Manipur Express

Zogam-ThupuakRifle butt a khet ziakin a nakguh 3 kitan

Lamka, July-25: Tuni nitaklam dak 6:15 velin Bethel khua ah Canter gari 2 a kizui VDF personnel-te laka khat in Lhunkhothang Haokip (48) s/o Jangkho Haokip of Molnom a Rifle tawi butt in 2vei akhet ziakin a nakguh (rib) 3 kitan a, tu’n Dist Hospital ah etkol in om hi. Lhunkhothang in a gendan in tunitak lamin a lawmpa tawh lampi ah khe a pailai Bethel khua ah VDF te canter gari 2 ah kizui tawh kituak uh a, VDF-te laka a a theihkhak mi khat a houpih ziakin VDFte khat gari apan kumkhia in a Rifle tawi butt in 3vei khen a, amah kintakin Dist Hospital puaktung in om hi. Tuni nitak mah in X-ray kila a, huai apan a nakguh (rib) 2 kitan hi’n Doctor te’n gen uhi.

 

Hoihnu thahna ziaka lungkimlou in dharna tu

Lamka, July-25: Ms. Luanneihoih @ Hoihnu(48) d/o (late) Thienkhopau Vaiphei of Red Cross Road zan zingsang in D. Phailian a a dukan sung ah sisa a kimukhia a luang tuni’n RIMS a post mortem bawlzawh in nitaklam dak 3.30 in Lamka puaktung hi a, Red Cross Road a a inn uah puaklut in om hi. Huai apan in New Christian Cemetry, HQ Veng ah kivui hi. A luang tuni’n Imphal akipan in Manipur State Women Commission apan Chairperson I.Ibetombi makaih in member - June Rose Vaiphei, Majidakhan, Iteshwori Devi leh Member- Secretary Meghachandra Sharma in hong zui uhi. Hoihnu sihna tawh kisai in D.Phailian khawsung nupite tamtak kikhawm in Hoihnu’ dukan kong ah sit in protest nei uhi. Amau mulkimna neilou a tualthatte mawhpaih thu puangkawm in govt in ni 2/3 sunga mankhe ding in ngen uh a, Phailian Welfare Committee in leng tualthatte ni 3 sunga mankhe dingin govt ah thutawp pia uhi. Tualthahna ziaka lungkimlou pawlkhat in khawpi sung a dukan omteng khaksak uh a, mun bangzahhiam ah Gari leng khamkhawl man mahle uh thuneitu tuamtuamte’ apan ngetna ziakin gari bel ngeina bang in tainawn pah hi.

       Manipur State Women Commission a Chairperson I.Ibetombi in numeite thanghuai taka thah ahihna tutung apen, amasa hilou hin gen a, hun paisa ah, tualthattu matkhiakna din hun sawtpi lasek mahleh tutung apen mipite leh kuapeuh pankhawmna ziakin suikhiatpah lam etthu gen hi. Tualthana tawh kisai in CCpur Dist Students’ Union(CDSU) te’n Chief Minister kianga meorandum pia in tualthattu(culprit) akintheipen a mankhe ding leh a misi innkuante kiang ah exgratia peding in ngen uhi. Hoihni thah ahihna tawh kisa in Police te’n tuni tan in muanmawh matkhiak nei nailou uh a, tualthahna tawh kisai in FIR No. 72( 7) 2012 CCP-PS U/S 302 IPC registered uhi.

 

Manipur State Women Commission

Vice Chairperson, NYK in Lamka pha

Lamka, July-25: Km. L. Tilotama Devi, Hon’ble Vice Chairperson, NYK Sangathan, Ministry of Youth Affairs & Sports, Govt of India in tuni’n CCpur district hongpha a, zinglam dak 11.00 in Tuinuphai khua ah NYK Work camp 2011-12 a kibawl Youth Club office building hong hi. Huaizawh sunnung dak 2.00 in NYK/CCpur leh Hmar Veng Youth Club saina in Hmar Veng a Playground ah ‘Awareness and Education for the prevention of Drugs Abuse and Alcoholism & Youth Initiative for the publicity of message of peace & development’ zatna om a, Vice Chairperson, NYK Sangathan in thugenna hun zang hi. Huai ah Imphal akipan in Mrs Jackie Ruivah, IAS, Zonal Director, NYKS, Imphal Zone in Vice Chairperson, NYK Sangathan hongzui hi.

 

Accident ziakin Hospital ah

Lamka, July-25: Thangliansiam (8) s/o Janga of Neihsiel veng(Lamka) tuni zinglam in Muolvaiphei ah school kai dinga kuanlai Gypsy khat in phukha a, a mailak liam in a phukha Gari mah in Dist. hospital ah tun hi. Thangliansiam in Muolvaiphei a Mt Carmel H/S ah Class ‘B’ simlel hi’n kigen hi. Huailou in Ginkhanmang(30) s/o Gousuanhang of Gangpijol, kal masa a 2-wheeler in a phutkhak a taklam khepek liam nasia in tuni’n dist. hospital ah etkolin om hi.

 

JNU a M.Phil Entrance Result

Lamka, July-25: Jawaharlal Nehru University(JNU),Delhi a Master of Philosophy(M.Phil) zil ding lakna dia Entrance Test om a result suak a, Lamka lam mi bangzahhiam telkha uhi. Amaute Priscila Niangdeihkim, Zammuanching, Ngaibiakching leh Pumlianmunga hi uh a, kha 1 sungin scholarship Rs 5000 sang ding uhi. Himahleh UGC- Junior research fellow (JRF) hiam UGC-National Eligibility Test for Lectureship (NET) neite’n kha 1 in Rs 18,000 sang ding uhi. Thu kizadan in tutunga M. Phil zil dinga chingthakte NET/JRF neisa ngen hi uhi.

