ZYA Tuivel Block Raising Day lopna om
Lamka, Dec-10: Singngat sub-division sunga Maukot khua ah tuni’n ZYA Tuivel Block Raising Day 2013 lopna om a, Chief Guest in Ginsuanhau, MLA(Singngat A/C ), Guest of Honour in Langkhanpau Guite, Chairman, ADC/Ccpur leh Chief Host in Thanglianpau Guite, President, ZRO pang uhi.

Chief Guest in agenna ah ZYA Tuivel Block nuaia khua 7 omte’n makaite tawh kalsuankhawm dinga ngen kawm in, khawtang leh gamsung hoihna dinga makaite thuman leh amaute tawh pankhawm poimawh hi’n gen hi. Aman agenzelna ah ZYA tup leh ngim theisiam kawm a i kalsuan chiang in gamsung nuam ding chi hi. Huailou in Tuivel bial a tuilakna ding bawlna kipanlel hi’n leng gen a, development tamsem tunsak hiding chi hi.

ZYA Raising Day zatna ah T. Goukhomang, President, ZYA Gen HQ telin ZYA makai tuamtuam tawh ZYA Tuivel block buala mipi ahunhop tel uhi.

Singngat Block ASHA Day zang uh
Lamka, Dec-10: Singngat community hall ah tuni zinglam in ‘Singngat Block ASHA Day – cum-Distribution of Annual Untied Fund for VHSNC and PHSC’ zang uh a, Chief Guest in Ginsuanhau, MLA(Singngat A/C ) pang hi. Aman mipi adia poimawhpen damtheihna ahihdungzui in ASHA worker-te’ nasepna phattham ching hi’n gen a, ASHA worker-te’n thanuamtaka semzui zel dingin leng ngen hi. Huai hunah Lalrobul Fimate, SDO/Singngat leng tel hi.

Inn khat mei in kangtum
Lamka, Dec-10: Sangaikot TD Block huamsung a om G. Khonom village a Letkholun Haokip s/o Thongkhopao Haokip tenna in December 9, 2013 zan dak 11:30 velin innsung van bangmah tuahkhiak manlouh in kangtum hi’n thusuak kingah hi. Khawsung mipite’ hahpahna ziakin innkim ate a peh ding vengzou uhi. Mei kipatna chettheih hikei mahleh inn nuai a akoih gamlak akipan puaktung phet meihol bag 2 omte akipan meikang kipan hidia gintakthu gen hi.

ADC Chairmen-te leh CS kimu
Lamka, Dec-10: Tuni nitaklam dak 3.00 in Chief Secretary PC Lawmkunga,IAS chamber ah ADC Chairmen-te leh Chief Secretary kimu uh a, huai ah Langkhanpau Guite, Chairman, ADC/CCpur leng vatel hi. Huai hun ah Manipur govt in ADC khut a power piakkhiak ding(delegation of power) tungtang genkhawm uh chih ahi hi.

Nehru Marg junction ah sem uh n
Lamka, Dec-10: 84-RCC BRTF te’n Dec 2, 2013 apan Lanva lei-Dorcas Road junction kikal Tedim Road a minor repairing zousiang uh a, tu’n Tedim Road- Nehnu Marg junction apan Police Station lam zuan in minor repairing pan uhi. 84-RCC BRTF te’n gari tamluat ziak in ni 1 sungin tomkha zou uh a, Christmas ma in Police Station-Lanva lei kikal minor repairing a zawh uh gintak huailou hi.

Thanlon Power Sub-Station
Lamka, Dec-10: Chief Minister O.Ibobi Singh leh Thanlon bial MLA Vungzagin Valte, Parliamentary Secy panlakna ziakin Thanlon ah Nov 17, 2012 akipan 33/11-KV Power Sub Station bawlna nasep kipan tu in zawhsiang hita a, tukum sung Christmas ma in hon hiding chihthu om hi. Ani ding bel official a puankhiat hi nailou a, Chief Minister O.Ibobi Singh in hongkhe ding hi’n kigen hi.

Director, FW in Lamka pha
Lamka, Dec-10: Dr O.Ibomcha, Director of Family Welfare in tuni sunnung in Lamka hongpha a, Dist Hospital a Casualty geia building kibawlthak enkhia hi. Thusuak kingah dan in Manipur Chief Minister O.Ibobi Singh in tukha sungin huai building hongkhe ding hi’n kigen hi.

Family Benefit scheme mudin 163 telkhia
Lamka, Dec-10: District Level Committee on NSAP, CCpur te’n National Family Benefit Scheme 2013, tungtawn a hamphatna ngahdingin mi 163 telkhia uh a, beneficiary-te min Dist Social Welfare office ah kitak hi. Family Benefit scheme 2013 a beneficiary te’n bank account hong in DSWO ah ki report ding in DSWO/CCpur in theisak hi.

