Myanmar a MP telching a om Ms Suu Kyi lawhchinna India gama North-east bial mun tuamtuam ah lopna om
Imphal/ Guwahati, April-3: Nobel prize tanpha ngah Ms. Aung San Suu Kyi makaih National League For Democracy (NLD) in tutung Myanmar Parliamentary by-election ah vual zawhna thupitak a ngah uh India malsuahbial(North-east) mun tuamtuam ah kipahpihna kawmin lopna thupitak om hi. Thusuakin a gendanin tulel in India malsuahbial a om Mizoram state ah Myanmar galtai tampen a, mihing lakh 1 bang om zouding ua tuat hi uhi. Amaute’n zan leh tuni in leng Mizoram state sung mun tuamtuam ah lawm uh chihthu om hi. North-east India a om Myanmarese refugee te’n tu in Election Commission in official a election result a puankhiak ding uh ngaklahtakin ngak uh hi’n kigen a, Myanmar ah mipi vaihawmna (democracy) tunding thaknawn hun ding ngaklah mahmah uh ahihdan puang uh. Imphal leh asehvel mun tuamtuam ah leng Suu Kyi kipahpihna thupitak om hi.
Mizoram state khawpiAizawl pansan Burmese Social Welfare Association President Kn Htwe in zan in News saite’ kianga a gendanin by-poll ah NLD’ vualtungtuanna ka kipak mahmah uh a, himahleh Myanmar a mipi vaihawmna tunding kikna dingin huaitan lel a hun tawk naikei chi hi. Sepaih thahatna tawh kum tamtak vaihawmkhum a ka om ziakun mipite’ dipkuatna a beithei naikei a, tutung election ah leng military government in a gup candidate hunkhop in daan leh duun tuamtuam kikhungte bawhsia uh ahihdan kithei mahmah chi hi.
Assam state khawpi Guwahati, Meghalaya state khawpi Shillong, Tripura state khawpi Agartala,Nagaland state khawpi Kohima leh Dimapur banah Arunachal state khawpi Itanagar leh North East region a mun tuamtuam ah leng Suu Kyi kipahpihna ziaka mipite thawmging thupi mahmah hi’n kigen hi.
Zan in Burma mi North east India a hong galtai tamtakte biakinn a lut in Pathian kiang ah kipahthu genna hun zang uhi. Myanmar heutu khat in a genna ah NLD lawhchinna pen mipi’ lawhchinna hi a, ka kipak mahmah ua, himahleh ka sakhau(bag) te uah ka vante uh guang a, Burma gam ka kiknawn hun uh atung naikei deuh chi hi. Aung San Suu Kyi thupina leh chihtakna kilang mai a, tutung pen seat 45 lel a by-election ah NLD 40 ching hilai a,kum 2015 ka ngaklah mahmah uh chi hi. Kum 2015 chiangin Myanmar ah General Election om ding a, huai hun ah military junta kigolhlou a NLD in vualtungtuanna a ngah aleh Suu Kyi in Myanmar President len dingin bil-at hisimta in kigen hi.
Kum 1990 a MP dia telching Tint Swe in a genna ah, 1990 general election tawh teh in tutung by-election anuam mahmah a, mipi deihtelna tawh vote khiak hi a, Suu Kyi leng telching ahih tawh kitonin Parliament sung ah amah hong gamtangta ding ahihman in kum 2015 chiangin mipite’ deih party mah in govt hon bawlkhiak ka kinem chi hi. Dr Swe ahihleh physician hi a, vaihawmna lentheilou dia delhkhiak ahihphet in tuni dong New Delhi ah kibu denlai hi. Guwahati a om Nava Thakuria in a genna ah tutung election pen Burma gama dingin kikhekna thupilua hi a, ahihziakin 2008 constitution pen khenthak ahihkei leh Suu Kyi adingin leadership letding haksa mahmah lai maithei chi hi. Myanmar ah mipi vaihawmna tunding ahihtheihna dingin a kim-le-kiang a om India, Bangladesh leh Thailand in leng pan naktakin ana la uhi. Myanmar leh India malsuah bial a om state 4 -Mizoram, Manipur, Nagaland leh Arunachal Pradesh te kigamgi helhel hi a, Myanmar tawh 1,640 km asau gamgi a dai kikai omlou(unfenced border kikop) in om uhi.
