‘Zomi National Freedom Award’ pe ding

Lamka, June 29: United States of America(USA) a Zomite’ kipawlkhawmna lianpen Zomi Innkuante’ inntekna in tunung sawtlou in ‘Zomi Khawmpi USA’ kichi om ding hi. Huai hun ah Guest of Honour in Zomi National Congress Chief Chin Sian Thang,MP pang ding a, aman Zomi-te’ gam leh minam tawh kisai in thugen ding chihthu kiza hi. Zomi Khawmpi USA zatna hun ah Zomite sung ah minam suahtakna bukim ngahna ding leh minam buppi kigawmkhawm theihna dinga panla tawntung (late) T. Gougin,ex-Minister leh Chin Sian Thang kiangah zahtak etsakna in “Zomi National Freedom Award” piak hiding chihthu kiza hi

Union Home Secy leh ULFA makaite kihou

New Delhi, June- 29: Assam helpawl United Liberation Front of Asom (ULFA) a Chairman Arabinda Rajkhowa makaihin tuni’n ULFA-pro talks group pawlin New Delhi ah Union Home Secretary R K Singh kimuhpih uh a, thu tuamtuam genkhawm uh chihthu om hi. ULFA te’n Union Home Ministry ah demand tuamtuam a piakte utawh kisai dakkal 2 val ding Union Home Secretary makaihin genkhawm uh chih thusuak om hi.

       ULFA makaite’n Union Home Secy tawh a kimuhpih zawh un Rajkhowa in media- te kiang a gendan in Home Secretary tawh a kihouna uh lungtunhuai mahmah a, thilpaidan et in ahoihlam nawt touzel laidingin kilang chi’n gen a, Singh leng kihong mahmah chi hi. Assam a issue tuamtuam omte ULFA in a puaklut tawh kisai leng genkhawm uh a, kihouna in masawn zel din kilang chi uhi. Union Home Minister P. Chidambaram, Assam govt palaite leh ULFA leader te’n June 30, 2012 in peace talk neiding uh chihthu kiza hi. April 2012 in leng New Dehi ah Union Home Ministry leh ULFA makaite’n thil omdan genkhawm khata uhi. Union Home Secretary RK Singh in ULFA leader- te kiangah tripartite talks a thu kigente bangteng sepkhiak hita hiam chih etzui gige hiding chi’n leng ULFA leader-te kiang ah gen hi.

Annual Geneneral Meeting leh vanzat hawmna

Lamka, June-29: Dist Project Co-ordinator, Manipur Sericulture Project/CCpur saina in Tuibuong a Sericulture office ah tuni’n Dist Sericulture Co-operative Federation te’n Annual General Meeting leh vanzat hawmna kithuah program nei uhi. Huai ah Ms Jacintha Lazarus, IAS, DC/CCpur khuallian a pang in vanzat(equipment) te hawmkhia a, Functional President in H.Ginzamang Simte, Director of Sericulture pang hi.

     DC/CCpur agenna ah lungkhoina mun hahsiang ngai gige ahihman in maban ah MGNREGS nasepna tungtawn a hahsak theihdan ding ngaihtuah ding ahihdan gen kawm in lungkhoina programme tungtawn in lungkhoi mite’n thil tampi a theihbeh uh deihthu gen hi. Tuni a Annual General Meeting ah Manipur Sericulture Project a Field Operational Unit (FOU) nuai a beneficiary 54 te lak ah Rs. 10,000 chiat cheque a chiat piak ding chih himahleh cheque-te avekin afel nailouh ziakin mi 27 pekhe phawt uh a, Catalytic Development Program (CDP) 2010-11 nuai a beneficiary 20-te kiang ah lungkhoina vanzat(rearing equipment) tuamtuam -rearing net, emergency lamp leh lungkhoihna ding reck 1 chiat hawmkhia uhi.

