Chairman ADC/CCpur in Khuanggin JB School hongkhia
Lamka, July-22 : Langkhanpau Guite, Chairman ADC/CCpur in July 20, 2013 akipan in 10-Tuivai ADC Constituency bial veh hi. Aman NLCPR tungtawn in Khuanggin JB School kibawl July 21, 2013 zinglam dak 11.00 in hongkhia a,EBCC Pastor Thangzamang in Pathian kiangah thumna in lan hi. Chairman in huai hun ah Khuanggin JB School a student-te adingin uniform leng pia hi. Aman innlam zuan a hongpai lam in Thuangtam JB School a student-te a dingin leng uniform a thawn in hongpia a, tuni nitak dak 8:00 velin Lamka hongtung uhi.
DC in ex-gratia leh aliamte panpihna ding buaipih
Lamka, July-22: Laka Police station ah June 30,2013 nitakin Police leh mipi kinawk tuahna kala thautang leng in Lunminsiam Guite (20) s/o Lunkhopau Guite of Zenhang Lamka kha in lim a, midang 23 liam uhi. Lunminsiam dam zoulou in July 6 in Shija Hospital ah si hi. CDSU pawlin DC tungtawn in CM kiang ah memorandum pia uh a,misi innkuante ex-gratia Rs.5 lakhs piak banah a innkuante khat sepna piak ding; aliam 23te panpihna Rs 1 lakh chiat piak ding leh thau a mi kapliam Police-te suikhiak a akituahpih bang gawtna piak ding chi’n point 3 tel ngetna pia uhi.
DC/CCpur in govt apan thupukna omte-misi innkuante kiang ah July 20,2013 tan in govt in adia hitheitan ex-gratia piak ding, aliamte panpihna (financial assistance) piakding chi mahleh July 20, 2013 tana hihfel zawhlouh ziak in DC CDSU te’ kiang ah July 27, 2013 tan ngak lai din ngen a,CDSU te’n hungaih din lemsa uhi. DC/CCpur in Principal Secy (Home) tawh CDSU te’ thilphut hihfel sawm in tuni apan Imphal ah buaipih a, July 23 in leng buaiph lai ding hi’n kigen hi.
NFCH akipan panpihna sum hawmkhia
Lamka, July-22: National Foundation for Communal Harmomy (NFCH) te’n namkal buaina ziaka tagahte laizilna dia panpihna uh tamtak laka student 62 te ading panpihna sum tuni sunnung in DC office a Conference Hall ah Maniram Sharma, IAS, Addl DC & Project Director DRDA leh S.Khaikhopau Ngaihte, BO HQ in hawmkhia uhi.
S.Khaikhopau Ngaihte in agenna ah NFCH akipan panpihna ngah student-te govt in kum 18 tan huhna piakdin ahun ahihsau ziakin kum 25 tan panpihna peding hi’n gen a, student te’n DC office ah kumteng in document tuamtuam submit ngai hi’n gen hi. Aman agenbehna ah NFCH panpihna sum class XII tan student 1 kiang ah kha 1 in 1000/- pia a, graduate tan te kha 1 in Rs 1250 leh professional course-te kiang ah kha 1 in Rs 1500/- pia hi’n gen hi. Tuni a NFCH sum lakhalou student te’n guardian tawh kizui in bank passbook tawi in DC’s office ah laktheih ding hi’n gen hi.
