Health Minister makaih in joint meeting om

Lamka, April-14: Health Minister Phungzathang Tonsing’ zi (late) Mrs T Chhungi theihgigena mualsuang honna April 17, 2013 a om ding tawh kisai in tuni sunnung in Health Minister Phungzathang Tonsing makaih in veng 18 apan tuanvai ding teng in joint meeting nei uhi. Minister in agenna ah azi T.Chhungi theihgigena mualsuang hon hun ah Chief Minister O. Ibobi leh azi,Mizoram a Minister (Evironment & Forest) H.Rohluna leh azi banah official tamkhop in hong uap ding uh hi’n gen hi. Seat arrangement, hall function leh nek-le-tak bawl tawh kisai poimawh petmah hi’n gen a, afel theipen dinga pangkhawm vekdin ngen hi. Azi theihgige nang in April 16 in Souvenir copy 2000 Lamka puaktung hiding in gen a, azi’ theihgigena dia mi tuamtuam in la aphuah uh CD album leng honkhiat hiding in gen hi. Mimal kiangah chialna piak hilou ahihdan gen in Newspaper tungtawn leh Lamka khawpi area a saptuam 149 te kiang ah chialna kipia hi’n gen hi. Huai ni in azi damlai a tanchin, a damlouh hunsung a USA a ki-etkoldan telin mipi ma ah genkhe ding hi’n gen hi.
Tuni a joint meeting ah April 17, 2013 a program zatding dan banah nek-le-tak tawh kisai genkhawm uhi. Tunitan in mimal kiphal a gan thawh omlai a, huai ni in mipi nekkhawm ding gan 64 (sial 14, bawng 12, vok 19, kel 10 leh belam 9) banah ngasa kg 120 leh ak 11 thawhkhawm hita hi.
Hall bawlna tawh kisai April 15, 2013 in social work omding a, huai ah Veng bangzah tel ding uhi. Gan kithawhkhawm teng PT Sport Complex ah koih in om a, April 16, 2013 in vok telin kimvek ding hi’n kigen hi.

Seminar ah khua 10 val apan mipi tamtak tel uh
Lamka, April-14:Tuibuong Christian Church-te saina in tuni zinglam dak 9:00 apan nitaklam dak 4:00 tan ST. Chullouphai a Community Hall ah Dr.T.Lunkim makaihna in ‘Kuki Nam Pumkhat leh Christa Houbung Pumkhat Kitona’ kichi thupi a zangin ‘One Day Seminar’om hi. Huai hun session 4 in kikhen a, 1st session ah Dr T.Lunkim in “Human Rights leh Kukite jalenna” chih pansan in sinsak a, 2nd session ah Dr Satkai Chongloi, Principal RTC in “Kukite satingin akan khom, Chistian te Christian akan khawm” chih thupi pansan in sinsak hi. 3rd session ah Dr T.Lunkim, Kuki Bible Translator in “Kuki Bible” chih pansan in sinsak hi. 4th Session ah Dr T.Lunkim in “Kuki Nam pumkhat le Christa Houbung Pumkhat kitonale Christa Houbung leh Domination kibah louna” chih thupi pansan in sinsak hi. Huai seminar ah ST Chullouphai khaw kim leh kiang khua 10 val apan mipi tamtak paikhawm in ST Chullouphai Community Hall ah tasenglou uhi. Program hunsung in lasiam tuamtuam apan Pathian phatna la ngaihkhiat in om a, hun tawpna ah Dr T.Lunkim in program a telteng ading in Pathian apan vualzawlna ngetsak hi.

