Angels' Place ah Doctorate degree leh Trophy lopna om

Lamka, April-23: Bungmual khawkhung a om tagah etkolna Angel's Place ah tuni in Dr. R. Sanga, Co-ordinator,Angel's Place in 'Throne of Grace Theological Seminary & Ministries INC(International)' apan Doctorate Degree(Ph.D) a ngah lopna leh March 4, 2012 a Khuman Lampak main stadium Imphal a 5th Inter Children's Home Sports Festival 2012 huna Angel's Place apan student-te'n group, individual leh cultural events ah Gold Medal 10, Silver 6 leh Bronze 5 a lak uh kipahpihna programme om hi. Huai hun ah H. Mangchinkhup, EM/ADC; C. Hangshing, ED/DRDA; K. Thansang, retd Addl.DC/Ccpur; Dr. V.C. Pau leh USA apan Angel's Place enkoltu' James Connection Trust a Executive Director Jan C. Swensen, Donald Vice leh a teamte'n leng uap uhi. Lamka leh Imphal akipan in leng mi tamtak kikhawm uh a, Angel's Place a naupang etkol a omte' nu-le-pate leng tel uhi.

Dr. R. Sanga in a thugenna ah heutute adia nasep haksa mahmah ahihleh mihing bawlhoih sawma etkolna nasep hi a, tuamah bangin naupang etkolna lamah leng haksatna tampi kalah tuni chiangin Angels' Place ah naupang tagah leh genthei 145 vel etkol a omlel hi'n gen hi. James Connection Trust a Executive Director Jan C. Swensen in New Delhi apan Azhoniu Phizo in a gelh Ambassador car lem hongkhe kawmin Angels' Place a naupangte'n lemgelh leh lam chituamtuam a siamna a neihna ding un hibang thilte poimawh ahihdan gen hi. USA a Evangelical Christian University,Association of Evangelical Gospel Assemblies,Los Angels nuaia affiliated Hyderabad a 'Throne of Grace Theological Seminary & Ministries INC(International)' ah mi 8 in Ph. D ngah in huai lakah Manipur apan Dr. R. Sanga in "Sovereignty of God" kichi thesis agelh tungtawn in Ph.D. ngah a, January 11, 2012 in degree piakkhiakna Convocation programme om hi'n kigen hi.

{rss uri=https://picasaweb.google.com/zogam.com/Apr242012?authkey=Gv1sRgCL-FqqC4iaPC8wE limit=10}

Union Home Ministry in ceasefire hihtawp ut hi'n ngawh
'Sambhu Singh in Manipur Chief Secretary hihna len-ut' – NSCN(IM)

Kohima, April-23: Tulai a Nagalim sung leh pua a security force-te' gamtatdan apan thil tamtak chiangta a, Ministry of Home Affairs (MHA) in centre govt leh NSCN(IM) kala ceasefire pailel hihbei ut uh ahi, chi'n NSCNI(M) in ngawh uhi. NSCN(IM) leader-te'n a genna uah MHA a Joint Secretary(North East) Shambhu Singh in Prime Minister's office ah amah mimal' lunglutna thu tuamtuam banah phaijang bial mite angvan kawmin Nagate doudalna thu tamtak ana tunta a, Manipur Chief Secretary hih a lunggulh ziaka huai teng semsuah ahi, chi uhi.

NSCN(IM) in ngawhna a bawlna uah Shambu Singh adingin ceasefire kichi leh Naga issue hihveng(solution) ding bangmah poimawhlou a, amah lunglutna pen ahihleh Manipur Chief Secretary letkhak ding chih hilel chi uhi. Tuabanah Cease Fire Monitoring Groups (CFMG) Chairman Maj Gen (retd) N George nasep leh gamtatdan in leng khentuam nei mahmah a, centre leh NSCN kal a palai dia guan himahleh Assam Rifles-te' sik-le-tanga a din nakkhem pen theihsiam huai nawnlou chi uhi. Thu leng vengvung paulam kawmin Naga mipite'n NSCN(IM) gum nawnlou uh a, tua ziakin a designated camp teng uh security force te'n um kual le uh kipekhia (surrender) mai ding uh ahi chih Centre lungsim guk hilel chi'n NSCN(IM) makaite'n ngawhna bawl uhi.

Myanmar Parliament session tuni'n kipan

NLD apan MP chingthakte'n session boycott in kichiam lou uh

Naypidaw, April-23: Myanmar Opposition leader Ms Aung San Suu Kyi makaihna National League for Democracy (NLD) te'n government ah a thilphut uh sukbuchin ahihlouh ziaka lungkimlou in tuni apan Parliament session om boycott puang uh a, April 1, 2012 a by-election ah MP telching a om NLD member 43 te kuamah MP hihna din kichiamlou uhi.

