Sept 4, 2013 tan Imphal ah Newspaper-te suaklou ding; AMWJU leh hawker-te tuni’n Protest Rally pai uh
Imphal, Sept-2: All Manipur Working Journalists’ Union(AMWJU) leh All Manipur Newspaper Sales and Distributors’ Association(AMNSADA) pawlin militant-te akipan vauna om thithe ziaka lungkimlou in tuni’n Majorkhul a Manipur Press Club akipan Chief Minister’ bungalow zuan in Silent Protest Rally pai uh a,palai mi 7 in CM kiangah memorandum pia in media house-te leh media person-te security pe dingin ngen uhi.
Tuni nitaklam dak 4.00 in AMWJU,AMNSADA leh Editors Committee pawl te’n meeting nei uh a,Sept 3, 2013 in Keishampat ah Sit-in-protest neih dingin thupuk uh a, Imphal apan kisuahkhia Newspaper-te leng Sept 4, 2013 tan suaklou ding chihthu om hi.
Tuni a Protest Rally paite apan palai mi 7 in Chief Minister kimuhpih in memorandum a piak hun uah Chief Minister in media house-te security piak ding a chiam banah mun media tawh kisai khakna om mun poimawhte ah patrolling tamtheipen paisak hiding in cvhiam chihthu om hi. Imphal a media house te’n militant pawlkhat akipan press statement a suahlouh ziakun journlalist leh Newspaper hawker-te vau(threatened) in om uh a,
Militant group a faction khat in media house-te attack hiding in a vau ban uah Newspaper hawker te’n leng mipi laka newspaper a hawmkhiak ua leh attack hiding in vau uhi.
Tuni a vuahzu tukum adia vuahtui tamni pen hilai
Lamka, Sep-2:Lamka khawpi leh akim ah August 2013-September 2013 kikal sungin vuahtui hoihkiak deuh a, tuni nitaklam dak 4.00 vel akipan in vuah tamtak zu nawn a, tuni a vuahzu 24.0 mm a sah zu in, lampi kisiatna munte ah tui vungdim in, nullah tamzaw apan hawktui luanglet hi. Tukum sunga vuahtui rate tam ni pen tuni hi a, vuahzuk dan tehna ah 115.2 mm/hr tung hi. Vuah zuk sawt hunpen March 16, 2013 in 466.8 mm zu a, nikhat adia vuahtui sawt a kiak nipen May 22 , 2013 in 210.8 mm kia hi. Ni kizom a akawt sawt hunpen May 12, 2013 akipan ni 12 sung hi a, khawkeu sawt hunpen ahihleh January 30, 2013 akipan 39 sung ahi hi.
Shillong a Sweet Falls ah student 2 kelum
Lamka, Sep-2: Meghalaya khawpi Shillong a Sweet Falls ah tuni in Lamka lam mi 2 kelum uhi. Thu kingahdan in lawmta kithuah a ngadong(waterfall) en dinga kuan S. Thangliankhual (23) s/o S. Kapthianmung of Go Cin Khup Veng, New Lamka(EBC Lamka South DS Quarter a teng) leh Michael Thangchinmang @ Michael L. Ngaihte(16) s/o L. Anthony Ngaihte of Zion Veng, Rengkai hi uh a, S. Thangliankhual pen Shillong College a B.Sc 3rd year sinlel hi a, anih tuak un Siamsin Hostel a om hi uhi. Tuni nitak dak 6.00 velin mi 2-te tuikia ahihlam uh theih hi a, YPA leh SYO telin pawlpi tuamtuam leh Lamka lam mi tamtak paikhawm in zong mahle uh, hiaithu sut ahihtan in S. Thangliankhual pen mu zou nailou uh a, Michael Thangchinmang bel mukhia uhi. Shillong a Sweet Falls in kumteng phialin mihing hinna la hi’n kigen hi. Sweet Fall a tui in a khawhkhakna mun thuk mahmah a, huai mun ah duty in mi 2 om gige mahleh tuni’n Shillong ah bandh a om ziakin duty omlou a, huaimun a hawh mi 2te’n pai louhna ding mun lama paikha uh hiding a gintakthu genpawl om hi.
Dist Hospital a diet supply khawl
Lamka, Sept-2:Dist. Hospital a Diet Supplier in govt apan bill pending Rs. 80,000/- val a lakkhiat theihlouh ziak in May 2013 kha tan diet supply a, huai nung Diet Supplier in khawlsan hi. Dr N.Paulginthang, Med Supdt/ Dist Hospital makaih in damloute khualna in fund om dandan zangin June apan Aug 2013 tan zing leh nitak in damloute an pia uh a, sum le pai haksat ziakin sunzom zoulou in dinkhawl phawt hi. Damloute leh mipi’n theisiam ding in Medl Supdt in ngen a,Dist Hospital a diet supplier in govt apan sum a lakkhiat louh tamtak omziaka haksatna atuah leh Dist Hospital a diet supply ding om nawnlouh thuleng Director of Health Services ah bangzah vei hiam report bawl a, Aug 28, 2013 in leng report bawlnawn hi’n gen hi.
