Central in a sponsored scheme tuamtuamte’ nasepdan enzui dingin Committee tuamtuam 3 kibawl khia
Imphal,Oct -15: Prime Minister’ 20-point Programme nuaia scheme tuamtuamte Manipur ah nasephiakna lam a ze-awl luat ziakin nasepna lam hatzawksem theihna dinga enzui dingin state govt in Monitoring Committee tuamtuam 3 bawlkhia chihthu om hi State Planning deptt in Monitoring Committee 3 a bawlkhiakte bel State Level Committee, District level Committee leh Block level Committee hi uhi. Chief Minister in State Level Monitoring Committee a Chairman hihna len a, Deputy Commissioner te’n District Level Monitoring Committee a Chairman hihna len a, Additional Dy Commissioner te’n Block Level Monitoring Committee ah Chairman in pang uhi.

PM’s 20-Point Programme kichi kum 1975 in patkhiak hi a, huai nung kum 1982, 1986 leh d 2006 in a programme bawlthak zel hi a, scheme tuamtuam- zawnna hihbeina ding,lou bawlte huhna, tuisiang dawn ding piakna; Schedule Tribes, Schedule Caste & OBC-te khawsakna changkanna ding; numei leh naupangte khantouhna ding; kikawmna lamlian puahna ding; slum area mite khantouhna ding gelsak, singtanggam a khawsate sepna piak ,inn neiloute tenna ding ngaihtuahsak, laizilna, family welfare, damtheihna lam, environment conservation leh khawtang dinmun khantouhna ding chihte a programme ah tel hi.

Hiai programme nuaia project leh scheme chiamtehtham deuhte bel Mahtma Gandhi National Rural Employment Guarantee Scheme (MGNREGS), Swaranjayanti Gram SwarojgarYojana (SGSY), Targeted Public Distribution System (TDPS), Antyodaya Anna Yojana (AAY), ICDS Scheme, Prime Minister GrameenSadakYojana (PMGSY), Rajiv Gandhi GrameenVidyutikaranYojana (RGGVY), National Rural Drinking Water Programme (NRDWP) leh Sanitation Programmes tuamtuam hi a, himahleh hiai scheme-te khawpi tawh kinaih urban leh rural areas mun ah sepkhiak hi a, singtangdawn leh gam kilkoi munte ah nasepkhiak muh ding tawm mahmah chih ahi hi.

Scheme tuamtuamte sepkhiakdan ze-awl lua sak banah nasepna hatzawk theihna dia enzui dingin Monitoring Committee 3 bawlkhiak dingin thupukna om a, Chief Minister in Chairman ahihna State Level Monitoring Committee a member-te Environment & Forest Minister, Health & Family Welfare Minister, PHED Minister, RD&PR Minister, Social Welfare Minister, Chief Secretary, akisaipih Secretary-te, govt of India akipan representative 2, social sector a nasem NGOs akipan representative 2 banah educationist 2 hiding uh a, huai Committee in kum 1 sungin scheme sepkhiakdan 2vei enzui ding uhi.

DC in Chairman/Chairperson ahihna District Level Monitoring Committee a member-te be; District Development Officer banah Social Welfare, Health & Family Welfare, Environment & Forest leh DRDA a Chief Executive Officer-te leh India govt akipan representative 2, NGO akipan representative 1 banah Educationist 1 tel ding a, huai Committee a Member-Secretary in ADC/DPO (Planning) pang ding hi. Committee in kha 3 sungin scheme tuamtuam sepkhiakdan khatvei zel enzui kawmin Annual District Plan bawl ding uhi.

Huaibanah Addl DC in Chairman ahihna Block Level Monitoring Committee ah Social Welfare, Health & Family Welfare, Environment & Forest leh DRDA a Block Level Officer-te banah, Adhyaksha/Up-Adhyaksha, Pradhan/Up-Pradhan, District Council member-te, India govt apan representative 1, NGOs akipan representative 1 leh educationist 1 telding a, Committee a Member-Secretary in Block Development Officer pang ding hi. Committee in kha 3 zelin 1vei teitei schemes tuamtuam sepkhiakdan enzui(review) ding uhi.

