Police leh Transport deptt te’n Special Drive pan uh
Lamka, July-26: Police leh VDF banah District Transport Officer/CCpur nuai a staff te kithuah in tuni zinglam dak 10.00 akipan nitaklam dak 4.00 tan khawpi sung mun tuamtuam ah ‘Special Drive’ bawl uh a,gari tai velte ngentel taka check bawl in  Gari a registration No. Plate omloute, naupang kum chinglou gari hekte, 2-wheeler hek helmet khuloute leh zu leh khamtheih hih kawma gari hekte ahunkhop mankhia uh a, huaite liausak inTR-5 receipt cut zel uhi. Police leh Transport deptt kigawm a Special Drive om ni 2 sung daih ding ahih ziakin July 27, 2013 tan sunzom lai ding uh chihthu om hi.

SP/CCpur akipan thusuak om dungzui in Police personnel hunkhop banah Traffic police leh VDF personnel pawl in Transport deptt a staff-te tawh kithuah in tuni zinglam dak 10.00 akipan in Public Ground kiang Tipaimukh Road, Tuibuong a Peace Ground jul Tedim Road banah Central Lamka a Lailam-lui kiang Tedim Road leh Rengkai-Nehru Marg junction lak ah ‘Special Drive’ bawl in duty uh a,2-wheeler akipan 4-wheeler himhim checking bawl uh a,registration number plate omloute, Gari document bukimlou leh driving licence tawilou himhim a suakta omlou khop in khauhtakin panla uhi. Mun khenkhat ah naupang kum 18 chinglou a gari hek leh helmet khulou a 2-wheeler hek banah zu leh damdoi khemtheih hih(zukhamsa leh damdoi khamsa) kawma gari hek leng matkhiak om hidan in mit a mu khenkhat in gen uhi.

Pol Science a top-10 te kipahman peding
Lamka, July-26: CCpur Govt. College a Political Science(Pol Sc) department in Manipur University(MU) nuaia  BA (final year) result puankhiak laia lawhchingte tuni sunnung dak 1.00 in  College ah kipahpihna programme zang uh a, huai ah College a department tuamtuam apan sinsaktute, student lawhchingte banah  5th leh 6th semester zil laite tel uhi.

Principal Ricky Vanlallawm Guite in student lawhchingte kipahpih kawm in thanuam taka pangte lawhching zel uh ahihdan gen a, kum 1965 a CCpur Govt College phuhkhiak ahihnung in  sangtaktak a lawhching  tamtak omta hi’n gen hi. Kum nawn in College a Pol Sc a Head of department leh aseppihte’n sum kithawh in student-te hasotna kawm in  MU saina ah exam result suah hun ah Pol Sc a top 10 tan late kipahpihna piaksawm uh hi’n gen a, huai ding percent sangpen Rs. 7,000 piak hidinga, azom  Rs. 5,000, a 3na in Rs. 3000 ngah ding hi’n gen hi. Lawhchinna dingin student-te’ adin kuhkalna poimawhpen  a, TDC(BA) zoute’n Master degree sunzom dingin leng hasuan hi. Political Science deptt ah tukum in Ccpur Govt. College student 24 exam lakah pass zah  80% tung a, 2 in 1st divn in pass uhi.

Shaktiman leh Diesel- Auto kiphutuah: mi 4 liam
Lamka, July-26: Tuni zinglam dak 9.30 velin Tualnuam khua a FCI Godown kibawl kiang ah Mata lam zuan Shaktiman(No. MN-02A/7024) leh passenger pua a Lamka lam zuan  Diesel Auto kiphutuah kha uh a, Auto sunga tuangte lakah mi 4 liam hi’n kigen hi. Shaktiman in Auto a nawkkhakna ah Paulallian (30) s/o Daltingen of Tangmual a veilam khuk guh kitan in amit tung leng liam a,  serious sim hi’n kigen hi. Huailou in Letkholal (70) f/o  Genliankhual of Lingsiphai, a lu leh akhe liam  a, Upa Kamtinthang (80) f/o Jamtingen of Tangmual akhuk leh a aliam ziakin kikhui a, Ramjan (32) s/o Shalim Khan of Yaripok, akawng leh a pumlak nasa hi. Gari tuahsiatna ah Diesel-auto leng kisia a, aliamte hospital puaktung hi uh a, doctor te’n admit uhi.

