ADC/CCpur leh District Administration panlakna in Mary Kom vaidonna leh amah adia thumsakna om
Lamka, Aug-27:World Women Boxing champion hihna 5vei la banah London ah July 27-Aug 12,2012 sung Olympic Games a numei boxing(kg 51-category) kidemna ah India adia Medal la masapen CCpur district mi MC Mary Kom vaidawnna leh a lawhchinna ziaka Pathian’ tunga kipahthu genna (Home Coming Reception-cum-Thanksgiving Ceremony) zan sunnung dak 1.00 in Lamka Public 
Ground ah Autonomous Dist Council(ADC)/CCpur leh District Administration saina in programme thupitakin zat hi a, Rt Rev Dr Ginkhanmung Zou,Bishop in Mary Kom adia vualzawlna ngetna in thumsak hi. Huai ah Phungzathang Tonsing, Minister(Health & FW); TN Haokip Ex-Minister, Chaltonlien Amo, Chairman,Hill Areas Committee; Ginsuanhau, MLA; Vungzagin Valte, MLA; DIG, SBF/STC; Commander,27-Sector Assam Rifles leh SP/CCpur in leng huai hun uap uh a, thugenna saulou nei in kipahpihna thilpiak tuamtuam leng pia uhi. ADC/CCpur a EM leh MDC teng banah District Level Officer teng leng kimphial uh a, MC Mary Kom a pasal Onler Kom in a kithuahpih banah a nu-leh-pa in leng hongzui uhi.
Mary Kom in Lamka Public Ground dimlet phiala mipi kikhawmte ma a a genna ah a pasal in a makaihna ziakin tu a a dinmun tan tungthei hi’n gen a, a lawhchinna a pasal ziak ahi chi’n atungah kipahthu gen hi. Aman a genzelna ah, “Non thumpihna ziak ua hitan tungthei ka hihman in ka kipak mahmah” chikawm in London Olympic Games a bronze medal a lak mipi’ muh dingin liktou hi. CCpur dist. adiakin Lamka leh a sehvel a electric meivak ginatlouh poisak thu gen in, huai dia panlak deihthu gen hi. Programme zatlai a thauging husa a theih in dip hawmsak mahmah hi’n gen a, muanna leh lemna omna dia panla din mipite ngen hi. Aman Lamka ah leng Boxing zilna ding mun om chih a theih in kipak mahmah ahihdan gen hi.
Mary Kom leh amah zuite zan sun dak 12.00 in Kangvai ah CCpur District Sports Assn(CDSA) leh CCpur District Students’ Union(CDSU) makaihna in mipi tamtakin ana vaidawn uh a, pakkhi leh lukhu kilawmtak khuksak in om hi. Langkhanpau Guite, Chairman/ADC in Mary Kom’ lutung a khutnga in thumsak a, huaizawh in in Lamka lam zuan uhi. Lamka tunma in leng khawteng phial ah vaidonna om hi. Public Ground lutna ding main Gate ah Hiangtam Lamka hausa Thangkhosuanmung makaihna in vaidonna leh gun salute kithuah om hi.Huchi’n Rayburn College NCC sr division te’n tutna tunga tusak in zawng uh a, IRB Band party in music tawh kithuah in Lamka Public Ground tunpih uhi.
Rev D. Jangkholam in thumna in hun hong a, huaizawh in DC/CCpur in vaidonna thu gen in Mary Kom vaidawnna huna paikhawmte tungah kipahthu gen hi. Huchi’n pakkhi ohsak hi a, huaizawh in Rt Rev Dr Ginkhanmung Zou, Bishop in kipahthu genna leh vualzawlna ngetsakna thumna hun zang hi. VIP leh mi poimawh tuamtuam in thugenna saulou a neihzawh un pawl tuamtuam tamtak apan deihsakna leh kipahpihna thilpiak tuamtuam in zui hi.Huai ah ADC/CCpur in sialtal(mithun) liantak khat Mary Kom pia uh a,ADC-te mah in Tuibuong area ah km. 3 asau Ring Road a bawl uh “Mary Kom Ring Road” chih a minvuah uh Phungzathang Tonsing, Minister(Health & FW) in Mary Kom’ pekhia hi. Programme zat hunsung in nam tuamtuam apan cultural dance lahna a om banah lasiam hunkhop in siamtak in lasa uhi. Programme zawhsiang ahih tawh kiton in Langkhanpau Guite, Chairman, ADC in vote of thanks a gen a, huchi’n Rev Lalrosiem Songate in thumna in hunkhak hi.