Home Minister in Mizoram phading
Aizawl, April-3: Union Home Minister P Chidambaram in zingchiang(April 4) in Mizoram state pha ding a, Tripura apan Bru refugee-te Mizoram a pikik nawnna ding tawh kisai a 2vei hong zinna hita ding hi’n kigen hi. Aman Mizoram apan taikhia a Tripura a om Bru galtaite awlmawh mahmah a, Mizoram govt tawh kilemna tuamtuam bawl ahihnung a tuni tanpha Bru galtaite ginataka Mizoram lutkikpih ahihlouh ngaisiamlou in Mizoram govt kiang ah leng theihsakna 3/4 vei bawlta hi’n kigen hi.
Chidambaram in April 4 in Aizawl tungding a, Raj Bhavan ah zan giak ding a, a zing(April 5) in Mizoram tumlam a Bru galtaite’ omna dia mun kibawlte enkhe ding hi. Union Home Minister in helicopter zangin Mamit district sung a Suarhliap village bawh ding a, huai apan in gari a tuangin Damdiai phalai ding chihthu om hi. Damdiai ah Bru galtaite akimuhpih zawh in helicopter mah zangin Tuipuibari village pha ding chi’n official thusuak om hi.
Minister kipahpihna programme zang ding
Lamka, April-3: INC Election Committee, Hiangtam Lamka te’n ‘Hon kipahpih ung na lawhchinna’ chih thupi anei in March 5, 2012 zinglam dak 11:00 in Hiangtam Lamka a YPA HQ Hall ah 58-CCpur A/C ah Congress(INC) ticket a MLA telching ahih banah Minister (Health & FW) hihna lenthak Phungzathang Tongsing kipahpihna program zatsawm uhi. Huai ah Chief Host in Kamsuanlun, EM, ADC/CCpur pangding a, Pastor V.Jamkhanthang, EBCC Hiangtam Lamka in Minister ading in thumsak ding hi. Minister kipahpihna programme zat hunsung in H.Zamkham, Chairman, INC Election Committee Hiangtam Lamka banah Kamsuanlun, EM/ADC leh Phungzathang Tonsing, Minister (Health & FW) apan thugen ngaihkhiakna om ding a, nitaklam in ankuang umkhawm ding uh hi’n thusuak kingah hi.
SBI/CCpur in Rs. 3.06 crore mukhia
Lamka, April-3: State Bank of India(SBI)/CCpur Branch in April 1,2011 akipan March 31, 2012 sung in sumpung(net profit) a muhkhiak teng uh Rs. 3,06,00,000 (Rs. 3.06 crores) tungpha hi’n thutut kingah hi.Huailou in RBI in SBI/CCpur Branch leng Currency Chest Branch hidia a bikhiah dungzui in nasepna bangkim zawhsiang phial hita a,tuni apan ni 15 sungin Currency Chest branch hidia honna(formal inauguration) a om theihna ding in hahtakin panla lel uh hi’n leng thutut kingah hi.
SBF STC ah Passing Out Parade
Lamka, April-3: BSF Subsidiary Training Centre(STC) a training zouthakte ading in April 4, 2012 zinglam dak 8.00 in BSF Parade Ground ah Recruits Passing Out Parade om ding a, huai ah Sudesh Kumar, Inspector General khuallian a pangin Passing Out Parade atel jawan-te akipan salute la ding hi.