Polling Station tungtang genkhawm
Lamka, July-26: CCpur dist. a polling station khenkhat a min khek ding leh polling station behlap dinga ngetna omte tawh kisai in  tuni zinglam in DC office ah political party tuam tuam meeting om hi. Meeting ah Polling booth rationalization tungtang ahamau mah in  thutanna n la theilou uh a, Imphal ah huaithu tut hiding in gen uhi. CCpur leh Henglep A/C ah polling station min khek ding a ngetna  mun 3 tuak ah om a, Saikot A/C sunga polling station 4 omte apan section thak 1 chiat koih dinga ngetna om hi.  Tipaimukh, Singngat leh Thanlon ah bel tuabang thu omlou hi. Tuni a thu tuamtuam  agenna uah Ccpur dist. a final theihlouh ahihman in  A/C tuamtuam a SDO chiat in ahun bangzel a hoihtaka enkai dingin  thupuk uhi.

Job oriented course 2 behlap ding
Lamka, July-26:Centre govt. in state tuamtuam a Community College 200 honkhiak ding a sawmte lakah Imphal a D.M. College of Science leh Lamka a CCpur Govt. College ah ‘job oriented course’ 2  om ding hi’n kigen hi. Huai course (i) Advanced Diploma in Computer Software and Hardware leh (ii) Automobile  Course hi a, tulela session  2013-2014 sung in pat sawm uh hi’n kigen hi. CCpur Govt. College Principal Ricky Vanlallawm Guite in a gendan in huai course tungtawn in student-te’n tulai  a siamna poimawh tuamtuam sinthei ding uh a, sepna ngah theihna  ding tana sinsakna piak hiding uh chi hi.  Lamka a Community College om ding pen Pauchungnung Vaiphei, Asst. Professor, Dept. of Political Science in enkai ding chih hi a,aman  tuma in St.Joseph Community College, Bangalore ah huaitawh kisai thil tuamtuam va enkhia hi’n g kigen hi.

TRABDA kum 25 chinna lawm ding
Lamka, July-26: Tipaimukh Road Area Business Development Assn(TRABDA) kiphuhkhiak nung kum 25 chinna October 12, 2013 in lop sawm uh a, tuni zinglam in IB Road a KKL complex  ah huaithu genkhawm uhi. TRABDA in ‘25th General Meeting’ a neihna uah Business session leh  Awareness campaign  a khen in session 2te ah silver jubilee lopna hun a zat dingin Rs. 1.5 lakh bikhiah uh a, TRABDA nuaia kikhaikhawm gari neite’ zuih dinga kibawl pen kumlui a mah zat dinglemsa uhi. Huailou in gari service leh station mun ding tawh kisai ah TRABDA executive member tawh gari neite’n genkhawm lai ding uh hi’n kigen hi.

Lawh ngetna in Rally kipan ding
Lamka, July-26: Dist. tuamtuam a Anganwadi worker te’n hamphatna(honorarium) a ngah dingte uh state govt. in pelou a, huaithu a lungkimlou in CCpur District Anganwadi Worker/Helper Association pawlin July 30, 2013 in khawpi sungah Rally paisawm uhi. Assn thusuakin a gendan in social welfare dept nuaia om Anganwadi worker & Helper-te’n kha 14 sung lawh a muhlouh ziakun July 30 in  Public ground apan Tedim road tawn in DC office tan rally pai ding uh a, lungkimlouhna thu leh memorandum leng DC/CCpur kiangah pe ding uh hi’n kigen hi.

