Senapati ah zan nitak in FCI antang pua Truck 2 kihalsia
Manipur ah tuni’n dakkal 18 sung General Strike om
Imphal, Dec-27: Film Forum Manipur leh Manipur State Shumang Leela Council pawlin civil society organisation tuamtuam tawh pangkhawm in Dec 21, 2012 zankim akipan hunchiam omlou ding a General Strike puan uh Christmas ding ziakin Dec 23, 2012 zankin akipan a khahkol(relaxed) uh zan(Dec 26,20122) nitak zankim akipan in sunzom nawn uh a, himahleh pawl tuamtuam akipan ngetna tamtak om ziakin dakkal 18 achin tawh kiton in tuni nitaklam dak 6.00 in General strike tawpsak uhi. Hibang kal ah United Naga Council in Naga mite luahna bial teng ah zan nitak zankim akipan dakkal 72 sung General Strike a puan ziakun huai in nawngkaina thupitak tun a, Senepati ah tuni zingsang baihtak dak 1.30 velin FCI antang pua Truck 2 kihal a, Truck (No. JH-02L/9395) kangse dimdem in antang a puakteng leng kangtum hi’n kigen a, Truck (No. WB-59A/4413) leng hal in om mahleh Police, CRPF leh Fire services te’n kangse sana manloi in phelhmit uh hi’n kigen hi.
Tuni a General Strike ziaka buaina omkhak ding venna in Imphal East, Imphal West, Thoubal leh Bishnupur a Dist Magistrate tengin tuni zingsang dak 6.00 akipan nitaklam dak 6.00 tan Curfew puang uh a, Police in Imphal khawpi sung mun tuamtuam ah patrolling a pai thithe ban uah security leng hihkhauh in om a, hileleng buaina thiltung thupilua gen ding omlou hi.
Zan in Kwakeithel Akham Leikai a Community Hall ah Film Forum Manipur leh Manipur State Shumang Leela Council inntekna in civil society organisation tuamtuam tamtak tawh joint meeting om a, huai ah pawl tamzaw in General Strike ziaka mipi in genvuallouh haksatna thuak uh ahihdan genkawm in General Strike pen khawlsakzaw ding in deihthu gen uh a,huai dungzui in tuni nitaklam dak 6.00 tan General strike om dia thupukna bawl kawmin Dec 18,2012 in Chandel a Musical Concert omlai a announcer apang actress Momoko khoihtu Livingstone matkhiak a Manipur govt khut a piakkhiak ahih masiah rally, sit-in-protest leh kiphinna tuamtuam paitou zel ding in thukim uhi.
Thudang kizadan in Senapati ah antang pua Truck 2 kihal laka ase dimdem pen a driver Sahid Ali (35) of Sanggai Yumpham(Thoubal Dist) a gendan in zna nitak dak 11.00 vela Senapati tungpan phet Maruti 800 (No. omlou) khat in makhelh in meltheihlouh mi bangzah hiam in amah leh handyman Wazid Ali (25)of Sanggai Yumpham kaikhia in mun a theih ngeilouhna uh munkhat ah tonpih uh a. khahkhiak ahih un Truck kangse khinta hi’n gen hi. Senapati Police Station a officer in-charge Th. Ngouni, S.I. in Truck halsiat om chih report a muh phet in Dist. Council office complex a om 109-Bn. CRPF-te tonpih in delh a, thil omdan suizuina paizel hi’n gen hi.

