Award lopna leh kipahthu genna programme
Lamka, Dec-6: Lianchinkhup Tombing @ Lian C. Tombing of G. Mualkoi makaihna Covenant Children Home a naupangte etkolna ah pahtakna lawhtak khop a a hihhoih ziakun ‘Rajiv Gandhi Manav Seva Award 2013 for service towards the welfare of Children’ kichi Award piak hi uh a,tuni’n Covenant Children’s Home(CCH) a Auditorium ah kipahthu genna leh Award lopna kithuah om hi.

Huai hun ah Lian C Tombing, Chairman, Covenant Children’s Home(CCH) Managing Board in Award tawh kisai agenna ah Covenant Children’s Home a naupang tagah etkol a omte lakah lupna ngak a midangte sanga kep ngaizaw naupang Miss Vung Mary etkolna tungtawn a huai Award mu hi’n gen a, huai nasepna govt in phawkpha hi’n leng gen hi. Aman a genzelna ah Award musaktu Vung Mary pen etkol a poimawh tan Covenant Children’s Home in enkol dinga, a damsung etkol a ngaih leleng akul leh poimawh banga enkol a kem ding uh hi’n gen hi. Tuni a Award lopna hunah Rev. Khen P. Tombing telin Lian C. Tombing lawm-le-vualte banah CCH a student-te’ leh nu-le-pate’ tel uh a, vok 3 gou in ankuang lui uhi. Lian C Tombing in Union Minister Ms. Krishna Tirath apan Nov 19, 2013 in New Delhi ah Rajiv Gandhi Manav Seva Award 13 sang a, huai Award bel Rs. 1 lakh, Silver plate leh Citation in zui hi’n kigen hi.

84-BRTF te’n lampi bawl kipan uh
Lamka, Dec-6: DC’s office chamber ah Nov 30, 2013 in khawpi sung lamlian omdan genkhawmna ah DC in OC 84-RCC BRTF kiangah Tedim Rd a Police Station kong zero point apan Lanva lei tan lampi kuakna teng Dec 16, 2013 tan a minor repairing bawl ding leh a kuakna teng hudim din a theihsak dungzui in Dec 2, 2013 apan 84-RCC BRTF te’n nasep pan uhi. 84-RCC BRTF te’n Lanva lei akipan Dorcas Road junction tan tukal in minor repairing zousiang ding uh a, Dec 9, 2013 in Police Station kong zero point akipan New Bazar lam zuan in nasep pan nawn ding uhi.

GBC ah Graduation Service
Lamka, Dec-6: New Lamka a Grace Bible College(GBC) campus ah Dec 7, 2013 zinglam dak 11:00 in Graduation Service 31veina om ding a, Rev Dr Richard Howell, General Secretary, Evangelical Fellowship of India (EFI) in graduate zouthakte hasotna thugen ding hi. Rev.Dr.Kamkhanthang, Principal, GBC in graduate thakte degree pe ding a ,Rev.S. Vungminthang, General Secretary, EBC in graduate thakte adi’n thumsak ding hi. Tutung in GBC ah akigawm in mi 54 graduate ding uh a, huaite Master of Divinity 17, Bachelor of Theology 32 leh Diploma in Theology 5 hi uhi.

ADC sumzat ding (Budget estimate) bawl
Lamka, Dec-6: P.Sianzadong, MDC & Chairman, Finance Committee, ADC/CCpur makaih in a office chamber ah tuni sunnung in Finance Committee te’n kum 2013-14 & 2014-15 sunga ADC/CCpur nuai a staff-te’ khalawh (pay/salary) leh thil tuamtuam a zatding budget estimate bawl uhi. Finance Committee te’n 2013-14 revised estimate in Rs. 4979.57 lakh leh 2014-15 budget estimate Rs. 6294.96 lakh bawl uh a, Manipur govt a Finance deptt ah thon ding uhi. Finance Committee te’ gendan in ADC/CCpur in staff-te khalawh leh thil tuamtuam a zatdia bikhiah zah Manipur govt in pe ngeilou hi’n gen uhi. Huailou in January 2014 kha in Lamka khawpi a dukan/dawr/establishment teng ah tax collection bawl ding, huai hunsung mah in trade licene leng check dingin thupuk uhi.

ZYA Tuivel Block Raising Day
Lamka, Dec-6: Zomi Youth Assn(ZYA) Tuivel Block kiphuhkhiat nung kum 1 chinna Dec 10, 2013 zinglam dak 10.30 in Singngat sub divn. a Maukot Community Hall ah lopna om ding a, Ginsuanhau, MLA (Singngat A/C) khuallian hiding hi. Huai ah Chief Host in Thanglianpau Guite President, ZRO pang ding a, Functional President in Langkhanpau Guite, Chairman, ADC/CCpur pang ding hi. Khualliante apan thugenna ban ah T.Goukhomang, President, ZYA Gen HQ; Grace Zamnu, MDC; P.Sianzadong, MDC; Tongkai Baite, MDC; Hrila, MDC leh Minboi Vaiphei, MDC te’n leng thugen ding uhi.