Mi hunkhop in Bank a PO ngahthak
Lamka, April-14: Bank tuamtuam a Probationary Officer (PO) ding lakna din kumlui a written a lawhching te’n February 2013 in personal interview nei ua, huai ah ahunkhop lawhching uh a, a sepna ding uh Bank leh a posting mun ding uh atamzaw hihfel hita hi.
Tutan a kitheidanin, Lamka mi PO ngahte’ lakah Muanlallian Hauzel s/o Raymond Hauzel of Bungmual, Thangmuanlal Munsong s/o Ginsuanthang of New Lamka, Ms. Ching Ruthi d/o Ginzalam Guite of New Lamka leh Jamkhanlian Valte s/o V Ginkhanthang of Zenhang Lamka te’n Indian Overseas Bank ah sem ding uh a, April 27, 2013 a pan Kolkata ah training ding uhi.
Tualou in Steve Lianbiaksang Guite s/o (late) Kamzadal Guite of New Lamka in Vijaya Bank tang a, Thangsuanmung Phaipi s/o P. Khamzamang of Hiangtam Lamka in Syndicate Bank tang a, Ms. Biaksiam d/o H. Thangkhanpau of Nehru Marg in Punjab & Sind Bank tang in Paukhanmuan Valte s/o Mangkhangin of Phaitong (Thanlon sub-divn) in Oriental Bank of Commerce (OBC) tang chihthu kiza hi. Steve Guite in ACIO-II tawh mukhawm a, ACIO-II pe’n join in tu in training lel chihthu kiza hi. (Gelhkhak louh leh gelhkimlouh a om leh gelhthak zel theih ahi. – Editor)

T.Chhungi Memorial Free Cancer Detection Camp & Seminar
Lamka, April-14: Khanthang Tonsing s/o Health Minister Phungzathang Tonsing in anu phawkkikna hiding in April 18, 2013 zinglam dak 10:00 apan in Salem House, Hebron Veng, New Lamka ah “T.Chhungi Memorial Free Cancer detection Camp & Seminar” sai ding a, Roko Cancer Charitable Trust, Delhi apan doctor team mi 4 hong kuan ding uhi. Huai ah cancer veilou dia kiven dingdan kisinsakna/seminar leh athawn a ki etchetna omding a,. kiensak nuam te’n phonr no. 8729853439/ 9402024479 ah booking/ registration bawl theih ding hi. Kamsung (oral), nawi (breast), suul (curvix/uterus) te ading leh midang lunglutna neite teltheih ding hi.

Traffic rule bawhsi mi 27 mankhia
Lamka, April-14: Lamka khawpi sunga ‘One way traffic rule’ leh‘Gari parking’dan Police, VDF leh traffic Police te’n enzui zel uh a, April 8-13, 2013 kikal kalkhat (one week) sung in traffic rule bawhsia mi 27 mankhia in TR-5 receipt cut in fine sak uhi. Adiakin gari parking dan kibawl zat ahih nung kum 2 val mahleh gari parking dan kibawl niteng in bawhsia a matkhiat omtou den hi.

Culvert kisia tam ziakin nawngkai

Lamka, April-14: Lamka khawpi a kawmtuahna dinga kizang lampi poimawh bangzah hiam khaktan a kibawl culvert hunkhop kisiat ziakin khe a paite leh gari zanga taite’n haksatna tuak uh a, huaite ziaka tuahsiatna thiltung leng om hi. Thutut kingahdanin Thingkangphai khawlai ah Tedim road a culvert khat kisia a, huailou in New Bazar, Bethel Veng, Pearsonmun leh mundang khenkhat ah leng culvert kisia hi. Mi khenkhat in a gendan un culvert kibawl hunin ahiding bangtak a bawl ahihlouh manin culvert in sawt daihlou hi’n gen uhi.

