Minister thak kipahpihna in mipi kikhopna leh ankuangluina om
Lamka, April-5: Hiangtam Lamka  INC election committee-te’ saina in tuni in Hiangtam Lamka a YPA Gen. HQ Hall ah 58-CCpur A/C a INC candidate Phungzathang Tonsing in MLA telching ahih kia hilou in Cabinet Minister a ngah banah tanvou poimawhtak(Health & FW deptt) a let kipahpihna in mipi kikhopna leh ankuangluina kithuah hunzang uh a, huai hun zatna ah Chief Host in S. Kamsuanlun, EM, ADC/CCpur  pang hi. YPA Hiangtam Lamka Unit te’n Minister kipahpihna in puandum silhsak uh a, ZMA office bearer tengin Minister leh Chief Host thangsuah puan  silhsak in INC Election Committee Chairman in Minister leh Chief Host  saliang petuak hi. Langkhanpau Guite, Chairman,ADC/CCpur; H. Mangchinkhup, EM/ADC; M. Gouzamang Guite, EM/ADC banah  makai hunkhop in uap uh a, khaw tuamtuam apan hausate banah  Lamka leh Imphal apan mipi tamkhop paikhawm uhi.

Chief Host apang S. Kamsuanlun, EM/ADC in a thugenna ah Minister thak Phungzathang Tonsing in Health & Family welfare a tankhak mipi adia hamphatna tungtuan hi’n gen a, abial(A/C) sunga mipi tamtakte’ adin damtheihna leh maban hoihzaw neihtheihna ding a panlatu hiding in lam-et huai  sakthu gen hi. Maban sautak mupha heutu mah telching a a om chiang un gam leh mipi adia vualzawlna thupitak hizel ahihdan leng gen a, mipite’n telching a om palaite’ nasep ding kawkmuh a telching a omte a semsuahtu ahih theihna ding ua panlakkhawm poimawh ahihdan gen hi.

Health & FW Minister  Phungzathang Tonsing tuni a pahtawina leh kipahpihna a ngah  Lamka khawpi sung adia  masa ahihdan gen kawm in mahni hatna a Minister tanvou ngah ding hileh ngahlou ding ahihdan gen in hi. MLA dinga telching mipite’ Minister tanpha tanvou tang thei dinga domsangtu mipite’tung ah kipahthu gen hi. Aman a genzelna ah, election himhim team work ahihdan leng  gen  a, veng tuamtuam a om gamsung puah ut-te’ panlakna gahsuah muhtheih a kilangkhia bel tuni a Minister dinmun tanpha hi’n gen hi. 
   
Maban paizel dingah leng zi suunkhin a langbei himahleh mipite’n amah thuap a lampi dik leh hoih kawkmuh ding in ngen hi. Hun paisa ah azi thugen a zuih chiangin lawhchinna om ahihdan gen a, kivaipuakna lam ah leng tuhun sanga hoihzaw om dinga deih ahihdan gen in, ‘kei non thei hia?’  chite hizawlou in gam bawlna dinga panlatu ka hi chi a kimaituah hunta ahi chi’n gen hi. Assembly election om lai in 58-CCpur A/C sunga polling station 63 omte’ laka Hiangtam Lamka in Congress adinga vote hoihpiak  ahihziakin vengsung ading YPA Hall  tukha beima a bawl kipan dingin chiam hi.

Minister in a genzelna ah District sungah  tuinek kiningching om theihna dinga panlakna paitou zel kalah Lamka khawpi a  tuinek ding taksapna etkai hiding a gen in flagship programme nuai a nasep ding kiguangte  tungtawn in  tuinak omte’ puahphat hiding chi hi.  Khuga Dam apan tui lakna ding in khawpi sung ah tuilawng hoihtak zawl lut hidin gen hi. Tutung a Assembly election ah Congress in lawhchinna nasatak a ngah ziakin phualpi solkar ah leng kum paisate ah Planning Outlay 15% zela pung himahleh tukum in 25% a pungsak dinga ngetna bawl ahihdan gen hi. Khawpi sung lamlian leh kongzing  lampi kawchikte  leng etkaina dinga panlak hiding chikawm in lamlian keklet hunah  lamlian nawka teng innkuan a sukkhak dingte kiangah zangna dopna(compensation) tungtang leng ngaihtuah ahihdan Minister in gen hi. Tuni a kikhopna programme zawh in mipi paikhawmte’n  Minister kipahpihna ankuang umkhawm uhi.

C.Hangshing in ED/DRDA charge la
Lamka, April-5:H.Chinkhokam @ C.Hangshing, Sr MCS in tuni zinglam in DC/CCpur  office campus a DRDA office ah  Executive Director/DRDA len ding in Ms. Mannuamching, MCS apan in charge la hi.  C.Hangshing in charge a lak hun ah DRDA staff hunkhop tel uh a, amah tuni apan  office kai in nasep kipan hi. ED/DRDA thak in  staff-te’ room om teng phasuak in thil paidan tangpi etzui leng pan hi. C.Hangshing in hunsawt paisa in SDC/HQ, SDO/CCpur leh Addl DC/CCpur len ngeita hi.