Oct 19 in Rev Dr. Do Kham kivui ding
Lamka, Oct-15: Rev Dr. Chin Do Kham, D.D, D.Min, Ph.D zanhal in Motel Laurel 6, Maryland, US ah bathroom a kisil lai pukphut in si a, zan nitaklam dak 3.00 in Baltimore Airport apan Funeral Home khat a puaklut in om hi. Aluang Oct 16 nitaklam in Tulsa airport puaktung hiding a, Schaudt’s Glenpool Funeral Home, Tulsa ah vui dinga koih hiding hi. Tulelin sivuina ding han (cemetery) buaipih lel uh a, Oct 19, 2013 in kivui ding hi.
Tuni akipan Oct 18, 2013 tan Jenks city sunga Newspring Family Church ah Dr. Do Kham suunna leh a hinkhua a a nasepte kipahpihna nei ding uh a,Dr. Do Kham innkuanpih e gamdang a omte’n leng Tulsa zuan uh a, zan nitakin Far East Mission Church ah suunna hun zang uhi.
Dr Do Kham sihna Motel 6 a General Manager Ms. Aleice Whitaker in agendan in Oct 13(Sunday) zinglam dak 11:00(US local time) apan dakkal 2 sung a room sungah dai zikzik in om a, aman leng lamdang sa in anuaia semte’ hilh a, amau kong a kiuh hang un dawnna bangmah omlou in phone in houpih sawm mahle uh dawnna omlouh ziakin Police-te sam uh hi’n gen hi. Police-te leh Motel staff te’ pindan sung alut hun uah kisilna kuangsung ah sisa in mukhia uh, chi hi. Police-te’n investigation a bawlzawh uh nitaklam dak 5.00 velin Ambulance a pawkhia in Baltimore Medical Examiner office pawtung uhi.
Zomi Innkuan Delhi makaih in Oct 16 in Vikas Puri a biakinn ah Zomi Christian Fellowship Rev Do Kham suunna nei ding uh a, Kuki Christian Leaders Fellowship, Kuki Baptist Convention, ZOMUS, ZBCM, GZA, ZRO, ZC, 3WZC, Zomi Innkuan mun tuamtuam ate banah mimal leh pawl tuamtuam in suunthu puang zungzung uhi.
Rev Do Kham bel, US mite’n ngaina in ngaisang mahmah uh a, makai ettontham ching in leng ngai uhi. Mizoram CM Lal Thanhawla in leng Mizoram veh dingin chial ngeita hi.

SUUN PIHNA THUPUAN
Thangkhankhup (40) s/o SK Ngaihte,EE(retd) of Lower Chapellane tulelin Dimapur, (Nagaland) ah Union Bank a Probationary Officer(PO) semlai tuni zingsang in bathroom ah pukphut in si a, aluang Lamka a vui dingin tuni nitak zansawt nungin Dimapur apan hong kipaw ding a, Imphal a a inn uh totpih masa kawm ding uhi.
Manipur Express a Patron member SK Ngaihte leh a innkuante’n hibang lusuunna a tuahna uah Manipur Express staff-te’n ka thuakpih un ka sunpih mahmah uh a, amau haksatna hun ah khamuan a hehnem ding in Pathian kiangah ka ngetsak uhi. –Manipur Express staff-te

DC in suty la in a khua uah zin
Lamka, Oct-15: Ms Jacintha Lazarus, IAS, DC/CCpur in tuni apan suty la a, Tamil Nadu state ah a tenna khua uh zuan in zinkhia hi. Amah Oct 21 ahihkeileh Oct 22 , 2013 in Lamka hongtung kiknawn ding hi’n kigen a, DC/CCpur omlouh sung in Maniram Sharma, IAS, Addl DC & Project Director DRDA in DC/CCpur mawhpuakna len ding hi.

Electric dept- te nasep kipan
Lamka, Oct-15 : Electricity deptt/CCpur Divn te’n District Hospital ah dakkal 24 sung electric meivak supply piak a sawm uh sepsuahna ding in Khengjang Power Sub-Station apan electric meivak laksawm uhi. Tua tawh kiton in tuni’n nasep kipan uh a, District Hospital apan in electric khuam phut uh a, tuni in Zellang Veng tan tung ua, Oct 16 in Bijang tan tung ding uh hi’n kigen hi. Amau a gendan un tu October khasung a zawhsiang hiding a, huai chiang in District hospital ah niteng in dakkal 24 sung electric meivak omta ding in gen uhi.

‘Walk for Health’ awareness campaign
Lamka, Oct-15: Ngathal a SSPP Residential school student te’n tuni zingsang in khawpi sung ah “Walk for Health” awareness campaign nei uh a, Ginzamung, Asst Commandant STC/BSF in khuallian a pang in uap a, Rev T.Lalzagin, Area Pastor in thumna in student-te khakhia hi. Khuallian in agenna ah mihingte’ adin exercise poimawh petmah a, zingsang baihtak a damtheihna ding in zingsang baihtak a walking paizel hoih mahmah hi a gen in kuapeuh zingsanga walking paizel dingin hasuan hi.
Headmistress Biaksang in school dangte hih ngeilouh ‘Walk for Health’ kichi patkhiak hi’n gen a, Lamka ah gari tam hiaihiai in huih niin deuhdeuh a, damtheihna dingin gari zat tamlouh a, zingsang a walking paizel poimawh chih mipi laka tangkoupihna neih hi’n gen hi. Huai ah SSPP Gen HQ makaite, teacher leh student-te tamtak tel uhi.Amau SSPP Residential school apan Ngathal road -New Lamka a Jamsuan Road-Awnsuak Road- Dorcas Road- Marian Street zui in Phailian ah suakkhia uh a,Tipaimukh Road zui in Lamka Police Station apan Tedim Road zuitou nawn uh a,Ngathal Road zui in school tungkik uhi.

