Solar Power Plant kiluh: battery 2 kigu
Lamka, Aug-26: Dist Hospital a ward tuamtuam ah electric/power omlouh hun a electric power supply dingin MANIREDA in Dist Hospital a Blood bank inntung ah solar plate tamtak koih uh a,Blood bank building nunga 25-KV Solar Power Plant kichi Nov 11, 2011 in Health Minister Phungzathang Tonsing in hong hi. Huai Solar Power Plant kizat nung nitak electric power omlouh hun in solar power zang in ward tuamtuam ah electric power piak in om hi. Hileleng kuate hiamin 25-KV Solar Power Plant kongkhak kalhna hihsia in battery 3 ‘Sunshine 2V. 800 AH AT C10 Tubular LM Solar Battery, Made in India’ chih kigelh battery Sl No. 68, 69 leh 80 gumang uh a, zan nitak dak 6:30 velin battery kigukmang kitheikhia hi’n kigen hi.

Hospital a damlou giahpih khenkhat apan kizadan in zan zingsang dak 3:00 vel tan solar power light pai in huai nung mit vengveng a genpawl om uhi. 25-KV Solar Power Plant ah battery 120 kizang a, electric power omlouh hun in dakkal 8-12 kikal sung power supply zou a, tu’n battery 3 kigukmang ziak in dakkal 4-6 kikal power supply zou ding hi’n kigen hi. Medl Supt/Dist Hospital in Police Station ah tuni’n report bawl a, Inspector Elvy Tunglut makaih in Police te’n spot enquiry bawl ngal in Chengkon-lui ah Solar battery bawm hawm 3, a sung a sik/plate teng kilakhia mukhia uhi. Police te’n gutate matkhiat sawm in suizui lel uh a, FIR No.74(8) 2013 CCP-PS U/S 457/380/34 IPC registered uhi.

Dist Hospital campus ah Police leh VDF-te Hospital veng dingin giak uh a, hileleng Hospital campus ah gutate ut-le-dah a gamtang thei veve in gari (2-wheeler) bangzah hiam leng gutate’n gumang uh a, Dist Hospital campus ah Police leh VDF te om nungin leng guta te’n thil tuamtuam a gukmang theih uh lamdang sakthu mi hunkhop apan kiza hi.

Micro-drill awareness campaign honna
Lamka, Aug-26: Hiangtam Lamka a PTC Conference Hall ah tuni in District Hort & SC te saina in Micro-drill awareness campaign om a, huai ah Kamsuanlun, EM/ADC khuallian a pang in hongkhia hi. Huai hun ah July-Aug 2013 sungin loubawlmi 85 kianga micro-drill a piakte uh lak apan tamtak tel uhi.Khuallian in a genna ah ei lam in huan/lou bawl a haichite tui (water) ipiak chiangin huan haichite’ tui poimawhzah kitheilou in tui tamluatziaka si leng omthei a, huai a omnawn louhna dingin film tuamtuama i muh uh Springer water zanga haichi tui piakna ding Hort & SC deptt in hong puaklut uh kipahpihthu gen hi.

Training sungin H.Bishwar, HDO/Henglep; W.Jadumani Singh, Wahengbam Irrigation Enterprise, Thoubal; S.Shyamjai Singh, HDO/Thanlon, Parbung leh Francis Zou, HDO(Hqtr) CCpur te’n sinsak ding uhi. Training a telteng batch 4 a kikhen in batch 1 ah mi 50 zel tel uh a,tuni’n 1st batch te’n training pan uh a,last batch te’n Aug 29, 2013 in zouding uhi.

Shaktiman in gawilum kha dek
Lamka, Aug-26: Tuni zinglam in Lamjang khua a NREGS(Job Card) tungtawn a singnou suang dinga kuante laka tel Suangchin(70) s/o (late) Ngaihkhojam of Lamjang lamlian sak a lamkhou apan tolhkhe kha in Shaktiman nuaiah lut kha a, driver omna lam ahih khaklouh ziakin driver in theikha pahlou in agil ah gawikha zek a, himahleh mipite’n a theihpah ziak ua kikouzak in Shaktiman driver in khamkhawl pah thei a, hospital puaktung in om hi. Thutut kingahdanin agil lak gawikha zek ahihman in a zunthakna ah sisan pawt hi’n kigen hi. Driver leh mipite’n thei hakzaw hile uh vangsiat ziakin gawilum thei dingin kigen a, Hospital puaktun nungin vangphat huaitakin halhkhe zekta hi’n kigen hi.