YPA in School tuamtuam etkhiat pan
Lamka, Sept-2: YPA Gen HQ in educational institution te’n student-te kicheidan leh numeite uniform banah student-te enkai dingin Aug 2013 tan hun a bikhiah uh ahun beitak dungzui in tuni in College leh High School etkhiat pan uhi. YPA Gen HQ makaite, New Lamka block leh Lamka block makaite’n G.Mualkoi a Covenant school, Rayburn H/S, Rayburn College, St Peter’s school, V.K Tawna High, Cambridge school leh Ebenerzar Academy pha huai institution a thuneite tawh houlim uhi.
President YPA GHQ in agenna ah numei student-te' nik(skirt) in khuk (knee) khuh banding, pasal-te’ khekol tuallua leh khekol gong tide lua chihte kilawmlou hi a genin educational institution school te’n panla dinga theihsak hi’n gen hi. Institution a thuneitute’n a genna uah YPA in student te’ kicheidan ding thusuah abawl uh school rule tawh kituak hi a gen in kipahpih mahmah uh hi’n kigen uhi.YPA makai te’n Sept 3, 2013 zinglam dak 10:00 apan in school tuamtuam phanawn ding uh a, school thuneitute houlimpih sunzawm ding uhi.
Auto apan kia, driver in ngaihsaklou
Lamka, Sept-2: Judi (20) d/o Lalroulhan of Hmar Veng, tulela Kamdou Veng a Salvah Model school a teacher sem zan nitaklam dak 4:00 velin a naunu Julia(16) tawh Gamphajang ah house visit ding a kuanlai Koite khaw kiangah Diesel auto apan kia a, auto driver in passenger dangte a khakzawh nung in Dist Hospital tun ding chi’n gen mahleh va kik nawnlou in taisan hi’n kigen hi. Huai thu ah Judi’ nu apan kizadan in Diesel Auto apan Judi a kiatnung in khawphawklou in om a, Auto diver in Judi’ sanggamnu kiang ah passenger dangte drop khitnung a Dist Hospital ah pawlut ding chi mahleh kik tuanlou in Judi leh a sanggam nu kihepmangsan hi’n gen hi. Julia in apa-neu phone thei a, apa neu in Car in Judi leh Julia pithei a, Dist Hospital tun hi’n gen hi.
Rengkai Road mun tamtak ah sia
Lamka, Sept-2: Police Station leh Rengkai kikal Rengkai Road lamlian mun tamtak ah sia a, motor a taite leh khe a paite adingin haksatna tanpha tun hi’n kigen hi.Adiakin lamlian laizang mun 4/5 vel ah kuak(hole) thuk taktak om a,huai munte ah motor taite leh khe a paite adingin nawngkaina thupitak tunsek hi’n kigen hi.Govt leh akisaipih thuneitute’n ngaihven kin ding leh akintheipen a panla dia deihthu tamtak in gen hi.
Thanlon bial ading antang pua
Lamka, Sept-2: Thanlon A/C MLA’ nominee Goulal Naulak in tuni in Thanlon A/C ading Public Distribution System (PDS) antang hunkhop pua in Thanlon zotpih hi.MLA’ nominee in antang a puaklutte BPL antang 505 antang, AAY antang 294 quintals leh APL antang 100 ahi hi. Thanlon A/C ading a PDS item tuamtuam puaklut a omte ahiding bang in hawmkhiak zel hi a, bialtu MLA in leng enkhe touzel hi’n thutut kingah hi.
BWWA te’n guta 1 mankhia
Lamka, Sept-2: Bijang Women Welfare Association (BWWA) pawlin zan zingsang baihtak dak 3:15 velin ak gulai Vanlalngak (28) s/o Sahkholal of Saidan, Electric Veng mankhia uhi. BWWA apan kizadan in Vanlalngak in ak 2 gu a, huaite a zuakzawh chiangin New Bazar a Hahat kiang ah No.4 leisawm hi’n gen uhi. BWWA pawlin Vanlalngak lawmpa Lulun of Kangvai mankhe manlou in amah taimang a,Vanlalnghak thuhilhna hoihtak a neizawh un khahkhia uh hi’n kigen hi.
Mi vaukawma sum ngen Jail ah
Lamka, Sept-2: Lunkhongam Haokip (28)s/o (late) Ngamkholun Haokip of Ukha Gate, Kwakta leh midang 1 in Aug 27, 2013 nitak dak 10:00 velin Teijang a Nepali Basti a Nepali omte vaulau kawm in Rs 20,000/- a demand ziakun Police te’n mankhia in CJM/CCpur court ah Lunkhongam Haokip dingsak uhi. CJM in Judicial Custody (jail) a omdin a thutankhum ziakin Police te’n tuni’n Jail ah Lunkhongam Haokip koih uh a, FIR No.76 (8) 2013 CCP-PS U/S 506/511/34 IPC & 25(1-C) A.Act registered uhi.
