Assam Rifles te’n UG hidia gintak mi 2 kaplum

Imphal, Sep-19:Tuni zingsang baihtak dak 3.00 velin 10-Assam Rifles personnel te’n Imphal West district sung Lamsang PS a Phayeng Kharang Babulok canal ah helpawl(UG) hidia gintak 2 kaplum uh chi’n Police thusuak in gen hi. Police-te’n misi 2te akipan in 9mm pistol 1, AK rifles 1,hand-grenade 2, detonator 2, magazine 1,AK rifles tang round 23 leh IED(bomb) hidia gintak mukhia uh chihthu leng om hi.
       Police in misite tuni nitaklam in va pawkhia uh a, Lamsang Police-te theihpihna in Forensic expert te’n siluang 2te a etchet khit un kuakua hi uhiam chih suichet dingin RIMS morgue a koih hi uh chih ahi hi. Polic teamte Phayeng area a tunma in khawsung mite’n media-te kiang ah a gendan in tuni zingsang dak 3.00 vel akipan in hun sawtkuamtak thauging za uh a, mi 2/3 kaplup hi uh chihthu za mahle uh Assam Rifles te’n misi luang omna mun tan paisaklou uh hi’n gen uhi. Khawsung tawh kinailua a thiltung deihlouhthu khawmite’n gen uh a,huaiziakin lounei mite’n tuni’n lou nasepna a khawlsan uh leng nuamlou sakthu gen uhi.                                                                  

Chairman/DRDA in training hongkhia

Lamka, Sept-19: DRDA/CCpur saina in tuni’n Tuibuong a District Training Centre ah MGNREGS 2012-13 tawh kisai in ‘One Day Training Program’ om a, Langkhanpau Guite, Chairman, DRDA/CCpur in hongkhia hi. Chairman/DRDA in agenna ah MGNREGS nasepna a lawhchin sem theihna ding a training om kipahhuai sakthu gen a, BDO/SDO ten village level a training hun ah kuapeuh in theisiam ding a hilhsawn din deihthu gen hi. Kumdang sanga MGNREGS 2012-13 nasepna lawhchinna din BDO/SDO te’n pan la ding in ngen hi. C. Hangshing, ED/DRDA in training tawh kisai pulakna nei a, BDO 10 kiang ah MGNREGS material hawmkhiak ahi hi. echnical session ah State Institute of Rural Development (SIRD) te’n sinsak uhi.

SSC exam centre ding felta

Lamka, Sept-19:Staff Selection Commission (SSC) saina nuai ah Data Entry Operator leh LDC lakna ding in Oct 28, 2012 in Combined Hr. Secondary Level Examination om ding a, amasapen ding in CCpur district ah leng exam centre om ding hi.Exam centre tawh kisai in tuni’n DC/CCpur office chamber ah meeting om hi. Huai ah CCpur District a SSC exam centre ding in Lamka college leh CCpur Govt college zatding in thupuk uh a, Lamka college ah candidate 762 exam ding uh a, CCpur college ah candidate 1008 in exam ding in bikhiah uhi.

BJP CCpur Dist in bandh support

Lamka Sept-19: BJP makaihna NDA pawlin Sept 20, 2012 in zingsang dak 6.00 akipan nitaklam dak 6.00 tan Bharat Bandh a puan uh BJP CCpur dist in full support puang uhi. BJP CCpur dist makaite apan kizadan in mizawng leh gentheite khualna ziak hi’n taklang uh a, bandh sungin CCpur district ah school teng, school naupang pua school van te, Medical deptt, electricity deptt, PHED leh Press/Media te khahkawl hiding in gen uhi. Mipite’n leng bandh lawhchinna dia kithuahpih chiat ding in leng ngen uhi.

Justice Roland in enkhe ding

Lamka, Sept-19: Supreme Court of India thusuak dungzui in Narcotic Drugs and Psychotropic (NDPS) Court Manipur apan Justice Roland Keishing in Sept 22, 2012 in Lamka Police Station mun pha ding a, damdoi khamtheih leh galvan ban ah van tuamtuam mat a omte koihkhawmna ‘Malkhana’ enkhe ding hi.

