Vungzagin Valte, MLA kipahpihna programme zang uh
Lamka, April-27: Lamka apan km 6 vela gamla Saikul khua ah tuni zinglam dak 10.30 apan in Saikul khawsuak MLA dia telching masak a om Vungzagin Valte, MLA(56-Thanlon A/C) kipahpihna om hi. Huai ah mun tuamtuam apan Saikul khua a khangkhia mipi tamtak paikhawm uh a, Ginsuanhau Zou,MLA(60-Singngat A/C) in leng uap hi. Tuni a kikhopna ah Saikul khua omkhiak akipan tuni tana site suunna hun leng zang uhi.
Vungzagin Valte,MLA in mipi kikhawmte’ ma a athugenna ah Saikul kichi CCpur district a singtangmite’ adiakin Paite-Zomite adinga khangthu poimawhtak piankhiakna mun hi’n gen a, khawta himahleh tuni chiangin mun tuamtuam ah kithehzak uh ahihdan gen hi. Saikul khua apan khangkhia amah ngei leng SBI ah kum 20 vel asep sungin Award 3vei sangkha in, tuateng banah MLA tanpha tung thei dinga vawksang ahihna tung ah Pathian tungah leng kipahthu gen hi. Aman a genzelna ah tutung election in chituamna bikdeuh nei a, mipite’n mahni deihpen, phutluihna om hetlou a atel theihman un Pathian min phat ahihdan gen hi. Saikul khawmi gentheitak leh belhding inn hoih nei zouloute’ adinga panlak theihdan tenga panla ding hi a gen kawmin khawsunga bii inn teng Langva ngaihtuahsak sawm hi.Valte in damlou lupna ngakte panpihna pia hi.
Ginsuanhau Zou,MLA in a thugenna ah Saikul khawsung lutna lampi hoihtaka puah ahihtheihna dingin ballu single tanbek sundim hidingin chiam a, khawsung mi kum 70 tunglamte kiang ah leng thilpiak pia hi. Tuni a kipahpihna programme zatna ah Rev Kamchinmang, DS/Thanlon in Vungzagin Valte,MLA leh a innkuante ading in vualzawlna ngetna thumna nei hi. Khawsung mipi te’n MLA kipahpihna in memento khat leh pak pia uh a, programme zatzawh in ankuang umkhawmna in zui hi.
STC General Assembly-cum-Election lawhchingtak in zou uh
Lamka, April-27: Simveng a SYO Hall ah tuni zinglam dak 10:00 apan in Simte Tribe Council(STC) General Assembly-cum-Election om a, Rev L.Khammang, Pastor AG in Assembly hong kawmin Pathian kiang ah thumna in lan hi. Huai ah delegate 297 paikhawmte’n kum 2012-2015 sunga STC General President ding in B.Dongzalian leh General Secretary ding in Th Doukhanmang telching uhi. Central Advisory Board ding in Nehzasoi, H.Jamkhanpau, N.Pauchindou, L.Paudomang, Th Chinkhothang, S.Thangchinlal , Th Haukhosoi, T.Goukhomang leh S.Jamthang te telching in om uh a, Chief Executive Committee ding in Th Dongchinpau, Kamlian, Suankhogin, Tualkap, Kamchinthang,L.Chinlal, Dongsoi, T.Pumkhokam leh H.Chinlianjohn telching uhi.
Langkhothang, Election Commission in telching a omteng kichiamsak a, Rev Kaikhanmang in Pathian
kiang ah thumsakna nei hi. General Assembly sung in thu poimawh tuamtuam genkhawm uh a, STC Constitution kizang lel pen revision leh amendment bawl ding, huai semzui ding in Revision & Amendment Committee phutkhia uh a, huai Committee a Convenor dingin H.Jamkhanpau guang uh a, member 7 vel pha ding hi’n gen uhi.
