Chief Minister in DGP kiangah thupiak khauhtak pia. State Government in Sangai Festival kisakkholhna enkhia.
Imphal, Nov-18: Chief Minister O Ibobi Singh makaihin tuni in state govt a top official te’n Sangai Festival om ding tawh kisai kisakkholhna enkhia uh a, festival lawhchingtak a om theihna dinga panla chiat dingin a kisaipihte thuhilh uhi. Chief minister in heads of departments teng kiangah a mawhpuak uh sem buching chiat dingin theisak a, Nov 21, 2013 akipan ding ‘Sangai Festival’ pe’n nop bawlna mawk hilou in omze neitak a zang ding in theisak hi.
Chief Minister O. Ibobi in official conference neihna hunah Chief Secretary PC. Lawmkunga, Additional Chief Secretary, DGP Manipur banah Principal Secretaries, Commissioners leh Tourism, Commerce &Industries, PWD, Power, Law and Legislative Affairs leh department tuamtuam apan Commissioner-te tel uhi. Tua hunah, department tuamtuam apan top official te’n Sangai Festival tawh kisai kisakkholhna report pia uh a, tulel paidanin Chief Minister lungkim mahmah chih ahi hi. Chief Minister in tuni nitak zan nungin DGP Manipur, MK. Das kiangah Sangai festival lawhchingtak a zat ahihtheihna dinga panla dingin theisak chihthu om hi. Das in leng tuni nitak nung mah in Chief Minister’s official bungalow a Mini Secretariat ah high security meeting sam ngalin IGP- Zone-I Kailun kiangah mawhpuakna piak khit ahih dungzui a na hoihtaka semding in theisak nawn a, huai ah IRB leh MR apan Bn CO teng telkim uh chih ahi hi. Imphal area himhim ah security hih khauh hiding a, traffic paidan leng bawl lamdang hiding chihthu om hi.
DC/CCpur leh DC/Tamenglong kiteng ding.
Lamka, Nov-18: Ms Jacintha Lazarus, IAS, DC/CCpur leh C. Arthur W, IAS, DC/Tamenglong hongtung ding Dec 2, 2013 in Imphal ah kiteng ding uh a, sunnung dak 1:30 in Chingmeirong a Don Bosco Ground ah wedding reception program om ding hi. Ms Jacintha Lazarus in Sept 10, 2009 in CCpur dist a, DC 33na ding in hong joint a, kum 4 leh kha 2 val DC/CCpur hihna len a, DC/CCpur hihna len sawtpen hilai hi. Amah Chennai a om Suthanthirasingh & Mrs S.Esther’ tanu hi a, a pasal ding C.Arthur W. IAS, DC/Tamenglong ahihleh (late) C.Peter, IPS, Addl DGP & Mrs C.Sujatha’ tapa ahi hi.
K.Moses Chalai in Singngat pha.
Lamka, Nov 18: CCpur leh Bishnupur district a Electoral Roll Special Summary Revision 2014 adia observer K.Moses Chalai, IAS, Commissioner in tuni in Lamka hongpha a, DC/CCpur tawh Singngat khua pha uhi. Huai ah SDO/Singngat leh election deptt te'n zui uh a, Special Summary Revision 2014 tawh kisai SDO-te nasepdan enkhia hi. Election Observer in Singngat apan Lamka hongtun kik hun ah DC’ residence sak a Guest House ah an ne a, huai zawh nitaklam dak 3:00 in DC office chamber ah Addl DC/CCpur, SDO teng leh Election deptt-te tawh joint meeting nei uhi. Moses Chalai in SDO te’n Special Summary Revision 2014 tawh kisai hoihtak a semkhia uhiam chih telin nasepdan tuamtuam dotna bawl hi’n kigen hi.
15th School Annual Day zang.
Lamka, Nov 18: Leijangkhawpi a om H.M English High School ah tuni in ‘15th School Annual Day’ zang uh a, DC/CCpur khuallian hiding himahleh ahawh theihlouh ziak in Maniram Sharma, IAS Addl DC/CCpur pang a, Functional President in L.Mangkhogin Haokip, IPS, SP/CCpur pang hi. Huai hun ah student te'n item tuamtuam lahna nei uh a, HSLC examination 2013 a passed te pahtawina leng om hi.
