Central official in Lamka pha
Lamka, July-14: Dr.Ajay Kumar, Joint Secretary, DEITY Govt.of India in ni 2 sung om dingin tuni’n Manipur hongpha hi. Imphal hongtun in Airport apan CCpur dist hong manawh pah in Koite khua ah National Institute of Electronics and Information Technology (NIELIT) mun ding mimal’ gam enkhia hi. Huai apan Tuibuong a Fishery office gam enkhia a, huai zawh in Pangzawl gamsung enkhia hi. Dr Ajay in NIELIT omna dingin gam 3 acre alian poimawhhi’n gen a, temporary office ding in HQ Veng,Lamka West a DIET Centre puahthak hidin gen hi.
SSC exam centre din namkip hita
Lamka, July-14: CCpur district a tuailai sepna zongte’ adin Staff Selection Commission(SSC) Exam centre a poimawh ziakin CDSU leh pawl tuamtuam in hun sawtpi apan a buaipih uh lawhching in Lamka ah SSC Exam centre om ding in namkip hita chihthu kiza hi. Staff Selection Commission in advertisement asuah October 21 leh 28 a ‘Combined Hr Sec Level (10+2) Examination, 2012’ om ding ah exam centre khat ding in Lamka (CCpur) koih in om hi. Centre code leng 5502 hi’n chiangtakin kitaklang hi. Tuailai lehkhasiamte’n Lamka centre tungtawn in sepna hoihpipi a muh uh deihsakhuai hi.
LT Ngaihte vaidawnna om
Lamka, July-14: Thawnkhokam Ngaihte @ LT Ngaihte, IFS, Indian Embassy, Kabul (Afghanistan) ah First Secretary (Com) & HOC semlel leh azi in Lamka hongpha uh a, YPA Gen HQ makaite’n tuni nitaklam in Hiangtam Lamka a YPA HQ office ah vaidawnna leh kithuahkhawmna hun zatpih uhi. Huai ah Rev G.Haukhomang, Chief Adviser, YPA Gen HQ in Pathian kiang ah thumsak hi.
LT Ngaihte in Ministry of External Affairs a Under Secretary semlai January,2012 bulin Indian Foreign Service(Jr Admn Grade) a kaisang in February,2012 in Afghanistan khawpi Kabul ah First Secretary dingin pai a, tutan huai gam ah posting lai hi’n kigen hi.
UBI ah sum hong tung
Lamka, July-14: Tuni sunnung in security tamtak in a venbitna nuai ah UBI/CCpur branch a ding sum tamtak hongtung a,Bank a sum taksap ziaka khalawh(pay/salary) leh sum lakkhiak ding tuamtuma neite ading in haksatna omlou ding chi’n kigen hi.
H.Mangchinkhup in Water Tanky hong
Lamka, July-14:H.Mangchinkhup, EM,ADC/CCpur in abial 16-New Lamka West, ADC sung a New Lamka(G) ah tuni zingsang dak 7:00 in Water Tanky kibawlthak hongkhia a, Upa Gen Than Lian, ex-MDC & Secy. New Lamka(G) V/A in Pathian kiangah thumna in lan hi. Huai water Tanky bel Tribal Affairs & Hills fund apan H.Mangchinkhup, EM in Rs 8 lakh a sanction a kibawl hi’n kigen a, tui litre 13,000 vel tazou ding hi. Tanky omna area a innkuan 100 val in hamphatpih ding un kigen hi
Police khut ah July 16 tan om ding
Lamka, July-14: Police deptt nuai a Drug Cell te'n zanhal in New Bazar ah Thonkhanmuan (48) s/o Nengdouthang of Zion Veng,New Lamka akipan in No.4(heroin powder)gram 9 mukhia uh a, amah leh a khamtheih puak Police station ah pekhia uhi. Police te'n zan in CJM court ah ding sak uh a, CJM in July 16, 2012 tan Police custody a om ding in phalsak a, amah tung ah Police in FIR No.70 (7) 2012 CCP-PS U/S 21 DN&PS (Narcotic Drug&Psychotropic Substance) Act registered uhi.