Annual Day-cum-Prize Distribution om
Lamka, Dec-6: Ngathal a SSPP Residential school ah tuni in Annual Day-cum- Prize distribution program 2013 om a, student te’n kum 2013 sunga project work tungtawn a thil tuamtuam a bawlte uh muhtheih dingin koih(display) uhi. Huai hun ah Khamminthang, Secy, SMC in agenna ah mihingte ipiankhiat apan sih tanpha siamsin vek hi’n gen a, khutsiam silbawl ban ah sports leng education khat hi’n gen hi. Student te ading in omdan hoih poimawh a, bangchituk a laisiamte leng omdan ahoih kei leh zat taklou hi’n gen hi.

SSPP Residential school ah tukum 2013 a class X examna ah a hunkhop lawhching uh a, kumthak 2014 a HSLC exama ding inleng student 27 tel ding uhi. Headminstress makaih in sports hunlai leh thil tuamtuam hihna a kipahmante hawmkhia uhi.

Electric regular loulua
Lamka, Dec-6: January 2013 kha akipan school tuamtuamte school lutpan in tukum tawp final exam pailel a, school khenkhat te’n exam zou in school bangzah hiamte’n final exam lel uhi. Student-te laisimna ding a electric meivak poimawh laitakin electric regular loulua a, student tamtakin haksatna gen vuallouh tuak uhi. Tulelin Manipur ah electric power kidaihlou in govt in state dang apan leithawh a, Manipur a mipite zatding electric power kiching govt in leizoulou hi’n kigen hi.

Annual Gen Body meeting leh election
Lamka, Dec-6: EBC Worker Pensioners’ Assn(EBCWPA). pawlin tuni’n EBCC Central Lamka a meeting hall ah Annual General Body meeting 20veina leh election nei uhi. Huai hun ah Rev S.Vungminthang, Gen Secy, EBC in Pathian thugen kawmin Worker Pensioner- te hasotna thu gen a, Rev S.Ginjam, President, EBCWPA in member thak-Upa N.Thonzagin, Convention Press Manger; Upa Ngulkhanjam Ngaihte, Head Clerk, Dorcas Hall leh Pastor PH Routhuam lalut hi.Kum 2012-13 sunga member 4 sisate suunna leh a nutsiat uh innkuante adia thumsakna Rev K.Thuamvung in nei hi. Kum 2013-16 sung EBCWPA makai ding telna ah Rev S.Ginjam mah telching uhi. Vice President in Rev K.Thuamvung; Secretary in Upa Ngulkham, Asst Secy-cum-Finance in N.Thonzagin ban ah Treasurer in Upa L.Vungzapau tel uh a, makai thak teng Pastor Ngulkam in Pathian kiang ah thumsak hi.

Seminar on Micro Finance Approach
Lamka, Dec-6: Tribal Reseach Institute(TRI) akipan huhna tungtawn in MHJU saina in Dorcas Hall campus a Dorcas Guest House ah Dec 7, 2013 zinglam dak 11.00 akipan in ‘One Day Seminar on Micro Finance Approach’ om ding hi. Seminar honna hun ah

Chief Guest in Maniram Sharma,IAS, Addl DC/CCpur pang ding a,Guest of Honour in Khaikhopau Ngaihte, SDC BO/DC’s office/CCpur pang ding hi.Huai ah Functional President in Ramngaining Zimik,A/O, Tribal Reseach Institute pang ding hi.

Seminar hun ah Abhinanda Jha,Chief Manager,UBI/CCpur Branch; S. Kaikhanthang Ngaihte,Chief Manager, SBI/CCpur leh Khaisiamlal Guite,DGM/NABARD in thupi tuamtuam zangin sinsak ding uhi.

IMPHAL NEWS

All political party palaite hongtung; Home Ministry official- te’n enkhe ding
Imphal, Dec-6: Union Home Ministry official-te leh All Political Party member te’n Moreh pha ding uh a, Kiginni leh Pathianni huai muna om in border fencing leh gamgi omdan enkhe ding uhi.Chief Minister O. Ibobi makaihna in Dec 1, 2013 a Delhi zin All Political Parties palaite leng tuni’n Imphal hong tungkik nawnta uhi.
Union Home Ministry official-te Dec 7, 2013 zinglam dak 9.00 in Imphal hongtung ding uh a, zinglam dak 10.00 in Helicopter in Moreh zuan ding uhi.Union Home Ministry a top official-te banah Surveyor General of India a high ranking official-te, BRO official-te leh Assam Rifles official-te tel ding uhi.All Political Party palaite’n Dec 7, 2013 zinglam dak 8.00 in Dy CM Gaikhangam makaihna in Moreh zuan ding uhi.

