UCO Bank branch kihong ding
Lamka, April-11: Hmuia Veng, Central Lamka ah April 13,2013(Kiginni) zinglam dak 10.00 in United Commercial(UCO) Bank branch thak honna om ding hi. Huai ah BB Sahay, Circle Head, Northeastern in hong ding a, Chief Guest in Ms Jacintha Lazarus,IAS, DC/CCpur pang ding hi. YMA Lamka Branch leh Zenhang Lamka Cultural Troupe akipan Cultural programme om ding hi. UCO/CCpur branch ahihleh Manipur adingin branch 3na hiding a, Nangkhogin Dousel, Branch Head(Manager) makaih in Asst Branch Head 1, Clerk 1 leh Head Cashier 1 om masa ding hi’n kigen hi.
Khua 2 ah innkang om
Lamka, April-11: Tuni zingsang dak 3.30 velin Bungmual Lamlian Veng a Mrs. Ngaimuan’ dukan akipatna theihlouh mei in kang a, thiltung mipite’n a theihpah ziakun van tamzaw kangtum manlou in phelhmit thei uhi. Thu kizadanin meikang om hun ah electric pailai a, electric tungtawn a meikuang kipan hidingin gingta uhi.Huailou in Saikot A/C a om Thinghangjang khua ah April 9, 2013 sun dak 12:00 vel in Jamkhothang s/o Otkholet tenna inn mei in kang a, bangmah lakkhiat man omlou hi’n kigen hi. Inn neitu in a gendan in khaw mite'n singtanglou(jhuming) hal naikei mahle uh khawsung mi Hemzathang in khawmite theihlouh kalin singtanglou ana hal hi'n gen a, huai apan meikuang in khawsung pehsuak dek a, ama’ tenna inn meikuang in peh in kangtum a, inndang peh manlou in mipi’n phelhmit hi’n gen hi. Inn kang ah angtang bag 5, mobile handset 2,innsung vanzat teng ban ah license nei single barrel 1 kangtum hi'n gen hi. innkangtum ah sum atuat in Rs 1.65 lakh vel man ding kangtum hi’n kigen hi.
Chhungi Memorial Gift pia
Lamka, April-11: CCpur MLA’ nominee Mangpu in tuni sunnung in Lamka khawpi a tagah kepna mun 6 ah ‘Chhungi Memorial Gift’ in antang bag 2 chiat hawmkhia a, (late) Chhungi Tonsing in adamlai in tagah leh meithaite itna ziakin thilpiak(gift pesek hi’n Mangpu in gen hi. Aman gift a piakna munte Tabitha Home(Hiangtam Lamka); Only Grace( New Lamka); Amaging Grace(Bungmual); Destitute Children Home(SA Road); North East Children Home, (Rengkai) leh Bethel Children Home(Hmuia Veng) hi uhi.
SP/CCpur in thil omdan enkhia
Lamka, April-11:Health Minister Phungzathang Tonsing’ zi Mrs T Chhungi theihgigena mualsuang honna April 17, 2013 (Nilaini) zinglam dak 10.00 in Salem House, Hebron Veng, New Lamka ah om ding a, mualsuang hon hunah Chief Minister O. Ibobi, Minister/MLA leh official tamtakin huai hun a uap ding ziakun security lam leh traffic tawh kisai kisakkholhna pailel hi. Tuni nitaklam in L. Mangkhogin Haokip, IPS, SP/Ccpur makaihna in Police leh Traffic lamte’n Salem house leh a sehvel a gari koihna ding telin mipi khawheidan lemtang zawsem a bawl(arrange) sawm in enkhia uhi.
State level ah khatna la
Lamka, April-11: SSA, State Mission Authority, Manipur saina in zan(April 10, 2013) zinglam dak 10:00 in Babupara a Bengali H/S ah ‘Right to Education- Your understanding of School’ chih thupi a nei in ‘2nd State Level Competition of Essay writing, Painting, Elocution & Fancy-Dress’ om hi. Huai ah Jenny Lian Remmawi in ‘Elocution’ ah khatna la chihthu kiza hi. Amah Blue Star Academy ah Class VI sinlel hi a, New Lamka’ Vengnuam a om T Liankaplun leh Mrs Dimngaihlun te’ tanu upapen ahi hi.
Bosconian 1st Batch-te kithuahkhawm
Lamka, April-11: Kum 1973 in BSEM saina a Class-X exam-te laka Donbosco High School apan examte laka damlaite’n tuni’n Khuga Dam IB ah ‘6th Re-union & 40th (Ruby) Anniversary’ zang uhi. Huai hunah 1st batch atel sikhinsa mi 6 leh 1st batch-te laka tel a innkuante uh si 8 te suunna om hi.Rev Father Jose Principal, Donbosco H/S, senior teacher Chaoba leh mi tuamtuam in thugen uhi. Kum 1973 a HSLC examna ah Don Bosco H/S akipan candidate 40 lakah 1st class in Lungmuana Lakher leh Albert Gengoukhup Mate in pass uh a, amaute Ccpur dist. adia 1st divn a pass masapen hi uhi.
