Aknou khat in khe 4 nei
Lamka, April-9: Tuibuong Jail sakzek L.Semol khua a om Thiengin @ Thiena leh a innkuante’ akpi 1 in nou 10 val nei a, huaite lak a khat 1 in khe (leg) 4 nei hi.Huai aknou in kha 4 a neihte laka 2te bel a ngeina bang in om a, himahleh adang 2te ahihleh a tawlam meibul lak ah om a, huaite’n leilak sikkha theilou hi. Aknou khe 4 nei om mukha tengin lamdangsa uhi. Aknou khe 4 neipen in leng aknou dangte tawh an zongkhawm uh a, hileleng aknou dangte bel pha zoulou deuh hi’n kigen hi.
Vision 2020 team in Singngat phading
Lamka, April- 9: Singngat V2020 implementing team member te’n April 10,2012 in Singngat phading uh a, huai ah Singngat sub-divisional headquaters puahphat dingdan, tuinek dinmun, power supply tawh kisai, kikawmtuahna lampi leh civil administration dinmun banah khantouhna bangbang om theiding hiam chih a mun ah etkhiakna nei ding uh a, a (findings) te uh district administration telin official tuamtuamte’ kiangah pelut ding uh chih thu kiza hi.
DC makaih in Calamity Relief meeting
Lamka, April-9: DC/CCpur makaihna in BRGF Resource Centre ah April 11,2012 nitaklam dak 3:00 in Calamity Relief tawh kisai ‘District Level Sub-Committee on Relief Assistance under Calamity Relief’ meeting om ding hi. Huai ah SDO teng, DAO(Agri), DO(Hort& SC), DFO(fishery), EE/ PWD, EE/IFCD, EE/Electricity leh OC(Fire Brigadge) tel ding uh a, Calamity Relief tawh kisai case luite leh case thakte genkhawm ding uh hi’n kigen hi.
Director leh Jt Director in hongzin
Lamka, April-9: W.Rajen, Director of Education(S) leh Iboyaima, Joint Director in tuni in Lamka hongpha uh a, Molnom khua a Gandhi Memorial H/S leh Mata aVungzagenHigh School enkhia uhi. Official 2 in mun tuamtuam a school 2te a phakzawh un DC/CCpur leng kimuhpih uh a, nitaklam in Imphal ah kiknawn uhi.
Free text book hawmkhiat kipan
Lamka, April-9: CCpur dist sunga govt school leh Govt Aided school tamtak ah free text book hawmkhiak hi a, tuni’n CCpur govt H/S ah Tipaimukh block te ading hawmkhia uhi. April 10 in Thanlon block ading hawmkhiat hiding a, April 11, 2012 in Singngat block ading hawmkhiak hiding hi’n gen uhi.
Innkang panpihna pia
Lamka, April-9: Dr F.Thienkhogin, Dist Malaria Officer(DMO)/CCpur makaihna in Malaria staff te’n April 5, 2012 sunlai a Tuibuong Jail sak L.Semol khua a Lhunkhopao Touthang s/o Jangkhojang tenna inn kangtum panpihna in thousilen(mosquito net) 5 pia uh hi’n kigen hi.
ZYA Executive Meeting om ding
Lamka, April-9: Hiangtam Lamka a ZYA office ah April 14, 2012 zingsang dak 7:00 in ZYA Gen HQ executive member te’n emergency meeting neiding uhi. Huai ah ZYA General Assembly-cum- Election, ZYA constitution amendment tungtang, YVA apan ZYA representative ding laklut ding thu banah Unit thak leh Region honna tawh kisai report leh Annual Audit report telin thu tuamtuam genkhawm ding uhi. Huai ah akisaipihte telkim chiat ding in Thangzamang, Gen /ZYA Gen HQ in theisak hi.
Ibungo kidnap thu ah mi 4 jail ah
Lamka, April-9: Kh.Ibungo Singh (40) of Khumujamba Meitei Leikai tulelin New Bazar a ak zuakna ah salesman apang March 24, 2012 nitak a pimang(kidnap)te laka tel Marimsanglen Chothe (26) of New Wangma Village,Chandel Dist leh Satkithang Kipgen (23) of Saikul Village,Senapati Dist azing March 25, 2012 nitaklam in Police te’n G. Khonom ah mankhia in Kh. Ibungo leng hunkhua uhi.1/11-Gorkha Rifles te’n mi kidnap pawla tel hidia gintak midang 2-Letkhotinthang(27)of T.Champhai leh Jousuanlal (24)of Belpuan village mankhia uhi.Huai mi 4te Police custody ah ni 10 a om nungun CJM in Judicial custody (jail)a omding in thutan khum a, tuni’n Imphal jail a koih hi uh chi’n Police thusuak kingah hi.
