Leimatak ah DLCC meeting
Lamka, Sept-1: Ms Jacintha Lazarus, IAS, DC/CCpur makaihna a Dist Level Co-ordination Committee (DLCC) meeting om hun nanung a thupukna dungzui in Sept 11, 2013 zinglam dak 11:00 in Leimatak khua ah DLCC meeting om ding a, huaia tel dingte Sept 11, 2013 zingsang dak 8:00 in DC’s Bungalow apan in Leimatak khua zuan ding uhi.DLCC meeting ah SDO/BDO te leh District Level Officer(DLO) teng kimtaka tel ding in DC/Ccpur office apan theihsakna om hi.
AO Generalists (Scale-I) ding in
Niangngaihvung kia lawhching
Lamka, Sep-1: United India Insurance Company Limited a AO Generalists (Scale I) sem ding lakna ding in August 2013 a Interview om result suak a, huaia lawhching mi 445-te lakah singtangmi lawhching om sun Niangngaihvung (SL.No. 119, Reg No. 16028338) hi’n kigen hi.
Car in naupang khat phukha
Lamka, Sep-1: Sarah Tinlungdei (5) d/o Thenkhohau of D. Phailien,Kashmir Veng D. tuni zinglam dak 9.40 velin lampi a pailai Car in phutkhak ziakin kipuk a, a veilam khepek guh Car in gawikha in a guh kitan hi’n kigen a, District Hospital ah admit in om hi.
Traffic rule bawhsia 15 mankhia
Lamka, Sept-1: Lamka khawpi sunga‘One way traffic rule’ kizang leh ‘Gari parking’tawh kisai banah gari kileithak khenkhat ah dakkal 48 sanga sawtzaw A/F kigelhte tulai in Traffic Police, Police leh VDF kigawm combined team in niteng in enzui uh a, Aug 26-31, 2013 kikal kalkhat sung in traffic rule bawhsia leh Gari No. omlou a A/F kia kigelh 15 mankhia in TR-5 receipt cut in liausak uhi.Adiakin gari parking dan kibawl kum 2 val zat hitamahleh nitengin huai bawhsia omden lai a, gari thak a A/F kigelhte leng dakkal 48 hrs sungin Transport office ah registration bawl a, No.gelh ding in govt order om hi.
Guite Road lampi siatdan lungjinhuai
Lamka, Sept-1: Imphal-Dimapur lamlian(National Highway No. 2) leh Imphal-Jiribam lamlian(National Highway No. 37) ah bandh leh blockade om mun mahmah a,huchih hun chianga CCpur district in thautui leh vanzat poimawh tuamtuam Mizoram akipan a laklut theihna lampi omsun ‘Guite Road’ hi a,huai pen CCpur district ading in ‘life-line’ chihtheih khop in poimawh hi.Himahleh Guite Road lamlian keplouh leh zunlouh in om a, tulai a passenger Bus tai omsunte leng mun tamtak ah lamlian a kisiat ziakin taisuak ziahziah theilou in mun khenkhat ah Bus tung apan passenger-te kumkhia in lamlian siatna munte ah suangtum khong koih in pang mai uhi.
YPA in School-te etkhiat panding
Lamka, Sept 1: YPA Gen HQ in School leh College te’n student-te kicheidan enkai dinga theihsakna abawl uh hun bikhiah August kha tan ahih dungzui in Sept 2,2013 akipan College leh High School a numeite uniform a nik(skirt) in khuk(knee) khuh banlou leh student-te kicheidan etkhiat panding uhi. Thusuak kingahdan in Sept 2, 2013 zinglam dak 9:00 in YPA Gen HQ Office, Hiangtam Lamka ah kingakkhawm ding uh a, huai apan school/college etkhiat panding uhi. G.Mualkoi a Covenant school ah pan ding uh a, abanbana enkhia in New Lamka area a school leh college teng zawhsawm uh hi’n kigen hi.