Electricity te’n drive sunzom

Lamka Sept-19: Electricity deptt/CCpur divn te’n Lamka leh akim a khaw tuamtuam ah electric fee tampi ba leh phalna beia electric mei lagute zonkhiatna dingin Sept 7, 2012 apan ‘revenue drive & detection of un-authorised connection’ a pat uh tuni’n leng Rengkai area ah sunzom uhi. Huailou in Electricity deptt/CCpur divn te’n zan leh tuni'n new connection form 200 homkhia uh a, tuni’n Imphal apan form bangzah hiam lakbeh nawn uh hi’n kigen hi.

A hunkhop in sepna muthak uh NEHU a MA result leng suak

Lamka, Sept-19: Food Corporation of India(FCI) a Assistant lakna ding result tuma zekin suak a, huai ah   S.Minlun leh Kamminthang lawhching in West India lam ah posting ding chihthu om hi. Huailou in Home Ministry nuai a SIB a semding lakna ding result suak ah S. Go Sian Lal @Samuel   lawhching a, Aizawl ah join ding hi’n kigen hi. Thudang kizadan in NEHU nuaia MA result suak ah Lily Niangngaihmang in Sociology ah 59.7% in pass a;   Jesica P.Guite in Geography ah 60.1% ; Kimbiaksang in Pol. Science ah 57% leh Nianghawmching in Sociology ah 60% in passed chihthu om hi.

Suanmoi Guite in zi neiding

Lamka- Sept-19: Zomi Human Rights Foundation (ZHRF) a Secretary General Suanmoi Guite s/o (late) Gouzachin of Nehru Marg, Lamka leh Miss Thangbiaklian d/o Upa T Thangthiang of Lamphelpat, Imphal hongtung ding Oct 17, 2012 zinglam dak 11:00 in EBC Central Lamka biakinn ah dansiangthou in kigawm ding uh chih thutut kingah hi. Oct 16, 2012 in Lamphelpat,Imphal ah Miss Thangbiaklian khakna om ding hi’n kigen hi.

All India Shooting Competition ah tel ding

Lamka, Sept-19: Chinkhanlal Tonsing s/o T Liankhangin of Pearsonmun in All Manipur Police Shooting Competition a 200m category INSAS rifle/AK rifle/SLR Rifle shooting ah khatna alak ziakin Oct 3-7, 2012 sung Bhubaneshwar a ''13^th All India Shooting Competition'' a tel ding in selection ngah hi. Huai Competition a teldin Manipur apan mi 2 telkhiak hi uh a, Chinkhanlal Tonsing in 200m shooting ah Manipur ai-oh ding hi. Amah tulelin Lamka Police Station ah posting   a, Pangei ah tunung in Shooting Training ding hi’n kigen hi.        

Tuni’n Cabinet meeting om

Imphal, Sept-19: Chief Minister’ Cabinet Secretariat ah tuni sunnung dak 2.00 akipan in Cabinet meeting om a, huai ah Centre in kum khat sungin innkuan khat in subsidised a LPG cylinder 6 tan piak dia a puan banah Manipur state govt in subsidised rate mah in ium 1 sungun LPG cylinder 3 piak beh ding in thupukna bawl uhi. Cabinet meeting ah subsidised rate a LPG cylinder 6 tan Centre in a piak banah public te’n market rate a cylinder 3 lei ding hileh haksatna tuak tamtak om ding chih ziakin state govt in innkuan khat in kum 1 sung in subsidised rate in LPG cylinder 3 tan piak lemsa uh a, Public Distribution System(PDS) leng Manipur ah ahithei tan in bawlhoih(streamline & revamp) ding in thupuk uh chihthu om hi.

BJP in mipite apan support ngen

Imphal, Sept 19: Central BJP in Sept 20, 2012 in India gam pumpi ah dakkal 12 sung Bhrat Bandh a puan uh BJP Manipur Pradesh pawl in leng Manipur mipi kuapeuh in bandh support ding leh a lawhchinna dia kithuahpih ding in ngetna bawl hi. Sh Shantikumar Sharma, President, Manipur Pradesh in tuni’n Nityaipat Chuthek a BJP office ah Media-te kimuhpih in a genna ah thautui leh niteng vanzat poimawh mante a khan thithe ziaka mipi vantang tunga puakgik thupitak UPA govt in a tutsek lungkimlouh latsakna ziaka Bhrat bandh bawl hiding ahihdan gen hi.Hibang thilte ziakin Trinamool Congress in leng UPA govt apan kizukkik in UPA minority suakta chi’n leng Shantikumar in gen hi. CPI Manipur State leh Non-Congress political party tuamtuam in leng bandh support uh hi’n leng BJP Manipur Pradesh President in gen hi.

