Core Committee in guta 1 mankhia
Lamka, Sept 20: Zenhang Lamka huamsung a om pawl tuamtuam kibawlkhia Core Committee te’n tuzing dak 5:00 vel in guta 1 Mr Mangminlian Taitom (27) s/o (late) Lunkhokam of Tongpu Veng, Phailian mankhia uh a, amah apan in aluminium kuang, ketli, antang kg 5 leh singpek mukhia uhi. Mangminlian Taitom ahihleh RP leh No.4 addict hi’n kigen a, mukhiak a om vante tuni apan ni 3 sung a van neitute'n va kan theih ding a, huai nung in bel kuaman bangmah gen thei nawnlou ding uh hi’n Zenhang Lamka Youth Club apan thutut kingah hi.
Passenger gari-te atai omlou
Lamka, Sept 20: BJP makaihna NDA pawlin tuni zingsang dak 6.00 akipan nitaklam dak 6.00 tan Bharat Bandh a puan uh BJP Manipur Pradesh leh BJP CCpur dist in full support puang uhi. Total bandh ziak in Imphal leh Lamka kikal a passenger pua gari taituah omlou a, gari neu te bel angeina bang in khawpi sung ah taituah a, hindan ngeina leng hihbuailou hi.
Tuima khua ah Health Camp
Lamka, Sept 20: District Health Society/CCpur saina in Sept 24, 2012 in Singngat PHC nuai a Tuima khua ah Mobile Medical Camp leh Reproductive Child Health (RCH) Camp om ding hi. Huai camp ah Dr. F.Thienkhogin, Dist.Leprosy Officer, makaih in Dr. David Gangte, MO, Saikot PHC; Dr. Mellory, MO i/c, Behiang PHC; Dr. Lalremruoti Colney, MO i/c, Singngat PHC; Dr. Meethoibisana, MO Ayush, Saikot PHC ban ah Singngat PHC apan Vunglalven, GNM leh Niangngaihman, ANM te'n kithuahpih ding uh a, Chiinngaihhau, Lab Technician, DMMU leh K. Vungthiansiam, X-Ray Technician, DMMU te'n leng zui ding uhi. District Family Welfare staff te'n a kul leh poimawh bang in naupangte natna dalna tuamtuam in kap ding uhi. Medical camp a kuan dingte Sept 24, 2012 zingkal dak 6:00 in CMO office apan kipakhia in Tuima khua zuan in zinkhe ding uhi.
Youth Leadership Seminar
Lamka, Sept 20: Evangelical Youth Fellowship, ECA leh Hope Baptist Fellowship Church, Bangalore saina in Sept 27-30, 2012 sung Kholmun ECA biakinn ah "Challange of Youth" chih thupi a zang in Youth Leadership Seminar - 2012 om ding hi. Seminar hun sung Uncle Victor Sitther, Bangalore; Rev. Sekar, Bangalore, Rev. Obed Haokip, Bangalore, Rev. Thangkholal Haokip, Guwahati leh Hemkhomag Haokip te’n thupi tuamtuam pansan in sinsak ding uhi. Huai seminar ahihleh Sept 27, 2012 nitak dak 6:00 in Pastor Chungkhojam, Area Pastor, Koite Lui Pastor Area in hongkhe ding hi.
Seminar on Climate change
Lamka, Sept 20: EFICOR Delhi, SPTWD, Manipur Branch leh Evangelical Churches Association (ECA) pangkhawm in Sep 27, 2012 zingkal dak 7:00 apan nitaklam dak 4:00 sung ECA Tuibuong ah ‘One Day Seminar on Awareness Program on Issue of Climate Change, Christian Perspective’ kichi om ding hi. Huai hun ah Mang Doungel, Co-Ordinator, Centre for Policy Studies & Advocacy, EFICOR leh Lun Haokip, Program Co-ordinator, STPWD, Manipur Branch te’n sinsak ding uh a, huai ah Area Youth leaders, Church leaders leh Missions workers te telding uhi.
