Miss Zenngaihsang @Sangi, Winner, Zofa Lelte 2022 kawmna
by Lian Samte, Aizawl

Awle, Heutupa V. Nunlian in ‘Zofa Lelte Tungtawn a Testimony” FB Wall ah hon phoukhia a. Ama tel thu hilou in, sapna leh chialna om ziak a panmun guan a om ahihna leh lamet sang a ‘support’ muh haksazaw ahihdan thu te hon gelh te sim lechin Zofa Lelte 2022 Competition hong suahkhiakdan leh atup leh ngim te na thei mai ding. Va gelh sau-sau le a ngaikei. Huaiziak un.

Huchiin, Manipur Region apan in mi giat ngut hon sawlkhia ua. Amau te tuh Joseph N. Songkhuallian, Lhunkholam Kipgen, Jemhoi Khongsai, Sonia Lamngaihchin, Ngaineiniang Tombing, Zenngaihsang, Vungthianhoih leh Hoineivah Baite te ahi uhi. Dendon tak ale…. Hichibang khangthak la sa state pua kan a sawl theihkhop a siam hiaizahpi ana om ihi umaw! A heutupa un a gimpih namah a, a suanhuai un a lamethuai khopmai uh.

Chihbang in, lametna lianpi toh hong kuankhia ua. Aizawl hong tun un ka va dawn a, ka inn a pilut in, singpi ka dawnpih a (sang le tel in), a giahna ding uh ka bawlsak pah soksok a, chi’a kisatheitak a gen ding ka neikei. Khat mah leng ka inn a hong tunglou ahihman un. Pii leng ka va pii kha thahah kei. Organiser te fellua ahihman un VIP treatment pah ziahziah mai ding uh ka koih mai hi.
Ahihziak in, tuailai fel taktak ahi ua, upa zahdan siam in, kampau a kidamthei ua, biakna a ngaihsak uhi. Huai ka chihna ziak tuh, hong tun nung uh sawtlou in ka saptuam uh, EBCC, Aizawl South, a hong kikhawm pah tiltel uh hiven. Amau tuh Pa Mangzalian Suante te inn hong bulbawl ua. Pa Lian mah in ana makaih in ana huai a. A music track di uh bang le a bawlkhak pawl om chi hileh kilawm. Amah dong mai ua.

Biakinn a hong kikhawm mai hilou. Pathian phatna la te hong sa in biakna hong hulumsak mahmah ua. Nuam khatel e. Ka sound system uh hoihlou ka chihchih uh, “amau hong zat uleh hoihlua ana hidan ei ve”, achi aka Pa Mangzalian in. Huchia biakinn a zai hong oih ua kipan in khatna la tuh om ngeingei di uh eive, ka na chi lungsim a. Gen bel ka genkhe kei 😉.

Huaizoh, Pa Mangzalian te inn ah kithuahkhawmna ka nei ua. Deihsaktu leh ngainatute ka paikhawm ua. Ka saptuam-khozang un a-fans uh ka suakpah mai uhi. Upa, tuailai, nupi, chi’a kidam omlou. Gamteng ka na genkhum ua, advice, chidan in. Amau sang mah a lasak siamzaw leh la/music theizaw ka bang mai uh. Eimi te ngeina chiin hon ngaisiam mai un. Deihsakluatziak a genval sakval omleh ‘hon’ ngaidam henla…chikawi thah! Piaktheih, hihsaktheih zaw bangmah ka na nei tuankei uh. Thuhilh vakvak chihlouh ngal. Ka hihtheihsun un tuh deihsakna packet lianpi-pi leh tampi toh ‘ding inla na khe in kipai in’ ka na chi leltak maimah ve ua.

Huchiin, kidemna tuh hong paitou zel a. Top 10 tan bang hong tungtou. Ei a te hong ching toutou om bang chu, phurhuai himai. “Nou ziak a Youtube, Lelte, chih khawng ki-et kholoh ahi aw,” chi eivoi Upa K. Khamchinlian in. Dik venti.
Competition pailai mahleh, hun-awl aneih chiang un biakinn mah hon zuan tintin ua, phatna la te hong sa in, hong pawllim thei zel uhi. Kou saptuam mahmah hon ngaina uh le bang ka sa. Nak noplouh. N’on eng lawzen di ua! Biakna a ngaihsakdan ua pan Pathian lau mahmah ahihdan uh kilang in, vualzawlna leng atang ngei ding uh chih gintakna lianpi ka nei tinten mawk aka. Midang te’n le gingtalou tuanlou in.

Awle, Final Night hong hita chu, fans te omthei nawnlou ka himai uh. Amun a ‘live’ a va uap dia kichial vengvung mai. Kei le Nu Hauvung in hong chial kha aihbang. Va uap in, support-banner bang va zak deidai bang le ki-om hiin maw. Banner laang tegel bang atal uh kolh vetvut tuak sim zomah. Fans le anei upa thei ve uh, hon chi maithei na ua zaw, kidek haksa lua eive. Hoihtak in en le uchin, huai banner-nuai a dak keukau bang le ei-a te supporter mah ahi. Amah le a mai asau sim ta.

Results Night.