April 17, 2013 in Road diversion om ding
Lamka, April-14: Health Minister Phungzathang Tonsing’ zi (late) Mrs T Chhungi theihgigena mualsuang honni April 17, 2013 in Chief Minister O.Ibobi leh high ranking official tamtak hongtel ding ziakun zingsang dak 6.00 akipan nitaklam dak 4.00 tan Tedim Road lamlian zuidan kikheng lamdang ding hi’n SP/CCpur apan thusuak om hi. Huai dungzui in Singngat lam zuan gari teng in College Road-Jamsuan Raod-Ngathal Road-Tedim Road zui ding uhi. Gari himhim Jamsuan Road apan Awnsuak Road –Joshua Road ah lutthei lou ding uh a, himahleh Tedim Road apan gari taite’n atung akigente zui in Jamsuan Road zui thei ding uhi. Singngat lam apan Lamka zuan gari (heavy/medium/passenger gari) te’ Lanva a BSF road zui in Gangpimual road-Pearsonmun-Tipaimukh road zui in paiding uhi. Bungmual lam apan New Lamka zuan gari te’n Convention Road zui in GS Road apan Tedim Road ah pawtkhe ding uh a, diversion teng ah Traffic Police, VDF ban ah volunteer hunkhop duty ding uh hi’n kigen hi.

Micomax Tablet latna om
Lamka, April-14: L.Foundation School te’n April 15, 2013 sunnung dak 3:00 in class VII & VIII student- te’ zatding micromax tablet piakkhiatna leh Pathian kiang a latna program nei ding uh a, Rev V.Thangkhangin, Director (Institutions), EBC in Pathian kianga latna leh student-te adin Pathian kiang ahvualzawlna ngetsak ding hi. Huai zawh in school thuneitute’n student te kiang ah micromax tablet pekhe ding uhi.

PHED Tanky a tuilate theisak uh

Lamka, April-14: New Lane, Bungmual a PHED water tanky apan phalna tellou a tuila-te kiangah YPA Bungmual unit leh Village Authority in tuilong( pipe) lakhe dingin theisak uh a, tanky sunga tui tamlou ahihmanin adim chianga kikima hawmrual ding uh hi’n kigen hi.

Langva in at liam
Lamka, April-14: Thangkholun (38) s/o Khupzanang of Mata tuni sunnung dak 2.00 velin Bethel Veng a misi inn a nasemlai langva in atliam a, a taklam khut-ngawng a thagui zung 2 kitan hi. Dist. Hospital puaktun nungin doctor-te’n admit uh hi’n kigen hi.

Nupa Seminar omding
Lamka, April-14: EBCC New Lane saina in April 19 & 20, 2013 in EBCC New Lane, Bungmual ah ‘Kum 50 nuailam Nupa Seminar’ om ding a, Rev M.Zalian Guite, Dist Suptt, Mizoram in sinsak ding hi.

Siamsin Career Talk omding
Lamka, April-14: SSPP Lamka Joint HQ inntekna in April 20, 2013 sunnung dak 1:30 apan YPA Hall, New Lamka ah ‘Siamsin Career Talk’ omding a, huai ah SSPP member class IX-XII zillel ban ah class XII exam zoute kia telding uhi. Huai ah Dr Liangoumuan Samte, Paukhenkhup Guite, T.Lianchinpau telin mibangzah hiamte’n sinsak ding uh a, program atel student te ading in Rev Dr.Thangminlun Mangte, Local Pastor EBCC Bethel, Lailam Veng in Pathian kiang ah thumsak ding hi.

IMPHAL NEWS
Dakkal 26 sung General strike puang
Imphal, April-14: Manipur a helpawl tuamtuam 6 kigawmna Co-ordination Committee(CirCom) pawlin India President in April 15, 2013 a Manipur hongphak ding boycott puang uh a, April 15, 2013 zingsang dak 6.00 akipan April 16, 2013 zingsang dak 8.00 tan dakkal 26 sung General Strike puang uhi.CorCom a telte KCP, KYKL,Prepak, Prepak-Pro, RPF leh UNLF hi uhi.

Imphal News-te suaklou ding
Imphal,April-14: Tuni’n Manipur ah Cheiraoba festival kizang a, Meitei community a innlusi a tenna inn chiat uh cheimawi in nek ding limchi taktak bawl u a, pathian biakna in zang uhi. Mi tamtak in hinkhua a lawhchinna sangzaw ngahna ding hi a lam-en kawm in amau omna mun tawh kinaipen mualtung(hill top) ah kal(climb) uhi.Cheiraoba festival ziakin Imphal pansan Newspaper office teng tuni kikhak a, huaiziakin April 15,2013 issue Newspaper suaklou ding hi’n kigen hi.