SBI ading Currency Chest hongtung
Lamka, April-9: Reserve Bank of India(RBI) in SBI/CCpur Branch leng Currency Chest Branch kichi RBI sik-le-tanga sum kemthei dinga a seh dungzui in hun bangtanhiam paisa akipan SBI/CCpur branch ah Currency Chest koihna ding a bawl uh zawhsiang hi a, tuni in Truck khat in Currency Chest hong pawtung a, huai pen April 10, 2012 in a koihna mun dinga tut hiding hi’n kigen hi.
BSI/CCpur Branch meeting
Lamka, April-9: Bible Society of India(BSI)/CCpur Branch vaisai pawlin April 11, 2012 sunnung dak 1.00 akipan in Presbyterian Conference Hall ah meeting nei ding uhi. Huai ah Annual Confertence,2012 tungtang, Collectors Meet,2012 leh thu poimawh tuamtuam genkhawm ding uh chih thusuak om hi.
Manipur in Overdraft Rs. 500/600 cr neithei dinga patauh huai hi’n kigen
Imphal, April-9: Manipur a deptt tuamtuam in kum 2011-2012 a financial year beini March 31, 2012 in lawh leh senna tuamtuam adia a lakkhiak uh kigawm Rs. 700 crore a phak ziakin Manipur govt in a sum neih sanga tamzaw lakhia in RBI ah sumbat(overdraft) Rs. 400 crores bel nei a, bank tuamtuamtuam in a sum piakkhiazah diktak uh RBI ah a submit ma un Manipur govt in March 2012 kha lawh piakkhiak man teitei sawm in panla hi’n kigen hi. March kha lawh hawmkhiak ahih hunhun in overdraft Rs. 500 crores akipan Rs. 600 crores vel pha ding hi’n kigen a, huchi ahih aleh RBI in April 19, 2012 vel akipan in Manipur govt in payment bawl theilou dia gak in ‘ban’ puankhum thei dia patauh huai hi’n kigen hi.Huaiziakin state govt in April 19, 2012 ma ngei in lawh hawmkhiak man sawm hi’n thutut kingah hi.
Finance deptt a official khat in a gendan in state govt in employee tamtak appointment bawl a, huaite Centre phalna om ziaka bawl himahleh state govt in Centre apan sum muhma in appointment bawl in sum omsate zang hi’n gen hi. Huailou in Manipur govt in Way & means ah Rs. 60 crores tan account a balance om ding himahleh huai a omlouh banah state govt in niteng in transaction ah Rs. 24 lakh tan a om ding himahleh huaite koih a omlouh ziakin overdraft om hi’n leng gen hi.
Pre-paid electricity paihoih
Imphal, April-9: Electricity deptt in April 4,2012 in pre-paid system a electric meipak piak pan uh a,huaini in Paona Bazar area ah pre-paid card hawmkhik pan uhi. Huai paitou zel in tuni chiang ah Paona Bazar, Thangal bazar leh Khoyathong bazar area teng huamsak uh a, consumer te’n electric meivak regular tak a muh banah dakkal tamtheipen muh deihna ziakin consumer tamtak in Rs. 1000 man recharge card lei uh a, ni 1 sung lelin leng Rs. 1 lakh val man record card kileikhia hi’n thutut kingah hi.Chief Minister in leng govt in power (electric meivak) ngai poimawh ding hi’n gen a, ni 1 sunga dakkal 20 tan electric meivak pethei dinga panlak hiding in gen hi.
A/R te’n Solar Street light pia
Imphal, April-9: 42-Assam Rifles te’n Military Civic Action Project nuai ah Chandel district sung a Larong Khunou a Village Authority makaite khut ah Solar Street Light 6 pia uh a, Major General UK Gurung, Inspector General/Assam Rifles(South) in tuni’n huai Solar Street Light 6te pekhia hi. Huai hun ah Brig Upendra Dwivedi, Commander, 26-SectorAssam Rifles leh a/R official tamtak in leng uap uhi.
PMGSY nasepna 20% lel kizou
Imphal, April-9:Manipur ah Central scheme(flagship programme) nuaia nasep pailelte laka poimawh PMGSY nasepna 20% lel kizou hi’n kigen hi. Manipur ah mihing 250 akipan 1000 leh atamzaw omna khuate pucca road kichi black-topped lamlian a zop ding leh lamlian omsate keklet ding chih hi a, huai scheme nuai ah lamlian 1225 zawh dinga ngim lak ah 269 lel nasepna zawh hi a, huaiziakun nasep dia bikhiah laka 20% lel kizou hi’n kigen hi. PMGSY scheme nuai mah ah mi 1000 sanga tamzaw omna khaw tuamtuam kikawmna lamlian 80 vel bawlzawh ding a ngim lakah 55 lel kizou hi’n kigen hi.Mi 500 akipan 1000 tan omna khaw tuamtuam kizopna ding lamlian 211 bawlzawh ding chih lakah 100 kia kizou a, mi 250 akipan 500 chiang omna khua ading lamlian 363 bawlzawh dia ngim lak ah 61 lel kizou chihthu om hi. Mi 250 sanga tamzaw omna khuate kikawmna ding lamlian 571 bawlzawh ding chih lakah 53 kia kizou hi’n leng kigen hi.