NLD apan MP dia telchingthakte laka tel Ohn Kyaing in a gendanin Parliamentarian te' adia kichiamna ding a Myanmar dan bupi(constitution) a kigelh thumal khat paihkhiak a adang a khen ding chi a demand kibawl sukbuchin ahihlouh ziakin Aung San Suu Kyi telin NLD member te kuamah Naypyidaw (Myanmar' khawpi ) ah ka pai kei ua, Parliament session ah leng ka tel kei uh, chi hi. President Thein Sein in reformist administration a patkhiak nunga election ah opposition-te tawh a kitauhpatna uh hi'n kigen hi.

Mandalay MP Ohn Kyaing in agenbehna ah tu in NLD thupuangtu U Nyan Win makaihin ukil(lawyer) te'n maban a panlakdan ding buaipih lel uh a, ni tamlou nungin sukfel hiding chi'n gen hi. Parliamentarian-te' kichiamna(oath taking) tawh kisai clause ah Myanmar danbupi humbit "safeguard" dingin ka kichiam chih pen NLD in danbupi zahtak "respect" chi a khen hi hen chi'n ngetna bawl uhi. A sungthu taktak ahihleh Aung San Suu Kyi in kum 2008 a military junta in dan bupi apawng bawl mawk uh khen utna ziak banah politics apan military kichi a paihkhiak vilvel ut ziak hi'n gen uhi.Military junta te'n danbupi a bawlthak uh kum 2010 akipan Myanmar govt in zang hi'n kigen hi. Aung San Suu Kyi in Radio Free Asia-te' kiang a agenna ah, kichiam 'oath' thumal khat khenkhiak ahih hunhun apan NLD member-te' leng session pailel ah tel ding uh a, MP dia kichiamna leng nei ding uh ahihdan gen hi.

SYO Hall ah Award ngah kipahpihna programme om

Lamka, April-23: Simveng a SYO Hall ah zan sunnung dak 1.00 in Simte Youth Organisation(SYO) Gen HQ leh Khangthah Zuun Pawl(KZP) Gen HQ vaisaina in 21st Mizoram Music Lelte Chibil Award(Simte) sangtu S. Thangsiam@Snoopy Simte s/o S. Ginthang of Zogam road, New Lamka leh Rajasthan a Junior Archery a Gold medal la Th. Lun Simte s/o Th. Haulianmoi Simte of Zion veng, New Lamka kipahpihna programme om hi. Huai ah Upa Khaivom in Snoopy Simte leh Th. Haulianmoi Simte adingin vualzawlna ngetsakna thumna nei hi.

Award ngah mi 2te kipahpihna(felicitation) zatna hun ah Simte tribe sunga makai tuamtuam leh mipi tamkhop tel uh a, KZP leh SYO apan makaite'n thugen in mahni tempaina chiat ah nekzonna ding tanpha tun theihna tana pang dngin mipi paikhawmte leh Award ngahte hasotna thu gen uhi.

Kum 1 sunga 3vei kibawl culvert sia

Lamka, April-23: Tipaimukh Road apan Marian street(Phailian)-Dorcas road kawmtuah Dorcas venga (late) T.Vialkhai street ah kum 2011 tawpkuan in NREGS tungtawna Culvert kibawl chimsia a, huai culvert kum 2011 sungin 3vei mahmah kibawl hi'n kigen hi. Tuni zingsang in bialtu MDC H. Mangchinkhup, EM/ADC in amun ah va enkhia hi. Thu kizadan in Village Authority etkaina nuaiah NREGS(Job card) tungtawn a kibawl hi a, cement leh leingoi tawh suang(chips) kihelzah kituaklou in a kichipna munah chips amal-mal in lengkhe thei a,huai culvert thildang in a suksiat hilou in agikna pawzoulou hi'n leng kigen hi. Tuni a vuah tamtak a zuk hun in culvert kisiatna kianga inn 2 huangsung ah hawktui lutin, akiang naizaw pen varandah tanpha ah tuivung hi. (late) T. Vialkhai street pen lampi poimawhtak hi a, diesel auto service group 2 in a totkhak banah Lamka lut dinga Tipaimuhkh road zui a taisuk ding khenkhat in leng Chimtung veng apan apan a lut tawnkha hi.

Dist. Hospital kong a Pulsar kigu

Lamka, April-23: Dist. Hospital konga gari koihna a Pulsar-150 black colour kikoih tuni zingsang baihtakin gukmang hi a, mit a mukhate' gendanin zingsang dak 4.30 velin hospital kongah T shirt vom silh pasal khat banah jacket tawh jeans khekol a kithuam pasal 1 in huai Pulsar enzui den uh a, amau guk hidin ginthu gen uhi. Pulsar bike neitu Demkhohen(25) s/o Seilet of Changpikot(near Kangvai) in a sanggamnu damlou enkol a omlai a Pulsar gukmang sak a om hi'n kigen hi. Aman kal 2vel paisa in Tamil Nadu apan hong puaktung hi a, a number leng kikhek nailou in No. TN-02/T6039 mah zanglai hi'n kigen hi.

