Dist Level Working Committee-HPF(M) kiphutkhia
Lamka, Aug-29: Sadar Hills a Haipi khua ah July 13, 2013 in Indian Constitution a Article 244A tawh kisai in ‘Consultation and Awareness Campaign’ om a, huai ah United People's FrontUPF) a makai tamkhop tel uh a, CCpur, Chandel leh Sadar Hills a civil organization tuamtuam akipan mipi 3000 vel paikhawmte’n UPF Political Demand "Autonomous Hill State" adia panlakna thuap dingin Hill People’s Forum,Manipur(HPF-M) bawlkhia uhi. Tuni’n Hills Peoples Forum, Manipur (HPF-M) a State Level makaite saina in Nehru Marg a Zomi Council Administrative Building ah Dist Level Working Committee, HPF-M phutkhia uhi. District Level Working Committee member ding a guan a om mi 7 te- Lalrothang; John Benedic; Vungsuanthang; M.C. Chinminthang; Th.Kamneithang Vaiphei; H.Pauzalal leh TK Hang hi uhi.

HPF-M District Level Working Committee member dia guan a omte meeting hnawn hun a makai dingin Vungsuanthang leh Lalrothang guan hi uh a, meeting hun ah member 7 te’n amau sungah Office Bearer ding kiguan thawh ding uh a, member laklut beh ding tawh kisai leng mawhpaw ding uh chih ahi hi.

LB Sona, Chairman, Zomi Council in a genna ah Manipur a singtangmite’n voice khat i neih kei uleh i demand-te uh bangmah tangtunglou ding a, govt in political dialogue leng hon neihpih ngeilou ding hi’n gen hi. Singtangmi teng voice khat neihtheihna dingin kituak tak leh khekhat a dinkhawm alou theilou hi’n gen hi. Aman a genzelna ah Manipur a singtangmi-te adiakin CCpur dist a omte’n bandh /strike i neih chiang un boundary neilou a ki-support tuah chiat poimawh chi’n gen hi. Maban ah leng boundary nei a bandh/srike i neihtouh zel leh namkal buaina tungthei ahihziakin huai pumpelhna ding in kuapeuh in panla chiat ding in ngen hi.

Manipur a singtangmite’n haksatna tuamtuam i tuahte, maban ah tuahtouh laidingte ban ah singtangmite haksatna tuamtuam omte hihveng theihna ding in Hills People’s Forum, Manipur (HPF-M) phuhkhiak hi’n kigen a, Dist tengah Dist Level Working Committee phuhkhiat ding chih dungzui in a masapen din CCpur Dist Level Working Committee kiphut khia hi’n kigen hi.

Bangladesh a Supreme Court Judge in Khuga Dam enkhia

Lamka, Aug-29: Bangladesh a Supreme Court Judge sem Justice Bhabani Prasad Singha in tuni zinglam dak 10:45 velin Lamka hongpha in huai akipan Khuga Dam enkhia hi. Khuga Dam ah Dist Administration lam apan Maniram Sharma, IAS, Addl DC & Project Director DRDA leh Soiminlian, MCS, AC to DC/CCpur te’n ana vaidawn uhi. Thusuak kingah dan in Justice Bhabani Prasad Singha kichi Manipuri community ahihdungzui in khat veibek Manipur phak a utziak a hongpha hi’n kigen hi. Amah Aug 24, 2013 in Imphal hongtung a, mun tuamtuam pha in Aug 30, 2013 in Bangladesh ah kiknawn ding hi’n kigen hi.

‘Certificate course in Seri’ training honna
Lamka, Aug-29: Kwakta a Sericulture Training Centre ah Aug 30, 2013 zinglam dak 10.00 in Sericulture tawh kisai training chikhat ‘Regular Training of Certifcate Course in Sericulture for the session 2013-2014’ honna function om ding a, Govindas Konthoujam, Minister(Commerce & Industries,Vety & AH & Sericulture) khuallian a pang in hong ding hi.Huai ah Functional President in O. Nabakishore Singh,IAS, Principal Secy(Commerce & Indus and Sericulture) pang ding a, Guests of Honour in M. Prithviraj Singh,Parliamentary Secy(YAS & Tourism) leh Smt Thoibi Devi, Chairperson, Kwakta Nagar Panchayat pang ding uhi.