CM in Power Sub-station hong ding

Imphal, Sept-19: Chief Minister O. Ibobi in Sept. 21, 2012 zinglam dak 9:30 in Kongba ah 132/33-KV Sub-Station hongkhe ding a, tua zawh in Kangla, Sangaiprou, Kakwa leh Sangaipat ah 33/11-KV Sub-Station khat chiat hongkhe ding hi. Huaizawh in Chief Minister in ‘Online building Portal for Imphal East District’ kichi hongkhe ding a, huai hun ah Functional President in Health Minister Phungzathang Tonsing pang ding a,Guest of Honour in Social Welfare Minister A. Mirabai Devi pang ding hi.

Chinese hand-grenade 1 mukhia

Imphal, Sept-19:Uining Sengbam Chaoba (55) of Khagempalli Pankha gate bul ah tuni zingkal baihtak in Chinese hand-grenade khat muhkhiak hi a,Police ah report pah ahihziak in Singjamei Police leh police bomb expert kithuah in lakhia uhi. Uining Sengbam Chaoba bel Secretariat a driver sem hi a, Works Minister-lui K. Ranjit in leng driver a ana zatsek hi’n kigen hi.

District 2 ah vote simna zou uh

Imphal, Sept-19: Phaijang bial district 4 ah Sept 13,2012 a Gram Panchayat election om Sept 17, 2012 in vote sim kipan a,tuni’n Bishnupur leh Thoubal district ah zawhsiang hita hi. Bishnupur district ah Zila Parishad 11, Pradhan 24 leh Panchayat member 219 telna a vote sim zawh hita a,Thoubal district ah leng Zila Parishad 16, Pradhan 41 leh Panchayat member 422 telna dia vote simzawh hita hi.Imphal West ah Wangoi a Zila Parishad adia vote simna kia zawhlouh hi a, tuni nitaka hiaithu bawl tanin vote simna paitou lai hi.Imphal East ah Porompat biala Zila Parishad leh Sawombung biala Panchayat member vote simna zousiang nailou uh a, Sept 20 in Zila Parishad seat 1 leh Pradhan seat 3 a vote sim lai hiding hi.

Chief Minister in IT Park enkhia

Imphal, Sept-19: Chief Minister O. Ibobi in tuni nitaklam in Mantripukhri a IT Park kibawl enkhia a, huai hun ah Manipur Chief Secretary leh Commissioner(Power) te’n CM zui uhi.Huai IT Park bel 27.12 acres alian hi a, phase II akhen in om a, Phase Ina adin SPA fund apan Rs. 1000.00 lakhs sanction hi a, Phase II adin Rs. 2432.16 lakhs sanction in om hi. Bawlzawh hun ah mi 2000 in sepna muh lawh ding uh hi’n kigen hi. Akigendan in main building, transformer leh generator set, gate house + security cabin, septic tank, underground water tank, over heating tank, cover car parking, landscaping, deep tube well etc leng bawl hiding chihthu om hi.

Sekmai Police te’n haltum

Imphal, Sept-19: Sekmai Police ten July 10, 2012 a Pangolin Shells kg 18.9 vel a muhkhiak uh tuni’n Koirengei a Forest Training complex ah haltum uh chihthu om hi.

Sepna regularised ding hi’n gen

Imphal, Sept-19: Manipur a Engineering deptt tuamtuam- PWD, IFCD, PHED,Electricity leh Minor Irrigation deptt a Muster Roll, Casual leh Worked Charged a semte’n service dinmun(condition) leh lawh regular taka muhlouh ziakin haksatna lianpi tuaksek uh a,amaute haksatna Chief Minister kianga tut sek ahih ziakin Chief Minister in sum-le-pai dinmun a hoihdeuh hunhun in phase dan a regularised hiding in gen chi’n Indian Trade Union Congress(INTUC) President in gen hi.

KSO Gen HQ in dakkal 48 sung state-wide bandh zukkik

Teacher Eligibility Test(TET) hun kisuan

Imphal, Sep-18: Kuki Students’ Organization(KSO) General HQ in September 19, 2012 zingsang akipan dakkal 48 sung Manipur state pumpi bandh dingin puang mahle uh tuni sunnung in Education Minister M. Okendro office chamber ah aki houlem theih ziakun state wide bandh ding khawlsak uh hi’n Sasang Vaiphei, General Secretary, KSO Gen HQ in puang hi.