Sept 4 in News suaklou ding
Militant pawl in Imphal a Media house-te attack dia a vau ban uah Newspaper hawker te’n leng mipi laka News hawmkhiak ua leh attack hiding in vau uh a, hibang helpawlte apan vauna News/Press-teng tunga thiltung sek ahihna ah Manipur Hills Journalists Union in leng support puang in Sept 3,2013(Sepnawnni) in Newspaper office teng kikhak ding a, Sept 4, 2013(Nilaini) in Manipur a Newspaper teng suaklou vek ding hi. Huaiziakin Manipur Express deihsak leh ngaina a latute tengin leng hong theisiam dingin kon ngen uhi.
Shillong Lajong teamte hongtung
Imphal, Sep-2: Shillong Lajong football club team a player mi 25 tuni nitaklam in Imphal hongtung uh a,Sept 5, 2013 in Manipur Arambai 11team tawh Khuman Lampak a Main Stadium football ground ah Charity Match kimawl ding uhi. Huai Charity Match bel Wafa Arambai Football Academy puahna dia kibawl hi’n kigen hi.Shillong Lajong Chief coach Thangboi Singto in a gendan in football promote-na din Charity match neih ding kipahhuai sakthu gen hi. Thangboi Singto ahihleh CCpur district mi hi’n kigen hi.
Eligibility Test result suak
Imphal, Sept-2: Board of Secondary Education Manipur(BSEM) in High School Leaving Certificate(HSLC) Examination, 2014 a Private candidate ding telkhiak ding in Aug 29, 2013 a Eligibility Test, 2013 a conduct uh a result suakta hi. Eligibity Test a tel dinga candidate ki-enrolled 3227 om lak ah test hun ah candidate 2672 appeared uh a, huaite laka mi 2598 passed uhi. Pass zah 97.23 percentage tung hi’n kigen hi.
Cultural Festival om ding
Imphal, Sept-2: All Manipur Huiyen Lalong & Traditional Cultural Preservation Committee,Manipur saina in Sept 4 & 8, 2013 zinglam dak 11.00 in Khuman Lampak Indoor Stadium ah ‘All Manipur Pung Cholom/Thang Ta Best Figher Championship’3veina om ding a, Chief Guest in Sanajaoba Leishemba, King of Manipur pang ding hi.Huai ah Guest of Honour in Y. Mani Khuman,President, AMUCO leh Special Guest of Honour in Y. Nabachandra, President,UCM pang ding a,Functional President in P. Shamu Meitei,President, UTRA/Thoubal pang ding hi.
Numei bawlsiat deihlou in campaign
Imphal, Sep-2:Numeite bawlsiatna leh gelgawtna deihlou in All Manipur Women Voluntary Association (AMAWOVA) leh Poirei Leimarol Meira Paibi Apunba Manipur kithuah in Ningthoukhong, Bishnupur leh Nambol ah lampi a laidal tak kawm in campaign nei uh a, August 26 akipan campaign a neih uh Sept 4, 2013 tan sunzom ding uhi. Amau pawlin khawtang siatna apan numeite humbit deihin panla uh hi’n kigen hi.
Khudengthabi ah bomb puak
Imphal, Sep-2:Chandel district sung a om Khudengthabi ah tuni zingsang baihtak dak 12.40 velin IED hidia kigen bomb hattak puakzak a, hileleng asi leh liam om chih bangmah thu kizalou hi.
Army khat kithah sawm
Imphal, Sep-2: 24-Assam Rifles a Havildar Ram Bahadur (46) G/D 2401374 tulel a ‘E’ Coy Tengnoupal a om in tuni zingsang dak 6.00 velin a thautawi zangin amah leh amah kikaplup sawm a, a gilnem(abdomen) ah thautang 3 lut a 183-Military Hospital, Leimakhong puaklut hi a, a dinmun lauthawn huai hi’n kigen hi.Official thusuakin a gendan in amah ahihleh Tengnoupal ah kum 27 omta hi’n kigen hi.
Sepaktakraw federation beisak
Imphal, Sep-2: Sepaktakraw Federation of India (STFI) in tuni’n Manipur unit suspend thu puang uh a, Sepaktakraw World Super Series omlel a national duty neilai, Manipur player 4-te Manipur Unit in a tawpsak ziak a Executive Committee in Manipur Unit leng suspend hi’n kigen hi. Thusuakin a gendan in Indian men’s team a member Akash Singh leh women’s team a member - Kh Bijeta, Kh Omita leh O Chaoba te kum 10 sung All Manipur Sepaktakraw Association (AMSTA) in suspend thu puang a, AMSTA theisak masalou a national camp ah atel ziak uh hi’n kigen hi.
Pasal khat sisa in kimukhia
Imphal, Sep-2: Langol kianga ISKCON Nature Cure Research Centre kong ah tuni zingsang in pasal khat sisa in muhkhiak hi a, amin Naorem Naocha (17) s/o (late) Shanti of Langol Lairembi Leikai hi a, zan nitak a thah hidin gintak thu kigen hi.Thiltung tawh kisai in Lamphel Police Station ah case khat registered hi a, N Naocha thattu dinga gintak Rame (17) s/o Rajen of Games village zone-III leh Ningthoujam James (17) s/o Kumar of Yumjaongambi Games village IV tuni in Police in mankhia uh a, huai mi 2te inn mipi thangpaite’n hihsia uhi.