Mualnuam khua ading solar hawmkhia       

Lamka, June-7: Thanlon sub-divn sunga Mualnuam khua ading solar home light 40 banah solar street light leh a khuam (post) kithuah tuni’n DC office a Storeroom apan hawmkhiak hi a, DC/CCpur; ED/DRDA leh SDO/CCpur te’n beneficiary-te lakah solar light hawmkhia uhi. DC/CCpur in a genna ah tuni a solar light kihawmkhiate BADP 2010-2011 tungtawn a hawmkhiak hi'n gen a, Singngat sub-divn ah Model town ding in Behiang leh Thanlon sub-divn ading in Mualnuam khua telkhiat hi'n gen hi. Solar light ngah innkuan 40te’n a phatuam theipen a zang ding leh khawkim leh khawkiangte etton theihdia zang din leng theisak hi. Mualnuam khua a BPL family innkuan omteng solar light piak kisawm ahihdan DC in gen a, tutung in innkuan 40 telkhiat masak hi'n gen hi. Solar light teng Mualnuam khua puaktung sak hidin leng DC kigen hi. Solar light kihawm khiate V.Hangkhanlian, ex-MLA (Thanlon A/C ) hunlai in BADP 2010-2011 fund apan Rs 20 lakh a thawh zang a kileikhia hi'n leng kigen hi.

India President telna ding ah HT Sangliana, IPS(retd) & ex-MP min leng genlat khak in om

Aizawl, June-7: India President thakding July 2012 a telna(election) om ding ah tutung in singtangmite’ adingin ‘chance’ piak hita hen chih pressure ahat mahmah a, huchi kalah, President lentheidia gintak singtangmi bangzahhiam min genlat ahihnungin tu in National Minorities Commission Vice-Cairman HT Sangliana, IPS(retd) & ex-MP  min leng dawkkha hidanin thusuakin gen hi. Congress President Sonia Gandhi in maban a India President telna ding ah PA Sangma a deihlouh ziakin India malsuahbial apan singtangmi ding ahih thouthou leh chi’n Sangma khingtu dingin HT Sangliana deih chihthu om hi.

     Lok Sabha Speaker-lui PA Sangma in hun bangtanhiam paisa apan naktakin kisakhol kawm in panla a, huai kawmkalah amah lou midang a kipei lua omlou hi’n kigen hi. Congress Working Committee (CWC) te’n zanhal a meeting ah Presidential election ding tawh kisai Sonia Gandhi khut ah a ngak ziak un mi tamtak in Gandhi mitsuan lel uh chihna ahi hi.Hibang kalah HT Sanglian in bel constitutional post (President) let ding chih a mang a leng manpha lou himhim ahihdan gen hi. Himahleh, huai tuh ding a sawl a a om lebel mansa ahihdan genkawmin, bangteng hileh Pathian thuthu ahi chi hi. Sangliana ahihleh singtangmi ahih genlouh Christian community apan hi a, Indo-US nuclear deal tawh kisai in Parliament a ‘vote of confidence’ lak ahihlai in a omna party BJP taisan in Congress ah lut a, huai apanin Gandhi family in pakta mahmah hi’n kigen hi.

    Aman Karnataka a IGP ahihlai in nasem hoih mahmah in ama tanchin pansan in Kannada feature film 3 bang bawlkhiak hi a, aminthan ziak mahin North Bangalore apan BJP ticket in MP dingin telchingin ana om kha hi. Lawm-le-vual ahauh thutuam hileh India malsuahbial a Nam neu tuamtuamte’ buaina tawh kisai leng ahunkhop suvengkha hi’n kigen hi. Member of Parliament lui Sangliana in India gamsung a minority community-te’ gupna ngah mahmah chih hi a, PA Sangma in “tribal president” campaign abawlnak peuhleh amah deihtu mi atawm luat ziakin Sonia Gandhi in a gup zawkmah leh HT Sangliana adingin ‘chance’ lian mahmah thei ding hi’n kigen hi.

     AIADMK chief Jayalalitha leh BJD chief Naveen Patnaik in bel President thakdin PA Sangma deih uh ahihdan puangkhin uhi. Hileleng NCP President Sharad Pawar in Sangma gup sawmlou ahihdan kichian khin a, huai kawm in United Progressive Alliance(UPA) candidate pen mah support dia mansa ahihdan gen hi. Congress sung ah tulai in leader tuamtuamte’n ngaihdan pawng gen ngamlou uh a, agukin Union Finance Minister Pranab Mukherjee, Vice-President Hamid Ansari, West Bengal Governor Gopalkrishna Gandhi, President lui APJ Abdul Kalam leh Lok Sabha Speaker Meira Kumar adingin kisehkhen sim uh hi’n kigen a, AICC Chief Sonia Gandhi deihsakna leh vualzawlna kua’n a tangdia chih bildawh mahmah chiat uh chihthu om hi.