Activa in lampi a pailai phukha
Lamka, April-5: Zan nitak dak 8.30 velin Rayburn College kiangah Activa(No. MN- 02A/6535) atai Samuel Khaute(40) h/o Thiennngaihching of Ngathal in lampi a pailai B. Pauzagin Ngaihte(50) h/o Nianngaihman of Bethel veng, New Lamka anunglam apan phukha in a nihtuak ua liam in Dist. hospital ah admit in om uhi. Samuel Khaute in B. Pauzagin a phutkhak phet a kipuk in lamlian  ah amai tatkha in liam a, phutkhak a om pen leng a taksa mun bangzah hiam nasa in alu leng liam hi. Huailou in Julekha(2) d/o Md.  Abdul Gafar of Kwakta zan nitaklam  dak 4.15 velin lampi lai ah gari hattak a tai in a phutkhak ziakin a lu liam a, dist. hospital ah etkol om hi.

L.Semol khua ah inn 1 kangtum
Lamka, April-5:Tuibuong Jail sakzek a L.Semol khua ah tuni sun dak 12:30 velin Lhunkhopao Touthang s/o Jangkhojang tenna inn mei in kang a, innsung a van omteng kangtum vek hi'n kigen hi. Lhunkhopau ahihleh 31-Assam Rifles apang tulelin Nagaland a omlel hi a, azi Lamlhing leh atate numei 3 leh pasal 1 inn a omlel uh hi'n kigen hi.
Lamlhing in a gendan in amah tuni sun in potkhia a, naupangte’n inn ah TV a etlai un  anhuan-inn lam apan meikuang mu uh a, huai in  innsungteng pehsawn pah  hi’n gen hi.  TV en a om naupangte bel aliam omlou in taikhe man uh a, hileleng meikuang kipatdan bel thei tuanlou hi’n gen hi. Aman agen dan in sum Rs 8000 val, TV, Fridge, Sofa set, Almirah, swing machine, blanket 5, brief case 4, sik singlem (iron box) 8, gas leh  buhhum bag 20 telin tamtak kangtum a, thil kangtum teng Rs. 10 lakhs value vel hidin gen hi. Fire Brigade leh mipi’n delhhuan in meikuang phelhmit sawm mahle uh  huihnun ziakin phelhmit zoulou uh hi’n kigen hi. Tuni a innkang bel atung langva, atuang singpek leh abang maupek kiphan hi'n kigen hi.

CMO in Doctor-te’ meeting pih
Lamka, April-5: Dr HL Liensang, CMO/CCpur  makaih in tuni zinglam in  a office chamber ah Community Health Centre(CHC) leh Primary Health Centre(PHC) a Medical Officer incharge teng  meeting uh  a, huai ah CHC/PHC a Medical Officer incharge te’n report pia uh a, huaizawh in  JSY tungtang leh  thutuamtuam genkhawm uhi.  

Kangkap ah gam kaang  
Lamka, April-5: Thu  kizadanin, zan April 4, 2012 zinglam dak 10:30 velin gamkang in Kangkap khua a EBC Saptuam school khang  peh a, school building peh thei dinmun a a om ziakin skul naupangte patau in kap zelzul man hial uh a, kintakin a innlam chiat ua paisak in om uh chi uhi. Khawmite loulam a mangtom a akuan gaih laitak uh ahihman in khawsung a om Pastor-pa leh school pute’ makaihin mei phelh uh a, himahleh, mei a hatluat ziakin phelhzawh ding vual hikei mahleh vuah a zuk ziakin huai in meikuang hihlmit  theikhong hi’n kigen hi.

Youth Integration Camp om ding
Lamka, April-5: District Youth Affairs & Sports Officer/CCpur saina in April 11-15, 2012  sung Muolvaiphei Youth Centre ah “Youth Integration Camp” om ding hi. Huai  ah mun tuamtuam apan tuailai 300 vel telding uh a, camp om sung in National Integration, Communal Harmony, anti-drug abuse, HIV/AIDS leh thu tuamtuam  kikumkhawm ding uh a, sinsaktu siam taktakte’n sinsak ding uhi. Huailou in Youth Rally, Social Service ban ah, Games & Sports leng om ding hi. Huai a telding a lunglut Village Youth Centre leh Youth Orgn tuamtuam te’n Kim Shoute, Youth Officer, DYASO  ah thuchian kantheih ding hi.

Lungthul(L) ah inn 10 kisia
Lamka, April-5: Zan sunnung dak 2.30 velin huihpi leh vuahpi kithuah hattak in Singngat Sub-divn sunga om Lungthul(L) khua ah tenna inn 10 mutsia a, Community Hall kibawl lel leng sia hi’n thutut kingah hi. Huailou in Singngat sub-divn sung mah a om Lungchin khua ah leng huih hat in tenna inn 7  mutsia hi’n kigen hi.

A/C 5 ading  nominee guangfel
Lamka, April-5: Assembly election zawh nung tuni tan in PDS tawh kisai in 58-    CCpur chihlouh A/C 5 a MLA te’n amau nominee ding guag uh a, huaite Henglep A/C ah nominee luipa mah Kapboi guan in om a, Singngat A/C ading in Sonmuan, Thanlon A/C ading in Goulal leh Tipaimukh A/C ading in Samson guan in om hi.