DC in Workshop hongkhia

Lamka, June-29: District eGovernance Society, CCpur saina in tuni in Tuibuong a District Training Centre ah National eGovernance Plan(NeGP) tawh kisai in ‘Delivery of Services through the Common Service Centres(CSCs)’ workshop om a, DC/CCpur in hongkhia hi. Huai ah Rina Salam, Management Consultant SeMT; L.Satyabati Devi, IO-I Gdm MSITS; N. Kenjit Singh, IO-Gd-I DIT leh Kaikhanthang, Chief Manager,SBI/CCpur te’n sinsak uhi.

MLA-te programme ding kisuan    

Lamka, June-29: CCpur District Congress Committee(I) makaite’n June 30, 2012 zinglam dak 11.00 in Synod Hall ah CCpur district apan Congress ticket a MLA ching 6te kipahpihna(felicitation)programme neihpih a sawm uh Congress Legislative Party (CLP) meeting hun tawh a kituahkhak ziakin July 7, 2012 zinglam dak 11:00 a ding in ahun kisuan hi’n thusuak kingah hi.

Sepna hoihzaw muthak    

Lamka, June-29: Miss Paungaihnem@ Nempi d/o Upa T. Khamzalam of Vengnuam South, (New Lamka) tulela Andhra Bank a Probationary Officer semlel lai in Central Bank of India ah ‘Specialist Officer in IT’ muthak a, aman July 9, 2012 in Mumbai ah join ding hi’n thutut kingah hi.

Christian Book Festival kipan            

Lamka, June-29: Tamil Nadu state sung a dia laibu zuaktu minthangpen pawl a kigen Beautiful Books te' saina in Hiangtam Lamka a YPA GHQ Hall ah tuni’n Christian Book Festival 2012 kipan a, July 1, 2012(Pathianni) tan om ding hi. Huai hun ah Beautiful Books, Chennai te'n Pathian thu tawh kisai laibu tuamtuam kiman chikchik in zuak uh hi’n kigen hi.

Leaders’ Camp/Seminar om  

Lamka, June-29: EBC saptuam a Baptist Youth Fellowship, Lamka South Divn saina in tuni zingsang in Elim Veng a New Lamka Baptist Church ah ‘Leaders' camp/seminar 2012’ kipan a, Rev N.Thawndoulian, DS Lamka South Divn in hong hi. Tuni’n Rev L.Khamkholun, Gen. Secy EBC in ‘leadership’ chih thupi pansan in sinsak a, June 30, 2012 in Pastor T.Thangzasiam in ‘discipleship’ chih thupi pansan in sinsak ding a, nitaklam in Rev N.Thawndoulian in camp/seminar khak ding hi.

Accident ziak in mi 2 liam

Lamka, June-29: Ngaizaniang (53) w/o Khamkholian of Mata tuni zing dak 7:00 velin a khua uah scooter in phukha a, amai lak liam hi. Jangkholhing (15) s/o Paojang of Kamdou Veng tuni zingsang dak 7:00 in a inn gei ua hai(mango) kung ah hai loudia kisalai kia a, aban veilam liam hi. Accident aliam mi 2 te Dist Hospital ah om uhi.

SYO vaipaw thak ding telna om  

Lamka, June-29: Sim Veng a SYO Hall ah tuni in kum 2012-2015 sunga Simte Youth Organisation(SYO) Gen HQ vaipaw ding telna om a, huai ah SYO unit leh block tuamtuam apan paikhawm uhi. President dingin L.Dongchinthang, Gen. Secy din N.Chinkhansiam Simte leh Treasurer din L.Ginkhup telching uh a, L.Henzamang, Election Commissioner in makai thakte kichiamsak a, Evan Gouchinthang in Pathian kiang ah thumsak hi. Tuni a mi 3 telching a omte’n tunung in cabinet keklian ding uhi.

Saptuam makaite adin training

Lamka, June-29: District AIDS Prevention and Control Unit (DAPCU) saina in June 30, 2012 in EBC Secretariat ‘Dorcas Hall’a Semi-Auditorium ah saptuam makaite ading in ‘People Living in HIV/AIDS (PLHIV’) tawh kisai ni 1 sung ‘sensitisation training programme for faith healer’kichi om ding a, DC/CCpur khuallian a pang in hong ding hi.Huai ah CMO/CCpur in keynote address gen ding a, DFWO leh Rev.V.Khamvum, Lecturer, GBC in thupi tuamtuam zang in sinsak ding hi.