Zan a Mary Kom vaihawmna hun ah saptuam pawl tuamtuam apan makaite,public leader-te, tribe leader-te,philanthropic organisation tuamtuam,hausa(village chiefs)te, students makaite, cultural troupe tuamtuam, lasiam hunkhop leh mipi tamtak paikhawm uhi.
Health Minister in Dist. Hosital enkhia
Lamka, Aug-27: Phungzathang Tonsing, Minister(Health & FW, GAD, CADA ) in tuni sunnugin District Hospital omdan enkhe kawmin vapha a, staff-te meeting neihpih hi. Huai ah Dr. N. Paulginthang, Medl Suptd/Dist. Hospital; Dr. V.C. Pau, DFWO; doctor leh nurse-te banah staff-te tel uhi. Medical Suptd. in Dist. Hospital adia poimawh tuamtuamte gelhthawh in Minister pia hi. Gas pipeline telin OT ading van tungkhin mahleh thuah theihlouh in omlai a, Hospital a 2nd storey building kibawl mial mahmah a, zat hun ah nawngkai thei ding hi’n taklang a, Ward kibawl thak leng maternity ward dia pe dingin Minister ngen hi. Minister in a genna ah Moreh, Kangpokpi, Jiribam leh Lamka a Dist. hospital puahphat a lunglut thu gen a, hospital staff-te’n damloute itna tawh kuhkal taka nasem ding in hasuan hi. Buaina leh haksatna om hun ah Police-te maphutu hi uh a, huai thuaptu Medical a semte ahihman in a nasepna poimawh petmah hi’n gen hi.
Huaima zinglam dak 11.00 in Health Minister New Lamka a atenna inn “Salem House” ah khua/veng chih a Congress Unit makaite kiangah kum 2012-13 a IAY beneficiaries 99 te ading pekhia hi. Aman a genna ah IAY beneficiaries-te lakah poimawh diak om a, huai dugnzui in Congress Unit makaite’n selection a bawlte uh a tamtuam leh atawm tuam chih omlou in kibangvek in mi 1 tung ah Rs 10,000/- chiat hawmkhe ding in theisak hi. Tuni’n misi omziak ban ah ED/DRDA tenna inn a bomb puak ziakin awla sum hawmkhe dingin Unit makaite theisak hi.
Bike 2 kiphutkhak ziakin mi 1 si, 5 liam)
Lamka, Aug-27:Tedim Road a Molnom khawsung lampi hoihna laitak Waiting shed kong ah tuni nitaklam dak 4:30 vel in Pulsar-220 (No. MN-02A/4292) leh Yahama FZS (No. MN 02A/5972) kiphutuah kha a, mi 5 liam uhi. Aliamte District Hospital tunpih nungin Mangminlien Lhungdim(23) s/o Jamkhothang Lhungdim of Dampi damzoulou in si hi. Aliamte lakah Paumuanlal Changsan (25) s/o Thiankholun of Dampi leh Goulian (19) s/o Vummang of Dampi village a liamna uh serious ziakin Imphal ah referred hi uh a, Henkholian (30) s/o (late) Jampao of Misao Lhahvom, Lamkhopau (28) s/o Lalkhojang of Misao Lhahvom leh Jangkholun (24) s/o Letthang of Misao Lhahvom tu’n Dist Hospital a etkol hi uhi. Gari 2te naksiat mahmah a, Police Station ah koih uh hi’n Police apan kiza hi. Thiltung zakphet in Hiangtam Lamka a om S.Kamsuanlun, EM, ADC/CCpur in puandum in siluang tuam chihthu om hi.
Police duty lai in a kapkhak damzoulou in si
Lamka, Aug-27:Lamka Public Ground ah zan sunnung a MC Mary Kom vaidawnna programme zat lai in Lamka Public Ground khangzek a duty a om Police(constable No. 064022) T.Nangkhanson(30) s/o T.Tuanggin of Mualveng, Hiangtam Lamka in nitaklam dak 3.00 velin a tawilai AK-47 rifles khahsuah in huai apan thautang leng in fencing kha a, huai zuankik lam in T.Dongzapau(67) s/o (late) Ngulkhothang of Mualveng, Hiangtam Lamka lampi a pailai adip kapkha hi’n kigen hi. Amah kintak in Hospital tut himahleh aliamna a serious ziakin doctor te'n Imphal ah refered uh a, hileleng tungmanlou in Bishnupur lak ah si hi'n kigen hi.