 

UCC pawl in meeting uh

Lamka, July-25: United Chiefs Committee (UCC) pawl tuni zinglam in President Lalboi tenna inn Chiengkonpang ah meeting uh a, maban a panlakdan ding thu poimawh tuamtuam genkhawm uhi. Amau July 28, 2012 zinglam dak 11:00 in President inn mah ah meeting nawn dingin thupuk uh a, huai ah Block tuamtuam a President leh Secretary teng ban ah UCC member te telkimt dingin theisak uhi.

 

Advance Christian Leadership Seminar

Lamka, July-25: EBC, Manipur leh Haggai Institute India, Hyderabad pangkhawm in July 23 apan New Lamka a Dorcas Hall campus ah ‘Advance Christian Leadership Seminar’ om hi. Huai ah EBC saptuam apan Pastor 36 leh heutu tuamtuam 20 tel uhi. Seminar hun sung in Haggai Insitute, India apan heutu tuamtuam in sinsak uh a, July 28, 2012 tan sunzom ding uhi.

 

BSI/CCpur Branch meeting

Lamka, July-25: Bible Society of India/CCpur Branch pawlin July 28, 2012(Kiginni) sunnung dak 1.00 in Presbyterian Synod Hall ah meeting nei ding a, huai ah collector-te sinsakna(training) tawh kisai leh thu poimawh dangte genkhawm ding uhi.

 

Mawhpaihthu leh ngetna thusuah

Lamka, July-25: Lamka Traders & Self Employed Assn(LATSEA) pawlin Ms. Luanneihoih @ Hoihnu(48) d/o (late) Thienkhopau Vaiphei of Red Cross Road sihna tawh kisai in tuni’n Emergency meeting nei uh a, a member pih uh mulkimna beia thattute mawhpaihna sangpen puankhum uhi.Amau pawlin tualthatte kintaka mankhe ding in Police ngen uh a,Dist admn in leng misi innkuanpihte akituahpih jangna dopna(ex-gratia) pe din ngen uhi.

   LATSEA pawlin thupuan a bawlzelna uah Lamka khawpi ah nektom zong tamtak om ahihdan puangkawm in niteng nektom zong dia kuankhe khin, Hotel a nek-le-dawn ding bangkim bawlsa a koihte banah mun tuamtuam apan zin-le-leng hongtung dingte leh azinkhe ding niteng in mi tampi om ahihman in lungkimlouh latsakna a bandh bawl phutphut kichi mipi adia gen vuallouh manna ahihman in kuamah zongsang lou ding in puang uhi. Huaiziakin maban ah kiphinna hiamlungkimlouyh latsakna a bandh bawlsawm kuapeuh in

Phone No. 9856289892,8974225922 & 9615945499 tungtawn in Lamka Traders & Self Employed Assn(LATSEA) pawl theisak masa dingin thupuan bawl uhi.

 

SUUNNA

Hatkhoting @Lumnu (83) w/o (late) Sawngzakhuol of JKT road, Chiengkonpang tuni sunnung dak 1.00 velin teknat in si a, July 26,2012 in Chiengkonpang hanmual ah kivui ding hi.

Zamkhosoi(84) f/o Khaizakap of HQ Veng, Lamka West sungkhawh ziakin tuni zingsang baihtakin si a, tuni mah in HQ veng hanmual ah kivui hi.

 

Guvernor in Bill 7 laka 4 lemsakna pia

Imphal, July-25: Manipur Assembly Monsoon omlai July 9, 2012 in govt bill tuamtuam 4 leh July 3,2012 in govt bill 3 akigawm in Bill 7 passed uhi. Hileleng Manipur Governor in Dan(Act) a puan theih ding in July 20, 2012 in ‘the Manipur Appropriation(No. 3) Bill,2012’ lemsakna pia a, huaizawh July 23,2012 in ‘the Manipur Municipalities(6th Amendment)Bill, 2012’ ‘the Manipur Value Added Tax(1st Amendment)Bill, 2012’ leh ‘the Manipur Panchayati Raj(7th Amendment) Bill, 2012’ lemsakpih(assent) pia hi’n kigen hi. Hileleng bill dang 3 ‘the Manipur Protection of Interests of Depositors(In Financial Establishments) Bill,2012’ ‘the Manipur Professions, Trades, Callings & Employment Taxation(8th Amendment) Bill, 2012’ leh ‘the Manipur Parliamentary Secretary(Appointment,Salary & Allowances and Misc Provisions)Bill, 2012’ ahihleh   lemsakna suai a piak thu zak hinailou hi.

 

Kargil Vijay Divas zat hiding

Imphal, July-25: India leh Pakistan sepaihte Jammu & Kashmir a Kargil biala kidouna ah Pakistan sepaihte a vuallelh uh theihgigena in India in kumteng a zat ‘Kargil Vijay Divas’ kichi Manipur ah leng July 26, 2012 in zat hiding hi.Manipur Secretariat South Block ah July 26, 2012 zinglam dak 11.00 akipan in Manipur govt nuaia Directorate of Information & Public Relations saina in huai hun zat hiding a, Chief Minister, Minister tuamtuam leh MLA-te tel ding uhi.

 

Photo Exhibition tuni’n kipan

Imphal, July-25: Directorate of Advertising & Visual Publicity(DAVP) nuai a Field Exhibition Officer saina in Imphal West district a Mayang Imphal Municipality Hall ah tuni’n ni 5 sung om ding photo exhibition kipan a, Mayang Imphal Municipal Council a Chairperson Th. Raj Mohon Meitei in hong hi.Field Exhinition Officer Gin Gangte in a gendan in ‘Photo Exhibition’ ah Centre in North–east biala development scheme tuamtuam a sepkhiakte lemlak tuamtuam 150 kitak hi’n gen hi.Photo exhibition honna ah Mayang Imphal Municipal Council a Vice Chairperson Smt Leima Devi leh Executive Officer Smt Anita leng tel uhi.