Delhi ah Manipur mi 1 awklum
New Delhi, April-14: Police thusuakin tuni a agendanin, Delhi University's Hindu College a hostel room sungah Manipur mi student khat awklumsa a muhkhiak ahi chi uhi. Thusuakin agendanin, misi ahihleh Kirpa kichi hi a, kum 20 val zekpan ding ahi chi ua, Hindu College Hostel room No 175 sungah tuni (April-14/Pathianni) zinglam dak 9 vel in sisa in muhkhiak hi a, a room sunga ceiling fan pansan a awklum ahi chi uhi. Police te’n Kirpa apan in akithahna ziak (suicide note) leng mukhia in, thil omdan suizui lel uh chih thu kiza hi.

Vungzagin Valte tuni’n Delhi apan hongtung
Lamka, April-12:Thanlon MLA banah Parliamentary Secy (Hort, Soil & CADA) Vungzagin Valte tuni in New Delhi apan award 3 sangkhinin Imphal hongtung hi. Aman’ New Delhi ah ni 6 hun a om sungin Secretary (MoRTH) leh National Highway Authority of India (NHAI) Chief Engineer-te kimuhpih a, Food Corpn of India (FCI) a Chief Managing Director (CMD) Dr Samra; Rural Development Ministry a Joint Secy Jarnail Singh IAS; Jt Secy (Home Ministry); PS to Minister RD; Forest Ministry a joint Secy; DoNER secretary; Health Secretary leh Union Rural Development Minister-te leng mu a, Manipur state kia hilou in adiakin Thanlon A/C ah lam tuamtuam a development om theihna ding genpih chihthu kiza hi.

Union Ministry tuamtuam a Minister leh official-te’n leng abial sungah ‘all round development’ om theihna dinga panlakpih ding ahihdan ana chiam uh chihthu kiza hi. Vungzagin Valte tuni zinglam dak 11:30 in New Delhi apan azi Lalneihmawi tawh Imphal hongtung kik uh a, Imphal airport ah mi tamtakin ana vaidawn uh a, mi tuamtuam in Airport mun ah kipahpihna thilpia uh a, tamtak in pahtakna ziakin pakkhi oksak uhi.

Kuva man leh nektawm thil kibawl tungtang genkhawm
Lamka, April-12: Lamka Traders and Self-Employed Assn(LATSEA) pawlin tuni’n a office uah kuva man(rate) tungtang ah meeting poimawhtak nei uh a, huai ah Bihari Association apan member muanhuai hunkhop leng tel uh a, thil omdan sawtkuamtak a genkhawm nungun kuva man(rate) tungtang thupukna a bawl ban uah khawpi sunga nek-le-tak bawlna leh zuakna munte ah CMO/CCpur office akipan ‘Food Safety Training Certificate’ neichiat ding leh nektom thil kibawlte himhim dakkak 24 tana khot louhte kuama’n zuaklou ding in thukim uhi.

Meeting thupukna dungzui a LATSEA thusuak in a gendan in Lamka a kuva zuak tengin April 13, 2013 akipan in rate ngeina banga zuaknawn ding in theisak uhi. Huai dan in kuva zarda-120 Rs. 5 leh Kom kuva Rs. 2.50 zel a zuak hiding hi.Huai rate a zuak theihna ding in Mahajon Dipu of Zion Street, Mahajon Devraj of Colney Plaza(New Bazar), Mahajon Ramanan of Colney Plaza(New Bazar) leh Mahajon Kamlesh of ner Appollo Veng bul te’n kuva nah/teh atampen in tehkhat zel ah Rs. 2.50 @ Rs. 600/- Laat 1(company pack) leh Bangla Nah/teh khat ah Rs. 1.33 @ Rs. 160/- Laat 1(company pack) hisap in hon pethei ding uhi.

