Don Bosco Higher Secondary ah ‘School Day’ zatna om
Lamka, Oct-11: Donbosco Higher Secondary School, Lamka ah tuni in ‘School Day’ zang uh a, Chief Guest in Lungmuana Lakher, IAS, Commissioner(Vety & AH), Govt of Manipur pang hi.Huai ah Functional President in Rev. Dominic Lumon,DD, Archibishop of Imphal pang a, Guests of Honour in S. Minlianthang, IAS, Joint Secretary( MOBC), Govt of Manipur leh Joseph Lalrothang ZEO, CCpur pang uhi.
Chief Guest in student-te’ hasuan kawm in Donbosco kiphuhkhiak apan a minhoihnate khahsuahlou a, lawhchinna tawh student-te’n siamsinna sunzom zel dingin chial hi. CCpur dist apan laisiam leh officer tamtak piangkhia a, huaite lakah Donbosco apan khangkhia tampi om chi hi. Don Bosco pen student-te’n kisaktheihpih a, school in leng a kisaktheihpih theihdin student-te’n laisiam a lawhchinna sangtak ngah dingin hasuan hi. Mite’n Japan in gam dangte thilbawl copy in ngai mahle uh Japan mipite’n midangte thilbawlte hoihtakin suichian ua, a mukhetute sanga siamzaw in vanzat dang hoihtak bawlkhia uh chin iPhone(Apple company) neitu Steve Job in gen chi hi. Tua ziakin laisim te’n hoihtak a theisiam dia sim dingin ngen hi.
Functional President in siamsinna(education) ziakin mite lungsim leh maban hoihzaw hi’n gen a, thilhoih omthei liaiteng piansakna ding Education thiltup hi’n gen hi. Education in student-te adi’n thil hoihzaw, lungsim hoihzaw, maban hoihzaw, pilhuaizaw leh mihing adia thilhoih theitawp piansak ding a tup man in Don Bosco school in mi hoihtak, amau mimal ading kia hilou in society hoihna ding ngaihtuahmi a piansak zel lam-etna nei hi’n gen hi.
Guest of Honour apang ZEO in lawhchinna ding a thuguk ahihleh thilkhat tangtunna dinga lam-etna sangtak neih a, huaimah bawhzui a kuhkaltak a pan ding ahihdan gen hi. Guest of Honour S. Minlianthang in itna tawh kibulphuhloute’n sawt daihlou ahihman in school-te hiai a kibulphuh dingin chial hi.
Lamka a Don Bosco ahihleh kum 1957 a phuhkhiak hi a, High School om masa in, kum 2010 in Higher Secondary level ah upgrade hi a, tukum in Hr Sec(Cl-XII) candidate 166 lakah 1st divn in 119 passed uh a, 2nd divn ah 41 passed in Dist Topper leng huai school apan hi’n kigen hi.
Lasiam masa S. Chingnu’ Album kihong
Lamka, Oct-11:Kum 1980’s vel apan Lamka a lasiam minthang mahmah, Ms S. Chingnu in “Kon Ngilh Zou Diam” kichi Music DVD Video a bawlthak tuni nitaklam in Simveng a SYO Hall ah laphuahsiam leh lasiam-lui K.Vungzalian, ex-Minister in hongkhia hi. Aman a genna ah S.Chingnu’ late piching in siamsin naupangte’ zil dinga hoih hi’n gen a, MIL a tuansak theih hileh thupi kuai mahmah ding hi’n gen hi. Chief Host apang Ginsuanhau, MLA in lasiam masate lakah S. Chingnu’ lasakte ngaina tungtuan ahihdan gen hi. Huai ah Functional Head in H. Mangchinkhup, EM/ADC pang a,Guest of Honour in Tongkai Baite, MDC pang hi.
S. Chingnu in Album tawh kisai a genna ah khangthakte hun ah lasiam kibehlap zel ding ahihman in la a kisa sate hilou, lathak mah sa a, i late puahpha a khansak ding a deihhuai dan gen hi. Mipite’n lasa dinga hong kipanthakte a hoihlouhna uh gentam zawlou in masawn a lunglutna tawh hong kalsuan theihna ding un hasotdan, pahtawidan leh kithuahpihdan siam poimawh hi’n gen hi.Ms S.Chingnu in Radio ah Paite, Thadou leh Zou programme telin la tuamtuam 85 val khum a, Album a bawlte lakah tuni a kihongkhia pen 13na hi’n kigen hi.
