BRTF lampi bawlte vaulau om
Lamka, Dec-16: Nehru Marg-IB road junction a BRTF lampi bawlte zan nitaklam in pasal bangzah hiam in pistol dokkhia a vaulau kawmin insum ngen uh hi’ kigen hi. Pathianni ahihziakin local mite lampi bawlin kuanlou uh a, huchihlai in mundang akipan nasem dia omte vaulau a sum ngen uh hidin gintak-huai thu kigen hi. Thiltung tawh kisai kuate gamtatna hiam chih theihchet hi nailou a, lampi bawlte’n alauh ziakun nasep khawlsan ding tanpha in thuneite kiangah ngen uh hi’n kigen hi. Lehlam ah Tedim road zul a BRTF te nasepna zekai mahmah hi’n kigen hi.

SHEDA honkhiak in om
Lamka, Dec-16: Tuni zinglam in Chiengkonpang ah S.T. Solomon, Chief of Chiengkonpang in ‘Society for Health and Educational Development for All(SHEDA)’ kichi hongkhia a, Upa LS Gangte in thumna in lan hi. Tuazawh in Dec 16-27 tan daih ding ‘10 days Indian Sign Languages Course in Manipur’ kipan a, huai bel AYJNIHH tawh pangkhawm a SHEDA in a sai uh hi’n kigen hi.

Ni 14 thaman piak ding gen ding uh
Lamka, Dec-16:Ms Jacintha Lazarus, IAS, DC/CCpur makaih in Dec 17, 2013 zinglam dak 11:00 in DC’s office a BRGF Resource Centre ah SDO/BDO teng leh DRDA staff-te meeting ding uh a, MGNREGS 2013-14 nasepna 2nd phase ni 14 a thaman(wages) release dingthu genkhawm ding uhi. Kumteng in Job Card holder te’n Christmas leh kumthak a zatman ding in ni bangzah hiam MGNREGS nasepna man sum release hizel a, Christmas leh Kumthak thawhlawm dingin Job Card holder-te’n zangman uh a, phattuampih mahmah hi.

Gloria Chiinlianniang leh Pumlal Ngaihte kiteng ding

Lamka, Dec-16: Lasiam Miss Gloria Chiinlianniang d/o (late) Khamkhopau Valte @Paupi of Zenhang Lamka leh Major Pumlal L. Ngaihte s/o Chinkholal L. Ngaihte of Tuibuong, January 17, 2014 (Friday) zinglam dak 11:00 in Tuibuong a New Testament Baptist Church ah dansiangthou in kigawm ding uhi.

Sweet December Musical Nite
Lamka, Dec-16: ECA nuai a Evangelical Youth Fellowship , Koite Lui Pastorate Area saina in Dec 17, 2013 nitaklam dak 5:30 apan K.Salbung a ECA Gallery ah ‘Sweet December Musical Nite 2013 leh 2014 a EYF, KPA kum 25 chinna ding lopna’om ding a, Rev Thangjakap, Director, Youth & Music, ECA, ECCI in hong ding hi. Huai ah Bollywood singer Kavita,Maniwood Artists apan Mandikini ban ah lasiam tuamtuam John Guite leh Nemsemhoih telin mi hunkhop in Pathian la sading uhi.

YPA Gen HQ in chialna bawl
Lamka, Dec-16: YPA Gen HQ makaite’n tuni’n mike/loudspeaker zang in khawpi sungah kikou uh a, YPA te’n Christmas leh Kumthak nuamtak leh kipahtak taka zangding in deihsakthu gen puang uhi. Amau Mas leh Kumthak van ding leite dawrkaite’n khem mailou in aman diktaka leisak ding, mun tuam apan hongpaite buaina tuak a om leh panpih ding a mansa ahihdan uh tangkoupih uhi. Mipi’n innkim leh kiang banah dawr neitute’n mahni dawr kim leh kiang siangthou taka koih chiat ding, Hospital sianthouna dinga kuapeuh in panla din ngen uhi. Hospital a sem doctor leh nurse te’n damloute itna leh deihsakna tawh kem ding in leng ngen uhi. YPA huamsung ah bazar bomb/ bombala leh mipi patausak thei ding kuaman hihlou ding leh kham bikbek ahihdan puang uh a, ahih teitei a om leh action lakding in puang uhi.