       Tuni a Education Minister leh KSO Gen HQ makaite kihouna a thupukna dungzui in TET forms leng district HQ teng ah DC/ZEO-te tungtawn in hawmkhiak hiding a, TET form hawmkhiak hun sung leh submit hun ding leng suansau hiding chih hi. Huailou in Staff Selection Commission(SSC) saina a examination leh TET exam hun leng a kituah ziakin TET exam hun ding ahun suan hi a, hun lemtang dang bikhiah pah hiding chihthu om hi.

     District HQ teng ah TET exam centre koih ding tungtang ah leng Education Minister in

huai thu ngaih poimawh hiding a genkawm in kumthak a kipan district HQ teng ah TET exam centre koih dinga panlak hiding in gen chihthu om hi. Tu dinmun etin district HQ teng ah TET exam centre kintaka honkhiak ding in technical problems om zek a, hileleng kumthak apan in bel district HQ teng ah TET exam centre honkhiak hiding in kilang chi’n KSO Gen Secretary in gen hi.

     Tuni’n Education Minister makaihna a meeting ah Manipur state Education Consultative Committee a member-te Vungzagin Valte, MLA(Thanlon A/C); M.K Preshow, MLA(Chingai A/C); Nemcha Kipgen, MLA(Kangpokpi A/C); Z. Kikhonbou Newmai, MLA(Tamei A/C); Victor Nonglur, MLA(Chandel A/C); Dr. Alexander Pao, MLA (Karong A/C); Dr, Suresh Babu,IAS, Principal Secretary (Edn-S); Deleep Singh,IAS, Director of Education (S) banah Kuki Students’ Organization (KSO) leh Democratic Students’ Alliance Manipur (DESAM) palaite tel uh a, meeting ah thupukna poimawh point 4 bawl uhi.

                                                                                                                     (UNA Agency)

Chairman/DRDA in training hong ding

Lamka, Sept-18: DRDA/CCpur saina in Sept 19, 2012 zinglam dak 11:00 in Tuibuong a District Training Centre ah MGNREGS 2012-13 tawh kisai in ‘One Day Training Program’ om ding a, Langkhanpau Guite, Chairman, DRDA/CCpur in hong ding hi.Huai ah C. Hangshing, ED/DRDA in training tawh kisai pulak ding hi. Huai hun ah State Institute of Rural Development (SIRD) apan faculty bangzah hiam leh DRDA/CCpur te'n MGNREGS tawh kisai sinsak ding uhi.

Education thu ah meeting om

Lamka, Sept-18: Ms.Jacintha Lazarus, IAS, DC/CCpur makaihna in tuni nitaklam dak 4:00 in DC office a BRGF Resoure Centre ah education tawh kisai review meeting om hi. Huai ah SSA funding tungtawn a nasep tuamtuamte tel in thupoimawh tuamtuam genkhawm uh a, SSA nuaia nasepte lawhchin sem theihna ding a panlakdan ding tuamtuam leng genkhawm uh chihthu om hi.

SSC saina a candidate 3540 om

Lamka, Sept-18: Staff Selection Commission (SSC) in CCpur district ah exam centre a koih nung a amasapen ding in Oct 28, 2012 in Data Entry Operator leh LDC lakna ding in Combined Hr. Secondary Level Examination om ding a, huai ah candidate 3540 om hi’n kigen hi. Candidate 1770 in morning shift ah exzam ding uh a, candidate 1770 mah in evening shift ah exam ding uhi. Tunung sawtlou in exam centre ding puankhiat hiding chihthu om hi.

DC in ED/DRDA lennawn ding

Lamka, Sept-18: Manipur Cabinet meeting thupukna dungzui in Dist teng a Deputy Commissioner teng in ex-officio Executive Director/DRDA len nawn ding in order suak hi. Tulel a ED/DRDA len MCS senior officer tengin DC kiang ah charge pekhe ding in govt in theisak hi. Huai dungzui in C.Hangshing,MCS in leng DC khut ah ED/DRDA charge pekhe ding a, aman Project Director, DRDA/CCpur len ding hi’n kigen hi.

Vangai ah Pulic hearing omding

Lamka, Sept-18: Noida pansan Jubiland Oil & Gas Pvt Ltd te’n CCpur district sung mun tuamtuma ah leinuai apan thautui laihkhiak ding tawh kisai in tumalam apan in block level in public hearing om a, Tipaimukh Block ah zawh hita hi’n kigen hi. DC apan kizadan in Sept 20, 2012 in Vangai ah Public hearing om ding hi.

