YVA Mata Unit Golden Jubilee lopna om
Lamka, Dec-12: Young Vaiphei Assn (YVA), Mata unit kiphuhkhiak kum 50 chinna (Golden Jubilee)tuni zinglam Mata playground ah lopna om a, Chief Guest ding Health Minister Phungzathang Tonsing a zinkhiak ziakin hawh theilou a,amah sikin a Chief Agent LT Juan Tonsing sawl a, ama’n Jubilee suang hongkhia a, Rev. S. Prim Vaiphei, President, AMCO in Pathian kiangah lan hi. Huai ah Functional President in LM Khaute, IPS, ADDl DGP (L&O, Manipur) pang a, Jubilee Souvenir hongkhia hi. Guest of Honour ding DC/CCpur leng a zinkhiak ziakin amah tangin Mani Ram Sharma, IAS, Addl DC/CCpur pang hi. Special Guest in Henlianthang Thanglet, Addl. CEO/CCpur pang a, Chief Host in S. Minboi Vaiphei, MDC/Haopi Range pangin Special invitee in L. Vaiphei, DFO/Bishupur pang hi.

Chief Guest apang LT Juan Tonsing in Minister pa hawh theihlouh poisak thu gen a, Minister in maban a Parliamentary election ding ziakin Delhi ah hihding poimawh a neih ziaka zinkhia hi’n gen hi. Minister in Jubilee message laithon khak a, huai simkhe kawmin YVA Mata unit phungvuhna di’n Rs. 50,000 pia hi.

Functional President in a genna ah aneu apan Mata area a khawsa ahihziakin Mata khua ngaina mahmah ahihdan gen a, YVA in gentheite panpihna lam ah kum 50 mel amuh kipahpih thu leng gen hi. Jubilee zat theih a om lawhchinna thupi mahmah ahi chi in, Jubilee zatna phathuam thei pen a zang dingin hasuan hi. Mata khua i chih Zomite ading a khaw lianpen lawi hi a, nam tuamtuam kituak taka tengkhawm ahihna uah etton tham ching ahihdan gen hi YVA in gentheite panpih kia hilou in, siamsinna lam ah leng panla a, tuailaite discipline leng enkol thei leh chi’n a deihthu gen hi.

Lallunkam, Chief of Mata in a gendan in kum 1917 in Mata khua kiphutkhia a, YVA om ma inleng Mata khua mipite’n phatuamngaih nasep panta uh chi’n gen hi. Kum 1985 in Mata ah YVA HQ kiphutkhia himahleh kum 1963 a Mata Sonlai Pawl kiphutkhia pen kum 1994 in YVA chi a khek ahih ziakin Golden Jubilee zattheih a om hi’n gen hi. Tuni programme zatna ah YVA heutu masa sisate sunna ban ah adamlaite kiang ah memento leng piak hi uh a, mi phatuam ngai tungtuang leh laisimna lam ah lawhching bikte YVA Award pia uhi. Nitaklam in bawng 2 leh vok 2 gou in ankuang luina om hi. Nitaklam dak 6:00 in Farewell programme om a, huai ah Genneikhup Vaiphei, EM/ADCC; Letkhogin Haokip, IAS, Commissioner (DIPR); Soiminlian Lengen, MCS, SDO/Henglep; Tinliankham, SO/PHED; Kaineipau, Special Contractor; Paulianlal Vaiphei, President, YVA Gen HQ leh Lamkhogen Vaiphei, President, Zillai Gen HQ te’n Chief Guest, Functional President, Guest of Honour, Special Guest, Chief Host, Host of Honour leh Special Host hihna tawh uap uhi. Miss Golden
Jubilee contest leng om a, Jaicy d/o Sinu in khatna la a, 1st runner-up ah Nianglalnei d/o (late) Ginminthang leh 2nd Runner-up ah Lammuannei d/o Lallunkam pang hi.

LT Ngaihte, IFS kipahpihna leh thumsakna
Lamka, Dec-12: YPA Gen HQ in tuni sunnung Hiangtam Lamka a YPA Gen HQ office ah Leivang Kam Ngaihte @ LT Ngaihte, IFS, 1st Secretary, Indian Embassy, Kabul kipahpihna leh thumsakna om a, Rev. Paukhanmang Guite, DS, EBC/Lamka North Division in vualzawlna leh thumsakna nei hi. LT Ngaihte in agenna ah ki-unauna tundingna dia YPA phatuam ngaihna thupisa in, mite’n i nasepsate apan hon thei in ahoih leh hoihlou thei uh chi hi. Khawtang vai ah philantropic orgn ahihdungzui in mi niampen leh sangpen-te’ etkoldan kibang paipih din ngen a, nasepna khempeuh ah guptuam neilou a panla dingin leng chial hi.

