a om T.Lianminthang pen D.Lianminthang chihding hizaw hi.

 

Suunna

Pautinlien (63) s/o (late) Suohthang of Chiengkonpang bazar BP stroke ziakin tuni zingsang baihtak 2.30 velin si a, tuni mahin Chiengkonpang hanmual ah kivui hi.

 

Moreh lampi dakkal 24 sung bandh

Imphal, Oct-1: Chandel district sunga Kwatha village Authority te’n Imphal-Moreh lamlian a Chandel leh Moreh kikal dakkal 24 sung bandh puang uhi. Tuni zingsang dak 6.00 in bandh kipan a, Oct 2, 2012 zingsang dak 6.00 tan bandh om dfing chihthu kiza hi.Sept 28, 2012 in Kwatha Lamkhai ah Assam Rifles-te patrolling a pailai un bomb puakzak a, huai ah civilian 1 a sih banah numei 2 liam a, Assam Rifles jawan 2 si in jawan 5 liam uhi.

 

Commando te’n UG hidia gintak 1 kaplum

Imphal, Oct-1:Manipur Police Commando team leh UG hidia gintak khat tuni nitaklam dak 6.30 velin Takyelpat(Imphal West) a Sports Authority of India(SAI) kiang ah kikap uh a, huai ah Commando team in helpawl(UG) hidia gintak 1 kaplum uhi. Thutut kingahdan in Commando pawlin SAI kiangah lamlian ah frisking leh checking a bawl lai un khawl dingin mi khat thu a piak ua leh khawl tuanlou in Commando teamte kap a, Commando pawlin leng kapthuk in kaplum uh chi’n Police thusuak in gen hi. UG hidia gintak pen in Commando-te omna lam ah thautang round 13 kap mahleh Commando teamte a liam omlou hi’n kigen hi.          

       Commando te’n misi luang taksa tung apan AK-47 rifles tan kapkhiaksa(empty saches) 13, 9mm pistol 1 leh atang round 1 leh hand grenade 1 mukhia uhi. Siluang lakkhiakma in Police leh Forensic deptt in hoihtakin enchian uh hi’n kigen hi. (UNA Agency)


NCP office mun kisuan

Imphal, Oct-1: NCP Manipur Unit office zan in Thangmeiband a K. Radhabinod tenna inn akipan in Keishamthong biala Sena Road a Thouda Bhabok Leikai, Tedim Road ah kisuan a, huai ah NCP Manipur unit President thak L. Ibomcha,MLA in October 10, 2012 a office kisuan ding a bikhiahsa himahleh Jana Neta Irabot pianni tawh kituak ding in Sept 30, 2012 a kisuan ahihdan gen hi. Aman a genzeldan in party sunga kituahlouhna bang,mah omlou hi’n gen a, hileleng sum-le-pai zat thelthang ziakin President-lui K. Radhabinod tung ah bel action lak himaithei chi’n gen hi.

 

Combined team in UG 3 mankhia

Imphal, Oct-1: SP/Thoubal in thusuah a bawldan in Thoubal Commando team leh 15-Assam Rfles kithuah combined team in zan sununng dak 1.20 velin Heirok Ngarouthel Urak area ah search operation a bawlna uah KCP(KK Nganba) faction a self-styled Lance Corporal 1 leh

cadre 2 matkhiak hi uhi.Matkhiak a om self-styled Lance Corpotal amin Yaikhom Mangi Singh @ Herojit (28) s/o Y. Chaoba Singh of Nongsum Maning Leikai, Uyumpok hi a, combined team in amah a kipan in 9 mm pistol 1 leh atang 5 mukhia uhi. .

Combined team in search operation sunzom uh a,nitaklam dak 3.20 velin Wangjing SK Leikai apan KCP (KK-Nganba) faction a cadre Ningthoujam Amrjit Singh @ Boicha (24) s/o N. Samo Singh of Wangjing S.K. Leikai mankhia uh a, amah akipan in .22 revolver1 leh atang 1 banah Chinese hand grenade 1 mukhia uhi.Huaima deuh sunning dak 2.05 velin combined team in Yairipok Bazar lak search operation bawl uh a, huai ah KCP (KK Nganba)faction a cadre Ngasekam Rajdon @ Keba (25) s/o Ng. Tharo Singh of Yaripok Top Chingtha mankhia uh a,amah akipan in Chinese hand grenade 1 mukhia uhi. (UNA Agency)

 

