Central apan official in nasepna enkhia

Lamka, April-26: RK Sharma,NQM in Chandigarh apan hongzin in April 18-19, 2012 sungin Thanlon sub-division sunga Mualnuam leh Kaihlam khua kikal lamlian km. 15.09 vel asau PMGSY nuaia nasepna hong enkhia hi. Huai ah Manipur state apan engineer khenkhat leh nasemtu(contractor)te tawh kithuah in amun mahmah ah va enkhia a, nasepna lungtunhuai hi'n gen chih thutut kingah hi.

India gamsung pumpi ah Anganwadi Centre 13 lakhs val om

Manipur ah Anganwadi leh Mini-Anganwadi Centre 9883 om

New Delhi, April-26: Rajya Sabha ah tuni'n dotna leh dawnna hun ah Union Minister for Women and Child Development, Smt. Krishna Tirath in India gamsung pumpi ah tulel in Anganwadi Centre 13 lakhs val om chi'n dawnna pia hi. Aman a gen behdan in March 31, 2012 tanin India ah Anganwadi leh Mini-Anganwadi centre 13,04,611 om chi'n gen a, Manipur ah tulelin Anganwadi leh Mini-Anganwadi centre 9883 om hi'n leng gen hi.

Union Women & Child Development Minister in a genna ah Andhra Pradesh in Anganwadi leh Mini-Anganwadi centre 86164 nei a, Arunachal Pradesh in 6028, Assam in 57656, Bihar in 80211, Chhattisgarh in 47355, Goa in 1262, Gujarat 50149, Haryana in 25171, Himachal Pradesh in 18651, Jammu & Kashmir in 26400, Jharkhand in 38186, Karnataka in 63376, Kerala in 33082, Madhya Pradesh in 90999, Maharashtra in 106231, Meghalaya in Anganwadi leh Mini-Anganwadi centre 5113 nei a, Mizoram in 1980, Nagaland in 3455, Orissa in 69183, Punjab in 26656, Rajasthan in 58494, Sikkim in 1225, Tamil Nadu in 54439, Tripura in 9906, Uttar Pradesh in 186447, Uttrakhand in 17568, West Bengal in 116390, A & N Islands in 697, Chandigarh in 420, Delhi in 10570, Dadra & N Haveli in 267, Daman & Diu in 102, Lakshadweep in 107 leh Puducherry in Anganwadi leh Mini-Anganwadi centre 788 nei hi'n gen hi.

Assam Rifles-te'n NSCN(IM) te' galvan pekik

Dimapur,April-26:NSCN(IM) te'n April 19, 2012 in Assam Rifles-te' thau 5 a matsakte uh zanhal (April 24) in apiak kik utawh kitonin Assam Rifles te'n leng NSCN(IM) heutute' galvan a laksakte uh zan in NSCN (IM)'s cease-fire monitoring cell (CFMC) office ah pekikta uhi. Huai hun ah cease-fire monitoring group (CFMG) lam apan staff officer CFMG office G Rengma leh personal secretary to CFMG Chairman Shokhum tel uh a, NSCN(IM) lam ah CFMC secretary S Among leh Deputy 'kilonser' Tokishe tel uhi.

Assam Rifles te'n zan a galvan a piakkikte uh AK-56 rifles 2, M-20 pistol khat, 9mm pistol khat, telescope 1, binoculars 2, 7.62 tang 44, 9mm tang 4, bulletproof jacket khat, 7.65 SLR tang 20, mobile phone 4, sum Rs 1799, uniform set 18, tumbler 2 leh jungle boots pair 4 banah uniform jackets 4 hi a, himahleh laptop pen pekik nailou uh hi'n kigen hi. CFMG Chairman Maj. Gen. (retd) N. George in a genna ah tu in pawl 2 kalah kitheihsiamna omta a, maban ah lemna leh muanna kipzawsem omna din panlak lai hiding chi hi.

NSCN (I-M)'s convenor CFMC Vikiye Awomi in Assam Rifles authority te apan galvante muhkik hita chi a, huai galvante NSCN(IM) heutu (card holders) te' tenna inn a va luhlai ua a laksak ngen uh ahi chi hi. Card holder te ahihleh "Red card holder" Rev. Puni Mao kivenbitna thau banah a bodyguard 2te galvan leng laksak hi uh a, card holder dangte laka "white card holder" dang 2 ahihleh "Col" Yarteo leh "Kilonser" K. Chawang te' galvan ahi chi'n Awomi in gen hi.