ED/DRDA in training hong

Lamka, Sept-18: DC office a BRGF Resource Centre ah tuni zinglam dak 11:00 in “One Day training Program on Engineering Design & Estimation under IWMP” kichi om a, C. Hangshing, ED/DRDA in hongkhia hi. Huai ah DRDA nuai a Watershed Development Team te'n sinsak uh a, Integrated Watershed Management Program (IWMP) nuai a Section Officer teng banah Technical Assistant leh Computer Assistant teng tel uhi.

Special Interactive Program om

Lamka, Sept-18: Directorate of Field Publicity, Ministry of Information & Broadcasting, CCpur Unit saina tuni zinglam dak 10:00 in Muolvaiphei Community Hall ah ‘Special Interactive Program on Agriculture’ om hi. Huai hun ah Dr. Ingam Pamei, Directorate of Field Publicity, Meghalaya in uap a, Imphal apan Vivek Khorijam, Field Publicity Officer/Senapati leh Anthony, Field Publicity Officer/Imphal te'n zui uhi. Huai ah Hrila, MDC ban ah Agri deptt/CCpur apan official bangzah hiam leh loubawlmi hunkhop tel uhi.

Suunna

Rev Holkhosei (101) h/o Geilhai of Bijang family lane, tuni zingsang dak 3.00 velin teknat in si a, tuni mah in kivui hi.

G. Pumkhanpau @Paupu (65) s/o (late) Lianzathang of Church Road, New Lamka tuzing baihtakin damlou in si a, YPA Hanmual New Lamka ah kivui hi.

Panchayat election result kim nailou

Imphal, Sept-18; Manipur phaijang bial district 4 ah Sept 13, 2012 a Panchayat election om zan apan vote sim kipan mahleh tuni tan in zawhsiang hinailou a, hileleng zawh nailouh teng Sept 19, 2012 a zawhsiang hita dingin kigen hi. Imphal East district ah tuni tan in Zila Parishad seat 10, Pradhan seat 28 leh Panchayat member 302 a vote sim zawh hita a, Imphal district sung Jiribam sub-divn ateng zan nitak nungin zousiang uhi. Imphal West district ah Zila Parishad seat 9, Pradhan seat 25 leh Panchayat member 222 a vote sim zawh hita a, Bishnupur district ah Zila Parishad seat 6, Pradhan seat 24 leh Panchayat member 214 a vote sim zawh hita hi. Thoubal district ah Zila Parishad seat 14, Pradhan seat 36 leh Panchayat member 412 a vote sim zawh hi a,adangte Sept 19, 2012 in sunzom ding uhi.

Police in UG dan a a kaplup uh

UG ki-surrrender-sa hizaw

Imphal, Sep-18:Imphal East Commando team in Sept 15,2012 nitakin helpawl atel hidan a a kaplup uh PLA atel kum khat leh akim paisa in Maphou Dam area a Assam Rifle post ah ki-surrendered-sa hizaw in kigen hi.Amah Takhellambam Gobin @ Tomba (22) s/o T Dhara of Takhel Mamang Leikai(Imphal west district) hi a, Imphal east Police commando te’n amah taksa tung apan 9mm pistol 1 leh atang 3, Chinese hand grenade 1 leh Honda Activa scooter 1 mukhia uh hi’n kigen hi.

   Tuni’n misi innkuante leh Leikai mipite’n CM kianga memorandum piaksawm in mass rally pai uh a, Sanjenthong ah Imphal east commando pawlin dal uhi. Hileleng MLA, Heingang A/C makaihna in CM kiang ah memorandum pia uhi. Misi innkuante gendan in Sept 15, 2012 nitakin a lawmte laka khat Amom Aken Singh in panchayat candidate khat inn a an ne dingin zonkhiak a, huai nungin Imphal East Commando-te kaplup a om hi’n gen uhi.

PLA Sgt tuni’n Imphal tut in om

Imphal, Sept-18: Meghalaya a East Khasi Hills district sunga Indo-Bangladesh gamgi a Dawli mun ah Sept. 4, 2012 nitak a India honglut sawm BSF ten PLA self-styled Sgt Athokpam Surchandra @ Chaothei @ Ningthou (48) s/o A. Kula of Thongju Part-II Boroi Makhong a matkhiak uh tuni in Guwahati apan Imphal tut in om hi. Amah Meghalaya state govt apan Porompat Police ten a lak uh hi’n kigen hi. Mat ahihlai in a taksatung apan in Mobile handset 1, Simcard 2 leh Rs. 8735 muhkhiak in om hi.