Thiltung tawh kisai in tuni sunnung dak 4:00 velin Chairman ADC/CCpur & EM/ADC bangzahhiam makaih in Police deptt leh khutkhial lamte pupa ngeina dan in misi innkuante laka lut in vok gou uh a, siluang puandum atuam in Rs.3 lakh piak din kihoulem thei uh hi’n kigen hi. Siluang tuni’n RIMS ah postmortem bawl hi a, nitak khawmial tungin Lamka puaktung hi a, Aug 28, 2012 in Lamka hanmual ah kivui ding hi. Police in zan a thiltung ziakin FIR No.88(8) 2012 CCP-PS U/S 307/326 IPC & 27 Arms Act registered uhi. T.Dongzapau ahihleh Electricity deptt a Section Officer(retd) hi’n kigen hi.
Pawl tuamtuam 3 in Bandh puang
Lamka, Aug-27:H. Chinkhokam @ C.Hangshing,Addl DC/CCpur & Executive Director/DRDA tenna inn compound ah Aug 25, 2012 nitak dak 7.30 velin meltheihlouh pawlin bomb a paihlut uh puakzak in a naupa H. Nengkhanpau(53) leh a tunu Baby Thiankim(1 yr) liam hi. Hiamgamtaka gamtangte mawhpaihna leh govt in vau a om Officer-te bitna dinga security kiching piak ding phutna in Zomi Students’ Federation(ZSF), Kuki Students Orgn(KSO)/CCpur leh CCpur Dist Students’ Union(CDSU) in Aug 28,2012(Sepnawnni) zingsang dak 5.00 akipan nitaklam dak 4.00 tan CCpur district ah ‘Total bandh’ puang uhi.
Chairman,ADC in suti puang
Lamka, Aug-27: Olympic Games,2012 a Medal la MC Mary Kom vaidawnna dinga kisakkholhna nasepna ah Autonomous Dist Council/CCpur nuaia semte leh office staff-te’n na hahtaka a sep ban uah lawhchingtaka programme zat zawh ahih kipahhuai sak ziakin Langkhanpau Guite, Chairman, ADC/CCpur in tuni’n suti puang a,huaiziakin tuni’n Tuibuang a ADC office leh ADC nuai maha om Town office kikhak hi.
SP in a suspend banah Jail tun
Lamka, Aug-27: Police constable(No. 064022) T.Nangkhanson (30) s/o T.Tuanggin of Mualveng,Hiangtam Lamka in zan nitaklam dak 3:00 velin a tawilai AK 47 khahsuah in huai apan thautang leng lampi a pailai T.Dongzapau(67) s/o (late) Ngulkhothang of Mualveng, Hiangtam Lamka a kapkhak damzoulou in si a, huai tawh kisai in SP/CCpur in zan nitak in suspension order suah hi. Police te’n tuni’n CJM court ah T.Nangkhason pawkhia uh a, CJM in Jail a om dia thutan khumziak in Police te’n Jail ah koih uh a, FIR No.88(8) 2012 CCP-PS U/S 307/326 IPC & 27 Arms Act leng registered uhi.
DC office ah meeting om ding
Lamka, Aug-27: DC/CCpur makaihna in Aug 29, 2012 sun dak 12:00 in DC office chamber ah Education deptt a SSA tawh kisai in meeting om ding hi. Huai ah CMO/CCpur leng leng telding a, NRHM nuai ah student-te adia Health Card kibawl tungtang leng genkhawm ding uh chihthu om hi.
Naupang 1 well ah kelum
Lamka, Aug-27: Ngathal khua a pateh(mushroom) bawlna a well (pukhri) sung ah zan sun dak 12.00 velin naupang khenkhat kisilte laka tel H.Khamthianmuan (13) s/o H.Langkhanmang tui ah kia a, YMA Ngalthal te'n a theih phet un panla in dakkal 2 val a buaipih nungun pukhri sung apan sisa in lakhia uh chihthu om hi. Khamthianmuan bel tulelin Blue Star Academy ah Class VIII simlel hi'n kigen a, tuni'n in YPA New Lamka hanmual ah kivui hi. Khamthianmuan ahihleh Shillong EBCC Pastor Rev V Thangkhangin sanggamnu ta ahi.