Mite’n YPA ah lametna sang mahmah neichiat hi’n leng gen a, adiakin migenthei zaw deuhte’n panpihna tasam ahihman un amaute angvantu a pang dingin leng LT Ngaihte in makaite ngen thak hi. S Chin Ngaih Pau, President, YPA Gen HQ in khawtang paidante’ saptuam in naktakin thuzawh a, himahleh saptuam lamte’n khawtang tawh kisai ah kikoih gamla in kibuaipih lou chi a, khawtang ah leng saptuam te’n sauzaw kalsuan dingin adeihthu gen hi. Tuni a hunzatna ah YPA Gen HQ a CEC Vice Chairman, Thangkhochin Ngaihte in deihsak thilpiak nam puandum silhsak hi.

Missions Conference-cum- Gen. Assembly
Lamka, Dec 12: Rayburn Presbyterian Church, New Lamka ah Dec 13-15, 2013 sung PCI (Reformed) Missions Conference-cum- 30th General Assembly om ding a, Dec 13, 2013 nitak dak 5:00 in Elder T.Khupzadou, Moderator, GA in hong ding hi. Huai hun ah Rev Khen P.Tombing, Chief Co-ordinator, PCI (R) in Pastor 2 ordination peding hi. PWF Central Choir te’ bawl Gospel Music Album ‘Buhnei Toupa’ kichi Rev G.Suanzalam, Co-ordinator (Instn) in hong ding hi. Paul Billy Arnold in Pathian thu gen ding a, Pastor H.Kumarjit, Missionary to Meiteis in missionary report peding hi.

Conference sungin Rev Jonathan Iverson leh Rev Paul Billy Arnold in Pathian thu gending uh a, Missionary report hun ah Pastor H.Kumarjit banah Evan. Pauven Ngaihte, Missionary to Dai’s Tribe; Rev Thangvanlian, Missionary to Myanmar; Pastor H.Chinsuanmang, Missionary to Cambodia; Evan Niangboi, HIM/India; Rev B.Chinlamthang , IEM/India leh Samuel Hangzo, Missionary to Buddhist te’n report pe ding uhi.

NEILIT ceritifcate hawmna om
Lamka, Dec-12: National Institute of Electronics and Information Technology (NIELIT)/ CCpur Extn Centre, Hill Town,Lamka ah tuni in training zou masa student 65te certificate piakna om a, huai ah Maniram Sharma, IAS, Addl DC/CCpur khuallian in pang a, Guest of Honour in T.Goukhomang, DDO,ZEO/CCpur pang hi. Khuallian in agenna ah tulai khawvel Computer/Technology age ahihziak in BA certificate neite’n leng computer/technology theih ban ah certificate neih ngai hi’n gen hi. Lawhchin din certificate kia hunlou a, kuhkal leh tupguh neikawm a panlak ngai hi’n gen hi.Khuallian 2te’n training zouthakte lakah certificate hawmkhia uhi.

ICI 64th General Assembly paizel
Lamka, Dec 12: Rengkai ICI biakinn ah zan nitak in ICI 64th General Assembly kipan a, Rev D.Ruolngul, Moderator in Hall honna leh latna nei a, Rev Dr JL Songate, Executive Secy ICI in report tomkim pia a, Tawnluaia in Pathian thu gen hi. Tuni’n khawmpi lian 64th General Assembly nei uh a, agenda tamtak genkhawm uhi. Dec 13, 2013 zinglam dak 10:00 a biakna kikhopna ah Elder Evanjohn, in Pathian thu gending hi. Dec 14, 2013 zinglam dak 10:00 in ICI Central Choir Silver Jubilee lopna omding a, Dr Chaltawnlien Amo, Chairman, Hill Area Committee in Souvenir hong ding a, C.Lalrosanga, Addl Director General (P &A), NER, AIR& Doordarshan in Jubilee Music Video Album hong ding hi.

Loan bat tawh kisai Lok Adalat
Lamka, Dec-12: Chief Judicial Magistrate(CJM) court/CCpur ah Dec 14, 2013 in Lok Adalat om ding ah huai ah State Bank of India/CCpur akipan loan la din ginalou(Non-Performing Assets)mi 359 te adin loan bat tawh kisai genkhawm a hiding a, tamtak ngaihdam a om theihna hunhoih hiding hi.Huai ah loan account omdan apan etin loan bat ahihkeileh a interest 25% akipan 50% tan maisak(waive) theih tanpha hiding chih thu om hi. SBI/CCpur branch ah tulelin loan dit ginatlouh Rs. 3.27 crore vel om hi’n thutut kingah hi.