Khamtheih hunkhop mankhia  

Lamka, June-29: Zomi Revolutionary Army (ZRA) pawlin tuni zinglam in Thiankim (28) w/o Tuanmuansang of Sahei Road, New Lamka akipan in damdawi khamtheih RP tang 177 mukhia uh a, huaite Thiankim in tang 1 zel Rs 6 rate a la in Rs 10 in zuak hi’n kigen a, damdoi khamtheihte tuni mahin ZRA te’n haltum uhi. ZRA Town Commander Robin in a gendan in tunung in Thiankim in khamtheih zuak ziaka matkhiat nawn ahih aleh action khauhtak lak hidin gen a, khamtheih zuak midangte’n leng zuak nawnlou ding in theisak a, a zuak teitei matkhiat a omte tungah action lak hiding in gen hi.

ZOLLS saina in Seminar om

Lamka, June-29: Zomi Language & Literature Society (ZOLLS) saina in tuni apan in Venus Hotel ah ‘How to prepare Lexicography’ chih pansan in Seminar om a, Rev Dr Luaichinthang, Chairman ZOLLS in seminar hong hi. Huai ah Imoba Singh, Associate Professor, Lexicographer, Linguistics deptt, Manipur University in sinsak hi.

Mobile Shop 10 ah antang kizuak

Imphal,June-20: Imphal bazar ah antang man nasataka a khan ziakin CAF & PD Minister M. Okendro in tuni apan ni 10 sung mun tuamtuam ah Mobile Shop tungtawn in antang zuak hiding chih a puan dungzui in Imphal Municipal area sung ah Mobile shop 10 tungtawn in antang kizuak a, kg. 1 a Rs. 9 rate in mi 1 inn kg. 15 tan lei uhi. Zingsang dak 10.00 akipan nitaklam dak 5.00 tan mipi lakah mobile sale in antang zuak uh a, suti leh holiday ni in bel zuak hilou ding chihthu om hi. Mobile shop tungtawn a antang kizuakna munte 1) Thangal bazar, 2) Paona bazar, 3)Wahengbam Leikai parking, 4)Sagolband parking, 5) Khoyathong parking, 6)Imphal Municipal office kong, 7)Shamu Makhong, 8)Andro parking, 9) Khuman Lampak a ISBT mun leh 10) Keishamphat a CCpur parking mun ahi hi.

Senior IAS Officer 1 kaisang

Imphal, June-29: Ameishing Luikham,IAS(Manipur- Tripura 1981 batch) tulela Principal Secretary(Tribal Affairs & Hills,CAF & PD) tunai chin in IAS Apex scale Rs. 80,000 (fixed) ah kaisang a, Additional Chief Secretary hitou ding hi. Huai tawh kiton in amah dinmun Additional Chief Secretary(Tribal Affairs & Hills, CAF & PD) hiding hi.

NCP pawl kikhopna om ding

Imphal, June-29: Nationalist Congress Party(NCP) Manipur Pradesh a office bearer-luite leh kumbul a Assembly election om lai a NCP ticket a candidate teng June 1, 2012(Pathianni) zinglam dak 10.00 in Keishamthong Laisom Leirak,Imphal ah meetin om ding chi’n L. Ibomcha Singh,MLA in thupuan bawl hi. L. Ibomcha in thupuan a bawl danin NCP National President Sharad Pawar in thupiak a bawl dungzui a meeting sam hi’n puang a,NCP Manipur Pradesh a Adhoc Committee a Convenor din Sharad Pawar in amah sep hidan in leng L. Ibomcha in gen hi.

Free Eye & Medical camp

Imphal, June-29: Imphal East district sunga om Top Khongnangmakhong a Eastern Youth Development Association pawlin Manipur govt nuaia Medical Directorate leg Leima Diagnosis, Porompat tawh pangkhawm in June 30, 2012 zinglam dak 9.00 akipan nitaklam dak 4.00 tan Top Khongnangmakhong ah ‘Free Eye & Medical Health Camp’ sai(organised) ding uh a, huai ah Specialist doctor 1, mit doctor 3, ENT surgeon 1 leh cardiologist 1 in damloute en ding uhi.

