Imphal-Mandalay kikal flight maban chianglou
Imphal, Dec-9: Manipur a Sangai Festival,2013 omlai Nov 21-30, 2013 kikal in Imphal leh Mandalay kikal lenna(flight) a kikawmtuahna kipan mahleh gamdang mite’n Manipr hongphak ding uh dalna ‘Protected Area Permit(PAP)’ lakkhiak ahih tuanlouh ziakin Imphal-Madalay kikal flight service maban ding chianglou hi’n kigen hi. Ministry of Home Affairs akipan phalna om dungzui in Manipur a Home deptt in kumteng in PAP khahkol zel a,thu kizadan in Dec 31, 2012 tan PAP khahkol( relaxed ) himahleh huai nungin khahkol ahihman theih hilou hi. PAP kizat ziakin gamdangmite’n Manipur hong phak ding uh nawngkai kia hilou in international flight leng regular taka service haksa ding in om hi. Hileleng Manipur govt in tutungin PAP khahkolna ding in Centre ah pan alak thu theih hilou hi.

Data apan kitheidan in PAP system khahkol sungin Manipur hongpha gamdangmi(foreigner) tam tuan mahmah a, huai in economic dinmun ginalou Manipur adin phattuamna thupitak tun hi’n kigen hi.Kum 2008-09 sungin gamdang akipan khualzinmi(foreign tourist) 271 lelin Manipur hongpha uh a, kum 2009-2010 sungun foreigner 405 in Manipur hongpha uhi. Kum 2008-09 sunga Manipur hongpha India gamsung mun tuamtuam akipan leh gamdangmi kigawm 1,15,571 hi a, kum 2009-2010 sunga hongpha teng 1, 27, 929 hi uhi. PAP kikhahkol sung kum 2011-12 sungin foreigner 602 in Manipur hongpha uhi. PAP kikhahkol sungin gamdangmi Manipur hongzinte adin ni 30 sung om theih a,gamdangmi India-mi tawh kitengte adin bel ni 90 tan hithei hi. Union Cabinet in Nov 14, 2013 in Imphal leh Bhubaneshwar airport 2te International airport in puang hi.

EBC Budget din Rs.15 crores bikhiah
Lamka, Dec-9: EBC Hiangtam Lamka biakinn a EBC Kumsim Khawmpi 65 veina paitou lel ah tuni zinglam palai 821 paikhawm te’n business session nei uh a, huai ah January 2014- March 2015 sung a EBC budget ding in Rs.15 crore passed uh a, kum 2014 sung a Grace Bible College sumzat ding Rs 47,86,000 leng- pass uhi. Kum 2014 a Khawmpilian vaisai ding leng tel uh a, Business Chairman din Upa T.Lamenthang, Vice Chairman din Upa T.Langzathang, Recording Secretary din Upa T.Paukhansiam leh Asst Recording Secretary din Upa Darneingam telching uhi.

Jan 2014- March 2015 sunga EBC sum muhna lam adin sawma khat ah Rs 12,39,00,000/- Mission ah Rs 1,57,50,000/-Dorcas (antang pham) ah Rs 58,75,000/-Evangelical Book House ah Rs 6,00,000/-Press/Offset ah Rs 6,25,000/- Kristian Thukizakna ah Rs 3,75,000/- Institution/school ah Rs 3,75,000/- Innluahman ah Rs 7,20,000/-Relief ah Rs 3,50,000/- Publication ah Rs 1,75,000/- Misc ah Rs 1,75,000/- DORCED ah Rs. 9,55,000/- leh Kipahthugenna ah Rs.1,25,000/- hiding hi.

Dec 10, 2012 in leng Business session paitou lai ding a, Missionary post 10 leh Mission promoter 1 create ding, EBC Hq in sawltak bial pumpi a zatding 2 neihding thu leh Kumsim Khawmpi neih hun ding telin thu tuamtuam genkhawm ding uhi.

Indian flag akimkhat ah kikhai
Lamka, Dec-9: South Africa President-lui Nelson Mandela (95) damlouh ziakin Dec 5, 2013 nitak in Johannesburg a a tenna inn ah si a, India gam pumpi ah amah suunna ni 5 sung om ding hi. Huaiziakin Lamka khawpi a govt office building teng ah leng India flag a kimkhat a niam in kikhai vek hi.