Hmar biala YMA branch omte kitawp

'Hmar autonomy piak hilou ding ' -R Lalzirliana, Home Minister

Aizawl, April 26: Mizoram Home minister R Lalzirliana in Mizoram north leh northeastern biala Hmar-te' omna(dominated areas) te Autonomous District Council piak ding thu bangmah omlou chi hi. Mizoram ah Autonomous District Councils (ADC) omsa 3 tawh kisai ahihleh bangmah kithei banlou a, huaite Mizoram Union Territory ahih laia bawlkhiak a om ahi chi hi.Mizoram Home Minister in a genzeldan in huai hunlai in ADC bawlkhiak ding dalna(objection) kibawl khalou mah hi a, tu'n tribe kuamah adingin ADC tuam bawl hinawnlou ding chi hi. Zan in Aizawl ah political party tuamtuam leh civil society te'n meeting poimawhtak nei ua, huai ah Lalzirliana in Hmar te' thilnget thil hitheilou ahi chi hi. Hmar People's Convention-Democratic (HPC-D) leh Central YMA kala thubuai a omlai in Home Minister in hibang thupuan bawl hi'n kigen hi.

Meeting a tel min taklat utlou khat in agenna ah Home Minister Central YMA leader-te kiang ah laulou leh hangsantak a om dingin hasuan a, helpawlte' vauna ziak a daai mailou ding a genkawm in HPC(D) demand khauhtaka nang dingin genpih chi uhi. Central YMA President in Mizoram govt kiangah HPC(D) demand lawhchingsak kei un chi'n ka genkei chi mahleh, Home Minister in na thugen uah dingtang un chi hi.

HPC(D) leh Central YMA kal sousang sem din kilang a, zan in Tuisual group YMA nuai a om branch 16 te'n Central YMA ah kitawpna pelut uhi. HPC(D) te'n Central YMA makaite' kianga deadline a piak uh zan(April 25,2012) a abei tawh kitonin Hmar bial a YMA branch omte'n kitawpna pia uh hi'n kigen hi. Tuisual group area ahihleh HPC(D) te' hatna mun hi a, huai bial nuai ah YMA group 3 – Tuivai, Serlui leh Chalfilh om lai hi.

YMA kichi kum 1935 a European Missionary te'n social institution dan a bawlkhiak uh hi a, tu in YMA in Mizoram sung leh pua ah a kigawm in group 46 leh branch 787 nei hi. Hmar biala YMA omte phiat ahihtawh kitonin tuni'n Sakawrdai Youth Association kichi bawlkhiak a om hi'n Lallianzuala in gen hi. Lallianzuala ahihleh Sakawrdai mi ahihbanah Tuisual group YMA Vice President lenlel hi a, aman leng zan nitakin kitawpna pelut hi. SYA kibawlkhia pen Adhoc Committee dan hiphot a, Central YMA leh HPC(D) in kilemna a bawltheih pah uh lamet ahi chi hi.

HPC(D) te'n April 17, 2012 in HPC(D) demanded area Sinlung Hills Development Council huamsung a YMA branch omteng phiat vek dingin thupuan nei uhi. Aziak bel Central YMA President T Sangkunga in a thugenna ah Central YMA in govt kiang ah Hmar te'n ADC a ngetna uh pomsaklou dingin kingen chih kampau a zatziak ahi chi uhi. Central YMA leader khenkhat in HPC(D) -te tawh kihouna pailel chi mahle uh HPC(D) te'n thusuah a bawlna uah Central YMA leader-te kuamah in HPC(D) makaite mulou uh a, houlimna himhim omlou ahi chi uhi. HPC(D) Information Secretary John F Hmar in a genna ah ADC bawlkhiakin Mizoram state neusak tuan ding ahi a chih uh thil diklou ahi chi hi.

Bialtu MLA in Singngat khua pha

Lamka, April-26: Ginsuanhau, MLA(60-Singngat A/C) tuni'n Imphal apat Lamka hongpha in SDO/Singngat, PHED CCpur division a EE leh AE tonpih in Singngat khua pha a, Simbuk khua ah Singngat tuinek lakna mun ding Intake Point a etkhiak banah Singngat Army camp kianga Treatment Site leng enkhe nawn hi. MLA in Central Bank of India/ Singngat branch leng enkhia a, huaizawh in Public ground puahphat ding dan, Singngat Vety Hospital, FCS Godown, Hill Model H/S, Singngat Standard H/S, SDO Office leh Quarter teng leng enkhia hi.

STC General Assembly-cum-Election

Lamka, April-26:Simveng a SYO Hall ah April 27,2012 zinglam dak 10:00 apan in Simte Tribe Council (STC)General Assembly-cum-Election om ding a,huai ah kum 2012-2015 sung STC General President leh General Secretary ding telna om ding hi. Huai ah President ding a candidate 3 om a, huaite B.Dongzalian,T.Dongchinkham leh Tualkap hi uh a, General Secretary dingin candidate 3 mah om hi'n kigen hi

Block 2 ading free text book

Lamka, April-26: CCpur dist sunga govt school leh Govt Aided school tamtak ah free text book hawmkhiak hi a, tuni'n CCpur govt H/S ah Henglep block nuai a school 25 ading hawmkhia uhi. Vimala Raina H/S a CCpur Block Resource Centre ah CCpur block nuai a school 64 ading textbook lakha nailoute ading in leng kihawmkhia hi.

