Tuibuong Womens’ Assn-te’n area keklian
Lamka, Aug-25: Tuibuong Women Welfare Assn(TWWA) pawlin Aug 8, 2013 akipan Tuibuong area ah khamtheih doudalna panlak kipan uh a, niteng a duty in khawsunga khamtheih leh zu zuak, zukham leh buaina bawl omtheilou ding chih thupuan a bawlnung un thupuan bawsia om sek mahleh tuni chiangin lawhching mahmah uh hi’n kigen hi. Tuma deuhin Zion Veng leh Downtown Valley area duty uh a, huai area apan area dang keklian in zan in Tuibuong community hall ah khaw hausate leh V/A tawh meeting aneih hun uah Happy Valley area leng huam dingin makai thak guang uh a, Zion Veng, Downtown Valley, Happy Valley ah leng TWWA in panla ding hi’n gen uhi.

L.Hoinu Mate, Chairperson,TWWA in a gendanin khawsung makaite lemsakna tawh tunung zek chiangin Tuibuong sunga Laizon Veng leh Khopi Veng ah makai thak guan hiding a, huai hun ah Tuibuong area teng huamkha in nasem ding uh chi hi. Aman agenzelna ah Pastor leh Evangelist banah saptuam mipite’n thumna tawh numei pawlte panlakna athuap ziakun nitengin lawhching touzel a, khawtang siatna tamzaw kilanglua om nawnlou in thoveng mahmah chi hi. Nasep hunsung a banghiam hihkhelh omkha thei ahihman in kuapeuh in kithuahpih zaw a, theisiam dingin leng ngen a, mipite kithuahpihna poimawh ahihdan gen hi. Tuibuong nupite’n khamtheih a matkhiak chiangun azuaktute thuhilhna nei in khahkhe zel uh a, tuni nitaklam inleng Peace Gound munah khamtheih bangzah hiam mankhia uhi.
Thudang khat ah Hmarveng Defence Committee a Women’s Wing pawlin duty sunzom zel uh a, tuamah bangin Bijang Women Welfare Assn te’n leng khawsunga a khamtheih zuakte’n tawpsan dia thupiak a neih nung ua thilsia hih om nawnlou dia vauna abawl uh lawhching in, tuni chiang in thilsia tungthak omlam zak hilou chi uhi.

SBI/branch te’n Water filter 5 pia
Lamka, Aug-24: State Bank of India/Pearsonmun Branch a Manager leh staff te’n zan in Gangpimuol a STC/BSF huangsung a om Central school ‘Kendriya Vidyalaya’ a staff-te leh student-te zat dingin water purifier(filter) 5 pia uhi.

Traffic rule bawhsia 16 mankhia
Lamka, Aug-25: Lamka khawpi sunga ‘One way traffic rule’ leh ‘Gari parking’ dan ban ah gari kileithak a A/F kigelhte tulai in Traffic Police,Police leh VDF kigawm combined team in niteng in enzui uh a, Aug 19-24, 2013 kikal kalkhat sung in traffic rule bawhsia leh Gari No. omlou a A/F kia kigelh 16 mankhia in TR-5 receipt cut in fine sak uhi. Adiakin gari parking dan kibawl kum 2 val zat hita mahleh nitengin huai bawhsia omden lai a, gari thak a A/F kigelhte leng dakkal 48 hrs sungin Transport office ah registration bawl a, No. gelhding in govt in order suah hi.

Ngakik ah kia in liam
Lamka, Aug-25: Hegin(35) s/o Hemsei of District HQ, Tuibuong tuni in Pearsonmun khawsak Suongpi kianga Ngakik mun a hawh sunnung dak 2.15 velin kia a, aliam ziakin hospital tut hi a, doctor te’n alu mun 6 khui uhi. Thu kizadan in Hegin leh alawmte Ngakik ah lim kila dingin ding uh a, huchihlai in suang a nalluat ziakin Hegin kitalpuk in a khanglam suang tung kidenna a, khawphawk pahlou a om in, alawmte’n Lamka pawtung uhi.

Khaw lumdan uang deuhdeuh
Lamka, Aug-25: Tulai in khawlumdan uang deuhdeuh a, maban ah khua alum deuhdeuh lai khak ding patauhhuai hi’n kigen hi. Zan leh tuni in Lamka khawpi a khawlum sunning dak 2.00 velin 34 degree celcius tungzou hial a, tuni nitak dak 9.00 in 30.5 degree celcius tan hilai hi. Tulai in huihnung ginatlouh ziakin khawlum thuak haksa sak hi’n kigen hi.

JNV ah campaign on NBA
Lamka, Aug-25: Directorate of Field Publicity, Ministry of Information and Broadcasting(I&B), Govt. of India in Ministry of I&B nuai maha om Song & Drama Division, tawh pangkhawm in tuni’n JNV/Tuinom ah ‘Special Publicity Campaign on NBA, DBTS and NICH’ sai uh a,drama leh thil tuamtuam lahna nei uhi.Sadbhavana Diwas zatna tawh kiton in amau pawlin 46-Assam Rifles ah leng zan in zang uh a, JNV/Tuinom ah Aug 26, 2013 in leng sunzom lai ding uhi.

