FCI Godown building bawl kipan pahta ding
Lamka, April 2: Lamka apan simlam km 2 vel a gamla Tualnuam khua ah Food Corporation of India (FCI) in Godown a bawlsawm tunung sawtlou in building lam kipan ding chihthu kiza hi. Chief Minister O Ibobi makaihin zanhal nitaklam in meeting om a, huai ah Health & FW Minister Phungzathang Tonsing, Vungzagin Valte MLA, Chief Secretary DS Poonia, Project Director MDS leh Dy General Manager FCI te telin dakkal 2 vel genkhawm uh chihthu om hi. FCI Godown kibawl ding Matric tonnes(MT) 2500 capacity dia bikhiah himahleh MT 5000 capacity hiding a, Thoubal a FCI godown kibawl dek leng MT 5000 capacity mah hiding chihthu om hi. ZEPADA in MT 2500 capacity godown kidaih lah deuh dia thei in kum 3 paisa akipan state govt leh FCI ah MT 5000 MT capacity tanbek hisak dingin ngetna a piaklut uh hi'n kigen hi.
BRGF meeting & MLA-te kipahpihna
Lamka, April-2: Chairman ADC/CCpur makaih in a office chamber ah April 4, 2012 sunnung in BRGF tawh kisai in "Planning & Implementation Committee" te'n meeting nei ding uh a, huai ah MP,MLA teng, DC/CCpur ban ah dist level officer khenkhat tel ding uhi. Meeting zawh sunnung dak 1:30 in District Council Hall ah Council member te'n CCpur Dist apan MLA telching thakteng kipahpihna(felicitation) programme neihpih ding uh hi'n kigen hi.
Tedim Road lamlian bawlthak
Lamka, April-2: National Highway Divn-III te'n March 25,2012 in Police station kong a Traffic point apan Light House lane lam mawnawh a amlian a bawl uh a hoihlouh luat ziakin, zan akipan in bawlthak kipan uh chihthu om hi. Huaia nasemte'n a gendan un tuma a abawl lai un machine kisiat ziak in nasep zou manlou in khawlsan uhi. Zan apan a bawlthakna munte uh inch 1.5 velin sah a, amasa a kibawl tawh teh in hoihzaw hi'n kigen hi. Police station kong apan lampi bawl apat uh Khawmoi khua a kibawl tawh kisutuah ding hi'n kigen hi.
SSPP in kipahpih thu puang
Lamka, April 2: Siamsinpawlpi Life member T.Semzakam' tanu Baby Lhinghoihkim in UPSC saina a Indian Forest Service (IFS) examna ah a lawhchin ziakin SPP Gen HQ in kipahpihthu puang uhi. Baby Lhinghoihkim in posting mun ding option a piakah Manipur khatna a hihsak leng SSPP in ngaisang mahmah ahihdan thutut kingah hi. Amah laizilna tawh kisai in Delhi, Shillong leh mun tuamtuam a omlai in leng SSPP active member hi gige hi'n SSPP Gen HQ apan thutut kingah hi.
Niin halna a thil puakzak ah liam
Lamka, April-2: Jamkhomang Baite(28) s/o Ngamzatong Baite of K.Khomunnom village in zan zinglam dak 8:00 velin a inn-gei ua huansung(kitchen garden) ah singteh keu leh niin neng hal lai meikuang lak apan thil(explosive/bomb hia kitheilou) puakzakin ataksa mun tuamtuam thehkha a naktak in liam hi. Aman kintakin Dist Hospital ah puaktung himahleh a dinmun lauhthong huai hi a a kilat ziakin doctor te'n Imphal ah refered uh chihthu om hi.
SHG te'n tuni'n training nei
Lamka, April-2: DC office khang a Dist. Training Centre ah tuni in DRDA/CCpur saina in 'One Day Training Program of SHGs under SGSY' kichi om hi. Ms. Mannuamching, ED/DRDA in training uap in course tawh kisai pulak a, KS Guite, NABARD/CCpur in SHG tawh kisai paidan leh account maintain dan sinsak hi. Dr. Lalhngaklien, AH & Vety deptt in vok khoi dan leh etkoldan sinsak a, S. Shyamjai Singh, Senior Hor Dev Officer in nahtang(banana) leh pateh(mushroom) bawl dan sinsak a, huai training ah SHG tuamtuam apan member 60 val tel uhi.