Misi tungtang ah kihoulem uh
Lamka, April-11: Zion Street a om C.Lalzomliana’ building a tuikulh(ring well) feet 38 vel athuk ah zan in well sunga generator bawl S.Jawanjit Singh (22) s/o Samungou of Khumujamba in a bawlzawh a kaltou lam kesuk in buaisia a, lakkhiak pah sawmin hahtakin panla uh a, lakkhiak zawh himahleh damzoulou hi. Huai thu ah inn-neitute’n Mizo puan in siluang tuam uh a, tuni nitaklam dak 3.00 in misite inn ah kihouna ah om huai ah C.Lalzomliana innkuante’n Rs 1,50,000/- in si gal uh a,thunung, thuma omlou di’n kihoulem uh hi’n kigen hi.
Dist. Hospital a ceiling pulhkhia
Lamka, April-11: Dist. Hospital a Male Surgical Ward a plaster-na feet 5 vela lian cement tuni sunnung dak 1.30 veli pulhkhia a anuaia om mi 3 delhkha a, amaute lakah Kapboi (40) s/o L. Thangzalang of Leijang Khopi liam a,midangte bel liamlou uhi. Mi 3 laka 2 delhkha masalou hileh a 3na naungek delhkha ding hi’n gen uhi. Amaute’n dist. hospital ah tuni zinglam dak 4.00 vela tui tawilai rickshaw a tuahsia Velminlal (22) s/o Upa Khupkhokam of Leijang Khopi ompih lai tuabang tuak uh hi’n kigen hi.
Free Diabetic Camp om ding
Lamka, April-11: Nazareth Nursing Home, CCpur College Square ah April 8, 2013 in Free Diabetic Camp om ding himahleh lemtanlouhna ziak in ahun kisuan a, April 12, 2013 zing dak 8:00 apan sun dak 12.00 tan om dingin bikhiah thak uhi. Huai ah diabetes (zunkhum) veite suina leh kepna (diabetic detection and treatment) om ding a, blood glucose manbei in piak ahih banah uric acid leng test-na leng om ding hi. Huai ah CMC Vellore akipan specialist doctor in diabetes veite en ding hi.
BRTF-te’n nasepna sunzom
Lamka, April-11: BRO nuaia Border Roads Task Force(BRTF) pawlin March khabul in Tedim Road-Simveng zotna lampi bula electric transformer kiangah culvert bawlsawm in JCB zangin lampi adung-avai kimkot feet 12(square feet 12) vel, athuklam leng feet 12 toukuak uh a, ground leveling abawl nungun tuni’n culvert bawltheihna dingin cement sun kipan uh hi’n kigen hi.
Thautui kibuak in kihallum
Lamka, April-11: Thu kizadan in zan nitak dak 8.00 velin Nanglianpau (25) s/o N. Khandou of Pangzawl in kisilna(bathroom) sung a omlai thautui(kerosene) zangin a pum kibuak a, huainungin lighter zangin amah leh amah kihal hi’n kigen hi. A innkuante’n a theihphet un delh mahle uh akang dingteng kangkhin man a, dist. hospital puaktun nungin doctor-te’n a taksa kahiang 95% sia hi’n gen uh a, huainung sawtlou dak 9.45 in dam zoulou in si chihthu om hi. Pangzawl hanmual ah tuni in misi kivui hi.
SUUNNA
G.Tuanzaneng (83) f/o G.Jamkhothang of Zion Veng, New Lamka tuni zingsang baihtak dak 1.30 velin damlouh ziakin si a, tuni mah in YPA hanmual, New Lamka ah kivui hi.
*******************************
IMPHAL NEWS
Chandel a koihlou dingin ngen
Imphal, April-4:Chandel district HQ a 20-Assam Rifles camp ah tuma a galvan koihkhia KYKL(MDF) cadre-te omsak hiding uh chihthu om ziakin Chandel Naga People’s Organisation(CNPO) pawlin Dy Chief Minister banah Home Minister Gaikhangam kianga ngetna pia in Chandel ah KYKL(MDF) cadre-te koihlou ding in ngen uhi. Tuma lam in state govt in Leikun a om 8-Bn Manipur Rifles camp ah KCP(Lallumba) cadre-te a koihsawm ziakin mipi lungkimlou in kha 1 sung kiphin uh a,a tawpin govt in Kainathang mun ah KCP cadre-te omsak hi’n kigen hi.
BJP Manipur Pradesh in kipahpih
Imphal, April-4:BJP National President Rajnath Singh in BJP National General Secretary dingin Arunachal Pradesh akipan MP(Lok Sabha)-lui Tapir Gao a guannawn banah Vice President ding in Assam akipan MP(Lok Sabha) Bijoy Chakraborty leng a guan ziakin BJP Manipur Pradesh pawlin Northeast bial apan BJP National leader dinga mi 2 guana omte kipahpih thu puang kawmin BJP National President tung ah kipahthu puang uhi.