Meikang aliam hospital ah admit in om
Lamka, April-5: Kwakta kianga Terakhongsangbi a om Anou(70) w/o Nara Singh tuni zinglam dak 8.00 velin lung-am a puk in meiphu bawhkha a, mei-am kithehzak in a taksa mun bangzah hiam thehkha in aveilam ban leng kangliam a District Hospital ah etkol in omhi.  Silchar khawmi Lanva a hotel bawl a om Biru Dev(54) s/o Suresh in  zan nitak dak 7.45 velin belsung a tuisou a dop khiakna lam ah bawsak kha in a taklam khe liam a, amah leng district hospital ah  om uhi.

Thanlon MLA in panpihna thon
Lamka, April-5: Vungzagin Valte, MLA(56-Thanlon AC)  in zan a huihpi in a mutsiat Songtal a inn 7 leh Thuangtam a inn 3 te kithuahpihna dingin tuni  zingkal in antang bag 10, chini bag 1 leh bawngnoi hunkhop khaktou chihthu kiza hi. Tuni in Songtal ZYA makaihin mipi’n social work nei in inn kisiate tungding nawn uh hi’n kigen hi. MLA-pu in SDO/Thanlon  kiangah huihpi-vuahpi ziakin  Thanlon bial ah inn-le-lou kisia bangzah om hiam chih amun mahmah a enkhe dingin theisak a, SDO in leng a staff-te spot enquiry bawl dingin sawl hi’n kigen hi.

SUUNNA:
Khamthianlun @ G Lunte (31) s/o (late) Zadeng of Tedim Road(near SBI/CCpur) tuni nitak dak 7.30 velin overdose in si a, April 6, 2012 in Lamka hanmual ah kivui ding hi.

Governor leh CM akipan message
Imphal, April-5: Manipur Governor Gurbachan Jagat leh Chief Minister O. Ibobi in Good Friday ziakin Manipur mipite lakah adiakin Christian-te deihsakna thuchah(message) puang uhi. Governor in mihing itna ziaka khelhna apan tankhe ding in Toupa Jesu leitung a hongpai a hinna pia ahihdan puang hi. Aman mihingte kala ki-it tuahna ding sinsak a, sihna apan a thawhnawnna in gitlouhna leh sualna tunga vualzawhna langsak hi’n leng Governor in puang hi.Chief Minister in a message ah mihingte adia Toupa Jesu’ kipumpiakna taklang a, Good Friday in mihingte hotdamna dia Toupa Jesu sihna taklang a, a thawhnawnni Easter Sunday in gitlouhna tunga  hoihna vualzou ahihdan langsak shi’n puang hi.Good Friday tungtawn in Manipur mipite lakah ki-itna, lemna leh kituahna a om deihthu Chief Minister in puang hi.

April 7 in High Court ah nasep pan ding
Imphal, April-5: Capitol project(Chingmeirong)  a Gauhati High Court,Imphal Bench building kibawl ah April 7,2012 in Court nasepna kipan ding a, huai ding in April 7, 2012 sun dak 12.00 in Supreme Court of India a Judge apang Justice  Altamas Kabir in honna nei ding hi. Huai ah Supreme Court of India a Judge ngen Justice AK Patnaik, Justice Gyan Sudha Misra, Justice Jasti Chelemaswar banah Justice Madan B. Lokur, Chief Justice of Andhra Pradesh High Court, Justice AK Goel,   Chief Justice of Gauhati High Court, Chief Minister O. Ibobi Singh leh mi poimawh tamtak in uap ding uhi.

Inter-village Cultural programme
Imphal, April-5:PIB(Defence Wing) thusuak kingah dungzui in  IG/AR (South) nuai a om 26-Sector Assam Rifles-te saina nuai ah zanhal in Joupi khua ah Inter-village Cultural competition om a, huai ah Joupi leh akim a khaw tuamtuam 7 akipan tuailai 150 vel Inter-village Cultural programme ah tel uhi. Kidemna tuamtuam om zawh in 37-Assam Rifles a   Offg Comdt in kipahman tuamtuam hawmkhia hi.  

Myanmar election a Observer hongtung  
Imphal, April-5: Myanmar a Parliamentary seat 45 ah April 1,2012 a  by-election om ah International Observer khat apang PC Lawmkunga,IAS, CEO Manipur hongtungkik nawnta a,aman a gendan in Myanman a election ah candidate-te’n vote muhna ding in  sum leh van hawmkhia muh hilou a, election ni in leng Polling area leh thautawi police leh army muhphak ding omlou hi’n gen hi.
Election a telching a om NLD makai Ms Aung San Suu Kyi in election observer-te leh media-te a kimuhpihna ah election tawh kisai in govt tunga lungkimlouh thu bangmah gen neilou a, complaint leng bangmah muh omlou hi’n Lawmkunga in gen hi.  Ms Suu Kyi in akinthei lam in India hong phak a lunglut thu leng gen chi’n PC Lawmkunga in gen hi.