Cable wire gu mi khat mankhia
Lamka, July-22: Khawpi sung mun tuamtuam a cable wire kikhungte gukmang ahihsek ziakin Laizom Cable Network leh Angels Vision kithuah in suizui uh a, nitak chiang in cable gui kigukna munte ah duty uhi. Zan nitakin Lamka Hanmual lampi a Chiengkon lui kiangah cable gui tamkhop tawi a mei a halsiang lai mi khat tuakkha in mankhia uhi. Matkhiak a om Pausuanmung (25) s/o Lamsuan of Suangdoh hi a, amah Lamka ah kum tamkhop om mahleh a tanaute kianga giak lou in New Bazar peuh ah giak sek hi’n kipuang a, nitak 4 akizom in cable gui gu hi’n leng kipuang hi. Cable wire a plastic teng mei a halsiang in, a sung a siik gui teng kg 1 ah Rs. 300 in Rengkai Road a sikse zuakna ah pezel a, cable neite’n huai dawr leng vauhilh kawm in tuban gutate thilzuak lei nawnlou dingin theisak ua, tuabang a gamtang a omlai leh action la ding uh hi’n gen uhi.
Addl DC in nasep sunzom nawn
Lamka, July-22: Maniram Sharma, IAS, Addl DC/CCpur & Project Director DRDA/CCpur in July 7, 2013 in a innkuante tawh Lamka nusia in Delhi tung a, July 8 & 9, 2013 in Delhi a Vigyan Bhavan ah Jairam Ramesh, Union Minister (Rural & Development) makaihna nuai a National Level DRDA Project Directors’ Conference ah tel hi. Conference zawh in Maniram in Delhi apan Rajasthan a a tenna khua uh pha a, July 20, 2013 in Lamka hongtung in tuni apan ageina bang in office kai nawn hi.
BA/BSc/B.Com result suak
Lamka, July-22: Manipur Univeristy nuaia BA, B.Sc leh B.Com 3rd Year (Final year) result 2013 zan in suak a, BA(Hons) candidate 449 laka 343 pass uh a, a pass zah 76.39% tung a, BA (General) exam 306 lakah 221 passed uh a passed zah 72.22% tung hi. , BSc (Hons) a 454 exam lakah 305 in passed uh a, passed zah 67.18% tung hi. Huailou in BSc (General) ah 241 laka 154 passed in pass zah 63.90% tung a, BCom(Hons) a 82 lakah 72 passed in pass zah 87.80 % tung hi. BCom (General) ah mi 4 exam in 3 passsed a, pass zah 75% tung hi. BSc Food Processing Technology ah exam mi 12 passed vek in pass zah 100% tung hi.
6th Semester result suak a samngtaka lawhchingte lakah Lamka College akipan Niangboi Paite d/o T. Thangkamlian of New Lamka in Education ah 5th position la hi.
Mid-Day Meal thu ah pilvang di’n ngen
Lamka, July-22: State khenkhat a mid-day-meal lakah poison(pesticide) a telkhak ziakin) a sihlawh tanpha om a, huaiziakin CCpur dist. sunga school thuneite pilvang dingin ZEO/Ccpur in theisak hi. Thusuakin a gendan in school thuneite’n mid-day meal hoihtak a etchian masak poimawh a, gimsia a om leh naupangte adia hoihlou thei ahihman in tunung a suizui dinga koih din theisak a, anhuan-te’n hoihtak leh siangthou theipen a kem dingin leng theisak hi.Student-te laka hawmzak ma in anhuantu in ne masa dingin leng theisak hi.
Bliss Island ah awareness programme
Lamka, July-22: People Advance in Social Service(PASS) leh Ccpur Dist. Parents Assn for Person with Disablility (CDPAD) saina in Lanva a Bliss Island School ah tuni sun dak 12.00 in ‘Parents Meet – cum – Awareness Programme’ 26veina om a, Chief Guest in Grace Zamnu, MDC(Muallum) pang hi. Huai ah vual phalou tamtak paikhawm uh a, Chief Guest in in amaute kepna hoihtak piak ding ahihdan gen hi.
UNDP palai in Lamka pha ding
Lamka, July-22: Ms.Lise Grande, UN Resident Coordinator& UNDP Resident Representative in July 27, 2013 in Lamka pha ding a, Pearsonmun ah sunnung dak 2:00 in khuallian a pangin Ability Village (An Empowerment Centre of Persons with Disabilities) ding ding a, Rev S.Vungminthang, General Secy EBC in thumna in lan ding hi. Huai hun ah Phungzathang Tonsing, Minister (Health & FW, GAD & CADA) in Chief Host hihna tawh uap ding hi.