Block 10 ading sanction
Lamka, April-3:District Program Co-ordinator, MGNREGS in Block 10 a Job-card holder te’n kum 2011-12 a MGNREGS 3rd phase a ni 21 sung nasepna ding sum sanction hi.Block 10 te leh khua omzah ban ah Job-card holder omzah ahihleh Thanlon block a khua 64 ah Job Card holder 3,138; Tipaimukh block a khua 18 ah Job Card holder 3,257; Lamka block a khua 53 ah Job Card holder 14,424; Singngat block a khua 95 ah Job Card holder 4,559; Vangai block a khua 35 ah Job Card holder 2,350; Saikot block a khua 39 ah Job Card holder 2,905 ; Henglep block a khua 162 ah Job Card holder 6,234; Tuibuong block a khua 137 ah Job Card holder 10,952; Sangaikot block a khua 96 ah Job Card holder 3,684 leh Samulamlan block a khua 99 ah Job Card holder 4,124 hi uhi.
Sepaih officer 4 in promotion ngah
Lamka, April-3:BSF a Assistant Commandant lenlel N Ginzamung s/o Rev N Phungzapao of Bungmual (tulel a Nagaland a posting), Khupsuanmang Valte s/o V Jamkhualthawn of Zenhang Lamka (Meghalaya a posting) leh Khaiminlian Vaiphei c/o Dr Goulam of Red Cross Road (J&K a posting) te zanhal in Dy. Commandant ding in promotion order suak chihthu kiza hi. N Ginzamung ahihleh STC/BSF, Gangpimual ah hongpai ding a, Khupsuanmang bel Tura mun mah ah om ding a, Khaiminlian in Tripura tang hidanin kigen hi. Tualou in, 172-Bn CRPF (Jharkhand) a 2 IC lenlel Henjang Vaiphei in leng Commandant dingin promotion ngah a, 87 Bn CRPF Jiribam ah posting ding hi’n thutut kingah hi.
Cataract case 2 operation
Lamka, April-3: District Blindness Control Society/CCpur saina in Dist Hospital a Eye OPD ah Cataract Free Eye Camp om a, huai ah mitlai mungou(cataract) case 5 mukhiate lak ah Mrs Nuamzen(70) of Mualpi village leh Joy(55) of Terakhongsangbi tuni’n amanbei in operation bawl in om uh a, April 4, 2012 in midang 3te operation bawl hiding un kigen hi.
DRDA staff-te’n ED/DRDA kha uh
Lamka, April-3: Ms Mannuamching, ED/DRDA in Dist Council a CEO alet tak ziak in DRDA staff te’n tuni nitaklam in DC/CCpur office khangzek a Dist. Training Centre ah khakna program zang uhi. Huai ah DRDA staff te’n Belpi khat, pak leh puante’n khat pia uhi.
Khaw tuamtuam ah DDT kap ding
Lamka, April-3: District Malaria deptt in April 2012 khasung in CCpur dist a Malaria vei tamna PHC 5 nuai a PHSC 10 huamsung a khaw tuamtuam ah DDT(thoukang thahna damdoi) kap ding uhi. DDT kapna ding bialte Behiang PHC nuai a Hiangtam-K PHSC , Singngat PHC nuai ah Hiangmual PHSC leh Lungthul-E PHSC, Thanlon PHC nuai ah Dailon PHSC, Sinzawl PHC nuai ah Sumtuk PHSC, Patpuimun PHC nuai ah Ngampabung PHSC, Kangreng PHSC, Kharkhuplen PHSC, Sibapurikhal PHSC leh Phailenthangpunji PHSC hi’n kigen hi.
RSBY tawh kisai Workshop
Lamka, April-3: DC office a Conference Hall ah March 4, 2012 zinglam dak 11:00 apan in Labour deptt. Govt of Manipur nuaia Manipur State Rashtriya Swasthya Bima Yojana Society saina in ‘District Level Workshop on Rashtriya Swasthya Bima Yojana (National Health Insurance Scheme)’ om ding hi. Huai ah DC/CCpur khuallian in pang ding a, Guest of Honour in Executive Director, Manipur State RSBY Society leh Functional President in Dy Labour Commissioner, Manipur pang ding hi. Huai workshop ah Imphal apan expert te’n sinsak ding uhi.