District a BADP nasepna enkhia
Lamka, April-27: CCpur district a Border Area Development Programme(BADP) awh kisai nasepte enkhe ding in Dr Buddhadeb Ghosh, Principal Investigator, ISI/Kolkatta in tuni in Lamkha hongpha a, DC office ah DC/CCpur, ED/DRDA, SDO/Singngat leh DRDA official-te tawh meeting uhi. Dr.Buddhadeb Ghosh in meeting zawh sun dak 12:30 in DC office apan Singngat area a Behiang (V), Hiangtam(K) leh Pakmual khua a BADP nasepnate enkhe ding in Lamka kuankhia a, amah April 28, 2012 nitaklam in Imphal ah kiknawn ding hi’n kigen hi.
Indefinite bandh puang nawn
Lamka, April-27 : Lamka-Imphal kikal kawmtuah a passenger service Tata-Winger pawl All Lamka Texi Owners Society (ALTOS) te’n govt ah thil a ngette uh hihbuchin saklouh ziaka lungkimlou in April 29, 2012 zankim akipan in Tedim Road ah hunchiam omlou bandh puang uhi. Bandh sung in Medical deptt, Water supply, Electricity leh Institution te khahkawl(relax) ding uh a, Lamka-Imphal kikal Tedim Road ah passenger pua gari himhim tailou di’n puang uh a, passenger pua gari tai teitei om a, banghiam atuah ua leh mimal in mawh kipuak ding chi’n ALTOS makaite’ apan kiza hi. ALTOS pawl in Imphal ah Tata Winger-te parking mun kichian piak ding , KCP-MC( Nongdren Khomba) group te’n Tata Winger (ALTOS) tunga bandh a puan uh lakkhiat ding, Impha- CCpur Bus Owners &Workers Assn(Down service) te’n ALTOS makaite tung a FIR a bawl uh lakkhiat ding leh Imphal a ALTOS te’ timing ding govt in a piak ding chihte hi’n ALTOS makaite’ apan kiza hi.
Youth Club-te tawh joint meeting
Lamka, April-27: Grace Zamnu,MDC in tenna inn Lailam Veng ah tuni zinglam dak 11:00 apan in Muallum ADC bialsung a khaw tuamtuam apan Youth Club makaite samkhawm in joint meeting nei uhi. Huai ah khaw tuamtuam apan mi 20 vel paikhawm uh a, maban ah Natural Calamity Awareness Campaign leh Blood Donation Awareness Seminar banah MDC Football Tournament ding thu genkhawm uhi. May 9, 2012 in Lamka ah Natural Calamity Awareness Campaign leh Blood Donation Awareness Seminar om ding a, June 2012 sungin MDC Football Tournament neih din thupuk uh chihthu om hi.
IWMP tawh kisai training kipan
Lamka, April-27: DRDA/CCpur saina in tuni akipan in District Training Centre ah Integrated Watershed Management Program(IWMP) nasepna tawh kisai in Watershed Committee-te’ ading in Workshop om hi. Tuni’n Project I- Henglep block, Samulamlan leh Tuibuong block banah Project III - Vangai block leh Tipaimukh block te’n training nei uh a, IWMP tawh kisai block tuamtuam a Chairman leh Secretary te tel uhi. April 28, 2012 in Project II- Singngat block leh Project IV- Thanlon block te training ding uhi.
Vengsung mipi in social work nei
Lamka, April-27 : Tedim apan Synod Super Market lutna bul a culvert kibawl thak ah hawktui luangkhe theilou in Tedim Road lampi ah luang a, Vengnuam mipi’n muthei nawnlou leh chimtak gawp in tuni zingsang in social work nei in culvert nawltuak a nin omte hahsiang uhi. Thu kizadan in culvert nuai a adouna singte a kilakkhiat louh ziak in nulah sung ah niin dim a, hawktui luanna ding hubing vek a, mipite’n niin omteng hahsiang in culvert douna singte leng lakhia uhi.
S.I apan Inspector ah kaisang
Lamka, April-27: Hnunsuanmung Valte s/o Thanglian Valte of Lailam veng in hun bangtanhiam Central Industrial Security Force(CISF) ah Sub Inspector a sepnung in zanzekin Inspector ah kaisang hi. Hnunsuanmung tulelin Baroda Airport (Gujarat) ah posting in omlel a, promotion a ngah tawh kitonin Assam a Dibrugarh district sung Duliajan mun a OIL India Limited’ Navratna company HQ ah posting ding chihthu kiza hi.