Culvert bawlna ding enkhia

Lamka, April-26: CCpur Govt College gate konglak a Tipaimukh Road-IB Road kisuktuahna a curlvert ah hawktui dimlet in lamlian lai ah tuiluang gige a, tuni zinglam dak 10:30 vel in bialtu MDC Kamsuanlun, 80-RCC a OC Gowda leh S.Khaikhopau Ngaihte,SDC/BO Hqtr, DC office in culvetrt bawldan ding enkhia uhi. Tipaimukh road bawl BRO te'n tuktui luanma a Culvert bawl ding uh hi'n gen uhi.

PDS agent ding block 2 a felta

Lamka, April-26:DC/CCpur office ah zan apan in Public Distribution System(PDS) tawh kisai a agent tungtang ah meeting om a, tuni'n Henglep block ading hihfel uh hi'n kigen hi. Thusuak kingahdan in CCpur block leh Saikot block ading agent list bawlzawh hita a, official inl puankhiat nailouh hi'n kigen hi. Block dangte aleng tunung sawtlou in hihfel hidin kigen hi.

Public toilet ah misi luang kimukhia

Lamka, April-26: Tuni zinglam dak 10:00 velin New Bazar a Public toilet sung ah misi luang khat kimukhia a, Police apan kizadan in amah Ksh Doren(30) s/o (late) Ksh Mohindro of Tuibuong Forest Gate hi'n gen uhi. Police te'n siluang la in Dist Hospital morgue tun uh a, postmortem bawl zawh in a innkuante pekhia uhi. Police te'n Ksh Doren taksa tung ah syringe a kikapna ma munbangzahhiam mukhia uh a, overdose a si hidia gintakthu leng gen uhi.

SUUNNA

Elboi Khupchinlian(22) s/o G.Tuallianmang of Red Cross Road zan nitak dak 9:00 in ihmu lum a, tuni'n Lamka hanmual ah kivui hi.

Home Minister in Chief Minister mu

Imphal, April-26: Manipur Pradesh Congress Committee(MPCC) President banah Home Minister Gaikhangam in tuni'n Chief Minister O. Ibobi kimuhpih hi'n kigen hi. Huai nung sawtlou in Home Minister in press-te kimuhpih in a dotna uh a dawnna ah amah leh Chief Minister kalah ngaihdan kituahlouhna omlou hi'n gen hi. Aman a gendan in April 30, 2012 tan in Ministry keklet zawh lamet thu gen a,huai hun ah Minorities communities leh Women reservation leng om ding hi'n gen hi.

Home Minister in a genzelna ah Manipur ah NSCN(IM) official designated camp omlou hi'n gen a, army lam apan huchibang om hi a gen a om leng state govt in theihpihlou chi hi. Huchibang designated camp om hileh state govt in Centre theisak ding hi'n leng Home Minister in gen hi. Jessami a buaina om leng venna dingin tu'n bialtu MLA leh Police a IG khat a mun ah omlel uh hi'n gen a, tunung sawtlou in IRB ahihkeileh Manipur Police company 1 koih hidin gen hi. Huailou in naupang pimang thu om sek leng dalna dingin Police station teng panla ding a theihsak hi'n gen a, MPCC President dinmun tawh kisai leng AICC khut a om hi'n gen hi.

Imphal East district ah 144 Cr PC

Imphal, April-26:Imphal East district pumpi ah April 24, 2012 zingsang dak 6.00 akipan in 144 Cr PC koih in om a, huai May 23, 2012 tan lakkhiak hilou ding chihthu om hi. District Magistrate/Imphal East thusuak dungzui in 144 Cr PC koih ahih sungin pawlam mun khat ah mi 5 sanga tamzaw omkhawm phallouh ahih banah galvan leh hiamhei tawikhia a om phal hilou a, hileleng huai in Law & Order tawh kisai a kizang Police leh security-te bel huam khalou ding hi. Procession, public rally leh meeting om ding himhim District Magistrate akipan phalna lak masak ngai ding chi'n leng thusuak in gen hi.

PHED in theihsakna poimawh bawl

Imphal, April-26: Executive Engineer,Water Supply Maintenance Division No. II,PHED apan thusuak in a gendan in deptt in phalna a piak dungzui a tui pua a mipi laka zuak private Tanker-te'n mihing adia nek-le-dawn dinga siangthou mah zuak uh hi'n puang hi. Huaite bel Water Supply Maintenance Divn No. II nuaia Koirengei Water Supply scheme, Porompat Water Supply scheme leh Canchipur Water Supply scheme akipante kia hi a, huchilou mundang apan tui kila a kizuak a om aleh huaite bel department in theihpih banlou chi'n thusuak in taklang hi.

Commando-te'n helte 2 man

Imphal, April-26 : Imphal East Commando te'n zan zinglam dak 9:30 in Ngaryan area ah UNLF atel khat mankhia uh a, amah akipuanna akipan mipi, govt. nasem leh sumdawng (businessman) te lak apan party fund ding kaikhawmtu leh munkhat akipan mundang a galvan paw vialtu hidan in gen uhi.Imphal East Commando-te mah in zan nitak dak 6:45 vel in Ahanlup Ngaiharaopham mun ah PLA khat mankhia uh a, amah mipi, govt. nasemte leh sumdawngte lak apan party fund ding khontu hi'n police thusuak in gen hi.