ICI programme poimawh 3 om ding
Lamka, Dec-9: Rengkai ICI biakinn ah December 10-15, 2013 sung ahun kibang in Independent Church of India(ICI) 64th General Assembly, 30th ICI Central Youth General Conference leh ICI Central Choir Silver Jubilee Celebration om ding hi.Sielmat a ICI Conference Hall ah Dec 10 & 11, 2013 in ‘the 140th ICI Executive Council’ sitting om ding hi. Rev Dr JL Songate, General Secretary,ICI in General Assembly 64veina a biakna kikhop banah ICI Central Youth General Conference 30veina leh ICI Central Choir Silver Jubilee lopna hun uasp chiat dingin mipi kuapeuh chial hi.

Lamka Public Ground ah Mela
Lamka, Dec-9: CCpur District Sports Assn(CDSA) leh CCpur District Students’ Union(CDSU) kigawm in Northeast Trade Fair Assn(NETFA) tawh pangkhawm in Dec 11-30, 2013 sung Lamka Public Ground ah Mela(Trade Fair) sai ding uhi. Huai hunah item chi tuamtuam mipite muhtheih ding leh naupangte kimawl theihna ding thil tuamtuam koihsawm uh a, huaite banah kipolhlimna ding leh nek-le-dawn chi tuamtuam leng koih ding uhi.

Dist Youth Convention, 2012-13
Lamka, Dec-9: NYK/CCpur saina in Dec 14, 2013 zinglam dak 11:00 in Saiton Community Hall ah ‘District Youth Convention, 2013-2014’ om ding a, TN Haokip, MLA (Saikot A/C) khuallian hiding hi. Huai ah Guest of Honour in Nehthang Mate, MDC pang ding a, H.Doungel, Dist Youth Co-ordinator, NYK/CCpur in vaidawn thugen ding hi. Huai hun ah Chief Guest in Kha Aimol Youth Dev Orgn-te kiang ah ‘Dist Level Outstanding Youth Club Award, 2012-13 ’ title peding in Rs.10,000/-leh certificate in zui ding hi.

Assessment Camp omding
Lamka, Dec-9: Composit Regional Centre, Guwahati leh People Advance in Social Service (PASS) saina leh Oil & Natural Gas Corporation Ltd. New Delhi akipan huhna tungtawn Oct 10, 2013 zinglam dak 10:30 apan in IB Road a Synod Hall ah ‘Assessment Camp for Hearing aids, crutch, wheel chair, tricycle etc’ om ding hi.

Gospel Visual Album hon hiding
Lamka, Dec-9: S.T Chongboi in abawl Gospel Visual Album ‘Jesu hungvah ding ahitai’ kichi Dec 15, 2013 sunnung dak 1:00 in Tuibuong a Beth-shan Cottage ah honna om ding hi. Huai ah Dr Seiboi Singsit, IFS, retd Principal Chief Conservator of Forests & former Chairman ,MPSC in hong ding a, Rev Lalrosiem Songate, Principal, ETC in Pathian kiang ah lan ding hi.

NE Children Home Founding Day
Lamka, Dec-9: Rengkai a Bethlehem Veng ah Dec 10, 2013 sunnung dak 1:00 in North Eastern Children’s Home Founding Day zat hiding a, student te’n item tuamtuam show ding uhi.

SSPP Jt. HQs Lamka makaite na guan

Lamka, Dec-9: Tuni nitaklam dak 3.00 in Hiangtam Lamka a SSPP Jt. Hq Lamka office ah kum 2013-2016 sunga SSPP Jt. Hq Lamka vaipaw ding makai thakte na gotna om a, Jt. Hq President S. Lamkhankhual in amaute tungtawn a nasep dingdante telin, tunung a siamsinna lam puahna dinga panlakdan ding genkhawm uhi.

&&&&&&&&&&&&&&&&&&&&&&&&&&&&&
IMPHAL NEWS
Assembly session ni 2 sung om ding
Imphal, Dec-9: Manipur Assembly Winter session hongtungding Dec 18, 2013 akipan om ding ni 2 lel om dingin tuni a Assembly Speaker makaihna a Business Advisory Commitee(BAC) meeting in bikhiah uh chihthu om hi. Assembly session kipatni Dec 18, 2013 in member site suunna(obituaries) hun a zat hiding a, Dec 19, 2013 in normal business om ding chih thupukna tuni a BAC meeting ah bawl uh hi’n kigen hi

Manipur in ni 5 sung suunna puang
Imphal, Dec-9: South Africa President-lui banah huai gama mingou(white) leh mivom(black)te kala kideidanna liantak om hihbeia vaihawmna kibang nuaia omsaktu leitung pumpi a leader minthangpente laka tallangpen Nelson Mandela in sawtkuamtak taksa hatlou a om Dec 5, 2013 nitak in si a, India adia lawmhoih ahihbanah India tawh kizopna hoihtak nei leader ahihziakin India in ni 5 sung suunna a puan dungzui in Manipur in leng Dec 6-10, 2013 sung ni 5 tan suunna hun puang hi.Huai tawh kiton in govt office tengah India flag a kimkhat a khainiam hi a,ni 5 sung suunna om sungin official in entertainment leng omlou ding chih ahi hi.