Dengue Action meeting om ding
Lamka, April-3: Dr A.Chaoba, State Malaria Officer makaihna in Imphal ah April 4, 2012 zinglam in Dengue Action meeting om ding a, huai ah Dr F.Thienkhogin, DMO/CCpur vatel ding hi. Huailou in April 5, 2012 in leng Dr A.Chaoba makaihna in amah office ah Malaria tawh kisai review meeting om ding a, Dist tuamtuam apan Malaria Officer-te telding uh hi’n kigen hi.
Good Friday-cum-Revival programme
Lamka, April-3: Saparmeina a Salem Village KBC saptuam in Good Friday leh Easter Sunday hunsung Revival Programme a zatsawm in April 5-8,2012 sung “Good Friday-cum-Revival Programme” chi’n minvuah uhi. Huai hunsung in Rev Dr Khaizakham, Principal,ECT in thugen ding a, avangkim in ECT Trio pawlin phatna lasa ding uhi.
Upa Ngaizalam’ inn ah sunna programme
Lamka, April-3: Mrs Niangsuanching(52) w/o Upa Zamkhothang Guite of New Delhi damlouhna ziak in Hearts and Lung Institution, Punchkuain Road,New Delhi a ICU ah sawtkuamtak etkol a om dam zoulou in tuni zinglam dak 11:30 velin si a, DTL Colony, New Kilokari, Opp. Maharani Bagh, New Delhi ah zanhahpih hi a,April 4,2012 in Kashmere gate a Nicholson Cemetery ah kivui ding hi. Zamkhothang’ upa Upa Ngaizalam of Bungnual’ tenna inn ah April 4,2012 zinglam dak 10.00 akipan in suunna programme zat hiding chih thutut kingah hi.
SUUNNA:
Mrs Ngemzangai @ Ngaitom(73) m/o V. Luaizachin of Bungpilon tuni zingsang dak 400 in a khua uah cancer natna ziakin si a, tuni nitaklam in kivui hi.
Heroin(No. 4) bawlna mun luhkhia
Imphal, April-3: Narcotics Control Bureau(NCB), Assam Rifles leh Thoubal district a Lilong apan NGO kithuahkhawm in March 30, 2012 in Thoubal district sunga om mualdawn khat ah No. 4 bawlna(mobile heroin manufacturing unit) khat luhkhia in huai ah mi 4 mankhia uhi. NCB Regional Director Vijay Shahasane in zan in Imphal ah Media-te kimuhpih in huai thu puang hi. Aman a genna ah Manipur gam ah No. 4 bawlna mun khat om chih Dec 2011 apan a teihkhiak uh hi a, huai mun luhkhiak sawm in panla toutou uh ahihdan leng gen hi.
Matkhiak a om mi 4te Lilong area akipan ngen hi uh a, Naruddin (28), Jiya-ul Rehman, Munir (30) leh Yahiya (30) hi uh a,amau akipan in No. 4 bawlna ding raw opium kg. 6 muhkhiak hi’n NCB Regional Director in gen hi. Mi 4te kipuandan in CCpur akipan in poppy tang sunga tui(seed fluids) lei uh a, huaite morphine leh opium in bawlkhia uh a, huchi’n heroin taktak a bawlsawn dingin Guwahati a thon zel uh hi’n kipuang uhi. Local market ah heroin kg. 1 in Rs. 10 lakhs akipan Rs. 15 lakhs tan man mahleh international market ah Rs. 1 crores vel man hi’n kigen a, local market ah a rate niam ziakin damdoi khamtheih hih pung nasa hi’n kigen hi.
Training din Officer 3 vatel ding
Imphal, April-3: Th. Chittaranjan,IAS, DC/Chandel; K. Radhashyam,IPS, SP/CCpur leh Mrs Roui Kullai,IFS, Divisional Forest Officer/Central Forest Divn in Red Horn Division, Ranviya ah April 6-8, 2012 sung ‘Interaction on Security in North-east region’ kichi training a tel dingin Manipur govt in sawl(released) chihthu om hi.