Commando te’n UG 1 kaplum

Imphal, July-25: Lamphelpat PS bial Heinoubok area ah tuni nitak dak 8.20 velin Imphal West Commando pawl leh KCP(City Meitei) pawlte kikap uh a, huai ah Commando pawlin UG 1 kaplum uh a, amah taksatung akipan in 9mm pistol 1, atang 4, Chinese hand grenade 1 leh demand letter 1 mukhia uh chihthu om hi. Kaplup a om amin T. Bobi(32) of Ibotombi of Koirengei bazar hi a, demand letter a puak ah Jt Director(Youth Affairs & Sports) kiang ah Rs. 20 lakhs ngetna kigelh chi’n Police thusuak in gen hi.

 

Hr Sec School 1 chiat koih hiding

Imphal, July-25: Education Minister M. Okendro in Manipur a Assembly Constituency om teng ah govt school(Hr Sec school) khat chiat koih hiding chi’n gen a, education tungtawn in thilhoih leh khantouhna lam a phattuamna om thei liaite ahitheitana omsak hiding chi’n zan zekin Keirao bial aphak hun ah gen hi. Education banah CAF & PD Minister in a genzelna ah Govt om ahih ngal leh mipite poimawh mipite’n niteng a a poimawh uh antang, thautui,school leh teacher taksapna thu amah theisak ahih aleh aman huaite panla teitei ding hi’n gen hi.

 

Meltheihlouhten bomb paihkhum

Imphal, July-25: Singjamei Mayai Leikai a om Electricity deptt a Executive Engineer P. Birendra (55) s/o (late) Mohon inn ah tuni zingsang baihtak dak 5:10 velin meltheihlouhte’n hand grenade khat paihlut uh Car parking lak ah puakzak a, bomb hal kithehdalh in Car khat hihkha zek a, adang bangmah asia omlou hi’n kigen hi.

 

Old Age pension sum kihawm ding

Imphal, July-25: Social Welfare Officer/Sadar Hills in thupuan a bawl dungzui in July 30, 2012 zinglam dak 10.00 akipan in Gamnom Saper Meina PS ah Old Age Pension kihawm ding chi’n puang hi.Bishnupur district a Old Age pension sum, meithaite panpihna leh disabled person-te adia huhna sumte July 28, 2013 akipan in Aug 3, 2012 tan kihawm ding hi.

 

Deptt in Seniority List suah

Imphal, July-25: Directorate of Education(S) nuai a Primary Teacher sem graduate zousate’ seniority list deptt in suah hi’n kigen hi.Huai ah Dec 21, 1981 leh kum 2006 kikal a appointment ngahte kia telsak hidan in thusuak in gen hi.

 

Entrance Test hun ding bikhiah

Imphal, July-25: Manipur University(MU) ah M.Sc(Anthropology) 1st semester course sinding lakna ding in July 28, 2012 zinglam dak 11.00 in Entrance test om ding a, Dept. of Art Sc. a M.Sc 1st Semester zil ding lakna din July 30 zinglam dak 11.00 in Entrance Test om ding hi.MA(Mass Communication) sin ding lakna dingin July 27, 2912 a Entrance Test om ding leng Aug 1, 2012 zinglam dak 10.30 a om ding in ahun kisuan hi.Huailou in MA(Adult Education) 1st Semester sinding lakna ding in Aug 3, 2012 zinglam dak 11.00 in Admission Test om ding hi.

 

Operation neih himahleh damzoulou in si

Imphal, July-25: Langol Housing complex(Type-II) a om M. Mema Devi(43) w/o M. Ibomcha apaisa May 29, 2012 in Imphal Hospital leh JNIMS ah operation kibawl dam hoih thei tuanlou a, Guwahati zotpih himahleh damzoulou in Guwahati ah si hi’n kigen hi. A tapa M. Kingkii in tuni’n Manipur Press Club ah a gendan in anu’n agil na asak ziakin RIMS ah ensak uh a, ultrasound tanpha lak himahleh bangmah muh omlou hi’n gen hi. Ni 4 nung May 28 in Imphal Hospital ah Dr. Rajen vanaih uh a, aman appendix hidan a gen in operation bawl ngai hi’n gen a, huai dungzui in May 29 in operation bawl in om hi. Investigation hoihtak a bawllouh a operation bawl ahih dungzui in appendix lam siatna bangmah omlou hi’n M. Kingkii in gen hi. TB dia ginlelh hinawn a, operation bawl nungin leng damsiang thei lou a, atawp in June 3, 2012 in Imphal Hospital pawtkhiaksan uh a, inn ah kikem uhi.

       Inn a om sungin agil puakin om theilou a, June 14 in JNIMS ah puaklut a om in admit uhi. Huchi’n July 17, 2012 in operation bawl hinawn a, agil sungah tui litre 4 lakkhiak in om chih hi. Guwahati lam adia refer din ngen mahle uh JNIMS te’n phallou uhi. Amau leng chi mawh in July 19 in JNIMS apan pawtkhia in July 20 in Guwahati zuan uh a, Dispur Private hospital ah ki-admit uhi. Huai Hospital a doctor-ten a etchet ua leh operation bawl aleng phatuam nawnlou din gen uh a, Mema Devi leng ni bangzahhiam ICU a etkol nung in dam zou tuanlou in si hi. Huai tawh kisai in a tapa M. Kingkii in Imphal Hospital a Dr. Rajen in a khoihbuai ziak hi’n gen hi.

.

Awklum hilou in kuate hiam in a thah hidin gintakthu kigen

Numei khat a dukan sungah sisa in kimukhia

Lamka, July-24: Tuni zinglam dak 7:00 vel in D.Phailian bazar a dawr khat sung ah dawr neitu’ Ms. Luanneihoih @ Hoihnu(48) d/o (late) Thienkhopau Vaiphei of Red Cross Road, Lamka tuni zingsang dak 7.00 velin a dukan sungah sisa in muhkhiak hi a,amah awklumsa hidan in kilang mahleh a luang omdan leh a nak apan sipawt dan in awklum ahih gintak haksapi hi’n kigen hi. Police te’n zinglam dak 9.30 velin siluang vala uh a, post-mortem bawl ding in District Hospital morgue tun mahle uh Hoihnu sihdan muanmawh huai sakziak in RIMS a forensic expert-te’n postmortem a bawl ding un Imphal ah puaksuk in om hi.