Accident aliam dam zoulou in si
Imphal, April-9: Amang Chongloi(51), Principal, Children’s Training School,Langol leh a innkuante zanhal(April 7) in Alto Car a tuangin Motbung zuanlai Truck tawh a kipelh laitak un akal uah Gypsy khat tailut in huchi kalah Amang leh a innkuante tuanna Alto Car pen accident a, Amang leng Shija Hospital ah etkol himahleh damzoulou in tuni zingsang baihtak dak 1.30 velin si hi. Siluang tuni nitaklam dak 4.00 velin Chingmeirong Chirstian Cemetry ah kivui hi. Principal, CTS a sihna ah a seppih staff te’n suunthu puang uhi.
MP chingthak Ms Suu Kyi in April 23 akipan Myanmar Parliament ah a seat luahding
Yangoon, April-9: National League for Democracy (NLD) thupuangtu in tuni a a gendanin, opposition leader Ms Aung San Suu Kyi in April 23, 2012 chiangin Parliament innpi ah a seat luahta ding chi hi. Nobel laureate Suu Kyi ahihleh April 22, 2012 in Myanmar vaihawmte’n khawpi thak a bawlkhiak uh Naypyidaw tung ding a, a zingchiang April 23 in Parliament( lower house) a session masapen om ding ah tel ding chi hi. Myanmar Parliament tutkhawmna(session) March 23, 2012 apan khawlsakin om a, April 23 a sutzop nawnding chih ahi hi. April 1, 2012 in Parliament seat 45 a by-election ah National League for Democracy in seat 44 a candidate a neih lak uah seat 43 ah ching uhi.Huai ah NLD Chief Suu Kyi leng Kawhmu Township Parliamentary constituency ah lower house(Pyithu Hluttaw ) a member(MP) dingin telching in om hi.
Agency thusuak in a gendan in April 1, 2012 a Myanmar a Parliamentary by-election ah hun paisate sangin mipi in zalenzaw a vote khia hi a theihziakin USA in Myanmar tunga gakna(sanction) a koih uh khahkol zek sawm uh hi’n kigen a, France in leng Eurpean Union in Myanmar tunga sanction a puan khahkol ding a panlak sawm hi’n kigen hi.Tutung a by-election ah Ms Suu Kyi makaihna NLD in leng zalen taka election tuh in 43 hial a chin ziakun leitung gam tuamtuam in Myanmar a deidanna uh azia om tuan mahmah in kilang a, Japan a bank lienpen 2na Mizuhi Corporate Bank in leng Myanmar ah office hong ding uh hi’n puang uhi.
TN Assembly ah Mobile phone puaklut phal hilou
Chennai, -9: Tamil Nadu Assembly speaker D Jayakumar in tuni a thusuah a bawlna ah, Tamil Nadu Assembly hall sung himhim ah mobile phone puaklut leh zat khaam bikbek ahi chi’n puang hi. Speaker thusuakin a gendanin Assembly hall sung leh pua tanpha ah cell phone khaam ahih tawh kitonin Minister, MLA leh journalist-te kuama’n pawlut theilou himhim ding uh a, amaute’ adingin Hall pawlam ah locker kibawl ahihman in huai mun ah akoih masak zel ding uh ahi chi hi.
Speaker Jayakumar in agenzelna ah Assembly campus a om cafeteria, member lounges leh mun tuamtuam ah pay phone kikoih ahihman in kuapeuh in huaite zangthei ding a, MLA te’ kiangah smart card piak hiding uh a, huai in kum khat daihding chi hi. Karnataka lehGujaratAssembly-te ah Session neih ahihlai in MLA khenkhat in Video film thanghuai taktak a etziak un minsiatna tawpkhawk om a, huai tawh kizoi tawn in Tamil Nadu Assembly Speaker in leng khaamna bawl hidan in kigen hi. Kumlui 2011 in TR Baalu MP tapa DMK MLA TRB Raja in house proceedings pailai a DMK leh AIADMK member naktaka a kisel lai uh mobile recording a bawlziakin mat in om hi.
.