SP/CCpur in agenna ah student-te laisimna a lawhchinna din tupna hoihtak nei ding leh huai tangtunna dingin chitak, kuhkal leh tupguh hoihtak neia laisim dingin hasuan hi. Student te'n khawtang leh saptuam program ah kihel hun ah leng hun zatdan siam dingin hasuan a, nu-le-pa zahtak ding, huai tungtawn a Pathian apan vualzawlna leh lawhchinna hong luanglut ding hi’n gen hi. HM English school apan HSLC examination 2013 a passed mi 30- 1st division ah mi 15 leh 2nd division a mi 15te SP/CCpur in memento pia hi.
ATSUM volunteer-te’n office 2 chabi kalhsak.
Lamka, Nov 18: Muan Tombing makaih All Tribal students’ Union Manipur (ATSUM) pawlin govt in sepkhe dia a thilphutte uh sepsuahlouh a om lungkimlouh latsakna in hill district teng ah kiphinna pan uhi. ATSUM te’n ROTO (Reckoning Of The Other) pansan in National project a nasepnate khawlsak uh a, state govt tungah leng lungkimlouhna langsak uhi. Tuni zinglam in ATSUM volunteer te’n ZEO office leh SDO/CCpur office khaksak uh a, hileleng Police te'n chabi kikalh teng khensia in office staff-te ngeina bangin office kai uhi.
ATSUM demand-te lak ah Education tawh kisai Hill district tengah teaching & non-teaching staff kiching koihding, school omte ah infrastructure bukim koih ding, Hill dist teng ah B.Ed centre koih ding, Health tawh kisai in PHSC, PHC leh CHC te hoihtak a function sak ding, Hill district a Dist Hospital tengah Specialist doctor, Nurse kiningching leh equipment bukim koihding, ST tawh kisai atuam a State Commission omsak ding, singtangmite rights leh natural resources teng kepbit ding, Indian Constitution under 371 C tungtawn in Hill Areas Committee function sak ding, tulel a ADC member te NE state danga ADC member te tawh kikim a power piak ding, chih telin thil tuamtuam demand uhi.
DTO office ah car Mela om.
Lamka, Nov 18: Rajpri Enterprise, Chingmeirong Imphal-te' saina in tuni zinglam apan Dist Transport office ah Chevrolet Car Loan Mela om a, Chevrolet company kipan gari bangzah hiam mipi leitheih dingin koih(display) uhi.
Uihai (mad dog) keih ziakin mi 3 si.
Lamka, Nov 18: Dr HL Liensang, CMO apan kizadan in ni bangzah hiam paisa in Tipaimukh area a Taithu leh Lungthulien khua ah uihai (mad dog) khat in mi 10 val akeih nung in Taithu khua ah Nov 8, 2013 in mi 2 si a, Lungkhulien khua ah Nov 16, 2013 in mi 1 si hi’n gen hi. Huai uihai pen Lungkhulien khua apan Taithu khawmi khat in a lei hi a, Taithu khua ah mi 10 val kei a, huai zawhin ui neitu inleng deih nawnlou in Lungthulien khua ah pekik nawn a, huai khua ah leng mi bangzah hiam kei hi'n kigen hi.Huai uihai bel Lungthulien khua ah si hi’n kigen hi. CCpur dist kia hilou in Manipur a Sekmai leh Thoubal area ah leng ui hai (mad dag) om ziakin kuapeuh pilvang dingin Director of Health Services in order suah hi.
3rd Party Monitoring Team.
Lamka, Nov 18: Singngat leh Thanlon sub- divn a Border Area Development Program (BADP) 2012-13 nuai a development works tuamtuam kisemte enkhe ding in BADP a 3rd Party Monitoring Group -Good Samaritan Foundation apan member 2 leh Zomi Mothers' Assn Gen HQ apan member 2 te'n Nov 19, 2013 in Lamka apan zinkhe ding uh a, Singngat area ah BADP fund tungtawn in na kisem taktak hiam chih amun ah enkhe ding uh a, Singngat area apan Thanlon area, huai akipan Tipaimuh Road zui in ni bangzah hiam huai bial a nasepn enkhe ding uhi.
A/R te’n USRA Chief’ inn buluh.
Lamka, Nov-18: Tuni zingsang baihtak dak 1:11 velin 7th Assam Rifle te’n B. Phaicham a teng USRA Chief ban ah KNO Vice President Lalminthang Vaiphei tenna in luh(raid) uh a, van bangmah matkhiak bel neilou uh chihthu kiza hi. Lalminthang’ zi Ngaikim in a gendan in zingsang dak 1:11 velin 7th Assam Rifle-te’n inn compound gate tung apan tawmkhia in, innsung a room teng zon nei hileh kilawmtakin pholh uh a, himaleh bangmah a muhlouh tak un zingsang dak 2.00 velin paikhia uh chi hi. Inn neipa a pasal Lalminthang bel Delhi azin laitak hi’n gen hi. Thiltung tawh kisai ah KSO-CCpur in poisakthu puang uh a, pawl tuamtuam tawh SoO omlai a hibang numei-naupang patausak thei ding a A/R te gamtatna mawhpaih thu puang uhi.