       Thu kizadan in Hoihnu in pasal nei ngei mahleh ta neilou uh a, a pasal’ tawh kum 2 val paisa in kikhen uh a, aman Phailian bazar ah Moreh van zuak in a dukan mun ah giak hi’n kigen hi. Tuni zingsang in Hoihnu sisa in aluang muhkhiak ahih lai in dukan sung a fan khaina sik(iron) ah Moreh puan in kikhai a, a khe in sual/tuangtung sik kha ban in a nak(nose) ah sisan pawt a, a kam(mouth) apan alei(tongue) leng dawkkhe lou in a om ziakin a mukha phot in kuate hiamin athah nung a awklum dan a koihtawm hiding in ginglel uhi.            

     Hoihnu’ dukan akonglam pang kikhak(closed) a, anunglam kongkhak pen a pawlam ah kikalh mahleh chabi(key) kikhailou hi’n kigen hi. Nupi khat in dialpuan lei ding chi a dukan nunglam a kongkhak ahon leh Hoihnu kikhailum a mu hi’n kigen hi. Dist Hospital a Morgue ah Police-te’n Hoihnu’ luang a etchetna uah a ngawng guh kitan hidin ginglel uh a, kuate hiam in a thahzawh nung a kikhailum dan a akoih uh hiding in ginglel uhi. Hoihnu sihna tawh kisaiin Police te’n FIR No. 72( 7) 2012 CCP-PS U/S 302 IPC registered uhi. Zillai CCpur Block in tualthatte mawhpaihna sangpen puankhum uh a, Police-te’n a kintheipen in tualthat te mankhia a, dan(law) tawh kituak action lakkhum ding in ngen uhi.

 

Vice Chairperson,NYK Sangathan

Lamka, July-24: Km. L. Tilotama Devi, Hon’ble Vice Chairperson, NYK Sangathan, Ministry of Youth Affairs & Sports, Govt of India in July 25, 2012 in CCpur district hongpha ding a, zinglam dak 11.00 in Tuinuphai khua ah NYK Work camp 2011-12 a kibawl Youth Club office building hongkhe ding hi.Huaizawh sunnung dak 2.00 in NYK/Ccpur leh Hmar Veng Youth Club saina in Hmar Veng a ‘Awareness and Education for the prevention of Drugs Abuse and Alcoholism & Youth Initiative for the publicity of message of peace & development” zatna hun uap ding hi.

 

Socio-Economics Census meeting

Lamka, July-24: Mannuamching,MCS i/c DC/CCpur makaihna in tuni in DC/CCpur office ah Socio-Economics Census tawh kisai meeting om a, Maniram Sharma, IAS, AC to DC/CCpur leh Sub-divn tuamtuam apan SDO-te’ tel uhi. Huai ah Aug 1, 2012 in CCpur dist ah Socio-Economics Census kipan ding a, huaima July 31, 2012 a Supervisor leh Enumerator teng training piak ding thu genkhawm uh a, training tawh kisai thu tuamtuam genkhawm uhi.

 

1-Day Farmers’ Convention

Lamka, July-24: Agricultural Labours Union (ALUM), Manipur leh Indigenous Kuki Peoples's Forum (IKPF) saina in B.Vengnom community Hall ah July 27, 2012 zinglam dak 11:00 in "One Day Farmers Convention" om ding a, Langkhanpau Guite, Chairman ADC/CCpur khuallian a pang in hong ding hi. Huai ah Functional President in Rev YR Chothe, President, ALUM & IKPF pang ding a, Guests of Honour in Demmang Haokip, Vice Chairman, ADC/CCpur;Genneikhup Vaiphei, EM, ADC/CCpur; Paolal Haokip, MDC; Thangkhomang Haokip, MDC leh N.Tomba Singh, Chief Adviser, ALUM pang ding uhi.

 

Culvert bawlna nasep paitou zel

Lamka, July-24: CCpur Govt College kong laka IB Road-Tipaimukh Road junction khenzek Tipaimukh Road lam ah 80-RCC BRTF te’n Culvert bawl a pat uh masawn zel a, culvert sandan ding tan suang(concrete) bawlzou dekta uh a, tunung sawtlou in atuang(slap culvert) pan ding uh hi’n kigen hi. Culvert kibawl ziak in lampi tawhtan hi a, huai lampi alou theilou a tot a ngaih hun ah tamtak adingin nawngkai a, Culvert zawh kin ahih deihthu tamtak in gen uhi.


Guta te’n BSNL gui gumang

Lamka, July-24:CCpur Govt College kong lak IB Road-Tipaimukh Road kisuktuahna kiang zeka Culvert bawlna dingin JCB zang na asep lai un BSNL phone line tamtak hihse kha uh a, huchih lai in zan nitak in guta pawl khat te’n BSNL phone line metre 30 vel asau gumang uhi. Tuni’n Telecom department te’n BSNL phone line kigu mangte peh nawn uh a, zat pah theih tupna in hahtakin buaipih uhi.

 

JNU ah Asst Professor sepna mu

Lamka, July-24: Mercy Vungthianmuang w/o Lam Benson Guite of JNU (old Campus), New Delhi in tunaichin in Jawaharlal Nehru University a Centre of German Studies, School of Language, Literature and Cultural Studies ah ‘Assistant Professor in German’ sepna ngah a, tunung sawtlou in join ding hi’n kigen hi. Aman kum 2011 in Marbach, Germany apan DLA-Marbach scholarship sang a, huaima 2009-2010 sungin University of Konstanz, Germany apan DAAD scholarship ngah a, kum 2008 in UGC- Junior research fellow (JRF) ngah in 2007-08 in UGC-National Eligibility Test for Lectureship (NET) ngah nawn hi.Kum 2007 in UGC- Rajiv Gandhi national fellowship for SC/ST leng ngah a, kum 2010 apan tunitan tua a sepna ding ah Guest Lecturer in pang hi.