NSCN(IM) te’n mi khat kaplum

Chandel,Oct 1: Chandel district sung Tengnoupal biala Lamlong Khullen hausa(village chief)lui Modun Maring(43) s/o(late) in Kh/ Menai zan nitak Pathianni-Seppatni kikal zankimlai in NSCN (IM) hidia gintakte’n kaplum uh chihthu om hi. Siluang post mortem bawlzawh in a innkuante kianga piakkhiak hi’n kigen hi. Modun Maring ahihleh Tennoupal A/C apan MLA telching a om DK Korungthang nungzui(worker) hi a, azi 2na Toningnai tawh omlai kaplup a om hi’n kigen hi.Alu leh a awm(chest) ah thautang lutna ma om a, hiai thu bawl ahihlai tan in bangziaka thah hihiam chih bangmah thupuan zak omlou hi.(UNA Agency).

 

Prepak(PRO) cadre 3 mankhia

Imphal, Oct-1: Porompat PS in a huamkhak Haptta area ah helpawl om chihthu zak ziak in Imphal East Commando leh 28- A/R team in Counter Insurgency Operation bawl uh a, Prepak(PRO) a tel numei 2 leh pasal 1 mankhia uhi. Mat a omte Ningthouzam Yahengbam (o) Pramodini Devi (30) d/o N. Ibomcha of Arong Khunou Mayai Leikai, Ningthouzam Lourembam (o) Sundari Devi @ Thoibi @ Lhingjelthoibi (28) d/o N. Ibomcha of Arong Khunou Mayai Leikai leh Khangembam Raghumani Meitei (55) s/o Kh. Angou of Yairipok Malom Maning Leikai hi uh a, amau apan Lethod shell 4, Hand Grande 1, PEK Explosive 500gm, Electronic detenator leh wire 1 leh mobile handset 3 mukhia uhi. Amau kipuan dan in 2nd Lt. Yaima, tulel a Myanmar a om in Oct 9, 2012 chiang a Prepak(Pro) raising day hun ah security-te khoih(attack) ding in phone tungtawn a thupia hi’n gen uhi.

 

Exam form submit hun bikhiah

Imphal, Oct-1: Manipur University a Controller of Examinations in BA/B.Sc/B.Com/B.Sc Biotech/BSW 1st, 3rd & 5th Semester examination,2012(December) a examination adding tuni apan exam form hawmkhiak kipan a, Oct 10, 2012 sutzop hiding puang hi. Examination form submit hunding a bikhiah dan in 5th Semeser adingin fine tellou in Oct 24, 2012 tan submit theih ding a, fine telin Oct 30, 2012 tan hithei ding hi.3rd Semester adin fine tellou in Oct 29, 2012 tan submit theih ding a, fine telin Nov 2,2012 tan hithei ding hi.1st Semester adingin fine tellou in Oct 31, 2012 tan hithei ding a, fine telin Nov 5, 2012 tan hithei ding hi.

 

zogam thupuak_logoLATSEA in General strike tawh kisai thupuan bawl

Lamka, Sept-29: JAC makaihna in KSO leh ZSF in S. Nabil hausa thattute matkhiak ding phutna in Sept 29,2012(Kiginni) a General Strike a puan uh ngaih poimawh thu Lamka Traders & Self-employed Assn(LATSEA) pawlin puang uhi. LATSEA pawlin bandh/general strike in nitenga nektom zong leh kilawh tawmte banah dukan hong(business community)te’ nekzonna leh khawsakna puakgik tun munlua ahihman in ahitheitan a bandh bawllou in govt tunga lungkimlouhna leh thilphut omte govt tung maha puakgik tunthei ding kiphinna dang zong zaw dingin bandh leh general strike bawl sawm makaite kiangah ngen sek uhi.

       Tutung in leng thil omdan zaksak dinga ngen in hungaih mahle uh bangmah zaksak ahihlouh ziakun LATSEA pawlin dukan hong chiat dinga thusuah a bawl dungzui un kuapeuh ngeina banga dukan hongte tungah kipahthu gen uhi. Himahleh CDSU in ‘nikhat kia kithuahpih’ dia a nget ziakun huai ngetna pomsak in dukan/dawr leh adangdang khaknawn ngai a, huai theisiam dingin kuapeuh ngen uhi. Buaina ding zong pawl khenkhat om mahleh LATSEA in lemna, kituahna leh lungnuam taka khawsak khawm a deihpen hi a, kuama’n vuallelhna lama lalou dingin ngen uhi. LATSEA kichi pawlpi michih leh namchih adia hoihding gelna a phuhkhiak ahi a, thil kiveidan diklou om thei ding leng deihlou uh hi’n puang uhi.