Tangmual JB School ah uniform kihawm
Lamka, July-22: Tangmual JB School ah July 19, 2013 in School Management Committee a Secretary Th. Gindam Vaiphei in student 127 te laka SSA nuai a school uniform hawmkhia a, student te’n uniform thak kipahpih mahmah uh hi’n kigen hi. Huai hun ah School Managment Committee member T. Gindam leh L.M. Vaiphei in leng uap uhi.
BADP 2013-14 final bawlding
Lamka, July-22: Langkhanpau Guite, Chairman ADC &DRDA makaih in ama’ office chamber ah July 24, 2013 sun dak 12:00 in Dist Level Screening Committee on Border Area Development Programme (BADP) review meeting om ding a, huai ah BADP annual action plan 2013-14 genkhawm in finalised ding uhi.
SUUNNA
V.Kaizanang (73) f/o Upa Ginkhanmuan of Vengnuam, New Lamka tuni zingsang dak 3:00 vel in zunkhum ziaka natna tuamtuam vei in si a, tuni mah in kivui hi.
Kaikhothon (90) f/o Thonkhotuan of Vengnuam, New Lamka tuni nitak dak 7:30 velin teknat in si a, July 23 in YPA New Lamka hanmual ah kivui ding hi.
Khailal (80) s/o (late) Lunhen of Saipum zan nitak dak 8.00 velin si a, tuni’n Saipum hanmual ah kivui hi.
&&&&&&&&&&&&&&&&&&&&&&&&&&&&&&&&&&7
IMPHAL NEWS
Governor mangpha khakna om
Imphal, July-22: Manipur Governor Gurbachan Jagat hun(tenure) tuni’n 3 a bei ziakin Manipur govt in tuni’n 1st M/R Banquet Hall ah mangpha khakna(farewell programme) zatpih in mangpha khakna ankuang lui tawh thuah hi.Tuni a Governor khakna hun ah Chief Minister O. Ibobi Singh, Minister leh MLA-te banah state govt nuaia top official-te tel uhi. Governor Gurbachan Jagat in July 23, 2013 sunnung dak 12:30 in Imphal nusia in Delhi zuan ding hi. Amah paikhiak zawh in Nagaland Governor Ashwinikumar in Manipur Governor hihna tawh lenkhawm ding a, himahleh aman bang chik hun in Manipur governor hihna tawh lenkhawm ding in kichia ding hiam chih theihh ahihlouh banah Manipur Governor thak ding kua hihiam chih leng theihchet hinailou hi.
Jiribam ah gari tamkhop tung
Imphal, July-22:Imphal-Dimapur lamlian(NH No. 2) a Kohima kiang ah lamlian feet 250 asau a chipkhiak ziakin vanpua Gari tuamtuam 100 val Jiribam tawn in Imphal zot sawm in zan apan tuni tan in Jiribam ah kinawnlut uhi. Tuni’n Jiribam ah petrol pua truck 22, diesel pua Truck 23, LPG pua 21 leh SK oil pua 9 tung uh a, gari dang leng tunbeh mahleh security escort om chiang in Imphal zuan theipan ding uh hi’n kigen hi.Thu kiza danin Imphal akipan tumlam km 222 vel a gamla Jiribam a om gari-te’n Gularthol leh Leingangpokpi kikal ading security escort poimawh uh a, Imphal-Dimapur lampi kisiat nung a niteng vanzat poimawh pua a Imphal zuan dia kisa masapen a chiamteh in om uhi. Tulelin gari tamzaw te’n Imphal-Jiribam lampi mitsuan uh a, Kohima kianga menchipna mun ahihleh ni 60 sunga bawlzawh hi maithei chi uhi.