AIR/CCpur tungtang Delhi ah theisak
Lamka, April-2:CCpur Dist Students Union(CDSU) in Tuibuong a Local Radio Station(LRS),AIR/CCpur apaisa April 13, 2010 a honkhiak himahleh tuni tan ginataka a function louh tungtang ah thil omdan enzui a panla ding in Delhi a om Chief Exectvie Officer,Prashar Bharti leh Director General,AIR kiang ah ngetna tawh kithuah theihsakna pia uhi. Huai ah AIR/CCpur ah approved staff kiching koih kin ahih ding, LRS/AIR,CCpur in bank account tuam a neih ding, LRS/AIR, Ccpur ah mipi adia poimawh leh phatuam 'commercial announcement' leng patkhiak(broadcast) din ngen uhi. CDSU in akisaipih thuneite kianga ngetna a piak uh ngaihsak kin ahihkei aleh kul leh poimawh asak bang un kiphinna pan ding uh hi'n leng theisak uhi.
Free Eye Camp ah mi 200 val en uh
Lamka, April-2: District Blindness Control Society/CCpur saina in tuni zinglam in Dist Hospital a Eye OPD ah Cataract Free Eye Camp om a,huai ah Dr.Roby,Eye Specialist, Dist Hospital in mitlam buaina nei mi 200 val en hi. Huaite lak ah mitlai mungou(cataract) case 5 mukhia uh a, April 3, 2012 in District Hospital ah mi 5 te' mit manbei in operation bawl hiding chihthu om hi.
Army-te'n galvan hunkhop mukhia
Lamka, April-2: Police apan kizadan in 10-Assam Rifles leh 46-Assam Rifles kigawmte'n March 29, 2012 nitak dak 9:45 velin Lunjang Guite(45) s/o (late) Seilen Guite of Belam Veng, HQ Veng, Lamka West a tenna inn apan mankhia uh a, amah akipan in .32 calibre pistol 1, magazine 3, 9mm colt automatic pistol 1 leh atang 4 mukhia uh a, Imphal Police khut ah pekhia uhi.Lamka Police-te'n Imphal Police-te' khut apan a case lasawn in FIR No. 32(4) 2012 CCP-PS U/S 25(1-A.Act) Arms Act registered uhi. Police te'n CJM court ah Lunjang dingsak uh a, April 4, 2012 tan Police custody a omding in CJM phalsak hi'n thusuak kingah hi. Police thusuak danin Lunjang Guite ahihleh thau(gun) zuaka kipei hi'n gen uhi.
Youth Club te'n guta 2 mankhia
Lamka, April-2: CCpur Meitei Leikai Youth Club/Khumujamba te'n tuni zinglam in a veng uah guta 2 mankhia in amau apan battery 1 mukhia uhi. Mat a om mi 2te Thanggouhau (28) s/o Khamzanang of Songtal, tulel a Laiveng, Bungmual a om leh Somlian(24) s/o Pumgin of Vengnuam, New Lamka hi uhi. Amau tuni zingsang dak 2:00 velin Hiangtam Lamka a Basanta Welding Workshop ah MSF te' gari kibawl apan battery gukhia uh hi'n kigen hi. Youth Club te'n guta 2 te tuni'n a innkuante uh khut ah pekhia uh a, Khumujamba Leikai sung ah guktak phal ahihlouh ban thil gukmang himhim zuak sawm nawnlou ding in thuhilh uh hi'n thusuak kingah hi.
BSF te'n thaukap sunzom ding
Lamka, April-2: STC/BSF CCpur a training te'n Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah March 16, 2012 zingsang baihtak akipan nitak zan sawt tanpha long/short/grenade leh 51-mm mortar a kap uh March 31, 2012 tan daih ding himahleh ahun behlep uh a,April 1,2012 akipan April 15,2012 tan zingsang dak 5.00 akipan zan khawvak in leng kap ding uh hi'n taklang uhi. Huai hunsung in a kimnai a khua omte apan mihing kuamah huai area a lutlou ding leh ganvulh leng huaimun a lut dia kuama'n khahzanlou ding in DIG, STC/BSF in thupuan bawl hi.