Thousilen 464 hawmkhia
Lamka, Dec-16: Dist Malaria deptt te’n Dec 13, 2013 in Saikot PHC bial sunga khua bangzah hiam ah ‘Long Lasting Insecticide Nets’ kichi thousilen 464 hawmkhia uhi. Huai banah malaria deptt te’n Dec 2-15, 2013 sungin damlou mi 373 sisan test uh a, huailak ah malaria positive 1 mukhia uh a, huai PF hi’n kigen hi.

Tipaimukh & Thanlon ading PDS items

Lamka, Dec-16: Tipaimukh MLA’ nominee Samson in HQ Veng, Lamka West a FCS Godown apan Novr 2013 quota ding PDS antang APL, BPL leh AAY kigawm quintal 400 lakhia in PDS Agent-te’ kiang ah pekhia hi. Tuni mah in Thanlon MLA’ nominee N.Goulal inThanlon area a Nov 2013 quota ding PDS antang APL quintal 100, BPL quintal 426 leh AAY quintal 249 kigawm 640 lakhia a, PDS agent 34 te’ kiang ah pekhia hi.

Zodawn Tour in zinkhia
Lamka, Dec-16: SSPP V.K. Tawna College Branch te’n ‘Zodawn Tour’minvuah a singtanglam mun tuamtuam pha ding in tuni’n zinkhia uh a, amaute tuni zingsang dak 7.00 in Paukhenkhup Guite, Vice President SSPP Gen HQ in sawlkhia (flag off) hi. SSPP VK Tawna college Branch te’n Suangdoh, Mualnuam leh Songtal khua pha ding uh a, Dec 17, 2013 in Lamka hongtung kik ding uhi.

DSSS te’n Media-te kimuhpih

Lamka, Dec-16: Diocesan Social Service Society(DSSS) project nuai a ‘Peace Initiative in North East India’ a Peace Program Co-ordinator len Lydia Monsang leh Peace Activitist apang Nianglamching @ Veven Zou in tuni’n Nehru Marg ah Media- te kimuhpih uh a, activities tuamtuam pulak uhi.
Lydia in agenna ah DSSS ahihleh Church Based hi a, Women Dev, Health, Self Help Group, HIV/AIDS, Micro Agriculture telin project tuamtuam om hi’n gen hi. ‘Project on Peace Initiative in NE India’ te’n Manipur a dist 9 ah nasem uh a, church leaders, students, NGO leh teacher-te lakah peace, non-violence, violation of human rights leh toy gun thu seminar/training neihpih zel uh a, CCpur dist ah kum 1 leh akim nasemta uhi. Class VIII-X kikal studet-te leng councelling neipih zel uhi. Naupangte’n thaulem deih mahmah uh a, huai in hiamgamna leh thil hoihlouh tun ahihdan sinsak zel uhi. Manipur ah kum 20-30 paisa a hiam gamna tungkhinte hongtun nawnlouh a, kuapeuh khamuang a omthei ding leh namkal buaina tun nawnlouhna din naktaka panla uh hi’n gen hi.
Veven in CCpur dist a student tamtak khawsakna haksa ziakin lungkham leh kingaisiate councelling neihpih uh hi’n gen a, numeite’n sum deihna ziaka mahni taksa pum itlou a gamtang tamtakte leng houlimpih uh hi’n gen hi. Maban ah leng nasepna sunzom zel ding hi’n taklang a, society sungah kituahna, lemna leh muanna omna ding leh tuailai kingaisiate bawlhoihna dingin kuapeuh in kithuahpih din ngen hi.

