Khawvaiphei.com Topper Award hawmna ah Korea Pastor 2 inleng uap
Lamka, June-22 : Khawvaiphei.com saina leh Sterlite Computer leh Muana Vaiphei sponsored na in tuni nitaklam dak 3:00 in Cozy World restaurant ah Class X MIL (Vaiphei) Topper Award 2013 hawmna om a, South Korea apan Pastor 2 – Rev. Jung Kwang Soo leh Rev Chang Woong Park te’n leng uap uhi. Award sponsored te’n topper 3 te - P. Felboi Vaiphei s/o Lunlianlal Vaiphei of Pengjang; Kammuanlal s/o Pumlianmang of Pengjang leh Chinhawilian of Pengjang te kiang ah Award pekhia ua, Rev Th. Mangthianlal Vaiphei, President & CEO Glocal Volunteer in Pathian kiang ah vualzawlna ngetsak hi. Mi poimawh tuamtuam ban ah Rev. Jung Kwang Soo te’n thugenna nei uhi.

Bialtu MLA in Panglian ah Community Hall hong
Lamka, June-22: Panglian V/A leh Construction Committee saina in tuni zinglam in Panglian Community Hall honna program om a, Ginsuanhau, MLA (Singngat A/C) khuallian a pang in hongkhia a, Rev K.Zama Vaiphei, bial Pastor in Pathian kiang ah thumna in lan hi. Huai ah Guest of Honour in Tongkai Baite, MDC(Sangaikot) pang a, Rachel N.Guite, SDO/Singngat in leng uap hi.

Chief Guest in a genna ah MLA’ Local Area Dev fund Rs. 6.9 lakhs zang in Panglian Community Hall kibawl in atung leng kikhuh a, huai thupi sakthu gen hi.Khua khenkhat ah Rs 8 lakh bei a kibawlte leng atung(roof) kikhuhzou nailou ahihdan gen hi. MLA fund tungtawn a Singngat A/C a nasepna gah muh masakpen hi’n leng gen a, hall bawlna a sum piak nailouh omlaite August 2013 ma a piak hidinn gen hi. Singngat A/C a mihing kum 5 tunglam teng Biometric photo kila chiat ding in theisak a, biometric photo kila louteng tunung in India khua leh tui hilou chih hun hong om ding hi a gen in biometric photo kilaloute govt apan hamphatna tuamtuam piaktheihlouh hun om ding hi’n leng gen a, kuapeuh biometric photo kila chiat dingin ngen hi.

Principal Secretary( Health & FW) in District Hospital enkhia
Lamka, June-22: Dr Suhel Akhtar, IAS, Principal Secretary (Health & FW) in tuni sunnung in Lamka hongpha in Dist Hospital enkhia hi. Aman Medical Suptd room ah Maniram Sharma, IAS, i/c DC; Dr HL Liensang, CMO; Dr N.Paulginthang, Medl Suptd Dist Hospital; S.Khaikhopau Ngaihte, BO Hq, DC’s office leh Senior doctor hunkhop meeting neihpih hi. Huai zawh in OPD ward tuamtuam, CT Scan, blood bank, Operation Theatre, Gynea & Maternity Ward, Children Ward, Medicine ward, Surgical ward, DFW office, CMO office leh Dist Hospital gate kianga Generator zatlouh a om enkhia hi.

Thu kizadan in National Human Rights Commission teamte’n July 17, 2013 in Dist Hospital enkhe ding uh a, huaima teitei in CT Scan machine zattheih ding a bawl ding, electric power om hun ah CT Scan machine azawh kei leleng dakkal 1 sung a diesel litre 20 val negai generator zat theih dia koihdan ding enkhia hi’n kigen hi. Generator zat theihna ding in earth connection omlou teng leng electricity deptt te’n akintheilam a bawlding in EE/Electricity theisak hi’n kigen hi. Principal Secy in CT Scan koihna room hoihtaka hahsiang dingin akisaipihte theisak hi.
Dr Suhel Akhtar, IAS ahihleh doctor(Surgeon) ahihban ah Sept 30, 1995- June 28, 1996 sung DC/CCpur in hong om a, Dist Hospital tawh kisai adiak in OT room a et-hunah thil tamtak thei pah hi’n kigen hi.