YPA in School-te enkhe ding uh
Lamka, Aug-25: YPA Gen HQ in School leh College te’n student-te kicheidan enkai dinga theihsakna abawl uh hun bikhiah August kha tan ahih dungzui in Sept 1, 2013 akipan College leh High School a numeite uniform omdan leh kicheidan enkhe ding uhi. Tuni sunnung in YPA Gen HQ leh Block/Unit makaite’n meeting nei uh a, huai ah Block leh Unit makaite’n thil omdan report pia uhi. President, YPA Gen HQ in huai huna agenna ah Educational Institution-te’n student-te adiakin numeite kicheidan enkai dinga thupiak ahihdungzui un hoihtakin panla uh a, huaite tungah kipahthu gen hi.

Bike leh Auto kiphu: mi khat si
Lamka, Aug-25:Tuni nitaklam dak 5:30 velin K. Salbung khua Tedim Road ah Pulsar bike khat leh Diesel-Auto kiphutuah kha in Bike atuang mi 3 lakah a hektu Seikam Haokip (50) s/o Haothang Haokip of T. Muolkot (Samulamlan TD Block) alu lak liam in District Hospital puaktung nung sawtlou in si a, midang 4 liam uhi. Thu kizadan in Diesel auto pen Kashmir Veng leh Boljol kikal service hi a, K. Salbung leibul lak ah bike tawh kiphukha in Diesel-Auto atuang passenger 2-Tongthang Kipgen (40) s/o Nehlam of Khaopijang(Henglep sub-divn) leh Ginkam Kipgen(40) s/o Buhkhosat of Laloiphai(Senapati dist liam) uhi. Aliamte dist hospital tut ahihnung un Tongthang pen nitak dak 10:00 velin Imphal a etkol dingin refer in om hi. Bike nunga tuang mi 2te laka Paokam Haokip (40) s/o Hensat of H. Kotlenphai pen District hospital a admit in om a, Haokholun (32) s/o Ngamthang Haokip of T. Mualkot ahihleh dressing zawh in paisak in om hi.

SUUNNA
Kimkhansang (20) s/o Sumkhanlun @ Lunpì of Hiangtam Lamka zan nitaklam in a inn uah sisa in kimukhia a, tuni in Lamka hanmual ah kivui hi.Amah Rayburn College, New Lamka a kai ahi hi.
Thawngchinlian (33) s/o S. Chinzapau of Zenhang Lamka tuni zingsang baihtak dak 1:10 velin damlou in si a, tuni mah in kivui hi.Amah tulelin YPA/Lamka Block a Secretary(Info. & Publicity) hi’n kigen hi.
T. Paukhenkham (65) f/o Chinlalmuan of New Bazar, Thangzam road tuni sunnung dak 12.30 velin kalna in si a, Aug 26, 2013 in Lamka Hanmual ah kivui ding hi.
Kaikhogin(50) h/o Tinlhing of Hermon Veng, Tuibuong tuni zinglam dak 11.30 velin sungna in si a, Aug 26, 2013 in Tuibuong hanmual ah kivui ding hi.

Micro-drill awareness campaign
Lamka, Aug-25:Hiangtam Lamka a PTC Conference Hall ah Aug 26, 2013 zinglam dak 10.00 akipan Micro-drill awareness campaign om ding a, huai ah Horticulture te’n July-Aug 2013 sunga loubawlmi 85 kianga micro-drill a piakte uh telkim ngai ding chihthu om hi.

Talent Search leh Merit Scho
Lamka, Aug-25:Tukum sungin Lamka ah academic session 2013-14 sunga private leh govt school a Class X student-te adin ZEO/CCpur office ah State Level National Talent Search Exam,2013-14 om ding a; Class IX simlelte adin State Talent Search Exam 2013-14 leh class VIII simte adin National Means cum Merit Scholarship Exam 2013-14 omding hi. Huai ding in ZEO office ah Sept 15 tan application form kihawm ding a, Sept 30, 2013 tan in submit theih ding hi.

NVBDCP review meeting
Lamka, Aug-25: CMO/CCpur makaihna in Aug 27, 2013 in CMO office a Conference Hall ah National Vector Borne Diseases Control Program (NVBDCP) thu ah review meeting om ding a, huai ah Male Health Supervisers; Male Health Workers; Multipurpose Workers leh Malaria Technical Superviser-te telding uhi.

3rd Lamka Book Fair paitou zel
Lamka, Aug-25: Book Link, Kolkata; Penguin Books (Delhi) leh HSA Jt HQ, Lamka pangkhawm in Aug 25, 2013 akipan IB Road a Synod Hall a ‘the 3rd Lamka Book Fair 2013’ om tuni tan in lun mahmah a, laibu chituamtuam lei mi tamthei mahmah hi. Laibu kizuakte 10% discount ngen in a zuak ziakun niteng in a leitu tam gige a, Aug 29, 2013 tan sunzom ding uhi.