Mizoram Annual Plan dingin Rs 2300 crores bikhiah

New Delhi, June- 7: Union Planning Commission in kum 2012-13 a Mizoram Annual Plan dingin Rs. 2300 crores bikhiah hi. Planning Commission a Deputy ChairmanMontek Singh Ahluwalia leh Mizoram Chief Minister Lalthanhawla in tuni’n Planning office ah hun sawtkuamtak a houlim nung un Planning Commission in Rs 2300 lemsakpih hi.

Huai plan size apan Rs. 200 crores ahihleh Finance Ministry, Govt. of India sum neihbelh lemchan dan zirin kikawmtuahna lampi puahna(special road development programme) a zat hidinn kigen hi. Mizoram plan size hihfelna hun ah India malsuahbial state dang khenkhat aleng hih fel hi a, Mizoram Annual Plan kumlui asang in 35% in pung a, kumdang tawh teh a apun tampen hun hi a, Assam Plan punna ahihleh 16% leh Manipur 9% banah Tripura 15 % apung hi’n kigen hi.

     Montek Singh in food grain production & productivity tutungin ngaih poimawh hiding chi a, kumteng a louma a buh piang atawm deuhdeuh ziakin Agriculture & Allied Sector azat ding sum poimawh zah koih hi a, state govt in project liantak a neih New Land Use Policy pe’n nautang in tuasang a a manpha zawsem a ahamphatpih theihna ding uleng gel ahi chi hi. Agro-based industries, food processing, micro industries leh gua (bamboo) tungtawna industry tuamtuam omte leng naktak a dopsang sawm ahi chi’n Montek Singh in gen hi.

     4^th Five Year Plan sungin Mizoram ah khantouhna a om dan mit in muhtheih chi’n Montek Singh in gen a, Road Transport, Power, Education leh Health sector ah khantouhna thupi mahmah chi hi. Mizoram state a khua om 94.4% te ah kikawmtuahna bawlsuak vek hita a, khua 61.19% te ah bangchituk in vuahzu, nisa leleng kikawmtuahna buailou dingin lampi hoihta a, khua 81.31% in meivak muta chi’n Ahluwalia in gen hi. 2011 census dungzui in Mizoram ah lehkha simthei leh gelhthei 91.58% a phak ziakun 93.91% asang Kerala zomtu hi’n kigen hi.

UZO in June 5 observe zel ding

Lamka, June-7: ‘Zou Nampi’ Pa (Father of Zou nation)’chih minvuah om Upa T Gougin (87), ex-Minister, writer & journalist sihni June 5 tunung in UZO Gen HQ amah theihgigena kawmin kumteng in zang(observe) ding ch’n Ginsuanhau,MLA & President UZO Gen HQ in gen hi. Ginsuanhau in a gendan in Upa T.Gougin panlakna ziakin kum 1956 in govt in Zou tribe recognition bawl a, kum 1961 in UZO ana dinkhia in President masapen in pang hi’n gen hi. Aman a genzelna ah Zogal Memorial Hall complex gam leng Upa T.Gougin in a piakthawh hi a, adamlai a nasepte Zoute ading kia hilou in Manipur singtangmi adiak in Zomite adin mangngilh vuallouh na tamtak semkhia hi’ gen hi.

Coffee Growers’ training om

Lamka, June-7: Coffee Board saina in tuni in New Lamka(G) a Venus Hotel ah Coffee Growers’ training programme om a, huai ah coffee ching(growers) mi 30 vel ban ah khaw tuamtuam a hausa hunkhop tel uhi. P. Langthasa, Deputy Director, Coffee board of India; P. Choudhury, Liaison Officer; AK Bora, specialist (Agronomy) leh T.C Hazarika, Field Officer, Jorhat te’n training a telte sinsak uhi. June 8, 2012 in Munpi leh Tallian a coffee chiinna munte enkhe ding uh hi’n kigen hi.