Central team in inspection bawl
Lamka, Dec-27: Ministry of Rural Development and Drinking Water, Govt of India a National Level Monitor team apan Shashi Kant leh Shashi Bukan in Thoubal dist leh CCpur dist sunga Rural Development scheme nuai a nasep tuamtuamte enkhe ding in Manipur hong pha uh a, Dec 24, 2012 in Thoubal dist sunga scheme tuamtuamte etkhiakna zou in zan nitak in Lamka ah hong giaklut uhi.
Tuni’n DC office a BRGF Resource Centre ah DC makaih in DRDA staff te tawh joint meeting nei uhi. Huai tawh kisai DC/CCpur apan kizadan in National Level Monitor te’n MGNREGS, SGSY, Total Sanitation Campaign, Water supply scheme leh NSAP nuai a thil tuamtuam enkhe ding uh hi’n gen hi. Central palaite’n tuni’n Lamka block a develop,mernt scheme tuamtuamte enkhia uh a, huai ah LT Puii, SDO/CCpur; H.Chinkhanneng, AE/PHED; A.Umarani Devi, DSWO leh DRDA official te’n zui uhi.
Lamka block sungah Geljang, Mata, Lingsiphai leh Hiangtam Lamka ah MGNREGS, IWMP, SGSY, Total Sanitaion Campaign, IAY, Water Supply leh National Assistant nuai a scheme tuamtuamte enkhia uhi. Dec 28, 2012 in Saikot block leh Samulamlan block nuai a development scheme tuamtuamte enkhe ding uh hi’n kigen hi. Central palaite’n a gendan un tuni a inspection a pat uh himahleh, a etna chiangchiang uah nakisemte lungtunhuaisa mahmah uh hi’n gen uhi.

Police-te panlakdan thupi
Lamka, Dec-27: Film Forum Manipur & Manipur State Shumang Leela Council pawlin Manipur ah Dec 21, 2012 akipan General Strike a puanziak un mun tuamtuam apan Lamka tungsuak ding lai Imphal ban paitheilou a tang(stranded) tampi om sek hi. Huaite Minister, MLA-te, MDC khenkhat ban ah DC/CCpur leh SP/CCpur makaih in Police-te’n hahtakin pan alak ziakun Lamka tungsuak ghei uhi. Lamka tungsuak theiloute’ pina dingin student organisation te’n gari tamtak kaikhawm uh a, DC/CCpur in gari thautui teng ngaihtuah vek hi’n kigen hi. SP/CCpur makaih in Police te’n amau’ area hikei mahleh mipite khualna ziak in sih-le-hi’n kal ah Imphal khawsung mun tuamtuam leh Airport ah khualzinte pikhia uhi. Dec 24, 2012 nitak diakdiak bangin SP/CCpur makaih in Police-te’ khawvak phialin Dec 25, 2012 zingsang dak 1:30 tan Lamka Police Station ah Imphal apan hongtung dingte ngak in phalbi khawvot nuai ah nasem uh hi’n thusuak kingah hi. Imphal apan Lamka hong paisuak theilou mi tamtak in Lamka Police-te kipiakzawhdan thupi sa in kipak petmah uh hi’n thutut kingah hi.

Awllen Guolnuom 2012 zatna kipan
Lamka, Dec-27: Joint Section, YMA Chiengkawn Branch makaih in tuni zingsang a kipan 28, 2012 tan daihding ‘11veina Awllen Guolnuom 2012’ kipan hi. Sun in Donbosco compound ah kimawlma tuamtuam om a, nitak in Chiengkawn Community Hall ah mipi kikhopna om hi. Tuni zingsang dak 6:00 in Marathon Race om a, Chiengkawn Bazar a YMA Branch office apan Khamginlun, Secy YMA Chiengkawn Branch in khahkhia (flag off) in Mission Compound saka suanglakna tan taitung uhi. Huaizawh in Don Bosco compound ah kidemna tuamtuam om hi.Nitak dak 5:30 in Chiengkawn Community Hall ah mipi kikhopna om hi.
Dec 28, 2012 nitak a kikhopna ah Chief Guest in S.Thienlaljoy Gangte, MCS pang ding a; Guest of Honour in Ng Joseph, IRS leh Functional President in S.T Solomon, Chief of Chiengkawnpang pang ding hi.Huai ah lasiam tuamtuamte apan lasak ngaihkhiakna om ding a, (late) Khaitinpau @ Tawia Award hawmna leng om ding hi.

Electoral Roll final revision
Lamka, Dec-27: Hun bangtanhiam paisa apan CCpur district ah electoral roll revision kipan a, huai paitou zel hi’n kigen hi. DC/CCpur apan kizadan in electoral roll apan behlap ding leh paikhiak ding bangzahhiam om a, behlap ding tawh kisai leh hearing ding teng zawh hita chi’n gen hi. Aman a genbehna ah finalised kibawl lel hi’n gen a,huai Dec 30, 2012 tan a zawhsiang hiding in gen hi.