DC in inspection bawl kawmding
Lamka, Sept 20: Noida pansan Jubiland Oil & Gas Pvt Ltd te’n CCpur district sung mun tuamtuma ah leinuai apan thautui laihkhiak ding tawh kisai tuni’n Vangai ah pulic hearing om a, Ms Jacintha Lazarus, IAS DC/CCpur huai hun ah tel hi. DC/CCpur in Vangai area a PHC leh school tuamtuam inspection bawl kawm ding hi’n kigen hi. Huaiban ah Sept 24, 2012 in DC/CCpur in Guite kual pha ding a, BADP 2009-10 fund a kilei Ambulance gari Sinzawl PHC ading in pekhe ding hi’n kigen hi.
Army 1 damlou in si
Lamka, Sept 20: Henglep Post a om 46-Assam Rifles a semlel Dalip Singh s/o Gopal Singh of Uttarakhand state apaisa Sept 17, 2012 zinglam dak 11:30 vel in alawmte tawh patrolling pailai kipuk damzoulou in si hi. Army te'n siluang RIMS ah portmortem bawl in akhua uah sungkuan te kiang ah pua uh hi’n kigen a, Henglep Police te'n Unnatural Death (UD) Case No. 4/2012 HLP-PS U/S 174 Cr PC registered uhi.
Army te’n camp apan taikhia mi 4 man
Lamka, Sept 20: Police thusuak kingah dan in Chongkhozou designated camp a omlel KNO/KNF (Zogam) cadre mi 4 apaisa Sept 15,2012 in camp apan galvan tuamtuam AK 56-rifles 2, magazine 3, atang 40, M-16 Rifles 2, magazine 3, atang 48 ban ah lethod thau(gun) 1, atang 2 tawh taikhia uhi. 46-Assam Rifles te'n Sept 17, 2012 sunnung dak 2:30 vel in Bualmual leh Hengmol khua kikal ah mi 4 teng mankhia in Imphal Police te khut ah pekhia uh a, Imphal Police te' khut apan CCpur Police te'n case lasawn in zan in CJM court ah dingsak uhi. Mi 4 te lak ah Jangminlun Khongsai @ Jony (19) s/o Chungkhai Khongsai of Songpeh, Lalcha Misao (24) s/o Songkhosat of Motbung leh Suanminlal Khongsai (19) s/o Nangkhanthang of Ngoiphai te Sept 25, 2012 tan Police custody ah omding in phalsak a, himahleh Khamlunhao Tungdim @ Lulun (15) s/o Donglamthang of Mualtam ahihleh kumching(under age) ziakin Shan Veng , Rengkai a Observation Home (Juvenile) ah etkawl in omlel hi'n Police thusuak kingah hi. Chongkhozou designated camp a apan taikhia mi 4 te' tung ah Police te'n FIR No. 96 (9) 2012 CCP-PS U/S 400 IPC & 25(1-C) A.Act registered uhi.
Mission Kumsim Khawmpi 6veina
Lamka, Sept 20: EBC Lamka South Division Mission Kumsim Khawmpi 6veina Sept 21-23, 2012 sung EBCC Vengnuam, New Lamka ah om ding hi. Sept 21,2012 nitak in Rev N.Thawndoulian, DS/Lamka South Divn in khawmpi hongkhe ding a, khawmpi sung in Rev. L.Kham Kho Lun, Gen.Secy, EBC; Rev.Paukhanmang Guite, Director of Institutes, EBC; Rev.S.Vungminthang, Director of Missions, EBC leh Rev.K.Kamchinkhup, Director of Ministries, EBC te'n thugen ding uhi. Sep 22,2012 sunnung dak 1:00 apan in Vaihawmna Hun omding a, Sept 23,2012 nitak kikhop zawh in khawmpi bei ding hi.
Biakinn thak hon hiding
Jamsuan Road, New Lamka a EBCC College Veng biakinn thak Sept 21, 2012 sunnung dak 1:00 in Rev L.Kham Kho Lun, Gen Secy EBC in honna leh Pathian kiang ah latna neiding hi. Huai hun ah N.Thawndoulian, DS Lamka South in Pathian thu gending a, EBCC College Veng leh EBCC Hebron te apan lapawl ngaihkhiakna omding hi.