Bandh sungin buaina omlou
Lamka, Aug-27: C.Hangshing, Addl DC/CCpur & ED/DRDA inn compound ah Aug 25, 2012 nitakin meltheihlouh pawlin bomb a paihlut uh puakzak in a naupa leh a tunu liam a, hiamgam taka gamtangte mawhpaihna leh govt in Officer-te security kiching a piak ding phutna in ZSF, KSO leh CDSU in tuni zingsang dak 5.00 akipan nitaklam dak 4.00 tan CCpur district ah ‘Total bandh’ puang uhi. Bandh sungin buaina bangmah omlkei mahleh advance a puankholh ahihlouh ziakin mi tamtak adingin nawngkaina lianpi tun hi. Bandh sung in ZSF, KSO leh CDSU makaite’ mah volunteer in pang uh a, huaiziakin hun paisa a bandh tawh kibanglou in mipi ading azia om mahmah in kilang hi.
Police te’n Jail ah koih
Lamka, Aug-28: Khupzalal Singson(35)s/o Lamkhothang of Patjang village apaisa Aug 21, 2012 in 5/9-Gorkha Rifles leh 46-Assam Rifles kigawm te’n Rengkai Road a hotel khat apan mankhia in amah apan .32 pistol 1 leh magazine 1 mukhia in Imphal Police ah pekhia uhi. CCpur Police te’n a case lasawn in zan in CJM court ah dingsak uh a, CJM thupiak dungzui in Police in Jail ah koih uh a, FIR No.85(8)2012 CCP-PS U/S 25(1-A.A)A.Act registered uhi.
Culvert mun ah gari taisuak thei
Lamka, Aug-28:CCpur Govt College kong laka Tipaimukh road-IB road junction a Tipaimukh roah lampang ah 80-RCC BRTF te'n culvert a bawl uh a zawh nungun tui buakkot zelin ni tamkuamtak koih uhi. Gari paisuak theihlouhna dingin culvert leh lamlian kal lei vukdimlou a a koihna mun uah tuni’n lei vukdim in atung ah suanghum sung uh a, Aug 29, 2012 akipan Culvert kibawlna tung Tipaimukh Road ah gari taisuak theita ding hi’n kigen hi.
Mawhpaihna thupuan bawl
Lamka, Aug-28:Lower Chapellane a om C. Hangshing, Executive Director/DRDA tenna inn huangsung ah Aug 25, 2012 nitak a bomb pailutte pawl tuamtuam in mawhpaihthu puang uhi. Zomi Youth Association(ZYA) Gen HQ, Tribe Council(PTC) Gen HQ; Young Paite Association(YPA) Gen HQ leh YPA Lamka Block; SSPP Gen HQ; Mizo Peoples Convention(MPC) Manipur ; District Congress Committee(I)/CCpur banah pawl tuamtuam in leng mawhpaihna thupuan bawl uhi.
Free Medical Assessment Camp
Lamka Aug-28: State Mission Authority,Manipur saina in Sept 3,2012 in Synod Hall ah pianken a mi bangloute adin‘One Day Free Medical Assessment Camp’om ding hi. Singngat Community Hall ah Aug 4,2012 in om ding a,huai ah Imphal apan Specialist doctor te’n naupang kum 4-8 kikal mite en ding uh chihthu om hi.
Thanlon A/C ading SK Oil
Lamka, Aug-28: Thanlon A/C a MLA’nominee Goulal in zan in July 2012 quota SK lakhia in Lamka apan Thanlon khua ah pawtung a, tuni apan ni 10 sung PDS agent-te lakah hawmkhe ding a, agent te’n mipi lakah hawmkhe ding uh hi’n kigen hi.
Tuni’n Cabinet meeting om
Imphal, Aug-28:CM Cabinet Secretariat ah tuni nitaklam dak 4:00 akipan Cabinet meeting om hi. Huai ah Chingmeirong a High Court complex ah VVIP Guest House bawl ding lemsa uh a, huai dingin Chief Secretary makaihna Committee khat bawlkhia uhi. Huaibanah Gurgaon ah Performance Art Centre khat bawlkhiak leng lemsa uhi.
Cabinet in deptt tuamtuam 9-Medical, Tribal Affairs & Hills, Labour, Social Welfare,Forest, Agri, IFCD, Sc & Technology, leh IT a semte’n State Plan akipan lawh a laksek uh himahleh tuban Non Plan fund apan lawh piak hita ding uh a,ahunhun in lawh latheita ding uh chih hi.State Plan a sum hongpaite development nasepna lam a zat dingin thupuk uhi. Huailou in PM Package nuai a District HQ teng kikawmtuahna ding in lamlian lampi 3 chiat bawlkhiak din lemsa uh a, huai lamliante bel singtanggama District HQ teng kikawmh theihna dinga bawl hidin gen uhi. Cabinet in Mao a Regional Potato Farm ah contract basis a kum 5 sung sem ding Senior Research Fellow 2 lak lemsa uhi.