Naupang 12000 val JE dalna kikap
Lamka, Aug-26: Dist.Immunisation Office leh PHSC mun tuamtuam ah July 2013 akipan naupang kum 1-15 kikalte adingin Japanese Encephalities (JE) kichi khuak a khawsik lutding dalna damdoi manbei in kapsak hi uh a, JE vaccine 2500 indent lak ah tunitan in Vacine 2400 zang in naupang 12000 val kap in om uh hi’n DFWO/CCpur apan kiza hi. India govt in thoukang akipan JE natna dalna session July- Sept kikal hi’n puang a, JE vaccine 1 ah naupang 5 tan kap a omzel hi’n kigen hi.

Duty pawlin mi 3 mankhia
Lamka, Aug-26: YPA Gen HQ apan kizadan in YPA Pearsonmun a duty te’n Aug 24, 2013 nitaklam in numei leh pasal omdan kilawmlou a om numei 1, officer 1 telin pasal 2 mankhia uh a, thuhilhna hoihtak neihzawh in paisak uh chi’n thusuak kingah hi.

Youth Revival Camp 2013
Lamka, Aug-26: Evangelical Organisation Church (ECCI) pawlin Aug 29-Sept 1, 2013 sung Jacob Taonamol, Gelmol ah ‘Youth Revival Camp 2013’ nei ding uhi. Aug 29 nitak in Rev Lamkhogin Khaute, Executive Director,EOC (ECCI) in Camp hongkhe ding a, Rev Dr Kh Khaizakham leh Pastor Genlal te’n thu gending uhi. Youth Revival Camp 2013 sungin Dr. Sangching, Lecturer GBC; Rev. Dr. Kaitinkap Vaiphei, Lecturer, ECT; T.L Mang Vaiphei, President, YCO; Rev. Robert H.Vaiphei leh Evan. Lamneihpau, Coordinator ,YCO te’n thupi tuamtuam pansan in sinsak ding uh a, Rev L.Khupboi Vaiphei, Director of Missions, EOC in Youth Revival Camp hunkhak ding hi.

Pu-pa tawndan kepbit ding thu genkhawm
Lamka, Aug-26: Paite Cultural Society (PCS) pawl Vialzakham, Executive Director, PCS tenna in ah zan in meeting uh a, pu-pa tawndan tuamtuamte kepbit ding thu genkhawm uhi. Maban ah Nov 22-23, 2013 sung Lamka ah Cultural Festival neih ding in thupuk uh a, huai hun ah pu-pa lam(dance) tuamtuamte lahna neih ding leh huaite recording bawl a kepbit dingin thupuk uhi.

Paybill Computerization buaipih tam
Lamka, Aug-26: ZEO/CCpur nuai a employee-te’ Paybill computerization poimawh a, akisaipih tamtak in ZEO office a DDO kimupih in buaipih lel uhi. Employee-te’ laka senior scale, enhancement scale leh trained scale hamphatpih kha tengin DDO kiang ah lawh lakna submit ngai ding a, Sept 5, 2013 tana hihfellou teng govt in Aug 2013 khalawh (pay/salary) piaklouh dingin order suah chihthu om hi.

IMPHAL NEWS
High Powered Committee pawlin Indo-Myanmar gamgi enkhia uh
Imphal, Aug-26: Indo-Myanmar gamgi a om Myanmar army-ten gamgi hong kantan zel ban uah border fencing pailel ah Manipur gam lianpi Myanmar gama lut ding a patauhna om ziakin Manipur govt in High Powered Committee a bawlkhiakte’ tuni’n Moreh vapha uh a, Indo-Myanmar gamgi a border fencing kibawlna munte leng va enkhia uh chihthu om hi. High Powered Committee tuni a Moreh vaphate Dr. Suresh Babu, Principal Secretary(Home);Brig Ranjit Mangkotia, 26-Sector Assam Rifles; DC/Chandel; ADC/Chandel; SP/Chandel leh CO, 9- Assam Rifles hi uhi.

Non-Congress pawl pankhawm sawm
Imphal, Aug-26:Kum thak 2014 bul lama Lok Sabha election om ding ah Manipur ah Congress hilou political party tuamtuam in Congress(I) candidate khetkhiak sawm in common candidate khat dinsak sawm uh a, meeting tanpha nei panta uhi. Sept 1, 2013 in meeting neinawn ding uh a, huai ah candidate ding genfel sawm uh chihthu om hi.Hileleng CPI pawlin Inner Manipur a MP candidate dingin Dr M. Nara chih bawl uh a,BJP pawlin leng Inner leh Outer Manipur ah candidate neihsawm uhi.Hibang kalah Trinamool Congress pawlin leng Outer Manipur a candidate ding in state President Ms Kim Gangte,ex-MP min puangkhe khin uhi.