Thusuakin a genzeldan in Autonomous Dist Council(ADC) a phut a om Trade Licence issue tawh kisai govt lamte nasep etzui ding in thupuk uh a,khawpi sunga van zuaka vialpaite’n rate mumal a neihlouh ban uah koi ahong kipan hiam chih theihlouh a tamluat ziakin security point of view tawh kisai in Street Hawker-te Identity card piak thuuk uhi.

Khawpi sunga nek-le-tak bawl kuapeuhmah in CMO/CCpur office akipan Food Safety Training Certificate a neihchiat ding uh chih leng thukim uh a,tulai in nipi(summer) kipan ding ahihtak ziakin food contamination ziaka sungphiah(diarrhea) leh adangte akipan kivenna ding in nektawm bawlna leh zuakna munte’n nektawm thil kibawl(singara, halua,sapji leh adangdang dakkal 24 sanga sawtzaw a zuaklouh ding uh, nek-le-tak koihna(storage) himhim zusa(rat), innlawl(cockroach) leh miksi(ants) in a nek phaklouh dia kepbit/kep siangthou ding banah nek-le-tak bawlna munte kep siangthou gige ding chih ahi hi.

Atunga kitaklang mipi adia phatuam ding thilte sepkhiak zawhna dingin mipi tawh pankhawm ngai a, thupuan nelhsiah leh bawhsia a om leh gelhthawh in LATSEA office,Saulim Restaurant, Nehru-Marg-Tedim Road junction a report dingin theihsak hi uhi.Phone no. 8974225922/9856289892/9089590489 leng contact theih ding hi.

Mihing 1000 val adia kingakna ‘Tuikham Lei’ dengdel gawp
Lamka, April-12: CCpur, Singngat leh Saikot A/C huamkha a khawsa khaw tuamtuam 10vel a mihing 1,000 val omte’n nekding leh vanzat tuamtuam puaklutna banah Lamka khawpi tawh kikawmna dia a zat theih uh om sun Nghathal leh Tuikham kikala Tuitha lui tunga lei(suspension bridge) April 1 sun dak 12:00 velin kisia hi. Huai bial mipite’ adia kingakna om sun huai lei dengdel petmah a, cement zanga foundation kibawl leng a hoih nawnlouh ziakin mipite patau gawp uhi.

Tuabang kalah Thanlon MDC Zamkhanpau in tuni zingsang in sumtang leh vanzat khenkhat apiakte zangin lei kisia repair bawl hi a, foundation leng kisedek ahihmanin tunungin patauh huai veve ding hi’n kigen hi. Huai biala Singngat, Saikot leh CCpur A/C nuaia om Thenmuol, Daijang, Tuibul, Ngurte, Tuikham, Khuangnung, Sumtukphai, Tuikhamphai, Benah Zou leh Gelbung telin khawdang khenkhat in nitengin lampi di’n zang uhi. Tuitha lei tawnin huailam apan Lamka a school kaite cycle leh khe in kuan zel uh a, lei hoihlouh ziakin dip kaw kawmin zuisek uh hi’n kigen a, nupite’n leng bazar kaina dingin nitengin zang uhi. Mipite’n Minister, MLA-te leh Dist. Admn apat lei bawlna dinga panpihna poimawh mahmah uh ahihdan gen uhi.

Handloom Mela hunkhakna om
Lamka, April-12: ADC/Ccpur saina in YPA Hall, Hiangtam Lamka ah April 10, 2013 akipan ‘Handloom Mela’ om a, tuni sun dak 12.00 akipan hun khakna om hi.Huai ah Ms. Jacintha Lazarus, IAS, DC/Ccpur khuallian in pang a, aman a thugenna ah pawl dang saina hilou a ADC saina nuaia programme om ziakin lawhching ahihdan gen hi. Tuni in Mela hunsunga stall bawlte kiangah DC in participation certificate pekhia a, Chairman/ADC in incentive pekhia hi.