Ahun beisa van tamtak haltum
Lamka, July-26: Zenhang Bazar a dukan khenkhat ah kicheina(cosmetic) van tuamtuam ahun beisa kizuak Rs. 80,000 vel man ding tuni’n  CCpur Consumers’ Club (CCC) pawlin khonkhawm in  haltum uhi. Consumers Club makaite’n  agenna uah hunpaisa ah khawpi sunga nektheih leh van chi tuamtuam ahun bikhiah beisate kaikhawm in hihse zel uh a, dukan khenkhat vauna leh theihsakna a piak nung un leng kilawmlou taka gamtang omlai hi’n gen uhi. Hibang gamtatna tawpsanloute matkhiak a om ua leh a dukan uh khaksak  hiding leh akisaipih ADC tawh pangkhawm a licence cancelled sak ding uh hi’n gen uhi.

DTC Tuibuong ah meeting
Lamka, July-26:Tuibuong a   District Training Centre(DTC)  ah Aug 1, 2013 zinglam dak 11:00 in VLEs temeeting ding uhi. District e-governance Society  a Chairperson  leng hikawm  DC/Ccpur in thusuah a bawlna ah DeGS, DIT, MSITS, M/S Zoom leh M/S Hughes  tawh meeting ding uh a, VLE-te haksatnate telin Solar Power Pack installation, Citizen Centric Service, VLE leh CSCs function theihna dinga guideline banah SDO/BDO-te pan mun tungtang genkhawm hiding ahihman in VLE-te telkim  ding in theisak hi.

Guta-te’n ZEO office sung luh uh
Lamka, July-26: Tulai in khawpi sungah gutate gamtatna uang mahmah a,  tunai chin in ZEO/CCpur office huangsung a DI  of Schools/Singngat room kiluh a, Computer system tuamtuam banah Monitor leh UPS telin van khenkhat gu uhi. Huai tawh kisai Kaikhanlian Guite, DI/CCpur in a genna ah ama’ office chamber’ a tukvelh  ah gutate lut uh a, huainung in Singngat DI room luh thei uh a, van tuamtuam gumang uh hi’n gen hi. Gutate’n amah  room ah calculator leh ar-pin bawm  gu uh a, DI of Schools/Singngat room a computer CPU a tat louh ziakin gu theilou in nusia uh chi hi.
***************************************
IMPHAL NEWS

Manipur ah Kargil Diwas kizang
Imphal, July-26: Tuni in  Secretariat South Block  ah Kargil Vijay Diwas zat hi a, huai ah  Chief Minister O Ibobi khuallian hi a, Functional President in  PHED Minister I Hemochandra in pang hi. Chief Minister in  a thugenna ah Kargil War lai a melma doutu Indian Army-te hansandan phattham ching ahihdan gen a, hinna pe phal  mihangsante zahna pia hi’n gen hi.

US team in Visa buaipih ding
Imphal, July-26:Kolkata a om  U.S. Consulate General in July 29-31, 2013 sung Imphal hongpha dinga, U.S. visa ngah theihna dinga theihtuak omte hong pulak ding hi. Kolkata a US Consulate General office thusuakin ataklatdanin US Consular team te’n Imphal hongtun hun un US Visa tawh kisai ‘public information sessions’ sai ding uh a,  Visa ahihleh non-immigrant tourist leh student visa hiding hi. Amaute’n Manipur University ah July 29 sunnung dak 2.15 in student Visa tungtang sinsak ding uhi. Mega Manipur School ah July 30 zinglam dak 11.30 in sinsak  ding ua, JNIMS ah July 31 sunnung dak 2.00 in  nei ding uhi. Classic Hotel (Board Room) ah July 31,2013  zinglam dak 9.00 in ‘Travel Agents Meet’ sai ding uhi.

