DC/CCpur khakna leh vualzawlna ngetsakna
Lamka, Nov-29: Ms Jacintha, IAS, DC/CCpur leh C. Arthur W, IAS, DC/Tamenglong hongtung ding Dec 2, 2013 in Imphal ah kiteng ding uh a, huaizawh in Chingmeirong a Don Bosco Ground ah wedding reception program om ding ziakin CCpur district apan MLA teng, MDC-te, District Level Officer(DLO) te ban ah organisation tuamtuam amakaite’n tuni nitaklam dak 3:00 in DC/CCpur bungalow sak a Guest House ah DC/CCpur hilai pasal nei ding khakna leh vualzawlna ngetsakna(blessing ceremony) kithuah zatpih uhi.
Programme kizatna dingin Father Jose, Good Shepherd Parish in thumna in hun hong a, Langkhanpau Guite, Chairman, ADC/CCpur in welcome address gen hi. Health Minister
Phungzathang Tonsing in agenna ah CCpur dist a numei DC hilai pasal neiding Jacintha Lazarus hampha mahmah hi’n gen a, a vaihawm siam ziakin Community om teng lakah feltak a vaihawm thei hi’n gen hi. MGNREGS 2010-11 tawh kisai a nasep hoihziak in National Award ngah a, nam tuamtuamte tuamtuamte khentuam neilou a vaihawm, lauh neilou leh thilhih ngamlouh neilou hi’n gen a, pasal neiding a a omtheih leng Pathian apan vualzawlna hi’n gen hi.
Jacintha Lazarus in pasal a neih nunga DC/CCpur len ding midang thei zoulou uh hi’n leng Minister in gen hi. DC in a pasal tawh hinkhua nuamtak leh Pathian’ vualzawlna ziakin , tu-le-ta tampi a neih uh deihsakthu leng gen hi. CCpur district ah mihoihloute ziak in buaina om a, kuapeuh in huai chindan tawpsan ding in ngen hi. Thil hoihlou bawltute Police te’n mankhia uh a, a matna ua telkha leng hilou, mat a omte pekhe ding a Police Station kong a kitom, buaina bawl leh Police Staton buluh sawm chihte kuapeuh in tawpsan ding in ngen hi. Minister in DC/CCpur ading vualzawlna ngetsakna (blessing ceremony) Committee sik-le-tang in sial (mithun) pia hi.
T.Manga in agenna ah Henglep A/C akipan akizom in term 4 sung MLA dia telching in om a, hileleng DC/CCpur in Henglep area a khua a phak zah tuansuak nailou hi’n gen hi. DC/CCpur ziakin MGNREGS tungtawn in khawpi sung ah kikhekna lianpi om a, tu’n DC/CCpur leng Manipur mi kia hilou in singtangmi (tribal) hita ding ahihdan gen kawmin Christian innkuan hoihtak hong bawlkhiat uh deihsakthu gen hi.
Vungzagin Valte in agenna ah DC/CCpur’ pasal ding Arthar ading in CCpur mipite brother- in-law ban ah CCpur dist pen brother-in-law Dist hita chi’n gen a, nupa nuamsa hong hih uh deihsakthu gen hi. Langkhanpau Guite in agenna ah IAS 2 kiteng ding te’n IAS officer ding leh maban a DC/CCpur ding 2/3 bek ta a neihkhiat uh deiksakthu gen a, nupa nuamsa leh lawhhching ahih uh deihsakthu gen hi.
SP/CCpur in agenna ah mihingte piankhiat apan zi-le-pasal neih poimawh pen leh family bawlna kipatna ahihman in DC/CCpur leng pasal a neihding kipahpihthu gen a, DC/CCpur in Police-te a kithuahpihna tung ah kipahthu gen hi. Tuni program hun ah DC/CCpur’ family te ban ah C. Arthur W, IAS, DC/Tamenglong’ innkuante tamtak tel uhi.
Dr Jim Reeves,Director, Manipur Conference, Seventh Day Adventist in DC/CCpur ading in vualzawlna ngetsakna (blessing prayer) nei a, Dist Level Officer leh Organisation tuamtuam te’n presentation pia uh a, Rt Rev Ginkhanmung Zou, Bishop , MELC in thumna in hun khak (closed) hi.

KFC kum 25 chin lopna om
Lamka, Nov-29: Tuni zinglam dak 11:00 in Kangvai Community Hall ah Khawvaiphei Film Company (Ltd) kiphuhkhiak nung kum 25 chinna Silver Jubilee zatna om a, T. Manga Vaiphei, MLA & Chairman MTDC in Chief Guest hihna tawh uap in Jubilee suang hong hi. Huai hun ah Khatkhotong Baite, President, VPC Gen HQ in Chief Host hihna tawh uap a, Jubilee lopna in Bawng khat leh vok khat gou in ankuang luina om hi. Huai hun zatna mah in tuni nitaklam in Vaiphei Artistes' Assn (VAA) te’n concert nei uhi.