CBF Annual Conference om ding
Lamka, Oct-15: CCpur Baptist Fellowship(CBF) pawlin Beulahlane a Simte Baptist Church ah Oct 18-20, 2013 sung Annual Conference 32veina zang ding uhi. Annual Conference om sung in Rev Sut Khan Thang,Executive Secretary,CBA; Pastor Henjalen Doungel,Pastor KBC C/C B. Vengnuom; Rev H. Kaisanglun Gangte,Women & Youth Secretary,GBA; Rev Bonny Kamkhosat Kilong,Pastor Ch BA Gambih No. 2 leh Rev Lal Ngaihte, Mission Secretary,SBCA in thugen ding uhi.

Mihing pilvang ding leh ganvulh khahzanlouh deih
Lamka, Oct-15: STC BSF a traning te’n Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah thau a kap uh ahun behlap uh a,tuni askipam Ocvt 31, 2013 tqan zingsang dak 5.30 akipan in nitak zan sawt tanpha leng kap ding uh hi’n DIG, STC BDF in puang hi.
Huai hunsung in mihing kuamah huai area a lutlou ding leh ganvulh leng huaimun a lut thei dingin kuama’n khahzanlou din theisak uhi.

Pathian thu genkhawm in lampi zui
Lamka, Oct-15: ‘Lalpa Damna Ministry (Healing God Ministry)’ pawl in tukha bul apan khawpi sung mun tuamtuam ah Pathian thugen uh a, tuni’n Hill Town a Tribal Museum apan Pathian thu genkawm in khawpi sung lamlian zui uhi.Amau Tribal Museum apan Red Cross Road zui in Tedim Road apan Tuibuong Forest Gate tan zui uhi. Lalpa Damna Ministry pawl in program a neihna uah Vanlalrengpuii in Pathian thugen zel hi.

KVIB te’n interview zou
Lamka, Oct-15: Trade tuamtuam ading PMEGP loan 2013-14 apply-te laka KVIB ate adin Oct 9 apan DC office a BRGF Resource Centre ah interview om a, tuni’n zou uhi. KVIB tungtawn a apply 674te lakah mi 184 absent uh a, tuni a interview a telkha loute’ adin Oct 17 in chance piak hilai ding hi. Oct 17-23, 2013 sung KVIC nuai a loan apply-te ading in interview om ding a, Oct 17 in Sl.No.1- 150; Oct 18 in Sl.No.151- 300; Oct 21 in Sl.No.301- 450; Oct 22 in Sl.No.451- 600 leh Oct 23 in Sl.No. 601- 651 hi ding hi.

Saptuam 3 kigawm thumkhawm uh
Lamka, Oct-15: Bungmual a EBC saptuam 3- EBCC Bungmual, EBCC Bethany leh EBCC New Lane a numei pawlin tuni zinglam dak 10:00 apan in New Lane a EBC biakinn ah khawtang siatna tawh kisai in thumkhawm uhi. Huai hun ah Mrs. Chingngaihlun in Pathian thugen in thumna ah makai a, numei tamtak paikhawm uhi.

ZYA CEC meeting om
Lamka, Oct-15: Zomi Youth Assn (ZYA) a Central Executive Committee pawl tuni zing dak 7:30 in Nehru Marg a Zomi Council office ah meeting uh a, huai ah Cabinet activities report pom uh a, Oct 25-27, 2013 sung Lamka Public Ground a 3rd World Zomi Convention ading Hall bawlding thu genkhawm uhi. Oct 16, 2013 in vanzat ding teng kaikhawm ding uh a, Oct 17, 2013 apan Lamka Public Ground ah Hall bawl patsawm uhi.

SUUNNA
K. Thangrem (53) s/o (late) K. Lianzau of Mission Compound tuni sunning dak 2:00 velin cancer natna ziakin si a, Oct. 16, 2013 in Mission Compound hanmual ah kivui ding hi.
K. Lalcha Gangte(89) s/o(late) Soikhai Gangte of Old Bazar/Zenhang Lamka taksa upat tak ziaka teknat in zan zingsang baihtak dak 1.20 velin si a, Zenhang Lamka hanmual ah kivui hi.