PLS OB kitelna om

Lamka, April-23: Paite Literature Society(PLS) office ah tuni'n kum 2012-2015 sunga PLS Board of Directors dinga telching mi 15 te'n Office Bearer ding tel uhi. Huai ah President in John K.Ngaihte, Vice President in Dr. Tualchin Neihsial , Secretary in Pauzagin Tonsing, Asst.Secy-cum-Finance Secy in Upa S.Vungsing leh Treasurer in Upa T.Hanglamthang tel ching uhi. Huailou in nominated post ah L.Tualkhanhau, President, PTC,Gen HQ; S.Chin Ngaih Pau, President, YPA,Gen HQ; Lianzapau Samte, President, SSPP, Gen HQ; Rev. K.Kamchinkhup, Director(Ministries)EBC; Dimzangai, Editor Ruth Messanger; L.Chinkhanlian, Editor, Manipur Express; Th.Thangzalian, Editor, Lamka post; Vung D.Tombing; John Deng leh Tunglut Thuamkhopau guang uhi.

Manipuri Bible honna om

Lamka, April-23:Nehru Marg a Sun Beam Aboard ah tuni zingsak dak 7.00 velin 'Gideon International CCpur camp' saina in Manipuri a Bible kisun 'New Testament' honna om a, huai ah Pastor Rocky Chothe, EFCI, KhugaTampak in a honna nei in, Elder Cherai Ningthoujam, MEBC, Phailian in Pathian kiang ah a thumna in lan(dedicated) hi.

YPA Unit Awareness Program

Lamka, April-23:YPA Hebron Veng Unit, New Lamka saina in zan sunnung in New Lamka YPA Hall ah, 'the 1st YPA Hebron Veng Unit Awareness Programme' om a, YPA member tamtak paikhawm uhi. Huai ah Rev Khamvum, Dean, Grace Bible College; Rev. Khen P Tombing, Sr.Adviser, YPA, Gen HQ; L Tualpum ex-President, YPA New Lamka Block leh S. Chin Ngaih Pau, President, YPA Gen.HQ ten thupi tuamtuam pansan in sinsak uhi.

Kipuk in a kawngbom tatliam

Lamka, April-23: Mrs Lamlhai(70) m/o Thangmang, MDC of M.Songgel zanhal zingsang in daileng dinga kisalai toilet a kia in a kawngbom lak tatliam a,Dist Hospital ah etkol in om hi.Huailou in Jesse(5) s/o Pauthang of Tuibuong leng Sintawpni(April 20) sunnung in school kaitawp lampi ah Pulsar bike in phukha a,tu'n District Hospital ah om hi.

YPA Kanaan Veng te'n guta mankhia

Lamka, April-23: YPA Kanaan Veng Unit te'n tuni zinglam in innluh sawm guta khat mankhia uh a,amah Pumkhanmang(47) s/o(late) Ngulhau of Kangkap tulel a Saidan khua a Hahat inn pansan a om mankhia uhi. Pumkhanmang in Kanaan veng a Maman leh Hmingte te' inn luhsawm in teklai leh sing zanga kongkhak chabi khetsiat sawmlai mi'n tuakkha in matkhiak a om hi'n kigen hi. Amah kipuandan in kal 1 paisa in Kangkap khua a akipan ART damdoi ne ding in Lamka hongzin a, Hahat of Saidan inn pansan a om ahihdan gen hi. Agen behna ah zi nei in ta 2 nei mahleh kum banfah hiam paisa in azi tawh kikhen uh a, a zi in a tate enkol hi'n leng gen hi. YPA Kanaan Veng Unit te'n thu hilhna a neihzawh un Kanaan Veng ah huchibang a gamtang nawnlou dinga kichiamsak in khahkhia uhi.

SUUNNA

Miss Lianzokim(13) d/o Haukhanlian of Zuihnuam Road, New Lamka zan nitak in Dist Hospital ah TB natna ziakin si a, tuni'n YPA New Lamka hanmual ah kivui hi. Amah tulelin Rayburn H/S ah class VII simlel hi'n kigen hi.

L. Pauzamuan (45) s/o (late) L. Dalthang of New Lane Bungmual tuni zingsang baihtak dak 12:5 in sungna in si a, tuni mah in Bungmual hanmual ah kivui hi.

Baby Hatlemhoih(1 ½ ) d/o Thiana of Mualkot zan nitaklam dak 4:00 velin awmna in si a, tuni'n Mualkot hanmual ah kivui hi.