Synod Hall ah Assessment Camp om
Lamka, Dec-10: Artificial Limbs Manufacturing Corpn of India (ALIMCO), Oil and Natural Gas Corpn Ltd. (ONGC) leh People Advanced in Social Service (PASS), CCpur pangkhawm in tuni zinglam in IB Road a Synod Hll ah ‘One Day Assessment Camp (SWAVIAMBAN ABHIYAN) for free distribution of Artificial Limbs & Appliances’ om hi. Huai ah Th. Borbabu, Sr. Orthologist, RIMS i/c P &O Unit; Th. Chivson Singh, Audiologists, DDRC/PASS; Himansh Bhatt, P&O, ALIMCO leh Md. Asim Qaman, P&O (Rehab. Expert) ALIMCO, Guwahati te’n vualphalou tamtak enkhia uhi. Tuni a assessment camp a ki-ensak te Doctor leh Expert te’ prescribed dungzui in ni 45 sung etkhiat hiphot ding a, huai nungin apoimawh bangbang PASS tungtawn in vanzat ding hawmkhiat hidin gen uhi.

RRC team in NRHM nasepna enkhia
Lamka, Dec-10: Regional Recource Centre, Guwahati apan Central team-Dr Joydip, Adviser, Public Health; Dr Chinmay, Consultant, Public Health leh Nongyai Singh, Public Health Consultant te’n tuni’n Lamka hongpha uh a, National Rural Health Mission (NRHM) tungtawna nasepnate enkhia uhi. Amau Saikot PHC leh Kumbipukri PHSC leng enkhia uhi. Central team te’n Dec 11, 2013 in tulela Dist Hospital 100 bedded apan 150 bedded hi ding a proposal om tawh kisai in Dist Hospital enkhe ding uh a, Dec 12, 2013 in Singngat PHC enkhe ding uhi.

Van tuamtuam bag 60 val hawmkhia
Lamka, Dec-10: Khawvaiphei.com leh YVA Imphal Block kithuah in Henglep area a khua 43 ading van tuamtuam leh blanket kigawm bag 60 val tuni in hawmkhia uhi. Thu kizadan in, WARM TANGGAM project minvuah in phatuamngai mituamtuam apan in vanlui leh athak kaikhawm uh a, huaite singtanglam a khawsakna haksazawte kiang ah hawmkhiak dingin tuni zinglam dak 8:00 velin pawkhia uhi. Van hawm dingte Alfred Jamlallun Khaute, SDC/CCpur in flag-off a, Upa S. Thongzalal in Pathian kiangah thumna tawh khakhia hi.

Annual Conference-cum-Sports meet
Lamka, Dec-10: YVA Chongkhawzo Block te’n Dec. 12, 2013 tan Chongkhawzo khua ah YVA Chongkhawzo Block Annual Conference-cum-Sports Meet zang ding uh a, tuni in Opening Ceremony om hi. Huai hun ah Soiminlian Lengen, MCS, SDO/Henglep, Kh Benlian Vaiphei, Editor Nisin Thuhiltu leh Khuallianmang, Chief of Phailianbung te’n Chief Guest, Guest of Honour leh Functional President hihna tawh uap uhi.

SUUNNA
Shangrang w/o Dongkhanmang of Dumsau tuni nitaklam dak 5.30 in GNRCH Hospital, Dispur ah si a, amah hun sawttak ICU a etkol hi’n kigen hi. Aluang Dec 11, 2013 in CRPF lenna in Lamka hong pawtung ding hi’n kigen hi.
Ginzaman (54) m/o Thonchin of Bukpi(Thanlon sub-division) tuni tunitaklam dak 5.00 in cancer ziakin si a, Dec 11, 2013 in Bukpi ah kivui ding hi.
&&&&&&&&&&&&&&&&&&&&&&&&&&&&

IMPHAL NEWS
Mary Kom biography honkhiakna om
Imphal, Dec-10: Olympics Bronze medallist MC Mary Kom biography ‘Unbreakable’ kichi zan in Mumbai ah honna om hi. Huai ‘Unbreakable’ kichi Mary Kom tanchin gelhna ah a hinkhua ah anuam leh haksa a tuahte telin ama thu tamtak kigelh hi. Huai honkhiakna ah Bollywood actor Amitabh Bachchan in leng uap a, Mary Kom in, ‘London Olympics a boxing a quarter-final ka lut in Sir Amitabh Bachchan in kipahpihthu hon khak masapen a, tua ziakin amah ka ngaisang petmah’ chikawm in huai biography honna a a teltheih ziakin kipak petmah ahihdan leng gen hi.