Awareness Campaign om ding
Lamka, April-27: Project Manager, District Handlooms & Textiles/CCpur saina in April 28, 2012 in IB Road a Synod Hall ah ‘Awareness campaign on welfare schemes (HIS & MGBBY), Comprehensive Package(WCC & YPB) and Revival & Restructuring Package for Handloom sectors’ om ding hi. Huai ah V.Tualthang, Director, Commerce & Industries, Manipur khuallian in pang ding a, Functional President in M.Meghachandra Singh, Project Manager(Handloom)/CCpur pang ding a, Guest of Honour in Kommu Ravindra, Asst. Director & Officer-in-charge, Weavers Service Centre, Imphal pang ding hi. Huai ah mi tuamtuam 6 in sinsak ding uhi.
Priscilla Home ah puankhui zilna
Lamka, April-27: Priscilla Home, New Lamka ah kum 1 sung siamgat leh puankhui zil ut numeite ading in manbei a ziltheihna ding om a, a lunglutte adin amun ah kantheih ding a, May 5, 2012 zinglam dak 11.00 in personal interview om ding hi.Hatsakna tuamtuam ziaka hinkhua zangkhial numeite’n leng ngaihven theih ding chihthu om hi.
Dist Level Athletics Meet
Lamka, April-27: SSA leh RMSA saina in May 9-11, 2012 sung Lamka Public Ground ah, school tuamtuamte a ding in District Level Athletics Meet om ding hi. Huai tawh kisai tuni sunnung in DC & Chairperson, DBE/SSA-RTE, CCpur makaih in meeting om a, huai ah ZEO/CCpur leh CCpur dist sung a block tuamtuam apan DI of schools te tel uhi. Block tenga school-te lak apan naupang hatpen leh a siampente tunungin District level Athletics Meet ah telsakdan ding leng genkhawm uhi.
Tuni in Cabinet Meeting om
Imphal, April-27: CM Cabinet Secretariat ah tuni nitaklam dak 3:00 akipan in Manipur Cabinet Meeting om a, huai ah Panchayati Raj Amendment tungtang genkhawm uhi. Thu kizadan in tunung sawtlou in Manipur phaijang bial ah Panchayati election ding tawh kisai in bial lepthakna( delimitation) poimawh ding hiam chih telin thu tuamtuam genkhawm uh a, tu dinmun ah Panchayati election om ding hileleng delimitation poimawh lou ding hidan in gen uhi.
Ministy keklet guih himaithei
Imphal, April-27: Chief Minister O. Ibobi leh MPCC President banah Home Minister Gaikhangam zan zinglam dak 10.00 akipan in Chief Minister office ah amau gel kia dakkal khar sung a houlimna uah bangthu genkhawm uhiam chih bangmah puankhiak hikei mahleh mi tamtak in Manipur ministry keklet ding tungtang genkhawm uh hidingin gintak thu gen uhi. New Delhi akipan April 22, 2012 a hongtung Chief Minister leh April 23, 2012 a hongtung Home Minister kimutuahlou in om vengveng uh a, zan a kimu nawn pan uh hi’n kigen hi. Huchi kal ah Ministry leng April 28,2012(Kiginni) in keklet ahih himaithei dan in thuthang om a, hileleng thuchiantak bel theih hinai tuanlou hi.
Health & FW Minister in hong ding
Imphal, April-27: Shija Hospital, Langol a Auditorium ah April 28, 2012 sunnung dak 2.30 in Health & Family Welfare Minister Phungzathang Tonsing in Manipur adia masapen “Calculase II-Holmium Laser & Flexible Ureterorenoscope (Most advanced non cutting urinary stone surgery)” vanzat leh ‘Retrograde Intra Renal Surgery(RIRS)’ tawh kisai Live workshop honna nei ding hi. Huai ah Guest of Honour in Dr Sh. Shurchandra, Director of Health Services pang ding a, Invited Faculty in Dr Harbans Singh,MS, MCh(Urology), Chief Urologist, RG Stone, New Delhi pang ding a,Functional President in Dr S. Jugindra , Medical Supdt Shija Hospitals & Research Institute pang ding hi.