Judge Pu Jeff Akai Haokip in amasalam deuh a, Miss Zenngaihsang lasak tung a personal comment abawl cheuh, “Kuanlam a ka lak ua naungek khat tel ka chihleh nungaknou ana hi a…” achih ziak le hituanlou in, banghiam khat lamet nei mah ana kibang mawkmawk hi.

Huchiin, 3rd Prize goes to, hong hita. Khopilian lamte’n tuh, ‘2nd Runner-up’ achi d’u chu.

Manipur Region apan contestant khat min hong ging tuh….dip kisai latlat pah ngal. Kisaktheih bang nak omlua hiin maw. Prize la theilou zen in i ‘emotional’ maimah ua hiven.

‘And, 1st prize goes to….’
“The Winner is…” chih mai awmtak ka chi lungsim tuankei.
‘is…’
‘is…’
‘Zenngaihsang’ hong kichi bang tuuuuu……..

Fans-family te TV enlai awngzak, sousang gawp chih bang le om, chih thukhonung kiza. Huchi’a ei-a te bang in khatna hon lak uleh ana kihi hemhom mawk. Eikia a om bang le kimawk nuih huauhuau.

Huainung Pathianni masapen ah Tlangnuam Aizawl South lam fans-te toh kithuahkhawmna hun kineithei pah. Huai hun ah tuh kipakselua gen di thei zozen le omlou in kihi hemhawm vek, chih di hia. Kimawk nuihnuih mai. Huchiin, biakna kikhop tawp in Pa Mangzalian Suante te innlam kimanoh seuhseuh a.

Kei ka tun in Winner Miss Zenngaihsang leh a lawmnu Miss Vungthianhoih te tutnanip ah ana tu tittet khin uhi. Akiim-le-kiang tutna te ah upalam leh agal deuh ah nu lam te ana tu dim sim ta ua. Winner & partner tutna taklam lianpi ana awng hekhok mawk hi. Kei le a nawl khat a tutnanip tung a ka va tutdek leh ‘lady’s purse’ khat kikoihsa ana om a. Indian Railways style a tutna khamna hiding hitah e, chiin huai Winner-nu kiang a mun-awng tuh kisuanglah sim kawm in ka naih doondoon zaw ta hi. Lah kipaksim giauguau in. Kuamah ana tut ngamlouhna zaw hi ding hiven. Teknung-vuainung a hampha kha tuh kisuak ahi phot peuhmah a….

Huchiin, Pa Mangza makaih in kipahpihna programme hong kipan ta. Pastor Pumsuanmung, EBCC, Aizawl in hanthawnna, deihsakna leh vualzawlna thu te hon gen a, thumna hon neihsak bok hi. Huaizoh in Miss Zenngaihsang in kipahthu hon gen zek. Huaizoh tuh thugen ut kituh. Upa lam te’n tang deuh uh. A thugen te uh na theihnop uleh Pa Mangza te nupa ana dong mai ua.

Huai ni a kou fans te hamphatna tungtuan tuh, live, fet-to-fet (face-to-face) in, kisawkpha phial in Winner-nu lasak ka ngaiha uhi. Lasiamlouh tuh kisik huai mahmah eive. Va dinpih ek mai dia hoihlua…a second voice dia. Tulai a huaikha bang chita uh a le? Backup vocal achi uh eita kha?

Kipahna luanglet ziak in, zannitak dak 10 nung in lawm te ana kikankual ua. Cake bawlsiam Nu Chiching, w/o Pa Tunson, ana om laizang a. Hilele maida omlou, baking soda omlou…. Bangchichi hiam a sutuah in aziing a ding in cake bel bawltheih hi veve hi. Nih tak hi zomah. Huchiin, Zofa Lelte 2022 Winner, Miss Zenngaihsang ngei in huai ‘Vualzohna Sangnip’ (Victory Cake) tuh hon at ta hi.
Amah Sangi tuh kei sang a niamzaw deuh, ngoudan hun geih, maibial pian, samsau mam zitzet, biangki-kivawk, mukzum chiuhcheuh, mit siang kilkel, nuihmai leh hasiang sitset ahi. Zomi-Paite novelist Pu Eugene Chinzahao in describe letuh ‘angel’ bang mai in a genkhe thei di. Angel mu tuh ahituan hetkei nadia. Huchi khop kha hinchin. Kei bel kamsiamlou ka hihman in, ‘melhoih’ ka chisuk lel a.
Huan, hun kibichilhtak kal ah, ka na houlim tittit zel ua. Amah tuh mi hounuam, kamdam, kisatheilou, leh lungsim siangthou tak leng ana hi nghe nghe ani. Pa Ginsuanmang in, “Nak thuman uh e maw? La sa dia I sawl leh hon sa pahpah uh. Utlou chile ule himai hi a…” achi. Ka theihnop leh ka dotna te kizen tak in hon dawng zel a.

Huchiin, hun-am leh kikhelahtak in, sunnung dak 3 pelhzek in, Organiser te toh hih ding tampi aneihlai ziak un, hon paisanta uhi. Anung ah upa te leh fans te’n ka entum vung mai ua, ka houlim lukluk nilouh uh.