Naupang khat electric in man

Lamka, June-7:S. Geltui khua ah tuni sunnung in theigah hai(mango) lou dinga kisa lai, Thanglianmung(13) s/o Khupchinmang of S. Geltui a tuanna singkung leh electric gui ‘High Tension’ kinaih khak ziakin haikung in electric vurrent hipkha in electric in Thanglianmung man a, amah haikung apan kia hi. Electric current in a ziakin pumpi mun tamtak liam hi’n kigen hi. Huai hun lai in Thanglianmung nu leh pa khua ah omlou uh a, khaw sau in a theihphet in Lamka zuatpih a, naupang nu leh pate tawh kimu in hospital ah admit uhi.

Sub-divn 2 ah leng bank zat hiding

Lamka, June-7: June 5, 2012 a DLCC meeting thupukna dungzui in Thanlon sub-divn nuai a MGNREGS Job Card neiteng in tunungin SBI/Thanlon branch apan sum lakhe ding uh a, Singngat sub-divn a MGNREGS Job Card neiteng in leng Singngat a Central Bank of India apan sum la ding uh chi’n DLCC meeting ah thupuk uh chihthu om hi.

Hot cook food item hawmkhia

Lamka, June-7: Dist Social Welfare office a CDPO office ah Lamka Block sunga Anganwadi Centre- te ading in June 2012 quota Hot-Cooked Food item tuamtuam -antang, ankam thau, dal leh naupang vitamin damdawi tamkhop hawmkhia uhi. Huai Hot-Cooked Food itemte Anganwadi Worker te'n amau centre chiat ah huan minsa in naupangte manbei in nasak ding uh hi’n kigen hi.

Free text book hawm ding

Lamka, June-7: Govt in CCpur dist ah academic session 2012-2013 a zatding free text book ahawm zawhsiang hinailou a, June 11-16, 2012 in CCpur govt H/S ah ZEO leh CEO/ADC nuai a school te ading in kihawm kheding hi. June 11, 2012 in Samulamlan block leh Tipaimukh block a hawmkhiak hiding a, June 12, 2012 in Henglep leh Thanlon block ate ham hiding hi. June 13, 2012 in Singngat leh CCpur block ate hawmkhiak hiding a, June 14, 2012 in ADC/CCpur block leh Tipaimukh ate hawmkhiak hiding hi. June 15, 2012 in ADC/Samulanlam block leh Thanlon ate hawm hiding a, June 16, 2012 in ADC/Henglep block leh ADC/Singngat te ading hawm hiding hi.

ZDV in T Gougin, ex-Minister suun

Lamka, June-7: United Peoples’ Front (UPF) nuaia om Zou Defence Volunteer (ZDV) President Kamkhanpao in T. Gougin MA, ex-Minister sihna tawh kisai a ‘Condolence message’ a bawlna ah Manipur chauh hilou a India malsuahbial a singtangmi pau kitheihtuah teng khekhat a dinkhawmna dia kal a suanna khangthakte’ adin mangngilh vuallouh hi a, Kuki/Zomi/Mizo khentuamlou in Zosuante’ khawsuahna dia pan a lakna leh mipite ana makaihna ZDV in ngaisang mahmah chi hi. Makai muanhuai leh sautak muban heutu khat mansuah a om kichi Zosuante’ adia manna liantak ahi chi’n ZDV President in gen a, a nutsiat a innkuanpihte suunpihthu leng puang hi.

Meritorious Award-cum-Felicitation

Lamka, June-7: HSA Saikot Unit saina in June 9, 2012 in Saikot a Youth Club Hall ah “The 4^th Meritorious Award-cum-Felicitation Programme 2012” om ding a, huai ah Chief Guest in T.N. Haokip, MLA(59-Saikot A/C) pang dinga, Guest of Honour in Ros Infimate, Exe. Secy, RPCNEI leh Functional President in Lal Hossan, EM/ADC pang ding hi. Huai ah lawhchinna ngah student-te pahtawina banah award piak   hiding uujhi.

SUUNNA

Sidhun Tamang (64) h/o Ningkhanchiin of G. Mualkawi zan nitak dak 10.40 in Sielmat Christian Hospital ah sinna ziakin si a, tuni’n Gangpimual hanmual ah kivui hi.

Reuben Kapsianhau(12) s/o Lalneihmuan of G. Mualkawi tuni zinglam dak 8.00 velin TB natna in si a, tuni mah in Gangpimual hanmual ah kivui hi.