IMPHAL NEWS
CM leh Governor apan message
Imphal, Oct-15 : Muslim mite adia ni poimawh Oct 16, 2013 a kizang ding Id-ul-Zuha tawh kisai in Manipur Governor Dr Ashwani Kumar leh Chief Minister O. Ibobi in Muslim community-te deihsakna thupuan bawl uhi. Governor in Manipur mipite lakah Id-ul-Zuha tungtawn a kitanausemna, lemna leh muanna a om deihthu puang hi. Chief Minister in a thupuan ah Id-ul-Zuha kichi ‘Festival of Sacrifice’ hi a, hiai hun Muslimte ading a kipahni ahih tawh kiton in nuamtak leh kituak taka zang dingin deihsakthu taklang hi.

General strike in hindan buaisak
Imphal, Oct-15 : Manipur gam Oct. 15, 1949 akipan Indian Union a laklut ahih mawhpaihna in Manipur a helpawl tuamtuam 6 kigawmkhawm Corcomn pawlin zan nitak zankim akipan tuni nitaklam dak 6.00 tan dakkal 18 sung Manipur ah General Strike a puan ziakun huai in hindan ngetna nasatakin buaisak hi. Tuni in Imphal leh district HQ kawmtuah passenger gari-te service omlou a, Imphal ah bazar, banks, sumbuk leh educational institution te kikhak vek hi. Khawpi sung mun tamtak ah paramilitary personnel leh police tamtak duty uh a, passenger gari taituah omlouh ziakin govt office ah semtute office kai muh tawm mahmah hi’n kigen hi. Hileleng General Strike sungin buaina thiltung thupilua gen ding omlou hi.

Ukhrul ah Army leh helte kikaptuah
Imphal, Oct-15: Ukhrul dist sung Nungshangkhong mun ah Assam Rifles-te patrolling pailai PLA hidia gintak helpawlin lampi a bomb ana hihpuak in kikap uh a, hun sawtlou sung kikaptuah uh chihthu om hi. Huai ah asi leh liam omlou a, helpawlte leng gamlak ah kihemkhia uh hi’n kigen hi. Huai tawh kisai in PLA/RPF te’n amau thilhih hidan in taklang uh a, Publicity Secretary Bankim in thusuah a bawlna ah maban ah hibang in PLA te gamtang zelding hi’n taklang hi.

CM in RIMS a Conference uap ding
Imphal, Oct-15 : RIMS Jubilee hall ah Oct. 19-20, 2013 sung ‘17th Annual Conference of the Association of Surgeon of India, Manipur Chapter -2013’ leh ‘International Heptatobiliary Conference’ kithuah om ding hi. Huai ah Chief Minister O. Ibobi khuallian a pang in uap ding a, Functional President in Prof. Ksh. Kala Singh, President ASI Manipur State Chapter pang ding hi. Guests of Honour in Dr. N. Bijoy MLA; Prof. S. Sekharjit, Director RIMS leh Dr. Sarejchandra Hari, President ASI Headquarters te pang ding uhi.

Bandh ziakin vanpua gari tamtak koltang
Imphal, Oct.-16 : Manipur ah khatvei thu in bandh 3 tak om ziakin van tuamtuam pua truck tamtak Mao ah tang(stranded) uh hi’n kigen hi. Saikul Area Naga People’s Organisation leh Kuki Inpi, Saikul Gamkai te’n dakkal 48 sung Senapati district ah bandh bawl uh a, tuni in CorCom te’n dakkal 18 sung General Strike puang uh a,Maoist Communisty Party te’n tuni’n dakkal 12 sung bandh puang uhi. Huai bandh 3 teng akiphut tuah ziakin van pua gari tamtak Manipur a hong paisuak theilou in Mao ah khawl uh a,tuni nitak nungin Mao akipan Gari hunkhop hong kipankhia hi’n kigen hi.

Women’s International Film Festival ah award hoihtak ngah
Imphal, Oct-15:Sonia Nepram in a direct Manipuri documentary film ‘Gun & a God’ kichi minthang mahmah a tuni’n Mumbai a Women’s International Film Festival-2013 ah ‘Jury Choice Award’ piak hi a, Award piakkhiakna hun ah Director Sonia Nepram in award sangg hi.

School gam patta submit ngai
Imphal, Oct-15: Directorate of Education (S) akipan thusuak in headmaster/headmistress tengin a,amau govt school gam(land) patta xerox chiat ZEO te kiang ah copy submit ding in theisak hi. ZEO/CCpur nuai a om govt school a headmaster/headmistress tengin akinlam in ZEO office ah school gam patta xerox copy submit ngai a, ZEO te’n Directorate of Education (S) ah submit sawn ding uhi.