Thilging ngaihtakin mipi patausak
Lamka, Nov-29:Tuni nitak dak 10.10 in bomb hileh kilawm ging ngaihtak in bangzah vei hiam Lamka khawpi sung zelsuak a,Joint Philanthropic Orgn(JPO) pawlin mipi khualna in bazaar bomb(cracker) halpuak leh zuak omlou ding chi a ‘ban’a puan laitak ua hibang thilging ngaihtak a kizak ziakin banghiam thiltung hoihlou om hidia gingta in mipi patausak hi. Hileleng akhawnung a kithei danin huai thilgingte DC/CCpur bungalow a cracker kihalpuak ging hidan in kiza phing hi.DC/CCpur in Dec 2, 2013 a pasal a neih ding ziakin tuni’n CCpur district apan MLAs/MDCs leh District Level Officer(DLO) tengin amah khakna kawmin vualzawlna ngetsakna hun zatpih uhi.

Minister in YPA Hall hong ding
Lamka, Nov-29:YPA Bungmual unit in YPA Hall abawl uh Nov 30, 2013(Kiginni) zinglam dak 10.30 in honna function om ding hi. Huai ah Phungzathang Tonsing, Minister(Health & FW/GAD/CADA) in Chief Guest a pang in ding a,Pastor M.Ginzatun, local Pastor EBCC Bungmual in Pathian kiangah lan ding hi. Hall honzawh in mipi kikhopna in zui ding a,Chief Guest in voluntary blood donors certificate leh cleanliness drive category 1 & 2 a kipahman a hawmkhiak banah thugen ding hi. Programme zat sungin item tuamtuam om ding hi.

Kwakta khua akipan gari 5 mukhia
Lamka, Nov-29:Lamka Police te’n information hoihtak a ngah dungzui un tuni zingsang dak 7:30-8:30 kikalin Insp Elvy Tunglut, OC/CCpur PS makaih in Police-te’n gari 3 zang in Kwakta vapha in Ward No.6 a inn 2 ah CCpur district akipan 2-wheeler kigu 5 leh tui pump-na (Tulu) horse power 0.5 te 1 mukhia uhi. 2-wheeler gari te- Activa old model 1 (MN 02A-0795); Activa (white) new model 1, Pulser 180 (black) 1; Kinetic (MN 02-0272 ) leh Scooter bajaj (blue) 1 mukhia uhi. 2-wheeler gari 5 kimukhiate inn sung a kisel hi a, akhente lupna room ah puan kikhuhkhum a, huai inn 2te ah inn neitu kuamah omlou in naupang leh damlou khawng om uh chi’n Police te’n gen uhi. SP/CCpur in a gendan in OC/CCpur hahpan ziakin 2-wheeler gari 5 muhkhiak hi’n gen hi. Khawpi sunga gari neu (2-wheeler) mangsakten gari document tawi in Police station ah amau gari a telkha hiam chi’n enkhia uh a, nitaklam tan in Kinetic chihlouh gari 4 te a neitute’n Police station apan lakhia uhi.

Public Protest Rally adin chial
Lamka, Nov-29: Nov 25, 2013 in Gas stove zuak mi 3 laka khat in Rengkai ah nupi khat mualphousak a sawm banah rape tanpha a sawm mawhpaihna leh tunung in hibang thil a tun nawnlouh deihna in Rengkai Women Association(RWA) panlakna in Nov 30, 2013(Kiginni) zinglam dak 10.00 in Lamka Public Ground akipan Tuibuong a DC/CCpur office tan mipi in lamlian zui in processon pai ding uhi. Huai ah kuapeuh vatel chiat dingin RWA makaite’n mipi chial uhi.
Kuki Nampi Taona Silver Jubilee

Lamka, Nov-29: Old Gelmol a Jacob Taona Muol ah tuni’n Kuki Nampi Taona(KNT) kiphuhkhiak nung kum 25 chinna Silver Jubilee zang uhi. Huai hunah IFCD Minister Ngamthang Haokip in Kuki nampi kituahna dinga Pathian kianga thumna lam hahbawl ahiding mah a genkawm in pahtakthu gen hi. Thangsei Haokip, President, KIM in KNT puanlap a khaipalh zawh in, u-le-nau kal a kilemna om theilou pen Pathian kia in hon gawmthei hi’n gen a, thumna lam bahlou a pang zel dingin makaite leh mipi paikhawmte chial hi. Tuni a hunzatna ah lapawl tuamtuam in Phatna la sa uh a, programme zawh in ki-itna ankuang umkhawm uhi.