Union Minister in Manipur hongpha ding

Lamka, June-7: Jairam Ramesh, Union Minister(Rural Dev & Panchayati Raj) in June 9, 2012 in Manipur hongpha ding a, central apan official hunkhop in hongzui ding uh hi’n thutut kingah hi. Zinglam dak 9.00 in Union Minister in Imphal Airport bawh ding a, huai apan Bishnupur district zuanpah ding a, huai district sunga developement scheme nasepna tuamtuamte enkhe ding hi’n kigen hi. Union Minister in CCpur district leng pha ding a, MGNREGS leh PMGSY nasepna banah development scheme tuamtuamte enkhe ding a, sunnung in Imphal ah kiknawn ding chihthu om hi.

Health & FW Minister in Jiribam pha

Imphal, June-7: Jiribam biala Chhotobekra ah sungkhawh leh luak(diarhoea & vomiting) kithuah natna hii leng in naupang 1 a sih banah 40 vel damlou om chihthu om ziakin Phunzathang,Minister(Health & FW, GAD,CADA) in tuni’n Jiribam bial pha a, Medical Director Sh Shurchandra Sharma banah specialist doctor hunkhop leh medical team in Minister zui uhi. Minister in tuni nitak nungin AIR/Doordarshan tungtawn in a genna ah natna hii leng pen control zawh ahihdan gen hi. Health Minister in Jiribam Community Health Centre(CHC) dinmun leng enkhia a, lupna 50 tan om ding hi’n gen chihthu om hi.

Bomb puakzak ziakin mi 2 liam

Imphal, June-7:Tuni nitak dak 6.15 velin Thoubal Moijing Awang Leikai a om Md Nazimuddin tenna inn ah meltheihlouhte’n a koihguk uh Chinese handgrenade puakzak a, mi 2 liam in tuni’n RIMS ah etkol hi uhi. Aliam mi 2te Md Mustaq(32) s/o Maniqun of Moijing Chingya Leikai leh Md Azjuddin(34) s/o(late) Sanaton of Moijing Kangjeibung hi uh a, bomb koihgu kuate pawl hihiam chih Police in suizui uh chihthu om hi.

State level Watermelon Festival

Imphal, June-7: Nahakpam Foundation te’n Horticulture Mission Manipur apan huhna zangin June 8-12, 2012 sung Iboyaima Sumang Leela Sanglen ah ‘1^st State Level Watermelon Festival,2012’ organised ding uhi. June 8, 2012 nitaklam dak 4.00 in honna function om ding a,huai ah M. Kuber Singh, Joint Director(Hort & SC) khuallian a pang in Waterlemon Festival hong ding hi.Festival om hunsung in watermelon tawh kisai seminar leng om ding a, huai ah specialist leh expert tuamtuam resource persons a pang in sinsak ding uhi.

Helpawl atel numei khat mankhia

Imphal, June-7:Thoubal Commando te’n zan nitak dak 5:30 velin Thoubal Kyamsiphai Mayai Leikai lak operation a bawlna uah KCP(Wanglem) group atel numei khat mankhia uhi. Matkhiak a om Ms Kh. Ningol Lata Devi w/o Th. Tiken Singh hi a,Commando pawlin amah akipan in Chinese handgrenade khat 1 leh mobile phone 1 mukhia uhi. Amah thudotna apan a kipuandan in June 5, 2012 nitak in Thoubal Haokha a NRL Oil Pump bomb paihkhumte lakah hidan in kipuang a, Imphal-Moreh kamtuah in KCP (Wanglem)te adia galvan pawvialtu apang hidan inleng kipuang chi’n Police thusuak in gen hi.

Motorcycle in a phutkhak damzoulou

Imphal, June-7:Pallel Bazar ah zan nitaklam dak 5:30 velin motorcycle a tai khat in khe a pailai Hegit Tontang (65) s/o (late) Sangku of Sangourou village, Chandel District phukha in taisan a, Hegit a liam nasat ziakin JNIMS tut nungin Shija ah refer hi a,hileleng dam zoulou tuni zingsang baihtak dak 1:30 velin si chihthu om hi. Huailou thuthang kizadan in Dharamshala a Kolkata Hardware Store ah zan zinglam dak 10:40 velin meltheihlouhte’n ava koih uh Chinese handgrenade khat muhkhiak hi a, City police- te’n va lakhia uh hi’n kigen hi.