Zomite laka mi poimawh Dr. Chin Do Kham si
Lamka, Oct-14: Zomite laka mi poimawh USA a khawsa Rev Dr Cin Do Kham @ Do Kham,M.Div., D.M., Ph.D. in a omna USA a Maryland state leh New York ah Pathian thugen a om aWashington DC ah Pathian thugen a om tuni zingsang dak 6.00 (IST) in heart attack in si chihthu om hi. Amah dak 11.00 velin Washington DC a a tunna Motel Laurel apan potkhe ding chih himahleh a a potkhiaklouh ziakin Motel staff te’n a room ava etkhiak ua leh kisilna(bathroom) an sisa in mukhia chihthu om hi. Rev Do Kham bel Global Outreach leh Community Development a President ahih banah USA a Zomi Innkuan leh Global Zomi Innkuan a President leng hi a,Global Zomi Alliance(GZA) a General Secretary len lai hi’n leng kigen hi.Aman Pathian thu genin leitung gam tuamtuma ah zin koikoi a,a damsung in leitung gam tuamtuam 35 ah Pathian thu gen hi.
Rev Dr Cin Do Kham kum 1959 in Myanmar gamsung Chin state a Tedim township Saipimual khua ah piang a,apa (late) Lam Za Gin hi a,anu Mrs Cing Za Dim ahi hi.Amau unau 9 pha uhi. Do Kham tu’n US mi hihna(citizenship) nei hi a,azi Dr Siraporn Kham leh a tanu uh Mary(19) leh a tapa uh Joshua(14) tawh tulelin USA a Tulsa, Oklahama ah khawsa uhi.
Rev Do Kham sihthu zak phet in leitung gam tuamtuam a om Zomite’n kitatsatlou in suunthu puang zungzung uhi. Amah dam hileh Lamka ah Oct 25-27, 2013 sung 3rd World Zomi Convention ah leng tel ding a, biakinn 2 ah Pathian thu a gen ding banah Seminar ah leng sinsaktu in pang ding hi.
Zomi Council(ZC), Zomi Re-Unification Organisation(ZRO) leh 3rd World Zomi Conventionb(3WZC) in Rev Do Kham sihthu zak phet in suunthu puang pah uhi. ZC in leitung pumpi in Zomi leader a theihphak Rev Do Kham pammaih sakthu leh suunthu puang uh a,a damsung hun sawtlou himahleh Zomite adia vualzawlna hithei ding in aman vualzawlna thupitak tang hi’n puang uhi. Aman hong nutsiat ziakin hukdim vuallouh ding mun-awng om hi’n leng ZC thusuak i gen hi.
ZRO in Global Zomi Alliance a General Secretary Rev Do Kham suunthu puang kawmin Zomite itna a kizopkhawmna dingin tatsatlou a panla hi’n taklang uh a,Zomite adin aksi banga pitu muanhuaitak hi’n leng taklang hi.USA a Zomite omte kizopkhawmna ding Zomi Innkuan bawlkhiakna a panlatu leng hi a, ZRO in amah zahna pekawm in a innkuanpihte lusuunna thuakpihthu leng puang uhi.
3WZC Organising Committee in leng Rev Do Kham in ahunlou a hong beisanna tung ah suunthu pung kawmin 3WZC thugenpi hiding leh Convention Souvenir adin ‘Zomi-te tuibang kigawm in mapang khawm ni’chih article gelh hi’n taklang uhi.Amah international Speaker minthang ahihbanah laigelhtu leh thil bangkim a Pathian deihdan lenkip tinten mi hi’n taklang uh a,amah omlouh Zomite adin gen vuallouh manna hi’n puang uhi.

USRA 9th Reformation Day 2013 zat in om
Lamka, Oct-14: Henglep sub-divn sunga KNO’ Horeb designated camp ah United Socialist Revolutionary Army(USRA) kiphuhkhiak kum 9 chinna 9th Reformation Day zatna om hi. Huai ah Lalminthang, President & C-in-C, USRA in mipi leh hausa paikhawmte ma ah thugen a, kum 2004 akipan USRA kichi Vaiphei tate adinga phuhkhiak a om hi’n gen hi. President in cadre si mi 6te suunna hun ah makai a, a innkuante uh present pia in, cadre-te kiangah rank leng pia a, gam-le-nam adia nasem hoihte leng kipahman pia hi.
President in agenna ah Vaiphei tate mun tuamtuam a kikhenzak in i omna munpeuh leh totna munpeuh i gam suahsakna dinga kuapeuh in panlak theichiat hi’n gen hi. Hausa-te’ leh mipite’n mahni mawhpuakna sep buchin hileh khangtou ding hihdan gen hi. Development omtheihna dingin mipi leh hausa pankhawm poimawh a, nam khantouh theihlouhna ziak bel hamphatna tamzawte a tang dingte’n a tanlouh ziak uh hi’n leng gen hi.
Kangvai area ah pawlpi in Development Committee phutkhia in, VPC leh Dev commtt theihpihna tellou a namdangte kianga gam-le-guate zuakkhiak phallou in enkai lel chi a, huchimah bang in, singtang khuate a mawk a zuakkhiak khamna leng etkai touh zel hi’n gen hi. Laisiamna lou in gamsung leh nam changkang theilou ahihman in Zillai lamte’ mawhpuakna liantak om hi’n gen hi. Huailou in YVA in kuami-kuanam chih omlou a philanthropic nasep sunzom zel dingin leng ngen hi.
Kennedy Vaiphei, General Secy, USRA in Kuki, Zomi leh Meitei doudal lou a USRA kalsuan hi’n gen a, sanggam khat leh khat kal a kituahna deihzaw chi in, VPC pen Zomi ah om hi’n leng gen hi. USRA in amau area ah gamsung hoihna ding deih in zu le sa, luidung leh mun tuamtuam a siatna tunthei dingte kham uh hi’n gen a, Education policy ah leng panla in school omnate ah hausa upate tawh pangkhawm in laizilna lam naktak a puahphat hi’n gen hi. Kani(poppy) chiinna leh gamsung suse thei dingte tunung a kham hiding ahihman in mipite’n kithuahpih dingin ngen hi. Gamsung hihse thei dingte lakah meihol halnate leng etkai hiding chi hi.
Tuni a 9th Reformation Day zatna ah Chief Guest in Khatkhotong Baite, President, VPC Gen HQ pang a, Functional President in Lamkhogen Vaiphei, President, ZILLAI Gen HQ, Guest of Honour in Paulianlal Vaiphei, President YVA Gen hq leh Chief Host in Lalminthang Vaiphei, President, USRA pang hi.