‘Public Consultative on Autonomous Hill State’
Lamka, June-22: Central leh Manipur govt tawh SoO suaikai United People’s Front (UPF) saina in tuni zinglam apan Hiangtam Lamka a YPA Gen HQ Hall ah ‘Public Consultative Meeting on Autonomous Hill State’ om hi.Huai ah Rev Dr B.Luaichinthang in thumna in hun hong a, Calvin H. in program omdan tangpi pulak hi. K.Guite, Adviser ZRO leh John Pulamte, President Hmar Inpui a pan thugen ngaihkhiak hi a, huaizawh in Calvin H. makaih in houlimna(discussion) hun om hi. Huai programme zatna ah UPF a makai tuamtuam, Langkhanpau Guite, Chairman ADC/CCpur; Zomi Council Chairman LB Sona ban ah mi poimawh tamtak paikhawmte’n ngaihdan kikumuhi.

Khamtheih zuakte hawlkhiak hiding - BWWA, Bijang ah numei pawlin meisel tawh lampi zui
Lamka, June-22: Lamka khawpi ah khamtheih(drugs) ziaka siatna huaisetak doudal Bijang Women Welfare Association(BWWA) pawlin nasep sunzom zel uh a, tuni nitak dak 8.00 velin Bijang khawsung tawnin Sielmat tan lampi zui uh a, nupi tamtak paikhawmte’n meisel tawi kawm in khamtheih zuak leh hihte’n tawpsan dingin kikou uh a, ‘khamtheih zuakte pawtkhia’ un, chi’n kikou uhi. Huai huna BWWA makaite’n a genna uah thupiak om nung a zuak teitei matkhiak a om leh a inn chabi uh laksak hiding , khawsung akipan hawlkhiak hiding chi uhi. Amau June 11, 2013 akipan khawsung a thilsianglou omte hihsiang ding thiltup pipen hi’n gen uh a, khawsung mite gamtatdan enkai dingin nitengin duty uh chi uhi. Bijang area a khamtheih zuakte’n Pathian min leh khangsawnte’ khualna a tawpsan dingin leng mipite’n phuisam in ngen uhi.

Health Minister in Lamka pha
Lamka, June-22: Phungzathang Tonsing, Minister (Health & FW, GAD, CADA) in tuni zinglam in Lamka hongpha a, New Lamka PT Sports complex kim leh Lingsiphai gam ah BDO office bawlna ding mun lemchang enkhia hi.

Doctorate Degree ngahthak
Lamka, June-22: M.Kamminthang s/o Dr.M.Lachinkhai of Lailamveng in June 21, 2013
ni in JNU a School of Social Science akipan Doctor of Philosophy(Ph.D) ngah hi. Aman Dr. Harish Naraindas in a supervise na nuai a Thesis "Taming 'Bird Flu': A sociological study of an Epizootic Disease" chih tungtawn in Ph.D. ngah ahi hi.

Bohlui lei (bridge) kichim enkhia
Lamka, June-22:, June 20, 2013 sunnung in Shaktiman gari in Khuga right side canal apan Bohlui khua lutna a lei (bridge) tunga tailai lei in a kichippih ziakin tuni sunnung in Ginsuanhau , MLA (Singngat A/C) in lei kichim hong enkhia hi. Aman a gendan in June 24, 2013 apan Bohlui lei bawlna nasep kipan ding a, canal apan Bohlui khua lutna lei (bridge) akinlam a bawlzawh hidin gen hi.

SSC saina in exam om ding
Lamka, June-22: Staff Selection Commission (SSC) saina in Lamka a exam centre ah June 23, 2013 zinglam dak 10:00 akipan sun dak 12:00 sung Delhi Police nuai a SI sem ding, Central Armed Police Forces, CISF nuai a ASI leh NCB nuai a Intelligence Officer sem ding lakna din examination om ding hi. CCpur district ah candidate 810 vel om a, CCpur govt college ah candidate 450 in exam ding uh a, Lamka govt college ah candidate 360 vel exam ding uhi.

SSPP makaih in Home Reception
Lamka, June-22: SSPP Foundation Trust- te’n June 23, 2013 sunnung in GBC campus a Jelshyam Chapel ah SSPP heutulian Manipur pawlam a sepna nei a retired V.Dongzathang, N.Tuankhankhup, Thiauzakhup Hangzo leh Khaikhanthang Hangzo vaidawnna (Home reception) nei ding uhi. Huai hun ah Vumlunmang Vualnam, IAS, Joint Secy (Home) Govt of India apan thugen ngaihkhiak hiding a, heutu liante Rev. Dr. S.Langzakham, DS, Lamka South Divn. EBC in thumsak ding hi.