Food Security hilhchian di’n nawh
Imphal, July-26: Congress makaih UPA govt in  Food Security ordinance  patkhiak dinga thupuan abawl uh BJP in centre leh state level ah doudal uh a, BJP Manipur Pradesh thusuakin tuni’n a gendan in Food Security Ordinance tawh kisai Congress in a paipihdan in India Constitution kalh ahi, chi uhi. BJP thusuakin a taklatdanin Congress vaihawmna state kia ah bangziaka Food Security Bill zat hiding hiam, chi in Congress kiangah dotna bawl a, tulela Congress paidan apan India kichi Congress vaihawmna kia hileh kilawm a latsakin om chi uhi.

RIMS Ambulance Service
Imphal, July-26: Regional Institute of Medical Sciences(RIMS)  in damloute puak vialvialna dingin Ambulance thak nei uh a, RIMS a ki-enkol nuamte leh etkol a om, huai ambulance zang nuamte’n Casualty Ward Telephone Number 2414478 contact thei ding uh a, alemkei leh Extension No. 104 or 2414720 or 2414750 contact thei ding uhi.

Amnesty International in nawh
Imphal,July-26: Manipur a kithahna khenkhat human rights bawhsiatna suak in mawhna neilou tanpha thah in omsek uh kichi a, huai tungtang suizui  dinga Supreme Court in  mawhpuakna apiakte kithuahpih ding leh suizuina kintaka zawhpih dingin Amnesty International in theihsakna leh ngetna bawl hi.  Amnesty International thusuak danin Manipur Police leh CID  te’n kha 6 sung in  ‘extra-judicial killing’ case omte suikhe dingin leng ngen uh chihthu om hi.  

KNF(N) cadre mat in om
Imphal, July-26: Kuki National Front(N) active member Salkeithang Kipgen @ Ranjit (28) s/o (late) Khailam Kipgen of Sugnu Serou Lamkhai, Chandel Dist kichi  Imphal West Police Commando te’n zan nitaklam dak 3.45 velin Thangal Bazar area apan mankhia uh chi’n S P/ Imphal West thusuakin gen hi.

Meitei-te’n ST status a nget dal ding
Imphal, July-26 : All Tribal Students’ Union Manipur (ATSUM) in Schedule Tribe Demand Committee of Manipur Valley (STDCMV) pawlin ST status a nget uh naktak a dal ding uh hi’n taklang uhi. Hiai tawh kisai in ATSUM in India PM kiangah leng memorandum  pia uh a, amau a genna uah  Manipur a Meitei-te’n  ST status a ngah  theihna ding thu uh omlou a, amau  piak ahih ualeh state dangah  leng piaktuak adang tampi om hidan in taklang uhi. Hiai pen Meiteite’n Manipur a singtangmite hamphatna suh sawmna hidan a gen in, socio-economic leh educational lam a ST te hamphatna ding teng hihbei sawmna hidan in gen uhi.

NPF  CCpur Branch honkhiak in om
Imphal, July-26: Naga People’s Front (NPF) Manipur State Youth, Women wing leh CCpur Division Office bearer ding guanna tuni in Imphal a Tribal Research Institute (TRI)  ah om hi. Huai ah Manipur state NPF President Soso Lorho in makai thakte kichiamsak hi. Manipur State Youth Wing ah Robert Maram in President hihna len a, Worthing Horam in General Secretary hihna len hi. Tuabanah midang 6 te Vice-President leh Secretary banah  Executive Members dingin kichiam uhi.

Women wing ah President ding in K. Henya Liringam, General Secy. din Ngamreiphy te kichiam uhi. CCpur division NPF makai dingin Genlunthang in President hihna len a, LM Thomas Mangte leh Kh. Lian Vaiphei ten Vice-President leh office bearer ding in kichiam uhi. Huai hun ah Soso Lorho in a genna ah  mi tamtak in NPF pen communal political party dan in ngaihtuah mahle uh huchibang party hilou a, NPF ideology a theihlouh ziakuh hizaw  in gen hi.