Dongjang khua ah biakinn leh Guest House hon hiding
Lamka, Dec-27: Dongjang Presbyterian Church Construction Committee in a bawl uh Dongjang Presbyterian Church building leh Guest house honna Dec 29, 2012 zinglam dak 11:00 in om ding hi. Dongjang Presbyterian Church building pen Rev. J.Lalremsiama, Adminsitrative Secretary, Manipur Area MPCS in a hong ding a, Guest House pen Ms. Jacintha Lazarus, IAS, DC/CCpur in hong ding hi.

SP teng kigingsa a omdi’n theisak
Lamka, Dec-27: Dec 18, 2012 a Chandel a thiltung ziakin Manipur ah General strike om sungin mipi’n haksatna thupitak tuak a, zan nitak zankim apan UNC te’n Naga area sung ah dakkal 72 sung strike puang nawn uhi. Huai hunsung in strike supporter te’n govt van tuamtuam ahihsiat khakding uh venna in Dist teng a SP omte pilvang tak leh panla thei dinga kigingsa a om dingin IGP Zone-II in theisak hi.

Rs 80 lakhs man kangtum
Lamka, Dec-27: Kimjoe Gas neitu Lienminthang tenna inn apaisa Dec 22, 2012 nitaklam dak 4.00 vela kang tawh kisai inn-neitu in Dec 24, 2012 in Fire Brigade ah detail report pia hi’n kigen a, Fire Brigade lam apan thu kingahdan in meikang ah innsung van bangmah lakkhiak omlou phial a, van kangsiateng avek a kigawm in Rs. 80 lakhs vel man phazou hidan in gen uhi.

Lanva-lui ah nin paih phallou
Lamka, Dec-27: Innkuan tamtak in tuinek dingin Lanva-luitui zang uh a, tui haksatna kipat ma a huailui hahsiang sawmin Pearsonmun Village Authority in Lanva-lui a ninpaih ding khamna thusuah uhi. Lanva-lui in a totkhak masak khua Pearsonmun ahihman in vengdangte ading a leng nek-le-dawn tak tuitui siang hithei dingin Village Authority in bawl sawm uh a, huaiziakin Lanva nak akipan akhanglam ah kuapeuh in tui ninsak thei ding nin himhim pailou pailou dingin theisak uhi. Lanva lui kum tenga thuk deuhdeuh leng dalna ding in huai luidung a suang(stone) lak ding leng kham uh chihthu kiza hi.

ZTS te’ Get Together
Lamka, Dec-27: Zomi Theological Students (ZTS) pawlin Dec 28, 2012 zinglam dak 11:00 in Khominthang, New Lamka ah Get Together nei ding uh a, huai ah Zomi sung a Laisiang thou sinte telding uhi. Huai hun ah fellowship leh meeting poimawhtak neiding uh a, nitaklam ankuang umkhawm ding uhi.

ZYA Mualnuam Unit makaite
Lamka, Dec-27: Zomi Youth Association,(ZYA) Gen HQ makaih in mun tuamtuam ah ZYA Unit leh Block thak honna paitou zel hi’n kigen hi.Huai dungzui in tuma deuhin ZYA Mualnuam Unit honkhiat hi a,kum 2012-2015 sung vaipaw ding telna ah President in Thanglung, Vice President in T.Pausiam, Secretary in L.Thangliansng, Asst Secy in H.Khamkhanlian, Finance Secy in T.Paukhankhual, Asst Finance Secy-cum-Treasurer in H.Nengkhanlal leh Asst Treasurer in Songkhankhual tel uh a, Adviser di’n G.Suanpi, Chief of Mualnuam leh D.Lianthang guang uh hi’n kigen hi.