SSC nuaia exam hun kisuan
Lamka, April-12: Staff Selection Commission(SSC) saina in April 14, 2013(Sunday) in Combined Graduate Level Examination 2013 om ding chih himahleh Dr. B.R. Ambedkar Birthday ziakin ahn kisuan a, April 28, 2013 in exam ding uh chi’n SSC in thusuah hi. Tuabang kalah NE region ah April 21, 2013 a exam neite’ bel sukhalou ding hi’n kigen hi. Exam hun kisuan ziakin Admit card leng April 21, 2013 in regional office website-te ah download theih ding hi.

Suptd. makaih in Hospital ah meeting
Lamka, April-12: Dr. N.Paulginthang, Med Supdt, Dist. Hospital leh Dr Kim Simte, Dy Med Supdt, District Hospital makaihna in hospital staff Grade IV te’n tuni in meeting uh a, Bio-Medical Waste leh Hygene tawh kisai genkhawm uhi. Med. Suptd in tuma sangin hospital siangthou mahmaha ahihdan gen a, leivui khu a tamlai ziakin Grade IV te’n nikhat a 2vei nawt gige dingin theisak bawl hi. Meeting zawh in ninpaihna mun etkhia uh a, April 13 zingsang in Grade-IV te’n hospital huang hah di’n social work nei ding uh chi’n Suptd in gen hi.

Lamka ah khawlum uang
Lamka, April 12, 2013: India adia khawlumna pente laka khat Delhi sangin Lamka ah khawlum nasa zaw a, kum 10 sung adia chiamtehtham khop in April 11, 2013 in khawlumdan 39°C tung hi. Delhi ah khawlumdan 38°C khawng tung a, Lamka lumzaw chihna suak hi. Lamka a khaw lumdan tehna ah zan sunnung dak 2.35 in 39.8°C tungtou a, zan nitaklam tanpha in 30 degree Celsius khengtou lai hi. Khawlum ziakin bazar telin mun tuamtuam ah khe khawlai pawt tawm deuh hi’n kigen a, Lamka a khawlum deuhna munte ah nitak tanpha in khaw-ul luang pumdim chihthu kiza hi.

Insp C. Lalropuia in award 73 sang
Lamka, April-12:Police Inspector C. Lalropuia s/o C. Manga of Thingkangphai, tulela SP/CCpur office a ‘Reader to SP/CCpur’ semlel in Sept. 26, 1986 akipan kum 27 sung Police dept nuaia asepna ah a gin-omna ziak leh phatthamching nasep ziakin tunitan Award tuamtuam 73 sangta hi’n kigen hi. April 11, 2012 in leng Kangla Fort ah National Dedication Day Celebration, 2013 kichi om a, huai ah ‘Certificate of Distinction’ leh cash award Rs. 10,000 sang hi. National dedication Day celebration kichi Maharaja Nara Singh sih champha 163na a kizang ahi hi. Insp C. Lalropuia in Sub-Inspector post ah direct in lut a, tulel in Inspector tanin kaisang hi.

‘Excel Diagnostic Centre’ computerised
Lamka, April-12: Hill Town a IB road jul Gerizim Building nuaia X-ray leh ECG lakna dinga kizang machine thak digitalized hita a, tuni sunnung dak 3.30 in Pastor Kamchinmang, EBCC Hiangtam Lamka in Pathian minin latna nei a, hasotna thu leng gen hi.

Bungmual ah inn khat kang nawn
Lamka, April-12: Bungmual a Hausa Veng a Pauzason s/o (late) Thongzagin tenna inn tuni sunnung a electric painung sawtlou in kang a, inn neite kuamah omkei mahle uh akiangnai a omte’n meikhu mu in delhhuan uh a, kongkhak kalsia in phelhmit thei uhi. Inn neitu’n TV koihna kianga electric socket apan meikuang kipan hidingin gingta a, meikang ah TV telin stablizer, TV stand, Battery, Woofer, DVD Player, Inverter banah vanzat khenkhat kangsia hi. Bungmual ah kal 2 vel paisa in innkang leh inn kibu halsawmna tanpha om a, hiai tawh kisai Bungmual Village Authority in ngai serious mahmah in, YPA Bungmual unit tawh pangkhawm in panla uh a, kangmei-patau apan kuapeuh pilvang dingin V/A Secy Khamkhanthang Valte in ngetna leh theihsakna bawl hi.