Mahajon L.Mangkhosei in lei bawl (page 4na ading)
Lamka, Dec 12: Downtown, Tuibuong a om Mahajon L.Mangkhosei Mate in Songzakhawpi bawl sawm in Tuithalui ah ama’ sum sengin Feb 3013 apan lei(bridge) bawl n nasem a,tuktui luan laia nasep akhawl nung tuni’n JCB zangin pannawn hi. Amah apan kizadan in Tuithalui tunga lei bawlzawh hun in Rs.1.5 crore vel beiding hi’n gen a, Tuithalui gal (Saidan lampang) ah Songzakhawpi chih bawlkhiat sawm hi’n gen hi. Huai dingin gam pari 17 alian leikhia a, marketing shed, Hospital building, B.Ed College, Bible college, playground leh hanmual omdin gen hi. Huai area ah inn-mun hawm uh a, plot 300 vel mi’n leikhia in tu’n plot 50/60 vel omlai hi’n gen hi. Khawthak bawlzawh ah market area lampi feet 70 alian, Khomawi leh Kamdou Veng zotna lampi feet 30 alian leh Saidan lam zotna lampi feet 50 alian bawl hidin gen hi. Songzakhawpi adia inn mun kihawmte 80 feet X 40 feet alian hi’n leng gen hi.

MELC 11th Council & 59thAnnual Session
Lamka, Dec 12: MELC HQ Church, Zomi Colony ah Dec 13-16, 2013 sung MELC 11th Council & 59thAnnual Session 2013 omding a, Dec 13,2013 nitak dak 5:30 in Rev Nengkhanlal, Director of Mission in hong ding hi. Pastor Douchinlal, Headmaster CFA leh Pastor Kapkhanhau te’n devotion hun ah makai ding uh a, Pastor Kamzathang, Bial Pastor/Lamka, Upa Thongzadou, ex-Moderator leh Rev Thangchinkhup, Director te’n Pathian thu gen ding uhi. Dec 15,2013 zinglam dak 11:00 in ordination service omding a, Rev Hangminthang, Moderator in upa 6 ordination peding a, Upa Thangzadou, ex-Moderator in upa 6 te’ ading in hanthon thugen ding hi.

YPA makaih in mipi’n biakna nei
Lamka, Dec 12: YPA Hall, Dorcas Veng ah tuni in ‘Dorcas Veng YPA Meet on Veng Maitaam’ om a, mipi’n biakna neikhawm uhi. Elder Gouzanang, COC makaih in YPA Dorcas Veng sungah Oct 14, 2012-Dec 12, 2013 kikala misi 34 te’ suunna leh misi innkuante’ adin thumsak hi. Huaizawh in D.Pauchinkham makaih in ‘Kitamkhama Pathian buanna’ hun ah mipi thumkhawm uh a, Pastor Tualkhothang, EBC in khawtang siansuah in Pastor K.Muankim, PCI in Pathian kianga kipahthu gen hi. ‘Na deihlam lei ah kihih hen’ chih pansan in T.Damkhothang, Lecturer, GBC in Pathian thugen a, Langkhanpau Guite in ‘Tuailai leh Khawtang hinkhua’ chih pansan in thugen hi.
Pastor Songkhothang in khawtang adia vualzawlna ngen a, mipi paikhawm tengin maitaam bawlin huai asum leh pai muhkhiak teng ngaihnattuam mi 17 kihawmsak uhi. YPA makaih a antang kidongkhawm teng ‘khawsak haksa bik mi 22 te kihawmsak uh a, kum 80 tunglam mi 28te kiang ah pahtawina puanlum leh pakkhi pia uh a, ‘si antang dongmi 30te kiang ah kipahman in Rs.500/- chiat pia uhi.

Sweet December Musical Nite
Lamka, Dec 12: ECA nuai a Evangelical Youth Fellowship (EYF), Koite Lui Pastorate Area (KPA) saina in Dec 17, 2013 nitak dak 6:00 apan K.Salbung a ECA Gallery ah ‘Sweet December Musical Nite 2013 leh 2014 a EYF, KPA kum 25 chinnang lopna’ om ding a, Rev Thangjakap, Director, Youth & Music, ECA, ECCI in hong ding hi. Huai ah Bollywood singer Kavita, Maniwood Artists apan Mandikini ban ah lasiam tuamtuam John Guite, Nemsemhoih telin mi hunkhop in Pathian la sading uhi. Huai hun ah entry fee leh ticket omlou ding a, kuapeuh teltheih ding hi.