Misi luang khat kimukhia
Imphal, April-27 : Kumbi PS huamsung Napet Mayai Leikai ah tuni’n misi luang khat muhkhiak hi a, misi pen a ngawng kitansa in om a, a lu leh a pum kikhen hi’n kigen hi. Misi pen Moirangthem Mohan (27) s/o Mangi of Napet Makha Leikai chih suikhiak hi a, K. Ibomcha(49) of Napet Awang Leikai in a thah hidan in kigen hi. A kigendan in tumalam in Mohan in tem in Ibomcha ana dawt ngei a, huai thukna dan in Ibomcha in Mohan a thah hidi’n ginthu kigen hi. Ibomcha tuni mah in Police in mankhia uhi.
Meltheihlouh te’n Gari 2 hihsia
Imphal, April-27: Tuni zingsang baihtak dak 2.00 velin Assam akipan Imphal zuan Tata gari 2 in cement leh Activa gari 12 vel pawlai meltheihlouh pawlkhat in Cachar District sung Lakhipur Police Station biala Fulertal kiang National Highway No. 53 ah khawlsak uh a, Tata gari 2 (No. MN-01 8283 & MN-01 7564) te bomb tawh kibang zangin hihsia uh chihthu om hi. Huai Tata gari 2te ahun kibangin hihsiatsak uh a, huai mukha khawmite’n Lakhipur Police leh Fire Service-te theisak mahle uh ahun a delh kuamah omlou hi’n kigen hi. Huai Tata gari 2 te zingsang khawvak tan in leng a kuang(burning) kimulai chihthu om hi.
Khamtheih a sumdawng 2 man
Imphal, April-27: Lilong Turel Ahanbi lak ah tuni zingsang in 28-Assam Rifles te’n operation a bawlna uah damdoi khamtheih a sumdawng mi 2 leh Tata Safari(No. MN-04A/7444) sunga kipua damdawi khamtheih Pseudoephedrine tablets 21000 mukhia uhi. A/R te’n damdoi khamtheih pua Ayub Khan (36) leh Amjad Khan (28) of Lilong mankhia in Lilong Police ah pekhia uhi. Thudang kizadan in 24-Assam Rifles te’n Tengnoupal area lak operation a bawlna uah Maruti Van (No. MN-04/7490) a check ua leh damdawi khamtheih Brombezine tablets kg. 8 vel mukhia uh a, aneitu Md. Mansur (27) of Moreh Ward No. 5 man in Tengnoupal Police ah pekhia uhi.
Army-te’n UTLF cadre 1 mankhia
Imphal, April-27:Red Shield Divn nuaia om 33-Assam Rifles te’n tuni zingsang in Sagang bazar leh a kimlak operation a bawlna uah UTLF atel khat mankhia uh a, amah Satkholen Khongsal( 26) of Khomunnom( near IT road, Kangpokpi Ward No 12) hidan in PIB(Defence Wing) thusuak om hi. Amah thudotna apan a kipuandan in UTLF group a cadra hi a, tax khon banah Sagang area apan helpawl adia sumkhon hi’n kigen hi. Assam Rifles te’n Kumpi Police station ah pekhia uhi.
Damdoi khamtheih tamtak mukhia
Imphal, April-27: Narcotic Control Bureau (NCB) leh 28-Assam Rifles kithuahte’n zan in Moijing area lak operation a bawlna uah Opium kg. 8, limestone opium kg. 62 (cake), limestone tin 41, Ammonium Chloride kg. 1, Processing Machine 1, Pressing iron machine 1 leh Glows pairs 3 mukhia uh a, NCB Imphal ah pekhia uhi. Tualou in 42-Assam Rifles leh 28-Assam Rifles kithuah te’n tuni zingsang in Nangbrang area lak operation a bawlna uah RPF/PLA atel self-styled Corporal Th. Amarjit @ Priyokumar (27) of Moirangthem Laijibam Leikai mankhia uh chihthu om hi.
.