Chairman ADC/Senapati in Lamka pha
Lamka, Oct-11:RS Hiilii Henry, Chairman, ADC/Senapati in tuni sunnung dak 12:30 velin Lamka hongpha a, Tuibuong a ADC office ah Langkhanpau Guite, Chairman ADC/CCpur mu hi. Huai hun ah Demmang Haokip, Vice Chairman ADC/CCpur ban ah Mannuamching, MCS, CEO/CCpur-te leng tel uh a, ADC member- Y.Liba leh Kh. Sapuri te’n Senapati akipan in RS Hiilii Henry, Chairman, ADC/Senapati hongzui uhi.
Meeting om hun ding kisuan
Lamka, Oct-11: DC/CCpur makaihna in tuni in ‘Dist Level Committee on Central Scheme for Assistance to Victims of Terrorist and Communal Violence’ kichi meeting om ding himahleh lemtanlouhna om ziak in Oct 14, 2013 sunnung dak 1:00 a neih ding in ahun kisuan hi. Meeting hun ah SP/CCpur, CMO/CCpur, Dist Social Welfare Officer leh PO/ICDS tel ding uh a, case 4 genkhawm ding uhi.
‘Hehpihna Mak’ Gospel Music Video
Lamka, Oct-11: Chiengkawnpang Community Hall ah Oct 12, 2013 zinglam dak 11.00 in Soiminlian Lengen, MCS, SDO/SDM Henglep in Chief Guest a pang in “Hehpihna Mak” kichi Gospel Music Video hong ding hi. Huai hunah Guest of Honour in Robinson Gangte, SP Narcotics/Imphal pang ding a, Functional President in Thangpau, Chief of Tuilumjang pang ding hi.
RSBY card hawmkhiak hiding
Lamka, Oct-11: 16-New Lamka West ADC bialsung a RSBY(National Health Insurance Scheme)tungtawn a lim(photo) kilate’n Oct 12, 2013 zingsang dak 6.30 akipan in bialtu MDC H. Mangchinkhup,EM/ADC CCpur tenna inn Bungmual ah RSBY Card laktheih ding chih ahi hi.
District Level Seminar om ding
Lamka, Oct-11: Dist Co-op Officer/CCpur akipan thusuak in a gendan in Oct 16, 2013 zinglam dak 11.00 akipan in B. Vengnuom Community Hall ah Manipur State Co-op Union-te’ saina in ‘Participation of Youth as Co-operative Workers will enhance the Co-operative movement’ chih thupi azang in ‘One Day District Level Seminar’ om ding a,huai ah LAMPS Ltd a Managing Director-te,Chairmen leh Secretary-te banah Handloom Co-op Society-te telchiat dingin theisak uhi.
Laibu thak honna om ding
Lamka, Oct-11: Ginvum Ngaihte in Mizo pau a agelh ‘Chatuan Pahnihte Inkara Hun Rei Lo’ kichi laibu thak Sept 14, 2013(Seppatni) zinglam dak 11.00 in IB Road a Synod Hall ah honna(releasing function) om ding chi’n laibu bawltu akipan thutut kingah hi.
Van-gu a kipei mi 2 matkhiakin om
Lamka, Oct-11: Tuni nitakin Central Lamka mipite’n thil tuamtuam gu a kipei Haumuanthang(38) s/o (late) Ginkhopau of Geltui, tulel a Beaulahlane a om leh Ginminthang (31) s/o Kaphau of Ngoiphai, tulel a Khominthang a om mankhia uh hi’n kigen hi.Thusuak kingahdan in Haumuanthang ahihleh ak(chicken) leh thil tuamtuam gu a kipei hi a, aveng mite un tumalam in leng a matsa uh hi’n kigen hi. Tualou in akithuahpih mah Ginminthang in gas cylinder gu sek hi’n kigen a, amaute YPA Central Lamka Unit hall tut ahihnungin a sulnung uh suizuina paitou zel chih ahi hi.