Court in student 1 rape mi 2te mawhpaih
Imphal, Dec-9: District and Session Judge,Manipur East in tuni’n TG Hr Sec School a numei student khat pawngsual(rape) mi 2te siamlouh tangsak in mawhpaih a, huai mi 2 - Tarun and William tunga gawtna piak dfing thu Dec 11, 2013 in puankhiak hiding chihthu om hi. Thusuakin a gendan in Thongam Tarun ofThangmeiband leh Yumnam William of Khagempalli Pankha in Oct 20, 2012 in Tedim Raod jula Restaurant ah TG hr Sec School student numei khat rape uh a,huai tawh kisai in Lamphel Police te’n section 376, 120-b, 201 IPC pansan in FIR registered uhi. Huai case tawh kisai bangzahvei hiam hearing om nungin tuni’n court in student rape mi 2te IPC Section 376 (2)(g) (Gang rape) and 120-b (Criminal Conspiracy) pansan in mawhpaih hi. Mi 2te Court in kum 10 sung ahihkeileh damsung suangkulh(jail) tang ding tanin mawhpaih thei chihthu om hi. in

Governor ah memorandum pia
Imphal, Dec-9: MPP Vice President H. Manisana Singh(57) apaisa Nov 13, 2013 zinglam dak 9.50 velin Tedim Rd(Airport) kianga Changangei Uchekon ah Car a tailai meltheihlouh galvantawite’ a kaplup uh govt in tualthatte tunitan a matkhiaklouh ziaka lungkimlou in MPP worker leh member tamtak tuni in MPP office akipan Silent Protest dan in lamlian zui in Governor kiang ah memorandum piaksawm uhi. Himahleh BT park ah police tamtakin dal uh a, huchi’n MPP President N. Sovakiran makaihna in palai 7 in Manipur Governor Ashwani Kumar muthei uh a, amau Governor kiang ah memorandum pia uhi.Amau a taklatna uah MPP Vice-President H Manisana thahte mankhe din CM ah ngen mahle uh tunitan bangmah thu omlouh ziakin Governor kingah thatte mankhia a, akituahpih bang gawtna pe dingin nget uh hi’n gen uhi.

MPS officers seniority list
Imphasl, Dec-9: Manipur govt in April 1, 2013 pansan a zangin May 17, 2013 in Manipur Police Service(MPS) Officers final seniority list suahkhia a, review departmental promotion committee in Manipur High Court thusuak May 2, 2013 a Contemp case No. 62 of 2010 dungzui in July 1, 2013 a recommend abawl pansan in Manipur govt in Oct 1, 2013 in tentative seniority list of Manipur Police Service (MPS) grade II Officers suahkhe nawn a, huai tawh kisai objection bawl nuamte Dec 14, 2013 tan in Deptt of Personnel & Administrative Reforms(DP & AR) bawlthei lai ding uh chihthu om hi.

Haichi tang tuamtuam hawmkhia
Imphal, Dec-9: Imphal East a District Agriculture Officer- te makaihna in tuni in Imphal East a Seijang a loubawlmite kiangah RKVY 2013-14 tungtawn in haichi tang leh loubawlna a vanzat ding hawmkhia uhi. Huai haichi tangte tuni’n Seijang Community Hall ah ‘One day training program in Rabi Crops’ kichi om hun ah hawmkhiak ahi hi. Huai traing program zatna hun ah ankam tang, pea, sprayer, pump set leh Urea (lei hoihna) hunkhop loubawl mite lak ah hawmkhia uhi. Huai hun ah UCM President Y. Nabachandra, Agri deptt a Executive Officer H. Modhumangol leh Seijang Vegetable Crope a Chairman Kh. Sarat te’n Chief Guest, Functional President leh Guest of Honour hihna tawh uap uhi. Tuni a training program bel Dist Agri Officer, Imphal East leh All Manipur Young Farmers’ Union-te sai ahi hi.