World AIDS Day zat hiding
Lamka, Nov-29:Dist AIDS Prevention & Control Committee(DAPCC)/CCpur saina in Nov 30, 2013 zinglam dak 11.00 akipan in IB Road a Synod Hall ah ‘Greeting to Zero’ chih thupi a zangin ‘25th World AIDS Day,2013’ zat hiding hi. Huai ah Chief Guest in Rev LB Angam,General Director,ECCI Gen HQ CCpur pang ding a,Functional President in President,Joint Philanthropic Orgn(JPO) pang ding chi’n programme ah om hi.Guest of Honour in SP/CCpur pang ding a, Chief Host in DC/CCpur & Chairperson, DAPCC pang ding hi.
Miss Hoikhokim in Ph.D ngah

Lamka, Nov-29: Miss Hoikhokim Haokip d/o Sajang Haokip & Ms. Hoikhochin Haokip of N.Molhoi, CCpur in Manipur University nuaiah Doctor of Philosophy (Ph.D) ngah a, Dr. Kananbala Sarangthem, Associate Professor, Life Sciences deptt makaihna in Nov 27, 2013 in Ph.D degree piak in om hi. Dr. Hoikhokim Haokip in Doctorate Degree a muhna Thesis bel “ Cyanogenic glycosides and food quality of edible succulent bamboo shoots of Manipur” hi a, amah Ccpur Govt. College a Assistant Professor semlel hi’n kigen hi.

Free Eye camp ah mi tamtak tel
Lamka, Nov-29: Lions & Lioness Club of Imphal leh Lions Club of CCpur Greater pangkhawm in tuni in Sielmat Christian Hospital ah Free Eye Care & Cataract Detection camp sai uh a, huai ah mi tamtak en uhi. Mit lam buaina nei atamluat ziakin registration bawl mi 400 tan registration bawl uh a, Lions & Lioness club of Imphal apan Eye Specialist Dr Rajen Singh, Dr Chaoba Singh leh Dr Bhima te’n en uhi. Tuni a cataract (mitlai mungou) muhkhiat teng Dec 4, 2013 in Lions Eye Hospital, Airport Road, Imphal ah manbei in operation bawl hiding a, damdoi man leh mitbulh bel damloute’n a lei uh ngai ding in kigen hi. Tuni a sum-le-pai senna teng Lions Club of CCpur Greater member 37 in thawhkhawm uh hi’n kigen hi. Mitlam buai tuni a etmanlouhteng tunung a etna din program bawl hiding in gen uhi.

International Topper Thangson

Lamka, Nov-29 Gam tuamtuam 54 apan student siam tungtuan million 2 val te’n English First English Proficiency Index (EFEPI) test a neihna ua Topper-te lakah India apan MBRS, Guwahati student 2 telkha uh a, amaute Thangson Tawmbing s/o K.S. Tawmbing, Class-IX of Bungmual leh Vishek Dutta, Class-X hi uhi.
International Topper 2 te’n EPEFI sponsor-na in UK zuan ding uh a, London, Oxford leh Torbay a university entrance, seminar leh counseling for university application & preparation, immersion in British culture chihte a academic English workshop ah a tel zawh chiang uh Jan 26 2014 in hongkik ding uhi.
Student 2te pahtawina Miles Bronson Residential School, Borjhar, Guwahati ah neihpih uh a, Principal telin Quality Assurance Manager leh Faculty CABE Mr Areef Ahmed leh staff tuamtuam in medal leh pahtawina chi tuamtuam pia uhi.

General Assembly-cum-Election
Lamka, Nov-29: Simveng a SYO Hall ah Dec 4, 2013 zinglam dak 10.00 akipan in United Zou Organisation(UZO) Gen HQ General Assembly-cum-Election om ding hi.UZO Gen HQ a President Manglianthang in UZO flag kaipalh kawm in General Assembly-cum-Election hong ding a,ZCBC a Executive Director Rev Thangginmuanlian in thumna in hun hong ding hi.Huaizawh in UZO Speaker makaihna in March-Dec 2013 sunga makai sisate suunna om ding a, huaibanah UZO President in thugen ding hi.Huaikhit in Election Commissioner vaisaina nuai ah kum 2013-2017 sunga UZO Gen HQ vaipaw ding tel ding uhi.

Gutate’n ESC Secretariat luh uh
Lamka, Nov-29: Guta pawlkhat in Nov 27, 2013 nitakin Chiengkawnpang a ESC Secretariat Building luh uh a, huai ah ‘ESC HQ Church, Chiengkawnpang’ chih kigelh Belpi khap 6 a lian 2 gumang uh a, tuabang belpi mukhate’n ESC makaite’ #9862159376 thuzak dingin ngen uhi.

