Penglam Documentary film honkhiak in om
Lamka, Aug-28: S.Goukhansiam @S.Siampu in azi (late) Sangkhawl theihgigena dinga a bawl “The Great Penglam Documentary Film” kichi tuni zinglam dak 11:00 in YPA Hall, New Lamka ah honkhiat in om hi. Huai ah Health Minister Phungzathang Tonsing khuallian apang in hongkhe ding chih himahleh lemtanlouhna ziak in hawh theilou a, Langkhanpau Guite, Chairman ADC/CCpur in hongkhia in Rev Khen P.Tombing in Pathian kiang ah thumna in lan(dedicate) hi.

Langkhanpau Guite in a genna ah Penglam kichi mi chalak, piltak leh thil ahi dandan a gen ban ah haitaka om himahleh amah hinkhua leh tanchin akipan zil ding tampi om hi’n gen hi. S.Siampu in film shooting ah sum leh pai tamtak seng ahi chih theihchiatsa hi a, Health Minister tawh kithuza in panpihna peding uh hi’n gen hi. Rev Khen P.Tombing in a genna ah eipau a Penglam Film kibawlkhia kipahpihthu gen a, Siampu in maban ah leng khanglui lai apan tangthu tuamtuamte hong bawlkhiat deihthu gen hi. Penglam haitak leh piltak himahleh ahaina leh pilna tungtawn a zilkhiat ding tampi om hi’n gen hi. Film Director S.Siampu in Penglam Film kibawl khia mipi’n dubbing bawlsaklou ding in ngen hi.

Bangladesh a Supreme Court Judge in Lamka hong phading
Lamka, Aug-28: Bangladesh Supreme Court a Judge sem Justice Bhabani Prasad Singha in Manipur hongpha a, Aug 29, 2013 in Imphal a Classic Hotel apan zinglam dak 9:30 in Imphal nusia in Lamka hongpha ding hi. Justice Bhabani Prasad in Khuga Dam enkhia in huai ah lunch nei ding a, sunnung dak 1:00 velin Imphal ah kiknawn ding hi.

Electric gui sautak kitan
Lamka, Aug-28: Singngat leh Lamka kikal a Lamjang farm kiangah tuni’n electric gui sautak kitan hi’n kigen hi. Thu kizadanin huai electric gui kitan pen lamsak ah niamchik in kikhung a, lamlian lai bel khaktan khalou hi’n kigen hi.

Capacity Building of Mid Day Meal
Lamka, Aug-28: Director Education, Imphal leh ZEO/CCpur saina in Sept 6, 2013 zinglam dak 9:30 in IB Road a Synod Hall ah ‘1-day orientation programme on Capacity building of Mid day meal Scheme’ om ding a, ZEO khuallian apang in hong ding hi. Huai hun ah
Mid Day Meal tawh kisai in Director of Education (S) apan Nodal Officer leh teamte’n sinsak ding uhi. Orientation program ah Mid Day Meal tangkha ZEO/CCpur nuai a school-te leh ADCC nuai a school a Headmaster/Headmistress te tel ding uhi.

Reproductive & Sexual Health
Lamka, Aug-28: Dist Health Society/CCpur saina in zan akipan school tuamtuam ah ‘Adolescent Reproductive & Sexual Health (ARSH)’ tawh kisai quiz-cum-awareness program om hi. Zan in Vungzagen H/S ah om a, tuni’n Vimala Raina H/S ah om hi. Huai ah Seiboi Mate, DDM, (NRHM) in sinsak a, Aug 29, 2013 in Gandhi Memorial H/S ah om ding a, Aug 30, 2013 in Phungkhothang H/S ah om ding uhi. School tuamtuam a program neih hun ah class IX & X-te’ lak ah quiz kidemna neizel uh a, kipahman leng pia uhi.