World Blood Donors Day 2013
Lamka, June-22: Blood Bank Committee, CCpur leh DAPCU/CCpur pangkhawm in June 24, 2013 sunnung dak 1:30 in Dist Hospital a OPD Hall ah World Blood Donors Day 2013 zang ding uhi. Huai hun ah Dr Paulunmang, MO i/c Blood Bank in kum 2012-13 sung a Voluntary Blood Donation camp 6 vei om hun a sisan thawhte leh Dist Hospital a sisan tawh mi 150 vel kiangah kipah etsakna in certificate pe ding hi. Blood Donors teng tawh Association of Blood Donors,CCpur kichi bawlkhiat hidin kigen hi.Kum 2012-13 sung in CCpur dist in sisan bottle 1281 poimawh lakah mi kiphal 150 vel in sisan bottle 1 chiat thawh uh a, sisan bottle 834 te ahihleh damloute’n a ngaihtuah uh hi a,sisan bottle 305 bel exchange thawh hi’n kigen hi. Dist Hospital a blood bank te’n damlou sisan piakngaite ading in kha 1 sung in sisan bottle 107 poimawh gige uh hi’n kigen hi.

Dist E-Governance thu meeting
Lamka, June-22: Maniram Sharma, IAS, i/c DC makaih in tuni sun in Dist Training Centre ah CCpur Dist sung a VLE-te, DeGS, DIT, MSITS, M/S Zoom leh M/S HUGHES te’n meeting nei uhi. Huai ah Common Service Centres (CSCs) function-te a VLEs te’ haksatna thu, E-Governance Schemes tuamtuam, online monitoring tools, ZOOM Online leh APANA CSC thu genkhawm uhi.

Tuithalui ah siluang 1 kimukhia
Lamka, June-22: Saidan lei (bridge) sakdeuh ah tuni sunnung dak 2.30 velin Saidan khawmite’n Tuitha-lui in siluang a taihlai mu in lui apan kaikhia uh a, puan in tuam uhi. Nitaklam dak 3:30 velin Police te’n siluang la in Dist Hospital morque ah koih uhi. Thu kizadan in Elvis s/o Lalrohim of Saidan leh mi bangzahhiam in Pick-up gari zangin bazar pha uh a, innlam zuanlai Saidan lei(bridge) a khenzawh un Tuithalui tui in siluang 1 taih mu uh a, Elvis leng Tuithalui a dianglut in siluang kaikhia in Saidan lei (bridge) nuai ah koih hi. Aman a gendan in siluang a kaihkhiat hun ah leng anak(nose) ah sisan pawt khia a, khekol tom (cargo) teng a, a mel et in singtangmi ahih gintakthu gen a, amai lak soisakna omziak in ni 2 vel paisa in kuate hiamin a soisak lup nung un Tuitha-lui a pai uh hidin ginthu gen hi.

MLPO makaite leh kipahpihna
Lamka, June-22: Tuni sunnung in Zomi Colony Hausapa huangsung ah Munluo Phungpi Organisation(MLPO) makai thakte’ kianga charge piakna leh Cl-X leh XII a lawhchinna ngahte pahtawina zang uhi. Huai hunah Zomi Colony hausa Upa M. Chinkham in Cl-X zoukhia student 15 leh XII zou student 12 te Award of Recognition Certificate pia a, amaute adinga vualzawlna ngetsak in Pastor M. Khamkhansuan in thumsak hi. MLPO sung apan Miss Sylvia Hauzoukim Munluo d/o M. Lamkholun of Singngat in Kerala CBSE ah CGPA-10 in zoukhia a, Miss Jeneth Hatmuanching d/o Khamkhanhau of Zomi Colony in CGPA-10 mah in zoukhia hi.

Office Bearer thakte charge piakna ah M. Dongzalam, ex-Secy in makai a, tuma a election ah President din M. Thianzathang, Secy in Dominic Khammeng, Treasurer in M. Ginthanlian telching uhi. Programme zawh in MLPO sunga makaite leh mipite’n ankuang umkhawm uhi.

SUUNNA
Manngaihlun d/o Khailun of Bethlehem Veng, Rengkai tuni sunnung dak 1.15 velin New Bazar waiting shed kiangah sisa in muhkhiak hi a, June 23 in Rengkai hanmual ah kivui ding hi
Upa. T. Ngulkhohen(88) f/o T. Hemkhosei of Zomi Colony zan sunnung dak 2.55 velin Imphal a Sky Hospital ah teknat in si a, tuni in Zomi Colony hanmual ah kivui hi.
S.Langminlian s/o (late) S. Khamzalam of Simveng tuni zinglam dak 9.00 velin Imphal ah si a, June 23 in Simveng hanmual ah kivui ding hi. Amah Imphal a SO semlel hi’n kigen hi.