Good Friday ziakin office suti ding
Imphal, April-5: Manipur govt nuai a office leh educational institution teng April 6, 2012 in Good Friday ziakin General Holiday(suti) hi a, CCpur district leh Manipur singtanggam district teng ah leng suti hiding hi. Huailou in Negotiable Instrument Act, 1881 dungzui in  Manipur state sunga om Bank leh financial institution tuamtuamte leng April 6,2012 in Good Friday ziakin suti ding uhi.

IG/AR(South) in Saijik Tampak pha
Imphal, April-5:Maj Gen UK Gurung, YSM, IG/AR(South)  in zan in Brig Upendra Dwivedi, Commander HQ 26- Sector Assam Rifles tawh kithuah in Chandel district a   Sajik Tampak vapha a, huai ah khawsung mipi in amah vaidawnna in  cultural programme bawl u a, school naupang te’n a group in lasa uh a, Youth Club te’n traditional dance lahna nei uhi. IG/AR (South) in Sajik Tampak leh huai kima khaw tuamtuam apan hausate tawh a houlimna uah 35-Assam Rifles te’n huai bial mipite huhna nasep dia a nasep tuamtuamte uh ziakin kipahthu gen uhi. IG/AR South in a genna ah  Assam Rifkes-te leh mipite pankhawmna ziakin huai area ah muanna leh bitna dinmun hoihsem piangthei ding ahihdan gen chi’n PIB(Defence Wing) thusuak in taklang hi.

Electric khuam apan kia damzoulou
Imphal, April-5: T. Birendrajit(32) s/o (late) Pritichand of Maharabi Mamang Leikai(Sekmai PS) tulela Sekmai Electricity office a lineman sem in tuni zinglam dak 9.00 velin Maharabi Football Ground kianga electric post(khuam) muntuam a suankhiak ding chih ziakin electric gui lakhia a nasemlai a khuam(electric post) tung apan kia a, Chingmeirong a CMC hospital ah etkol himahleh damzoulou in si hi. Siluang tuni mah in RIMS ah post mortem kibawl a, huaizawh in a innluante khut ah piakkhiak a om hi’n kigen hi.

Union Home Minister P Chidambaram in Mizoram pha
Aizawl, April-5: Union Home Minister P.Chidambaram in Helicopter zangin zan nitaklam in Silchar apan Aizawl tung a, tuni’n Mamit district a Bru mite omna Suarhliap,  Damdiai leh Tuipuibari  pha in Bru makaite atuam in houlimpih hi. Home Minister’  tuanna lenna  in Lengpui airport bawhsawm mahleh khua(weather) hoihlouh ziakin bawh theilou a, Silchar ah lehkik in huai apan helicopter zangin Aizawl tung hidanin thusuak kingah hi. Union Home Minister in zan nitaklam a Aizawl helipad a bawh in state home Minister Lalzirliana banah home department official-te  leh security force top official tamtakin na vaidawn uhi. Huai apanin Raj Bhawan zuan a,  Durbar Hall ah Mizoram Chief Minister Lal Thanhawla leh official poimawhte tawh meeting nei uhi. Home minister in tutung a Mizoram a phakna tawh kisai  agenda poimawhte gen masa a, huaizawh in Bru galtaite’ dinmun genkhawmna ah, Mizoram govt in Tripura mallam a khawsa Bru galtaite Mizoram a pilutna ding in state govt in naktak in panla a,  kong zapi hong gige ahihthu gen uhi.

Chief Minister Lal Thanhawla in agenna ah Bru-te Mizoram mi diktak hi uh a, a home state uh Mizoram zuankik ut peuhmah ngaina uh ahihdan Union Home minister kiang ah gen a, state govt in leng hun sawtpi paisa apan pan naktakin latou den chi hi. Chief Minister thugen in Union Home Minister lungtang azawh leh zawhlouh genlouin Home Minister in Chief Minister kiang ah Tripura camp a om Bru galtaite April 26, 2012 leh  May 15, 2012 kikal ngei in  Mizoram a a omna ding mun uh tunchiat dingin theisak thouthou hi’n gen chihthu kiza hi.

Union Home Minister Mizoram govt kiang a theihsakna a piakdanin Bru galtaite pikikna ding tawh kisai a sum, antang leh transport thil a seen-le-paan omteng  Centre govt in tumvek ding hi’n gen  a, tualou in Tripura apan Mizoram a galtai Mizo innkuante leng Centre govt in a poimawh zahzah compensation peding hi’n gen hi. Huai hun meeting ah Mizoram police puahphatna ding tawh kisai, IR Battalion, Home Guard ban ah border fencing tungtang leng genkhawm uhi.

Chidambaram in  Civil Society Organisation leh NGO khenkhat a makaite tawh atuam in houlimna neihpih a, tua zawhin News-te kimuhpih hi. Tuni (April 5) zinglam  dak 8:50  in Home Minister in BSF helicopter zangin Suarhliap pha a, zing dak 9:10 in Damdiai ah Bru heutute tawh meeting nei  uh a,huai zawh zinglam dak 10:20 Tuipuibari ah Bru makai khenkhat tawh galtaite’ dinmun genkhawm uhi. Home Minister leh BSF official te’n zinglam dak 11:00 in meeting nei uh a, tuni sunnung dak 2.15 velin Lengpui airport apan Delhi zuanin lengkhe nawn hi.