Angel Vision-II tawh kisai thupuan
Lamka, Dec-12: Lamka Area(Angel Vision-II) a operator kikhen ziakin Dec 213 akipan in fee khontu atuam hita ding a,receipt bu-lui zat hinawnlou in athak kibawl chih thusuak in gen hi.Angel Vsion la kuaperuh in ana kithuahpih dingin operator in ngen a, join thak nuamte hiam complaint bawlnuamte’n JK Xerox & Offset Printing,T4eedim Rd(Mobile 9856289782/9856769361) contact theih ding chih ahi hi.

LPG cylinder man Rs.2 in khang
Lamka, Dec-12: LPG cylinder 1 ah subsidised rate in Rs. 242 himahleh dealer-te commission a khan ziakin tuni akipan in Rs. 2 in khang a, tu’n cylinder 1 ah subsidised rate in Rs.246 man hi.

Champion Trophy lopna om
Lamka, Dec-12: 6th (late) Seikam Memorial Open Football Tournament 2013 ah B. Aijalon Youth Club(BAYC) te’n champion trophy la uh a, tuni’n B. Aijalon khawmite’n Tuibuong a PHED campus ah trophy lawm uhi. Huai hun ah Thanghem Haokip, Adviser, BAYC in trophy tawh kisai thugen a, Rev Khaigin in Pathian thugen hi. Vengsung mite’n player-te pahtakna bawl uh a, nitaklam in trophy lopna in sial 1 leh bawng 3 gou in ankuang umkhawm uhi.

IMPHAL NEWS
Tuni a Nupilal Day zatna CM in uap
Imphal, Dec-12: Manipur govt inntekna in tuni’n Nupilal Memorial complex ah Nupi Lal zatna om a, ,huai ah Dec 12, 1939 a Manipur nupi site zahna leh amaute hansandan athaka taklatna om hi. Huai hun a Chief Guest apang Chief Minister O. Ibobi in a genna ah Manipur a nupite’n khawtang hoihna dinga pan alakna uh, khawsakna tawh kisai leh sum-le-pai muhna lam ah gen vuallouh a thupi ahihna uh taklang a, tulai huna numei tamtakte adin ettontak ching lua uh ahihdan gen hi. Huai ah Dy CM, Works Minister, Education Minister , Agricultural Minister , Commerce & Industries Minister MLA-te banah civil leh police top official tamtak leng tel uhi. Tuni a Nupi Lal zatna kawm in nupi 500 vel Nupi Lal Memorial complex apan Singjamei Chingamakhong tan tai uhi.

CM leh Works Minister in enkhia
Imphal, Dec-12 : JNIMS Hospital complex leh Administrative Block banah lupna 150 om theihna ding building kibawl a nasepna Chief Minister O. Ibobi leh Works Minister Kh. Ratankumar in tuni’n enkhia uhi. Huai hun ah Chief Minister in nasemte kiang ah Medical Council of India teamte’n JNIMS a etkhiakma ngei un nasepna zousiang ding in theisak a, JNIMS ah Post Graduate course zilna ding leng honkhiak hiding in gen hi.

Myanmar sepaihte’n border gate khaktan
Imphal, Dec-12: Thu kizadan in tuni’n Myanmar sepaihte’n Indo-Myanmar gamgi a gate No. 1 leh 2 chihlouh a dangte khaktan vek uh a,India mi leh Myanmar mite kikawmtuah theilou in koih uhi. Myanmar army a NCO khat in khaw tuamtuamte kiangah amau tunga thuneite apan thupiak om ziak hi’n gen a, Myanmar army te’n leng ziak hiam chih theilou uh hidan in kigen hi.Myanmar mite India honglut chiang un Indian Army- te’n siamnel tak in ana check sek uh a, tuaziaka hibang thiltung hidin leng ginthu kigen hi. Huailou in Central team leh Manipur Dy CM makaihna High Level in Moreh a phak lai un DC/Tamu telin mi bangzahhiam in memorandum piaksawm mahle uh pe theilou uh a, tua ziak khawng himaithei a gen in om hi

Inn khat mei in kangtum
Imphal, Dec-12 : Imphal East District a Porompat PS huamsung Kongpal Naoreibam Leikai mun ah tuni zinglam dak 9:07 velin Sorokhaibam Chandrajini Devi tenna inn mei in kang a, asi leh liam om kei mahleh innsung a vanteng bel kangtum hi’n kigen hi. Huchih lai in inn-neite bel a tapa uh zi neih ding tawh kisai a naktak akisakkhol a buai mahmah uh hi’n kigen hi. Amau inn sungah candle khawng de uh a, huaite a hihmit khaklouh ziak un huai apan meikang kipan hidia gintakthu kigen hi.