Youth Engagement Event zang uh

Lamka, Nov-29: Azim Premji University leh Ccpur Govt. College kigawm a saina in Ccpur Govt College ah tuni’n “Youth Engagement Event” zang uh a, Bijoy Sankar Das, Leader District Institute for Learning and Dev in event tawh kisai pulak in, ‘Challenges and opportunities in development sector, Role of Youth in social change, Role of Higher Education in Elementary Education, leh Career Prospective course in Ccpur’ chih thupi tuamtuam tungtawn in student-te sinsak uhi.

Loan hawmsawm lai khawlsak

Lamka, Nov-29: Jyoti Multipurpose Devt Society pawlin Mumbai a Nariman Point pansan Edision Finance Corpn (EFC) tawh pangkhawm in CCpur district ah loan hawm sawm uh a, district admn in thil omdan hilhchian dingin theihsak mahleh a hilhchian tuanlouh ziakun thuchian om masiah loan hawm theilou ding in Dist admn in theisak hi. Jyoti Multipurpose Dev Society a Organiser Ralremruot in Sielmat a a inn pansan a loan khawmkhiat a sawm teitei ziakin Dist admn leh Police pangkhawm in tuni sunnung in document poimawh teng laksak in amah leng pikhia(pick-up) uhi. Ralremruot apan kizadan in CCpur dist ah loan applicant 100 val om a, loan lakna ding form bel hawmkhe nailou uh hi’n gen hi. EFC in mipi lak ah loan hawmthei ding mah hiam chih thuchian om masiah document teng Police khut a om ding hi’n district admn theisak uh a, document-te awla piakkik ding a theisak in Lalremruot khah nawn uhi.

Hauginlian Tonsing album thak hong
Lamka, Nov-29: Hau Ginlian Tonsing of Vengsak, Pearsonmun in a bawl 'Hondampa Hoih' kichi Music Video Album thak tuni nitak dak 7:00 in SSSI Auditorium JNU, New Delhi ah hon in om hi. Huai album bel D. Kamkhanmang, New Delhi in apa (late) D. Dampu leh anu (late) Nengkhongai phawk tawntungna dia a sponsored hi a, lasiam Hau Ginlian, V. Hangpu, Mung Guite leh Mwanlal Tunglut in la tuamtuam 10 a sakkhawm uh hi’n kigen hi.

IMPHAL NEWS
Tuni’n Cabinet meeting om
Imphal, Nov-29 : Chief Minister O. Ibobi makaihna in tuni nitaklam dak 3.00 akipan nitaklam dak 5.30 tan CM Cabinet Hall ah Cabinet meeting om a, huaizawh in govt spokesperson M. Okendro, Minister(CAF & PD) in Press-te kimuhpih hi. Aman a gendan in Ministry of External Affairs in Manipur ah Regional Passport office hon dingin zan in thupukna bawl a,tuni a Cabinet meeting in Manipur Assembly Secretariat building lui mallam a annexe building zat phot dinga thupuk hi’n gen hi. Manipur ah Regional Passport honkhiak ahih tawh kiton in Passport buaipih a ni tamtak hun zat ngaisek leng azia omta ding chi’n Minister in gen hi.
Huailou in Food Security Act leng Manipur ah March 2014 akipan zat dingin Cabinet in thupukna bawl uh a,huai tawh kiton in Food Corporation of India(FCI) Regional Office leng January, 2014 sungin Imphal a honkhiak dingin thupuk uh a,temporary office dan in Assembly Secretariat-lui complex mah zat dingin thukim uhi. Manipur Assembly winter session leng Dec 18, 2013 akipan ding in Governor in recommend bawl ding thukim uh a,
Manipur ah Armed Forces Spl Powers Act koihlai theihna ding in Disturbed Area status eng Dec 1,2013 akipan Nov 30, 2014 tan koih touhlai ding in thupuk uh hi’n CAF & PD Minister in gen hi. Huailou in contract basis a semtu kizangte leng Finance deptt in a hun a hihsau(extend)sak ngai nawnlou in a zangtu deptt in fund a neih phot ua administrative deptt in ahun extend thei ding in thupuk uh chi’n Minister in gen hi.

CM in Indoor stadium thak hong

Imphal, Nov-29 : Chief Minister O. Ibobi Singh in tuni in Thoubal District sung a Waikhom Mani Girls College mun ah Indoor Sports Stadium thak kibawl Chief Guest hikawm in hongkhia hi.Chief Minister in a thugenna ah College puahna ding leh sum zatna ding poimawh om hun ah govt apan phalna leh lemsakpihna lak masak zel thil paidan ding dik ahihdan taklang hi. Huai Indoor Sports Stadium honna ah Education Minister M. Okendra leh official tuamtuam tamtak in leng uap uhi.