Tripper in Activa atuang 2 phulum
Imphal, Aug-28: Porompat PS huamsung Hapta Golapati mun ah tuni sunnung dak 2:30 vel in Tripper truck khat in Honda Activa atuang pasal leh numei khat phukha a, kintak in JNIMS puaktung himahle uh dam zoulou in si uhi. Misi 2te bel L Henao(22) s/o Bimol Chand of Khurai Thongam Leikai leh Ksh Mayum Devi (16) d/o Umakanta of Singjamei Chinga Makha hi uhi.
Helpawl 3 mankhia uh
Imphal, Aug-28: Chandel district sunga Pangal Basti lak tuni’n 9-Assam Rifles te’n operation a bawlna uah UNLF atel self-styled Private Abdul Rehman (18) of Pangal Basti Moreh Ward No. 5 mankhia uh a, amah akipan in 5.56mm tang 10 leh Handgrenade 1 mukhia uhi.Huailou in 24-Assam Rifles te’n Chandel district a Chamol village leh Tengnoupal PS lak operation a bawlna uah Prepak(GS) atel self-styled Lance Corporal Thoi (26) of Lamshang( Imphal West) leh KYKL atel self-styled Private Boinao Chungtham (24) of Thouthang, Imphal West mankhia in amau apan 9mm pistol 2, magazine leh atang 9 mukhia uh a, Imphal West Police ah pekhia uhi.
Mi 1 in numei tawh tulai dawt lum
Imphal, Aug-28: Airport Road Changangei Uchekon a Usha Café Restaurant ah tuni zinglam dak 10:00 in Th. Ibochouba(38) s/o Gambir of Nambol leh nupi ta 2 neisa RK Reena Devi w/o Sangam Pradeep of Laphupat Tera(tulel a Khagempali a om) tukhawm lai meltheihlouh pasal khat valut in Ibochouba alu leh awm lak tem in vadawt a, kintak in JNIMS zotpih himahleh dam zoulou in lamkal ah si chihthu om hi.
Commando te’n mi 1 hunkhia
Imphal, Aug-28:Mayalam Plywood Factory a Accountant sem Radha Krishna(49) s/o (late) Dewakar of Kanglatongbi tuni’n helte pawlkhat in kimu din sam uh a,aman leng alawmte khat tonpih in va hawh hi. Himahleh amun a tuntak un helpawlin a tonpihpa khahkhia in Radha Krishna pimang uhi. Huai thu zak phet in Police Commando pawlin delh pah uh a, sunnung dak 2.00 velin Sekmai PS huamsung Harangtheng Senjam Chirang mun ah helpawl tawh kikaptuah uh a, helpawl in Krishna a taisan ziakun Commando pawlin hunkhe thei uhi. Kikaptuahna ah helpawl atel 1 kaplup hi a, Commando te’n amah taksa tung apan in 9mm pistol 1 leh Chinese hand-grenade 1 mukhia uhi.
Home Secy in Assam dinmun enkhia
New Delhi, Aug 28: Union Home Secretary R.K. Singh in tuni’n Assam state a namkal buaina tawh kisai thil omdan etkik kawmin velthakna nei hi. Aman Assam a Director General of Police J.N. Chaudhary leh Principal Secy(Hom) Shailesh leng kimuhpih in relief camp tawh kisai, health care, water supply leh sianthouna lam genpih hi. Home Secretary in tuni nitaklam in media-te kiang a gendanin Assam ah lemna leh muanna(law & order) ngeina bangin om thei dekta a, lower Assam a relief camp 340 om lakah tamtak khak hita a, tu in 218 lel omta chi hi. Tualou in mi tamtakte’n akhua uh a zottheih tak ziakun tu’n relief camp a omteng mi 2,30,000 chauh hita chi’n gen hi.
Transfer/posting
1.Shyam Lal Poonia,IAS on return from LBSNAA as SDO/BDO, Chandel & Treasury Officer,Chandel in addition.
2.Hopeson Chothe,MCS, Addl DC, Moreh & Chandel and ED/DRDA Chandel as Addl DC, Moreh & Chandel and ED/DRDA Chandel and CEO,ADC/Chandel.
3.George Kangung Maram,PCS on deputation from Puducherry as Joint Secretary(Tribal Affairs & Hills).
4.S. Achouba Singh,MCS, Dy Secretary(RD & PR) & CEO, Zilla Parishad,Imphal West as Deputy Secretary(RD & PR).
5.Darshinso Aimol,MCS, SDO/BDO, Chandel as Under Secretary(Tribal Affairs & Hills).
6.Kh. Ibotombi Singh,MCS (under order of transfer as SDO/BDO, Saikul) as CEO, Zilla Parishad,Imphal West.
7.Ng. Roben Singh,MCS, Under Secretary(Tourism/ACR) & Staff Officer to Chief Secretary as Under Secretary(IT,ACR, Planning) & Staff Officer to Chief Secretary.
8.Kimjalhai Kipgen,MCS, Under Secretary(Arts & Culture/IT/Planning) as Under Secretary(Arts & Culture, Tourism).
9.DK Thangboi,MCS (under order of transfer as CEO,ADC/Chandel) as SDO/BDO, Saikul.
10.Md Abdul Rauf Shah,MFS, Audit Officer,Local Fund Audit as Sub-Treasury Officer,Moreh.
.