Pasal khat sisa in aluang kimu
Imphal, Dec-12 : Yairipok PS huamsung Andro Turelthel mun ah tuni in vengsung mite’n pasal khat sisa in aluang mukhia uhi. Huai thu police ah report pah uh a, police te’n huaimun kintaka delh pah uh a, Yairipok Police leh Thoubal police kithuahte’n siluang la in JNIMS morgue ah koih uhi.

Check post kiamsak dingin thupia
Imphal, Dec-12: Imphal-Moreh lampi(National Highway No. 2) ah Security force te’n Check Post a honkhiak tamluat ziakun gari a passenger-te adin nawngkaina lianpi tun a, huai thu Advisor in Prime Minister TKA Nair in Assam Rifles a thuneitute Manipur govt in Check Post kiamsak ding leh khat kia hong in theisak hi. Huai tawh kisai Assam Rifles lamin khamtheih pua a kipei(smuggler) tamluat ziaka chect post ahunkhop hon ngai hi’n gen mahle uh Advisor in PM in huaite check-na ding vanzat hoihzaw tawh kithuah dingin theisak hi.
Indo-Myanmar gamgi a duty dingin Central in Assam Rifles sikin BSF koihsawm a, huai dingin a process kipan hi’n thusuak in gen hi.

Criteria chinglou private school-te recognition beisak hiding-Edn Minister
Imphal, Dec-11: Palace compound a LamyanbaShanglen ah tuni’n AIR/Imphal a News Editor-lui Seram Mangi sih kum 1 chinna zatna hun ah Education Minister M. Okendro in a genna ah Manipur a student-te laisiamna leh khantouhna ding in private school te’n na thupi tamtak semkhe mahle uh sum-le-pai muhna ding kia mitsuan a Right to Education(RTE) criteria bukimlouhna school-te recognition lakkhiak leh beisak hiding chi’n gen hi. Primary teacher 955 vel graduate teacher a upgrade ahih utawh kiton in singtanggam leh phaijang biala teacher taksapna munte ah sepsak hiding a,private school-te etzuina ding guideline leng bawlkhiak hiding chi’n Education Minister in gen hi.
Education Minister in a genzelna ah Manipur ah higher education lam bawlhoihna ding in RUSA zat hita a, huai dungzui in Govt College leh Grant-in-Aid College a semding in UGC guideline tawh kituak siamna nei teacher 1170 lak hiding in gen hi. Huailou in DM College leng State University status a upgrade sawm in govt in panla chi’n gen hi. Huailou in College tuamtuam a Part-Time lecturer kizangte leng akinlama regularise dan ding govt in ngaihtuah chi’n leng Minister in gen hi. Huailou in College khenkhat ah Lecturer-te attendence chiamtehna dingin bio-metric kizang a,academic session thak ah student-te attendance chiamtehna ding in leng bio-metric zat hiding a, attendance chingloute exam theilou ding uh hi’n Minister in ghen hi.

Chairman,DC in Trade Fair/Mela hongkhia
Lamka, Dec-11: Langkhanpau Guite, Chairman, ADC/CCpur in tuni nitaklam dak 3:30 in Lamka Public Ground ah CCpur Dist Sports Assn (CDSA),CCpur Dist Students’ Union (CDSU) leh Northeast Trade Fair Assn (NETFA) pangkhawma a sai uh Dec 30, 2013 tan om ding Trade Fair/ Mela hong hi. Chairman ADC/CCpur in ‘Unity & Self Employment’ chih thupi pansan a Trade Fair/Mela om ding Lamka mipite adia phatuam leh nuamtaka zatding ahih deihthu gen hi. Huai Trade Fair/Mela ah Super Dragon Train, Merigold Round, car & bike taina, naupangte’ adia kimawlna thil tuamtuam ban ah stall tamtak kihongte ah van chituamtuam leitheih din om hi. CDSA lam apan kizadan in Christmas ding ziak in Dec 24, 2013 nitak apan Dec 26, 2013 sung Trade Fair/Mela kikhak (close) ding a, Dec 27, 2013 in kipan nawn ding hi.