Home Minister P.Chidambaram in Mizoram a phakna Dharmendra Sharma, Jt Secretary(Internal Security), Ministry of Home Affairs;  Arvind Ranjan, Special Director General BSF;  A.K.Mishra, Director IB leh top official hunkhop in Centre apan  zui uhi.

Chief Minister Lal Thanhawla in Home Minister leh a teamte  atenna a banquet Hall ah zan giaksak hi’n thusuakin gen hi. Home Minister in tuni’n  Bru heutute telin state official tuamtuamte a kimuhpih khitin  Delhi zuana kiknawn hi’n kigen hi.

MLA telching thak teng kipahpihna programme zatpih

Lamka, April-4:Tuni sunng dak 2.30 in Tuibuong a District Council Hall ah Langkhanpau Guite, Chairman, ADC/CCpur makaih in CCpur district sunga apan MLA telching thak 6te vaidawnna leh kipahpihna(felicitation) programme zatna leh amau adia thumsakna om hi.

Huai ah Health & FW Minister Phungzathang Tonsing(58-CCpur A/C), TN Haokip(59-Saikot A/C), Dr Chaltonlien Amo(55-Tipaimukh A/C), Vungzagin Valte(56-Thanlon A/C) leh Ginsuanhau(60-Singngat A/C) tel uh a, T. Manga Vaiphei(57-Henglep A/C) tulelin Delhi ah a zinkhiak ziakin amah sik-le-tang in Kamkholal Vaiphei tel hi. District Council member te’n MLA 6te Holy Bible khat chiat, pak leh Nampuan 1 chiat pia uh a, ADC Chairman Elder Langkhanpau in MLA 6te thumsakna hun zang hi.

Chairman ADC/CCpur in agenna ah Manipur govt in Dist Council khut ah deptt 26 piakkhiak ding in thupukna bawl a, power piakna ding tawh kisai in MLA-te’ tawh pankhawm ngai ahihdan gen a, Forest deptt leng ADC nuai ah a om theihna dingin pankhawm poimawh ahihdan gen kawm in gam-leh- leitang humbitna ding in MLA te tawh pangkhawm dingin MDC-te mansa hi’n gen hi.  

Health & FW Minister Phungzathang Tonsing in a genna ah MDC-te’n hibang a MLA-te kipahpihna programme a bawl uh CCpur dist adin a masapen hi’n gen a, MDC te’n Holy Bible a piak uh khalam leh salam a pitu ahihziakin kipahthu gen hi. District khenkhat ah MLA te leh MDC te pangkhawm a nasemlou uh ahihdan gen a, CCpur district ah bel huchihilou in MDC te leh MLAte pangkhawm thei ahihdan gen a, policy hoihtak a a paitheih na dingin “give & take policy” neih ding mah hi’n gen hi. Aman agenbehna maban ah ga, leh mipi adia nasepna ah pankhawm touhzel poimawh ahihdan gen a, akul leh poimawh banga kimukhawm a houlimkhawm zel deihthu gen hi.

TN Haokip in agenna ah hun paisa ah PHED pua a, tutung in bang mawhpuakna len ding hiam chih theikei mahleh tui(water) tawh kisai nasataka etkai poimawh hi’n gen a, mipi leh MLA telching a omte pankhawm poimawh hi’n gen hi. CCpur dist ah MLA 6 om a, amau teng INC apan ahihziak un Election Commission of India leh AICC High Command in leng record hial hi’n gen hi.

 Dr. Chaltonlien Amo in programme saitute tung ah kipahthu gen a, tulai Gun culture hita mahleh hunpaisate sanga muanna leh bitna omzaw ahihman in maban ah leng muanna bitna omtouh zelna dingin kuapeuh pankhawm ngai hi’n gen a, MLA te leh MDC te’ a pankhawm keileh development nasepna nawngkai ding hi gen in pangkhawm touzel ding in ngen hi.

Ginsuanhau in a genna ah CCpur district a constituency 6 ah Congress candidate- te telching vek ahih theihna ziak Congress MDC te panlak ziak hizaw in gen a, fund hongpaite, MLA quota leh quota dangdangte, ahi ding banga zat deihthu gen in, gam khantouhna ding in diktatna poimawhpen hi’n gen a, kuapeuh in pankhawm hatna ahi chih mangngilhlouh a deihthu gen hi.

Vungzagin Valte in a genna ah hibang a District Council lam in programme a zatpih uh kipahthu gen a, programme pen District Council-te sangin telchingthak a om MLA-te sai dia kilawmzaw ahihdan gen hi. Maban ah mipi nasem dinga telching ahih uh dungzui in ki tuak taka nasep poimawh thu gen a, MDC leh mipite tawh pankhawm ziakin CCpur dist ah INC te’ ngen MLA a ching hi’n gen hi.  

Tuni a programme zatna hun ah MDC teng ban ah DC/CCpur; CEO,ADC/CCpur; ED/DRDA thak ding, SDO-te leh Dist Council staff hunkhop tel uhi.