Zomi Convention information centre
Lamka, Aug-29:L.B.Sona, Adviser 3rd World Zomi Convention & Chairman, Zomi Council in tuzing in New Lamka Hebron Veng a Thangzamang dawr' Digi Info-Tech ah ‘The 3rd World Zomi Convention Information Centre’ hongkhia a, Pastor T.Vungkhansuan, Local Pastor EBCC Hebron in thumna in lan hi.
LB Sona in a gendan in state govt in kum 2 sung sum-le-pai haksatna tuak in contractor leh adangdangte’n bill la theilou uh a, 3rd World Zomi Convention budget ding leng deihbang zoulou in Rs 14.6 lakhs lel kibawl hi’n gen hi. Identity kepbitna dingin gilkial-haksatna tuah hun ah leng lungkelou a paitouh ngai hi’n gen hi.K.Guite, Adviser 3rd World Zomi Convention in a genna ah kipumkhatna ding in Kuki, Chin, Mizo leh Zomi teng ZO a kipaw dingin ngen a, nam piching bawlna ding in publicise siam mahmah poimawh chi hi.

Sanitary Truck battery kigumang
Lamka, Aug-29: Police apan kizadan in Aug 27, 2013 nitakin gutate’n Tipaimukh Road a ADC Town Hall campus a Sanitary Truck No. (MN 01-6879) battery gumang uh a, V.Kamzagin, EO(Town) in Police ah report bawl hi. Police-te’n gutate matkhiat sawm in suilel uh a, FIR No.75(8) 2013 CCP-PS U/S 379 IPC register uhi.

Vaulau a sum ngen mankhia
Lamka, Aug-29: Police apan kizadan in Aug 27, 2013 nitak dak 10:00 velin meltheihlouh pasal 2 in Teijang a Nepali Basti a Nepali omte vaulau kawm in Rs. 20,000 demand uh a,Nepali Basti a omte’n sum piak ding a neihlouh ziakun pasal 2 te’n Hill Town, Tipaimukh Road ah Rs 20,000 peding in theisak uhi. Police te’n thiltung omdan suizui uh a, zan nitaklam dak 4:40 velin sum demand tute laka tel Lunkhongam Haokip (28) s/o (late) Ngamkholun Haokip of Ukha Gate, Kwakta sum lading a kuanlai mankhia uhi. Police te’n tuni’n CJM/CCpur ah Lunkhongam Haokip dingsak uh a, CJM in Sept 2, 2013 tan Police custody a omdin phalsak a, Police te’n FIR No. 76 (8) 2013 CCP-PS U/S 506/511/34 IPC & 25(1-C) A.Act registered uhi.

School leh College a student-te tulai kicheidan enkhe ding
Lamka, Aug-29: YPA Gen HQ in tulai a student-te’ kicheidan etzui poimawh sa in student(numei)te’n khuk(knee) khuh banlou nik(skirt) teng omlou ding in education instituton tuamtuam theisak uh a,akisaipih thuneite’n Aug 31, 2013 ma in semkhe ding in leng theisak uhi. Hun bikhiah a bei tawh kitoin YPA Gen HQ paelin Sept 1, 2013 akipan in Lamka khawpi sunga School, Hr Sec School leh College omte abanban a phakkual in enkhr ding uh chihthu om hi.
Mun 3 ah accident ziakin mi 3 liam
Lamka, Aug-29: Lamka area ah tuni sunnung dak 2.10 velin mun 3 ah accident om ziakin mi 3 liam uhi. Thu kizadaninTorbung leh S. Kotlian kikal Loklaiphai ah cycle a tailai, Ms. Tingneimoi (30) d/o (late) Mangtinhau of Pengjang in anung a Auto tai lampi awn dinga kisa in kihei a,himahleh Auto nungah gari dang khat tai ahihlam a theihlouh ziakin huai gari thakhat thu a kihettuah kha dingin om ua, huaitakin aman gari pen phukha in lamlian pucca road kidenna a, gari in bel phukhalou hi’n innkuante’n gen uhi. Amah kintakin hospital casualty tut hi a, himahleh a khua a phawklouh ziakin doctor-te’n RIMS hospital ah referred uhi.

Huailou in Ngailemkim(26) w/o Genmuanlal of Saipum tuni sunnung dak 2.30 velin auto a tuanglai singpaw gari a sing kikoih in hetkha in, singin alu hihkha in khua phawklou a, hospital puaktung a om in admit uhi. Tuni nitaklam dak 5.52 in Zenhang Lamka a Kaivung road ah Jeep (No. ML05A/5575) in lampi nawl a pailai Muanthang (19) s/o Ramesh Khuptong of Vengkhang, Pearsonmun phukha in khawphawklou a, aphukha pen in hospital pawtung in admit in om hi.