Anti Conversion Law deihlou

Imphal, June-29: All India Christian Council(AICC), North East India Branch in thusuah a bawldan un Indigenous People Forum pawlin June 24, 2012 in Imphal a ni 1 sung Workshop om ah ‘Manipur Freedom of Religion’ kichi sahkhua khat apan adang zui theilou dinga gakna(Anti Conversion Law kichi ) Manipur a zat ding a recommend a bawl uh deihlouh thu banah pom theihlouh thu puang uhi. Thusuak in a taklatzelna ah Manipur kichi Hindutva force-te hatna state khat hi a, hibang kal ah sahkhua leh biakna khat apan adang a kisuan theihlouhna gakna kichi in sahkhaw zalenna nasatakin dal chi’n leng AICC thusuak in gen hi.

National Doctors’ Day zat hiding

Imphal,June-29: Indian Medical Association(IMA),Manipur State Branch vaisaina in Lamphelpat a om IMA House ah July 1,2012(Sunday) in ‘National Doctors’ Day’ zat hiding a, huai ah IMA Manipur State Branch a member apang doctor-te telkim chiat ding in Hony Secretary,IMA Manipur State Branch in theisak hi.

Original marksheet laktheih ding

Imphal, June-29: Council of Hr Secondary Education Manipur(CoHSEM) office ah June 30, 2012 akipan in Higher Secondary/Class XII (Compartmental) Examination,2012 a original marksheet hawmkhiak(issued) kipan ding a, akisaipih Institution tuamtuam a Head te’n office kaihun sungin la dingin Controller of Examinations, CoHSEM in theisak hi. Private candidate te’n leng admission card pawkhia(produce) in marksheet lathei ding uh chihthu om hi.

Hotel Classic ah Seminar om

Imphal, June-29: Indian Chamber of Commerce,Kolkata leh Ministry of Textiles, Govt of India saina in tuni sunnung in Hotel Classic ah ‘Seminar on Geotech and Agrotech Event in North East’kichi seminar ah R. Muivah,IAS, Principal Secretary(Works) in a gendan in Manipur a lamlian khaktan dia menchim(landslide) om thithe dalna ding in German technology ‘Synthetic Polymer” zat hileh kum 100 val menchim apan lamlian venbit theih ding hi’n kigen hi.Synthetic polymer zat hileh menchim omna mun a tui omte luangsuak thei ding a,hileleng suang leh leisai tolhte omlou ding hi’n gen hi. Muivah in a genzelna ah Manipur a lamlian bawlna ah hiai technology zat dinga ngaihtuah hi’n leng gen hi.Huai Seminar ah Manipur Chief Secretary DS Poonia, Textiles Commissioner AB Joshi leh J. Lhungdim,IDAS, Planning Adviser,NEC leng tel uhi.

Duty dia kuanlai Mata Dam ah tuahsia

Lamka, June-19: IRB apang Khuplal(30) s/o Nengzalian of Pearsonmun venglai zan nitaklam dak 3.40 velin a posting-na mun Mata Dam ah dity dinga kuanlai a tuanna Activa ah accident in tuahsia in amai liam a, Dist. Hospital ah admit in om hi. Huailou in Thuangkhoching(45) w/o Upa. T. Kamdoulian of Pearsonmun kalnih paisa a inntung apan kia, aliam nasat euh ziakin tuni’n Dist. Hospital ah adit in om hi.

Covenant Children’s Home in 6^th Graduation ceremony zang

Lamka, June-19: G.Mualkawi a tagah etkolna ‘Covenant Children’s Home(CCH)’ apan tukum a Class-XII zoute khak khiakna 6veina leh Covenant Children’s Home in kum 10 mel a muhna tungah Pathian kianga kipahthu genna tawh kithuah tuni zinglam dak 11.00 akipan YPA Hall, New Lamka ah om a,huai ah Rev. Lian C. Tombing, Chairman, Managing Board, CCH in vaidawnna thugen a, Rev. Khen P. Tombing, Chief Co-ordinator, PCI(R) in students lawhching mi 7te Graduation a pia hi.Huaizawh in Rev Kham T. Valte, Finance Secretary

Managing Board CCH in graduation ngahte pahtawina pia a, huchi’n Rev. G. Suanzalam, Co-ordinator(I), PCI(R) in lawhching a Home potkhiaksan ding student-te adin thumsak hi.