Suang in khoihliam
Lamka, April-12: Zan nitaklam dak 3.00 velin alawmte tawh kiselbuai ziakin suang(stone) zangin Rousangzuol (33) s/o Lalsang of Parbung village, Tipaimukh sub-division suang a khoihliam in in om a, alu(head) liam nasa in sisan tamtak pawt hi’n kigen hi. Zan in Lamka zuan a hong kipua in nitak dak 12.00 velin hongtung uh a, dist. hospital ah etkolin om hi.

Diabetes vei 75 etkhiakna om
Lamka, April-12: Nazareth Nursing Home, Ccpur College Square ah tuni in ‘Free Diabetic Camp’ om a, Dr. Premchandra, Endocrinologist, CMC Vellore in zunkhum(diabetes) veite etkhiakna nei in, Bijoy Rani, Diabetis Councellor & Dietician in amaute adingin zunkhum tawh kisai sinsakna pia hi. Nupin company in vanzat(lab) a ngaihtuah(sponsor) hi’n kigen a, CVN Mumbai pansan Diabetes care leh Lupin kithuahpihna tawh tuni a zunkhum veite etna om hi’n kigen hi.

IMPHAL NEWS
India Presdent zan 1 giak ding
Imphal, April-12: India President Pranab Mukherjee in Chingmeirong a Adimjati Shiksha Ashram kum 60 chinna lopna(Diamond Jubilee celebration) uap ding in April 15, 2013 a Imphal hong phak hun ah zan 1 giak ding chihthu om hi. President in April 15, 2013 nitaklam dak 4.30 in Indian Airline special flight in Imphal hongtung ding a, Adimjati Shiksha Ashram a Diamond Jubilee lopna uap kawmin huai complex building thak khenkhat leng hong ding hi.Amah huai zan in Raj Bhavan ah giak ding a, zingsang in Manipur nusia in kiknawn ding hi.

Tuni’n Cabinet meeting om
Imphal, April-12:CM Secretariat a Cabinet Hall ah tuni nitaklam in Cabinet meeting om a, huai ah agenda tuamtuam hunkhop genkhawm uhi. Huai meeting ah India President in April 15, 2013 in Manipur hongphak ding tawh kisai genkhawm uh a, President zintun ding tungtang leh thupi theipen a vaidawn ding tungtang telin thu tuamtuam genkhawm uhi. Cabinet meeting in Draft Industrial and Investment policy of Manipur 2013 kichi pom uh a,
Manipur State Rashtriya Swasthya BimaYojana (RSBY) Society a contract staff 7 lak ding leng thupuk uhi. Huai banah Raj Polyclinic, Langol View Clinic, Shija Hospital leh Sky Hospital ah BPL Card neite ading in Rs. 30,000 tan a thawn a ki-etkolna piak dingin leng lemsa uhi. Huailou in IAS a ex-cadre post 2(payscale Rs, 80,000(fixed) bawlkhiak(create) din leng thukim uh a, case FIR No. 24(4)2013 of Irilbung PS u/s 302/34 IPC a nasem hoih Police personnel(SIT) teamte pahtakna in sum(cash incentive) piak ding in leng thupuk uhi. Ritarani Devi w/o Late Th. Kiran Singh, Thongju Part II Koirou Mamang Leikai, Imphal East- driver of Tata Iris who was by killed by miscreants was appointed in the Edn. dept a grade IV piak lemsa uh.