A/R te.n khamtheih tamtak mukhia

Imphal, June-7: Zan zinglam dak 11:30 velin 9-Assam Rifles te’n Moreh ah khamtheih a sumdawng a Myanmar lutsawm mi 2 mankhia uhi. Huai mi 2te Samuel (30) s/o Thanghluh leh Thangkhosei(43) s/o (late) Thongkhojam of Dalpati Ward No. 2 Moreh hi uhi. A/R te’n amau akipan damdawi khamtheih Pseudoephedrine Hydrochloride kichi kg. 173 mukhia uhi. Huailou in 24-Assam Rifles te’n tuni sun Lokchao ah Pseudoephedrine kg. 300 vel ding mukhia uh a, aneitu S. Hlunkhohao Haokip (22) s/o S. Tongkhothang Haokip leh S. Tilkhothang Mate (18) s/o S. Tongkhosei Mate of Tengnoupal, Chandel District leng mankhia uh a, Narcotic Control Bureau, Imphal ah pekhia uh uh chihthu om hi. Huai damdawi khamtheihte akigawm in Rs. 2 crores val man hi’n gen uhi.

NSCN(I-M) leh Tangkhul-te kihou  

Ukhrul, June-7: NSCN(IM) top leader khenkhat leh Tangkhul community sunga civil society leader-te banah saptuam makaite’n zanin Ukhrul a Union Baptist Church hall ah meeting poimawhtak nei uh a, huai ah Dist Council(ADC) boycott tungtang banah, Indo-Naga peace talks dinmun leh maban kum 2014 a MP election ding tawh kisai genkhawm uh chihthu om hi.

Thusuakin a gendanin huai meeting ah Tangkhul pawlpi tuamtuamte’n NSCN(IM) leh India govt in Indo-Naga peace talks aneih utawh kisai lungtunlouh thu IM makaite genkhum ua, hun sawtpi paisa huna athugente uleh tulai a athugente uh kibang thou chihkhum uh hi’n kigen hi. Huai Tangkhul consultative programme hunah NSCN (I-M) functionaries ‘Kilonser’ K.P. Huray, emissary to collective leadership V.S. Atem leh Standhope Varah banah Tangkhul Naga Long (TNL) President lui Stephen Angkang leng tel uhi

Indo-Naga ceasefire tawh kisai a thuthak zak lamen in Ukhrul district apan mi poimawh tampi hall talou zenin paikhawm mahle uh thuthak zakding a neihlouh ziakun NSCN(IM) -te mawhsakthu genkhum uh hidanin kigen hi. District Councils tawh kisai Nagate’n “boycott call” a bawl uh sutzop zel hidin NSCN(IM) leader te’n gen uhi. Maban a Outer Manipur Lok Sabha member ding telna tawh kisai leng genkhawm nei uh a, ahihziakin a thupukna uh puankhiak hilou hi.

KPO/UTLF in thupuan bawl

Papao, Info & Publicity, KPO/UTLF in thupuan bawlin a taklatna ah kum 2010 akipan Kuki state movement kipankhia in sutzop zel hi a, KPO/UTLF kichi Kuki mipite sik-le-tanga galvan tawikawma panla hi’n taklang hi. Kum 1917-1919 Kuki-Anglo War laia Kuki mihangsan hinna piate, Kuki National Assembly(KNA) nasepkhiakte, United Peoples Front(UPF) leh Kuki National Organisation(KNO/KNA) nasep leh movement om etzui nungin thil kipahhuai ahihleh Organisation/badge tuamtuam om mahleh ngaihdan kilamdanglua omlou ahihdan muhkhiak hi a,KPO/UTLF in Kuki Nation based Organisation-te lakah kizoppih leh guptuam tuni tan neilou hi’n thusuak in taklang hi.

       Kuki state omkhiak theihna ding in KPO/UTLF in leng India Constitution a Article 224 & 244(A) tawh kituakin India govt lakah Mizo for Mizoram, Assamese for Assam leh Naga for Nagaland ahih bangin state tuam piaktheih mah hi a, India freedom fighter atel Kuki mite tunitan bangziaka Kuki state piak theihlouh hi hiam chikawm in galvan tawikawm a kiphinna om hi’n leng thusuak in taklang hi.Nampi tellou in nampi adia masawntheih hilou ahihna ah nampih mipite’n leng KPO/UTLF a kigawmna thuap chiat dingin leng ngetna bawl hi.

Manipur singtanggam ngaihpoimawh diak hiding –O. Ibobi

Planning Commission in kum 2012-13 a Manipur Annual Plan dingin Rs, 3,500 crores bikhiah

Imphal, June-6: Planning Commission a Deputy Chairman Montek Singh Ahluwalia leh Chief Minister O. Ibobi tuni’n New Delhi a Yojana Bhavan ah meeting uh a, huai ah kum 2012-2013 sunga Maniput Annual Plan dingin Rs. 3,500 crores bikhiah uh a,huai lakah Special Plan Assistance(SPA) leh Special Central Assistance(SCA) kigawm Rs. 1200 crores tel hi. Manipur govt in bel tukum 2012-13 a Annual Plan dingin Rs. 5,100 crore ngen a, huai lakah Special Plan Assistance(SPA) leh Special Central Assistance(APA) kigawm Rs. 1500 crores leng telsak din ngen hi.Kumlui 2011 in Manipur in Annual Plan Rs. 3210 crores ngah a, huai lakah Special Plan Assistance(SPA) leh Special Central Assistance) kigawm Rs. 300 crores leng tel hi.