School Evangelistic Camp
Lamka, Aug-28: HM English School a Moral & Religion deptt saina in tuni nitak in T.H. Joel Haokip, Secy School Foundation in ‘I am the way, the Truth and the Life’ chih pansan in School Evangelistic camp 2013 hongkhia hi.Huai Evangelistic Camp om sungin Evan Paugin; Evan Helun leh Mangcha, M.Th te’n Pathian thu gen ding uh a,Sept 2, 2013 in zou ding uhi. HM English School (HOMES) in kumteng in student-te khalam a a khanlet uh dfeihna ziakin School Evangelistic Camp neizel uhi.

Numei pawlte saina in thumna
Lamka, Aug-28: New Lamka area ah khamtheih chi tuamtuam zuak, hih zongsang leh numei-pasal kala thangtatna banah sualna tuamtuam hihte New Lamka area a numei pawlte’n vei mahmah uh a, tuni zinglam dak 10.00 akipan sunnung dak 1.00 tan New Lamka a EBC Hebron biakinn ah thumkhawmna leh ngaihdam ngetna nei uhi. Thumkhawmna hun Pastor T.Vungkhansuan, Local Pastor EBCC Hebron in thumna in hongkhia a, program sung in Miss Liankhoman, Dorcas Co-ordinator, EBC leh Mrs Chingngaihlun te’n Pathian thugen nei uh a, biakinn dim phitphet khop atam mipi kikhawm uhi.

EBCC Beth in Behiangjang veh
Lamka, Aug-28 : Baptist Youth Fellowship (BYF) Bethlehem EBCC New Lamka (G) ten “Na Pathian tuak dingin mansa in om in” chih thupi zang in Aug. 7-8, 2013 sung Behiangjang khua veh uhi. Zou Presbyterian Church Synod (ZPCS) biakinn ah kikhopna nuamtak nei uh a, thu leh la in kipawlkhawm uhi. Tua hun in BYF Bethlehem te’n silh le ten telin van tamtak leng pia uh a, Behiangjang khua mipite kipak petmah uhi.

CCpur Centre apan 189 lawhching
Lamka, Aug-28: Staff Selection Commission(SSC) saina in April 21, 2013 leh May 5, 2013 in Combined Graduate Level (Tier-I) Exam, 2013 om a, huai result puankhiak ah CCpur Centre exam 1378 vel lakah 189 lawhching uhi.Tier-I a lawhching candidate-te’n Sept. 28 & 29, 2013 in Tier-II exam ding uh a, huai a paisuak teng interview dinga sap hiding uhi. Ccpur Centre akipan All Post adi’n mi 149 leh Tax Assistant post a din mi 40, akigawm in mi 189 lawhching uhi.North Eastern Region a Centre 11 apan Guwahati ah All Post adi’n 462 lawhching uh a, Imphal ah 386; Shillong ah 261; Kohima ah 231; CCpur ah 149; Dibrugarh ah 80; Aizwal ah 80; Itanagar ah 73; Jorhat ah 61; Agartala ah 46 leh Silchar ah 40 hi uhi. Tax Assistant Post adin Guwahati apan 126; Imphal ah 94; CCpur 40; Shillong ah 40; Kohima ah 39; Dibrugarh ah 21; Aizwal ah 14; Itanagar ah 10; Agartala ah 8; Jorhat ah 8; Silchar ah 8 hi’n kigen hi.

Suunna
Mrs. Donkhanching @ Nu Don w/o Upa Zamkhuosuon of Singngat tuni nitaklam dak 4:30 in “stroke” (Brain Haemmorhage) ziakin si a, Aug 29, 2013 in Singngat ah kivui ding hi.

IMPHAL NEWS
Ministerial team in enkhe ding
Imphal, Aug-28: Deputy Chief Minister & incharge Home Gaikhangam in tuni’n Press-te kimuhpih in a genna ah Indo-Myanmar border fencing ah a thil hihdan diklou a om leh bawldik ding in government in panla ding chi’n gen hi. Aman a genzelna ah Dr J. Suresh Babu,IAS, Principal Secretary(Home) makaihna in High Powered Committee in Indo-Myanmar Border fencing a etkhiakna ua a muhdan uh govt a report piaklut hun in Ministerial team(Minister hunkhop) in border fencing kibawldan va enkhe ding uh hi’n gen hi. Dy CM in a gendan in Indo-Myanmar gamgi tungtang ah Centre leh state govt kithuzatuah gige a,bawldikngai a om leleng akinlam a zawhfel ahih lam-et thu gen hi.