Huai ah Khaikhanthang Hangzo,IRS(retd) telin mi poimawh hunkhop banah tagah etkol a omte innkuante tamtak leng tel uhi.

       Rev Lian C. Tombing in Covenant Home piankhiakdan tangpi gen a, tagahte khualna in kum 2002 akipan Home patkhiak ahihdan gen hi.Patkhiak tunglai in naupang 24 lel etkol himahleh tuni chiangin 500 sanga tamzaw etkol hi a, huaite lak ah khat mahleng damlouh ziaka Home mun a si a omlouh ziakin Pathian tungah kipahthu gen hi.

       Rev Khen P. Tombing in Class X & XII zouthakte theih dinga poimawh leh hasotna thu gen hi. Pathian in tup kichiantak nei a hon piangsak ahihbangin hon siamtu’n hon siamna san leh i zotna ding chiantak theih poimawh hi’n gen a, tup kichian neiloute maban ah mangthang nuam mahmah uh ahihdan gen hi. Nu leh pa te’n leng tate maban ding ngaihtuahna in amau lunglutna subject mah laksak ngai hi’n gen a, eimah a siamna ompen a tam theilam zat banah tup leh ngimte tangtunna dia naktaka panlak ngai hi’n gen hi.

       Tuni a Graduation Ceremony ah Covenant Children’s Home apan khangkhia student mi 7 te’n Class-XII zou in home pawtsan ding uh a, huailou in Covenant apan mah in tutung in mi 22 in Class X examna ah lawhching uhi. Graduation masapen kum 2006 in neih hi a, huai hunin mi 1 kia hilel hi’n gen hi. Covenant Children’s Home ah tunitan in ESC, MPSC, UPC leh PCI(R) saptuam apan naupang tagah tamtak etkol hi uhi.

CDPSA te’n Topper Award

Lamka, June-19: CCpur District Private Schools’ Assn(CDPSA) te’n BSEM leh CBSE saina a Class X pass-te lak apan CCpur Dist Topper Award piaksawm uhi. June 21, 2012 zinglam dak 10.30 in Sielmat Christian Hr Sec School ah huai Award piakna om ding a, M. Okendro Singh, Minister(Education/CAF & PD ) khuallian a pang in pekhe ding hi. Huai ah Guests of Honour in TN Haokip,MLA leh Langkhanpau Guite, Chairman, ADC/CCpur pang ding uh a, Chief Host in Ms Jacintha Lazarus,IAS, DC/CCpur pang ding hi.

MDC member te’n training nei

Lamka, June-19: DRDA/CCpur saina in tuni zinglam in Tuibuong a Dist Training Centre ah Dist Council Member(MDC)te ading in SGSY scheme tawh kisai training om hi. Huai ah C. Hangshing, ED/DRDA in keynote address gen a, ‘concept of SHG & accounts and implementation’ tawh kisai SBI te’n sinsak uh a, ‘basic concept of SHG’ tawh kisai Grace Zamnu, MDC in sinsak hi. Sunnung in huai mun mah ah Integrated Watershed Management Program tawh kisai ‘Awareness-cum-training program’ om a, huai ah M. Jugindro,AE (Horti), K. Hnunliansang, AE/DRDA leh Joyce Lalrinpui, PO/DRDA te'n thupi tuamtuam pansan in sinsak uhi.