IMPHAL NEWS
MP leh MLA te’n kha 1 lawh thawh ding
Imphal, June-22: Uttarakhand state ah tuilian ziaka mihing tamtak a sih banah tutan omna kitheilou a tamkhop om a, UPA Chairperson Mrs Sonia Gandhi in Congress MP leh MLA tengin panpihna dan in kha 1 lawh thawh dinga thupuan a bawl dungzui in Manipur apan MP 3 leh Congress MLA 42 te’n a kha khat lawh uh thawh(donate) chiat ding uh chi’n Manipur govt thupuangtu CAF & PD M. Okendro in gen hi.Tuni a Cabinet meeting in huai thu genkhawm in kha 1 lawh thawh ding in thupuk uh a, Congress Legislature Party(CLP) meeting in leng huai lemsa in thupuk uh hi’n thusuak in gen hi.

Kum 1 sung in UG 66 leh security 8 kaplup in om
Imphal, June-22: Manipur Police deptt t in kum 2012-13 sung a Annual Administrative Report a bawl dan un kum 2012-13 sung a kikaptuahna ah UG 66, civilian 24, security personnel 8 kaplup hi uh a, security personnel 28 liam uh hi’n kigen hi. State Police te’n UG 25 vel kaplum uh a, security personnel dang te’n UG 22 leh combined team in UG 8 kaplum uh a, faction killing ziakin UG 10 si hi’n kigen hi. Kumlui sungin helpawl 1320 mat in om uh a, huai lakah state Police te’n mi 685 leh security forces dang te’n helpawl mi 461 man uh hi.Helpawlte’ apan thau 384, thautang 8918, hand grenade 320, detonator 447, bomb 5, lethod bomb 41 leh IED 39 muhkhiak hi’n kigen hi. Manipur leh Nagaland a helpawl tuamtuam 16 te’ apan cadre 220 vel govt. ah kipekhia uh hi’n leng kigen hi.

District teng ah ‘District Court’
Imphal, June-22: Law & Revenue Minister Th. Debendra in Manipur a district teng ah ‘District Court’ bawlkhiak ding in govt in panla a, amasa in Thoubal, Bishnupur leh Senapati ah bawl masak hiding chi’n gen hi. District Court bawlkhiak nung in pending a om case tuamtuam akinlam a zawh theih pahpah hita ding a, Family court a case omte leng District Court ah ngaihtuah fel theih hiding chi’ gen hi. Law Minister in a genzelna ah Manipur High Court a Judge ding 5 ngetna lak ah Centre in 4tan hong phalsak a,tulelin Manipur High Court ah Chief Justice telin 2 lel om uh a, Judge dang 2 akinlama guang dingin state govt in Centre ah nawn touzel hi’n leng gen hi.

Sana Konung gam state govt in la ding
Imphal, June-22: Palace compound a om Manipur leng(Maharaja) omna Sana Konung leh huai kim-le-kianga gam omte ‘Manipur kichi kumpi(Leng) nei gam ahi’ chih lahna ding in State govt in la ding a, Historical Monument Act nuai ah hoihtaka puah leh kepbit hiding chihthu om hi. Sana Konung ah tulelin Manipur Mahajara Leishemba Sanajaoba khawsa lel hi’n kigen hi. State govt in Sana Konung gam lak a sawm Manipur Leng zahlouhna hilou in tunung a khangthak dingte’n leng Manipur kichi kumpi neia kivaihawm gam ahi chih a theihna ding uh deihna hizaw chi’n CAF & PD Minister M. Okendro in gen hi. Aman a genzeldan in Sana Konung leh akimlak gam letdan 12-23 acres vel hi’n gen hi.

Commando te’n helpawl 3 mankhia
Imphal, June-22: Thoubal Dist a Heirok ah PREPAK(PRO) te’ om uh chih thuguk zak ziakin Thoubal Commando te’n tuni sunnung dak 2:30 velin Heirok ah search operation bawl uh a, PREPAK (PRO) active member Th Janel Singh (28) s/o Th. Modhu Singh of Heirok Part-II Devi Mandop mankhia uh a, amah apan Nokia Mobile Handset 1 mukhia uhi. Amah kipuanna ah L Ibungo Singh(36) s/o (late) L. Bheiya Singh of Heirok Part-II Devi Mandop inn ah Chinese handgrenade 17 vel selgu ahihdan a gen dungzui in Commando te’n L Ibungo tenna inn valuh in antang koihna mun ah grenade 17 leh Kechaoda Mobile Handset 1 banah SIM Card 2 mukhia uh hi’n kigen hi. L Ibungo thudotna ah L Maimu Singh (34) s/o L. Janmajoy Singh of Heirok Part-II Devi Mandop, kichi in grenade te’ kem dinga piak sawm ahihdan a gen ziakin Commando te’n L Maimu Singh leng mankhia uh a, amah thudotna ah PREPAK (PRO) a self-styled District Commander & Finance Secretary, M Inaobi (32) s/o N. Jambu Singh of Heirok Part-II Devi Mandop in mi vaulau kawma sum ngetna dia a piak hi’n gen hi.