     Mercy Vungthianmuang in Holy Child Auxilium, New Delhi apan Class X 62.6% in zou a, huai mun akipan mah in CBSE nuaiah 64.8% in Class XII zou a, BA(Hons) in German, 6.97 CGPA (77.4%) in zou hi.Aman tulelin JNU ah Ph.D in German Studies hih lel a, JNU mah ah 6.33 CGPA (70.3%) in M.Phil(German Studies) leh 5.37 CGPA (59.67%) in M.A in German zou hi.,

 

NIOS centre ding propose bawl

Lamka, July-24: National Institute of Open Schooling (NIOS) exam centre muntuam a a kisuan nungun student tamtakin haksatna tuak in mun gamla pipi ah exam ding in kuan sek uhi. Mannuamching, i/c DC/CCpur in student-te khualna in CCpur Dist a NIOS exam centre ding proposal bawlin tuni’n Dy Secretary(Education-S) kiang ah message thon hi. Aman exam centre adia a proposed-te - CCpur govt College, Lamka College, Rengkai Hr Sec. School leh Gandhi Memorial H/S hi a, huai teng lak ah centre 2 bek govt in phalsak din lam-et huai hi’n kigen hi.

 

RIMS ah Dental College kihong ding

Imphal, July-24: Central govt in apan phalna om ziakin RIMS ah tunung sawtlou in Dental College honkhiak hiding chihthu om hi. Huai ding in Aug 1, 2012 akipan in session pat theih gintak hi a,RIMS thuneitute’n tulai in huai din akisaipihte tawh kithuzak gige uh chihthu om hi.Huai College pat ahih hun ah Assam chihlouh North-east state tuamtuam apan student 50 tan lak hiding a, huai lakah Manipur in seat tamdeuh ngah dia gintak hi a, RIMS employee-te adin leng seat tamlou reserved hiding hi.RIMS a Dental College honkhiak ahih theihna ding in vanzat poimawh kimtak in omkhin a, tunung a zat det dingin building leng kibawl lel lai hi’n Media Adviser,RIMS in thusuah bawl hi.

 

Winger leh Active kiphukha : mi 2 si

Imphal, July-24: Utlou khua a Power House kiangah zan sunnung dak 2:45 velin TATA Winger (No. MN0-4A/4070) leh Honda Activa khat kiphukha ua, huai ah Honda Activa a tuang Leisangbam Bochao(35) s/o Ibohal of Kabaw Wakching Mayai Leikai leh azi L.Ongbi Devi liam uh a, RIMS puaktung nung un Leisangbam Bochao pen dam zoulou in zan nitaklam in si hi. Azi Ongbi Devi leng a gim deuhdeuh ziakin Shija adia refer hi a, himahleh damzou tuanlou in tuni zinglam dak 10:30 velin si hi. Misi luang 2te RIMS a post mortem bawl zawh in a innkuante uh piakkhiak hi uhi. Tata Winger pen police ten man(detained) in tutan in Police Station ah koih uhi.

Leisai kichim mi 1 delhlum

Imphal, July-24: Jiribam leh Tupul kal a rail lampi bawl omte’n Nungba PS huamsung Khongsang mun ah Tunnel No. 12 a bawl lai un lei(soil) kichim a, huai in nasem(labour)te khat delhlum hi. A kigendan in nasemte’n Tunnel No. 12 a bawl lai un leisai kichim a, huai ah Ranjan Jha (19) s/o Rameshwor Jha of Bihar delhkha in a mun ah si hi. A luang RIMS a port-mortem bawlzawh in a khawlam uh puaktung dingin a seppihte’n siluang la uhi.

 

Select leh Wait-list te’ adin Counselling

Imphal, July-24:Medical Directorate in state nominee a Course tuamtuam sinding lakna din July 15, 2012 a Entrance test a conduct uh result suak a lawhchingte leh waiting list a omte a dingin July 27,2012 zinglam dak 10:00 in Directorate of Health Service, Lamphel ah Counselling om ding hi. Huai hun ah candidate teng ki-report ngai ding a, original certificate, admit card leh passport size copy 6 tawi ngai ding hi. Ki-report loute tunung in a case uh limnsak hilou ding chihthu om hi.

 

Oil pump-te’n haksatna tuak

Imphal, July-24: CAF & PD Minister in Imphal East leh Imphal West a Oil Pump om teng adin thautui(petrol & diesel) kiching puaklut hidia a gen ziakin khawpi sunga Oil pump omte khenkhat in nitak dak 9.00 tan hong sek mahleh uh electric power deih banga a ginatlouh ziakin Oil pump tamzaw in niteng a nitak dak 9.00 tan hon ding lemtanlouh hun tam mahmah in gen uh a, electric a regular louh ziakin haksatna tuak munlua uh hi’n leng gen uhi. Electric meivak omlouh hun ah Oil pump-te adin nitak dak 9.00 tan hon leng law & order thilah a noplouh hun tam mahmah chi uhi.

 

Imphal ah 2016 sungin railway line

Imphal, July-24: Jiribam akipan km. 84 a gamla Tupul tan railway line tunsakna ding in North-east Frontier Railway-te nasep kisan mahmah uh a, Jiribam apan Tupul tan tung ding Railway line nasepna March 2014 tana zawhsiang dia ngim(targeted) uh hi’n kigen hi. Nasepdan tu dinmun banga a paitheih zel leh kum 2016 sungin Imphal tan railway line tungsuak thei ding hi’n railway official khenkhat in gen uhi. Huai Railway project nasepna ah Rs. 727 crore bei dinga tuat himahleh zawhsiangna dingin Rs. 2,714 crore bei ding hi’n kigen hi. Jiribam leh Tupul kikal ah lei(bridge) 64 bawl ngai ding lak ah lei(bridge) lian 2 bawlzawh hita a, tunung sawtlou in adang 25 zawh hidin kigen hi.

