TULAI HUNSIA SUNGAH

Rev. Dr. J.M. Ngul Khan Pau

I. COVID19 SECOND WAVE:

Tutung Covid19 pulnatna nihna in India gam nuai cihtakin hong nuai a, Covid huhau in nisimin mi tulli val si hi ci-in kiciamteh hi. Tua tulli i cihte kumpi theihpihte hi a, kumpi theihpihloh a tamzaw hi dingin ki-um hi. Tua mah bangin a veithak (positive) ni khat in tul-za-li bang pha tawntung hi. India gam Covid19 hong tun tu’ngin kumpite in kilawhlohna dingin hong khakcip uh a, tua hangin a si a mang a om hangin mi tamlo nuntakna bei hi. Tutung Zato lamsiamte in (Medical Expertise) a huzap nihna (second wave) hong tung ding hi, a masa sangin nasiazaw ding acih hangun kigingkhol se loin Kumbh Mela (Hindute mawhmaina dingin Ganges lui-ah kidiah/tuilut) thumvei tak hong nei uh a, a khatveina tuilutna ah mi tul-za-sawm-sagih sangin tamzaw a, tutung tuilut khempeuh 9.1 million in kiciamteh hi. Leitung ah khatvei thu-a mipi tam kituahna penin kiciamteh a, International Space Station panin zong mipite kimu thei kici hi. Hih Space Station panin leitunga a kimu thei adang nih bek om a: Great Wall of China leh Himalaya mualdung ahi hi. Kumbh Mela zong kimu thei ahih manin a thumna hi ding hi.

Hih mipi 9.1 million tuilutte hangin Covid19 Second Wave (a huzap nihna) hong kizel gawpin tua mun panin amau omna ciatah natna ciahpih uh hi. Misi tamlua in nisim kihalna phualpite in halkhin zo loin, amau innkuanpihte in tua misi halte (cremation) sum tawh cial uh hi. Laigelh mi numei khat in ama pa sih hal dingin a pai uh ciang a halna ding phual mi thum kituh uh hi, ci hi. A mundang teng zong siluang li leh nga in ngak hi, ci hi. A kihal theite sumneite zong hi uh a, a kihal zo lote’n a it a ngaihte luang Ganges tuipi sungah pai uh hi. Tunai in tua bang a kipai leh luipi gei piaunel a kivui si luang 2000 val kimu hi cih thukizakna ah hong kigelh hi. Hih bang hong tung ciangin i labu a, “Nuntak hun tom mahmah hi, singteh pulh tawh kibang hi, buhlom hen tawh kibang hi, hunlap in,” a cih ka phawk hi. Singteh pulh tawh kibang takpi ahih manin Covid19 pulnatna taktak suak hi. Tutungin Pasian nasem pastor, missionary leh evangelist-te lim sih mahmah a, hih pulnatna leh Pasian nasemte’ nasepzia kikal etphathuai kasa hi. Catholic Church India in tutungin father, nuns leh bishop a site mi 350 val dingin gen uh a, tua mah bangin Protestant Pawlpite in zong tukum 2021 April kha sung bekbek hunbit nasem 250 valin hong sihsanin ciamteh uh hi.

Covid19 hangin a si inkuanpihte a ki it mahmah hangin misi kilawng thei lo, pawlkhat bang hankuang kikilhcip sa-in kipua a, inkuanpihte’n gal-et uh hi. Chennai ah nipi kalkhat apha naungek nih a nu leh pa un sihsan cih kaza hi. Tua bangin Pearsonmun khua panin naungek a nu in sihsan, ahih hangin doctorate in naungek honkhia thei, a mel i muh ciangin i lungtang hong zen hi. Ka lawm Nagate khat amah positive in ICU ah a om sungin a zi-in zato inn mundang khat panin na sihsan a, amah kihilh ngam nailo hi. Tua bangin Guwahati ah pastor a sem lai, keima hih theih bangin ka pattah a ithuai mahmah Tangkhul minam tulai takin zato ah om a, lametna tawm mahmah cih kiza hi. Ta guk nei-in sihna manna tuak leh a zi leh a tate mailam ding mihing lam panin gel haksa kisa mahmah hi.

