SSPP Rayburn College ah Fresher’s Meet nei uh
Lamka, Aug-31: Siamsinpawlpi (SSPP) Rayburn College, Hr Sec.Section te’n tuni in YPA Hall, New Lamka ah Fresher's Meet-2013 a 2veina nei uh a, Chief Guest in Langkhanpau Guite, Chairman ADC/CCpur pang hi. Huai ah Guest of Honour in Rev Khen P.Tombing, Principal, Rayburn College pang a,Functional President in Lianzapau Samte, President SSPP Gen HQ pang hi. Pastor T. Vungkhansuan, Local Pastor EBCC Hebron in Freshers student 163 te Pathian kiang ah thumsak hi.

Chief Guest in agenna ah Rayburn College akai SSPP member te'n lai hoihtak a sim a, College in a kisuanpih tham hih sawm din hasuan hi. Nidanglai in pi leh pu te'n sa mat galmat tam in kidem uh a, tulaia IAS leh sepna sang taktakmute i ngaih sang dan in ana ngaisang uh chi hi. Laizilna lam ah mi khenkhat in hun neihlouh paulam sek uh a, Pathian in miteng nikhat in dakkal 24 hon pia a, hun zang siamsiam mi lawhching hi’n gen hi. Student hih lai in kicheidan huntawk theih a, mite et aleng khengval lua a kicheilou ding in student-te ngen hi. I omdan apan mite'n SSPP ihih uh hon theihkhen uh poimawh a, zu leh khamtheih akipan kuapeuh kikem siangthou chiat dingin student-te hasuan hi.

Rev Khen P.Tombing in kum 1980 vel apan igam ah khamtheih honglut in inn chihphial nawkkha a, society sung naktaka tokbuai hi’n gen hi. Huai zawh unau melhaih hun hongtung in inn-le-lou tamtak haltum in om a, poikhoihlou mi tamtak ina hinna uh chan in huai nung kuapeuh kitoudelh theipanpan hi’n gen hi. Student te’n mahni khe a dinsawm a, laisimna ah kuhkal, chitak leh tupguh neikawm a laisim din hasuan hi.
Lianzapau Samte in a genna ah student- te tunung a nam leh gam adia khuampi ding ahihman in omdan, gamtat leh khawhei ah pilvang a, kuhkal leh tupguh hoihtak neikawm a laisim dingin hasuan hi.Student te’ graduate hun ah mahni kitoudelh theihna ding in khut nasep kidamlou a, siamna tungtawna govt ah sepna muzou loute’n nu-le-pa ah kinga lou a, mahni khe a dingzou ding a panla ding in hasuan hi.

Siamnunlian Valte in agenna ah Science leh Maths ah graduate kitam zou ngeilou a, Maths leh science teacher hoih i neihlouh ziakin civil service lam ah leng paisuak haksa hi’n gen hi. Student-te nam leh gam adia Architect hi uh a, tua dungzui in siamsinte'n tupguh kichian tak neih a i mi namte’ adia suan tham hi theihna ding a panlak ding ahi chi'n gen hi. Igam khangtou mahleh khantouhna detdou tak omtheihna ding leh employee bawlkhiat theihna ding in student te’n company tanpha bawlthei dinga panla dingin hasuan hi.

Denmark gam ah Ph.D. sin ding
Lamka, Aug-31: Dolly Doisiammawi Suantak d/o S.Genlunthang Vaiphei @Thangpi of Red Cross Lane, Hilltown in Denmark gama Aarhus University nuai ah kum 3 sung Ph.D(Anthropology) sin theihna ding scholarship mu chihthu om hi. Aman tulelin NEHU nuai ah JRF bawllel a, Sept 1, 2013 nitak in New Delhi apan Denmark zuan in kuankhe ding hi. Aarhus University bel leitung a University minthang mahmah khat ahihban ah Denmark gama University lianpen 2na hi’n kigen hi.

MSDP proposal list submit
Lamka, Aug-31: DC/CCpur makaih in tuni zinglam apan MDC member te’ block tuamtuam a kikhen in 12th Finance a 5th Year Plan ading MSDP proposal list submit uhi. Thusuak kingahdan in Manipur govt in MSDP tawh kisai state share a neih nak leh kum 5 sung lou in leng proposal submit teng zawh theih hi’n kigen hi.