MBBS/BDS Select List suak
Imphal, Aug-28: Director of Health Services, Govt of Manipur in academic session 2013-2014 akipan state nominee a MBBS/BDS course zil ding select list leh wait list suahkhia a, huai dungzui in un-reserved 77, ST 47, SC 3,OBC-M 19, OBC-MP 6 leh OBC Teli/N 1 tel uhi.Select list atel singtangmi(ST) 47 leh Wait list atel singtangmi(ST) mah mi 6 te’ min page 2na ah ahi bangbang in kisuah a, huaite ading in Sept 7, 2013 zinglam dak 10.00 in Lamphel a R 7 D Wing complex a Main Hall ah Open Counselling om ding hi.

Auto driver sihna thu ah mipi sousang
Imphal, Aug-28 : Tera Loukrakpam a om auto driver Ayekpam Nobin Meitei (55) s/o (late) Mohon zan nitak in RIMS a damlou paw ding a hire a om tuni’n Thoubal PS huamsung Kiyam Tangjen Hangen Konjin Erak mun ah sisa a muhkhiak in om hi. Aluang leh auto omna feet 100 vela kigamla in muhkhiak hi a, a innkuante’ tawh zan nitaklam tan in phone tungtawn in kithuzathei ua, himahleh nitak nungin a phone ki switch-off hi’n gen uhi.
Nobin Meitei taksa tungah liamna ma mun 2 ah muh hi a, a awm(chest) leh gawl (neck) lakah hiamhei a khoihna ma om hi. Huai ziakin Imphal-Jiribam Autorickshaw Drivers paw in tuni in lampi khaktan in kiphin uhi. Nobin luang post-mortem bawl dingin RIMS ah koih hi a, aman azi leh a tate 4 nusia hi.

Govt omlou tawh kibang –Dr M. Nara
Imphal, Aug-28:Manipur ah nekguk takgukna(corruption) nasa lua a, vaihawmtu govt tanpha omlou bang khop in Manipur ah nawngkaina ngen in dim chi’n CPI state Secretary Dr M. Nara,ex-Minister in tuni’n Irabot Bhavan ah Press-te ma ah gen hi. Aman a genzelna ah Manipur ah drug tungtawn a summet bawlte leh politiciante aguk a kizopna nei uh hiding a ginlelh-huai khop in khamtheih thila kibualte chethe uh hi’n leng hi. Manipur gam it-tu diktak leh Manipur kipumkhatna paipih Jana Neta Hijam Irabot pian champha 117veina September 1, 2013 akipan in kha kha sung zat hiding chi’n leng Dr M Nara in gen hi.

Tata- 407 in naupang khat phulum
Imphal, Aug-28 : ISKON temple a anu tawh hawhlai lampi ah Tata-407 in Paonam Angamba (4) s/o Ningthem of Ghari Mayai Leikai phukha in amun ah si hi. Thusuak in a gendan in Paonam Angamba leh anu in ISKON Temple manawh a pailai zinglam dak 9:45 vel dingin Ghari road mun ah Tata-407 in phukha a, Paongam Angamba etkol manlouh in a mun ah si hi.

Transfer/posting
(Manipur Health Service Officers)
1.Dr Lalremruati Colney,Medical Office incharge, Primary Health Centre/Singngat as
Medical Officer, Primary Health Centre/Sagang.
2.Dr Jamthianlal Valte,Medical Officer, District Hospital/CCpur as Medical Officer
incharge,Primary Health Centre, Singngat.
3.Dr Mary Jone Lalnunthar,Medical Officer, District Hospital/CCpur as Medical
Officer,Primary Health Centre/Singngat.
4.James Khupkhohao Touthang,Medical Officer, Primary Health Centre/Sagang as Medical
Officer, Primary Health Centre/Thanlon.