UTLA in thupuan bawl uh
Lamka, Dec-16: United Tribal Liberation Army(UTLA) a i/c I & PR L. Minlun Singson @ Franky in thusuah a bawlin a taklatdan in Sehzahau T. Singsit @ Abu Nidal in Nov 12, 2013 in organisation dan a kalh ziakin suspend in om a,Dec 12, 2013 in Cabinet in a tungtang a genkhawm nungin/Dec 13, 2013 akipan in suspend ahihna lakkhiak hi’n puang hi.
Huailou in Dec 14,2013 nitak in gov a ki-surrender SK Thadou leh a nungzui khenkhat in govt tawh SoO thukhun bawl UTLA/KNO atel s/s Corpl Lamsat Khonsai @ Katu kap uh a, mipi leng lauthong in koih uh chi’n puang hi.Huai UTLA in mawhpaihthu puang uh a, huai tungtang ah Kuki Inpi leh Kuki Chiefs Assn thupiak zui a omlai a hibanga gamtangte et maimai hilou ding chi’n puang uhi.

Bungmual khawsak ah siluang 1 kimu

Lamka, Dec-16: Bungmual khawsak BRTF camp apan gamlalou Tipaimukh Road khanglam a kawltu huan ah tuni nitaklam dak 5 velin siluang khat kimu a, police te’n siluang la in district hospital morgue ah koih uhi. Misi taksa tunga kimukhia a service identity card dungzui in Sunil Kumar Choudhury kichi hi a, 80-RCC Thanlon a sem hi a, suty la in a khua uh Bihar state phaksawm lai sisa a kimukhia hi’n gen uhi. Amah sihna ziak theih hikei mahleh kuate hiam in a thah hidin gintak hi a, a gawl ah khau a gakna a om banah a khedap langkhat leng mun gamla takah om a, atal(forehead) leng kuak dekdukin om hi. OC/CCpur PS makaih in Police te’n siluang omna mun delhpah uh a, Bungmual a om BRO/BRTF official te’n leng siluang enchian uhi.

IMPHAL NEWS
Cabinet in Dec 2013 tan in Plan sum 60% tan zat man hidin thupuk uh
Imphal, Dec-16:Manipur in tu financial year sunga Plan sum zat dinga bikhiah Rs. 3,650 lakah 13% vel a zatlai phet ziaka awlmawh huaisa in tuni nitaklam dak 3.00 akipan in CM Secretariat ah Cabindet meeting om hi. Huai ah tu December 2013 tan in Plan sum zat dia bikhiah lakah 60% tan bek zat man teitei ding in thupuk uh hi’n kigen hi. Huailou in Special Plan Assistance,Flagship programme leh Addl Central assistance tuamtuam ahun bangzel a fund ngah theihna ding in project tuamtuam a nasepna tawh kisai utilisation certificate te Dec 20, 2013 tana submit hidin leng thukim uhi.
Cabinet meeting in March 2014 akipan Manipur ah National Food Security Act zat kipan ding chih ahih tawh kiton in huai nasepna lawhchinsem deihna District Level Committees bawlkhiak hiding in leng thukim uhi. State govt on Manipur a mihing omzah laka targeted Public Distribution System laka 87% vel antang man niamtak a ngahsak sawm a,huaite adiakin AAY card holder te’n kg. 1 a Rs. 3 rate in antang kg 35 ngah ding uh a, wheat kg. 1 ah Rs. 2 leh coarse grain kg. 1 ah Re 1 in ngah ding uhi. Huailou in Priority innkuan atel mi 1 zelin antang kg. 5 zel a innkuan kim un ngah ding uh chih ahi hi.

Manipur ah Vijay Diwas kizang
Imphal, Dec-16: Kum 1971 a India leh Pakistan kidouna a India sepaih site zahna piakna kawm in tuni’n Vijay Diwas kizang a, Manipur Secretariat South Block a zatna ah Chief Guest in Chief Minister O. Ibobi pang hi. Chief Minister in a thugenna India zalenna(independence) humbitna dinga hinna pia mihangsante mangngilh vual hilou ahihdan uh gen hi. CM in a thugenzelna ah kum 1971 a Indo-Pak kidouna leh kum 1999 in Kargil a India leh Pakistan kidouna thu a genna ah Manipur mi sepaih pang bangzah hiam in leng gam humbitna ding in a hinna uh pia ahihdan gen hi. Tuni a Vijay Diwas zatna ah CM leh Minister tuamtuamte banah official te’n sepaih hangsan sisate zahna pia uhi.