     Maban ah JAC in leng lungsim piching neikawm in mipi hihbuai nawnlou ding lama pan alak uh deihthu LATSEA in puangkawm in tualthatte matkhiakna dia pan alak touhzel uh leng deihsakthu puang uhi. Huailou in tuni a bandh in gahsuah hoihtak a neih leng lam-et thu puang uhi.

 

Gospel Music Video hongkhia

Lamka, Sept-29: YPA Hall New Lamka ah tuni zinglam in Gospel Music Video Album thak ‘JEHOVA SHALOM’ kichi honkhiak hi a, Health & FW Minister Phungzathang Tonsing in hongkhe ding chih himahleh atel theihlouh ziakin a tapa Khanthang Tonsing khuallian a pang in hong hi.Rev.T. Lalzagin Pathian kiangah thumna in lan hi. . Album honna ah lasiam tuamtuam LL Muona, PCL Thuoma, Zaching, Muanching, Vungngaihlun, B. Muan, Donny, Kikim leh Lialian in lasa uhi.

 

General strike om: buaina omlou

Lamka, Sept-29: Henkhothang Haokip, Chief of S.Nabil thah ahih lungkimlouh ziaka kibawl JAC pawlin tualthatte matkhiak ding phutna in tuni akipan in CCpur district ah General Strike puang uhi. Tuni general strike hunsung in buaina bangmah omlou a, khawpi sung Veng/Khua khenkhat ah bel General Strike ahihlam thei banlou pawl leng om veve hi. Volunteer te’n dawr/dukan khaksak in gari tai khenkhat gari chabi laksak uh a, akhaw nung in pe kiknawn uhi.

 

Minister vaidawnna om ding

Lamka, Sept-29: Dr HL Liensang, CMO/CCpur leh Dr V.C Pau, DFWO saina in Oct 2, 2012 zinglam dak 10:30 in CMO office campus ah Health & FW Minister Phungzathang Tonsing kipahpihna leh vaidona kithuah program om ding hi. Huai ah regular staff leh contractual Nurses teng telkim chiat ding in CMO leh DFWO te’n theisak uhi.

 

PhualvaTimes.com website honna om

Lamka, Sept-29: New Lamka Hebron EBC kianga Digi-info Tech ah tuni sunnung in Pastor Dr. HS Chinsuanthang in website thak www.phualvatimes.com hongkhia a, Pathian kiang ah thumna in lan hi. Aman a genna ah website tungtawn in thil tamtak sepkhiak theih hi a, huaiziakin gou manpha ahi chi’n gen hi. Khamsonlian @Joy Ngaihte in Nov 11,2009 akipan mobile phone a SMS tungtawn in News khahkhiakna ding abawl PhualvaTimes kichi tumadeuh apan apan website piching dingin bawl a, zan nitak sawtnung a zawh ahihziakin tuni’n honkhiak a om hi’n kigen hi. Honkhiak zawh phet in internet zangtu tamtakin huai website ah amin uh register pah uh a, tuni kia in mi 100 valin registration bawl hi’n kigen hi. Website enkaitu din Lamka, New Delhi leh Bangalore ah mi 7 om hi’n kigen hi.

 

Jawans Revival Camp

Lamka, Sept-29: 1st IRB Unit Church, HQ Veng,Lamka West apan kithuahpihna zangin Manipur Police Christian Assn Youth Fellowship saina in Oct 2-6, 2012 sung Tuibuong a Christian Fellowship Campus ah ‘Jawans Rivival Camp’ om ding hi. Rev Nguljathang, Local Pastor, CFC in Camp hongkhe ding a, Pastor Elvis Nehlal in thugen ding hi. Camp om sungin councilor in Lunkhosei, MPCA Gen Secy, 2nd M/R pang ding hi.

 

International Day of Older Persons

Lamka, Sept-29: District Social Welfare office saina in Oct 1, 2012 zinglam dak 11:00 in DSWO office ah ‘International Day of Older Persons’ zat hiding a, Chief Guest in Dr H.L Liensang, CMO/CCpur pang ding hi. Huai ah Functional President in A.Umarani Devi, DSWO/CCpur pang ding a, Guest of Honour in L.S Gangte, (retd) Vice Principal/CCpur Govt College pang ding hi.