Ramlal Paul Hr Sec ah numei kia kai ding
Imphal, June-22: Deputy Secretary Education (S) in tuni’n order suah in Ramlal Paul Higher Secondary School ah numei kia kai ding chih hi a, huai dungzui in Ramlal Paul Hr Sec School leng ‘Ramlal Paul Girls Higher Secondary School’ chih hita ding hi. Huai Hr Sec School ah numei kia kai ding chihna ziak Education Minister M. Okendro in a genna ah govt school a kainuam numei tamtak khawsakna haksa om a, huaite sum-le-pai senglou a govt in lai zilsak a tup ziakin Ramlal Paul Girls Hr Sec School ah numei kia kaisak sawm hizaw in gen hi. Minister in a gendan in TG Higher Secondary School, Ibotonsana Higher Secondary School leh Ramlal Gaul Girls Higher Secondary School 3te govt in numeite kia kaina ding in hoihtaka puahsawm hi’n gen hi. Huai school 3 a pasal naupang Class XI leh XII te Johnstone Hr Sec School ah kai ding uh a, Class VI akipan class X te Keishamthong Model High School leh huai kimnai a govt High School leh Junior High School omte a kaisak hiding uhi.

Silver Jubilee lottery ticket honna om
Imphal, June-22 : YPA Imphal Block in Nov 9, 2013 in Silver Jubilee a lop a sawm uh tawh kiton in lottery bawl uh a, tuni’n raffle ticket honna om a, huai ah Chief Guest in Vungzagin Valte, Parliamentary Secretary(CADA, Hort. & SC) pang hi. Aman a thugenna ah singtangmite’chikhat ihi ua, pau leh ham tuam mahleh sisan kibang ihih ziakun kikhen thei i om kei uh, chi’n gen hi. Chief Host in M. Gouzamang Guite, EM/ADC pang a, Guest of Honour in P. Doungel, IPS,Principal MPTS pang hi. M. Gouzamang Guite leh P. Doungel in YPA panpihna in Rs. 5000/- tuak pia uhi. Lottery ticket khat zel Rs. 200/- a zuak hiding a, 1st prize ah Nano Car, 2nd Prize - Honda Activa leh 3rd Prize- Samsung Led 32inch hiding a, consolation prize 10 om ding hi’n kigen hi.

Nghathal ah MZP Conference-cum-Meritorious Award hawmna om
Lamka, June -21: Mizo Zirlai Pawl(MZP) Manipur HQ saina in tuni in Nghathal YMA Hall ah ‘the 40th Annual Conference-cum-Meritorious Award 2013’ hawmna om a, Langkhanpau Guite, Chairman ADC/CCpur khuallian in pang hi. Huai ah Guest of Honour in Maniram Sharma, IAS, i/c DC/CCpur pang a, Functional President in T.Sumlianthang, MDC (Lanva) pang hi.

Chief Guest in agenna ah CCpur dist ah student organisation tuamtuam omte pawnkhawm poimawh hi'n gen hi. Student-te tunung a nam leh gam, society leh dist makai ding hi'n gen a, laisim hun ah asiampen a pansawn a laisim ding in hasuan hi. Aman a genbehna ah nu-le-pa te'n tate’ laisimna dinga kithuahpih poimawh hi'n gen hi. Student te'n nu-le-pa zahtak a, Pathian thei gige leh mahni sanga upa zawte zahtak ding, laisimna ah tupguh hoihtak neihding, laisim zou a sepna hoihtak neihhun ah leng kiliansak mailou a mi panpihtu hi ding, Pathian kiang ah kipahthu gen leh mahni pianna nu-le-pa zahtak ding in hasuan hi.

Tuni a Conference ah class X & XII exam a lawhching teng kiang ah certificate leh thilpiak tuamtuam pia uhi. Lungmuana, IAS in apa’ theihgigena dingin ‘Hiako Memorial Award’ pankhia a,topper teng lakah huai award hawmkhia uhi.

CBSE nuai a class X ah Chiengkawnpang khawmi Chiinneilhing leh Mercy Kimneithiem te'n topper hihna la in Rs 3000 + memento tuak ngah uhi.K.Ruthy of Chiengkawnpang in CoHSEM nuai a class XII (Arts) ah topper hihna la in Rs 10,000 + memento ngah a, Science ah Jeremy Lalnunmawia Renthlei of Checkon, Imphal topper hihna la in Rs 7000 + memento leh Commerce Lamthiankim of Nghathal in topper hihna la in Rs 7000 + memento ngah hi.