Hill Areas Committee meeting om
Imphal, Dec-16:Manipur Assembly a Hill Areas Committee (HAC) pawl tuni in Assembly complex a Committee Room ah meeting uh a, huai hun ah HAC Chairman Dr. Chaltonlien Amo leh Secretary Z. Kikhonbou Newmai telin singtangm MLA(HAC member 13) paikhawm uhi. Huai ah Inter-District boundary thubuai tawh kisai, land record leh Hill areas a National Highway-te puahphat ding thu telin thu poimawh hunkhop genkhawm uh a, himahleh thupukna kichiantak lak om nailou hidan in kigen hi.

One day State Level Seminar om

Imphal, Dec-16:Manipur Pradesh Mahila Congress Committee saina in tuni’n Congress Bhavan ah ‘One day State Level on Crime Against Women (Nirbhaya Day)’ kichi zat in om a, huai hun zatna ah Chief Guest in Mrs O. Landhoni Devi,MLA pang hi. Aman a thgenna ah hibang awareness sai thilhoihtak hi’n gen a, adiakin nupi tamtak adin poimawh a sakthu gen hi. Numei kuapeuhin duatdan leh zahdan siam poimawh hi’n gen a , gam changkangte’n numeite zahtak ua, tua tawh kiton a numei tunga thangtatna kuapeuh in tawpsan dingin ngen hi.
Functional President apang Manipur Pradesh Mahila Congress Committee President RK Ranisana in a genna ah numeite decision making bodies atel hunta hidan in gen a, numeite tunga thangtatna tawh kisai i ngaihkhok tawh kiton in numeite tunga thangtatna etkai poimawh hi’n gen hi. Huai hun ah Director Prosecutor Ng. Tejkumar leh Advocate Th Premala Devi te’n leng thugen uhi.

Imphal adin tuni khua votpen

Imphal, Dec-16 : Manipur ah phalbi ahihtawh kiton in khuavot petmah a, tuni in Imphal khawsung mun tuamtuam ah gamdang a khawvot tawh kibang in vuk (snow) muh ding om hi. Abikin Thoubal district ah vuk tam diak a, Pathianni a vuah azuk ziakin tuni Manipur state adia avot kumpen a gen in om hi. Tuni a temperature 0.0 degree celcius tung hi’n Indian Council of Agricultural Research, Imphal Unit te’n gen uhi. Tukum adin Imphal khawpi sung a votpen ni tuni hi a record in om hi. Sunlai in 21 degree Celsius tung a, sun nitum pial in meikai omlai hi’n kigen hi.

‘GM Hall puahthak hiding’ - Gaikhangam
Imphal, Dec-16 : Manipur Film Dev Corpn leh Russian Centre for Science & Culture, Kolkata saina in tuni in JN Manipur Dance Academy Auditorium ah ‘Culture for Friendship & Co-operation’ kichi om hi. Huai ah Chief Guest in Dy. CM Gaikhangam pang a, aman hongkhia hi. Aman a thungenna ah Chief Minister makaihna in govt in Manipur culture banglam peuha masawn thei dingin panlak hi’n gen a, tuah tawh kiton in Manipur govt in GM Hall puahthak sawm hi’n gen a, mi 2000 vel tat theihna ding a bawl hidin gen hi. Tuni a hun zatna ah Mrs. Iriba K. Bashkirova, Consul General of the Russian Federation, Kolkata leh Alexander V. Mazirka, Director of Russian Centre for Science and Culture, Kolkata in leng uap uhi. Functional President in Art & Culture Minister lui Dr. M. Nara pang hi.

Polo Ground ah 57th CC Meet kipan
Imphal, Dec-16 : Manipur adia tournament thupipen tuni in Imphal Polo Ground ah CC Meet kichi ‘57th Sir Churachand Singh KCSI, CBE Memorial All india Invitation Football Tournament-2013’ kipan hi. Parliamentary Secy(Youth Affairs & Sports) M. Prithviraj Singh khuallian a pang in uap a, Functional President in K. Joykishan,MLA pang hi. Tuni a opening match ah YDO Heinoukhongnembi leh FC Khanglai/ Sadar Hills team kimawl uh a, huai ah YDO ten goal 2-1 in zou uhi. CC Meet ah tukum in CCpur akipan in club 3- ZFC, M. Songgel leh LSC te tel ding uhi.