ZSP in kipahpihna prog zang ding

Lamka, June-19: Zou Sangnaupang Pawlpi(ZSP) Gen HQ a Foundation Trust te saina in June 21, 2012 zinglam dak 11.00 in Zoveng a Zogal Memorial Hall ah ZSP member-te laka Class X & XII passed-te kipahpihna leh Award tuamtuam hawmkhiakna om ding hi. Huai ah Ginsuanhau Zou,MLA(Singngat A/C) khuallian hiding a, Functional Presidents in P. Sianzadong,MDC(Singngat) leh Ms Grace Zamnu,MDC(Muallum) pang ding uhi. Guests of Honour in L. Mangkhogin Haokip,IPS, SP/CCpur leh Dr Robert S. Ginlunmang Zou pang ding uh a,Chief Host in Manglianthang Zou, Acting President, UZO pang ding hi.

Santen, sungkhawh leh khawsik

Lamka, June-19: Tuktui luanhun (rainy session) himahleh kumdang banglou in tukum in tui tawm a, tui tawmziak a sianthou zawhlouh ziak in CCpur dist sung ah tulai in sungkhawh, santen leh typhoid(khawsik) natna tam mahmah hi. Mi kuapeuh in tui suansousa/tui minsa kia dawn a, bazar leh lampi gei a nektheih leh theigah chi tuamtuam kizuakte' sopsiang louh a nelou ding leh kuapeuh kiveng chiat ding in CMO/CCpur in mipi ngen hi.

Student 4 in ah Ntl Merit Award muding

Lamka, June-19: India govt nuaia Dr. Ambedkar Foundation, Ministry of Social Justice and Empowerment in CCpur district apan Dr. Ambedkar National Merit Award Scheme ngahthei  ding in academic session 2010-11 hun a Class X passed mi 4 telkhia uh a,huaite June 20, 2012 sun dak 12:00 in DC office ah cheque leh certificate piak hiding uhi. Amaute T.Khaiminlal Haokip s/o Ngamkhokam of Dist HQ, Tuibuong in Rs 50,000 ngah ding a, Henry H.Vumjou s/o Kailal Suantak of Red Cross Lane Rs 40,000; Sangneihlu Sanate s/o Romeo Sanate of Shan Veng, Rengkai in Rs 10,000 leh Serto Awar Kom s/o S.Rewangson Kom of Lower Komkeirap in Rs 10,000 ngah ding hi. Award ngah ding mi 4te’n mahni guardian-te tonpih ngai din kigen hi.

Kuki Holy Bile Anniversary

Lamka, June-19: Christian Fellowship Church, Dist HQ, Tuibuong ah June 24, 2012 sun dak 12:00 in Kuki Holy Bible Anniversary zatna om ding hi. Huai hun ah Rev. Nguljathang, Pastor, CFC in thumna in hun hong ding a, Dr. T.Lunkim in Pathian thugen ding hi

CMO in Palkhuang ah sawl

Lamka, June-19: Palkhuang khua ah tulai in sungkhawh ziaka damlou tam mahmah hi'n kigen a, tunai zekin leng sungkhawh ziakin nupi 2 si uhi. Palkhuang khua ah Dist Council nuai a damdoi inn, doctor leh nurse leng om uh hi’n kigen a, himahleh Dr HL Liensang,CMO in Pukpi PHC a medical officer H.Ginthianmung in Palkhuang khua vapha ding leh damlou omte enkhia leh a poimawh banga panpih dingin sawl chihthu kiza hi.

Dist Level Science Seminar

Lamka, June-19: ZEO/CCpur nuai a Science unit saina in Aug 2012 1^st week in ‘Maths in India, Past, Present and Future’ chih thupi a nei in class VIII-X kikal student-te adin Dist Level Science Seminar om ding uhi. Huai ah school 15 apan candidate 2 chiat telding uh a, school thuneitute’n kidemna a telding student-te list July 22, 2012 tan in ZEO office ah piaklut ngaiding hi. Kidemna a 1^st & 2nd te Imphal a State Level Science Seminar ah dist ai-oh in kuanding uhi.

CMO makaihna in meeting

Lamka, June-19: Dr H.L Liensang, CMO/CCpur makaihna in June 20, 2012 zinglam dak 11:00 in CMO office a Conference Hall ah Male Health Superviser, Male Health Worker, Multipurpose Worker leh Malaria Technical Superviser te meeting ding uhi. Huai ah deptt te nasep ding genkhawmna, tanvou hawmna leh thil tuamtuam genkhawm ding uhi.