 

.

zogam thupuak_logoMinister 2 leh MLA 3 in enkhia
Lamka, July-23: Manipur a vuahtui tawmziak in tuilou tamtak ah buh suantheilou in louneimi tamtak in haksatna tuak uh a, huai tawh kisai in Manipur cabinet in thil omdan enzui ding in Chief Minister O. Ibobi makaihna Task Force phutkhia hi. Task Force te’n July 21, 2012 in phaijang gama tuilou munte enkhia uh a, zan in Commerce & Indus Minister K.Govindas leh Works Minister Dr. Ratan Kumar in Manipur singtanggam a tuilou omna munte enkhia uh a, CCpur dist sung a tuilou(paddy field) mun tuamtuam leng enkhia uhi.Huai ah T.Manga Vaiphei, MLA(Henglep A/C) & Chairman, MTDC, Vungzagin Valte, MLA,(Thanlon A/C), Ginsuanhau MLA, (Singngat A/C), Dist Agriculture Officer , IFCD official te, Tongkai Baite,MDC leh officer hunkhop in zui uhi.
Minister 2 makaihna Task Force te’n Singngat A/C, Saikot A/C, Henglep A/C leh CCpur A/C sung mun tuamtuam pha in tuilou a buh kisuan theilouhna munte enkhia uh a, Singngat A/C ah Makhau bial a Gun-lui dung pha uhi.Makhau area apan Khuga Dam right side canal zui in Khuga Dam enkhia uh huai apan Lamka ah lut nawn uhi.
K.Govindas, Minister in agenna ah MLA/Minister tuamtuam te’n Manipur phaijang gam leh singtanggam ah tuitawmlua ziakin tuilou a buh suantheih louhnate enkhia in athil muhdan uh zan nitak mah in Chief Minister kiang ah report ding uh hi’n gen hi. Task Force te’ report dungzui in state govt in Manipur gam khawkeu(drought state) a puan ding leh puanlouh ding kinga hi’n gen hi. CCpur dist ah tui omlouh ziakin lou 90% ah lou neihna lawhsam hi’n gen a, CCpur A/C, Singngat A/C leh ah lou bawlna 90% ah lawhsam a, Saikot A/C a 95% ah lawhsam hi’n gen hi. Vuahtui tawm ziakin kialpi tungthei dinmun in om a, govt in pan huaiziakin govt in buhsuan theihna dingin Dist Agriculture Office/CCpur apan pumping set 40 ngetna om leng akintheipen a ngaihtuah hidin gen a, urea/har leng agri deptt tungtawn in subsidised rate ah bag 1 in Rs. 280- zel a piak hidin gen hi.
Minister in a genzelna ah lou nei mite lakah har/urea rate niamchik a piak theihna ding in govt in Rs. 4.60 crores vel seng hi’n gen a, himahleh huaite tungtawn a lou bawltheih ahih leh govt in manna in ngailou ding chi’n gen hi. CCpur dist ah vuahtui tawm mahleh Khuga Dam ah tui kiching tamtak om a, Canal ah akintheilam a khahkhiak hidin gen hi. Huai ding in Khuga Dam Left & Right canal-te a akisaipih deptt tungtawn in a kintheipen a puah hiding in leng gen hi. Minister in a genbehna ah August 1st week tan a tui kiningching a om leh tuilou ah buh chiintheih lai ding a, himahleh huai hun tana tui kimuh kei leh,buh chiin theih nawnlouh ahih ding ziakin seasonal crop tuamtuam chiindan ding ngaihtuah ngai ding hi’n gen hi.
Manipur ah kum 2009 in vuahtui kiakdan, 47mm kia ahih ziakin Drought state a puan in om a, tukum 2012 in vuahtui kiakdan 62mm tungou mahleh Dist tuamtuam ah vuahtui tawm ziakin tuilou tamzaw ah buh suantheihlouh hi’n kigen hi.


IFCD Minister in Khuga Dam canal dinmun enkhia
Lamka, July-23: IFCD Minister Ngamthang Haokip makaihna in Ginsuanhau, MLA(Singngat A/C), IFCD a Addl Chief Engineer T. Thaba Devi, Tongkai Baite, MDC/Sangaikot leh P. Sianzadong, MDC/Singngat in Engineer khenkhat tawh kithuah in Khuga Dam apan bangchileh lou bawlna ding in tui khahkhiak theih hiding hiam chih enzui kawmin Khuga Left canal leh Right canal a tui omdan amun mahmah ah enkhia uhi.
IFCD Minister in a genna ah Central Water Commission apan theihsakna om dungzui in Khuga Dam canal etkhia hi’n gen a, July,2012 kha beikuan ahih kei leleng August,2012 sung in tuilou km 20 val alian huamsung ah tui luanlut sak tup ahihdan gen hi. Canal hoihlouhna munte leng JCB zangin akinlam a bawl hidin gen hi. Khuga Dam canal mun khenkhat hoihlouh ziakin tu dinmun ah tui tamtak khahkhiak hileh kichim thei ding hi’n kigen a, tuni’n leng a etkhiakna dan in tui tamlou chik khahkhia uhi. Buh suan hun July khasung himahleh tukum in vuahtui atawm ziakin tuilou tamzaw ah tui omlou a, canal kiang mun khenkhat ah buh suanthei mahle uh Tualnuam apan Saikot kikal ah buh suan omlou uh hi’n gen hi.