Mizo Literature Society in MIL-Mizo topper kipahman a bawl uh hawmkhia uh a, class X ah Chiinneilhing of Chiengkawnpang (CBSE) leh Class XII ah Lalhriatrengi of Muolvaiphei (CoHSEM) in topper hihna la in Rs. 1500/ + memento tuak ngah uhi.

i/c DC in Pucca side drain leh Footpath kibawl enkhia
Lamka, June-21: Tuibuong apan Lanva lei (bridge) kikal Tedim ah MGNREGS 2012-13 a nitha 25 zangin khua leh veng bangzahhiam in Job Card tungtawn inTedim Road lampi nawl ah pucca side drain leh footpath bawl uh a, mun bangzah hiam ah ginataka bawl ahihlouh ziakin tuni nitaklam dak 4:30 apan Maniram Sharma, IAS i/c DC; S.Khaikhopau Ngaihte, BO Hq DC’s office; L.T Puii, SDO/CCpur leh C.T Lian, Social Worker te’n enkhia uhi.

Maniram Sharma in Pucca side drain kibawl lel mun bangzah hiam ah a thukdan leh aletdan hoihtakin feet tehsak a, veng khenkhat te’ nasepna lungtung mahleh veng khenkhat-te nasepna lungtung zoulou hi. Veng khenkhat in pucca side drain touthak in atung ah footpath bawl uh a, himahleh veng khenkhat in pucca side drain omsa bawlthak tuanlou in huaimah zangin atung ah footpath ding bawlthak pawl om uhi. Maniram Sharma in inspection a bawlna munte ah Appolo Veng leh Beulahlane kikal nasepna lungtung lou a, bawlthak vekding in SDO/CCpur theisak hi’n thusuak kingah hi.

EE/Electricity panla din thupia
Lamka, June-21: Mani Ram Sharma,IAS i/c DC/CCpur in Lamka khawpi sung mun tuamtuam ah electric post(khuam) kipukdek leh ahun beisa zattak nawnlou hunkhop om chihthu om ziakin Executive Engineer,CCpur Division, Electricity kiangah electric post kisia leh kipukdia kisa omzah kintaka suikhe ding leh huai munte a post(khuam) thak phut ding in thupia hi.

Army te’n nganja bag 4 dim mukhia
Lamka, June-21: 46-Assam Rifles pawlin tuzing dak 8:30 velin Tuibuong Peace Ground kiang ah Diesel Auto (No. MN-02A/4856) passenger pua a tailai check uh a, nganja bag 4 dim (kg 138 vel mukhia in Auto driver Khamminlian Vaiphei (32) s/o Gentinlian Vaiphei of Nghathal mankhia in sunnung dak 1:30 velin Police ah pekhia uhi. Thusuak kingah dan in Khamminlian tuni’n Tuibuong lam ah auto service lai Peace Ground khanglam ah pasal mi 4 te’n khawlsak in a vanpuak uh Moreh van hi a gen in New Bazar tan paw ding leh bhara Rs 1000/- piak dinga gen in tuang uh hi’n kigen hi. Auto driver in Lamka lam manawh in taipih a, Tuibuong Peace Ground gei ah Army te’n khaam uh a, passenger 4 te Army te’ matkhiak ma in Auto apan tawmkhia in taikhia uh a, Army te’n auto driver leh auto sunga a kipua teng tawh man uh hi’n kigen hi. Auto driver in mi 4 te’ vanpuak bang hihiam chih theilou hi’n kigen a, mi 4 te’n a van puakna uh hakkol 4 leh sai-ip bag 4 nusia uh hi’n kigen hi.

Seat luahlouhte cancell hiding
Lamka, June-21: Chairman ADC/CCpur apan thusuak dungzui in New Bazar Super Market a 1st leh 2nd floor a dawr/shop leh mehzuak seat piaka om tengin June 30, 2013 tana mahni seat chiat luahvek ding in theisak a, huaini tana seat luahlou a omlai leh seat piakna(allotment) cancelled banah deposit leng piakkik hilou ding a, kuama’n complain bawlthei lou ding chi’n V.Kamzagin, EO (Town), ADC/CCpur in theisak hi.