Laphuah siam Job B Lian si
Lamka, April 2: Zomite' lak a laphuah siam mahmah a kigen Nangkhanlian @ Job B Lian (48) b/o B Kamzamung Principal Bethany Christian College, tunitak dak 10:30 velin sungna in si hi. April 3, 2012 in a sanggampa Upa BKh Khankhup, Bungmual (New Lane) inn pansan in kivui ding hi. Unaupa Nangkhanlian ahihleh suanggelh leh painting lam ah leng kiva mahmah hi a, tualou in, 'Aw naupang te aw na ngai dih ua, I Toupa in thuchiam hon pia...." chih la phuaktu ahihbanah, 'Simlei haksatna tuang nung siahleng..' 'Dougal hong laang..' chih leh laa tamkhop ana phuaktu ahi hi. Amah ahihleh, Upa B Go Lian Mang MPS, BK Shwanno te tawh leng piankhawm (sanggam khat) ngen hi uhi.
Suunna
S. Mangkhum(19) s/o (late) Liantluang of GS road, New Lamka(G) zan nitak dak 8.00 velin khawphoklou a om in si a, tuni'n YPA New Lamka hanmual ah kivui hi.
H Lalkhohen (56) s/o (late) Lalkhogin of Tuinom tunitak dak 6 in TB natna in si a, April 3 in kivui ding.
Manipur Governor khualzin khia
Imphal, April-2: Manipur Governor Gurbachan Jagat tulai in suti la in zinkhia a, April 6, 2012 ma in Manipur hong tungkiklou ding hi'n kigen hi. Chief Minister O. Ibobi makaihna Congress ministry leng tu April 2012 khabul a keklet(expand) ding hi'n kigen mahleh Manipur Governor hong tunkik ma in hitheilou ding ding hi'n kigen hi. Manipur ministry ah Council of Minister 12 tan omthei ding chih hi a, tulelin Chief Minister telin Council of Minister 4 kia omlai a, Ministry keklet hun ah Minister 8 lak behlap theih lai ding chih ahi hi.
Tuni nitakin Cabinet meeting om
Imphal, April-2: Chief Minister O. Ibobi makaihna in tuni nitaklam dak 4.00 akipan nitak dak 7.30 tan Cabinet meeting om a, huai ah thu poimawh tuamtuam genkhawm uhi. Kum 2012-2013 sunga Manipur Annual Plan Outlay dingin Planning Commission in Rs. 4680 crore bikhiahsak ding a panlak thukim uh a, central govt apan 100% funding a kisem flagship programme tuamtuam review leng bawlin bangtan sepzawh hihiam chih leng genkhawm uh hi'n kigen hi.Huailou in Manipur State Road Transport Corpn(MSRTC) a sem khenkhat in govt employee hizenpi govt apan a ngah ding uh hamphatna a ngahlouh ziakun Supreme Court a case a bawl uh Court thupiak banga sepkhiak ahihlouh ziakin Supreme Court in Principal Secy(Transport) tung ah contempt proceeding(Court thupiak zahlou chi'n) thu om ziakin tuni a Cabinet meeting in MSRTC a sem employee te'n a ngah ding uh om bangbang leng piak thukim uhi chihthu om hi.
Numei pawl Sit-in-Protest tu uh
Imphal, April-2: Mrs Jangthailiu Kamei w/o Ngamsuaklung Kamei of Lunglei village apaisa March 22, 2012 in Bishnupur district sung Keinou Awang Leikai ah pasal 4 in a kisualhuan(gang rape) uh lungkimlouh latsakna leh numei tunga tatsia mi 4te akituahpih bang gawtna piak ahih deihna in Naga Women's Union(NWU), Rongmei Lu Phuam(RLP) leh Langol area a numei pawl kigawmkhawmte'n tuni zinglam dak 11.30 akipan in Grace Academy junction, Guigailong village gate(Langol Range foothill) ah Joint Sit-in-Protest tu uhi.