1st National Asian Expo 2013 om ding
Lamka, Sept 1: YPA Lamka Block leh National Asian Expo Enterprises Ltd. Assam pangkhawm in Hiangtam Lamka a YPA Hall ah “1st National Asian Expo 2013” om ding hi. Huai ading in kisakkholhna pailel a, nasep zawh hunhun ni 3/4 nung in 1st National Asian Expo 2013 om ding hi’n kigen hi.
Awareness Programme om ding
Lamka, Sep-1: Pearsonmun Community Hall ah Sept 2, 2013 nitk dak 6.30 akipan SSPP Gen HQ saina in student-te adding in Awareness programme om ding hi. Huai hunah laizil student-te tamtheipen tel ding in chial uh a, education tawh kisai thu poimawh tuamtuam sinsakna om ding hi’n kigen hi.
SUUNNA
H.Siamminthang (43) s/o (late) H.Zakhum of Central Road, Hiangtam Lamka tuni nitaklam dak 5:00 velin sungna ziakin si a, Sept 2, 2013 in Lamka hanmual ah kivui ding hi.
IMPHAL NEWS
Imphal ah silent Rally pai ding uh
Imphal, Sept-1: Imphal a Newspaper Editor-te, media person-te leh newspaper hawker-te kap dinga vau om ziakin Sept 2, 2013 in Editor-te, media person-te leh newspaper hawmkhia(hawker)te silent Rally pai ding uhi. Amau zinglam dak 10.30 in Manipur Press Club a kipankhia in Chief Minister’ bungalow tan silent Rally paisawm uh a, Chief Minister kiangah memorandum pe ding uh a, Press/media person-te leh hawker-te bitna ding a govt in panla ding in ngetsawm uhi.
Thudang kizadan in All Manipur Newspaper Sales & Distributors’ Assn. pawlin Sept 2, 2013 akipan in huai thubuai a fel masiah Newspaper hawmkhelou ding uh hi’n thupuan bawl uh a,akinlam a buaina a ventheihna ding leh amaul eng Newspaper ngeina banga ahawmkhiak theihna ding ua panla dingin a kisaipihte ngen uhi.
BJP President in govt mawhsa
Imphal, Sep-1:BJP Manipur Pradesh President Th. Chaoba in Indo-Myanmar border fecing ziaka Manipur gam lian huntawk tak mangthang thei ding tungtang ah Congress makaihna Centre a UPA govt leh Manipur a vaihawm Congress govt pilvanlouh ziak hi a ngawh in mawhsakthu gen hi. Keishampat kiang Nityaipat mun a BJP office ah zan in Bharatya Janata Yuva Morcha saina a kha 1 sung political class om hunkhakna ah huaithu gen a,Congress in govt a bawl hunlai mah in Manipurin Kabaw valley khahsuah in Myanmar a lut hi’n gen hi.Tu’n leng Manipur mipite kituak a pankhawm ahihkei leh border fencing suanlam in Manipur gam pammaigh takin mang theinawn ding ahi, chi’n patauh thu gen hi.
Solid Waste Management Programme
Imphal, Sep-1: Solid Waste Management Programme kichi tuni in Imphal Municipal (IMC) Council Word No. 4, Nagamapal ah honkhiak hita hi. Huai programme ah local MLA L.Nandakumar Singh, N. Gitkumar, Director MAHUD leh L Arunkumar Singh, IMC Councillor Word No. 4 theihpihna tawh hon hi a, Word No.4 Development Committee, Ayangleima Self Help Group leh Centre for Research of Environment Devt (CRED) tawh pangkhawm in nasem ding uhi. Huai hun ah L Nandakumar Singh,MLA in agenna ah mipite’n solid waste management programme kithuahpih poimawh a, IMC in gari pe mahleh mipite’ kithuahpihna louin phattuamna omlou ding chi hi.