Manipur DGP MK Das khakna om ding
Imphal, Nov-29: MK Das, IPS, Director General of Police(DGP) a sepna(service) akipan Nov 30, 2013 in a khawl(retire) ding ziakin Nov 30, 2013 zinglam dak 9.00 akipan in 1st M/R parade ground ah Home deptt vaisaina in amah khakna programme leh ceremonial farewell parade kithuah om ding a,huaizawh zinglam dak 11.00 in DGP in a office ah Press-te kimuhpih ding chihthu kiza hi.Manipur govt in tuni tan in DGP thak ding order suah naikei mahleh tulela IPS officer omte lakah MK Das bana senior most IPS Officer bel Shaheed Ahmed,IPS,tulela Managing Director, Manipur Police Housing Corporation(MPHC) hi’n kigen hi.

Sangai Festival,2013 hunkhakna
Imphal, Nov-29:Sangai Festival,2013 beina ding ni 1 lel omni tuni’n Hapta Kangjeibung a Sangai Festival omna mun lun deuhdeuh lai a,mipi tamlua control haksa khop in Police duty-te buai uhi. Bheigyachandra Open Air Theatre(BOAT) a cultural performance ah Myanmar leh Thailand artiste performance kilawm mahmah a, huai en nuam mipi leng tam petmah chih ahi hi.Huailou in China gama Zhejiang Provincial Committee a Vice-Chairman Chen Jiayuan makaihna in China apan delegate 7 in tuni’n Sangai Festival, 2013 zatna mun pha uh hi’n kigen hi. Hapta Kangjeibung leh BOAT ah Nov 30, 2013 nitaklam dak 3.30 in ni 10 sung om Sangai Festival,2013 hunkhakna(closding function) om ding a, huai ah Chief Minister O. Ibobi khuallian in pang ding hi.

Imphal East ah 144 Cr PC kipuang
Imphal, Nov-29: Jiribam sub-divn telin Imphal East district sung pumpi ah 144 Cr PC koih hiding chi’n District Magistrate/Imphal East thusuah hi.Thusuak in a gendan in muanna leh bitna dinmun hihse om hi a, report ngah ziakin Dec 1, 2013 akipan Dec 31, 2013 tan 144 Cr PC koih hiding in kigen hi.Huai hunsung in pawlawm muh khat ah mi 5 sanga tamzaw om khawm phal hilou ding a, police duty-te leh security personnel-te chihlouh kuama’n hiamhei leh galvan tawikhe theilou ding hi’n Dist Magistrate thusuak in gen hi.

Sangai Festival ah guta 4 kimankhia
Imphal, Nov-29:Sangai Festival ah tuni in Police te’n guta(shop lifter) mi 4 mankhia uhi. Mat a omte ahihleh Aphokpam Premjit (30) of Kongba Bazar; Yanglem Kiran Singh (24) of Keishampat Kalam Leikai; Bipin Singh (24) of Kongjeng Hazari Leikai, Sega Road leh Phokchom Joylal Singh (24) of Khongjom Chingtham Mamang Leikai hi uh a, amau Thailand store ah van gudia kisa lai Police te’n a matkhiak uh ahi hi. Huailou in Sangai Festival sung ah zukham mi 11 Police te’n detained uh chi’n IGP (L&O-I) in Press release ah taklang hi

Lamka ah Bank thak kihong ding
Lamka, Nov-27: Lamka Police station khangzek Tedim Road-Zomi Colony junction kianga building thak ah Nov 28, 2013 zinglam dak 10.00 in Lamka adia Bank thak ICICI Bank Limited hon hiding hi. Huai ah Ms Jacintha Lazarus,IAS, DC/CCpur khuallian a pang in huai Bank thak hong ding hi.

Police te’n court ah dingsak
Lamka, Nov-27:Uttar Pradesh state Meerut khawmi Nafis Malik(26) s/o Md Yusuf Malik in zan zinglam in Rengkai Vengthar ah nupi 1 rape a sawmziak in alawmte mi 2- Parvez Ali (21) s/o Iqbal of Meerut tulelin RK Lane,Tribal Colony om leh Md Thoiba (30) s/o Md Junakhan of Keibung Makha Leikai (Thoubal dist) tulela Old Lambulane a om tawh mipi leh Police te’n mankhia uhi. Police te’n mi 3 te CJM court ah tuni’n ding sak uh a, CJM in Nov 30, 2013 tan Police custody a omding in phalsak a, Police te’n FIR No. 91 (11) 2013 CCP-PS U/S 450/354/511/34 IPC registered uhi.