Interview hun ding kisuan
Lamka, Dec-27: National Institute of Electronics and Information Technology (NIELIT) Imphal in CCpur extension a semding Guest faculty (computer/Electronics) 1 leh Guest Faculty Support Staff (GFSS) 1 laksawm uh a, bandh leh strike om ziakin interview ni ding ahun suan uh a,a lunglutte’n ZEO office ah apply theih lai ding hi. Husilou in DOEACC ‘O’ level leh Computer hardware maintenance ‘O’ level sinding lak asawm uh leng ahun suan uh a, ZEO office ah thuchian kantheihding chi’n thutut kingah hi.

SUUNNA
Juliana Niangkhanching(58) d/o(late) Paul Thongzalian of Bungmual apaisa Dec 24,2012 zingsang baih takin New Delhi a a tenna inn uah heart attack in puksia a, nitak dak 10.30 velin dam zoulou in si hi.Siluang zan in Bungmual puaktung hi a, zan mah in Bungmual hanmual ah kivui hi.
Majahon H Nengzapau(70) s/o (late) H.Ngulzachin of Tipaimukh Road, Hiangtam Lamka in zunkhum ziaka natna tuamtuam bangtanhiam a thuak nungin zan zingsang dak 3.30 velin si a, zan mah in Lamka hanmual ah kivui hi.
T.Jamkhomang Haokip (48) h/o Lamkhonei of Dist HQ, Tuibuong Dec 23, 2012 zinglam in Imphal Air port ah mi kha dingin Activa gari a mi 3 kipawlai Bishnupur ah bawng (cow) ziak in accident uh a, Jamkhomang alu liam in Shija Hospital puaktung himahleh damzoulou in Dec 25, 2012 in si a, huai ni mah in Dist HQ hanmual ah kivui hi.

IMPHAL NEWS
Mao ah Gari 113 tang(stranded)
Imphal, Dec-27:United Naga Council (UNC) in Dec 26, 2012 zankim akipan dakkal 72 sung General strike a pat uh paitou zel a Naga-te tenna bial ah khauh mahmah hi’n kigen hi.General strike ziakin Imphal zuana paisuak theilou Gari 113 vel Mao gate ah tang(stranded) uh hi’n leng kigen hi. Senapati dist. a Mao, Maram leh Tadubi mun ah bandh supporter-te’n lamlian ah Gari tyre hal uh a, Chandel dist. a Chakpikarong leh Toupokpi mun ah numei pawlte’n tyre ha in lampi a khaktan ban uah Manipuri film, song, cassette leh CD te hal uh a, bandh supporter te’n phaizng biala strike om counter-na hilou in Alternative arrangement tawh kisai a kiphinna masa hi’n gen uhi.

Inquiry committee sitting masa
Imphal, Dec-27:Prime News channel TV a correspondent banah DDK news stringer Thangjam Dwijamani @ Nanao apaisa Dec 23, 2012 ni’n bandh ziaka buaina cover lai kaplup ahihna suizui dia govt in a guan Inquiry Committee pawlin tuni’n sitting masa nei uh a,huai ah a case IO apang OC Lamphelpat telin police 3, VDF 9 leh media person 1 in statement pia uh a, Dec 28, 2012 in leng sitting sunzom lai ding uhi. Akigendan in Committee pawlin a zekaipen in leng kal 1 sungin govt ash report pe ding uh chihthu om hi.

Tukum adin Dec 24,2012 votpen
Imphal, Dec-27:Kumlui 2011 tawh tehkak in tukum in khua votdan uangzaw hi’n kigen a, tuni’n khawlum le votdan tehna temperature 3.2 degree Celsius tung hi. Dec 24, 2012 in temperature 2 degree Celsius tung a, tukum sung adia khawvotpen ni hi’n kigen hi. Ukhrul leh Senapati district ah tang sangdeuhte ah vuk kia sahthei mahmah a, khawvot leng uang mahmah hi’n kigen hi.