Ngeina bangin nasep sunzom.
Lamka, Nov-18: Directorate of Health Services thusuak in Lamka a Private Clinic 6 om lakah 3 in Private Clinic hong thei ding in Manipur Nursing Home & Clinic Registration Act 1992 & 1993 hoihtak nei uh a, adang 3 in neilou a chihte laka telkha People’s Health Foundation(PHF) Nursing Home a Dr (Mrs) Didim in a gendan in Nov 2013 kha sunga registration zousiang dinga hun piak ahih dungzui un zoufel ding uh hi’n gen a, huai dungzui in PHF leng ngeina banga kihong in nasepna paizel hi’n gen hi.
Covenant School ah Career Guidance.
Lamka, Nov-18:G. Mualkoi a om Covenant School te’n tuni’n G. Mualkoi PCI(R) church ah ‘Career Guidance on Banking’ nei uh a, huai ah S. Kaikhanthang Ngaihte, Chief Manager, SBI/CCpur Branch in Class VIII-Class X kikal student paikhawmte sinsak hi.
Village Water Sanitation Awareness.
Lamka, Nov-18: Lenlai Dev Orgn, Good Samaritan Foundation, Guite Kual Area Youth Dev Society leh PHED/ CCpur Divn pangkhawm in Tuibuong a District Training Centre ah tuni in ‘One Day Awareness – cum-Training of Village Water & Sanitation Committee’ nei uhi. Huai ah L. Ibomcha Singh, Suptd Engineer, Rural Circle – I, PHED ; L. Swamikanta Singh, Director, CCDU, Manipur; Ph. Yaima Singh, Suptd Engineer, Planning & Monitoring, PHED leh Devenkanta Singh, Chief Chemist, State Laboratory, Lamphelpat PHED te’n thupi tuamtuam pansan in sinsak uhi. Awareness training atel din Thanlon sub-divn, Singngat sub-divn leh Saikot sub-divn akipan Village Water & Sanitation Committee member hunkhop tel uhi.
SUUNNA:
1. Kaimuanlal (31) s/o G.Biakhlun of Mission Veng, Singngat zan nitak dak 8.00 velin si a, tuni’n Singngat ah kivui hi. Kaimuanlal in azi leh ta 2 nusia hi’n kigen hi.
2. Paulianthang (18) s/o Mangkhanpau of Teikhang village, Mizoram tuni sunnung dak 1.00 in Chennai ah si hi. Aman tulelin NALAAS Restaurant, Chrompet, Chennai ah sem a, aluang Chrompet Police Station puaktung hi a,ZYA Chennai Region leh pawl tuamtuam in buaipih uhi.
***********************************************
IMPHAL NEWS:
Cabinet Meeting om ding.
Imphal, Nov-18: MBBS/BDS Entrance Examination 2013 tawh kisai a thubuai-labuai khenkhat koihdap kawmin state cabinet in maban a MBBS/BDS entrance test tawh kisai genkhawm ding uh chihthu om hi. Chief Minister makaihin Nov 19, 2013 (Sepnawnni) in Manipur MBBS/BDS Entrance Examination, 2014, All India Pre Medical Test (AIPMT) 2014 tungtang houlimna neiding uh chihthu om hi. Thusuak kingahdanin, Nov 19 nitaklam dak 3 in CM Secretariat a Cabinet hall ah Cabinet meeting om ding a, tuazawh chiangin, Autonomous District Council- te’ thuneihna tawh kisai etthakna leh Manipur IT Project Developmet Company (MIPDCO) min khen ding tungtang banah Electricity deptt a SO-I (Elect) mi 24 te amau dinmun mah piak nawn ding tawh kisai genkhawm ding uh chihthu kiza hi.
Ukhrul ah bomb puak: BRTF 6 liam.