LATSEA in theihsakna thusuah
Lamka, Dec-11: Lamka Traders’ & Self Employed Assn(LATSEA) thusuak in a gendan in Gari nei tengin High Security Registration Number Plate(HSRNP) thuah chiat ding chi’n Manipur govt a Secretary(Transport) apan thusuak a om banah Lamka ah gari kigu a tamluat ziakin tuni tanin gari 2,000 val a number plate khekta uhi. Number khekna man district tengah kibanglou hi a theih ahihbanah CCpur district a tawh kisai LATSEA ah complaint a om sek ziakin huai dingin Manipur a authorised Agency ‘STIMNIT UTSCH’ tawh thil omdan genkhawm nungin registration bawlman anuai bangin bikhiah hi a, number plate bawlsak tengin a rate dungzui in receipt la dingin leng theisak uhi.
1.LMV ... Rs.1,363/-
2.Scooter .. Rs.649/-
3.Motorcycle Rs.638/-
4.3-wheeler Rs.755/-

Hiangtam Lamka hausa(chief) in hong
Lamka, Dec-11: Paite Cultural Society (PCS) saina in January 17, 2014 in Mission Compound ah ‘1st Paite Culture Fest’ om ding a, huai dia kisakkholhna in PCS pawlin Tedim Road, SBI/CCpur Branch sakdeuh ah Festival Gate a bawl uh tuni zingsang dak 6:30 in Thangkhosuanmung Guite, Chief of Hiangtam Lamka in hong hi. Aman a genna ah chihtakna leh diktatna tawh kithuah a Pathian laukawm in Paite Culture kepbit a deihthu gen hi. Huai gate bawlna ah Rs.25,000/- vel bei a, Mahajon 3- V.Nengkhanlal, Zamzahau leh H.Thangzamuan in panpih uhi. Tuni sunnungin Mission Compound ah Letboi Valte, Chief of Zenhang Lamka in ‘1st Paite Culture Fest’ mun ding ah ground breaking nei a, Pastor T.Thanggoulian, EBCC Mission Compound in Pathian kiang ah lan hi.

IFS Officer 2 training din zinkhe ding
Lamka, Dec-11: KS Tawmbing,IFS, Divnl Forest Officer, Southern Forest Divn/CCpur leh Mrs Gaithaolu Thaimei,IFS, Dy Conservator of Forests(Res,Selvi & Training) in Jodhpur(Rajasthan) a Arid Forest Research Institute ah Dec 16-20, 2013 sung ‘Integrated Approach for Sustainable Development of Fragile Desert Eco-System’ kichi compulsory training course ah vatel ding uhi. Huai dingin KS Tawmbing,IFS, DFO/CCpur in Dec 14, 2013 in Lamka apan zinkhe ding a, Dec 22, 2013 velin hong tungkik ding hi. Amah zinkhiak sungin L. Lukhoi Singh,IFS, DFO/Bishnupur in DFO/CCpur hihna len ding hi.

Central team in mun 2 enkhia
Lamka, Dec-11: Regional Resource Centre, Guwahati apan Central team- Dr Joydip, Adviser, Public Health leh Dr. Chinmay, Consultant, Public Health te’n zan in Saikot PHC leh Kumbipukri PHSC a National Rural Health Mission (NRHM) tungtawna nasepnate enkhia uh a, tuni’n Singngat PHC leh Dist Hospital enkhia uhi. Central team te’n NRHM tungtawna Singngat PHC leh Dist Hospital a nasepnate lungtung uh hi’n kigen a, Dec 12, 2013 in Imphal ah official meeting om ding hi. Central teamte ahihleh State apan official 3 in zui uh a, CCpur district ah official 4 in kithuahpih uhi.

Certificate hawmkhiakna function
Lamka, Dec-11: National Institute of Electronics and Information Technology (NIELIT)/CCpur Extn Centre, Hill Town, Tipaimukh Rd ah Dec 12, 2013 zinglam dak 10.30 in training zou masa student 65te certificate piakkhiak hiding uhi.Huai ah Chief Guest in Addl DC/Ccpur pasng ding a, Guest of Honour in ZEO/CCpur pang ding hi.

Auto accident ziakin mi tamkhop liam
Lamka, Dec-11: Lamka apan Bukpi a misi delh dingin Auto a mi 9 tuangte zan nitakin Hiangkot tang ah tuahsia uh a, Ms. Niankhoching (57) w/o Kaikholal of Bungmual liam in serious sim a, Ms. Ngaihoihching (65) w/o Sumzathang of Chimtung veng in a kawng nasa in, Khamvung(53) w/o Chindounang of Bethel in a taksa tung mun tuamtuam nasa a, hospital ah admit in om uhi. Midangte leng liam mahle uh serious lou uh hi’n kigen a, Diesel Auto pen lamkhang a tuk khia in a sungah Ngaihoihching leh a pasal tuang kha lai in Auto tawh lengkhia uh a, mi phatuam ngaite’n vadelh in, dist. hospital ah admit uhi.