Ruth Laldinthar in Ph.D ngah
Lamka, Oct-11: Ruth Laldinthar d/o Salsawmthang Inbuon of CCpur in Shillong a NEHU nuai apan a thesis 'Role of earthworms on soil microbial diversity and leaf litter decomposition in soils from selected forest stands of Meghalaya' tungtawn in Ph.D ngah hi. Amah’ research interest ahihleh Botany,Soil Microbial Ecology, Earthworm ecology, Decomposition and Plant Pathology hi’n kigen hi.
PHED staff- te’n galna pia
Lamka, Oct-11: PHED/CCpur office a sem Mrs Chinzaching w/o Sub.T.Liangin of Lower Chapellane, Hiangtam Lamka tuni’n a sih ziakin a seppih PHED/CCpur a staff te’n misi innkuanpihte kiangah galna sum Rs.20,000/- pia uhi.
Walk for Health awareness om ding
Lamka, Oct-11: Ngathal a SSPP Residential school a student te’n Oct 15, 2013 zingsang dak 6:00 apan in khawpi sung ah “Walk for Health” awareness campaign nei ding uh a, student-te banah staff-te leh SSPP makaite tel ding uhi. SSPP Residential school apan Ngathal road - New Lamka a Jamsuan Road-Awnsuak Road -Dorcas Road- Marian Street zui in Phailian ah suakkhe ding uh a, Tipaimukh Road zui in Lamka Police Station apan Tedim Road zuitou ding uh a, huai apan Ngathal Road zui in school tungkik nawn ding uhi.
Inn 3223 ah DDT kap uh
Lamka, Oct-11: District Malaria deptt te’n Aug 5 kipan Oct. 3, 2013 sungin PHC 3 nuai a PHSC 10 huamsung a khua 33 ah 2nd round DDT kap in tukum ading zousiang uhi. 2nd round DDT kap sungin khua 33 a mihing 18998 tenna inn 3223 a room 9342 kap uh hi’n official thusuak kingah hi.
Y/C Award selection bawllou
Lamka, Oct-11: NYK/CCpur tungtawn in kumteng a District Level Outstanding Youth Club Award leh award tuamtuam ngah ding telkhiakna DC/CCpur makaihna in tuni a om ding himahleh om theilou a, DC lemchan huna selection bawl hidin kigen hi.
TRATDA Silver Jubilee lopna
Lamka, Oct-11: Tipaimukh Rd Area Transport Dev Assn (TRATDA) kiphuh nung kum 25 chin Silver Jubilee lopna Oct 12, 2013 zinglam dak 10:30 in Hiangtam Lamka a YPA Gen HQ Hall ah om ding a, T.Manga Vaiphei,MLA & Chairman/MTDC khuallian hiding hi. Huai ah Guest of Honour in Vungzagin Valte, MLA & Parliamentary Secy pang ding a, Chief Host in Dr Chaltonlien Amo, MLA & Chairman HAC pang ding hi. Jubilee pa in Dongzakai , Chief of Hill Town pang ding a,Special Guests in Langkhanpau Guite, Chairman ADC/CCpur; Ms Jacintha Lazarus, IAS DC/CCpur; Lamkhosiem,DTO/CCpur leh L.Mangkhogin Haokip, IPS, SP/CCpur pang ding uhi.
SUUNNA
Mrs. Chiinzaching(73) w/o Sub.T.Liangin of Lower Chapellane, Hiangtam Lamka tuzing dak 7:00 velin BP stroke in si a,tuni mahin Lamka hanmual ah kivui hi.
IMPHAL NEWS
Financial Adviser,NEC hongzin
Imphal,Oct-11: NEC a Financial Adviser GK Chin,IP & TAFS in North Eastern Council(NEC) fund tungtawn in Manipur a project/scheme kisemte’ dinmun enkhe ding in tuni’n Imphal hongtung a, Martin War,Adviser(IFC & WSM),NEC in Financial Adviser hongzui hi.Tuni nitaklam dak 3.00 akipan nitaklam dak 5.00 tan Manipur Secretariat a Conference Hall ah Chief Secretary leh administrative head teng tawh NEC fund zanga nasepte tungtang Review meeting nei uhi.NEC Financial Adviser in Oct 12, 2013 in Lamka pha ding a, JNV/Tuinom a Water Supply enkhe ding hi.Huai apan hun sawtlou District Hospital leng pha ding a,huchi’n Khga Dam leng pha in nitaklam in Imphal ah kiknawn ding a, Oct 14, 2013 in Shillong a NEC HQ ah kiknawn ding hi.