     Chief Minister O. Ibobi in Planning Commission Dy Chairman tawh meeting ah a gendan in Manipur state govt in development lam nasepna ah Manipur singtanggam ngaihpoimawh hiding a, vanzat pioimawh(infrastructures) poimawh tuamtuam banah power(thuneihna) tamsem piak hiding a, singtanggam ah investment tamsem a lut theihna ding in policy thak bawlin panlak hiding chi’n gen hi.

     Planning Commission a Dy Chairman Montek Singh Ahluwalia in Manipur govt nasepdan lungtunhuai sakthu gen a, state sunga infrastructure lam kikhiakluatna omte kilual thei dinga panlak poimawh hi’n gen hi.Kum 2000-2009 sungin electricity,gas leh water supply banah public administration tawh kisai panlakdan ze-awl deuh sakthu gen a,transport, storage leh communication lam in masawn zawdeuh hi’n leng gen hi. Education leh Health lam leng nasazawsem a panlak deihuai sakthu leng Dy Chairman in gen hi.

   Chief Minister in state govt in sepkhiak dia a ngaih poimawh deuhte a taklatna ah health, education, women & child welfare, nutrition leh food security hi’n gen a, backward, remote leh border area lak puahna lam leng poimawh ngaih hidin gen hi.Huailou in state govt in power, drinking water, healthcare services, school education, irrigation leh sports lam leng ngaih poimawh hiding chi hi.

VIP hunkhop in Lamka pha

Lamka, June-6: Thangso Baite, MP(Outer Manipur), Dr Chaltonlien Amo, MLA & Chairman Hill Areas Committee(HAC) ban ah mi poimawh hunkhop in tuni’n Lamka hongpha uh a, Upa T.Gougin ‘Zou Nampi’ Pa(Father of Zou nation)’chih minvuah hial a om galna ah tel uh a, nitaklam in Imphal ah kiknawn uhi.

Police in Special Drive pan ding

Lamka June-6: SP/CCpur in tuni a thusuah a bawl dungzui in kuama’n Gari ah glass vom(black tinted filmed glass) thuahlou ding in theihsakna thusuah bawl hi.Thusuak in a gensan in Gari a black film glass thuah a om leh Motor Vehicles Act,1988 nuaia section 103na leh Central Motor Vehicle Rules,1989 a Rules 100(2) bawhsiatna hi a, huaite tungah dan dungzui in action lak hiding chi’n taklang hi.Huai tawh kisai in district Police te’n June 11, 2012 akipan in Special Drive pan ding huh hi’n leng SP in taklang hi.

Kha 1 sungin gari 122 kibehlap              

Lamka, June-6:CCpur district ah April 2012 sung in gari tuamtuam 122 kibeplap a, huai hundung in transport office in revenue Rs 9, 73, 200/- mukhia in govt ah challan in submit uhi. Huaiban ah May 2012 khasung in gari tuamtuam 143 kibehlap in Transport office ah registration kibawl a, deptt in revenue Rs 7, 20, 094/- mukhia in govt ah challan in submit uhi.

DC in Sericulture office enkhia

Lamka, June-6:Ms. Jacintha Lazarus, IAS, DC/CCpur in tuni sunnung dak 1:00 in Bijang a Sericulture office enkhia a, office campus sung a Store Room tuamtuamte leng en a, huaizawh in office staff-te meeting neihpih hi. DC/CCpur in sericulture deptt nasepkhiakte leh maban nasep dingte kanchian a, office signboard tak ding in leng theisak hi’n kigen hi. Maniram Sharma, IAS, AC to DC/CCpur; Laltlanpuii, SDO/CCpur; S Khaikhopau Ngaihte, Branch Officer, HQ DC’s office leh Kaithianjoy, SDC/CCpur te’n zui uhi.