Khongjom Day tuni'n kizang

Imphal, April-20: Thoubal district sung Khebaching a Khongjom War Memorial ah tuni zinglam dak 9.00 akipan Khongjom Day kizang a, huai ah Governor Gurbachan Jagat khuallian a pang in Functional President in Chief Minister O. Ibobi pang hi. April 23, 1891 in Khongjom mun a kidouna ah British sepaihte'n Paona Brajabashi leh Manipuri sepaih tamtak in a thatte uh zahna in tuni a Kongjom Day zatna ah Paona Brajabashi lim(statue) ah zahna pia uh a, Khongjom lui ah leng martyr-te zahna thilpiak pia uhi.

Manipur Governor in a genna ah khangthu(history) akipan kipumkhat louhna leh pankhawmlouhna ziakin hatlouhna tun a, huai tungtawn in midangte hong kigolh thei uh ahihdan kichian hi'n gen hi. Manipur tulelin dinmun haksatak ah om a, helna(insurgency) ziaka haksatna, kiman a sum a kitatsak,vaulau kawma sum kiphutluih, kithah kimat leh bandh/blockade telin buaina leh haksatna tamtak om a, huaite beitheihna ding leh muanna omna dingin pankhawmna a poimawhpen hi'n kigen hi.Chief Minister in zalenna humbitna dingin kipumkhatna poimawh ahihdan gen a, Khongjom War Memorial mun Tourist Spot hihsak tupna ziakin Rs. 20 crore bei a puah dingin govt in panla chi'n gen hi.

Bus accident ah passenger 2 si

Imphal, April-20: Imphal-Tamenglong lamlian a Dugailong ah tuni zingsang in passnger Bus 1 accident a, huai ah passenger 2 si in midang 6 liam hi. Thusuak kingah dungzui in tuni zingsang dak 6.00 velin Tamenglong district apan km. 4 vela gamla Dugailong mun ah Imphal zuan passenger Bus 1 accident ziakin amun ah passenger 2 si uh a, passenger dang mi 6 liam uhi. Thutut kingahdan in huai Bus accident dan thuchiantak zak hi nailou hi.

RIMS a Block 'A' ah bomb paihkhum

Imphal,April-23: RIMS Director office lutna bul a security guard-te omna kiang Block 'A' ah tuni zinglam dak 9:30 velin meltheihlouh mi 2 in hand-grenade khat valut in kintakin taikhia uh a, hileleng huai bomb pen puaklou hi'n kigen hi. RIMS a security guard te'n kintakin police ah theisak uh a, Police bomb squad te'n valakhia uh chihthu om hi.

27-Assam Rifles te'n panpih uh

Imphal, April-23: Thoubal district sunga Pangal Tabi village ah tuni sun dak 12:45 velin Tata-Magic(No. MN-01w/6685) accident a, mi bangzahhiam liam om a, hileleng agim selua omlou hi'n kigen hi. Huai thu zakphet in 27-Assam Rifles te'n amun delhpah in a liamte panpih uh a, First Aid a piak zawh in Imphal a etkol ding in hong pawtung uh chihthu om hi.

Assam Rifles te'n helte 2 mankhia

Imphal, April-23: PIB(Defence Wing) thusuak in a taklatdan in Red Shilef Divn nuaia om 22-Assam Rifles leh Police kithuah compined team in Jiribam ah UNLF 1 leh HPC(D) cadre 1 mankhia uhi. Combined team in April 21, 2012 in operation a bawlna uah Ningthembam village ah UNLF a self-styled Sgt L. Tomchou Meitei (43) s/o L. Iboton Meitei of Ekou Bazar, PS Lamlai, Imphal (E) mankhia uh a, amah akipan pistol 1 leh magazine 1 banah atang 2 mukhia uh. Huailou in overground hi a kigen Khaidem Madan( 35) s/o K Mahendra Meitei of Khabam Lamkhai, PS Mantripukhri mankhia uh a, Jiribam Police ah pekhia uhi.

Huailouin combined teamte'n April 21, 2012 mahin HPC(D) cadre selfstyled Sgt Lairuchan Hmar (21) s/o (late) Nagaineithou of Leiri village, Dima Hasao, Assam leng mankhia uh hi'n PIB thusuak in gen a, amah akipan single barrel Rifle 1 muhkhiak hi a, Jiribam PS ah pekhia uh chihthu om hi. Zan in UNLF a army No 985, Sgt Maj Angom Athouba @ Premjit @ Raju (30) s/o A Mangi Singh of Yorbung Maning Leikai, Bishnupur leng Jiribam area apan matkhiak hi a, amah akipan 9mm pistol leh magazine banah atang 1 muhkhiak hi a, Jiribam PS ah piakkhiaka om hi'n PIB(Defence Wing) thusuak in taklang hi.

.