Candidate 394 vel exam ding
Lamka, Dec-11: Staff Selection Commission (SSC) saina in Dec 29, 2013 in Stenographer Grade‘C’&‘D’semding lakna dingin Combined Hr Sec Level (10+2)Examination 2013 om ding hi. Lamka a exam centre CCpur Govt Collehe ah candidate 394 vel exam ding uh a, invigilator 20 duty ding uhi.

Biakinn building thak hon hiding
Lamka, Dec-11: DM Veng(Tuibuong) a Bible College compound ah biakinn building thak kibawl Dec 14, 2013(Kiginni) zinglam dak 10.30 in honna om ding hi.Huai ah Rev Lamkholian,BA, M.Div., Principal, Bible College, DM Veng in biakinn thak hong kawm in thumna in lan ding chi’n Board of Deacon,Building Committee apan thusuak in gen hi.

Angel Vision-II tawh kisai thupuan
Lamka, Dec-11: Lamka Area(Angel Vision-II) a operator kikhen ziakin Dec 213 akipan in fee khontu atuam hita ding a,receipt bu-lui zat hinawnlou in athak kibawl chih thusuak in gen hi.Angel Vsion la kuaperuh in ana kithuahpih dingin operator in ngen a, join thak nuamte hiam complaint bawlnuamte’n JK Xerox & Offset Printing,T4eedim Rd(Mobile 9856289782/9856769361) contact theih ding chih ahi hi.

10-Days Skill Dev. hunkhakna om
Lamka, Dec-11: Elimination of Rural Poverty Service (ERPoS), Corporate Social Responsibility (CSR) leh North Eastern Dev. Finance Corp. Ltd (NEDFi) pangkhawm in Nov 28, 2013 apan Sielmat ah ‘10th Days Skill Development Program on Dry-Flower Making’ a neih uh tuni in hunkhakna om hi. Huai ah Rajiv Khaidem, Branch Manager, NEDFi/Imphal leh Holkhomang Haokip, NEDFi, RO/CCpur te’n Special invitees dan in uap uh a, Rajiv Khaidem in Dry-Flower making atelte kiang ah certificate pekhia hi.

Buhpal chii ngettheih
Lamka, Dec-11: R.K. Dorenchand, Dist Agri. Officer/CCpur apan kizadan in CCpur dist ah kum 1 sungin double cropping om theihna dingin panlak hi a,kum 2014 bul ading buhpal chii (1st crop) Hybrid kichite a deihte’n DAO/CCpur office ah ngetna piaktheih hi. Buhpal chii te kg 1 ah Rs260/- man a, product lam hoih mahmah hi’n kigen hi. Huaite zat hileh kum 1 sung in buh 2vei laktheih a, 1st crop-te June kha tana laktheih hi’n DAO/CCpur in gen hi.

Evangelistic Meet kipan
Lamka, Dec-11: V.K Tawna College student-te’ adin tuni zinglam dak 9:30 in K.Vungsuanmang, Principal, V.K Tawna College in ‘Seek the Lord’ chih pansan in ‘Evangelistic Meet 2013’ hongkhia a, Dec 13, 2013 in zou ding uhi. Huai hunsung in Evan. Tongminthang Haokip in Pathian thu gen ding a, Praise & Worship hun ah T.N Muanthang & team te’n makai ding uhi.

YPA Meet on Veng Maitaam
Lamka, Dec-11: YPA Hall, Dorcas Veng ah Dec 12, 2013 zing dak 10:30 in ‘Dorcas Veng YPA Meet on Veng Maitaam’ omding a, Upa Tualzalang, EBC in hong ding hi. Huai ah suunna omding a, Elder Gouzanang, COC in misi innkuante’ adin thumsak ding hi. D.Pauchinkham, Adviser makaih in ‘Kitamkhama Pathian buanna’ mipi’n neiding a, Pastor Tualkhothang, EBC in khawtang siansuah ding a, Pastor K.Muankim, PCI in Pathian kiang a kipahthu gen ding hi. ‘Na deihlam lei ah kihih hen’ chih thupi pansan in T.Damkhothang, Lecturer, GBC in Pathian thu gending a, Langkhanpau Guite, Adviser in ‘Tuailai leh Khawtang hinkhua’ chih pansan in thugen ding hi. Pastor Songkhothang in khawtang adia vualzawlna ngen ding a, ngaihnat tuamte leh haksa bikte kiangah thil piakna, kum 80 tunglam te pahtawina leh ‘si antang dongte’ thilpiakna in zui ding hi.