Khawpi sung mun tuamtuam ah tuilet
Imphal, Aug-26: Imphal khawpi ah tuni’n dakkal 5 sung vuah tamtak zu a, huai in khawpi sunga nala ginatlouhdan kilangsak hi’n kigen hi. Imphal khawpi a VIP tamtakte omna area Babupara banah Paona Bazar, Konung Mamang, New Checkon, Keishamthong leh Sagolband area ah tui tamtak lampi leh innkim ah luangkhia in lamlian khong tum(submerged) a, Lamphel a quarter lak leng a hunkhop tuilian in hihbuai a innsung ah tui luanglut hial hi’n kigen hi. Vuah tamdeuh a zuk chiangin Imphal khawpi sung buai gige a, tulai in Jawaharlal Nehru Urban Renewable Mission (JNURM) ten khawpi sunga drainage system bawl uh a, nasepna azawh nailouh ziakun leng drainage lam nawngkai sek hi’n kigen hi. Hibang a vuahzuk chianga buaina a khatveina kia hi nawnlou hi.

JAC pawlin CS kiangah ngen uh
Imphal, Aug-26: AMTUC leh AMGEO kikhaikhawmna Joint Administrative Council(JAC) pawlin zanhal in Manipur Chief Secretary PC Lawmkunga,IAS a office chamber ah va mu in Chief Secretary a let kipahpihthu vatun uh a,JAC pawlin hun sawttak akipan govt ah demand tuamtuam a piaklutte uh pichinsak ding in ngen uhi.Chief Secretary in JAC-te demand ahithei tan ah panlakpih ding hi’n gen pih a, JAC leh Govt in MoU a suai a kaih dungzui ua sepkhiak theih bangbang om hiam chih tanpha leng Chief Minister tawh kithuza ding uh hi’n ana genpih ziakin JAC pawli kipahthu gen uhi.

Numei-pasal kilawmloutak a om mankhia
Imphal, Aug-26:Thangmeiband area a Meira Paibi leh Local Club te’n zan nitakin Cheirao Ching a Waiting Shed ah numei leh pasal kilawmloutak a omlai mankhia uhi. Mat a omte bel Thokchom Inaobi (37) of Khongjom Khewe Ching leh Oinam Merinda(40) of Sagolband Sayang Pukhri Mapal hi uhi. Amau huai hun in zukham tuak uh a, Lamphel Police ah pekhia uhi.

Census re-verification ngai salou
Imphal, Aug-26:Chief Minister O. Ibobi makaihna in Aug 22, 2013 a High Level meeting ah Senapati district sunga sub-division 3-Mao-Maram,Paomata leh Purul sub-divn a khua 48 ah kum 2011 census ah mihing pundan tamlua chih ziakin re-verification bawl ding a thupukna om Nasga People’s Orgn(NPO) pawlin lungkimlouh thu puang uh a,May 9-11, 2011 sunga physical re-verification om khit nunga hibang thuthak om pom theilou uh hi’n gen uhi.

BSEM in HSLC Eligibility test centre ding puang
Imphal, Aug-26: Board of Secondary Education, Manipur (BSEM) in HSLC Examination,2014 ding tawh kisai a Eligibility Test centre ding 10 tuni’n puangkhia uhi. Huaite 1) Ananda Singh Higher Sec. School, ah Roll no. 0000001-0000400 tuding uh a, 2) Brighter Academy ah Roll No. 0000401-0000800; 3) CC Higher Sec. School ah Roll No. 0000800-0001200; 4) Wangkhei Higher Sec. School ah Roll No. 0001201-0001400; 5)TG Higher Sec. School ah Roll No. 0001401-0001800; 6) Johnstone Higher Sec. School ah Roll No. 0001801-0002200;7) Ibotonsana Higher Sec. School ah Roll No. 0002201-0002500; 8)Ram Lal Paul Higher Sec. School ah Roll No. 0002501-0002800; 9)Keishamthong Higher Sec. School ah Roll No. 0002801-0003000 leh 10) Lila Singh Khongnangkhong High School ah Roll No. 0003001-0003227 tu ding uhi.