District a BADP nasepna enkhe ding
Lamka, April-24: CCpur district ah Border Area Development Programme (BADP) tawh kisai nasepnate enkhe ding in Dr Buddhadeb Ghosh, Principal Investigator, ISI/Kolkatta in April 27, 2012 in Lamka hongpha dinga, DC/CCpur, ED/DRDA leh DRDA official-te tawh meeting ding uhi. Meeting zawh in Dr Buddhadeb in Behiang (V), Hiangtam (K) leh Pakmual khua a BADP nasepnate enkhe ding a, April 28, 2012 in leng sunzom ding ding hi. April 28, 2012 in Imphal ah kiknawn ding hi'n thusuak kingah hi.
Guwahati apan Leimakhong ah joined
Lamka, April-24: Lalsiam Guite s/o Zamvung of Gangpimual tulela State Bank of India(SBI) a Probationery Officer semlel in April 9, 2012 in Guwahati akipan in SBI/Leimakhong Branch ah hong kisuan a, tu'n passing Officer mawhpuakna len hi'n thutut kingah hi.Amah probationary hun kum 2 a chinna hi'n kigen hi.
Cycle a accident dam zoulou in si
Lamka, April-24:Mrs Chiinneilam(25) w/o S. Manglianthang of Manniang veng apaisa March 30, 2012 nitaklam in Lamka hanmual lamsukna mun ah cycle a tailai kipukin accident a, dist. hospital puaktung nungin doctor te'n Imphal ah refered uh a, hileleng dam zoulou in zan sunnung dak 1.30 velin si a, tuni'n kivui hi.
Akigendan in Chiinneilam in Lamka zuan a cycle a tailai lampi a paite' a pelh sawmna lam in lamkianga suang gawikha in kipuk a, Lamka apan RIMS puaktung ahih nungin
Doctor te'n operation bawlin angoi(intestine) mun 2 ah kitan a, a gilpi leng mun khat kek in accident-na ah a sin(liver) leh taksa tung mun bangzah sukha hi'n kigen a, hi.Amah ni 7 sung ICU ah om a, Ward ah ni 9 a om nungin lam-et huailou hi a theihziakin doctor te'n inn a kienkol dingin paisak uh hi'n kigen hi. Aman a pasal banah tapa kum 3 mi leh kum 2 lela upa nusia hi'n kigen hi.
CCpur block ading Free text book hawm
Lamka, April-24: CCpur dist sunga govt school leh Govt Aided school tamtak ah free text book hawmkhiak hi a, tuni'n CCpur govt H/S ah CCpur block a school 64 ading hawmkhia uhi. April 26, 2012 in Henglep block nuai a school 25 ading hawmkhiat hiding hi'n kigen hi.
IWMP tawh kisai training om ding
Lamka, April-24: DRDA/CCpur saina in April 27 & 28, 2012 sung District Training Centre ah Integrated Watershed Management Program (IWMP) nasepna tawh kisai in Watershed Committee-te' ading in Workshop omding hi. April 27, 2012 in Project I- Henglep block, Samulamlan leh Tuibuong block bnah Project III - Vangai block leh Tipaimukh block te'n nei ding uh a, April 28, 2012 in Project II- Singngat block leh Project IV- Thanlon block te'n nei ding uhi. Huai Workshop ah Block tuamtuam a IWMP tawh kisai Chairman leh Secretary-te tel ding uhi.
Nam Khawmpi Committee meeting
Lamka, April-24: Hiangtam Lamka a PTC office ah tuni sunnung in kumlui April 5-8, 2011 sung Sinzawl khua a 2nd Paite Nam Khawmpi omlai a Committee member-te meeting uhi. Huai ah Committee member (late)Kamkhanpau @ Kampi suunna leng nei uhi. 2nd Paite Nam khawmpi a CD kizuak khinloute zuak khitdan ding leh thil felloute hihfel ding thu genkhawm uhi.
Manipur State RSBY Society in ngen
Lamka, April-24: Manipur State Rashtriya Swasthya Bima Yojana (National Health Insurance Scheme) a Executive Director NS Gokulmani in Lamka block, Tuibuong leh Saikot block nuai a Hausa/Village Authority Chairman teng in SSPP tower, Hiangtam Lamka(near Public Ground ) ah BPL family intimation slip lading in theisak hi. Hausa/VA chairman te'n BPL family member-te' lak ah intimation slip hawm ding leh enrolment bawl hun ah panla chiat din ngen hi.
Career Counselling om ding
Lamka, April-24: SSPP Gen HQ saina in April 28, 2012 sunnung in Bungmual a SSPP complex ah 'How to crack combined graduate level examination 2012' chih thupi zang in Career Counselling om ding hi. Huai ah SSPP member tutung a application form fill-up te kia telthei ding uh a, registration fee Rs 30 hiding hi. Registration bawl theihna munte Mawii dawr, Lamlian Veng, Bungmual; Kimbawi Pan Shop, Opp.Dorcas Hall, Hebron Veng, New Lamka leh Songbul News Agency, New Bazar hi'n gen uhi.