BSF a 196-batch a training zouthakte Passing Out Parade pai

Lamka, April-4: North-east bial a Border Security Force(BSF) te adia Subsidiary Training Centre(STC) om sun Gangpimual a STC/BSF ah tuni zinglam in 196 batch a training zouthak jawan 163 te passing-out parade pai uh a, Sudesh Kumar, IPS, Inspector General, BSF Meghalaya Frontier khuallian in pang a, passing-out parade paite’ apan salute la hi. Tuni a passing-out parade atel jawan-te batch 196 ‘D’ Coy a Deputy Commander SH MP Singh in arms, drill, border security & surveillance, tactics, field craft, map reading, border management, field engineering, counter insurgency operations, human rights, battle craft leh disaster management ah sinsakna hoihtak pia hi.

     Training zouthak mi 163te kum 18-27 kikal mi ngen hi uh a, laisiamna lam ah Cl-X zou mi 64, Cl-XII zou mi 95 leh graduate 4 tel uhi. Training-te’ lakah zi nei nailou 157 leh a neisa 6 te’ lakah siamna tungtuan nei hi a telkhiak mi 5 in khuallian akipan in pahtawina medal ngah uh a, amaute’ lak ah Haryana apan Somveer in overall ah 1^st hihna la in Gold medal sang a, Sunil Kumar in overall 2^nd hihna la in silver medal, Sunil Kumar in thaukap siampen hihna tang in silver medal, Parade commander Arunjit PK in ‘best in drill’ hihna tang in silver medal, Sajid VM in ‘best in endurance’ hihna tang in silver medal sang hi.

BSF te’n Northeast India ah Shillong munpi a nei in March 15, 1968 a dinkhiak ahihnung huai mun mah ah hun sawttak Subsidiary Training Centre(STC) koih hi a, February 16, 1990 in Manipur simlam a om dinga suan ahih dungzui in Gangpimual ah training centre koih hi a, huai ah tuni tanin State Police force leh Paramilitary force dang tamtak leng training piak hi uh a, tutan in batch 196na tan in training zoukhia uhi.

BRGF fund tawh kisai meeting om

Lamka, April-4: Chairman ADC/CCpur makaihna in a office chamber ah tuni sunnung in BRGF tawh kisai in ‘Planning & Implementation Committee’ meeting nei uhi. Huai ah   MP(Outer Manipur) representative leh T.Manga Vaiphei, MLA sikle tang in midang tel a, MLA dangte kimvek in DC/CCpur, ED/DRDA ban ah dist level officer khenkhat tel uhi. Thu kizadan in BRGF 2012-2013 tawh kisai fund hongpai hun ah nasepna dingin MDC te’n 50% ngah ding uh a, MLA te’n 30% leh line department te’n 20% ngah ding in thupuk uh hi’n kigen hi.

BSNL Tower puk: inn tamtak mutsia

Lamka, April-4: Tuni in sunnung dak 2.30 velin huihpi leh vuahpi kithuah hattak in Singngat Sub-divn sunga om Suangdoh khua BSNL Tower mutpuk a,huai tower sangtak kibulkalh in Suangdoh khua apan Lungchin zotna lampi lai ah kikhung in lampi dalkha hi’n kigen hi. Huai BSNL tower pen Rs. 60 lakhs bei in kum 2008 a kibawl hi’n kigen hi.

Huihpi leh vuahpi kithuah nung in Singngat Sub-division a Tuima khua a EBC School building mutpuk a, Thanlon Sub-division a Songtal khua ah inn 9 a mutsiat banah High School building verandah leh khuamte leng mutsia hi. S. Munhoih khua ah inn 2 telin a biakinn uh mutsia hi.

Director, Treasuries in Lamka pha

Lamka, April 4: Th. Kiran Kumar, Director(Treasuries & Account) Manipur in tuni sun dak 12:00 in official hunkhop tawh hong kizui in Lamka hong pha a, SP/CCpur office kiang a Treasury office ah staff-te’ nasepdan tangpi enkhia in houlim pih a, sunnung in Imphal ah kiknawn hi.

Mi 1 Jail ah: mi 3 case dang ah awklai

Lamka, April 4: Kh.Ibungo Singh (40) of Khumujamba Meitei Leikai tulelin New Bazar a ak zuakna ah salesman apang March 24, 2012 nitak dak 7.30 in innlam zuana Activa gari a tailai khawlsak a pimang(kidnap)te laka tel Marimsanglen Chothe (26) of New Wangma Village,Chandel Dist leh Satkithang Kipgen (23) of Saikul Village,Senapati Dist azing March 25, 2012 nitaklam in Police te’n G. Khonom ah mankhia in Kh. Ibungo leng hunkhua uhi. Khuga Dam area a om 1/11 Gorkha Rifles te’n mi kidnap pawla tel hidia gintak midang 3-Letkhotinthang(27) of T.Champhai leh Jousuanlal (24) of Belpuan village mankhia uhi. Huai mi 4te Police custody ah ni 10 a om nungun tuni’n Police te’n CJM court ah dingsak uh a, CJM in Marimsanglen Chothe pen Judicial custody(jail) a omding in thutan khum a, midang 3te case dang ah matbeh in om uh a, JCM in April 8, 2012 tan Police custody a omding in phalsak hi.