DDT kap di’n kuankhia

Lamka, June-19: Dist Malaria deptt te’n khaw tuamtuam a Malaria Positive tamna diakte ah DDT 1^st round kap(spray) sunzom zel uh a, tuni’n Lamka apan Behiang PHC nuai a khua 32 a inn 758 ah DDT kap ding in team khat kuankhia uhi.

KNLF/KPA in hilhchetna thusuah

KNLF a Info & Pub Secy Kolphe min a thusuak in a gendan in Indo-Burma border ah June 15, 2012 a khahkhiak a om Mangkholien Khongsai, Chief of Sadar Joute,Sadar Hills hi UTLF te’n a mat uh KNLF minsiatsakna ding in Kotlenphai apan Burma mi khat hong tonpihsak in Moreh kianga gamgi lei(bridge) a khahkhia uh hi’n taklang hi.UTLF member tulelin Sugnu Nazareth(Lompi Khunou) a omte tawh phone a akihouna uapan theihkhiak ziakin a thilhih uh taklat a om hi’n leng thusuak in gen hi.

     KNLF in mimal kianga sum nget leh kidnap chihte chinglou hi’n leng taklang uh a,huchibang hihte matkhiak ahihleh ngaihdam hilou din leng puang uhi. Orgn khat hih dungzui in contract work leh deptt tuamtuam apan bel percent lak hidin puang hi. SoO group khat in mipi hihbuai dingin bangchidan a orgn thakthak bawlkhia a kidnapping tanpha bawl uhiam chih dotna leng bawl uhi.

Central palaite’n training enkhia

Imphal, June-19 : P. Shrivastava, member NEC leh National Disaster Management Authority(NDMA) member Prof. Harsh Gupta in Takyelpat a Directorate of Civil Defence, Govt. of Manipur te saina in Ni 10 sung ‘Master Trainers’ Trainig Course on Disaster Management (Search and Rescue)’ kipatna hun va uap uhi. Huai training ah 14-Bn. NCC leh 65-Bn. NCC akipan pasal leh numei naupang kigawm 40 tel uh a,  June 30 in zou ding uhi. Huai hun ah Aradhya Kumar, Dy. Director, Imphal-Guwahati, Dr. Suhel Akhtar leh Director Civil Defence Manipur te’n leng uap uhi. P. Shrivastava leh Prof. Harsh Gupta bel programme zawh tuni nitaklam dak 4:45 in Imphal nusia in Delhi zuan in lengkhia uhi.

Health & TB Control Policy

Imphal, June-19: Manipur State TB Society, State TB NGO Forum leh Global Health Advocate,India saina in tuni’n TB natna apan kivendan ding leh TB natna etkoldan ding tawh kisai Workshop om a, huai ah Health & FW Minister Phungzathang Tonsing in a thugenna ah Health Policy leh TB Control Policy khat bawlkhiak(framed) hiding in gen a, huaima in aman Manipur a District om teng phasuak ding a, adiakin District Hospital munte enkhe masa phot ding hi’n gen hi.Minister in a genzelna ah TB control-na ding in NGO leh deptt teng leng kituak taka pankhawm poimawh hi’n gen hi. Tuni a Workshop ah Dr Th. Meinya,MP leh Dr I. Ibohalbi,MLA leng tel uhi.

MC Mary Kom kipahpihna zang

Imphal, June-19: Red Shield Division nuai a om Loktak Brigade(Army) te’n Bishnupur district a Kanthai mun ah World Boxing Champion hihna 5vei la MC Mary Kom kipahpihna hun zatpih uh a, huai ah Bishnupur district sung mun tuamtuam apan mi 300 val in uap uh chi’n PIB(Defence Wing) thusuak in gen hi. Summer Olympics om ding ah India gam apan Mary Kom dia telthei dingin numei boxing siam amah kia telkhiak ahi hi.         Col GS Reddy, SM Officiating Commander, Loktak Brigade in GOC Red Shield Division sik-le-tang in MC Mary Kom pahtakthu leh deihsakthu gen a, Manipur apan kimawl mite adia etton tham ahihdan gen hi. MC Mary Kom in leng hibang deihsakna a ngahna tung ah Red Shield Division-te tung ah kipahthu gen hi.