1-Month Spoken English hunkhakna
Lamka, July-14: Lalpuithluaii Foundation School a teacher tengin summer vacation sung a school uah “1-Month Spoken English Course” nei uh a,Khuma Thangjom in sinsak hi. Tuni in hunkhakna program ah ZEO/CCpur khuallian a pang in teacher teng kiang ah Spoken English tawh kisai CD 1 chiat pia hi. ZEO in CCpur dist ah L.Foundation school teacher-te loungal alompi a Spoken English Course zil om nailou hi’n gen a, teacher-te siamna student te’n a phattuampih ding ban uah society in leng phattuampih din gen hi. Teacher -te khualna ziaka kha 1 sung spoken English course saitu Principal Vunga leng pahtakthu gen gen hi.
BSF te’n thaukap hun ding behlap
Lamka, July -14: STC BSF CCpur a training te’n July 0l-14, 2012 sung zingsang dak 5.00 akipan in nitak zansawt tanpha Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah long/short/grenade leh 51-mm mortar a kap(firing nei) uh a, ahun behlap in July 15,2011 akipan July 31, 2012 tan hiding in ahun behlap uhi. Huai hunsung in a kimnai a khua omte apan mihing kuamah huai area a lutlou ding leh ganvulh leng huaimun a lut dia kuama’n khahzanlou ding in DIG, STC/BSF in theisak hi.
UCC pawlin General Assembly nei
Lamka, July-14:United Chiefs Committee pawlin tuni’n Sielmat Zawlbuk ah General Assembly nei uh a, huai ah hausa(chiefs) 100 val paikhawm uhi. Chiefs Assn. tuamtuam a makaite gendan in Manipur govt in Hausa hihbei sawm in hausate gam leh leitang leng laksak uh ahihman in hausate pangkhawm in Parliament ah memorandum piak a panlak poimawh sakthu gen uhi. State govt in forest survey bawl a sawm leng hausa teng pangkhawm a doudal ding, hausate lak apan fund kaihkhawm ding, CDSU leh CoPTAM tawh pangkhawm a panlak ding telin thu tuamtuam genkhawm uhi. Tuni a UCC General Assembly ah thupukna 3 bawluh a, huaite 1) Govt in forest/land survey a bawlsawm bawlsaklouh ding. 2) Pu-pa khang apan hausa kichi gou kiluahthawh ahihziak a govt in Village Authority election a saisawm leng dal ding leh 3) UCC ah Chiefs Assocation tuamtuamte’ in affiliation bawlvek din thupuk uhi.
DPI/GBM leh website honna om
New Delhi, July-14: Delhi Paite Indongta(DPI) te’n tuni nitaklam in Chanakyapuri a om Arunachal Pradesh Bhawan ah General Body Meeting leh Web-Site honna nei uh a, DPI committee member thakding telna leng nei uhi. Dr. Kamkhenthang Guite in website honna makaih a, Ngullam Tombing in hongkhia hi. Khatchin Langel makaih in ‘Delhi khawpi a omte’n Nam adia i hihtheihte’ chih kikumkhawm uh a, panelist ah Vumlunmang Vualnam leh T Kaithang pang uhi.
Govt in ni 2/3 sungin thupukna bawl ding
Imphal, July-14: Agriculture Minister Md Abdul Nasir in tuni’n Kshetrigao A/C apan student lawhchingte kipahpihna programme zatna ah vuahtui tawmluat ziaka khawkeu(drought) tawh kisai in Manipur govt in July 16 ahihkeileh July 17, 2012 in thupukna bawl ding hi’n gen hi. Minister in a gensan in tukum a vuahzu nasatakin tawm a,hileleng July 15, 2012 tan a vuahzu omdan tan hungaih hiding in gen hi.District tuamtuam apan Dist Agri Officer(DAO)te report govt in enzui lel a, July 16/17 velin CM tawh kimu ding a,huai ah govt in thupukna a bawl tawh kituakin Agri deptt in akul leh poimawh bang semkhe ding hi’n gen hi.