7th Occupancy Observation zang ding

Imphal,April-26: Manipur a pawl(organisation) tuamtuam 9 kigawmte saina in April 27, 2012 zinglam dak 9.30 akipan in Rupmahal Theatre ah '7th Occupancy Observation Day' zatna om ding a, L. Ibomcha Singh,MLA khuallian in pang ding hi. Huai ah Functional President in P. Parijat Singh,ex-Minister(Agri) pang ding a, Guests of Honour in mi poimawh tuamtuam 6 pang ding uhi. Programme zat sungteng live telecast hiding a, thugenna, lasak ngaihkhiakna,kipahman hawmkhiakna, tagahte panpihna piakna leh adangdang om ding hi.

Odisha MLA Hikaka khahkhiak hita

Bhubaneswar, April-26: Maoists te'n ni 32 vingveng Odisha MLA Jhina Hikaka a pimang nungun tuni in Narayanpatna kiang a Balipeta mun ah azi Koushalya leh Koraput pansan lawyer Nihar Ranjan Patnaik kiangah pekhia uhi. Puan-ak hing silh Laxmipur MLA kipah mel mahmah a, amah mu nuam mipi leh media-te pumdim hi. Biju Janata Dal govt in a thuchiamte uh a tangtun kei ua leh Hikaka in MLA a hihna apan kitawp ding ahi chi'n Maoists te'n gen uhi. Hikaka khahkhiak ahih nung sawtlou in Bhubaneswar ah medical check-up bawldingin zotpih in om hi.

Re-allocation of works/Transfer & posting

1.Dr J. Suresh Babu,IAS, Principal Secretary(Home/Education-S/SCERT/Adult Edn/IFCD) as Princial Secretary(Home/Education-S/SCERT/Adult Edn).

2.Dr Rajesh Kumar,IAS on return from Central deputation as Commissioner(IFCD).

3.Ningthoujam Geoffrey,IAS, Joint Secretary(Home) as Joint Secretary(Home/RD & PR).

4.Modak Hrisheekesh Arvind,IAS, SDO/BDO, Chandel as Joint Secretary(DP/Plg/IT).

5.B. John Tlangtinkhuma,IAS, SDO/BDO, Ukhrul & Jessami in addition as ADC/Ukhrul & SDO/BDO, Ukhrul and SDO/Jessami in addition.

6.Armstrong Pame,IAS, SDO/Paomata & SDO/Phaibung in addition as SDO/BDO, Tousem.

7.Robert Singh Kshetrimayum,IAS attached with DC/Chandel as SDO/Keirao Bitra.

8.Shyam Lal Poonia,IAS attached with DC/Senapati as SDO/BDO Paomata & Phaibung in addition.

9.Ningam Chamroi,MCS, CEO, District Council/Ukhrul & ED/DRDA Ukhrul as ED/DRDA, Ukhrul.

10.A. Temba Singh,MSS, Dy Secretary(Fishery/RD & PR/MOBC) as Dy Secretary(Fishery/MOBC).

11.L. Darshinso Aimol,MCS, SDO/BDO, Chingai as SDO/BDO, Chandel.

12.Ranjan Yumnam,MCS, Dy Protocol Officer & ex-officio Under Secretary(Home) as i/c Addl Director(Education-S/Hills).

13.Luckyson Ngamsa Kasung,MCS, ARC & Under Secretary(Sc & Tech) in addition as i/c CEO, Dist Council/Ukhrul.

14.Hannah Kahmei,MCS, Treasury Officer/Tamenglong as SDO/BDO, Tamei

15.N. Surjit Singh,MCS, SDO/Lilong as SDO/BDO, Saitu-Gamphajol.

16.M. Goura Singh,MCS, SDO/Saitu-Gamphajol as SDO/Lilong.

17. T. Kammuanlal Simte,MCS, SDO/BDO, Tamenglong as SDO/BDO,Tamenglong & Treasury Officer/Tamenglong in addition.

18.H.L. Jain, Jr MCS, SDC/Imphal West as i/c SDO/BDO, Chingai in his grade pay.

Re-allocation of works/Transfer & posting

1.V. Zathang,IPS, Addl DGP(Law & Order) as Addl DGP(Intelligence) & IG,Prisons in addition.

2.PM Goud,IPS, Addl DGP(Home Goard) & incharge IG,Prisons as Addl DGP(Armed Police/Training) & Addl DGP(Home Guard) in addition.

3.LM Khaute,IPS, Addl DGP(Armed Police/Training) as Addl DGP(Law & Order)

4.K. Jayenta Singh,IPS, SP/Thoubal as SP/Imphal West,

5.K. Radhashyam Singh,IPS, SP/CCpur as CO,1st Manipur Rifles

6.S. Manaobi Singh,IPS, CO, 2nd Manipur Rifles as CO, 7th Manipur Rifles

7.H. Thanghaulien Gangte,IPS, SP/Imphal East as SP/CCpur.