Helpawl atel mi 3 mankhia
Imphal, April-12 :Imphal West Commando te’n KYKL leh KCP cadre 2 Paite veng a Sangaiprou leh Kakwa mun ah mankhia uhi. Thusuak kimu in a taklatna ah mat a omte bel Akham Ranjan Singh (28) s/o A. Joy Singh of Kwakeithel Akham Leikai (KYKL) leh Laiphrakpham Chaoba @ Nanao (23) s/o L. Sanatomba of Bashikhong Panthoibi Bazar banah Bramacharimayum Herojit Sharma (27) s/o Ingomacha Sharma of Nambol Sabal Leikai (KCP) hi uhi.

N. Satyabhama’ luang la uh
Imphal, April-12 : RIMS a Pathology dept. a Jr. Research Fellow N. Satyabhama apaisa April 3, 2013 nitak a pawtkhia April 5, 2013 zingkal in sisa in muhkhiak tawh kisai in tualthattute matkhiak himahle uh N. Satyabham luang JNIMS morgue a om zan tan a claim omlouh ziakin Imphal East SP in tuni sunning dak 2:00 tan a claim om kei aleh koihkhiak hiding in puang a, tuni in JAC leh social organisation tuamtuamte’n meeting nei in siluang lak ding in lemsa uh a, a innkuante tawh JNIMS morgue akipan a lakhia in lampi zuihpih uhi. Amau Ayangpali Road, Kongba, Singjamei leh Kakwa tan lampi zuihpih ua, Kakwa tun uhi. JAC thusuakin a taklatna ah tualthatte akituahpih bang gawtna piak ahihkei ualeh kiphinna sutzop touh zel dingin puang uhi.

PREPAK (PRO) khat ki-surrender
Imphal, April-12: PIB Defence Wing thusuak in a gendan in PREPAK(PRO) atel Sergeant Ningtamba (29) s/o (L) Nimai of Mayang Imphal West district apaisa pril 8, 2013 in 27- Sector Assam Rifles nuai a om 39 A/R te kiangah Border Pillar-41 ah kipekhia hi. Aman huai hun ah 9mm pistol 1 leh Radio set leng A/R te kiangah pia hi.
Thudang khat ah, 1/11- Gorkha Regd leh 46 A/R ten April 9, 2013 in CCpur a Saikot area munkhat ah galvan tamtak mukhia uhi. Muhkhiak a om galvante bel 9mm pistol khat, 5.56mm magazine, M-16 magazine, US Carbine magazine leh 9mm tang 20 hidan in PIB(Defence Wing) thusuak in gen hi.

Seminar-cum-Membership Enrolment
Imphal, April-12 :Saitu Youth Congress Committee-te makaihna in zan in Gamnom Sapermaina Community Hall ah ‘One Day Seminar-cum-Membership Enrolment Program’ hun om a, Y. Rohosho, Vice-President MPYC in hongkhia hi. Huai hun ah Mrs Sunita Devi G/S MPYC (Enrolment incharge); Thanglet Baite, President- outer LYC; Lanmingthang Haokip, President 59- Saikot AYC; Dr. Ch. Narendra Singh Advocate- Guwahati High Court leh L. Chandra Kumar Singh Advocate- Chairman Legal and Human Rights Dept. MPCC tel uhi.

Transfer & Posting :
1. Killu Siva Kumar Naidu, IAS, (under order of transfer as SDO/BDO Chandel) as AC to DC/Ukhrul
2. Ch. Sachi, MCS, Dy. Director Transport as AC to DC/Imphal West.
3. A. Shiva Das Sharma, SDO/BDO Chandel as Dy. Director( Transport).
4. Meisnam Chanu Likhainu, MFS, Sub-Treasury Officer, Kakching as Dy. Director Finance & NRHM Manipur State Unit
5. Jamthianniang Thomte, MFS, Dy. Finance (PHED/ DE Finance) as Dy.( Finance/ PHED) & MACS Finance & Account Officer
6. P. Ratan Singh, MFS, Local Fund Audit as Sub-Treasury Officer/ Kakching
7. W. Ibohal Singh, Jr. MCS, AC to DC Bishnupur as SDO/BDO Parbung.