Rev. Dr. Do Kham suunna om
Lamka, Oct-14: Nehru Marg a Zomi Council office ah tuni nitaklam in Zomi Council HQ inntekna in Rev. Dr. Cin Do Kham of Tulsa,USA suunna om hi. Huai ah Zomi Council Chairman L.B Sona leh 3rd World Zomi Convention a Convenor Dr R.Sanga in suunna thu gen uh a, 3WZC Program Co-ordinator K.Vungzamawi in Rev. Dr. Do Kham in 3WZC adia article agelh simkhia a, Rev Khen P.Tombing in condolence prayer nei hi.
Rev. Dr. Chin Do Kham kum 1959 kum in Saipi khua (Mynmar) ah piang a, apa (late) Lam Za Gin Hatlang hi a, azi Dr. Siraporn (Thailand mi) tawh tapa Joshua Gin Kham leh tanu Mary Ching Kham nei uh a, Tulsa, USA ah khawsa uhi. Siamna lam ah M.Div., D.Min.Ph D hi a, gam tuamtuam 35 ah Pathian thu gen in phakual zel a, President of Global Outreach Community Development (GOCD) leh Secretary, Global Zomi Alliance (GZA) lenlel hi’n kigen a, 3World Zomi Convention ah EBCC Pethuel, New Lamka ah Pathian thu gending hi’n kigen hi. Pathian thugen siam kia hilou in lasiam leng hi a, kum 1978-79 hunlai in Manipur ah Gospel song cassette hong pawlut hi’n kigen hi.

TN Haokip in Seminar hong ding
Lamka, Oct-14:Manipur State Co-op Union-te’ saina in Oct 16, 2013 in B.Vengnuom Community Hall ah ‘Participation of Youth as Co-operative Workers will enhance the Co-operative movement’ chih ‘One Day District Level Seminar’om ding a, TN Haokip, MLA (Saikot A/C) in hong ding hi. Huai ah Functional President in L.Tompishak, President, Manipur State Co-op Union pang ding a, Guest of Honours in Demmang Haokip, Vice Chairman ADC/CCpur; Kaikhankap, DCO/CCpur leh Jamkhosei Baite, retd DCO/CCpur pang ding uhi. Technical session ah Kh.Tomba, DCO/Bishnupur; Y.Ningthemba Singh, DCO, Imphal West leh K.Joychandra Singh, Reporter te’n sinsak ding uhi.

Laibu thak honkhiat in om
Lamka, Oct-14: Ginvum Ngaihte in Mizo pau a agelh ‘Chatuan Pahnihte Inkara Hun Rei Lo’ kichi laibu thak tuni zinglam dak 11.00 in IB Road a Synod Hall ah Pastor Lianzakhuma, in hongkhia in thumna in lan hi. Huai ah Upa S.Vanlalruala, Secretary Mizo Literature Society, Manipur leh Ginvum Ngaihte in thugen uhi. S.Vanlalruala in agenna ah Mizo Literature hihhatna ding a Ginvum Ngaihte in lLaibu abawl kipahpih in ngaisang mahmah hi'n gen hi. Tuni a laibu kihong Manipur kia hilou in Mizoram ah leng hoihtaka zattheih ding hi'n gen a, Mizo Literature Society, Manipur in Library ah copy bangzah hiam koihding hi'n gen hi. Ginvum Ngaihte in agenna in laibu 3 bawlkheta a, amasapen Paite pau hia, adang 2 te ahihleh Mizo pau a bawlkhia hi’n gen a, sum-le-pai deihna ziak a zuakthawh ding a laibu bawlkhe lou hi’n gen hi.