8.Kamei Angam Ramanus,IPS, CO, 8th Manipur Rifles as SP/Imphal East.

9.L. Mangkhogin Haokip,IPS, Addl SP(Law & Order)/Bishnupur as CO, 5th IRB.

10.N. Worngam,IPS, Addl SP(Law & Order)/Thoubal as CO, 3rd IRB.

11.K. Chaoba Lokho,MPS, i/c SP(SIT) as CO, 7th IRB

12.Faumei Gonglin,MPS, i/c CO,5th IRB as CO, 2nd Manipur Rifles

13.Md Firoz Khan,MPS, Addl SP/Kangpokpi as CO, 8th Manipur Rifles

14.Y. Ashok Kumar Singh,MPS, Addl SP(Ops)/Moreh as Addl SP(Ops)/Imphal East

15.L. Ishwarlal Sharma,MPS, i/c CO 7th IRB as i/c SP(SIT)

16.AK Jhalajit Singh,MPS, Addl SP(Ops)/Imphal East as i/c SP/Thoubal.

17.Md Jackiruddin,MPS, DSP, Dist Jail/CCpur attached to Central Jail/Imphal as i/c Addl SP/Kangpokpi.

Phaizang helpawl-te'n B Kaljang khawmi 3 soisa in a van uh laksak

Lamka, April-25:Manipur phaizang helpawl hidia gintakte'n zanlam deuh April 20, 2012 nitakin Sangaikot sub-division huamsung a om Gamphajawl gam a gamvak a om B Kaljang khawmi 3 tuak kha in a mat-tang ban uah naktak a a soisak nung un mi 3te taikhethei in zanin a khua uh B Kaljang tung uhi.B Kaljang khawmi Tualkhenmang(36) s/o (late) Chinkhup, Thangzakai (36) s/o Suang Do Lian, Thangkhogin (38) s/o Chinsuan leh Thangchinkhup (55) s/o Ngulzathang te'n Gamphazawl khaw hausa apan gamvak theihna dingin permit tawi uh a, Army te'n leng a phalsak ziakun ah sabeng din gamvak uh hi'n gen uhi.

Soisak a omte apan kizadan in April 20, 2012 (Sintawpni) nitakin Tualkhenmang pen a gamvakna uah helpawlte'n man uh a, hun sawtkhop giahbuk a tunlouh takin alawm mi 3te patau in zingsang dak 3:00 velin a zong din kuankhia uhi. Luidung lam zui in Thangkhogin kuan masa a, aman huai ah helpawlte' pauging za in amah leng awlawl in kihemkhia a, huchi kawmkalah, giahbuk apan pawtkhe dia kisa phet Thangzakai leh Thangchinkhup te galvantawi mi 9 in thau tawh sutuah ngal uh hi'n kigen hi. Huai apan in a camp lam uah paipih uh a, huai pen border pillar 48 leh 49 kikal lak hi'n gen uhi. Gamgi zul apan Burma gamsung metre 20 vel ah a lutpih nung un helpawlte' camp bul tunpih uhi. Mat a om te'n a gendan un Khuangkhai khawmi gamvak mah mi 6 leng mat hi uh a, amaute sawtlou nungin khahkhia uh hi'n gen uhi.

Helpawlte' uniform ah PLA kigelh a, amau April 18, 2012 ni a Singngat sub-division sunga Zou Khonuam mun ah 39-Assam Rifles ambush bawlte hi un kigen uh chi uhi. Soisak a om te'n a genbehna uah helpawlte mi 20 vel ding khawng hi uh a, ZRA tawh kizom na hi uh, ZRA te' CID na hi uh chi'n singkhuah in khen zialzial uh hi'n gen uhi. Akhen chiangin Army te' CID khawng a ngawh in naktakin soisa uh chi'n leng gen uhi. Thangkhogin pen bangchidan hiam in Gamphazawl taitung thei mahleh a lawm 3 te mattang in om uh a, sa kapna ding a thau SBBL gun (license nei) 3 leh a vanpuak teng uh laksak uh hi'n gen uhi. Tualkhenmang pen a mat tung uapan a soisak ziak un a khetaw apan adek(neck) tanpha a khetna uh dup het-hut a, a lu leng mun 1 keek hi. Thangzakai leng a nungzang teng dup gaivek in om hi.

Soisak a omte'n a genbehna uah helpawlin, na lawmpa uh khat koi a om hiam ka zongkhe teitei ding uh, chikawm in a zongding in kuankhia uh a,amau huai hun lemchang ala in awlawl in gammang kawmlam ah kihemkhe thei uhi. Sun 2 leh zan 1 gamlak ah bangmah nelou a a painung un zanin T Khuangkhai a 35-Assam Rifles camp ah tailut thei uh hi'n gen uhi. Assam Rifles te'n medical treatment hoihtak abawl nungun Singngat MLA Ginsuanhau leh Sangaikot MDC Tongkai Baite panlakna ziakin T.Khuangkhai apan B Kaljang leh Lamka puaktung hi uh a, B Kaljang hausa (Chief) B Suang Do Lian in 35-Assam Rifles, Singngat MLA leh Sangaikot MDC tungah kipahthu gen hi.