II. INN GIMNAM SIA

Ko omna apartment sungah nuta thum studio room khat ah tuibuuk leh annhuanna tawh kithuah in om uh hi. A inneu bek hiloin amau mehduh nam pen a gimnam tuamtuam tawh sathau a kan hiden ahih manin a inn uh gimnam hat mahmah hi. Zingsang a thawhkhiat hun uh, a kongkhakpi ahon hun uh kithei hi. Besan sathau a kan gim khawng, lothangsan leh lothangkang gim khawng tawh amau kizutna sathau gimnam tawh a kigawm gim pen diik haksa kisa hi. Amau nuta teng sunkhua in kikhumcip thei bilbel uh hi. Amau a sungah om den uh ahih manin tua bang gimnam a om lam zong theilo uh himaithei hi. Inn gimnam i gen ciangin i Lai Siangtho sungah Lazarus sihna panin a thawhkik khit Martha in ama inn ah Jesu leh a nungzuite annekpih a, tua lai-ah Mary in sathau namtui tawh Jesu a khe a nuhsak i mu hi. “Amaute in nitak an na vak uh a, Lazaras ahihleh Jesuh tawh anne-in tukhawmin, Martha pen anpia-in a manlah hi. Tua laitakin Mary in a manpha mahmah nard sathau namtui thawl khat hong paipih a, Jesuh’ khe a nuhkhit ciangin a sam tawh a nulsak hi. Tua innsung khempeuh sathau namtui gim hong nam hi.” (John 12:2-3).

Martha innsung sathau namtui gim tawh kizel hi. Mite in i innsungah bang gimnam a za uh hiam cih ngaihsuthuai hi. Ei a inneite’n i zakloh hangin hong lengla mite’n i innsung gimnam na tel mahmah uh cih kimu thei hi. Lungdamkohna, Pasian pahtawina innsung khawng a gimnam zaknuam a, kitot kiselna, kimuhdahna, kisimmawhna innte a gim nam nap haksa hi. Hih ka gen leh 1993 November kha in Portland, Oregon ka omna inn ka phawk hi. Mikangte inn ah paying guest in ka om hi. Amau innkuan American Thanksgiving Day zang dingin inneipa’ nu leh pate kiangah zin uh hi. Tua inn golpi sungah kei kia ka om a, gamdang pan sangnaupangte’ ading ci-in company khat in kei zong bawngsa, voksa, aksa lompi thum hong pia uh hi. Ken zong India mite mehhuan ka theih danin bawngsa ka huan a, Mikang inn pen bit mahmah ahih manin kongvang khempeuh ka hon khit hangin “ai-eng leh lothang” gimnamte nipi kal khat sung bang tua innsungah nam lailai hi. Tulai-in i mehduh pawlkhatte i innvengte’n namsia a sak ding na om ding hi, cih zong phawkhuai hi.

III. MUSLIMTE ZINGSANG THO BAIH

Guwahati a ka omna uh ka innvengte uh Muslim vive hi. Ko omna tawh kigamlalo ah amau biakinn (masjid) khat om a, zingsang nai 4:00 in a siampipa un Allah phatna leh biaksapna hong tangko den hi. Tua bangin siampipa’ sapna ging a zakkhit uh ciangin pasalte zingtho suak uh a, mehteh zuak ding, ngasa zuak ding, sum thalawh dingte zingtho bek hinawnloin nasepna ciat ah kuan dingin hong gamlum uh hi. Tua zawh ciangin hong gamdai i cih leh amau sepna mun zuankhin na hi uh hi. Ka ngaihsutna ah bang hong om hiam cih leh zingsang thobaihte sum leh pai, nek leh tak ah zong na khangto hamtang cih ka mu hi. Zingtho ning ci mahmahlote sangin zingtho a sep ding zongte mah thupha sangtak zong ka sa hi. Zingsang lamsiau dingin nai 5:00 in ka pai ciangin tua lamsiau a ka paina ah mi na tam mahmah zo tawntung hi. Nupi papi nungak tangval zingsang huihsiang dik ding leh thala dingin a tai tawh, lampai tawh kitam mahmah ka muh in hong thalawpsak hi.

‘Minam khangto dingte zingtho baihte ahi uh hi’ ci leng kici khial lo ding hi. Tua hangin Muslimte amau omna munmun ah khangto mahmah uh hi. Mehteh mehgah limtakin cing uh a, tuate zuakin sum leh pai na zong uh hi. Lamka khuapi bang Muslimte’n mehteh mehgah hong zuak kei leh bang i meh tam ka ci thei zel hi. Tua bangin Assamese-te zong hunlui sungah - zingtho lo, nasep thanuam lo, amau lo amau kholo in Bangladesh panin Muslimte na sam uh a, gam leh lei neilo Muslimte kum bangzah zawh hiam ciangin innkip lokip hong nei uh hi. Nasem nuamte Topa Pasian in thupha na pia a, a lokhoh uh a sawt zawh ciangin amau lo khawng a suaksak tangthu gen ding tampi om hi. Keima awlmawh thu gen lai ding hileng Lamka gam bang mehteh mehgah lo bawlna ding mun tampi awng hi. Alim a al duh napi’in nasep sawmlo a mite huansa sepsa nek ding bek a sawm a thahatzaw lai khangnote hong om ciangin kiam lam a manawh i hi hi.