Khupching leh Ngambawm film hongkhia
Lamka, July-23: Bukpi Film Company(BFC) in Paite documentary film piching a bawl thak uh ‘Khupching leh Ngambawm(A legendary love story)’ zan sunnung in Auditorium Hall, Blue Star Academy a Auditorium Hall ah Vungzagin Valte, MLA(Thanlon A/C) in Chief Guest a pang in hongkhia hi. Huai ah Guest of Honour Langkhanpau Guite, Chairman,ADC/CCpur pang a, Functional President in M. Ginzapau, MDC(Ngazam ADC) pang hi. Chief Guest in a honkhiak Khupching leh Ngambawm film producer bel Mr & Mrs K. Ngulkhanthang hi’n kigen hi.
Chief Guest Vungzagin Valte in Film hongkhe kawmin a genna ah huai film tungtawn in nu leh pate’n leng tate kala ki-itna omte theihsiampih poimawh ahihdan gen a, BFC panlakna phat-huai sakthu gen hi. Aman a genzelna ah khangluite’ vanzat leh thilte tuni a kimu nawnlou tamtak omta a, a om sunte kepbit a, khangsawnte tanpha in a muhtheih ding ua kepbit poimawh hi’n dan gen hi. BFC leh Bukpi khawmite’n hibanga kithuahkhawma gou manphatak a bawlkhiak ziak un phat-huai sakthu leng gen a, BFC kithuahpihna in maban ah panlakpih ding hi’n gen hi.
Guest of Honour Langkhanpau Guite a genna ah Zomite laka pau chituamtuam tamtak omte lakah Bukpi pau kichi pau hoihtak leh mite hip mahmah ahihman in lemchinna adinga poimawhna liantak neih ahihdan gen a, film pichingtak kibawlkhia gou manpha hi’n gen hi. Aman BFC panpihna dingin Rs. 5000 in CD copy 2 lei a, film honkhiakna hun a lasate pahtak latsakna in Rs. 500 chiat pia hi.
Zan a Ngambawm leh Khupching documentary film honna ah Functional President M. Ginzapau, MDC banah Bukpi khawmi hunkhop leh mipi tamtakin uap uhi.


&&&&&&&&&&&&&&&&&&&&&&&&&&&&&
LOCAL NEWS
DC/CCpur tulelin Delhi ah omlai
Lamka, July-23: Ms.Jacintha Lazarus, IAS, DC/CCpur in ni 10 sung suti la in July 11, 2012 a zinkhia tuni vela hongtung ding dan in kigen mahleh tulelin Delhi ah om a, tuni’n leng official meeting a tel hi’n kigen hi. Thu kizadan in July 25, 2012 velin Lamka hongtung kik ding hi’n kigen hi.

Blood Donation campaign
Lamka, July-23: DAPCU, YPA Bungmual leh Dist Hospital a Blood Bank kigawmte saina in zan sunnung dak 1:00 in Bungmual a YPA Hall ah Blood Donation Campaign- cum- camp om hi. Huai ah Dr. Paulunmang ban ah Blood Bank lam apan officialte leh Dr.N. Paulginthang, Medical Supdt leh DAPCU official te’n sisan piak a lauh huailouhdan leh sisan piak poilouhdan sinsak uhi. Programme hunsung in mi 20 valin a blood bank a koih dingin sisan thawh(donated) uhi.

Socio-Economics Census
Lamka, July-23: Mannuamching, MCS i/c DC/CCpur makaihna in July 24, 2012 zinglam dak 11:00 in DC/CCpur office ah Socio-Economics Census tawh kisai in meeting omding a, huai ah Sub-division tuamtuam apan SDO teng tel ding uhi.

DU nuaiah Asst. Professor ngah

Lamka, July-23: Miss Vungmuanching d/o V. Sangthuam of Lamphelpat, Imphal in tunaichin in Delhi University nuaia Lakshmibai College ah ‘Assistant Professor in English’ ngahthak hi. Lakshmibai College ah Assistant Professor post awng (ST post 1) lakna dingin July 19,2012 a interview om a, huai ah Miss Vungmuanching lawh ching a, aman kalnawn sungin join ding hi’n kigen hi. Aman Nirmalabas H/Sapan 62.5% in Class-X zou a, Montessori Hr Sec School apan 69% in Class-XII(Science) zou nawn a, UCC, Barapani apan 56% in BA(English) zou hi. Manipur University apan 57% in MA(English) zoukhia a, 60% a M.Phil a zawh banah Manipur University mah ah tulel in Ph. D sinlel hi. NET + JRF leng kum 2008 in zou a, Assistant Professor UGC scale dungzui in Pay Band Rs.15600-39100 + Grade Pay Rs.6000 lawh ding hi’n kigen hi.

Army te’n KNLF 2 mankhia
Lamka, July-23: Police thusuak kingahdan in 39-Assam Rifles pawlin July 20, 2012 nitak dak 6:30 vel in Singngat sub-divn a L.Kanan khua ah KNLF a General Secy self-styled Lt Tonglenlal Hoakip @ Lalmoi (32) s/o Ngamkhojang of Vangkho village leh self-styled 2nd Lt Khupkhothang Misao (30) s/o Thongkholen Misao (30) of Tengnoupal tulela Singngat khua a om mankhia uhi. Assam Rifles te’n mi 2 te apan in AK 56 rifles 2, magazine 1 leh atang 9 mukhia in Imphal Police ah pekhia uhi. Singngat Police te'n a case lasawn in CJM court ah dingsak uh a, CJM in July 26, 2012 tan Imphal Police custody a om ding in phalsak hi. Police in huai mi 2te tung ah FIR No.11 (7) 2012 SGT-PS U/S 400 IPC, 25 (1-C) A.Act registered uhi.

Auto nih kiphutuah in mi 2 liam
Lamka, July-23: Koite kiangah zan nitak dak 7.00 velin passenger pua Diesel Auto leh Petrol Auto kiphukha uh a, huai ah Diesel Auto a tuang Thangkhanlal (30) s/o (late) Thangkhanpau of Bungmual akhe khat liam a, Petrol Auto atuang Mamang (45) h/o Neilam of Zolzam(near Tollen) in alu leh khe nasa in aliam mi 2te dist. hospital ah etkol hi uhi.