Lampi tawh kisai meeting omding
Lamka, Nov-27: DC/CCpur office chamber ah Nov 30, 2013 sunnung dak 2:00 in CCpur dist sunga lampi dinmun(roads condition) tawh kisai meeting om ding a, huai ah EE/PWD leh OC 84-RCC BRTF telding uh a, khawpi sung adiak in Tedim Road lampi hoihlou leh mun tamtak lamlian lai kuak tungtang genkhawm ding uhi.
Nov.6, 2013 in makaih in lamlian tawh kisai meeting ah OC 84-RCC BRTF te’n Tedim Road a Police Station kong zero point akipan Lanva lei tan lampi kuakna teng ni 16 sunga minor repairing bawl dingin thupuk mahle uh bangmah sepkhiat om tuanlou in Tedim Road se deuhdeuh hi.

Kuki Nampi Taona Silver Jubilee
Lamka, Nov-27: Kuki Nampi Taona (KNT) kiphuhkhiat nung kum 25 chinna ‘Silver Jubilee’ lopna Nov 28 & 29, 2013 in Jacob Taona Muol, Old Gelmol ah om ding hi. Nov 29, 2013 zinglam dak 9:00 in Rev Dr Sut Khan Thang, Executive Secy CBA in Jubilee suang hong ding a, Kuki Tribe leaders leh Nampi Taona makaite’n Jubilee dakpi khen ging ding uhi. Thangkhosei Haokip, President, KIM in KNT flag kaipalh ding a, Ngamthang Haokip, Adviser, KNT in Jubilee balloon khahkhe ding a, nitaklam in mipi’n Jubilee ankuang umkhawm ding uhi.

Free Eye Camp om ding
Lamka, Nov-27: Lions Club of Imphal leh Lions Club of CCpur Greater panlakna in Nov 29, 2013 zinglam dak 10:00 apan sunnung dak 2:00 sung Sielmat Christian Hospital ah Free Eye Camp om ding a, huai ah Imphal akipan doctor(eye specialist) hunkhop in mitlam buaina neite manbei in ending uhi.

DC/CCpur khakna leh vualzawlna
Lamka, Nov-27: Ms Jacintha,IAS, DC/CCpur leh C. Arthur W,IAS, DC/Tamenglong hongtung ding Dec 2, 2013 in Imphal ah kiteng ding uh a, huaiziakin CCpur district apan MLA teng,MDC leh District Level Officer tengin Nov 29, 2013(Friday) sunning dak 2.00 akipan in DC/CCpur bungalow sak a Guest House ah khakna programme leh vualzawlna ngetsakna(blessing ceremony) kithuah zatpih ding uh chi’n Organising Committee akipan thusuak in gen hi.

25th World AIDS Day zat hiding
Lamka, Nov-27: Dist AIDS Prevention & Control Committee (DAPCC) makaih in Nov 30, 2013 zinglam dak 11:00 in IB Road a Synod Hall ah ‘Getting to Zero’ chih thupi a zangin 25th World AIDS Day 2013 zat hiding hi. Huai ah Chief Guest in Rev L.B Angam, Gen. Director, ECCI Gen HQ; Functional President in T.Goukhomang, President, ZYA Gen HQ; Guest of Honour in L.Mangkhogin Haokip, IPS, SP/CCpur leh Chief Host in Ms Jacintha Lazarus, IAS, DC/CCpur & Chairperson, DAPCC hiding hi. Program hunsung in MSF leh Aimol Red Ribbon Club te’n Special Item neiding uh a, Happiness Home; DOVE Quartet; BYF Dorcas Veng leh EFCI Central Choir te’n Special No. present ding uhi.

VPC Eastern Block kitelna
Lamka, Nov-27: Vaiphei Peoples Convention(Eastern Block) in kum 2013-16 sung vaipaw ding tel uh a, Chairman in Jangneilun leh Vice-Chairman din Lunkam tel uhi.Huaibanah member leh advisor dingin Dr K. Lamneithang Vaiphei(General Secretary); ST. Damlian Vaiphei( Jt Secretary); SL Lunneilal Vaiphei(Finance-Treasurer); Thanglemsiam Vaiphei( Secretary, Statistics); Nekkhup Vaiphei( Secretary, Arts & Culture); Thangbawi Vaiphei(Secretary, Relief & Rehabilitation) ; S. Lamjagou Vaiphei(Secretary, Information); Muanthang Vaiphei( Secretary, Information) ; Kailet Vaiphei( Advisor) ; Lengkhotinlal Vaiphei (Advisor) leh M. Haopu Vaiphei(Advisor) hi’n kigen hi.