SUUNNA
H. Paukhenkham(25) s/o H. Tunlianthang of Lennuam Veng, Bungmual, tuzing baihtakin kalna ziakin si a, tuni mah in Bungmual hanmual ah kivui hi.

IMPHAL NEWS
Governor leh CM akipan message
Imphal, Dec-11: Manipur Chief Minister Dr Ashwani Kumar leh Chief Minister O. Ibobi in Dec 12, 2013 a Nupi Lal zatna ding tawh kisai in British te’n hong opkhum lai uh kum 1939 a Manipur nupi mihangsante zahna pia uhi. Governor in Nupi Lal kichi Manipur adia ni poimawh hi’n gen a, huai in numeite hangsanna leh kipumpiakna athak in hong theisak zel chi’n puang hi.Chief Minister in Nupi Lal kichi Manipur khangthu adia hun poimawh hi’n gen a, kum 1939 a Manipur nupite’n gam itna ziaka hangsantaka British a doudal ngam uh enton kawmin sualna doudal chiat dingin mipi hasuan hi.

Advance Christmast,2013 pay
Imphal, Dec-11: Manipur govt a Finance department thusuak dungzui in Christmas Festival ding ziakin gazetted officer-te telin govt employee-te allowance leh December 2013 kha lawh leng advance a hawmkhiak theih dingin order suah hi. Huai dungzui in employees te’n December 18, 2013 akipan in December,2013 kha lawh lathei ding uh a, govt in approved a bawl work charged/Casual/Muster Roll semte’b leng Dec 29013 lawh lathei ding uhi. Himahleh DP/Finance deptt in dan abawl tawh kituaklou a semtu kila adhoc/ substitute/ officiating/ contract/ casual/ muster roll te’n bel advance in lawh lathei tuanlou ding uh chih ahi hi.

Court in kum 15 jail tang din thutankhum
Imphal, Dec-9:District and Session Judge,Manipur East A. Guneshwar in tuni’n TG Hr Sec School a numei student khat Oct 20, 2012 in Tedim Raod jula Restaurant a pawngsual(rape) mi 2- Thongam Tarun of Thangmeiband leh Yumnam William of Khagempalli Pankha siamlouh tangsak in kum 15 sung Jail a om ding leh Rs. 35, 000 tuak liau ding in mawhpaih a, mi 2te liau ding kigawm Rs. 70,000 leng a victim piak hiding in Court in thutanna puang hi.Mi 2 te’n Class XII zil student 1 a rape ziakun Rs. 25,000/- tuak liau ding uh chih hi a, huai sum a piak kei ua leh kum 3 sung jail tan behlap ding uhi. Numei tung a a thiltup uh hoihlou ziakin Rs. 10,000 tuak liausak hiding uh a,huai sum a piak kei ua leh jail ah kum 2 sung tan behlap ding uh chih leng ahi hi.

Kuki helpawl hidia gintak 3 kaplum
Imphal, Dec-11 : Yairipok PS huamsung Henjang village ah tuni in Thoubal Police Commando-te leh 15-Assam Rifles kithuahte’n Kuki helpawl hidia gintak mi 3 kaplum uh chihthu om hi. Thusuak in a gendan in Thoubal Commando leh 15-Assam Rifles ten Nongpok Sekmai kimlak ah helpawl om chihthu zak ziakin huaimun delh uha, Imphal akipan km. 55 vela gamla Henjang village atun un helpawl hidinga gintakte’n ana kap uhi a, dakkal kimkhat vel akikaptuah nung un helpawlte kihemkhia uhi. Combined team ten kikaptuahna mun ah siluang 3 telin galvan leng mukhia uhi. Police thusuak in a tgendan in galvante G-3 rifle leh M-16 rifles mukhia uh a, Yairipok Police ten siluangte vala uhi.

Tuni General Holiday hiding
Imphal, Dec-11: Nupi Lal day ziakin Dec 12, 2013(Ningani) in Manipur govt nuaia office leh institution teng suti hiding hi. Huailou in Imphal as Nupi Lal complex mun ah Manipur govt saina in Nupi Lal Day zat hiding hi.

Transfer/posting
1.K. Rebecca Vaiphei,Sub-Treasury Officer/Imphal & Finance Officer(Education-U) as
Finance Officer(Education-U).
2.Dr Moirangthem Nalinda Kumar,Sub-Treasury Officer/Kakching as Sub-Treasury
Officer/Imphal.
3.Thongam Gunindro,Asst Treasury Officer/Bishnupur as Sub-Treasury Officer/Kakching.
4.Longjam Ratankumar, Asst Treasury Officer/Imphal as Sub-Treasury Officer/Wangoi.