3rd Lamka Book Fair beita
Lamka, Aug-29: IB Road a Synod Hall ah Aug 25, 2013 akipan ‘the 3rd Lamka Book Fair 2013’ om a, tuni’n beita hi. Organiser-te apan kizadan in huai Book Fair ah children books, Spiritual & History book zuakhe tampen uh hi’n kigen uhi. Organiser te’n Aug 30, 2013 in Imphal a Nupilal War Memorial complex ah Book Fair neinawn ding hi’n gen uhi.

Simveng V/A in hilhchian
Lamka, Aug-29: ‘Police te’n Solar Battery gu mi 4 mankhia’ chih zan issue ah Police-te kianga a kipuandan dungzui a kisuah ‘Paukhomang Taitom s/o late Khaichin of Simveng village’ kichi tawh kisai Khupkhanhau, Information Secy, Simveng Village Authority apan hilhchetna kimu dan in Simveng ah huchibang mi omlou a, Simveng mi hilou in Simveng a om a kichih pen vengsung suk minsiatna hizaw chi’n taklang hi.

ZORO Gen Secy si
Lamka, Aug-29: RW Ro Za Thang @ ST Parte, President, United Zo Indigenous People(UZIP) leh Zo Re-unification Orgn(ZoRO) a General Secretary damlouhna ziaka Aizawl Civil Hospital a om dam zoulou in zan in si chihthu kiza hi.Amah Zo identity leh politics tawh kisai in UN tanpha ah kumteng phialin hawh gige hi.

SUUNNA
L. Vumzalam Ngaihte(90) of Dorcas Road, New Lamka f/o L. Do Lam Thang Ngaihte, Lecturer, Grace Bible College tuni nitak dak 8.15 velin teknat ziakin si a, Aug 30, 2013 in YPA hanmual,New Lamka ah kivui ding hi.
Pausianlun (14) s/o Khamchinthang Samte of Behiang(V) damlouh ziakin tuni’n Dist. Hospital ah si a, Aug 30, 2013 in Behiang(V) hanmual ah kivui ding hi.

IMPHAL NEWS
Beneficiaries ding zah Sept 2013 sunga zoufel dingin CM in theisak
Imphal, Aug-29: National Food Security Ordinance tungtang ah Manipur a hamphatna ngah ding beneficiaries zah Sept 2013 sunga zoufel ding in Chief Minister O. Ibobi in akisaipih deptt official-te theisak chihthu om hi.Thutut kingahdan in kum 1 sunga summuh(income) Rs. 1 lakh nuailamte beneficiaries dia telkhiak hiding chi’n kigen hi,

Tuni sunnung dak 2.00 akipan dakkal 2 val Chief Minister O. Ibobi makaihna in CM Secretariat ah National Food Security Ordinance, 2013 tawh kisai meeting om a,huai ah Consumer Affairs, Food & Public Distribution(CAF & PD) Minister M. Okendro; Commissioner Y. Thamkishore; Additional Secretary/Director M. Yaiskul Meitei, DC-te leh ADC-te tel uhi.

Dakkal 2 val meeting zawh kuan in Chief Minister in CAF & PD kiang ah September 30, 2013 tan in Manipur district tenga beneficiaries ding zah suifel vek dingin theisak hi,

Manipur a mihing 27.218 lakhs om laka 87% huai bel 23.87 lakh velin hamphatpih dfing a gintak hi a, CAF & PD in beneficiaries ding zuina pankhin uh a, zou nailou hizaw un kigen hi. Beneficiaries dingin kum khat sunga sum muhkhiak Rs 1 lakh chingloute telsak hiding uh chih ahi hi.

Haipou Zadonang zahna piak in om

Imphal, Aug-29 : Zeliangrong mite adia mi poimawh leh ‘Manipuri Martyrs of Zeliangrong Community’ chih a om Haipou Zadonang sih champha 82veina tuni’n Keishampat a Zadonang Park ah kizang hi. Dy. CM Gaikhangam; Commerce & Industries Minister Govindas Konthoujam; N. Biren,MLA leh mi poimawh tuamtuam in huai hun uap uh a, Haipou Zadonang zahna in pak piak ahih banah suunna in mipi paikhawmte minute 2 sung dai dide in om uhi. Huai muna programme saulou zatzawh in GM Hall ah memorial function zatna om hi.