Tua mah bangin tanglai Pasian mite zingtho baih uh hi cih Lai Siangtho sungah kimu hi (Piancilna 19:27, Joshua 3:1, Late 5:3, 143:8). Cidamna kibang lo ihih manin sawt lup ding kisam zong ki-om thei hi. Ahi zongin Pasian zat mite a lumlum cih bang na om lo uh hi. Meitei minamte zong nitak ei mite lup zawh ciang kiho lai uh a, ahih hangin zinglol mahmah uh ahih manin khuavak taktak nai loin bawngleng tawh nasem dingte kipan khia uh hi. Hi bangin nek leh tak zong lehang i hau kei zongin i nekkhop kimu ding hi. America gam zong nasepna gam hi, zingsang a kuan pawl, zan lam a sem pawl cih bangin sun leh zan nasepna gam hi. Tua hangin leitung ah a haupen gam hi; ahi tak mah hi, cih ding hi.

IV. GUKTAKNA TAWH PASIAN BIA

Zingsang lamsiau a ka pai ciangin kala nupi nih zong ka mu thei zel hi. Amau lamsiau a hong pai hi masa loin mite huan sunga pakte a gu nuam na hi gige uh hi. Kumpite’n lampi gei a pakkung a suante uh zong a pak omte na lo thei zel uh hi. Tua pakte bang a zang ding hiam cih leh inn a tun uh ciangin a bawltawm pasian biakna in zang ding uh hi. Tua milim pasiante mai-ah pakte koih uh a, thupha ngen uh hi. A taktak in gen ding hi leng guktakna tawh amau pasian bia kici thei hi. Amau a nungta Pasian bia hi lo hiven phamawh se ding hiam i ci kha thei uh hi. Ei a nungta Pasian a biate’n zong i Pasian eima ut bangin kaih sawm i hidiam ka cih hun om thei hi. I Pasian khemsawm i hi diam, zawhthawh thu tawh eima nopsakna dingin Pasian bia i hi diam, ka ci hi. Thupha dawhna i bawlte hoih kasa hi. Ahi zongin hong piak leh lungdam ding, hong piak kei leh zong khasiatna a zatloh ding hoih hi. A hang pen hauhna cih khawng i lunggulh hangin a kemsiam ding kitawm hi. Zawnna hangin mihing nuntakna a kisiat mah bangin hauhna hangin zong kisia na tam mahmah hi.

Nung kha sungin papi khat tawh phone in ka kiho uh leh ama’n, “Sia aw, hauzo, damzo cih tawh sum leh pai hong zong siate i neih bangbang kipia a, amau ciah zawh ciangin ko a ngeina mah ka bang veve uh hi. Thu kigente maanlo maw, ahihkeileh ko mipite maan lo” cih hong dong hi. “Pia in hong dim ding hi” cih la tawh sumpi i khon ciangin a hun tawh kituak mahmah la ahi hi. Lai Siangtho in piakna in ngahna bulpi ahihna hong hilh hi. Ahih hangin hizah kong pia a, nang bangzah nong thukkik diam cih ngaihsutna tawh Pasian kianga piak pen itna leh lungdamna tawh hi lo, meet bawlna ahih leh a kilawm ding hiam cih ngaihsuthuai hi.
Mikangte’n nupa kal kikhen baihsa cih i ngaihsutna ah om kha thei tawntung hi. Ei zong i zi tungah ahihkeileh i pasal tungah kinga hi loin eima thalawhsa tawh nungta hileng bangzah i kiteng suak tam cih na ngaihsun ngei tam maw! Nupa khawngin i nuntak theihna khat pen i ki-it man hi masa loin ei bekin nungta paisuak lo ding cih lauhna khawng bek ahi kha tam? Nungkal sung a ka laibu simna ah “Munphiah thak zangin na phiat leh siang deuh kha mah ding hi, ahih hangin a sawt loin a lui pen tawh kibangin nin hong phiatsiang nawn lo ding hi,” ci hi. Tua ka tenpih ka zi ka pasal sangin a thak neizaw hi leng cihna lungsim a neite’n munphiah thak zang nuam tawh kibang uh hi. A sawt loin mihing mizia hong suak ding a, “a lui sangin hoihzaw tuan kei,” na ci veve ding hi. A hangin na zi kik zong vantung mi na hi loin nang banga lungkim thei lo khat na hi kha ding hi.

