ZYA block office honna leh Get-together
Lamka, Dec-1: H.Mangchinkhup, EM/ADC in khuallian apang in tuni sunnung in New Lamka(G) a L.Khamzalian tenna inn ah ZYA Lamka block office hongkhia a, Dr R.Sanga, Adviser, ZYA Lamka block in thumna in lan hi. Huai ah Chief Host in T.Goukhomang, President ZYA Gen HQ pang a, Special Guests in M. Gouzamang Guite, EM/ADC; V.Khaikhanmung, MDC leh T.Sumlianthang, MDC pang uhi.
Khuallian in agenna ah Lamka khawpi khangtoulou bang mahleh khanghat mahmah a, lusunna leh buaina tuah hun a panla dingin ZYA-te poimawh mahmah hi’n gen hi. President,ZYA Gen HQ in agenna ah ZYA Gen HQ adingin ZYA Lamka block pen inn khuampi tawh kibang ahihban ah khut-leh-khe hi’n gen hi. ZYA Unit tuamtuamte ahat ua leh Block leng hat a, block a hatchiang in Gen HQ hat hi’n gen hi. V.Khaikhanmung in ZYA Lamka block-te zatding in Parachute 1 pia hi. Office thak honzawh in ZYA Gen HQ, Block makaite, Adviser-te ban ah MDC te’n kithuahkhawmna leh ankuang umkhawmna nei uhi.

GBC ah Graduation Service om ding
Lamka, Dec-1: New Lamka a Grace Bible College(GBC) campus ah ah Dec 7, 2013 zinglam dak 11:00 in GBC Graduation Service 31veina om ding a, Rev Dr Richard Howell, General Secretary, Evangelical Fellowship of India(EFI) in graduate zouthakte hasotna thu gen ding hi. Rev.Dr.Kamkhanthang, Principal, GBC in graduate thakte degree peding a, Rev. S. Vungminthang, General Secretary, EBC in graduate thakte adi’n thumsak ding hi. Tutung in GBC ah akigawm in mi 54 graduate ding uh a, huaite Master of Divinity 17, Bachelor of Theology 32 leh Diploma in Theology 5 hiding uhi. Principal, GBC in huai hun uap dingin GBC deihsaktute tengteng leh adiakin Patron member-te chial hi.

Auto-pute’n lampi kuaknate bawl
Lamka, Dec-1: Vengnuam, New Lamka apan Dist Hospital, Mission Veng, Manniang khua kawmtuaha tai Diesel-Auto pawlin tuni’n Mission Veng leh Manniang khua kikala lampi hoihlou leh akuaknate bawl in social work nei uh a, vengsung mipite kipak mahmah chihthu kiza hi.

Traffic rule bawhsia 24 mankhia
Lamka, Dec-1: Lamka Police, Traffic Police leh VDF kigawmte’n Nov 25-30, 2013 sungin Lamka khawpi sung mun tuamtuam akipan traffic rule bawhsia 24 mankhia in liausak uhi. Traffic rule leh gari park dingdan banah 2-wheeler hekte’n Helmet khuk chiat ding chih dan kizang bang leng theihsa himahleh a bawhse teitei pawl om hige hi’n kigen a,mipi adia hoihzaw ding leh bitzawkna dia dan kibawl kizangte mi luhlul khenkhat in bawhsiat teitei tum uh hi a thei in Traffic Police khenkhat in lamdang sahial uhi.
Kikim Changsan in FAO sepna mu

Lamka, Dec-1: Assam Public Service Commission (APSC) nuaia Assam Finance Service exam result suak ah Miss Veijakim Changsan @ Kikim Changsan in Finance Account Officer (FAO) dingin lawhching hi. Aman tulelin Assam Secretariat ah sem a, KSO Guwahati a active member ahihbanah KSOG Finance- cum- treasurer (2012-13) leh Sunday School Teacher (kum 2009 akipan tutant) a pang hi’n kigen hi. Huailou in Gauhati University nuaia MA (History) 1st Class ah 4th position la chih ahi hi.