RSBY tawh kisai Workshop

Lamka, April 4: DC office a Conference Hall ah tuni in Labour deptt. nuaia Manipur State Rashtriya Swasthya Bima Yojana Society saina in‘District Level Workshop on Rashtriya Swasthya Bima Yojana(National Health Insurance Scheme)’om hi. Huai ah DC/CCpur khuallian in pang a, Guest of Honour in Executive Director,Manipur State RSBY Society leh Functional President in Dy Labour Commissioner,Manipur pang hi.Huai workshop ah khaw tuamtuam apan Village Authority member 15 vel tel uh a, slide tungtawn in National Health Insurance Scheme sinsak uhi.

Activa a mi 2 kipua tuahsia

Lamka, April-4: Zan nitaklam dak 6.20 velin Molnom khua ah Activa a pasal 2 kipawl kawma taite’n Maruty Van a pelh sawmna lam un phukha in lampi ah kipuk uh a, huai ah activa hektu Henminthang(22) s/o Seithang of Saikot liam in a khabe leh alu nasa a, dist. hospital ah etkol in om hi.

Police te’n Jail ah koih uh

Lamka, April-4:0-Assam Rifles leh 46-Assam Rifles kigawmte’n March 29,2012 nitak dak 9:45 velin Lunjang Guite(45) s/o (late)Seilen Guite of Belam Veng,HQ Veng,Lamka West a tenna inn apan mankhia in amah akipan .32 calibre pistol 1,magazine 3, 9mm colt automatic pistol 1 leh atang 4 mukhia uh a, ni bangzah hiam sung Police custody ah a om nungin Police te’n tuni’n CJM court ah dingsak uh a, CJM in Imphal a Judicial custody a om ding in thutan khum a, Police te’n Judicial custody(jail) ah koih uh chi’n Police thusuak kingah hi.

Course tuamtuam adin interview kipan

Lamka, April 4: Manipur Skill Development Society nuai a course tuamtuam a training ding lakna dingin tuni akipan DC office khang a Dist Training Centre ah interview om hi. Tuni’n Ananda Spa Institute, Hyderabad; Orion Edutech Ltd.,Guwahat leh JCRE Guwahati in fashion lam tawh kisai leh BPO lam a lunglutna neite ading in interview om a, tuni’n interview ah mi 5 tel in April 5, 2012 in sunzom ding uhi. April 7 & 9,2012 in Indian Skills leh Surya Vinayak Wellness Ltd.,Noida a sinding lakna din interview om ding hi.Interview a lawhching siamna tungtuan neite’n MSDS apan scholarship leng ngah ding uh hi’n kigen hi.

Governor leh CM akipan message

Imphal, April-4: Manipur Governor Gurbachan Jagat leh Chief Minister O. Ibobi in April 5, 2012 a kizang ding “Mahavir Jayanti” kichi Lord Mahavir pianni champha tawh kisai in adiakin Jain community-te deihsakna thuchah(message) puang uhi. Governor in lemna leh hiamgamna tellou lampi sinsaktu Lord Mahavir in itna, lainatna, hahpihna leh ngaihdamna lampi kuapeuh sinsak hi’n puang a, hiai Festival hun ah Manipur mipite’n leng huai lampi zuih a deihthu taklang hi.

Chief Minister O. Ibobi in leng Lord Mahavir kichi thudik leh diktatna sinsaktu zawlnei hi’n gen a, a hinkhia leh a sinsakna in mihingte lampi dik leh hiamgamna tellou hinkhua banah lemna leh ki-ut tuahna apan pial khelou dingin hong kawm muh ahihdan taklang hi. Hiai festival hun ah Manipur mipite kipak leh kituak taka zangkhawm dingin CM in deihsakthu puang hi.

Finance deptt in ‘ban’ puang

Imphal, April-4: Manipur govt nuai a Finance department(Finance Commission Cell) in Manipur a sum dinmun(ways & means position) siatluat ziakin Plan, Non-Plan, CSS/CPS nuai ah lawh(salary) chihlouh sum senna(expenditures) dang himhim hitheilou ding chi’n zatna ding teng ‘ban’ puang hi. Additional Secretary(Finance) H. Gyan Prakash in Order a suah dungzui in lawh(wages), pension, loan ditna, leh electric fee a piak ding tawh kisai hilou senna dang adingin sum lak(drawal) hitheilou ding chi’n taklang hi.

April 10 tan in leng Manipur ministry keklet ahih gintak huai nai tuanlou

Imphal, April-4: Manipur mipite’n Chief Minister O. Ibobi makaihna Manipur ministry bangchik chianga keklet(expand) hiding hiam chih theinuam chiat mahleh tu dinmun tana kilat dan in April 10, 2012 tan in leng ministry keklet ahih gintak huailou hi’n kigen hi.Thu kizadan in Manipur Governor tulela suti la a zinkhia leng April 7,2012 velin Imphal hongtungkik pan ding hi’n kigen a,huaizawh in Chief Minister O. Ibobi in Ministry kekletna ding tawh kisai in Congress High Command apan phalna la ding leh Minister thak dingte list hihfel dingin Delhi zin lai ding hi’n kigen hi. Chief Minister in ministry keklet ding tungtang ah AICC General Secretary(North-east incharge) Luizinho Faleirio leng a muh ngai ding a, hileleng amah tulai in Delhi ah omlou a, April 9, 2012 tan in leng Delhi a tunkik gintak huailou chihthu om hi.