ATSUM in Press Release suah
Imphal, Dec-27: All Tribal Student Union Manipur (ATSUM) President in tuni’n Press release a suah ah singtangmite adia kumteng phiala Christmas present in tribal-te ading a buaina thupitak tunsek hi’n taklang a, Dec 24, 2012 a Napet Chingol ah tribal student 13 huham tak a khoih ahihthu mawhpaih mahmah kawm in communal taka thilte ah ATSUM om maimai nawnlou ding ahihdan leng gen hi. Hun paisai in leng Parbung banah Yaiphakol, CCpur ah Dec 11, 2011 in Mrs. Hatkholhing(42) rape leh thah a om hi’n leng taklang hi. Tribal Christian kikhawm ding a kuanlai suang a denkhum leh Christmas ding ziaka dawr kai te vaulau a om thu leng ATSUM in mawhpaih in Manipur a singtangmite’n kitheih siamlouhnate koihkhiak a, khe khat a dinkhawm hun mahmahta hi’n taklang hi.

Capital punishment piak din puang
Imphal, Dec-27: Imphal East dist. a Napetpali mun ah Dec 24, 2012 in Senapati a Saikul sub-division akipan school naupang numei khoih(molested) mi 3-Tensubam Amitkumar Meitei (21) of Napet Pali, Ngangom Chandra Singh (21) of Napet Mamang Leikai leh Khaidem Sanahal (20) of Napet Mayai Leikai matkhiak hi uh s, Lamlai police station a koih in om uh chihthu m hi.. Maoist Communist Party Manipur te’n tuni a press release a suahna uah police custody a om mi 3te athil hih uh ngaihdam theihlouh ahihziak in capital punishment piak ding in thukimna bawl uh hi’n puang uhi.

Re-allocation of works/Transfer & posting

1. VK Thakral, IAS, Principal Secretary (Forest & Environment) as Principal Secretary (Forest & Environment/MOBC) & Member Secretary (MOBC) in addition.
2. Barun Mitra, IAS, Principal Secretary to CM & Principal Secretary (Finance/MOBC & SC) and Commissioner (Excise) and member secretary (MOBC) as Principal Secretary to CM and Principal Secretary (Finance).
3. Dr RK Nimai Singh, IAS, Secretary to Governor & Commissioner (Arts & Culture) as Secretary to Governor & Commissioner (Arts & Culture/ Youth Affairs & Sports).
4. H. Deelep Singh, IAS, Special Secretary (Youth Affairs & Sports) & Director (Youth Affairs & Sports/ Edn-S) as Director (Edn-S) & State Project Director (SSA/RMSA).
5. N. Ashok Kumar, IAS, Secretary to CM & Joint Secretary (Cabinet & Confidential) & State Project Director (SSA/RMSA) as Secretary to CM, Joint Secretary (Cabinet & Confidential) & Director (YAS) in addition.
6. Shailesh Kumar Chourasia, IAS, Joint Secretary(Finance), Director (Vigilance) & Project Director (MACS) as Director (Vigilance) & Project Director (MACS).
7. Modak Hrisheekesh Arvind, IAS, Director (Tourism), Commissioner (Taxes) & Staff Officer to Chief Secretary as Joint Secretary (Finance), Commissioner (Taxes/Excise) & Staff Officer to Chief Secretary.
ncipal Secretary to CM and Principal Secretary (Finance).
3. Dr RK Nimai Singh, IAS, Secretary to Governor & Commissioner (Arts & Culture) as Secretary to Governor & Commissioner (Arts & Culture/ Youth Affairs & Sports).
4. H. Deelep Singh, IAS, Special Secretary (Youth Affairs & Sports) & Director (Youth Affairs & Sports/ Edn-S) as Director (Edn-S) & State Project Director (SSA/RMSA).
5. N. Ashok Kumar, IAS, Secretary to CM & Joint Secretary (Cabinet & Confidential) & State Project Director (SSA/RMSA) as Secretary to CM, Joint Secretary (Cabinet & Confidential) & Director (YAS) in addition.
6. Shailesh Kumar Chourasia, IAS, Joint Secretary(Finance), Director (Vigilance) & Project Director (MACS) as Director (Vigilance) & Project Director (MACS).
7. Modak Hrisheekesh Arvind, IAS, Director (Tourism), Commissioner (Taxes) & Staff Officer to Chief Secretary as Joint Secretary (Finance), Commissioner (Taxes/Excise) & Staff Officer to Chief Secretary.