AIRCEL Tower-te ah thautui thunlou
Imphal, April-3:JTL kichi private company-te’n July, 2010 akipan in AIRCEL Tower-te a thautui lam mawhpuakna dingin contract sign uh a, hileleng AIRCEL adia thautui lakna Oil Service station 3 ah January,2012 akipan thautui man Rs. 2 crore piaklouh a om ziakin Imphal khawpi sunga AIRCEL Tower omte ah thautui thun hilou chihthu om hi. JTL te’n AIRCEL ading thautui mawhpuakna a lak ua kipan in thautui man ding sum ginataka piak pahpah hilou a, huaiziakin January, 2012 akipan March 20, 2012 sungin Oil station 3 ah thautui man piak ding Rs. 2 crores tutan piaklouh a om hi’n kigen hi.
ST Reservation 27% hisak din theisak
Imphal, April-3: Movement for Tribal People’s Rights, Manipur pawlin RIMS a sem ding Staff Nurse 71 leh LDC 11 lakna ding a recruitment process pailel lai ah ST candidate-te adia seat reservation 7.5% lel hihsak dinga RIMS thuneite’n a bikhiah uh India govt in kum 1993 a Office Memorandum a suah dungzui in 27% hi a, RIMS thuneitute’n leng ST adia seat reservation 27% hisak dingin theisak uhi. Huai zuih ahih kei aleh Movement for Tribal People’s Rights, Manipur om maimai lou ding hi’n leng theisak uhi.
Manipur apan Heroin kipua Rs. 5 cr man
Nagaland Police te’n mankhia
Dimapur, April-3: Nagaland Police te’n zanhal(April 1,2012)nitak dak 6.00 velin Chumukedima Police Check gate ah Imphal apan Dimapur zuan Bus a check ua leh passenger 1 in a suitcase sunga puankawm ah packet 4 a kitun a puakguk No. 4(Heroin powder) kg. 2 ½ vela gik international market a Rs. 5 crores vel man ding mukhia uhi. Bus checking bawlte laka tel Police Head constable Omatsungba in suitcase gikdan ginlelhhuaisa in puankawm lak a ethoih aleh a muhkhiak hi a, suitcase neitu Md. Siad Khan (28) of Kshetri Gaon(Singjamei PS, Imphal East district ) matkhiak in om pah hi. .
Md. Siad Khan kipuanna apan in Dimapur a Blue Hill station ah nitak dak 8.00 in a kithuahpih dia ana ngak Riyajuddin (28) of Kshetri Gaon leng matkhiak hi a, amau Paltan Bazar(Guwahati) a Sultan Hotel tan pawtung ding a Rs. 5000 tuak piak a om hi un kipuang uh a, Guwahati tunpih hun ah Rs.15,000/- tuak piak beh a om ding uh hi’n kipuang uhi.Zan nitaklam in Kohima ah Police HQ a Narcotic Cell ah T. Sangtam,IGP (INT) leh Jatila, SP (Narcotic) muh in Press-te mah ah No. 4 muhtheih dinga honkhiak in om hi.
NCB Regional Director Vijay in a gendan in poppy tang apan morphine leh opium a bawlna dingin zan khat sung lel hunla a, heroin manufacturing unit a semte’n a omna mun uh theihkhiak ziaka mat ahih ding uh kivenna in a omna mun ah mun tuamtuam ah kisuan uh hi’n leng gen hi.
SSA scheme lawhchinsak sawm
Imphal, April-3: Naupangte Class VII tan lai siamsak vek tupna a India govt in patkhiak SSA scheme tutan Manipur ah deih banga lawhchinglou hi a theih ziakin govt in lawhchinsak deihna ziakin District Education Board hih hatsem ding deih in panla hi’n kigen hi.SSA scheme nuai ah govt school a kai student-te laibu leh uniform manbei(free) a piak ding chih hi a, huaileng tuni tan in deih banga lawhching zou nailou hi’n kigen hi. Huailou in kum 1 sungin school ah student-te ni 200 sung mid-day meal piak ding chih himahleh Manipur ah ni 165 leng piakzawh hilou hi’n kigen hi.
.