 

An-ngawl thumkhawmna om

Lamka, Sept-29: CCWF-te makaihna in tuni zingsang dak 7.00 akipan sunnung dak 2.00 tan EBC Zenhang Lamka biakinn ah gam leh nam adia thumkhawmna 4veina om hi. Huai ah saptuam pawl tuamtuam apan paikhawm uh a, amau nek ding sik-le-tang in antang tawikhawm chiat in thumna neikhawm uhi.

 

Oct 1,2012 in class om nawn ding

Lamka, Sept-29:Council of Hr Secondary Education Manipur(COHSEM) in CCE Training programme a cancelled ziakun Rayburn College ah Oct 1, 2012 akipan in regular class sutzop nawn hiding chi’n huai College a Academic Dean in student-te theisak hi.

 

Bukpi EBC biakinn hon hiding

Lamka, Sept-29: Bukpi khua ah Oct. 3, 2012 zinglam dak 10.00 in EBC biakinn thak honkhiak hiding hi. Rev L.Khamkholun, General Secy. EBC in biakinn thak a honkhiak banah Pathian kiangah thumna tawh lan ding hi. Biakinn honna leh lopna zawh in mipi’n ankuang umkhawm ding uh a, huai dingin sial(mithun) 2, vok 1 leh kel 1 gou ding uh hi’n kigen hi.

 

Free Children Medical Camp om

Lamka, Sept-29: Nazarene Compassionate Ministries in India, Voluntary Help Unit Committee, RIMS leh Directorate of Health Services, Manipur pangkhawm in tuni zinglam apan in Hmar Veng ah ‘One Day Free Children Medical Camp’ bawl uhi. Huai ah RIMS apan Dr Emmanuel, PG ENT; Dr Kambiak, Sr Pediatric; Dr Thangjamang, PG Derma; Dr Hage Gunto, Derma; Dr Devdutta, Ophthalmology; Dr Poumei, PG Ophtalmology leh Dr Robert, PG Orthology te’n naupang tamtak en in damdoi leng manbei in pia uhi.

 

ZYA Rengkai Unit election om

Lamka, Sept-29: Sim Veng a SYO Hall ah tuni in Tonglal makaihna in ZYA Rengkai Unit election om hi. President in Anthony Ngaihte, Vice President in T.Lianminthang, Secy in T.Tunchinthang, Treasurer in Upa Paukholal leh Inf.Secy in L.Kapzalam telching uhi. Hunlemchang masa pen in ZYA Rengkai Unit keklet hiding a, huai zawh in ZYA Gen HQ in lalut ding hi’n thusuak kingah hi.

 

SUUNNA

Nemngaihmawi (17) d/o Thang elim of Ngeisok road Vengnuam(S), New Lamka tuni sunnung dak 12.30 velin awklum sa a muhkhiak hi a, tuni mahin New Lamka YPA Hanmual ah kivui hi.

 

CM in Haj Pilgrims a zinte khakhia

Imphal, Sept-29: Saudi Arabia a Mecca mun ah Haj Pilgrims a zinkhe ding Manipur akipan mi 308te tuni’n Chief Minister O. Ibobi in Imphal Airport ah khakhia hi. Tuni a khakkhiak a om mi 308-te lakah numei 188 tel uhi. CM in Haj a zinkhe dingte kiangah a phakna mun ding uh damtaka tung ding leh lawhchingtaka hong kiknawn ding in deihsakthu thukhak hi.

Tuni a CM in a khakkhiake 1st batch hipan uh a, Sept 30, 2012 in 2nd batch ah mi 184 kipankhe ding uhi. Tuni a hunzatna ah Agri Minister banah Manipur State Haj Committee a Chairman Md. Nasir leh State Haj Committee a Executive Member S. Wahida Rehman leng tel uhi.

 

Health leh FW ah Director thak

Imphal, Sept-29: Dr Sh. Surchandra Sharma, Director(Health Services) in voluntary retirement a lak ziakin Sept 30, 2012 in a sepna apan khawl ding hi. Huaiziakin Manipur Health Services(Special grade) a om Dr A. Bijoy Singh,Additional Director(Health) in Oct 1, 2012 akipan in incharge basis in Director of Health Services(in his grade pay) mawhpuakna len ding hi. Huailou in Dr L. Surchandra Singh,Director(Family Welfare) leng Aug 31, 2012 in a sepna apan retired a, huaiziakin govt in Manipur Health Services(Special Grade) a om Dr N. Achouba Singh, Addl Direrctor(Family Welfare) in incharge basis a Director(Family Welfare) mawhpuakna len ding in order suah hi.