Youth Festival ah dist ai-oh in kuan
Lamka, Nov-27: Deptt of Youth Affairs & Sports saina in Khuman Lampak ah Nov 27- Dec 1, 2013 sung ‘State Level Youth Festival’ om ding a, CCpur ai-oh in Zomi Cultural Society (ZOCUS) member 24 tuni’n kuankhia uhi. ZOCUS member te cultural dance, folk song, extempore speech leh guiter kidemna ah telding uh a, Dec 1, 2013 in Lamka hongtung kiknawn ding uhi.

HSA in mawhpaihthu puang
Lamka, Nov-27:Hmar Students’ Assn(HSA) CCpur Jt HQ thusuak in a gendan in zan in Rengkai khawsung ah Gas stove leh gas part zuaka vak kawma numei rape tupna thiltung mawhpaihthu puang uh a,hibang thiltup hoihlou nei gamdang mite akituahpih bang gawtna piak ahih deihthu puang uhi.Tunung in kuapeuh pilvang ding leh hibang thil a om del hun ah leng kintaka kithuza tuah kawma pangkhawm in mi hoihloute ahuntaka mankhiakdan ding lampi ngaihtuah dingin ngetna bawl uhi.

Ahun kikhel nungin tungpan
Lamka, Nov-27:Manipur & Nagaland a tuailaite lak akipan CRPF a Constable (technical/tradesmen) kilakna ding ah Manipur ate’n Nov 11, 2013 tanin CRPF Group Centre, Langjing ah application piak ngai a, huai tawh kisai official letter zan in DC/CCpur office ah tung pan hi. M.Kamala Devi, Under Secy(Tribal Affairs & Hills) Govt of Manipur in Oct 29, 2013 in DC teng ading copy pekhia a, hileleng DC/CCpur office ah Nov 26, 2013 in tung pan hi. Nagaland apan ST ading 46 leh Manipur apan ST ading post 20 reservation om hi.

SUUNNA
Upa Soizakai(88) of Kangvai teknat ziakin zan nitaklam dak 4.00 in si a, tuni’n Kangvai hanmual ah kivui hi.
T. Khambiakmuan(39) s/o (late) T. Ginkhopau of Laiveng, Bungmual zan nitak dak 12.00 velin Imphal apan innlam zuanlai sungna ziakin si a, tuni’n Bungmual hanmual ah kivui hi.

GAS
Agency Name: Haran Valley, Kwakta
Booking from Oct 10- Nov 4, 2013. Stock 306
Delivery date: Nov 28, 2013. Time 8:00am-11:00 am

IMPHAL NEWS
Sangai Festival,2013 hunkhakna
Imphal, Nov-27: Manipur Sangai Festival, 2013 apaisa Nov 21, 2013 akipan Hapta Kangjeibung a om Nov 30, 2013 nitaklam dak 3.30 in Hapta Kangjeibung & Bheigyachandra Open Air Theatre(BOAT) ah hunkhakna(closing ceremony) om ding a,Chief Guest in Manipur Chief Minister O. Ibobi pang ding hi. Huai ah Functional President in Dy Chief Minister Gaikhangam pang ding a, Guests of Honour in Assembly Speaker Th. Lokeshwar Singh; NEC Ministry of DoNER a member Madan Prasad Bezbaruah,IAS(retd); Manipur Chief Secretary PC Lawmkunga,IAS; NEC Secretary Ameishing Luikham,IAS; Manipur DGP MK Das,IPS leh Ministry of Tourism a Addl Secretary Girish Shanker pang ding uhi.

Chief Minister O. Ibobi in Ibudhou Marjing Pony sanctuary mun pha

Imphal, Nov-27: Chief Minister O. Ibobi in tuni’n Imphal East district sunga IbudhouMarjing Pony Sanctuary mun vapha in huai mun a om ‘Pony’ kichi sakol chikhat omte dinmun enkhia hi. Huai mun a om Manipur a Pony ten kiamlam nawt uh a, hoihtak a humbit ahih keileh mangthang thei dinmun a om hidan in gen hi. Manipur ah kumteng in International Polo tournament om gige a, huaiziakin Manipur a Pony omte humbit sawma panlak hi’n gen hi. Tulelin Manipur ah Pony 700 vel om hi’n gen a, Ibudhou Marjing Pony Sanctuary puahna ding in gam acres 300 alian poimawh a, tua dingin akim a gam neite tawh state govt in kihouna nei lel uh hi’n leng gen hi. CM in sanctuary ah Race Course leng koih hidi’n gen hi. CM in huai mun a phakna ah Vety & AH Minister K. Govindas, N.Biren,MLA banah USA, Germany leh Thailand apan Polo players te’n zui uhi.