Peace Mela hun behlap uh
Lamka, Aug-31: Tuibuong Peace Ground ah Aug 9, 2013 akipan Peace Mela kipan a, lawhching taka paitou zelin Aug. 31, 2013 a tawp ding in kigen mahleh ahun behlap nawn uh a, Sept 17, 2013 tan sunzawm ding uh hi’n thutut kingah hi.

1st phase ah 400 training ding
Lamka, Aug-31: Directorate of Education, Govt of Manipur in kum 2015 tan in untrained techer teng training vek ding in order suah a, Diploma in Elemenraty Education course training ding teacher list 1st phase suahkhiat hi a, mi 400 hiding uhi. Huai lak ah CCpur Dist apan mi 25 telkha a, tunung sawtlou in 2nd phase a training ding list suahkhiat hiding in kigen hi. Thusuak kizadan in Manipur ah tulelin untrained teacher 7000 vel om a, kum 2015 tan a training louteng govt in tawpsak thei hi’n kigen hi.

Home Style dawr thak kihong
Lamka, Aug-31: Chiengkawnpang a ECA office kong ah Mading Gangte in abawl dukan thak “Home Style (from Lighthouse Enterprises)” kichi tuzing dak 8:00 in Pastor T.C Goupi, Local Pastor GBA in hong in Pathian kiang ah thumna in lan hi. Pastor T.C Goupi in hasotna thugen in dukan bawltute chitak leh gin-om taka pangte akipat tung un lawhching hehu kei mahle uh atawplam in lawhchinna thupitak tawh Pathian in vualzawl hi’n gen hi.
Home Style dukan ah inn bawlna ding vanzat ch tuamtuam- pardah khaina, tyle, alluminium window & glass, spring mattress, false ceiling leh thil tuamtuam leitheih banah order theih ding hi. Huai dukan a vante Imphal rate tawh kibang a leitheih hi’n kigen a, adiak in spring mattress-te Manipur ah agent om nailou in Guwahati ah agent 1 kia om hi’n kigen hi.

DS quater thak honna om
Lamka, Aug-31: Upa T.Lamenthang, Chairman, DWC, EBC Lamka South in tuni zinglam in New Lamka Convention Road ah Divnl. Supdt, EBC Lamka South adia quarter kibawlthak hongkhia a, Rev Dr S.Langzakham, DS, EBC Lamka South in thumna in lan hi. DS quarter ding suangphum apaisa July 10, 2012 in Rev N.Thawndoulian, DS in nei a, zawhsiang ahihtan in Rs 14 lakh vel bei hi’n kigen hi. Huai quarter ah kitchen leh common room telin room 5 om a, inn nuailam ah gari parking mun ding om hi.

Numei- pasal kipawl lai mankhia
Lamka, Aug-31: ZYA Tangnuam Unit duty te’n tuni nitak dak 8.30 velin Pangzawl khawsak a Inter-State Bus Terminus mun ah numei leh pasal lumkhawm lai mankhia uh a, huchibang omdan thanghuai leh deihhuailou a om nawnlou ding in thuhilhna hoihtak a neihzawh un khahkhia uh chih thutut kingah hi.

KSO Haopi Block honna leh Election
Lamka, Aug-31: Geljang khua ah tuni in KSO Haopi Block honna leh election kithuah om hi. Huai ah Paokai Haokip, President KSO/CCpur in KSO Haopi block hong kawmin makai thak dingte kichiamsak hi. KSO Haokip block makai thakte President -K.Lunthang; Secretary- Seilienmang; Information Secy -Lunkhongam leh Finance Secy -Lamkhohao hi uh a, Rev T.Thangkholet Haokip in Pathian kiang ah thumsak hi. KSO Haopi block in khua 14- Ngoiphai, Geljang, Phaibem, K.Gamnom, K.Lhangnuai, M.Lhahvom, M.Semol, Vengnomphai, Mualsan, Thingkangphai, Pangjol,Suangsibok, Toljang leh Tuikhamphai khua huamkha hi’n gen uhi.