PTC Mizoram HQ in GHQ makaite mu
Lamka, June-21: Paite Tribe Council(PTC) Mizoram HQ makaite’n tuni sunnung in PTC Conference Hall, Hiangtam Lamka ah PTC/Gen HQ makaite kimuhpih uh a, pawlpi sung kivaipuakdan telin thu tuamtuam genkhawm uhi. Huai hunah PTC Mizoram HQ lam apan President H. Dalkhenkhai makaihna in Thangkhanlal Samte, Gen. Secy; Tualkhanzam, CEC Member leh Thawngzamuan, CEC member tel uh a, Gen HQ lam akipan L. Tualkhanhau, President telin makai tuamtuam tel uhi. Langkhanpau Guite, Chairman, ADC leh makai tuamtuamte’n PTC Mizoram HQ paidan ding telin thu tuamtuam hasotna nei uhi.

DC/CCpur tungah kipahthu gen
Lamka, June-21: CCpur Dist Hills Transport Union(CDHTU) in bandh leh blockade om hun ah CDHTU nuaia Gari-te passenger service leh vanpuak nawngkaina omlou din thautui kiching piak dinga DC/Ccpur a ngetna uh DC in Oil pump-te kiangah CDHTU ngetna banga thautui pedia a thu a piak ziakin CDHTU President leh Gen Secy in DC tungah kipahthu gen uh a,gari leh passenger-te adia lauhuai electric-gui,cable leh phone gui lamlian tunga niamlua a kikhungte enzui ding a CDHTU in DC a nget uleng DC in a kisaipihte thu a piak ziakin DC tungah kipahthu gen uhi.

Inside team leh Outside CCpur team
Lamka, June-21: CDSA saina in June 25, 2013 nitaklam dak 3:00 in Lamka Public Ground ah CCpur Dist a omlel (inside team) leh Outside CCpur team-te Exhibition Football Match 4 veina kimawl ding uhi. Huai hun ah Lamkhosem Khongsai, DTO/CCpur khuallian hiding a, inside team sik-le-tang in Zomi Football Club vs Hringsolal Thomte, Air India makaih in Outside CCpur teamte kimawl ding uhi.

Police te’n morgue ah siluang koih
Lamka, June-21: HQ Veng Youth Organisation pawl amau area ah nitak tengin duty uh a, zan nitak dak 8:30 velin CCpur H/S campus ah overdose a buaisia pasal 1 mukhia in Police-te sam uh a, Police-te tawh Dist Hospital tun uhi. Overdose a buaisia pen tuzing baihtak in dam zoulou in si a, kuahiam chih chetding in morgue ah koih uhi. Misi Pauminlun Guite (22) s/o (late) Thangkhansuan Guite of Khuanggin village(Thanlon sub divn) tulela V.Munhoih a om chih theihkhiak hi a, Police siluang a innkuante pekhia uhi.Pauminlun Guite’ luang akhua uh Khuanggin a vui dingin Lamka apan kipawkhia hi.

ASSEMBLY NEWS
Tuni’n demand tuamtuam 4 pass
Imphal, June-21: Assembly session ah tuni’n department tuamtuam 4 in March 31, 2014 tana a sum zat ding Demands for Grants,2013-2014 nuai ah akigawm in Rs.1,56,12,87,000 passed uhi. Huaite
1.Demand No. 15-Consumer Affairs, Food
and Public Distribution :Rs. 21,24,89,,000
2.Demand No. 18-Animal Husbandry and
Veterinary including
Dairy Farming : Rs. 81,61,61,000
3.Demand No. 26-Administration of Justice: Rs. 21,58,36,000
4.Demand No. 37-Fisheries : Rs. 31,68,01,000
6-IRB personnel 4 sihna ziak
Imphal, June-21: Manipur Assembly Session ah tuni’n Dr I. Ibohalbi Singh,MLA in June 5, 2012 nitaklam dak 3.15 in Maphou Dam a om 6-IRB personnel Hav Khamjathang Paite, Hav Th. Bimol Singh, Hav H. Deven Singh leh Rfm Hangshing Kaikhohau sihna ziak dotna a bawl Home Minister Gaikhangam in a dawnna ah Hangshing Kaikhohau amah leh amah kithat(suicide) hi a,midang 3te aman a kaplup hi’n Minister in gen hi.Misi 3 innkuante kiang ah GETI(GIS), Leave Encashment leh GPF(final) piak hi a,Hangshing Kaikhohau innkuante kiang ah GETI(GIS) piak hita chi’n leng Home Minister in gen hi.

Blockade thuak khate compensation
Imphal, June-21: K. Sharat Singh,MLA in kum 2011 a National Highway a Blockade omlai a thuak khate compensation piak hi uhiam chih dotna abawl tuni’n Transport Minister Dr Kh. Ratan kumar in a dawnna ah Gari hihsiat a om 39 lak ah gari 29 compensation piak hi uh a, gari 10 piak hinailou chi’n gen hi.Gari 10te compensation piak dingin Home Deptt in Planning deptt ah sum ngen a, huai muh hunhun in Finance deptt apan phalna la in Home deptt in compensation pe ding chi’n Transport Minister in gen hi.