Dy. CM in temple kibawlthak hong
Imphal, Oct-11: Deputy CM Gaikhangam in tuni’n Kanglatombi mun a Ibudhou Awang Koubru Temple kibawlthak hong hi. Huai hun ah Kh. Devendra,MLA( Sekmai A/C) leh L. Nandakumar,MLA(Uripok A/C) leng tel uhi. Dy. CM in a genna ah Pathian in Manipur gam nuamtak bawl a, nam tuamtuam leh pau tuamtuam omkhawmsak a, huai in Manipur kilawmsak mahmah hi’n gen hi.
NEC Secretary in Ukhrul pha ding
Imphal, Oct-11:NEC Secretary Ameishing Luikham,IAS in Manipur ah NEC funded project tuamtuam enkhe kawm ding leh a innkuante veh ding in Manipur hongpha a,tuni’n amah makaihna in Manipur Secretariat ah meeting poimawhtak om hi. Manipur ah tulelin NEC fund zangin project tuamtuam 65 sep hilel in kigen a, huaite atangpi in Power sector, Transport, Tribal development, Social sector, Education, Health, Minor Irrigation, Agriculture & Allied sector, Horiculture, Fisheries, Commerce & Industries, Tourism, IT, Science & Technology, Water Supply, IFCD, Youth Affairs & Sports, MANIREDA, Roads & Bridges hideuh in kigen hi. Ameishing Luikham bel Manipur-Tripura cadre IAS hi a,Manipur ah Additional Secretary lenlai Central deputation in NEC a Secretary len ahi hi. Aman Oct 12, 2013 in a innkuante veh dingin Ukhrul pha ding in kigen hi.
‘Miss KUT 2013’ 2nd screening
Imphal, Oct-11: ‘Miss KUT 2013’screening masa a tel theilou leh atel manloute ading in Oct 12, 2013(Kiginni) zinglam dak 10.00 in 1st Manipur Rifles Banquet Hall ah ‘Miss KUT 2013’ ading 2nd screening om ding chi’n Secretary, State Level KUT Committee,Manipur apan thusuak in gen hi.
Numei khat sisa in kimukhia
Imphal, Oct-11: Imphal West District sung Singjamei Makha Waikham Leikai ah tuni in innsung khat ah numei siluang khat kimu hi. Muhkhiak a om bel Sanabam Josina d/o Tomba hi a, tulel in amah Kakwa Lamdaibung ah a tanaute uh kianga om hi’n kigen hi. Sanabam Josina bangchidan a si hiam, bangziak hihiam chih tanpha theih hilou a, Singjamei police te’n siluang vala in RIMS morgue ah koih uhi.
FHW course adin admission bawltheih
Imphal, Oct-11: Female Health Worker(FHW) course sin dinga selection list a telkhate’n a zilna ding uh FHW Training school, CCpur; FHW Training School, Imphal leh FHW Training School, Lamphel amau tankhakna Training School a Principal-te kiang ah Oct 18-24, 2013 sung zinglam dak 10.00 leh nitaklam dak 3.00 kikal in original document-te leh passport size lemlak 3 tawikawm in admission bawl dingin theihsak hi uhi.
Viva- voce test hun ding puang
Imphal, Oct-11: Urban Health Centre(UHC)/Thoubal a Grade-IV sem ding mi 10 lakna ding in Oct 14, 2013 in Viva-voce test kipan ding a,huaia telding candidate te’n original document tuamtuam,residential & educational certificate banah attested passport lemlak 2 tawi dinga theihsak hi uhi.
Date Sl No of candidates
Oct 14,2013 1-172(Imphal West)
Oct 16,2013 996-1175(CCpur)
Oct 17, 2013 310-502(Thoubal)
Oct 18,2013 503-695(Thoubal)
Oct 19,2013 1176-1261(CCpur),906-910(Moreh)
925-932(Kangpokpi),933-970(Ukhrul)
971-988(Chandel),989-990(Tamenglong)
991-995(Tamei),1262-1277(Senapati)
Oct 20,2013 696-888(Thoubal)
Oct 21,2013 173-309(Imphal East),889-905(Bishnupur)
911-924(Jiribam)