Auto leh DI Tata kiphukha

Lamka, June-6: Zan nitak dak 7.00 velin Dorcas Road, New Lamka ah khawmial ziakin Diesel Auto( No. MN-02/9623) leh DI Tata kiphukha uh hi’n kigen hi. Huai ah auto malam a glass kithehzak in driver Kamlaljohn(19) s/o Pauneu of Bethel veng, New Lamka amai lak thehkha in liam a, doctor te’n mun 7 ah khuisak uhi. DI Tata kisezek mahleh Auto naksiat zaw hi’n kigen a, engine tanpha buaippha hi’n gen uhi.

Lamka College 36^th Foundation Day

Lamka, June-6: Tuni zinglam dak 11.00 akipan in Lamka College a Multipurpose hall ah huai College kiphuhkhiak kum 33 chinna zang uh a, Chief Guest in Gouzamang Guite, EM/ADC pang a, Functional President in Dr. M. Lokendra, Principal, Lamka College pang uhi. Chief Guest in a thugenna ah students tamtak in laisiamna a ngaih poimawh ziakun huai khantouhna thupitak hi’n gen hi. Pathian in amau kipanpihte kia panpih ahih bangin mahni mawhpuak laisimna mah hahbawl hunta a, laisiamna lou khawsuahna ding omlou hi a gen hi.

DMO thak in charge la

Lamka, June-6: Dr P.Nengzadou in tuni sunnung in Dist Malaria Officer lending in Dr N.Paulginthang apan charge la a, huai hun ah Malaria staff te'n DMO lui Dr N. Paulginthang khakna leh a thak Dr P. Nengzadou vaidawnna in singpi dawnpih uhi.

Bus terminus & TD office enkhia

Lamka, June-6: Ms Jacintha Lazarus, IAS, DC/CCpur in tuni sunnung in Pangzawl khaw saka Inter State Bus Terminal munding enkhia a, huai zawh in Lanva TD Block office mun ding Tualnuam ah enkhia hi. Huai apan in HQ Veng, Lamka West a Cluster Type Training Centre(CTTC) leng enkhia hi’n kigen hi.

Huihpi’n Prayer Hall Cabin mutsia

Lamka, June-6: June 3-4, 2012 nitak a huihpi leh vuah kithuah in Lamka khawpi leh a sehvel a nawk lai in T. Molkot a Bethesda Prayer Mountain ah cabin khat leng mutsia hi. Huai cabin bel Khaipao Haokip, MDC(Kholmun) in apa theih gigena dinga abawl hi a, thiltung puaknat thu TK Haokip, Chairman, BPT in gen hi.

Akihawm huna laloute’ piak hilou ding

Lamka, June-6: Dist Hospital a New building ground floor ah June 8, 2012 zinglam dak 10:00 akipan in 2na tan nei numeite panpihna sum JSY backlog leh sum piak nailouhte lak ah hawmkhe ding uhi. Huai ah Nov 1,2010-Jan 31, 2012 kikal Dist Hospital a nau neite kiang ah piak hiding uh a, JSY payment 3veina ding ahihtak ziakin sum hawm huna lakhaloute piak hinawnlou ding chihthu om hi. JSY tawh kisai ASHA member kuahiam amau tanding sum lanailou te’n office ah laktheih ding hi’n CMO/CCpur apan kiza hi.

SUUNNA

Khamzathang Ngaihte(54) s/o (late) Gengou of Vengnuam, New Lamka zan nitaklam dak 3.00 velin IRB a a seppih personnel khat in a kaplup tuni’n aluang hongtung a, tuni nitaklam in YPA Hanmual New Lamka ah kivui hi.

GOC in Community Hall hong

Imphal, June-6: Maj General Binoy Poonnen,VSM, GOC-Red Shield Division in tuni’n Senapati district sunga NC Phai village ah Military Civic Action(MCA) project nuai ah Rs. 5 lakhs bei a kibawl Community Hall thak hong kawmin khawsung mipite pekhia hi.Huai Community Hall vel 657 EME Bn in a bawl uh hi a, GOC in Khunkho Kuki village khawmite ading ‘OP SADBHAVANA’nuai ah Rs. 1 lakh man tui kholna vanzat(water storage) leng pia chi’n POIB(Defence Wing) thusuak in gen hi.NC Phai leh Khunkho Kuki village hausa 2 te’n Army-te’n mipi khualna a a nasep hoihte uh ziakun kipahthu gen uh chihthu om hi.