District Police te’n suizui lai uh
Lamka, Aug-27:Chapel lane,Hiangtam Lamka a om H. Chinkhokam @ C. Hangshing inn ah Aug 25, 2012 nitak dak 7:30 vela meltheihlouh pasal 2 in bomb a paih uh puakzak ziaka mi 2 liam banah Gypsy gari 1 segawp a, huai tungtang District Police te’n thil omdan suizui lai uh a, KNLF pawlte hidin gintakthu gen uhi. Huai thiltung tawh kisai in Police te’n FIR No.86(8) 2012 CCP-PS U/S 400/307/326/427 /34 IPC & 3 of Explosive substance Act registered uhi.
Jeep accident ziakin mi 5 liam
Lamka, Aug-27:Songpi khawkiang a Ngakik ah zan in Jeep(No. MNS/9742) a hawhte a kiknawn lam uh nitaklam dak 2.00 velin Pearsonmun khawsak a Taona mual khang lamsukna munah Jeep brake fail ziakin accident in lamkhang ah kia a, mi 5 liam uh chihthu om hi. Aliamte Daniel Lunkhohao(16) s/o Thenkhongam of B. Phaicham, Suonginmang(15) s/o Jamngam of Lungil, Ngamminthang (17) s/o Doungam of Lungil, Thangginlun(17) s/o Ginmang of Lungil leh Jamkhohao(16) s/o Lunpau of Lungil hi un kigen hi. Thudang kizadan in tuni zinglam dak 10.00 velin B. Aijalon ah Bike a tuangte’ sik(iron bar) puak in lampi a pailai Vaknu(53) w/o ST Liana hetkha in khawphawklou in kipuk a, dist. hospital ah etkolin om hi.
Joint Condemnation puang
Lamka, Aug-27: Paite Tribe Council Gen HQ,Young Paite Assn Gen HQ leh Siamsinpawlpi Gen HQ in H. Chinkhokam @ C. Hangshing, ED/DRDA & Addl DC/CCpur tenna inn ah Aug 25, 2012 a bomb kipai puakzak ziaka mi 2 liam tungtang leh T. Dongzapau s/o(late)
T. Ngulkhothang of Mualveng,Hiangtam Lamka zan in Police constable 1 in a kapkhak ziaka si tawh kisai in poisakthu puangkawm in huchibang thilhihte mawhpaihthu puang uhi. Officer 1 in KNLF/MPLA apan vauna muh banah a tenna inn konga gate kiang ah tuma lama bomb kikoih muhkhiak nunga leng govt leh thuneitute’n a nelhsiah uh theihsiamlouh thu lengpuang uhi. T. Dongzapau sihna tawh kisai ah leng Police lakah displine taksapna thupitak om ahihdan haihvuallouh in taklat a om hi’n thusuak in gen hi.Huaiziakin govt in tununga hibang thil tun nawnlouhna dinga panla dinga theisak kawm in govt in a kituahpih bang action la ding in leng theisak uhi.
Suunna:
Muandinglian(4)s/o Ginsuanlal of Kanaan veng, New Lamka tuni zinglam in damlouhna ziakin si a,tuni mah in kivui hi. Amah tulel in Rayburn High School a Class B sinlel hi’n kigen hi.
Chinkhenpau (22) s/o (late) Nengkhokam of Mimbung, Mizoram zanhal nitak dak 7.00 velin Chennai khawpi a sepna staff quarter uh Vaddapallini mun ah damlou in si a, zan in Kilpauk Medical College & Hospital a Postmortem bawl nungin Chennai khawpi ah kivui chihthu om hi.
Karnataka a kiknawn dingin chial
Imphal, Aug-27: Karnataka Deputy Chief Minister banah Home Minister R. Ashoka in North-east region pha dia hongzin ni 2 om dingin zan in Assam apan Imphal hongtung a, Lalrokhuma Pachuau,IPS, Director General of Police,Karnataka in hongzui hi. R. Ashoka in CM Secretariat ah Manipur Chief Minister O. Ibobi leh Home Minister Gaikhangam mu a, huai ah Manipur Chief Secretary DS Poonia,IAS leh Manipur DGP Y. Joykumar ,IPS leng tel uhi.
Karnataka Dy CM in Manipur mi Karnataka a om tuma a Manipur a paikik teng Karnataka a kiknawn dingin chial a, huia dingin Sept 1, 2012 in Guwahati apan Bangalore a special train pai ding hi’n leng gen hi. Sepna neite leh laizil(student)te patauhna ding bangmah omlou in venbit hiding un leng gen a, sepna neite leng a sepna mah uh zomkikl chiat thei ding hi’n gen hi.Aman a gendan in Bangalore khawpi kia ah leng Police 17,000 a duty banah Karnataka state Reserve Police lel leng platoon 25 zat hi uh a,CRPF leh Rapid Action Force company 3 tuak leng duty uh chi’n gen hi. North-east mite vaulau dinga zuahthu thehdalh mi 22 matkhiak hi’n leng gen hi.