Dy. CM Gaikhangam in Haipou Zadonang Park a Zadonang Bronze statue tunkhiak ding govt in lemsa hi’n gen a, tu financhial year sunga nasep kipan ding hi’n gen hi. Aman a genbehna ah Zadonang pen Zeliangrong mite kia ading hilou a, Zeliangrong mi ahihziakin Zeliangrong mite’n inntekna bel lathei uh, chikawm in Manipur pumpi a hizaw chi hi. UNC in Naga area a development work om ding a kham utawh kisai in poisakthu genkawm in hiai in chikmah in khantouhna tun ngeilou ding hi’n gen hi. Tamenglong district a thautui lak khiak ding tawh kisai phallouh leng Zeliangrong mite muhsitna hi’n gen hi.

Shillong Lajong FC-te Imphal ah kimawl ding
Imphal, Aug-29: I-League club Shillong Lajong FC te’n Sept. 5, 2013 in Khuman Lampak Main Stadium a Charity match ah hongtel ding uh hi’n kigen hi. Huai Charity match bel Wafa Arambai Football Academy-te saina hiding a, Shillong Lajong FC te leh Manipur Arambai-XI te kimawl ding uhi.
Shillong Lajong FC te Manager bel singtangmi Thangboi Singto hi a, India a Pro-Certificate nei mi 4 kia om lakah amah leng telkha hi. I-League season 2012-13 ah Shillong Lajong ten ahihsiat mahmah ziakun a Manager uh Scotland mi Desmond Bulpin paikhia in Assistant Coach Thangboi Singto amun ah koih uhi. Tu in Shillong Lajong a Coach/ Manager in Thangboi Singto om a, ama makaihna in Imphal ah Charity Match hong nei ding uhi. Thangboi Singto in kum 2009 in Shillong Lajong FC zom a, huai akipan in Lajong te ana kithuahpih den hi. Thangboi makaihna in Shillong Lajong FC te tulelin Shillong a JN Sports complex mun ah training lel uhi. Tunitan in gamdang akipan players Cornell Glen (Trinidad & Tobago), Taisuke Matsugae (Japan) leh Min Chon Son (South Korea) in Shillong Lajong FC zom uh a,huai banah India apan Subhash Singh, Milan Singh leh Vinay Singh te’n leng a zop ziakun Shillong Lajong FC te kimuang huntawk mahmah uhi.

Crime Againist Humanity rally om

Imphal, Aug-29 : Senapati bazar ah tuni in mipi tamtakin ‘crime against humanity’ chih thupi zangin Rally pai uhi. Huai Rally bel Senapati toll gate mun ah ex-MLA Awangbou Newmai in khahkhia a, amau Senapati public ground tan lampi zui uhi. Senapati Public Ground ah mipi paikhawmten Public Meeting nei uh a, India Prime Minister Dr. Manmohan Singh, Congress President Sonia Gandhi, Union Home Minister Sushil Kumar Shinde, Manipur CM O. Ibobi leh Governor Dr. Ashwani Kumar kiangah memorandum pia uhi.

Nobin luang lak hinailou
Imphal, Aug-29: Tera Loukrakpam a om Auto driver Ayekpam Nobin sihna tawh kisai a JAC kibawl te’n tuni’n kiphinna tuamtuam nei uhi. Tuni in Tera Bazar ah sit-in-protest om a, mipi tamtak paikhawmte’n National Highway lampi tanpha khak uhi. JAC te’n Ayekpam Nobin sihna tawh kisai a tualthatte mankhe dingin CM ah ngetna pia uh Aug. 31, 2013 tan a matkhiak ahihkei ua leh kiphinna nasa zawsem pan ding uh hi’n gen uhi. Ayekpam Nobin luang JN Hospital morgue ah koih in om a, a innkuanten la nuamlou uh hidan in kigen hi. Ayekpam Nobin bel zanhal nitak a RIMS a damlou pawding in a Auto hire a om inntung kik nawnlou a Thoubal PS huamsung Kiyam Tangjen Hangen Konjin Erak mun ah sisa in muhkhiak in om hi.

Spot Painting Competition om ding
Imphal, Aug-29: Rotary Club of Imphal, R.I. District 3240 saina in Sept 8, 2013 in Class I akipan X student-te adingin Rotary Multi-Service Centre,Mantripukhri ah Spot Painting Competition om ding hi. Competition a telnuam student-te adingin Sept 8 zinglam dak 9:00 -10.00 sungin registration bawl ngai ding a,zinglam dak 10.30 akipan sunma dak 11.30 tan competition om ding hi.Paper size 14”x11” chiat Club in peding a, a thupi(theme) ahihleh Judge te’n amun ah puang ding uhi.Group ‘A’ te Class I,II &III hiding uh a, Group ‘B’ ah Class IV,V & VI tel ding uhi. Group ‘C’ aj Class VII, VIII, IX leh X tel ding uhi.