Re-allocation of Work/Transfer
1. Vanlalfel, MSS, SO(CAF & PD/Revenue)  as SO (Revenue)
2. R. Lalthanliana, MSS, SO(GAD Welfare/Library) as SO (GAD/Welfare)
3. Kaikhosat Kipgen, MSS, SO(Forest & Environment/DP)as SO(Forest & Environment).
4. Nengkhokim Lhangum, MSS, SO(GAD/Estd) as SO(GAD/Account)
5. T. Vei, MSS (Prob.) as SO (Hills)
6. Zourisang Thiek, MSS (Prob.) as SO(CAF & PD)
7. James Doujapao Haokip, MSS (Prob.) as SO(Education-S)
8. L. Thongkhomang Khongsai, MSS (Prob.) as SO(Hills)

‘Van gam ah hibang thil hawm hi nawnlou ding’- Vungzagin

Parliamentary Secy in ‘physically challenge’ te’ adin panpihna hawm

Lamka, July-25:Thanlon MLA banah Parliamentary Secy (Hort, Soil & CADA) Vungzagin Valte in tuni in a tenna mun New Lamka a ‘Niangzen Khualbuuk’ ah Thanlon bial-te’ adin Tribal Affairs & Hills tungtawn in  ‘disablity/physically challenge’ te’ adia panpihna  tri-cycle, wheel chair leh hearing aid hawmkhia hi. Huai hunah  Maniram Sharma,IAS, Addl DC/CCpur;  Ramsang Infimate, MCS, SDO/Thanlon, Dr Tunkhanmuan MO/Sinzawl PHC, Thangdam ZEO (retd) leh mi poimawh tamtakin uap uhi. Valte in mipi paikhawmte’ ma ah a gendan in  hibang thil ngahkhate kingaise mailou dingin ngen a, huai in, ‘Van gam i tunchiangin hibang thil hawm hi nawnlou ding’  tua hun a ngaklah huai mahmah chi hi.

Parliamentary Secy Vungzagin in agen behna ah tutung in zakna lam a tasam deuhte’ adingin hearing aid  20 hawmkhiak theihin om a, tuaban ah, khut-le-khe bukim taka om lah taksap neuchik neihkhak ziakin mi khat kiangah cycle peithum nei, khut a hektheih (tri-cycle) piak hi a, midang 4te’ kiangah kisawnna wheel chair piakin om chi hi. Hearing aid poimawh mahmah  mi bangzahhiam a omlai ziakin amaute’ adingin TD Director ah 5 ngetbeh a, a piakbeh theih ua leh mi 5 in hamphatpih laiding uh a, tualou in tutunga abial sung apan hibang hamphatna ngah zouloute’n a hong painawn chiang a hamphatna ngahthei uh ahihdan leng gen hi. Hibang thil a piantheihna ah Chief Minister O Ibobi  leh a govt tungah kipahthu gen hi. Hamphatna ngahkhate’ adingin Pastor V Songzathang in thumsak hi.

Social work lai electric current in mi 2 man

Lamka, July-25:Henglep sub-divn a Munpi khua ah tuni zingsang dak 7.00 velin mipite’n  social work nei in High Tension(HT) leh Low Tension(LT) omna electric line a kinaihluat ziakin kigamlatsak deih in suansau sawm uh a, HT gui apan LT gui lakna ah electric off uhi. LT post ah mi 2 kal uh a, mundang apan asangzaw a kaih sawm in mipite’n electric post a nawk lai un HT gui tawh kinaichik a om ahihman in kihettuah kha a, post lang tuaka mi 2 tuangte electric current in man a feet 18 vel apan leitual kidenna uhi. Huai mi 2te  Lamka puaktung a om in Dist. hospital ah admit hi uhi.Amau  Thianlemsong (18)  s/o Tongkhohen  leh Thanglianpau (19) s/o (late)  Damminthang hi uh a, Thianlemsong  a tawbou, aphei leh a awm liam a, serious sim hi’n kigen hi. Thanglianpau’ a lenuai leh awmlak liam a, amah serious lawlou hi’n kigen hi.