60th Annual Council 2013 om ding
Lamka, Dec-1: Chiengkonpang a Synod HQ Church ah Dec 4- 9, 2013 sung Evangelical Synod Church (ESC) ‘60th Annual Council 2013’ om ding hi. Huai ah Rev T.Kampu, President AAS; Rev Henkholien; Rev Khaigin Gangte leh Upa LS Gangte, Chairman ESC in Pathian thu gending a, devotion ah Rev Thangkhosiem, Evan Khailalsiem leh Z.Malsawmlien te’n makai ding uhi. Annual Council om sungin Synod makai ding telna leng om ding a, Dec 9, 2013 kikhop tawpin Rev K.Lampu, Shillong in Council khak (close) ding hi.

EBC Kumsim Khawmpi 65veina om ding
Lamka, Dec-1: Hiangtam Lamka a EBC biakinn ah Dec 7-10,2013 sung Evangelical Baptist Convention(EBC) Kumsim Khawmpi 65veina om ding a, Dec 7, 2013 nitak in Rev L.Kham Kho Lun, Director(Missions) in hong ding hi. Khawmpi sungin Rev Dr Richard Howell, General Secretary, EFI leh Rev Dr Ginnei Thang Ngaihte, OMF, International, Bangkok in thugen ding uh a, Rev Dr Ginnei Thang Ngaihte in Bible study ah makai ding hi.
Dec 8, 2013 sunnung a Ordination Service ah Pastor 7 leh Upa 26 te Rev S.Vung Minthang, Gen Secy EBC in ordination pe ding a, Upa T. Langzathang, Khawmpi Chairman in certificate peding hi. Dec 9 nitak kikhop ah semtu pensioner 6te kiang ah Upa G.Thangchinlian, Chairman BOT in pahtakna(Meritorious Award) peding a, Dec 10 nitak in Upa 14te kiang ah Upa T.Langzathang in Pahtakna lai pekhe ding hi. Dec 9 &10, 2013 zinglam apan in Khawmpi palaite’n business session neiding uh a, EBC sum zatding zah genkhawmna, Khawmpi 66na a Uliante telna leh thu tuamtuam genkhawm ding uh a, Dec 10, 2013 nitak kikhop zawh in Rev V. Thangkhangin, Director(Instn) Khawmpi khak ding hi.

Gari accident ziakin liam
Lamka, Dec-1: Lalremrout (23) s/o Thangchungnung of Rengkai tuni sunnung in Khawmoi ah bike a tuanglai tuahsia in liam a, anak(nose) leh mundang dang liam in Dist. Hospital ah etkol n om hi.

ZDV in theihsakna thupuan bawl
Lamka, Dec-1: Caleb Thang, Secretary(Info & Pub)/ZDV Hq in thupuan a bawlna ah UPF nuaia SoO atel ZDV President Kamkhanpau makaihna in Zomi namsung a Zou community sungah lungsim a ki-itna, kituahna leh kilainatna kepbit gige ahih deihthu puang a, Zou community omna Zou village chiefs, contractor-te,politician-te leh bureaucrate-te lakah kuaman demand/extortion pelou din theisak a,Zou Suankhual Pawlpi min in Zou village chief-te kuaman sam theilou ding leh sum ngetna leng tawpsan dingin a theihsak banah ZDV in hun paisa ah ZDV min a thusuahte theihpihlou hi’n puang hi.Huailou in SoO ground rule kalh a nasep leh thilhih himhim tunung in khauhtaka dal(dealt) hidin leng puang hi.

SUUNNA
Th. Ginzalal Simte(45) s/o Th. Khupzagin of V. Munhoih hun sawttak damlou a om tuzing dak 4.00 in si a, tuni mah in Simveng hanmual ah kivui hi. Th. Ginzalal Simte bel Tipaimukh Road Area Transport Dev Assn(TRATDA) a Secretary l hi’n kigen hi.