Free health check-up om ding
Imphal, Sep-1: MG Avenue a Ching Tam Health Care munah tuni in media person-te adi’n free health check-up om hi. Huai free health check-up ahihleh Ching Tam Health Care leh All Manipur Working Journalists’ Union(AMWJU) pangkhawm a aneih uh hi’n kigen hi.
Laibu kibawlthak hongkhia
Imphal, Sep-1: Kshetri Chaoba in a gelh ‘Phijang Marumda’ kichi laibu thak tuni in RIMS Road a Heartstring ah hon in om hi. Laibu honna function ah Chief Guest in Longjam Jaychandra, former Director of J.N Dance Academy pang a; Functional President in Dr. Lanchenba Meetei, Prof. D.M College of Hindi pang in Guest of Honour in Thokchom Chandra, ex-President, Patriotic Writer Forum pang hi.
ZUF te’n khaw hausa kapliam
Imphal, Sep-1: Zeliangrong United Front(ZUF) pawlte’n dawi tawh kisai a thilhih(black magic) nei a ngawh in Chingmei Kabui village Chairman soisa uh a, huaizawh in a khe kapliam sak uhi. Thu kizadan in khaw hausapa amin Nailin Kamei (45) s/o Gaidinglung of Chingmei Kabui village, Khoupum Block hi a, village authority chairman leng ahi hi. Tuni’n RIMS a Casualty puaktun nunga agendanin zan nitaklam in ZUF helpawlin naktaka soisa in kap uh a, ataklam khe ah thautang lut chi hi. Khawsung mite’n a gendan un soisak a om Nailin Kamei zan nitak dak 8.00 velin Nimkaolong Primary School kiangah mukhia uh a, tuni zingsang in RIMS ah admit in om hi. Doctor-te’n serious hi’n gen uh a, vangtahna ziakin a mit(eye) in khua muthei nawnlou maithei chi uhi.
Sonia in medical check up dingin US ah zin ding
New Delhi, Sept-1:Congress President banah UPA Chairperson Mrs Sonia Gandhi in a damtheihna tawh kisai in medical check-up ding in US ah zin ding chihthu om hi. Kal paisa Seppatni in Parliament session a tellai Mrs Sonia in nak haksa a sak banah a awmna(chest congestion and asthma) ziakin chau in All India Institute of Medical Sciences (AIIMS) ah admit in om a, intensive care unit ah bangtanhiam sung etkol kawm in etkhiak hi a,huaini nitak sawtma in mahin AIIMS apan potsak(discharged) in om hi. Mrs Sonia Gandhi damtheihna lam tawh kisai ah Congress leader te’n thil himhim gen tam utlou uhi.Tu’n leng amah a health check-up ding in US ah zin ding chih himahleh ahun leh ani ding puankhiak hituanlou hi.
Indo-Myanmar Border fencing thu ah 1-day Seminar
Imphal, Sept-1: Hotel Imphal ah tuni in United Committee Manipur(UCM) te’ inntekna in ni khat sung “India’s Stand on the Territorial Integrity of Manipur” chih thupi a nei in Seminar om hi. Huai ah retired Judge C. Upendra in a genna ah Indo-Myanmar border fencing zawhsiang ahih hun ah Bishnupur district tawh kikim Manipur gam leitang Myanmar gama lut ding hi’n gen a, huai thu ngaihdau theih vual hilou hi’n gen hi.India Constitution dungzui in gamdang ah India gam piak khen phal hilou chih hi a, huai dana thil a pai teitei leh Indian Constitution bawhsiatna suak ding ahi chi’n leng C. Upendra in gen hi.
Manipur Governor tanpha in border fencing enkhe khin a, hibang kalah state Chief Minister leh Home portfolio leng lenkhawm Deputy Chief Minister in tuni tan amun mahmah vapha a border fencing a etkhiak nailouh lailai uh vangtah huaitak ahi chi’n leng C. Upendra in gen a, security tawh kisai a border fencing kibawl ahihleh bangziak a Manipur gam liankhop Myanmar piaktheih himawk ding hiam chi’n leng gen behlap hi. (UNA)