CDPSA leh CoHSEM in Workshop nei

Lamka, July-25: CCpur Dist. Private Schools’Assn (CDPSA) leh Council of Hr.Sec.Edn, Manipur (CoHSEM) in tuni zinglam dak 9.00 in ‘3-Day Workshop on Techniques of Teaching,Question Setting and Evaluation’chih thupi zang in Physics,Chemistry,Biology leh Mathematics teacher-te adi’n  Donbosco Hr.Sec.School ah workshop nei uhi. Huai ah Babudhon Sapamcha, Joint Secy (Academic), CoHSEM khuallian apang in hong a, CDPSA member tamtak tel uhi.

Khuallian in a genna ah teacher te adingin teaching, learning leh testing workshop poimawh  a, Hill dist ading in CDPSA leh CoHSEM pangkhawma ‘3 day workshop kinei pen a masa hilai in gen a, worskshop sungin resource person te’n a theihna uh atamtheipen teacher te adia pekhe ding leh teacher te’n a hamphatpih uh deihthu gen hi. Workshop ah   L.Biren Singh, Principal, Ukhrul Hr.Sec.School; Dr.L.Ramananda Singh, (retd) Reader, D.M.College of Science; Ng.Amumacha Singh, (retd) Jt.Director of Edn(S) leh H.Jayantakumar Singh (retd) Head of dept (Maths), D.M. College of Science te’n sinsak uh a, amau teng mah in workshop neihsung in sinsak ding uhi.

Home Minister kiang tungta  

Lamka, July-25: Lamka Police station ah June 30, 2013 nitakin Police leh mipi kinawk tuahna kala thautang leng in Lunminsiam Guite(20)s/o Lunkhopau Guite of Zenhang Lamka kha in liam a, damzoulou asi in midang 23 liam uhi. CDSU pawlin DC tungtawn in CM kiangah memorandum pia uh a, DC/CCpur in Principal Secy (Home) ah misi innkuante kiang ah govt in ex-gratia a piak ding, a innkuante khat sepna piak ding leh aliamte panpihna piak ding tungtang zasak pah a, DC/CCpur panlakna ziak in process paizel in a file leng Dy CM table ah omta a, Dy CM in ahihfel hunhun a order suahkhiat hidin  kigen hi.

Hot cooked food item hawmkhia

Lamka, July-25: Dist Social Welfare office campus a CDPO office ah Lamka Block sunga Anganwadi Centre 181  ading Hot-Cooked Food item tuamtuam  - ankam thau, dal, chi (salt) leh Micro Nutriens chi 3 hawmkhia uh a, July 26, 2013 in Singngat leh Henglep block  a Anganwadi Centre-te ading Hot Cooked Food item hawmkhe ding uhi. Huai Hot-Cooked Food itemte Anganwadi Worker-te'n amau Centre chiat ah huan minsa in naupangte nesak ding uh hi’n kigen hi.

Police te’n ‘special drive’ bawl ding uh

Lamka, July-25: Police leh Trasport deptt kithuah in July 26 & 27, 2013 in khawpi sung mun tuamtuam ah duty in Special Drive bawl ding uh a, huai hun ah Gari document/licence tellou hiam ,kum chinglou a gari hek, helmet khulou a 2-wheeler hek, zukham kawma gari hek leh MV Act bawhsiate himhim mankhia in challan zang ding uh a TR cut in liausak ding uh chihthu om hi.

Evangelistic Week zang ding

Lamka, July-25: New Lamka a Ebenezar Academy ah  July 30- Aug 1, 2013 sung “Let the little children come to Me” chih thupi zang in Evangelistic Week zang ding uh a, July 30, 2013 zinglam dak 9:00 in Pastor T.Vungkhansuan, Local Pastor EBCC Hebron in hongkhe ding hi. Evangelistic hunsung in  student-te group 2 in kikhen ding uh a, Pastor Dr Thangminlun, Local Pastor EBCC Bethel leh V.Biaklal te’n Pathian thu gen ding uhi.