V. MOUNT EVEREST

Tukal sungin Himalaya leh Mount Everest tawh kisai laibu ka sim kha hi. Tuipi panin a kiteh ciangin Mount Everest pi 29,035 a sang hi. Hih mualvum pen leitung mualtung kahte’ lungtup, damsungin khatvei peuhmah a tungvum tung ding a cih uh mual hi. May 29, 1953 kumin Sir Edmund Hillary leh Tenzing Norgay te hih mualvum a kah uh hi. Tua zawh, tuni dongin mi 5000 tua mualvum ah na kah khin uh hi. Tua mah bangin mi 300 in sihna tuak khin uh a, tuate sung panin mi 200te’ luang tuni dongin tua mual vuksah sungah om lai hi. Everest kah nading lampi 15 bang om a, ahih hangin lampi nihte kilimzat pen hi. Tibet lam panin lampi khat, tua ciangin Nepal panin lampi khat na om hi. Hih mualtung kahte’n khatvei thu-in kahto mengmeng hi peuh mah loin kha thum sung bang hun kisam uh hi. Camp (giahna) a kizang mun li ah om a, camp khatna panin nihna kikal sung bang vuk tung ah nipi kal nih sung bang kileh den uh hi. Camp thumna ciang lauhhuai luatna om lo a, ahi zongin camp lina mun panin tua mualvum kikal “sihna phual” (death zone) cih min na pia uh hi. Bang hang hiam cih leh tua mun ah sihna tuak na tam penpen hi.

Hih mualvum ah a kah dingte’n US dollar 70,000 bang na bei uh hi. Nepal kumpi phalna lei kisam, tua ciang tua mualtung kah a makaih ngei Sherpas cial kisam a, amau kha thum sung hong kem ding uh hi. Mualvum dong a kah theite adingin tua mun dong hong makaih ding uh amau vaipuak hi. Tua bangin kizepna leh vante tawh kha thum sung nek leh tak tawh tul-sawm-sagih bei kici hi. Kum khat sungin April kha tawp lam a kipan May kha bei dong hih mualvum kah hun ahi hi. Bang hang hiam cih leh khuahun hoih laitak, vukguah leh huihpi om lo deuh bek hi loin khuahun siang ahih man hi. Mualtung kahna a site bang hangin si hiam cih leh oxygen sihna phual kici panin seh-thum-suah-seh-khat bang bek hita ahih manin lungam in puk, nak sam, sisan khang, vuk tungah taalin kia, khuahun siatna cih bang a tuamtuam om hi. A kahto laite sangin a kumsuk uh ciangin a tuahsia tamzaw hi. A kigenna ah kahto lai-in tupna ngimna nei in hanciamna in sihna tampi pelhsak a, ahi zongin a tung atun zawh hong kumsukkik uh ciangin kikem nawn lo, gualzo kisa baihlua cih bang zong hi kha ding hi.

Ka lawm Chinese American khat zong ni dangin Assam ah House Church planting thusinna pia dingin kum khat in nga-vei bang hong zin thei hi. Thusinna a piakzawh ciangin US lam zuanin vanleng tawh a ciah ciangin, ama khasung makaipa’n, “Nong ciah ciangin Bangkok ah nong tam ngei loh ding hi,” cih vaikhak hi. Bang hangin US panin India hong kuan ciangin Bangkok hong tam leh zong phamawh sa lopi’n bang hangin a ciah ciangin hong tam ken, ci hiam cih leh, “Vai thupi i zawh mateng khalam nuntakna ah zong kikem in i hanciam hi. Ahi zongin tua vai thupi i zawh ciangin i thungetna zong kikhiamin, gualzo kisakna, kitha-awlsakna kinei hi. Tua ciangin khemna kinang zolo hi,” a cihnopna hi. Tua mualvum a tun uh ciangin minute 25 sung a om uh leh a sawt pen hi dinga, manzaihna leh tawm khat khuadak cih loh sawt om theilo uh hi. Khuahun vot dan minus 36-60 degree Celsius bangin vot thei hi. Huih dik ding oxygen bung tawh ahih kei uh leh zong huih tawm mahmah ta hi. Tua mualvum tun ding a dam sungun a hanciam uh hangin hun tomcik sung bek om theihna ahi hi.

I leitung nuntakna ah mualvum i nei ciat uh hi. Laipilna, sumzonna, zi leh ta neihna ah tua mualvumte i tun hangin bangmah a tuamna om tuan lo hi. Tua mualvum ah zong tenden theih hilo hi. Lawhcinna, nopsakna i cih khawng hong tulbaih mahmah lel hi. Upna tawh khualzin mite’ adingin i mualvum “Pasian tawh kikholhna” pen a bei thei nawnlo nopna mun ahi hi. Topa Pasian in thupha hong pia ciat hen.