KNO in hilhchetna thusuah
T. Stephen Kuki, Under Secretary,Info & Pub/Kuki National Orgn(KSO) in hilhchetna thusuah a bawl dan in KNLF pawl SoO group atel hilou uh a, tulelin Myanmar a om in Manipur Peoples Liberation Front(MPLF) te’n kibukna pia uh chi’n taklang hi. KNLF pawlin vau tawh thuah a sum nget a chin uh KNO in ngaitheilou hi a taklang kawm in amau operational area ah KNLF te a gamtat ding uh dal uh hi’n leng thusuak in gen hi.KNLF pawlin KNO phalna mu a gamtang uh chihthu(claim) om leng govt official kuamah in gingtalou ding in KNO thusuak in theisak a,KNLF pawlte’ phuahtawm ziaka govt official te’n KNO tunga ngawhna a bawl ua leh SoO thiltup tawh kikalh ding chi’n leng taklang uhi. Huai tawh kisai ginlelhna neite’n Joint Monitoring Group(JMG) tungtawn in kanchet theih ding chi’n thusuak in gen hi.


IMPHAL NEWS
Cabinet in Committee report enzui
Imphal, July-23: Chief Minister’ Cabinet Secretariat ah tuni nitaklam dak 4.00 akipan Cabinet meeting om a, huai ah vuahtui tawmluat ziakin Manipur a lou bawlna mun omte dinmun enkhe dia guana om Cabinet Committee apan report enkhawm uhi. Huai dungzui in Cabinet in thupukna 4 bawl uh a, huaite -1)Minor Irrigation(MI) deptt in River Lift Irrigation(RLI) station omte zanga nasem ding leh diesel poimawh dandan leng a ngaihtuah ding uh, 2)Agri deptt in lou bawl theihna ding mun tui omlouhna munte ah pump set zangin tui piakdan ding ngaihtuah ding uh a,buh chiin a lemtan kei dia leleng haichi bang chiintheih ding hiam chih a etzui ding uh, 3) Agri deptt in deptt dangte banah state leh local level a leng panla in lou a tui lutsak(irrigate) tawh kisai ahithei tana panla ding in thukim uhi. 4) Cabinet in tuban kal 1 sungin thil omdan enzui nawn ding uh chihthu om hi.

Imphal West dist ah 144 Cr PC
Imphal, July-23: Imphal West district pumpi ah Kiginni(July 21, 2012) akipan in District Magistrate/Imphal West in 144 Cr PC puang hi. Huai dungzui in 144 Cr PC koih hunsung teng pawlam mun khat ah mi 5 sanga tamzaw omkhawm phallouh hiding a, hiamhei leh galvan tawikhia kuamah om theilou ding chi hi. Hileleng huai in law & order maintain Police leh security force-te huamkhalou ding chihthu om hi.Thuthak om nawn masiah 144 Cr PC lakkhiak hilou ding chi’n leng Dist Magistrate thusuak in gen hi.

UNC in bandh khawlsak uh
Imphal, July-23: United Naga Council(UNC) pawlin Manipur a Naga mite kivaipuakna tuam(alternative arrangement) a phut uh nawhna in tuni zankimlai akipan July 27, 2012 zankim tan dakkal 96 sung total bandh a puan uh Union Home Ministry in bandh khawlsak ding a ngetna a bawl uh pansan a nei in bandh ding khawlsak uh a, hileleng centre in a limsak kei leh tunung in bandh omsak hiding in UNC thusuak in gen hi. Home Ministry in Manipur a Naga mite’n state govt nuai hilou kivaipuakna tuam pe ding a UNC in Centre a ngetna a bawl uh Home Ministry in enzui zel hi’n UNC makaite theisak uhi. Huailouin Naga Hoho makaihna nuai ah tu July,2012 tawpkuan in Indo-Naga peace process tawh kisai consultation om ding ziaka leng bandh khawlsak a om hidan in UNC thusuak in taklang hi.

Vauna dinga bomb kikoih 1 om
Imphal, July-23:Imphal West district sung Irilbung PS a Kongba Ucheckon a Mrs Moirangthem Ongbi Sorajini Devi(45) w/o Sarat inn kong ah tuni zingzang dak 5.00 velin Chinese hand-grenate khat muhkhiak hi a, Police ah report piakpah ahih dungzui in Police te’n lakhia uh a, muntuam ah hihsia uhi. Mrs Moirangthem Ongbi Sorajini Devi bel September 2012 kha a Gram Panchayat election om hunchiang in Kongba Ucheckon bial ah candidate ding hi’n kigen hi.

Commando te’n mi 2 mankhia
Imphal, July-23: Thoubal Commando pawlin zan sunnung dak 2.00 in Pallel bazar lak operation bawl uh a, drug zanga summet bawl mi 2 mankhia in khamtheih leng a hunkhop mukhia uhi. Huai mi 2te Md Sanayai(25) of Lilong Haoreibi Mayai Leikai leh Md Rajauddin(28) of Lilong Haoreibi Mayai Leikai hi uh a, Commando te’n amau akipan in damdoi khamtheih esdudo-ephedrine tang(tablet) strip 5,188 mukhia uh chihthu om hi.

Entrance test result suak
Medical Directorate in state nominee a course tuamtuam sinding lakna din July 15, 2012 a Entrance test a conduct uh result suak a, huai a telkha singtangmite leh a Roll No. uh ban ah sin ding uh course-te anuai abang hi:-
B.Sc(Nursing):
1.Nemchonghoi Kipgen(Roll No. 1025)
2.Esther Mansuankim(Roll 1435)
3.Anjeli Lhingpineng Touthang(Roll 1010)
B.Sc(RIT):
1.Lhingnunnem Khongsai(Roll 1925)
B.Sc(O.O.T):
1.Chiinhoihkim(Roll 2007)
B.Pharm:
1.Ngaimuanching(Roll 2037)
2.Esther Manthiannem(Roll 2033)
D. Pharm:
1.Nembiakmuang(Roll 2089)
2.Lamsuanmung Thangsing(Roll 1904)

.
  1. Zogam Thupuak | 20 July, 2012
  2. Zogam Thupuak | 18 July, 2012
  3. Zogam Thupuak | 17 July, 2012
  4. Zogam Thupuak | 16 July, 2012

Page 37 of 42

© Copyright 2024 - ZOGAM.COM. Designed by NemaGraphy.