MOBC beneficiaries puankhiak hita

Imphal, Sept-18: MOBC in Economic Development Programme (EDP) nuai ah Poultry, Fishery leh Vegetable farming-2011-12 adia beneficiary a telkhiak uh list puankhiak hita a, Directorate of Minorities, Other Backward Classes and Scheduled Caste office, North AOC, Imphal a notice board ah kitak khia hi. Selection a telkha te’n amau scheme chiat a Officer te kimuhpih ngai ding hi’n kigen hi. Huai hun ah original form receipt copy tawi ngai ding a, Oct. 1, 2012 tan in hihfel ngai ding hi.

Mizoram Parliamentary Secretary damlou in si

Aizawl,Sept-18: Mizoram a Parliamentary Secretary(Education) Chawngtinthanga in blood cancer ziakin Kolkata a Appollo Hospital a etkol om damzoulou in zanhal zinglam dak 8.45 velin si a, aluang zan in Aizawl puaktung in om hi. Tuni’n Electric Veng, Aizawl a YMA Hall ah zinglam dak 11.00 akipan in official a sunna function om a,Mizoram state govt in zahna thupitak pia in vui uhi. Tuni a suunna hun ah Chief Minister Lal Thanhawla, Minister-tamzawte leh MLA-te banah official leh mipi tamtak tel uhi.

       Mizoram a School Education, Law & Judicial department in zan nitak a thupuan a bawl dungzui un state pumpi ah zan leh tuni in Chawngtinthanga suunna in India flag akimkhat a khai hi a, govt office leh school teng kikhak vek hi. Ni 2 sung suunna hun zat sungin nopbawlna(entertainment) himhim omlou a, govt office teng ah India puanlap a kimkhat a khai ahi hi.

Minister 4te portfolio khen hilou ding

New Delhi, Sept-18: Prime Minister Dr Manmohan Singh makaihna Union Cabinet lepthakna(reshuffle) om phut thei gige ding hi’n kigen a, hileleng Home Minister Sushil Kumar Shinde, Finance Minister P. Chidambaram, Defence Minister AK Antony leh External Affairs Minister SM Krishna tanvou bel khen hilou ding hi’n kigen a, himahleh Minister khenkhat a tanvou uh khen om ding in kigen a,kum 2014 a Parliament election ding ziakin Minister hilai khenkhat Congress party a mawhpuakna letsak ahih kei ua leleng state politics adia sawlkhiak himaithei uh chihthu om hi.

   Power Minister Sushil Kumar Shinde in Home a letnung in Law Minister Veerappa Moily in Power a let beh banah Overseas India Affairs len Vayalar Ravi in Vilasrao Deshmukh sih zisakin Science & Technology let behlap a,Human Resources Minister Kapil Sibal in A. Raja kitawp nungin Telecom-Communication let behlap a, hibanga additional portfolio len Minister khenkhat a tanvou uh Prime Minister in khenkhiak zek lunglut hi’n kigen hi. Congress in govt a bawlna state khenkhat a Chief Minister-te khenkhiak om ding in gintakthu kigen a,CM khenkhat Union Cabinet a laklut ahih kei ua leleng AICC ah dinmun poimawhtak letsak ahih uh gintak ahi hi.

ALL INDIA RADIO CHURACHANDPUR

Wednesday : 19/9/2012(FM- 101.4 Megahertz)

5.30pm            :Paite Programme

                        1) Luaingaihnem (Mod)

                        2) Muan Hangzo (Mod)

6.00pm            :Hmar Programme

                        1) Lalzarlien Zoute (Mod)

                        2) Thanglienzo (Mod)

6.30pm            :Thadou Programme

                        1) Lhaineng & Pty (Trad)

                        2) Talk: “ Quality Education by Sonkhosei

7.00pm            :Farm & Home Programme- Thadou

                        1) Esther Sitlhou (Dev)

                        2) Talk: “Kuki Thai” by Lalkhothang

                        3) Science Magazine (L): Presented by Lamneichong Haokop

7.30pm            :Regional news in Manipuri

8.00pm            :Minor Dialect: Kabui

                        Athumeilu & Pty (Folk)

9.00pm           :News at nine.