 

Prepak 2 apan Lethod bomb 5 mukhia

Imphal, Sep-29:Manipur Police Commando te’n Prepak activist 2 mankia uh a,huaite akipan Prepak(PRO) Raising Day lopna a zat ding lethod bomb 5 kimukhia chi’n SDP/Imphal West in gen hi. Lathod bomb 5te zan nitak dak 10.30 in Imphal West district sung Singjamei Waikhom Leikai ah Prepak mi 2te matkhiakte apan hanotna ‘Fuji powder’ bom sunga kigelgu muhkhiak hi’n kigen hi. Matkhiak a om Prepak mi 2te S Gourashyam Singh (23) s/o S. Ibohal Singh of Kakching Khunou tulelin Naorem Leikai a Narasing Mandir kianga om leh M Amarjit @ Mayamba Singh (44) s/o M. Mangi Singh of Singjamei Wangma Mongkhang Lambi hi’n kigen hi. SDP in a gendan in a tuanna uh 2-wheeler hoihtaka check bawl nungin hanotna bom 15 laka 5 ah lethod bomb selguk a om hi’n gen hi.

                                                                                                                            (UNA Agency)

Narcotic Cell ten khamtheih mukhia

Imphal, Sept-29: Imphal West Narcotic Cell te’n tuni sunning dak 1:30 velin in Thangal Bazar a Shankar Hotel kong ah Md. Nawaz(29) s/o Md. Ibungo of Thoubal Moijing Wangmataba mankhia uh a, amah taksatung apan in damdoi khamtheih No. 4 (heroin powder)gram 30 mukhia uh chihthu om hi.

 

Child Rights Protection taklang

Imphal, Sept-29 : Manipur Child Rights Protection Convenor K. Pradeep Kumar in tuni in Hotel Nirmala ah press-te kimuhpih a, huai ah Sept. 2011-Sept. 25, 2012 sunga Manipur a Child Rights tawh kisai taklang hi. Aman a genna ah Manipur ah Child Rights tawh kisai in case 895 registered hi a, huaite lakaj rape case 11, Child trafficking 38, murder ah 9, suicide ah 1, Child soldier ah 9 leh adangdang case 7 om hi’n gen hi. Displacement ah leng case tamtak om a, Loktak a Phumbi Huts eviction ziakin naupang 800 hihbuai in om uh a, Lamphel Yaipha eviction ah 20 om hi’n gen hi. Huai hunsung in naupang 10 si uh a, mi 38 hutkhiak hi ua, midang 5 muh zawhlouh in om uhi. Child soldier atel mi 4 innlam tungkik uh a,huai a kigolh mi 12 matkhiak hi uh a, mi 6 taimang uh chih ahi hi.

 

Financial assistance nget-theih

Imphal, Sept-29: Directorate of Minorities, Other Backward Classes & SC ah i)Economic Development programme, ii) Skill Development programme, iii)Housing leh iv) Health Scheme adingin financial assistance nget theih ding chihhu om a,huai ngenthei dingin phaijang biala Assembly Constituency 40 huamsung a teng leh khawsa hih ngai hi.

 

Transfer/posting

1.M. Lakshmi Kumar Singh,IAS, DC/Bishnupur as Director of Institutional Finance &    

   Managing Director,Manipur State Co-op Bank in addition.

2.K. Radha Kumar Singh,IAS, Dc/Thoubal as DC/Imphal West.

3.Jason Shimray,IAS, Special Secretary to Governor as DC/Bishnupur.

4.Sumant Singh,IAS, Secretary to Chief Minister, Joint Secretary(Cabinet) & State Project

   Director/SSA & RMSA and Commissioner of Excise is released to join inter-state              

   deputation to Uttar Pradesh state govt.

5.A. Ashok Kumar,IAS, DC/Imphal West as Secretary to Chief Minister & Joint

   Secretary(Cabinet & Confidental) and State Project Director,SSA/RMSA in addition.

6.T. Ranjit Singh,IAS, Addl Secretary(DP) & Director of Institutional Finance and Managing  

   Director,Masnipur State Co-op Bank as DC/Thoubal

  1. LATEST NEWS ON S NABIL HAUSA CASE
  2. Zogam Thupuak | 29th September, 2012
  3. Zogam Thupuak | 27th September, 2012
  4. Zogam Thupuak | 26th September, 2012

Page 33 of 42

© Copyright 2024 - ZOGAM.COM. Designed by NemaGraphy.