Free Hepatitis Screening Camp

Lamka, July-25: Dr Liangoumuan Samte & team banah Mission Veng a Saviour Public School pangkhawm in July 27, 2013 zinglam dak 10:00 akipan in Saviour Public School ah kum 17 tunglamte ading in ‘Free Hepatitis Screening Camp’ om ding a,huai ah  kuapeuh a lunglutte telthei ding uh chihthu om hi.

Kirloskar Cement Mixer omta

Lamka, July-25: Concrete building sawng bawlna dinga poimawh leh nasep zangkhai saktuan mahmah hi a kigen, Kirloskar Cement Mixer kichi Mahajon Biakhnung  of Tedim road in tuma deuh in leikhia a, tulai in khawpi sungah mi tuamtuam in a khelh thei ding un service sak uhi. Huai vanzat in  Rs. 5 lakh vel man  a, Lamka khawpi sungah  Private a hibang vanzat neithak omsun hidinga gintak  hi’n kigen hi.

Gutate nasa deuhdeuh:pilvan ngai

Lamka, July-25: Kum bangzahhiam paisa akipan in Lamka khawpi leh akimlak ah gutate’n adiakin gari(2-wheeler) tamtak gu uh a,hangsan taka gari gute matkhiaklouh ahunkhop a om ziakin maingal deuhdeuh uh a, zanlai kia hilou in sunlai tanpha in leng 2-wheeler kigu gen ding om sek hi.Hibang  guta maingal taka gamtangte Police in panla a a mathiak uh deihthu tamtak in gen uhi.

SUUNNA

Thangpuilali (92) w/o (late) Upa Rothanga of Salem Veng tuni nitaklam dak 6.30 velin teknat in si a,July 26, 2013 in Lamka hanmual ah kivui ding hi.

Th. Khamkhogin(85) f/o Th.Tunlam of Leijangphai village( Thanlon sub-division)  tuni nitaklam in si a, July 26,2013 in Leijangphai hanmual ah kivui ding hi. 

&&&&&&&&&&&&&&&&&&&&&&&&&&&&&&&&&&&&&&&&

IMPHAL NEWS

Ashwani Kumar in charge la ding

Imphal, July-25: Manipur Governor Gurbanchan Jagat hun a beitak ziakin aman July 23, 2013 in  Manipur nusia in Delhi zuanta hi.Nagaland Governor Ashwani Kumar in Manipur Governor hihna tawh lenkhawm ding a, amah  July 29, 2013 zinglam dak 11.00 in Imphal a Raj Bhavan Durbar Hall ah Manipur High Court a Chief Justice  Abhay Manohar Sapre in kichiamsak ding hi. Ashwani Kumar bel CBI Director-lui ahihbanah Himachal Pradesh a Director General of Police(DGP) lui leng hi a,aman March 21, 2013 in Nagaland Governor hihna len hi.

Agri Dy Director inn ah bomb puak
Imphal, July-25:  Meltheihlouh pawlkhat in Ph. Rajendro, Deputy Director( Agri) tenna inn, Soibam Leikai Ahongei Leirak(Porompat PS) ah tuni zinglam dak 7.30 velin bomb khat pailut uh a, car (No. MN-1A/7815) leh two wheeler Dio vehicle (No. MN-01R/1748) kianga bomb puakzak in gari 2te kisia a,  mihing a hihkhak bel omlou hi’n kigen hi.  