Well(tuikulh) sung hahsiang dia kisa mi 5 buaisia, 2 si

Lamka, April-25:Bethel khua ah tuni nitaklam in tuikulh(well) hahsiang dinga kisa mi 5 buaisia uh a, huaite laka tel Alis Ngamkhohao @Haopu (26) s/o (late) Lamminthang of Molnom leh Mangkholen (37) s/o Songam Haokip of Bethel amun ah si uh a, well sunga buaisia Lalcha(20) s/o Songam Haokip of Bethel leh Jamgoulal Mate(20) s/o Letthang Mate of Molnom kintakin Sielmat Christian Hospital puaktung hi ua, Nehkhohao (24) s/o Thatkhokam Haokip of Molnom pen dist. hospital puaktung in om hi. Mangkholen hun sawttak lakkhiak theihlouh in well sungah om a, well sunga tui omteng hiipkang zawh nitak dak 9.40 velin aluang kaihkhiak theih hipan hi'n kigen hi.

Thukizadan in tuni nitaklam dak 3.40 velin Bethel khua a Songam Haokip tenna inn a well(tuikulh) hahsiang sawm in well sungah Alis Ngamkhohao @Haopu lut masa a, well bang a sik omte pansan a nei in kumsuk a, well sung a tui omte' tawpkang sawm in generator start di'n kisa a, hun bangtan hiam nung in generator koihna mun ding a koih zou in well pawlam a om a lawmte' kiangah a tha bei ahihdan hilh hi. Tua thu theih phet in Jamgoulal Mate kumsuk in well bang a siksan dinga kibawl siik len a kikhai Alis Ngamkhohao khawphawk nawnlou pen a puansilh a man in kaikhetou a, himahleh a gikziakin kesuk zel a, tui in a tup dek ziakin a khe in Alis Ngamkhohao zong in kaihkhiak sawm in panla a,aman a kawng bom a khau khih in Ngamkhohao bangtanhiam kalpih zou hi. Sawtlou nungin Nehkhohao kumsuk in Mangkholen inleng zui a, Jamgoulal Mate pen a buaisiat sim ziakin well apan pot in generator kikhihna khau ana len a, Nehkhohao in Alis Ngamkhohao luang generator tawh henkhawm in Jamgoulal Mate in kaikhia hi. Huainung in Lalcha leng a sunga lut in buaise pah hi.

Tuni a thiltung theih phet in civil society leh organization tuamtuam a makaite' banah MDC-te, SP, OC, DSP leh Police tamtak in amun delh huan in panpih uh a, well neitu Songam Haokip tenna huangsung leh pua ah mipi dimlet hi. Huai well pen kum tamtak paisa a kibawl hi a, feet 35 vela thuk ahih man in well sung hahsiang dinga kisate'n huih hoihlou banghiam dikkha a buaisia hiding un ginthu kigen hi. Well neitu Songam Haokip in tapa 6 nei a, tuate' lakah tuni a si Nehkhohao in azi leh a tapa kha 5 hipan khat nusia hi.

Khawmite laka MLA masa kipahpihna

Lamka, April-25: CCpur Sub-division sunga om Saikul khawmi MLA telching a om masapen Vungzagin Valte,MLA(56-Thanlon A/C) kipahpihna in April 27, 2012(Sintawpni) zinglam dak 10.00 akipan in Saikul Community Hall ah programme zang ding uhi.

Saikul khawmite huai dingin nasatakin kisakhol uh a,tuni'n mipi in social work nei in Lamka leh mun tuamtuam apan mi tamtak vakuan uhi.

Solar power plant mun ding enkhia

Lamka, April-25: MANIREDA te'n DC office ah Solar Power Plant koihsawm uh a, tuni'n MANIREDA official te'n DC office pha uhi. Amau Solar Power Plant koihna mun ding DC tawh enkhia uhi. MANIREDA te'n 25-KV solar power plant koih sawm in drawing a fel chiangin nasep pan ding uhi. Dist Hospital ah leng MANIREDA te'n Solar Power Plant koih uh a, nitak chiangin Dist Hospital a ward teng ah mei a vak ziakin damloute' adin nuam tuam mahmah in gen uhi.

Youth Gospel Icon 2012 om ding

Lamka, April-25:ECCI nuai a ECA Headquater Pastorate Area Evangelical Youth fellowship leh Music Committee-te saina in May 5, 2012 in Bijang a Area Office ah 'Youth Gospel Icon 2012' title kidemna om ding hi. Huai ah 1st Prize 5000 + trophy + citation; 2nd prize 3000 + trophy + citation leh 3rd prize 2000 + trophy + citation hiding a, mi 2 in consolation prize 1000 tuak ngah ding uhi.