IMPHAL NEWS
Chief Minister in JNIMS enkhia
Imphal, Aug-31: Chief Minister O. Ibobi in Imphal a Jawaharlal Nehru Institute of Medical Sciences (JNIMS) mun vapha a, huai ah Ladies Hostel, Administrative Block, Academic Block leh 150-bedded Ward kibawl lel enkhia a, OPD Ticket Counter leh complex sunga SBI branch omna mun leng enkhia hi. Chief Minister in Administrative Block kibawl nasepna zekailua sak ziakin lungkimlou a, nasemte’n panla kin ding leh kinawh deuh dingin Chief Minister in theisak hi.Medical Council of India te’n Dec 2013 in JNIMS hong enkhe ding uh ahihman in huaima in nasep zawh poimawh chi’n CM in gen hi. Chief Minister in JNIMS a phakna hun ah Health & FW Minister Phungzathang Tonsing,Works Minister Dr. Kh. Ratankumar, Principal Secy(Works) Ram Muivah, Principal Secy(Health) Suhel Akhtar banah PWD leh PDA official-te’n zui uhi.

Guv’ Bungalow kiangah bomb puak
Imphal, Aug-31: Paona bazar a Manipur Governor’ bungalow akipan gamlalou State Social Welfare Board Office kiang ah tuni nitaklam dak 4.00 velin IED bomb khat puakzak a, helpawlte thilhih hidingin Police te’n gingta uhi. Bomb puak ziakin thilsia tungkei mahleh Governor’ Bungalow a security guard a om, 109-Bn CRPF a constable TJ Singh liam zek hi’n kigen hi.

MK Das in DGP mawhpuakna len ding
Imphal, Aug-31: Y. Joykumar,IPS, Director General of Police(DGP),Manipur tuni’n Service apan khawl(retired) a,regular a DGP len ding guanfel masiah MK Das, IPS, Additional DGP(Home Guard & Prisons) in DGP mawhpuakna len ding in Under Secretary(DP) in order suah hi.
Y. Joykumar Singh siamna lam ah M.Sc hi a, Nov 14, 1976 Indian Police Service a lut hi’n kigen hi. MK Das,IPS bel laisiamna lam ah MA hi a, kum 1977 batch Manipur-Tripura cadre IPS Officer hi a, Nov 19, 1978 Indian Police Service joined hi’n kigen hi. MK Das in service hun sawt a neih nawnlouh ziakin a retire ma teng DGP len ding in gintak-huai chihthu kiza hi.

RIMS adi’n 10-bedded Deluxe paying ward
Imphal, Aug-31: Prof N. Damayanti, Chairperson, Hostel Development Committee, Regional Institute of Medical Sciences(RIMS) in tuni’n RIMS thuneite kiangah ’10-bedded Delux paying ward’ pekhia hi. Prof S. Sekharjit in huai pen Prof C. Arunkumar, Medical Superintendent etkolna nuaia koih hiding chi’n gen hi. Tuni a function lianlou zatna ah G.R. Khetrapal, Deputy Secretary, Union Ministry of Health & Family Welfare in leng uap a, Director in a genna ah Vijay Patni in apa Bhagawan Patni theihgigena dingin huai 10-bedded Deluxe Paying Award bawl hi’n gen hi.

Naga leh Kuki kivaihawmna tuam deihlou
Imphal, Aug-30: United Naga Council (UNC), Union government leh Manipur govt in New Delhi ah 6veina dia kihouna a neih utawh kisai tunai chin a kiphutkhia Hill People’s Forum (HPF) in thusuah bawl in Naga leh Kuki adingin administrative unit tuam bawlkhiak ding deihlou uh ahihdan puang uh chi’n UNA thusuak in gen hi. hi. (UNA)

Electricity employee-te’n ngen
Imphal, Aug-31: Manipur Electricity Employees’ Union (MEEU) te’n post awng 2255 leh work charged 365 leh Master Roll employee 38 te ahi ding bangtak leh a paidan ding bangtaka paisak dingin ngen uhi. Manipur Electricity Employees’ Union-ye Head office ah tuni’n Y. Ranapratap, President in New saite kimuhpih a, Manipur in NEEPCO, NHPC, TSECL leh PGCIL kiangah electric power leina dingin Rs 15 crores vel seng ahihdan gen hi.

Awareness and Memorial Day
Imphal, Aug-31: SASO, MNP+ leh Care Foundation kithuahte saina in Wahengbam Leikai a Brajanath Mandop ah tuni zinglam in ‘Unnecessary Death’ chih thupi azang in ‘Awareness and Memorial Day 2013’ zatna om a, Dr. Shyamjai , Deputy Director ,Manipur State Aids Control Society leh Health official-te ahunkhop tel uhi.