Home Minister kiang ah ngetna pia
Imphal, April-2: Manipur Police deptt a Sub-Inspector & Asst Sub-Inspector(SI & ASI) lakna ding in kum 2010 a recruitmet om result puankhiak dinga ngetna ziaka kibawl(Association for declaration of SI & ASI Recruitment results,2010) pawlin Home Minister Gaikhangam kiangah ngetna pia in recruitment result suaksak dingin ngen uhi. Amau a taklatdan un kum 2011 in written examna om a, Dec 24,2011 in SI adia written result suak mahleh ASI apen tutan suaklou hi'n taklang uhi.Huaiziakin ASI adia written result suaksak ding leh SI interview hun ding bikhuah dingin Home Minister kiangah Assn pawl in ngen uhi.
KSO Gen HQ election om ding
Imphal, April-2: KSO Gen HQ ah kum 2012-14 sung vaipaw ding telna leh General Assembly kithuah April 7, 2012 zinglam dak 9.00 in Kuki Inn,Imphal ah om ding chi'n Lunsei Touhthang, Secy/KSO Standing Committee in thusuah hi.Huai ah KSO Gen HQ a Cabinet member-te, Dist KSO,KSO branch tuamtuam leh sister organisation-te Electoral College ah tel ding uh chih hi. Huai ah President, Vice President,Gen Secretary leh Fin Secretary tel hiding a,huaite'n Standing Committee tawh kithuzak in post tuamtuam a ding guang(nominate) ding uh chihthu om a, KSO Standing Committee contach theih ding chi'n thusuak in gen hi.
A/R te'n damdoi tamkhop mukhia
Imphal, April-2:26-Sector Assam rifles nuai a om 24-Assam Rifles te'n zan in Sita-Tengnoupal road a Electric Power House kiang ah gari paivelte check a bawlna uah
Respifed tablet(RP) tang 1,25,200 (kg. 80) a gik mukhia uh a, damdoi tang a muhkhiakte uh zan mah in Tengnoupal Police Station ah pekhia uh chi'n PIB(Defence Wing) thusuak in gen hi.
SSPP Delhi makaite kichiam
Delhi, April 2: Siamsinpawlpi Joint HQ Delhi ah kum 2012-2014 sung President dia telching Ginthanlian Valte in cabinet expansion bawlkhin in Old JNU campus a SSPP JHQ Office ah cabinet-te tawh kichiam uhi. Vice President hihna L. Kamjohnson, Secretary S.Lianlalmuan, Asst Secretary Phunggoutan Guite , Fin Secy T.Thawngkhansiam leh Treasurer Ninglunching te'n lending ua, departmental secretaries leng guang fel uhi. Advisors dingin Biaklun Shoute, Dr Kamkhenthang Guite, Dr Thangchinkhup Guite, Thangzalun Khuptong, H.Chinzason leh Upa T. Kaithang guang uhi.
Re-allocation of works
1.DS Poonia,IAS, Chief Secretary & Secretary to government(Planning/IT/Cabinet & Confidential) & Principal Resident Commissioner, Manipur Bhavan/New Delhi as
Chief Secretary & Secretary to government(Planning/IT/Cabinet /Confidential,DP ) & Principal Resident Commissioner, Manipur Bhavan/New Delhi.
2.Ameishing Luikham,IAS, Principal Secretary(Tribal Affairs & Hills/Education-S/Adult Education/SCERT) as Principal Secretary(Tribal Affairs & Hills/CAF & PD).
3.Dr J. Suresh Babu,IAS, Principal Secretary(Home/CAF & PD/IFCD) as Principal Secretary(Home/Education-S/Adult Education/SCERT/IFCD).
THEIHSAKNA LEH NGETNA: Zogam.com users te khualna a admins te toh Zogam Thupuak vaisaite kitheihsiamna tungtawn a hong kisuah ahi. Zogam.com phalna om masa lou in website dang a suah sawn phal ahi kei.
.