NEC team in Imphal pha ding
Imphal, Dec-6 : North Eastern Council (NEC) apan mi 3 in Dec 8-21, 2013 sung Manipur hongpha ding uhi. Thu kizadan in NEC teamte DL Wangkhar, Director (E & M) NEC; Dr. Shailendra Chaudhury, Director (Sc. & Tech.) NEC leh M. Prakash Singh, Consultant, NEC hi uh a, Dec. 8, 2013 in M. Prakash Singh hongtung ding a, Dec. 17, 2013 in Imphal nusia in Guwhati zuan ding hi. Amah pai ni Dec. 17 nitaklam in DL Wangkhar leh Dr. Shailendra Chaudhury hongtung ding ua, Dec. 21, 2013 tan om ding uhi. Amau Manipur a om sung un NEC funding projects tuamtuam etkhe ding uh hi’n kigen hi.

Sit-in-protest tu uh
Imphal, Dec-6 : Medical Directorate a Deputy Director Dr. Sharat tenna inn ah Derc 1, 2013 in meltheihlouhpawlkhat in bomb va koih uh mawhpaihna in tuni in Medical Directorate office kong ah doctors leh nurses te sit-in-protest tu uhi. Bomb in lemna bangmah tunlou ding a, a poimawh leh thilnget neiten a deih uh hoihtak a taklang zaw ding in ngen uhi. Dr. Sharat inn a kitenna omlai in a innkiang uah handgrenade koih in om hi.

1st Winter Disabled Mela hunkhakna
Imphal, Dec-6 : Relief Centre for Welfare of Differently abled persons, life-line trust centre, handicapped welfare society, Leima Leiteng leh Chaikhat Khongthong Self helf group te saina a ni 3 sung ‘1st Winter Disabled Mela for Inclusice Society’ kichi Tera Primary School a om tuni’n hunkhakna om hi. Huai ah Chief Guest in K. Radhakumar,DC/Imphal West pang a, Functional President in Ch. Opendra, President Relief for the Welfare of Differently abled Persons pang hi. Guests of Honour in V. Tualthang, Addl. Director of Commerce & Industries leh Ng. Tejkumar, Director Law & Prosecution pang uhi.

Commando pawlin helte 2 man
Imphal, Dec-6 : Imphal West Commando te’n zan sunning in Imphal khawsung mun tuamtuam a search operation a neihna uah Malom Tuliyaima Awang Leikai mun ah KYKL a tel Laishram Kiranjit Singh @ Robert (33) mankhia uh a, tua zawh nitaklam dak 3:25 velin Nagamapal mun ah KYKL member mah khat mankhe nawn uhi. Matkhiak a omte akipan in Rs. 1,50,000/- mukhia uhi.

Scholarship form submit hun behlap
Imphal, Dec-6 : Directorate of Tribal Affairs & Hills in tuni a thusuah a bawlna ah Post Matric Scholarship 2013-14 apply-te adin Nov 30, 2013 tan form submit theih dia bikhiah himahleh ahun Dec. 16, 2013 tan hiding in behlap uhi. Thusuak in a gendan in scholarship form tawh kisai in forwarding leh students details bangmah omloute nawlkhin hiding a, submit khitsa reject a omte leng pom hilou dinkigen hi. Dec. 16, 2013 nungin ahun behlap hi nawnlou ding chihthu om hi.

Nupi Lal Day zat hiding
Imphal, Dec-6 : state govt saina in Dec. 12, 2013 in Nupee Lal Memorial complex ah Nupi Lal Day zat hiding hi. Huai hun ah Chief Guest in Chief Minister O. Ibobi pang ding a, Functional President in Dy CM Gaikhangam pang ding hi.

A/R leh PLA-te kikaptuah
Imphal, Dec-6 : Ukhrul district sung Kamjong a om Assam Rifles-te leh PLA te tuni zinglam dak 10:30 in kikap uhi. Huai hun ah Kamjong khawmiten thau kapging ngaih taktak za uh a, akhen chiangin bomb puak ging khawng za uh hi’n gen uhi. Huai kikapna ah helpawl lamten lethod gun leh grenade launcher khong zang uh hidin ginthu kigen hi. Asi leh liam om lam bel theih hilou hi.

Bomb va-hihpuak uh
Imphal, Dec-6 : Meltheihlouh pawl khat in zan nitakin Thoubal district sunga Lilong Chingkham a om Yaima Singh tenna inn ah bomb khat vapaihkhum in hihpuak uhi. Huai ah kuamah a si leh liam omkei mahleh a tenna innkim lak uah bomb puakzak in a hihsiat khak zek bel bangbang hiam om hi’n kigen hi. Bomb hihpuakte tuni tanin leng a kipuang omlou uh chih ahi hi.