PSC member 29 hongzin ding

Imphal, June-6 : Parliamentary Standing Committee(PSC) on Personnel Public Grievances, Law and Justice a Chairman Shanti Ram Naik makaihna in member 29 in June 9, 2012 in Manipur hongpha ding uhi. Amau Infrastructure development & strengthening Subordinates court tawh kisai a thil omdan enkhe dinga hongzin ding uh hi’n kigen a, Lok Sabha member 19 leh Rajya Sabha member 10 hiding uhi. Imphal a om sung un government official-te banah Bar Association-te tawh meeting ding uh a, June 10 in kiknawn ding uhi.

MBBS/BDS Entrance Test ah candidate 5,000 val tel ding

Imphal, June-6: Medical Directorate in state nominee a MBBS/BDS zil ding lakna ding in June 10, 2012(Sunday) in Entrance Test om ding a, huaia candidate dingte adia application submit theih hun beini May 25, 2012 tan in mi 5,010 in application submit uhi. Huaite lakah numei 2885 tel uhi. Entrance   test adng exam centre tuamtuam 10 kizang ding a, zinglam dak 10.00 akipan in zinglam dak 11.30 sung exam ding uhi. Candidate dingte June 10, 2012 zinglam dak 9.00 tan in exam centre a tunkim uh ngai ding hi.

Imphal-Moreh lamlian bandh sawm

Imphal, June-6: Paokholet Haokip(32) s/o(late) Onkhojang Haokip of Sita village zanhal zingsang in Kakching PS bial Pallel kianga Sekmai-lui ah sisa in a luang muhkhiak ahihziakin Pallel bazar a PDP Hall ah zan in mipi kikhawm in JAC bawlkhia uh a, misi innkuante thuakpihthu puang in govt in June 10, 2012 tan in tualthatte mankhia a akituahpih bang gawtna pe din govt nawh uhi. Misi innkuante leng ex-gratia pe dingin mipi kikhawmte’n govt ah thutawp pia uh a, a thil phut uh June 10, 2012 tana tungtunsak ahih kei aleh June 11, 2012 zingsang dak 6.00 akipan in Imphal-Moreh lamlian bandh hiding in thupuan bawl uhi.

‘Lawh hong pekin un’ -MEEU

Imphal, June-6:Manipur govt nuaia electricity deptt ah regular, workcharged leh muster roll a semte’n March 2012 kha akipan in lawh mulou uh a,kha 3 hial lawh mulou employee-te adin khawsakna haksa mahmah a, huaiziakin govt in akinlam a lawh pekhe dingin Manipur Electricity Employees Union(MEEU) pawlin ngen uhi. Post extension bawl nailouh ziak leh MGERL suanlam a tutan employee-te lawh hawmlouh lungkimlouhthu leng MEEU pawlin puang uh a,govt in kumteng a March leh April lakin post extension bawl hizel ahihdan theikawm zenpi tu June,2012 kha tanpha a post extension bawllouh a om leng lamdang sakthu puang uhi. Employee-te lungkimlou a kiphinna a kipatma in govt in regular,workcharged leh muster roll a semte’ lawh pekhe din MEEU pawlin theisak uhi.

Combined team in 2 mankhia

Imphal, June-6 : Thoubal Commando leh 42-Assam Rifles kigawmte’n zan nitak dak 7:00 velin Pallel bazar operation a bawlna uah NSCN(IM) active member 1 leh overground worker 1 mankhia uhi.Huai mi 2te’n Pallel bazar ah truck driver khat kiang a tax lak a sawmlai uh matkhiak hi uhi. Huaite Jenthungam Longmei(32) of Mahabali Kabui Khul hi a, tulelin Tuisimi village a om hi’n kigen hi. Combined team in amah apan 9mm pistol 1, atang 2 leh mobile handset 1 mukhia uhi. Akithuahpih ahihleh Th.Biren Singh (52) of Kongba Kshetri Leikai tulel a Pallel bazar a om hi a, amah akipan in Chinese handgrenade khat muhkhiak in om hi.

Syndicate Bank adia PO result suak

Syndicate Bank in nuaia Probationary Officers(PO) lakna ding in March 15-29, 2012 sung a interview om a result suak a, tutan akitheipha singtangmi a lawhchingte leh a Roll Nos uh anuai abang hi.

1.T Muansang Tonsing(1770500390)

2. Ching Za Hoih(1800509849)

3.Lallianmang Manlun(1760500763)

4.Ruthi Niangneihoi(1760500987)

5.Donald Zoremthang Mihriemate(1210502115)

6.Seiminthang Singson(1770500800)

7.Kimneithem Hangsing(1790500691)

8.Haoginthang Changsan(1210502330)  

9.Jessie Lalhmingmawi Pakhuongte(1800568791)