Voter-te khemna lel ahi -Kim Gangte
Imphal, July-22: Kumthak 2014 chianga Lok Sabha election om hun ah mipite vote deih ziak lela Congress in ‘Food Security Bill’ pankhia uh hi’n Manipur Pradesh Trinamool Congress President Ms Kim Gangte in gen hi. Tuni’n Hotel Excellency ah Food security bill tawh kisai press conference a Kim Gangte in a genna ah tulela PDS ration lel leng ginataka a piak ahihlouh lai a BPL family khat in Rs. 3 lel a antang kg 5 zel ngahtheih ding chih lamdangsa ahihdan gen kawm in Food security meaning diktak Congress in thei taktak mah uhiam chi’n dotna bawl hi. Huailou in CM Ibobi in dakkal 24 sung electric piak dinga thuchiam a bawl leng gintak huailou hi’n gen a, loadshedding hun tanpha leng govt in bill bawl hi’n gen hi.
Nimaichand Luwang in MPP tawpsan
Imphal, July-22: Manipur People’s Party(MPP) President-lui Dr Nimaichand Luwang in MPP member hihna apan kizukkhia in kitawpna lai pia a, July 19 & 21,2013 in MPP in huai thu genkhawm in thubuai omte hihveng in pomsak uhi. Party thusuakin a gendan in Nimaichand Luwang telin Wangkhem A/C sunga MPP party worker teng kitawp uh a, MPP Central Committee Member hnkhop leng kitawpte lak ahtel uhi.
Tuni in Police gari 2 halsiat in om
Imphal, July-22:Thoubal district sung Kakching sub-divn a pawl 2 kal buaina ziaka thau khahna ah Md Neimuddin s/o Md Riyajuddin kaplup in om a, midang 8 leng liam uhi. Thiltung ziaka JAC kibawlkhia pawlin tuni zinglam akipan in dakkal 48 sung general strike puang uh a, Indo-Myanmar lampi telin Thoubal district sung nawngkaisak hi. Strike hunsung in volunteer-te’n gari tyre hal in khauhtak in panla uh a, Hatta ah police commando(CDO 26) te zat gypsy(No. MN-01K/8100) leh Mantripukhri CRPF camp kiangah commando(CDO 47) te zat gypsy(No. MN-01W/0357) halsiatsak uh a, police-te’n tear gas leh mock bomb zang in mipite hawlzak uhi. General strike bel July 23 tan omlai ding hi.
Chingmeirong ah siluang mukhia
Imphal, July-22: Police thusuakin a gendan in Chingmeirong a Oil Pump kiangah tuni zingsang dak 6.30 velin nasem a nekzong Leishangthem Sanjay(38) s/o (late) Ibomcha tulelin Mayang Imphal Kokchai Mamang Leikai ah innluah a khawsa sisa in aluang kimukhia hi. Sanjay in azi tawh ta 2 nei in khawsa uh a,amah thahna a kigolh hidinga gintak mi 3 leng police in mankhia uhi.
Yairipok ah dukan 12 kangtum
Imphal, July-22: Tuni zingsang baihtak in Yairipok Bazar ah meikuang nasatak om a, huai in dukan 12 kangtum hi.Thoubal leh Yairipok Fire station apan meikuang phelh dingin team 2 kuan uh a, zingsang dak 3.00 velin phelhmit thei pan uh chi’n kigen hi.
AMSU in naupang hunkhia
Imphal, July-22: Hyderabad khawpi ah January 6, 2013 akipan omna theihlouh naupang 2 te AMSU) pawlin hunkhia uhi. Thusuakin a gendan in naupang kumchinglou 2te, Md. Ajaydin Khan (15) s/o Md. Manir Khan leh Md. Aslam Khan (14) s/o Juma Khan of Naharup Pangong hi uh a, Irilbung Police Station ah January 8, 2013 in missing report a chiamteh in om uhi.