BPL card holder te’n wheat/atta muhzah
Imphal, June-21: CAF & PD Minister M. Okendro in tuni’n Assembly ah Kh. Joykishan,MLA in BPL card holder te’n wheat leh atta a ngahzah uh dotna bawl a dawnna ah BPL card holder te’n kha 1 sungin wheat kg. 1.04 leh atta kg .97 ngah uh hi’n gen a, huaite district-wise dana piak hi’n leng Minister in gen hi. Minister in a gendan in khateng a piak ding himahleh Manipur puaktung ahihlouh hun omsek a, huai hun chiang in back-log om zel hi’n gen hi.

IMPHAL NEWS
Bandh khauh taktak lou
Imphal, June-21:CPI Manipur State Council in tuni’n dakkal 12 sung Manipur bandh a bawl un phaijang bial ah hindan ngeina nawngkaisak zek mahleh singtanggam ah bandh khauh taktaklou hi’n kigen hi. Imphal area ah dawr tamzaw kikhak in nidang tawh teh in mi tawm mahmah a, City bus leh Inter-district banah inter-state bus chihlouh gari tai tawm mahmah a, private gari banah auto leh taxi service pawlte ngeina bangin service uh hi’n kigen hi. Bandh sungin buaina leh thil hihsiat om kei mahle CPI worker te’n dawr a khaksak ban uah mun khenkhat ha lampi a khak ziakun kiselna om zekzek hi’n kigen hi.

KNF(P) cadre tungtang hilhchian
Imphal, June-21:IFCD Minister Ngamthang Haokip in tuni’n a office chamber ah media te kimuhpih a, A/R te tawh kikaptuahna aliam KNF(P) cadre Thangboi Kipgen(27) zan in Deulaland a Christian Hospital a admit a om kuate hiamin Hospital apan pikhia uh a, huai tungtang ah amah leng kigolhkha in ngawhna om mahleh kigolh khalou ahihdan gen hi. Hospital ah a tanau Dr Alen Chiru tawh kimu dinga hawh hi’n gen a, huai hospital ah KNF (P) cadre a omlam leng theilou hi’n gen a, Smt Nemcha Kipgen, MLA tawh leng kimu kha lou hi’n hi’n gen hi.

Selection Test hun kisuan
Imphal, June-21: Controller of Technical education in academic session 2013-14 a Engineering leh Pharmacy course zilna ding a admission/nomination bawl theihna ding a Selection Test ding buaina tuamtuam ziakin June 30, 2013 ni adia kisuan hi’n gen hi.

Australian coach in sinsak
Imphal, June-21: Manipur Development Society (MDS) sponsored na in June 6, 2013 akipan ni 30 sung daih ding Australian Coach Milan Milovanovic in Manipur a district 9 apan player 30 (kum 15 apan 19 kikal) telkhiakte’ “One Month Intensive International Class Football Training” piak kipan a, June 30, 2013 in exhibition match dan in Manipur’s Dr Ao Champion football team tawh kimawl ding uh a, huai ni mahin Baichung Bhutia makaih football team leh Shillong Lajong teamte’ leng Khuman Lampak ah kimbawl ding uh hi’n kigen hi.

URF cadre-te’ mat thu taklang
Imphal, June-21: Imphal West/SP in zan in URF cadre-te’ mat tawh kisai thusuah bawl a, huai ah All Manipur Petroleum Tankers Union, President in DGP a complaint a khiak dungzui in FIR No. 133(6)2013LPL-PS registered hi a, Lamphel Police te’n FIR No. 133(6)2013 U/S 307/364/384/506/511/34 IPC and 16/17/20UA(p)A.Act of Lamphel P/S dungzui in URF atel P Ruihini @ Moiyamba @ Biren Meiteei (51) of Khurai Chinangbam Leikai; H Shantikumar @ Pamel Meiteei (37) of Yumnam Huidrom Makha Leikai; Y Shantikumar @ Raja Meitei (36) of Irom Meijrao Mamang Leikai leh K Premjit Singh @ Nimai @ Konthouba Singh (32) of Thiyam Khunjao Maning Leikai mankhia uh hi’n gen a, extortion adin mobile phone no. 8414066926 leh All Manipur Petroleum Tankers Union President ading vauna lehkha leng muhkhiak banah a gari zat uh Kh. Lukhoi Singh of Naga Mapal min a ki registered Tavera Car vom (MN04A/5091) leng matkhiak hi’n gen a, investigation leng paizel hi’n gen hi.