IMPHAL NEWS
Political party-te tuni’n Delhi ah
Imphal, Dec-1: Indo-Myanmar border fencing tawh kisai a Central leader-te kimuhpih ding in tuni’n Chief Minister O. Ibobi makaihna in All Political Party leader-te Delhi tung uhi. Amau Indo-Myanmar border fencing ziaka Manipur gam lianpi Myanmar a lut ding tawh kisai in Prime Minister Dr Manmohan Singh, Union Home Minister Sushilkumar Shinde leh External Affairs Minister Salman Khurshid kimuhpih in thil omdan genpih ding uh a,Central leader-te kiangah memorandum leng peding uhi. Huai memorandum ah Indo-Myanmar border area lak joint survey bawlthak ding,border fencing tungtang ah Manipur in a ngetna a fel(solution om) masiah fencing a khawlphot ding,joint survery bawlna ah Manipur apan palaite leng a tel ding uh chih telin point tuamtuam hunkhop gelh uhi.

Mary Kom in a bawl innthak kihong

Imphal, Dec-1: London Olympic a bronze medallist MC Mary Kom in National Games village ah innthak a bawl tuni’n honna om hi. Huai innthak bel ‘Ebenezer inn’ kichi a, Samulamlan khua a Pastor P. Keivom in hongkhia a, tuazawh in Mary Kom leh a pasal K. Onler Kom in thugen uhi. Huai hun ah TN Haokip,MLA(Saikot); Jahemlung Panmei,MLA(Tamenglong) banah mi poimawh tamtak ing uap uhi. Huai inn bel sawng 3 a bawl hi a, tuni programme tel teng in an nekhawm uh hi’n kigen hi.

NGO tuamtuam in World Aids Day zang
Imphal, Dec-1 : Manipur Network of Positive People, Social Awareness Service Organisation leh Care Foundation banah Vihaan CSCs ten tuni in Imphal a Hotel Tampha ah ‘Getting to Zero: zero new infection, zero related death, zero discrimination’ chih thupi a zangin World Aids Day zang uhi. Hiai hun ah Radhakumar Singh,DC/Imphal West khuallian hi a, Functional President in Dr. L. Randir, Head of Paediatrics/ RIMS pang a, Guest of Honour in Dr. Th. Lokeshwor, Nodal officer of ART/ JNIMS pang hi. Manipur ah 1996 kum apan tunitan a 7,55,331 sisan test na ah HIV positive 43,707 muhkhiak hi a, tua lakah numei 12,335 om a, naupang 2910 om uhi. India gamsung Manipur, Nagaland, Maharashtra, Tamil Nadu, Karnataka leh Andhra Pradesh state-te AIDS tamna pen hi’n kigen hi.

MGNREGS thu ah procession pai uh

Imphal, Dec-1 : Manipur govt in MGNREGS pen Manipur State Rural Development Agency(MSRDA) tungtawn a channelizing a sawm deihlouh latsakna in zan in Ukhrul district headquarters ah Hunphun/Ukhrul Village- te makaihna in mipi’n lampi zui in procession pai uhi. Huai procession ah Ukhrul district sunga localities 27 vel apan mipi tamtak paikhawm uhi. Amau Tangkhul Nagalong Ground akipan in Mini-Secretariat tan pai uh a, huai ah ADC G. Dinpu tungtawn in Manipur Governor a ding memorandum pia uhi.

IAS Officer 3 kaisang uh
Imphal, Dec-1 : Manipur govt DP & AR thusuak in a gedan in IAS Officer 3 in IAS selection grade scale of pay ngah dingin kaisang uhi. Amaute K. Radhakumar Singh, IAS, M. Laksmikumar Singh, IAS leh H. Deleep Singh, IAS hi uh a, Screening Committee in Sept 16, 2013 a a tutkhawmna uah IAS Selection grade pay ngah thei dinga recommend uh hi’n kigen hi. Huai tawh kisai in Manipur govt in notification a suahna ah IAS Officer 3 ten zan akipan in IAS Selection Grade Scale ngah ding hi’n taklang hi.

AMWJU player-te hongtung ding

Imphal, Dec-1 : Assam a North East Media Sports Festival a vatel All Manipur Working Journalists’ Union (AMWJU) apan kimawlmi 10 te’n programme zawh ahih tawh kiton in
Dec 2, 2013 in Imphal hongtung nawnta ding uh chihthu om hi. Amau Table Tennis leh Badminton ah hihhoih mahmah in champion hihna tanpha vala uhi.Sangai Express akipan I. Ibobi,Mannaba akipan Bikramjit leh Poknapham akipan S. Sonia te’n a 2veina ding in champion hihna la uhi.