Jiribam ah ‘kawkek’ buaipih uh
Imphal, Aug-27: Imphal east district sunga Jiribam sub-divn ah kha tamlou paisa akipan in ganhing(lizard) chikhat thankik tawh kibang ‘kawkek (tokay geckos)’ kichi sum muhna hoihtak ahi chi’n hotel,dukan leh inn tamtak ah houlimna in zang uhi.Kawkek khat gram 200/300 tana gik, inches 10 apan 12 tana apum sau mankhate’n sum a lakh a sim in zuakthei uh chih akigen ziakin mi tamtak in kawkek mat sawm in gamlak ah giak hialin zong uh a, Jiribam bial kia hilou in Tamenglong bial leh Assam state sung tanpha ah a zong a kuan pawl om hi’n kigen hi.
MU nuai a BBA result suak
Imphal, Aug-27:Manipur University(MU) nuai ah July 2012 in Bachelor of Business Administration (BBA) 6th leh 2nd semester examination 2012 om tuni’n a result suak hi. 6th Semesters a candidate 36 lakah 26 pass uh a, pass zah 72.2% tung hi. Candidate-te laka pasal 26 lakah 16 pass uh a, numei 12 lakah 10 in pass uhi. 2nd semesters ah candidate 97 lakah 48 in pass ua, pass zah 49.5% tung hi. Pasal 51 lakah 23 pass uh a, numei 46 lakah 25 passed uhi.
28-Assam Rifles te’n Awareness nei
Imphal, Aug-27 : Kakching a om 28-Assam Rifles te’n tuni’n “Awareness with Compassion” chih thupi a nei in Kakching ah seminar nei uhi. Major General UK Gurung, YSM, IG/AR (South) in huai hun uap a, Assam Rifles a sem Medical officer/doctor hunkhoptak leng huai hun ah tel uh a, mun tuamtuam akipan in student leh mipi tamtak leng tel uhi. Awarness tungtang kisinsakna hun ah a tangpi in HIV/AIDS apan kivendan ding leh AIDS ziaka damloute kep leh etkoldan ding sinsakna leng om hi’n kigen hi.
SI/Jamedar lakna ding viva voce
Imphal, Aug-27: Manipur police deptt nuai a Sub-Inspector leh Jamedar lakna dingin tuma lama written test om tuni’n a result suak a, huai lawhching candidate-te ading in ading in
Sept. 3-11, 2012 sung in 1st M/R Banquet Hall ah viva voce/interview om ding hi. Sept. 3 in Sl. No. 1-100 te’ adin viva voce/interview om ding a, abanban in pai ding hi. Huchi’n Sept. 11 in Sl No. 400 apan atunglamte leh amau’ hun a telkhaloute adin viva voce/interview om ding hi. Written test a lawhching candidate-te zinglam dak 8:00 in ki-report masak ngai hi. Session masa zinglam dak 9:30 apan in sunnung dak 1:30 tan hiding a, session nihna sunnung dak 2:00-5:00 kikal in om ding hi.
Regional Director(DFP) thak in len
Imphal, Aug-27: Dr Engam Panme,IIS in India govt nuaia Ministry of Information & Broadcasting ah kum bangzahhiam sung Regional Director(Directorate of Field Publicity) len in Meghalaya,Mizoram leh Tripura region enkol a, tuma deuhin Regional Director(Directorate of Field Publicity) Nagaland & Manipur region len din kisuan hi.Dr Engam Panme bel kum 1004 batch Indian Information Service(IIS) hi a, Ministry of Information & Broadcasting nuai a All India Radio(AIR), Doordarshan Kendra(DDK) leh Press Information Service(PIB) ah dinmun tuamtuam lenkha hi.
Govt in Kothajit leng sum pia
Imphal, Aug-27: Olympic Games, 2012 omlai a Indian Hokcey team a tel Manipur mi Kh. Kothajit tuni’n Chief Minister O. Ibobi in ama office(CM Secretariat) ah kipahpihna latsakna in Rs. 20 lakhs pia hi.CM in tuma a kipahman piakna hun ah Kothajit sap ahih khaklouh poisakthu gen a,London Olympic Games ah Indian Hockey team adia a qualified ziakin amah leng Olympian status piak ngai ahihdan genchian hi.
.