Jiribam bial ah Office 1 kihal

Imphal, June-19: Jiribam PS apan mallam km. 2 vela gamla Kalinagar a Sub-divisional Agriculture office zan zinglam dak 11.00 velin meltheihlouh pawlkhat in hal uh a, office vanzat(furnitures) hunkhop leh document poimawh bangzah hiam kangtum man hi’n kigen hi. Meikuang muhphet in a kiang naia omkha tengin kidelh huan in meikuang phelh uh a, Fire Fire Brigade Gari in leng delh in office pumpi kangtum manlou deuh in phelhmit zou uhi. Huai office hal kuate hiam chih theih ahih nailouh banah aziak leng kithei tuanlou hi’n gen uhi.

A/R te’n galvan mukhia: 1 man

Imphal,June-19: PIB(Defence Wing) thusuak in a gendan in 13-Assam Rifles te’n zanhal in Tamenglong district sung a Khongjirom khawkiang gamlak a search operation a bawlna uah AK rifles 1, 303-rifles magazine 1, AK-47 rifles magazine 1 leh atang 30 banah Kenwood Radio set 1 leh charger 1 mukhia uh chihthu om hi.

     Huailouin PIB(Defence Wing) thusuak dangin a gendan in 43-Assam Rifles te’n zan in Kangpokpi apan simlampang km. 4 vela gamla Kalapahar area ah KRF cadre om chihthu zak ziakin operation bawl uh a, huai ah KRF cadre Kamsei Kipgen s/o(late) Ngamkhai Kipgen of Kholjang(Senapati district) mankhia uh a,amah a kipan in sum ngetna(extortion) khat leh SPM capsules 5 mukhia uhi. 43-Assam Rifles te’n a mi matkhiak uh Imphal West Police Station ah pekhia uhi.

Chinese handgrenade va koih uh

Imphal, June-19 : PHED a AE sem tulelin Senapati a posting a om H Gyaneshwor s/o Iboton of Pishum Oinam Leirak Lairembi Maning Leikai tenna inn gate bul ah tuni zingsang baihtak in meltheihlouhte’n ava koih uh Chinese hand-grenade muhkhiak hi a, police ah thil omdan report ziakin Police te’n vadelhpah in lakhia uh a, Lamphel area a nin paihna mun ah hihsia uhi.

KSO in dakkal 24 sung bandh ding

Imphal, June-19 : KSO Gen. HQ June 22, 2012 zankim apan June 24, 2012 zankim tan daih ding dakkal 24 sung Manipur pumpi bandh hidin puang uhi. KSO Gen. HQ a Vice-President Mangcha Baite in a gendan in KSO Gen. HQ in 2^nd M/R gate kiang Kabaw Leikai ah gam 100 x 30 ft. alian a neih uh himahleh state govt in 5-Star Hotel bawlna ding in Ningthem, Director of MDS pia hi’n order om chih hi. Huai thu ah KSO Gen. HQ lungkimlouin govt in a order zukkik din theisak uh a, April 30, 2012 in amun a vaphak ua leh 5-Star Hotel bawlna dia piakkhiak a om ahihdan mukhia uhi. KSO Gen. HQ theihpihna tellou a gam uh govt. in midang khut a apiak mawk lungkimlouh taklatna in bandh bawlsawm uh hi’n kigen hi.Huailou in Dec. 22, 2009 in Nongbrang ah student 2 -Paosat Kipgen leh Paolenlal Chongloi thahna tawh kisai leng govt. in bangmah thuchian a taklat louh ziakin leng lungkimlou uhi. Huai sihna tawh kisai suizui a, tualthatte matkhiak ding, misite innkuante akilawm bang ex-gratia piak din leng govt nawh uhi. Police misi 2te student mah ahihdan theikhia ua, amau NEHU a M.Com zil lai Christmas zang dia innlam hongpai hibang thil tuak uh hidan a leng gen in om hi.