IMPHAL NEWS
Guv in Award hawmkhia
Imphal, Aug-25: Manipur Governor Dr. Ashwani Kumar in tuni’n Thoubal district sung Kakching a om Library and Information Center saina nuai ah Class X & Class XII examna a position sangdeuh a pass-te kipahpihna Award piakna function ah Chief Guest a pang in Award tuamtuam hawmkhia hi. Governor in a thugenna ah student-te sepna muhbaihna ding course tuamtuam sinsak poimawh hi’n gen hi.Manipur ah laisiam sepna mulou tamta ahihman in job-oriented course lam sinsakna poimawh sakthu Governor in gen a, agriculture leh horticulture lam sinsakna leng ngai poimawh huai sakthu gen hi.

Tuni a function zatna hun ah RK Nimai,IAS, Commissioner (Art & Culture) & Secretary to Governor;Y. Surchandra,MLA; Radhakumar,IAS, DC/Imphal West leh Sobita,Director(Arts and Culture) leng tel uhi.

JAC te’n indefinite bandh khahkol
Imphal, Aug-25:Okram Gyanendro Singh kaplup ahih lungkimlou a JAC kibawlkhia pawl in tualthatte mankhe dinga govt phutna in Aug 23, 2013 in General strike puang uh a, Aug 24, 2013 akipan in hunchiam omlou ding General strike in sunzom uhi. Hileleng Aug 26, 2013 a Asthi om ding ziak banah Hunger Marchers’ Day ding ziakin tuni nitaklam dak 5.00 akipan Indefinite bandh khahkol phot uh hi’n JAC thusuak in gen hi. Govt in tualthatte a matkhiak tuan kei leh JAC pawlin kiphinna khauhsem in sutzop sawm uh hi’n puang uhi.

Manipur in NEET test pansan ding
Imphal, Aug-25: Manipur in MBBS/BDS course zil ding telkhiakna ding in Central Board of Secondary Education(CBSE) saina a National Entrance & Eligibility Test(NEET-UG) a lawhchingte lak akipan state nominee telkhiak ding in zan a Manipur Cabinet meeting ah thupukna bawl uh chihthu om hi. Manpur in Central pool akipan in MBBS seat 20 leh BDS seat 2 ngah ding a, RIMS ah seat 30 leh JNIMS ah seat 85 ngah ding a, huaite aveka kigawm seat 137 hi ding chi’n kigen hi.

MPP in state govt. mawhsa
Imphal, Aug-25: Manipur People’s Party (MPP) in tuni a thupuan abawlna uah PDS nuaia APL, BPL leh AAY card holder te’n Manipur a antang angah ding zah uh a ngah zawhlouh lai un bangchidan a PDS antang bag 1420 vel Myanmar gama puaklut dingin Moreh zuan a puakguk sawm omthei hiam chih dotna bawl uhi. Manipur mipite diklou taka talkaih sawm state govt gamtatna hi a ngawh in govt mawhsakthu puang uh a, huai thiltunga kigolhkha teng tungah gawtna khauhtak piak hihen, chi uhi.

Rape case ah KCP kigolh ding
Imphal, Aug-25:Kangleipak Communist Party (KCP) in rape case suizui ding leh a poimawh banga action la dingin ‘task force’ bawlkhia in Manipur ah rape case doudal ding uh hi’n puang uhi. Sanakhomba Meitei, Publicity Secretary, KCP in Press Release a suah dan in U Morok zuak nupi rape-tute damsung suangkulh tang dia thutankhum nung inleng tuni tan rape case 7 omlai a, KCP in mipite ngaihdan lakawm in gawtna khauhtak peding chi’n puang chihthu om hi.

Kuki mipi in ‘Aw’ khat suah di’n ngen
Guwahati, Aug-25:Bodoland movement leh Kuki State ngetna pangkhawm dia thukim nungin Kuki State Demand Committee(KSDC) in tuni’n Guwahati ah Kuki leader-te tawh consultative meeting om hi. Huai hunah KSO Guwahati, Kuki Innpi, Kuki Welfare Society (KWS) leh Kuki community sunga social leader-te tel uhi.Consultatvie meeting ah KSDC Chairman Hejang Haokip in khawvel kilchih a Kuki mipite’ kigawmkhawm leh kituak a aw khat(one voice) suah a, tup kibang nei dingin ngen hi. Kuki mipite adinga common platform om theihna dinga KSDC kiphutkhia ahihdan leng gen a, Sept first week sung in ‘National Federation for New State in India’ min in Guwahati khawpi a Mass rally neih hunah kuapeuh tel dingin ngen hi. KSDC in Sept sungin National Federation for New State in India (NFFNSI) zom ding a, NFFNSI huhna tawh kalsuan hiding chi hi. Assam a Kuki leader-te leh student leader-te’n KSDC leh Bodoland movement support uh ahihdan huai hunah hilh uh chihthu om hi. Shillong ah Aug 26, 2013 in KSDC in Consultative meeting nei nawn ding a, Meghalaya a Kukis leader-te tel ding uhi.