SP tuni’n office kainawn
Lamka, Oct-14: L.Mangkhogin Haokip, IPS, SP/CCpur in Oct. 2-13, 2013 sung suti (leave) la in Imphal ah tawldam a, tuni’n office kainawn in ngeina bang in nasep sunzom hi.

Traffic Police te’n footpath hah sak
Lamka, Oct-14: Lamka khawpi a Tedim Road lamsak leh lamkhang a footpath mi khenkhat te’n meh leh van zuakna in zang uh a, mi khenkhat te’n gari neu (2-wheeler) koihna in zang in footpath tungah khe a paite adi’n buaihuai sek hi. Huaiziakin tuni'n Traffic Police te'n khawpi sunga footpath tung a meh leh thil tuamtuam zuakte banah gari koihte hemkhe sak uh a, Oct 15, 2013 apan footpath tungah thil zuak leh koihte puakkhiat thawh a, liausak (fine) hiding un gen uhi.

Meeting om hun ding kisuan nawn
Lamka, Oct-14: DC/CCpur makaihna in tuni in‘Dist Level Committee on Central Scheme for Assistance to Victims of Terrorist and Communal Violence’ meeting om ding himahleh lemtanlouhna om ziak in a 2veina dingin Oct 23, 2013 sunnung dak 1:00 a neih ding in ahun kisuan hi. Meeting ah SP/CCpur, CMO/CCpur,Dist Social Welfare Officer leh PO/ICDS tel ding uh a, case 4 genkhawm ding uhi.

MLS-M Golden Jubilee lopna
Lamka, Oct-14: Mizo Literature Society,Manipur kum 50 chin ‘Golden Jubilee’ lopna Oct 16, 2013 zinglam dak 10.30 akipan in IB road a Synod Hall ah om ding a,Lungmuana,IAS, Commissioner(Vety & AH) khuallian hiding hi. Huai ah MIL-S founder President H. Darkhuma ‘Jubilee pa’ hiding a, Chief host in MB Sanghnuna,Chairman,MLS(founder Secretary) pang ding hi.Huai hun ah prize hawmna, Souvenir honna leh Chief Guest apan thugen ngaihkhiakna om ding hi.

ASHA te’n training ding
Lamka, Oct-14: Dist Health Society/CCpur saina in Oct 17-22, 2013 sung zinglam dak 10:00 apan CMO office campus a Mini Training Hall ASHA leh ASHA Facilitator te’n ‘ASHA Monthly meeting-cum- Home Based New Born Care training’ nei ding uhi. Oct 17, 2013 in Town area-te’ training ding uh a, Oct 18, 2013 in Henglep PHC leh Sagang PHC hiding a, Oct 21, 2013 in Saikot PHC leh Oct 22, 2013 in Singngat PHC & Behiang PHC-te’ hiding uhi. Huai ah Nalini Devi, Dist Health Public Nursing Officer leh Lamsanglian, Block Program Manager/Thanlon te’n sinsak ding uhi.

Illness Assistance fund screening
Lamka, Oct-14:Ms Jacintha Lazarus, IAS, DC/CCpur office chamber ah tuni sunnung in BPL family-te’ ading Manipur Illness Assistance Fund tawh kisai application 32 omte screening bawl uhi. Huai ah documents kimlouh ziakin applicaton 1 reject in om a, adang 31 te screening a paisuak in Imphal ah thon hiding in kigen hi.

AG Office te’n audit bawl
Lamka, Oct-14: Dist Horticulture & SC office ah tuni apan Oct 27, 2013 tan daihding in AG office te’n Audit pan uh a, Basanta Singh, Auditor makaih in mi 4 in audit bawl uhi.

SUUNNA :
H. Dongpau b/o Thiauzakhup IRS (retd) of Silo-am Veng, Bungmual tuni zingsang dak 6:30 velin cancer natna ziakin si a, tuni in Bungmual hanmual ah kivui hi. Amah electricity deptt asem hi a, a seppihte’n galna thilpiak pia uhi.Tualouin a tanu 2te sepna Young Learners School te’n leng Rs 15,000 in gal uhi.
F. Lalchhuma (56) s/o (late) Lianmanga of Red Cross road, New Bazar, tuni nitaklam dak 3.30 velin heart attack in si a, Oct 15, 2013 in Lamka hanmual ah kivui ding hi.