Kidoupi 2na hunlai a bomb mukhia

Imphal, April-4: Imphal West district sung Semjam Chirang Kumu tang(hill range) a pathian biakna mun(temple) kiang ah tuni’n pawlkhat in lei a tawhna lak ua leisai kawm ah a hawm(hole) om dan a thei in pilvangtak a tawh ua leh Kidouna 2na(2^nd World War) hun lai a bomb 39 mukhia uh hi’n kigen hi. Huasi bomb kimukhiate ah “Buster M-20 AIROP 1942   Lot 3   6965229” chih khong kigelh a, bomb khenkhat ah “Lot 22” kigelh pawl leng om hi’n gen uhi. Bomb toukhia pawlin Manipur Archives leh Police ah report pia uh a, Police te’n huai bomb-te lakhia uh hi’n kigen hi.

Imphal khawpi ah tuinek ding tasam

Imphal, April-4: Manipur phaijang bial adiakin Imphal khawpi sung ah ni tamtak paisa apan vuah a zuklouh banah lui(river) a tui nasatak in kiam a, tuisiang dawn ding taksapna liantak tuak uh hi’n kigen hi.Imphal khawpi adia tuinek kingakna bulpi Pormpat Water Supply Scheme ah tui nasataka a kiam ziakin March 31, 2012 akipan in Water Tanker-te’n tui pawkhe nawnlou uh chihthu om hi. PHED Maintenance Divn –II a Executive Engineer N. Nirmal Kumar Singh in a gendan in Iril lui atui a kiamluat ziakin Water Treatment Plant ah tui kaikhe zoulou hi’n gen hi.Huailou in Singda Water Supply Scheme ah leng tulai in tui nasatak a a kiam ziakin tui nek ding leh dawn ding bangzah mah pekhe zoulou hi’n kigen hi.

NE bial ah ‘Red alert’ puang

New Delhi, April-4: ULFA te’n April 7,2012 in pawlpi a kiphuhkhiak ni uh (raising day) a zat dek utawh kitonin Union Home Ministry in tuni in Assam telin India malsuahbial(North-east bial) pumpi ah security hihkhauh hiding leh kuapeuh pilvangding in theihsakna bawl hi. Home Ministry in Assam govt banah akim leh kianga state omte’ kiangah theihsakna pia in, april 7 a ULFA raising day ziakin security lam naktaka hihkhauh chiat dingin theisak uhi.

       Unon Home Ministry thupuangtu in a gendanin thuguk tuamtuam zak ahihnung in banghiam thiltung om thei gige chih ziakin North east region a state- te’ pilvang chiat ding a zaksak hita uh a, Paresh Baruah makaihna ULFA anti talks faction te’n banghiam thiltung huaisetak hihsawm uh chi uhi. Home Ministry in mun poimawhna deuhdeuh (sensitive locations), oil installations, railway tracks & stations, bus terminus, markets leh sahkhua tawh kisai mun(religious place) te ah security kiningching koih dingin state govt tuamtuam theisak uhi.

NSCN(IM) Chief Swu leh Muivah in Delhi zuan

Dimapur, April-4: NSCN (I-M) Chief(Yaruiwo) Isak Chishi Swu leh General Secretary/Prime Minister (Ato Kilonser) Th. Muivah in zan in Dimapur nusia in New Delhi tung uh a, Govt of India tawh tu April, 2012 khasung in Indo-Naga peace talks sunzom ding uh chihthu hi’n kigen hi. New Delhi a zotma ua Dimapur airport ah media-te’ kiang ah NSCN leader 2 ten a gendan un, tutung in lametna liantak tawh Delhi zuan uh ahihdan gen uh a, Govt of India in leng hun paisa en vengveng kawma dawnna kipahhuaitak a piak kinepthu gen uhi. Isak in a genna ah, centre leader te’n leng tutung in banghiam thil a puaksuah uh gintakna lianpi nei hi’n gen a, kihouna tungtawn in buaina vensak hiding chi’n India govt in a gen ziakin lametna om hi’n gen a, tuma lam in Prime Minister Dr Manmohan Singh leh Union Home Minister P Chidambaram tawh atuam a kihouna leng lawhching mahmah chi’n gen hi.

Chief negotiator banah NSCN (I-M) “Ato Kilonser” Th. Muivah in a genna ah India govt apan dawnna nanung (final response) ngak hita a, Nagate’ khangthu in chituamna (uniqueness) nei ahihlam govt in leng a theihpih dungzui un kilemna piching leng Nagate’ khangthu chituamna tawh kizawitawn mah a om dingin kinep thu gen hi. Indo-Naga peace talks neih nawn ni ding ahihleh official takin puakkhiak hi nailou hi. NSCN(IM) leader 2 te’n Union Home Minister leh Government palai(interlocutor) R.S. Pandey te’ tungtawn in India govt leh NSCN(IM) makaite’n kilemna thukhun zahhuai khop a thupi a neih uh kinepthu gen uhi.