Thoubal Police ten M/R 2 telin mi 5 apan khamtheih tamtak mankhia
Imphal, Nov-27 :Lilong PS huamsung Lilong Usoipokpi mun ah Thoubal Police te’n zan nitak dak 7:00 velin Imphal apan Moreh zuan Maruti Gypsy (No. MN-1X/4234) leh Ford Icon (No. MN-07B/6275) a check ua leh khamtheih tamtak mukhia uhi. Khamtheih a matte uh international market ah Rs. 15 crore vel manzou ding in kigen hi.Gari atuang Onlal Haokip(41) tulel a New Checkon a om 8th Manipur Rifles a Jamadar hi a, Chandel district sung Leikun post a om banah Lulun Haokip(27) tulelin Langol Gaes village a om amah leng 8th Manipur Rifles a rifleman matkhiak hi un kigen hi. Amau akithuahpih uh Mrs. Vahkin Haokip (30) of Pallel Bazar,Mrs. Chichiin Haokip (49) of Pallel Bazar leh Ford Icon driver Jamkhosei Haokip (27) of Moreh leng matkhiak hi uh chihthu om uhi. Amaute tuni nitaklam in media-te ma ah lahkhiak in om uhi. Akigendan in zan nitak a Moreh a zotna lam un Thoubal SP makaihna gari-te tawh kituak kha in taisia uh a, Police te’n delhzui pah in Lilong Usoipokpi mun ah delhpha uh a, Police te’n a check ualeh damdoi khamtheih tamtak mukhia uh chih ahi hi.

Myanmar apan hongzinte CM in mu

Imphal, Nov-27: Manipur mi hunkhop Myanmar gama khawsa tutung Sangai Festival uap kawma Manipur hong phate tuni’n Chief Minister O. Ibobi in CM Secretariat ah kimuhpih hi. Huai hun ah Myanmar apan hongzin delegate- te Kakchingtabam Sundergopal Sharma in makaih a, CM tawh thu tuamtuam genkhwm uhi.
PREPAK leh UNLF 1 tuak mankhia
Imphal, Nov-27 : Imphal West Police Commando te’n mun tuamtuam search operation a bawlna uah PREPAK leh UNLF member 1 tuak mankhia uhi. Thusuak in a gendan in Nov. 25 nitak in PREPAK active member Sougrakpam Ibotombi @ Sudon(36) of Mongsangei Maning Leikai matkhiak hi a, amah akipan in 7.66 pistol 1, magazine 1 leh atang 1 banah mobile phone 1 mukhia uhi. Tua zawh in UNLF atel Thounaojam Bachan Singh @ Achouba (30) of Heirangoithong a tenna inn ah mankhia uh a, amah akipan in Chinese hand-grenade 1t mukhia uhi.

Keibul Lamjao Cycle tour flag- off

Imphal, Nov-27 : Manipur Sangai Festival tawh kisai a Manipur Cycle Club-te saina in tuni in Keibul Lamjao Cycle tour flag-off in om hi. Huai cycle tour bel Tourism deptt.inntekna a Manipur Cycle Club te’n a sai uh hi a, tuni in Imphal Hotel mun ah cyclist 15 ten Keibul Lamjao National Park zuan uhi. Amau ni 2 sung Loktak lake area ah cycle tour in pai ding uh a, Bishnupur Municipal Council a Chairperson Laishram Lolindro leh a staff ten Bishnupur mun ah cyclist-te ana zintun uh a, Moirang ah Blooming Moirang a staff M. Shivaraj, M. Sarat, K. Charanjit leh a teamte’n ana zintun ding uhi. Cyclist te’n Moirang bazaar a Ima Keithel mun a pak omte tui buak ding uhi. Tuni a cycle tour ahihleh Keibul Lamjao National Park a om Sangai-te hoihtaka kepbit poimawh ahihdan taklatna ding a awareness thehdalhna a neih hidan in kigen hi. Nov. 30 in MCC-te saina in Imphal khawpi sungah cycle tour neih hi nawn ding hi.

Transfer/posting
(SUB-DEPUTY COLLECTORS)
1.Alfred Jamlallun Khaute Khaute,SDC on return from training as SDC/CCpur.
2.Lalthanzam Fimate,SDC on return from training as SDC, SDO/CCpur office.
3.Lalthazam,SDC on return from training as SDC, DC/CCpur office.
4.Solomon Lalneilien Fimate,SDC on return from training as SDC, Parbung(Tipaimukh).
5.Elangbam Amuthoi Khanganba,SDC on return from training as SDC, Henglep.
6.Kaigoulal Kipgen,SDC n return from training as SDC, ADC/Kangpokpi office.
7.Lunminthang Haokip,SDC, ADC/Kangpokpi office as SDC, DC/CCpur office.
8.Chunglenmang Kipgen,SDC, DC/Imphal West office as SDC, DC/Bishnupur office.