SP makaih in crime meeting om

Lamka, April-25: K.Radhashyam Singh, IPS, SP/CCpur makaihna in amah office chamber ah tuni'n Crime meeting om a, Addl SP, SDPO ban ah Police station tuamtuam a Officer Incharge teng tel uhi. Huai ah Police Station tuamtuam a Crime omte enkhawm uh a, maban a panlakdan ding telin thupoimawh tuamtuam leng gen uhi.

Laithon hawmkhiak felzaw din panla

Lamka, April-25:Postal deptt in Lamka khawpi sung ah laithon leh post office tungtawn a hongtung thil tuamtuamte felzawsem a hawmkhiak theih tupna ziakin veng tuamtuam a innchih ah min(names) lakkhawm sawm in kipan uh a, kuapeuh in ana kithuahpih ding in Postmaster/CCpur in ngetna bawl hi.

AC to DC/CCpur in enkhia

Lamka, April-25:Maniram Sharma, IAS, Asst Commissioner to DC/CCpur makaih in DC office staff bangzahhiam in tuni in District Treasury office inspection bawl uh a, Treasury Officer leh Asst Treasury Officer tawh document tuamtuam enkhawm uhi. DC office staff te'n kumteng in Treasury Office inspection a bawl zel uh kum tamkuamtak a khawl nung in tukum in kipan nawn hi'n kigen hi.

Kipuklai tuisa in buak kha

Lamka, April-25: Kal masa April 20, 2012 nitaklam dak 3.50 velin gamlak a sing-at a giak Ibungo(50) h/o Chanda of Kangvai apaisa April 20,2012 gamlak ah sing-at a giak lai nitaklam in tuisa ki-buakkha in a nungzang apan a pheibul tan liam a, zan in Lamka puaktung a om in dist. hospital ah admit uhi. Ibungo leh a lawmpa in sing-at in Henglep sub-division sung Kamkeilon gam ah giak uhi. April 20, 2012 nitaklam in a lawmpa damdawi la dingin Kamkeilon khua ah phak sung in meh huana omlai Ibungo ki-thalpuk phut in meikhuk bawhkha a, meh huanna ding tuisa in a nungzang apan buaksuk in hun sawttak khawphawk lou in om a, zing an-nek ma in a lawmpa giahbuk mun tung a, khawsung tan paipih in huchi'n Lamka puaktung a om hi'n kigen hi.

CMO/CCpur in suti la

Lamka, April-25:Dr. HL Liensang, Chief Medical Officer/CCpur in hih ding poimawh a neih ziak in suti la in tuni'n Guwahati ah zin a, aman April 28, 2012 tan suti la hi'n kigen hi. CMO/CCpur zinkhiak sung in Dr.F Thienkhogin, District Leprosy Officer/CCpur in CMO mawhpuakna tawh lenkhawm ding hi.

IWMP tawh kisai Workshop

Lamka, April-25: DRDA saina tuni in Dist Training Centre ah 'Workshop on Technical Issue &Account Matters for WDT members under IWMP" kichi om a, huai ah ED/DRDA in IWMP tawh kisai pulakna nei a,DFO/CCpur in training tawh kisai gen hi. Training hun sung in Imphal apan State Level Nodal Agency (SLNA) official 2 -AK Bowjit Singh, Technical Expert leh N. Shimrah, Finance Officer, SLNA (IWMP) ban ah DRDA/CCpur te'n sinsak uhi. Huai ah DRDA staff-te , Watershed Development teamte ban ah BDO te tel uhi.

Career Guidance Seminar om iding

Lamka, April-25: SSPP Gangpimualkawi Branch in student-te' siamsinna maban ding khualna in G. Mualkawi PCI(R) biakinn ah April 28, 2012 zinglam dak 9.20 apan nitaklam dak 3.30 kikal, "1-day Students' Career Guidance Seminar" nei ding uh a, huai ah M. Gouzamang, EM, ADC/CCpur khuallian hiding a, Resource person in Dr. David Jamzathang, Executive Director/PHF; Khaisiamlal Guite, Asst. Gen. Manager, NABARD, Major C. Tonsing, 27-Sector/AR leh Dr. Liangoumuan Samte, MO, Dist. hospital/CCpur pang ding uh a, thupi tuamtuam zangin sinsak ding uhi.

CRC Level Committee meeting

Lamka, April-25: CCpur Block saina in tuni in Rengkai Govt Hr Sec school, Vungzagen H/S leh New Lamka JB School ah 'One Day Cluster Resource Centre Level Committee' meeting om hi. Huai ah Right to Education Act thu, RTE pen cluster level a monitor ding thu leh thu tuamtuam genkhawm uhi.

'Literary Meet-2912' om ding

Lamka, April-25: Molnom a Sunshine English School ah April 25-26, 2012 sung 'Literary Meet-2012' om ding hi. April 25,2012 in GK competition, Drawing/Painting competition leh Essay writing competition om ding a, April 26, 2012 in Solo & peom recitation, Quiza competition, Extempore speech, Debating competition, Slogan writing competition, News reading leh adangdang om ding hi.