UNC in dakkal 48 sung bandh puang
Imphal, Dec-10: Ministry of Home Affairs a Joint Secretary(Northeast) Shambhu Singh in Naga mite’n Manipur govt nuai hilou Alternative Arrangement a kivaiuak ding a phut uh Manipur govt khut a ngak ding ahi achih lungkimlouh latsakna in United Naga Council (UNC) pawlin Dec 12, 2013 akipan dakkal 48 sung Manipur adia lifeline National Highway No. 37(Imphal-Dimapur) lamlian bandh puang uh a,huaizawh in hunchiam omlou din Manipur a Naga mite luahna bial a National project nasepna teng leng hunchiam omlou a ‘ban’ puankhum thei ding dinmun a om hi’n thusuak in gen hi.Hileleng bandh in Nagaland state huam khalou ding hi’n kigen hi.

Army-te’n IED bomb khat mukhia
Imphal, Dec-10 : Patsoi Police station bialsung Awang Khunou area ah tuni zinglam dak 9:30 velin 18th Sikh Regiment khe a petrolling paiten lampi kiangah IED bomb khat mukhia uhi. Tua tawh kiton in 18th Sikh Regiment a bomb expert ten lakhia in mun thoveng khat ah hihsia uh hi’n leng thusuak in gen hi. 18th Sikh Regiment pawl petrolling a pailai un lampi kiangah polythene vom a kitun IED khat mukhia uh a, tua phet in NH-37 khaktan ngal in, uisa-siam khawng zang in enkhia uhi. Huchi’n bomb ahihdan theikhia in bomb siamte sam in lakhia uhi. Huai IED bomb bel kg 2.4 vel agik hi’n kigen hi.

Accident ziakin mi 3 si, 8 liam
Imphal, Dec-10 : Ukhrul district sung mun 2 ah accident ziakin mi 3 si in mi 8 liam uhi. Thu kizadan in Dec. 9 nitaklam dak 5:30 velin Mapum Village ah sing chih ding (firewood) pua Shaktiman khat accident in kawl(gorge) ah kisa in huai ah asung atuang mi 2 si in midang 6 liam uhi. Huai Shaktiman bel Gamnuom leh Pushing village kikal a kawl(gorge) akia hi a, Shaktiman driver M. Chongampam of Chinjaroi village leh Janauddin of Silchar(Assam) amun ah si uh a, aliam mi 6 te Ukhrul District Hospital puaktung hi uhi.
Huailou in Ukhrul-Kamjong kikal atai Winger khat zan nitaklam dak 3:00 velin kawl (gorge) ah kia in huai ah driver Chonreingam Kasar (32) of Chadong village liam a, damdawi inn puaktung himahleh tuni zingkal in si hi. Huai ah passenger khat liam hi. Huailou in Ukhrul district sung mah Huishu village leh Kalhang village kikal ah Bolero khat kawl (gorge) ah kia a, huai ah driver si hi’n kigen hi.

URF cadre khat battery guksawm mankhia
Imphal, Dec-10 : United Revolutionary Front(URF) a cadre Ph Suresh Singh(27) s/o Manglem of Uripok Baschaspati Leikai in tuni’n Sanjem Chirang mun a TATA Truck khat akipan battery guk sawmlai mipi’n mukha uh a, naktak in kivuak-huan uh a, tua zawh in Sekmai Police ah pekhia uh chihthu om hi. Sanjem Chirang khawmi ten Loitangkhunou a Assam Rifles-te camp a om URF cadre te’n kim leh kiangah guktakna telin thil tuamtuam ah khawsung naktakin hih minsia uh hi’n gen uhi. Huaiziakin Meira Paibi ten duty a a omlai ua matkhiak a om hi’n phone in gen uhi.

Sports certificate in DPC nawngkaisak
Imphal,Dec-10: Manipur police a Constable leh state force a riflemen semsa tamtak Sports certificate zangin lut uh a, hileleng huchibang certificate tamtak Manipur govt nuaia Youth Affairs and Sports Department theihpih phaklouh a hunkhop a om ziakin promotion tawh kisai DPC ah nawngkaina lianpi om hi’n kigen hi. Huchibang thil hong kilatkhiakna bel
Police deptt a Constables leh Riflemen hunkhop ASI & SI (Male Civil) leh Jemandar (MR/IRB) adia promotion piak ding tawh kisai a DPC pailel ah hong kilangkhia hidan in thusuak in gen hi. .