Nagaland bandh tuni’n khawlsak
Imphal, July-14:Southern Angami Youth Organisation pawlin July 6,2012 akipan Imphal-Dimapur lamlian(National Highway No. 2) in a totkhak Kohima leh Mao kikal bandh puang in Manipur apan Gari himhim Nagaland tawn theilou dia a puan uh tuni apan khawlsak uh chi’n Home Minister Gaikhangam in gen hi. Nagaland gari DI Tata(No. NL-10K/2058) khat Tadubi apan hyjacked a om muhkhiak ahihban ah a hyjack-te leng Manipur police in mankia uh a, Manipur leh Nagaland govt kithuzaktuah in Southern Angami Youth Orgn pawlin leng tuni apan bandh khawlsak uh hi’n Minister in gen hi. Huai tawh kiton in Imphal-Dimapur lamlian ah ngeina bangin Gari pai nawnta chi’n leng gen hi.
Manipur Education Service(MES) Rules
Imphal, July-14: Education Minister M. Okendro in a gendan in Manipur ah Education Service(MES) Rules zat ahih hun ah teacher ding lakna(recruitment) ah sum-le-pai a kigolhgukna om theilou ding in govt in panla ding hi’n gen hi.Huai rules thak zat ahih chiang in appointment leh transfer/posting thil ah leng politics kigolh theilou ding chi’n Miniser in gen hi.Minister in a gen zeldan in sawtlou sungin hun sawttak pending a om hunkhop sepkhiak hi’n gen a,huaite adiakin teacher-te’ seniority list, CPIS, regular ZEO appointment bawl ding process pat ahihban ah Principal post awng tuamtuamte leng fill-up ding thu tel hi’n gen hi.
Thautui rationing system lakhia
Imphal, July-14:Consumer Affairs, Food & Public Distribution System(CAF & PD) Director in Imphal a Oil pump omte ah thautui lei theihna dia rationing system zat dia thupuan a bawl tuni in lakhia a, mipi(customer) te’n thautui a poimawhzah uh Oil pump tuamtuam apan leithei ding uh chi’n puang hi. Thautui paw ding Gari tamtak July 15, 2012 in CRPF-te venbitna nuai ah Imphal apan Dimapur zuan in kipankhe ding uh a,Chingmeirong a IOC ah leng thautui kiching stock hiding chihthu om hi.
No Confidence motion pawlut
Imphal, July-14: Autonomous Dist Council/Kangpokpi a Chairman lenthak Haokholal Hangshing in Chairman hihna a letnung kha 1 val mahleh bangmah sepkhiak neilou chi’n Chairman-lui deihzaw lamte’n soisel uhi. Huai tawh kiton in Haokholal Hangshing in Chairman hihna apan a tuhkhiak Seipu Haokip makaihna in member hunkhop in tuni’n muanzawhlouhna(No Confidence motion) pawlut uhi.
ILP ziaka mat a om khahkhia
Imphal, July-14: anipur ah Inner Line Permit(ILP) system koih ding phutna in July 9, 2012 akipan FRIENDS Adviser K. Kunjabihari Sharma (72) in hunger strike a neih ziaka Police in a mat uh tuni in khahkhiak in om hi. K. Kunjabihari Sharma in July 9, 2012 akipan in JNIMS ah hunger strike pan a, police te’n a lupna tawh chain bulhkhum uhi.State govt in Manipur ah ILP koih dingin Centre a recommend dia a thupuk ziakun Kunjabihari Sharma in an-ngawl a kiphinna khawlsan hi’n kigen a, huaiziakin khahkhiak a om hidan in kigen hi.
ST/SC leh Women seat reservation
Imphal, July-14: 4th General Panchayat Election,2012 tawh kisai in Imphal West, Imphal East, Thoubal leh Bishnupur district a Zilla Parishad member ding telna om ding ah ST/SC leh Women seat reservation tawh kisai in Porompat a Panchayat Bhavan ah July 16, 2012 zinglam dak 11.00 in kikhopna om ding a, huai ah seat reservation adin ‘draw of lots’ om ding chi’n Principal Secretary(RD & PR) VK Thakral,IAS in thusuah bawl hi.
.