IMPHAL NEWS
Manipur a BPL innkuan omzah Census report leh PC report kituaklou
Imphal, Oct-14: Census report leh Planning Commission of India report ah Manipur a BPL innkuan omzah a kituahlouh ziakin scheme khenkhat sepkhiakna ding ah nawngkaina omthei ding hi’n kigen hi. Planning Commission in ‘Poverty Estimate Report’ a bawlna ah Northeast bial ah Assam zom in Manipur ah BPL innkuan tampen hi’n koih uhi.Himahleh inn hoih leh latrine kibawl tampen chih hizel hi. Atangpi in BPL innkuante inn hoihtak neizou omlou hi’n kigen hi.

Meltheihlouh mi 5te ziakin Motbung sousang
Imphal, Oct-14:Sapermaina PS biala Motbung bazaar ah tuni’n meltheihlouh mi 5 in tenna inn susia in numei naupang 3 telin mi 4 kilawmloutak in soisa uh a, numei pawl thangpai in National Highway lampi khaktan in kiphin uhi. A kigendan in zukham mi 5te’n Motbung bazar a Pramo Devi’ tenna inn tuni sunlai in hihsia uh a, tua zawhin Motbung Meitei ground a mi tamtak omkhawmna mun a vapai in numei naupang 3 telin mi 4 kilawmlou takin soisa uh chih ahi hi. Numei naupang 3 aliam ban ah kum 40 a upa Sobha leng liam a, Motbung PHC tut in om hi. Huaizawh in mi 5te’n Imphal-Guwahati kikal atai Night Super Bus leng suangin deng uh a, a glass sia a, window kianga tu passenger khenkhat liam uhi.
Thil omdan Motbung Meiras Paibi te’n a theihphet un lampi khak tan in buaina bawlte kintaka mankhe ding in ngen uhi. Kuki Community leh Meitei Society makaite kimukhawm uh a, buaina bawl mi 5te matkhiak ding in thukim uhi.

Dakkal 18 sung General Strike kipan
Imphal, Oct-14 : Manipur a helpawl 6 kigawm CorCom pawlin Indian Union in thagum a Manipur opkhawm a om mawhpaihna in tuni zankim akipan Oct 16, 2013 nitaklam dak 6.00 tan dakkal 18 sung Manipur pumpi ah general strike puang uhi. CorCom te’n Oct. 15, 1949 a Indian Union in Manipur a opkhum pen dan tawh kituaklou hidan in gen uh a, thagum a laksuhna hidan a ngai in tunitan in pom siamlou uhi. Bandh hunsung in medical, water supply leh press/media te khahkol hidin puang uhi.

Film makers’ workshop om
Imphal, Oct-14 : Educational Multimedia Research Centre (EMRC) te saina in tuni in ni 6 daih ding ‘Fundamental of Digital Film-making (Cinematography)’ kichi tuni in kipan hi. Bharat Nerkar, faculty member,Deptt of Cinematography at the Film & Television Institute of India (FTII) in filmmaker workshop ah mipi tamtak paikhawm uh a, tua ziakin lawhching mahmah hidan in gen hi. Manipur a film industry ka thei a, akihelte leng ka theichian a, ahihziakin, hiai tawh kisai knowledge bangmah a neikei uh, chi hi.

Counselling Course adin appointment letter hawm
Imphal, Oct-14 : Teacher-te ading a kha 6 sung om ding Counselling Course kichi Oct. 20, 2013 in kipan ding hi. Huai a teldingte kiang ah tuni in Classic Hotel ah Parliamentary Secretary(MOBC, Science & Technology) Md. Amin Shah in hawmkhia hi. Huai hun ah Amin Shah in appointment letter piakte mahni post chiat ah Oct. 20, 2013 a ki-report chiat dingin theisak a, a ki-report loute a sepna uapan tawpsak hiding un gen hi. Aman huai counselling course pen centrally sponsored scheme hi a, tuaziakin kuapeuh in ngai poimawh dingin ngenhi. Huai hun ah Cl- VI to X leh Cl-XI to XII a teachers te’n counselling course nei ding uhi.

ATSUM te’n kiphinna pan nawn ding
Imphal, Oct-14 : All Tribal Students’ Union, Manipur (ATSUM) te’n State govt a demand tuamtuam a neih uh nawhna in kiphinna paizom zel hi a genin Speaker Majabung Gangmei in 2nd phase pat hiding chi’n tuni’n gen hi. Huai 2nd phase agitation bel ROTO (Reckoning of the Other’s) chih minvuah hidingin gen hi. ATSUM General Secretary Vareiyo Shatsang in state govt in ATSUM demand-te ngaihsaklou uh a, tua ziak in 2nd phase pat sawm uh hidan in gen hi. Jan. 18, 2013 in general strike nei uh a, tua zawh Feb. 3 in railway project nasepna khaktan uh a, huaizawh in tribal Minister 2 in kihouna nei ding in sam uh, chi a, himahleh kihouna pen lungtun huailou hidan in gen hi. Huaiziakin, ATSUM in kiphinna pan nawn pah ding hidan in gen a, lawhchin masiah paitou zelding uh hi’n leng gen hi.