Imphal, Nov-8: Ukhrul district a BRTF HQ mun ah tuni nitaklam dak 3:30 velin bomb hattak khat puakzak a, huai ah BRTF personnel 6 liam uhi. Thusuak kizadan in bomb puah hun in BRTF-te Truck innlam a pailai sungah BRTF personnel bangzahhiam tuang uhi. Huai bomb pen lampi a kiphum gu hidinga gintak hi a, Truck atuang mi 6 naktak in liam uhi. Aliamte kintak in Ukhrul District hospital puaktung hi uh a, agim diakte Imphal a Shija Hospital leh RIMS adia refered in om uhi. Ukhrul ah khakhat sung a bomb 3vei a puahna hi a, thiltung tawh kisai akipuang omlou hi.
Planning Commission in funds release ding in chiam.
Imphal, Nov-18 : Planning Commission a Senior Consultant Vikram Srivastava, Sr. IPS in ni 5 sung om dingin Manipur hongpha hi. Aman SPA, ACA leh Central Sector a projects nasepna tuamtuam ading funds release louh a omte a kinlam a release hiding in chiam hi. Aman Chingmeirong a Capital Project a etkhiak banah nasepna leng enkhia hi. Bishnupur, Senapati leh CCpur district a Mini-Secretariat building kibawlte a etkhiak banah LDA ten Loktak lake a Phumbi(biomass) a hahsiangna nasep uh leng enkhia hi. Huai banah, Thoubal Multipurpose Project, City Convention Centre, JNIMS leh Jiribam-Tupul-Imphal Railway-te leng enkhia hi.
BJP President in Mizoram pha ding.
Imphal, Nov-18 : BJP Manipur Pradesh a makai mi 4 in tuni’n Mizoram zin uhi. Amau Mizoram ah Nov. 25, 2013 a assembly election om ding ah BJP candidate te adingin campaign ding uhi. Huailou in BJP National President Rajnath Singh in Nov. 23, 2013 in Mizoram pha ding chi’n BJP Manipur Pradesh a Secretary L. Bashanta Sharma in press release suah hi. Tuni a Mizoram azin BJP Manipur Pradesh makaite bel Sh. Premananda Sharma, Gen. Secy. (Office); Ksh. Bhabhananda Singh, Gen. Secy. (Election Affairs); Yanglet Haokip, National Council Member leh Hmanglienkhuma Hmar hi uhi.
Ningthem Pukhri ah numei sisa kimukhia.
Imphal, Nov-18 : Porompat PS huamsung Ningthem Pukhri ah tuni zinglam dak 9:00 velin akim a omte’n siluang khat mukhia in police ah report uhi. Tua tawh kiton in Porompat Police te’n amun delh pah uh a, zinglam dak 10:30 in lakhe thei uh a, JNIMS morgue ah koih uhi. Misi luang bel numei hi a, kuahiam chih theihchet hinailou hi’n kigen hi.
Labourers award hawmkhia.
Imphal, Nov-18 : Manipur Industries Union (MIU) ten tuni’n Manipur Press Club ah 35th Foundation Day zang kawm in ‘1st Ingudum Birachandra Memorial MIU Sinmee Award 2013’ hawmkhia uhi. Huai hun ah V. Tualthang, Addl Director of Commerce & Industries, khuallian a pang in aman Award-te pekhia hi. Nasem( labourer) mi 3-Sanasam Nabachandra Singh, Keithelakpam Robindro leh Telem Gunamani in First Ingudam Birchandra Memorial MIU Sinmee Award-2013 ngah uhi.
MNPF te’n amau thilhih hi’n puang uh.
Imphal, Nov-18 : Manipur Naga People’s Front (MNPF) ten tuni a Press release a suahna uah Nov. 15, 2013 a TNL office a bomb hihpuak amau hi’n kipuang uhi. Thusuak kimu in a genna ah MNPF a Pub. Secy. Thomas Newmai in MNPF a demolition team te’n bomb ahih puak uh hi a, amau TNL banga NSCN(IM) nuai ah omlou uh a, TNL pen Tangkhul mite a ding a platform ahih ziakun kuamah tawh kikawi theilou ding uh hi’n gen hi. Huai banah tulel a TNL President Artax Shimray ni 10 sunga ahihna akipan a kitawp ding, a huchih kei a leh atung ah action khauhtak lak hiding in taklang uhi.
RIMS a ceiling kichim.
Imphal, Nov-18 : RIMS a Special Ward (Old Deluxe) room No. 7 ah tuni zingkal dak 7:00 in ceiling tung kichim a, room sunga om major operation kibawl Ningthoujam Olkhelia (48) w/o N. Joshobanta of Sagolband Sayang Leikai a lupna a omlai himahleh vangphat huaitak in hihkhalou vanglak hi’n kigen hi.