Ibobi in South Africa trip tawpsak

Imphal, July-25: Africa gambup tawlam a om South Africa khawpi Pretoria ah Finance tawh kisai genkhawmna om ding ah Chief Minister O Ibobi leng tel ding himahleh aman tawpsan  kik  hi.  Thusuakin a gendan in July 25-Aug 4 kikal South Africa veh ding chi a puankhiak hi ngeita hi.  Tuabang kalah MPCC President Gaikhangam tulela Dy CM in Air India flight in tuni nitaklam in Imphal apan New Delhi  zuan a, Food Security tawh kisai genkhawmna a tel ding hi’n kigen hi.  Food security bill leng AICC President Sonia Gandhi makaihna in  congress makaite’n July 27, 2013 in gen khawm ding uhi.

Non-Manipuri khat thah in om

Imphal, July-25 : Imphal West district sung Mayang Lamjing Water Supply Scheme mun ah tuni nitaklam dak 4:00 velin Non-Manipuri khat kaplup in om hi. Akigendan in kaplup a om bel a Voter I-Card apan in Shah Jahan SK (38) s/o Sakeel SK of Pada Jidiapda, Murshidabad, UP ahi hi. Aluang tuni mah in Lamshang Police-te’n  vala uh a, RIMS morgue ah koih uhi. Si luang omna mun ah revolver khat leng muhkhiak in om hi. Amah bel rickshaw zanga sik sia kaikhawm a zuak zel a kinga in nekzong ahi hi.  UNA

Railways officials khahkhiak in om

Imphal, July-25: Jiribam-Tupul railway lampi bawl a om Coastal Project Ltd a official 3te July 18, 2013 nitak dak 10:50 velin  meltheihlouhten a pimang nung un tuni in khahkhiak  hi  uhi. Pimang a om official-te Alok Kumar(Mechanical Engineer), Narshima Patra (Foreman) leh Basant Gohain (Supervisor) hi uh a, amau  Tamenglong district a Khongsang pansan a om hi ua, pimang ahihhun un a nasepna mun uh Nungkao a omlai uh hidan in kigen hi. Police thusuak in gendan in mi pimangtute JDF group hidan in gen uhi. Amau bel sum tampi demand uh hidan inleng thusuak in gen hi. UNA

Flyover a tawmkhia theichian

Imphal, July-25: Bir Tikendrajit Fly-over ah zan zinglam in  mikhat tawmkhia in a sih ziakin RIMS a misi koihna ah puaklut hi a, tuni a theihchet ahihnung in Sarangthem Iboton Singh(60) s/o (late)  S. Chaoba of Wangkhei Thambalkhong, Imphal East hi’n gen uhi. Sarangthem bel Thangmeiband Polem Leikai(Imphal west) ah innluah a om hi’n kigen a, a innkuante kiangah siluang piakkhiak in om hi. 

PMEGP interview omding

Imphal, July-25: PMEGP beneficiary-te adi’n tunung sawtlou a interview om ding chi’n kigen a,  a hun-le-ni ding puankhiak om nailou hi. Central Office of KVIC, Mumbai  apan PMEGP 1st instalment  dan in Rs. 8,55,91,000/- vel piak hi a, huaite kum 2012-13 sunga pending omteng hihvengna ding hi’n kigen hi

Student-te thagum a gawt deihlou 

Imphal, July-25: AMSU pawlin thagum-thatang a student-te gawt ahih uh deihlouhthu taklang kawm in Imphal East dist. sung Yaingangkpokpi a Immanuel English Academy ah  July 22, 2013 in Kh Babina Chanu (13) d/o Kh. Raghu Meitei of Nongada Makha Leikai naktak a soisak ahihdan puang uhi. AMSU Vice-President in tuni’n News saite kiang ah hehpihna bei a teacher khatin class IX-B student  soisa a, tuni tan a dinmun hoihlou in liamna in pumdim a, AMSU in hibang gamtatna koihdap louding hi’n gen hi. Hibang thil om nawnlouhna ding in teacher leh boarding warden in panla ding in theisak a, tuma a school khenkhat a bomb kipai tungtang leng mawhpaih mahmah hi’n gen hi. Thusuakin a gendanin examna ah maths subject ah Kh Babina Chanu a fail ziakin maths teacher in soisa hi’n kigen hi.