SUUNNA

Mr Zammin (75) f/o Thangpi of Tuibuong tuni zinglam in awmna in si a, tuni'n Tuibuong hanmual ah kivui hi. Thangpi ahihleh tulelin DC/CCpur office ah Lambu sem ahi hi.

Mrs. Ngaiching (95) w/o (L) V. Khamvung of Sinzawl tuni nitaklam dak 5:00 in teknat in si a, April 26 in kivui ding hi.

Census tawh kisai 'One-day Workshop'

Imphal, April-25: Tuni'n Clasic Hotel ah 'Household Amenities and Assets' chih thupi a zang in 'One-Day workshop' om hi. Huai ah moderator in Prof. N. Mohendro Singh pang a, O. Biren, former Director(Eco & Statistics); Prof. RK Narendra, Head of Dept. of Bio-Statics, RIMS; RK Dilip, former Director of Communication and Capacity Development te'n thupi tuamtuam zangin thugen uhi.

Gari a tinted glass etzui sawm

Imphal, April-25:Imphal West district police te'n tulai a thiltung deih-huailou khenkhat aziakin naupang khenkhat pimang(kidnap) a om leh crime thiltungte dal tupna ziakin Gari a glass kithuah pawlam apan kimu paisuak theilou(tinted glass) himhim ngentel taka etkhiak(check) hiding in puang uhi. Naupang pimangna dia Gari kizangte tinted glass hideuh vek a, Motor Vehicle Act 1988 a Section 109na leh Central Motor Vehicvle Rules,1989 a Rule 100(2) dungzui in gari a tinted glass tuahte Mtor Vehicle Act,1988 a section 191na dungzuii in action khauhtak lakkhum tyheihj hi'n SP,Imphal West in gen hi.

39-A/R te'n KYKL khat mankhia

Imphal, April-25: 23-Assam Rifles te'n tuni zinglam in Pukhao Khabam Mayai Leikai leh a kimlak ah search operation a bawlna uah KYKL atel khat mankhia uh chihthu om hi. Matkhiak a om a min Th. Ningthem @ Sanatomba (30) hi a, Assam Rifles te'n Police te kiangah pekhia uhi.

Lamlian bawlna zawhkin din phu

Imphal, April-25: Imphal-Jiribam kikal lamlian(National Highway No. 37 tuma a NH No. 53 kichi ) tulela Border Roads Orgn(BRO) pawlin repairing a bawl uh June 2012 khasung in nasep zousiang man dinga thupe ding in All Manipur Road Transport & Drivers Motor Workers' Union pawin state government phu(pressed) uhi. Amau pawlin thusuak a bawldan un lamlian repair-na dinga vanzat poimawhte zat louh in lamlian sik ah koih maimah hi a, GREF pawlin a nasepna uh ze-awl lua hi'n leng taklang uhi. Huailou in Barak, Maku leh Irang-lui tunga lei(bridge)te leng ginalou in dengdel lua chi'n taklang uhi.

Mipi in demand letter piaksawm mankhia

Imphal, April-25: Heingang PS huamsung a om Sangakpham a St. Anthony H/S ah tuni nitaklam dak 3:10 velin Yamaha a kipua mi 2 in demand letter piaksawm uh a, school suti ziakin pe theilou in school kiang a naupang om khat sawl uhi. Naupang ut kei mahleh piaksak teitei a sawmna lam uah Leikai mipite'n naupang pimang sawm hidia gingta in kisamkhawm in delh uhi. Huchi kalah mi 2 laka khatpen taimang thei in khat mankha uhi. Mat a om pen Th. Robert (24) s/o Kiran of Kakching Khunou hi a, KYKL atel hidan in kigen hi. Mipi te'n Police khut ah Th. Robert pekhia uhi.

Sainik School a Cadet 2 in hihhoih

Imphal, April-25: Manipur govt nuaia Deptt of Education(S) in Ministry of Science & Technology, Govt of India apan huhna zangin April 5-7, 2012 sung Bengali H/S ah 'Innovation in Science Pursuit for Inspire Research' chihthu a zangin 2nd District Level Exhibition & Project Competition of INSPIRE Awardees a saina uah Sainik School a cadet 2 in prize leh merit certificate la uh chi'n PIB(Defence Wing) thusuak in gen hi. Manipur state pumpi apan 391 telte lak ah Sainik School a Cdt Pradyumna Arambam in a project 'Treatment of Sewage Water by Constructing Artificial Wetlands' tungtawn in khatna la a, Cdt Miranda Thoudam in a project 'Energy from Hydrogen' tungtawn in 2na la hi. Hun paisa ah leng huai cadet 2 te'n Ministry of Science & Technology, Govt of India apan scholaship Rs. 5,000 tuak ngah uh a, May 3-5, 2012 sung Bengali H/S a State Level Exhibition om dingah tel ding uhi.