Theihgigena suangphuh honna
Lamka,April-24:(late)N. Songchinkhup, ex-Minister theihgigena suangphuh(memorial stone) honna April 25, 2012(Nilaini) sunnung dak 1.00 in YPA hanmual, New Lamka ah om ding hi. N Songchinkhup in 56-Thanlon A/C apan MLA ahih sung in Cabinet Minister dinmun tanpha len in Social Welfare, Transport leh deptt tuamtuam pua hi.Amah Manipur Assembly ah Chairman, Hill Areas Committee in leng pang a, Zomi Council a Chairman hihna leng hun sawtkhop len hi. Diabetes leh heart case ziakin September 13, 2010 in ana mualliam hi.
SUUNNA
Upa Vungchinpau @ Paupek(79) s/o (late) Khualchin of Vengnuam, New Lamka tuni zingsang baihtak in TB natna zakin si a, YPA New Lamka hanmual ah kivui hi.
'Manipur Meets West' -Musical Concert
Imphal, April-24: National Cadet Corps(NCC),Manipur-te saina in zanhal nitaklam dak 6.00 in NCC Ground ah 'Manipur Meets West' chih thupi zangin Musical Concert nuamtak leh thupitak om chi'n PIB(Defence Wing) thusuak in gen hi.Huai ah Kh. Joykishan,MLA khuallian hi a, Functional President in Col JJ Vargese, Commander NCC Group Manipur pang a, Guest of Honour in Col Sanjiv Kumar, Commandant, 28-Assam Rifles pang hi. Huai ah Manipur a group minthang Roop Raag te'n Manipuri lasa uh a, Phoenix leh White Fire te'n Western music lahna tawh kithuah concert nei uhi.
H. Naba, Naba Volcano, Sanatombi, Asem Bimola, Brojen Sharma, Ranbir Thouna, Takhelambam Premkumar, Lt Col Shantikumar Sapam,Sadanand, Pushparani, Nandeswori, Sarita Gazmi Natasha, Madhuri, Tinku, Sori Senjam, Swamikumar leh Kairang Quwali Group te'n Manipuri lasa uh a, Guru Rewben, Sando, Lain Gangte, Lt Col Shantikumar Sapam, Vivek, Alvina leh Shushmita sapla sa uhi. Concert om sungteng ISTV te'n live telecast bawl uhi.
March & April lawh(salary) zekai ding
Imphal, April-24: Manipur in India govt apan Central assistance Rs. 100 crores a ngah banah Market Borrowing dan in Rs. 97 crores a ngah kigawm Rs. 190 crores vel state account ah a koihtheih ziakin RBI ah overdraft neilou phot suak a, hileleng state govt employee-te' kha 1 lawh kigawm Rs. 250 crores a phak ziakin overdraft ompah thei ding hi'n kigen hi. Huai ziakin state govt in overdraft pumpelh theihna ding in March & April, 2012 kha lawh a hawmkhiakpah gintak huailoun hi'n kigen a, state govt account a sum tamlouh ziakin Finance deptt in March 2012 kha lawh leh security force-te ration money leng hawmkhiak theih nailouh dingin gak(prevented) chihthu om hi.
Sanakeithel a bomb puak ah 2 liam
Imphal, April-24: Lamphel PS huamsung Sanakeithel a Radha Digital Photo Studio building kiangah tuni nitak dak 6:40 velin huai building neitu banah Amway agent Dr. Madhubala in a car (No. MN-01W/0662) a koih meltheihlouhte'n bomb paihkhum uh a, huai puakzak in car nunglam tyre 2 te a puahkek banah Car nunglam glass teng kisia a, a kianga transformer om leng kisia in a thautui teng kibua hi. Bomb puahna kianga omkha nektawm zong a khawsa N. Joysana(35) of Langmeidong bazar tulel a Sanakeithel a om leh S. Naobi(29) of Tentha, tulel a Sanakeithel a om liam uhi. Thiltung zak phetin Lamphel police te'n vadelh mahle uh matkhiak neilou uhi.
Vehicle repairing tawh kisai training
Imphal, April-24: Red Shield division nuai a om 10-Assam Rifles pawlin April 8, 2012 akipan in Tamenglong district sunga Noney khua ah sepna neilou tuailaite Gari(vehicle) repairing sinsakna Vocational training neihpih uh a, huai ah Nonei, Tupul, Kotlein, Lamdangmei leh Kangchup khua apan tuailai tamtak tel uhi. Huai training in a thiltup lianpen thildang hilouin tuailaite'n amau khawsakna ding leh nekzonna ding siamna a neih uh deihsakna ziak hi a, Imphal a workshop liante tawh leng kithuza leh kizopna neikawm a sai uh hi'n PIB(Defence Wing) thusuak in gen hi.
MI Chief Enginner' inn ah bomb kipai
Imphal, April-24 : Lamphel PS huamsung Tera Khuman ah tuni nitak dak 6:45 velin meltheihlouhte'n Minor Irrigation(MI) a Chief Engineer Keisham Romi tenna inn ah bomb khat paihkhum uh a, puakzak mahleh asi leh liam omlou hi'n kigen hi. Huailouin tuni nitak dak 7.00 velin leng Sagolband Tongdom Leikai ah hand-grenade khat puakzak a, hileleng aliam omlou hi'n Police thusuak in gen hi.
.