State nominee a MBBS/BDS sin ding lakna CBSE in conduct ding, Manipur Cabinet in AIPMT,2014 zuih dingin thupukna bawl.
Imphal, Nov-19: CM Cabinet Hall ah tuni nitaklam dak 3.30 akipan in Chief Minister O. Ibpbi makaihna nuai ah Cabinet meeting om a, academic session 2014-15 ah Manipur state nominee a MBBS/BDS course sin ding lakna ding ah Central Board of Secondary Education(CBSE) saina a examna om sek All India Pre-Medical Test(AIPMT),2014 zat ding in thukim uhi. Huai tawh kisai in state govt in CBSE thuneitute kiangah tuni a Cabinet thupukna theihsakna ding in leng thupukna om hi’n thusuak in gen hi.

Government thupuangtu(spokesperson) CAF & PD Minister M. Okendro in Cabinet meeting zawh in reporter-te’ kiang a genna tuni a Cabinet meeting in Autonomous District Council(ADC)-te khut a power piak ding tungtang leng genkhawm uh a,ADC-te khut ah bangbang department piakkhiak ding hiam chih ngentel taka genkhawm nung in tu November khasung mahin power piakkhiak(decentralized) hiding in thukim uh hi’n gen hi.

Cabinet in academic 2014-15 ah state nominee a MBBS/BDS course sin ding lakna dingin AIPMT zuih ding in thukimna om hi’n gen hi. Tu academic session 2013-14 a state nominee telkhiakna ding in govt in NEET UG 2013 zui hi’n govt thupuangtu CAF & PD Minister in gen hi.

M.Okendro in a genzeldan in Supreme Court of India in academic session 2014-15 a AIPMT conduct ni ding puangkhe khin a, huchih dungzui in CBSE in leng Manipur in bang ngaihdan nei hiam chih Nov 15, 2913 tan in CBSE a theisak ding in ngen hi. Hileleng state Health deptt in CBSE ah huai dsawnna Nov 22, 2013 tan hungaih ding in ngen a, govt in lemsakna a piak ziakin thil omdan CBSE ah theihsak hiding chi’n CAF & PD Minister in gen hi.

CBSE thusuakin a gendan in Chhattisgarh, Himachal Pradesh, Haryana, New Delhi, Madhya Pradesh, Mizoram, Nagaland, Punjab, AFMC Pune leh Delhi University in state quota luah ding telkhiakna dingin AIPMT-2014 tel uh ahihdan taklang a, Odhisa, Jharkhand, Uttarkhand leh Sikkim in leng CBSE saina a AIPMT zat ding in Cabinet meeting ah luikhiak ding in omta hi’n taklang hi.

Minister in a genzelna ah tuni a Cabinet meeting in Manipur IT Project Development Company (MIPDCO) kichi leng Manipur IT SEZ Project Development Company (MIPDCO) chi a khek ding thukim a, SO-1(Electrical) post 24 leng SO-1(IT) a khen(re-designate) ding in leh SO-II (Electrical) a post 12 leng SO-II (IT) a khen dingin thupukna om hi’n gen hi.

Media te’n Railway lampi bawlna mun enkhia uh.
Imphal, Nov-19 : ATSUM te’n ROTO tungtawn in State government ah a thilphut uh a pichinlouh ziakun Nov. 11,2013 zankim akipan in Manipur a National lehg state nuai a Project nasepna tuamtuamte khawlsak in kiphinna pan uhi. Huai tawh kiton in tuni in Imphal a media teamte’n Jiribam-Tupul kikal a Railway lampi bawlna mun vapha uhi. Amau Tupul muna Rangkhong leh Awangkhul mun vapha uh a, huai ah site-incharge D. Vengkateshwor tawh kimu in thil omdan genkhawmpih uhi. D. Vengkateshwor in media-te kiang a gendan in Railway line bawlna nasep khawlsak ahihziakin sum tamtak mang hizaw in gen hi.
D. Vengkateshwor in a gendan in nasemte’ lawh di’n khakhat in Rs. 15 lakhs kiseng hi’n gen a, nasep khawlsak ahih aleh nikhat in Rs. 1 lakhs zel mang idan in gen hi. Tu’n a kigawm in ni 8 sung khawlsak hita a, huaiziakin state government in akinlam a ATSUM-te tawh kihou lem dingin D. Vengkateshwor in ngen hi.

Huailou in Tunnel(lei vuhvengna) asem Hyderabad based Sushee Infra Private Limited te’n tulelin mun 4 ah lei vutvang uh a, huai ah nasem mi 600 vel om uh a, nikhat sung na asep kei ua leh Rs. 10 lakh zel mang geihgeih uh hi’n kigen hi. Amau a gendan un tunnel vuhvang ahihtawh kiton a ni bangzahhiam khawlsan ahih aleh naseplouh ziakin chim lua uh hi’n leng gen uhi. Huaiziakin hiai railway line a nasepna pen akhawl thei hilou ahihdan Press-te kiangah gen uhi.Huai Railway lampi bawlna March 2015 sung a zawhsiang hidin kigen a, tulai in companies tuamtuam 10 velin nasem hi un kigen hi.

HIV leh World AIDS Day tawh kisai in meeting om.
Lamka, Nov-19: Ms Jacintha Lazarus, IAS, DC/CCpur makaih in tuni sunnung dak 1:00 in DC office a BRGF Resource Centre ah District AIDS Prevention & Control Committee leh Philantrophic Organisation te'n joint meeting nei uh a,huai ah World AIDS Day leh khawpi sung a HIV awareness neihding tawh kisai genkhawm uhi. Nov 25-28, 2013 sung ‘Drug Abuse & HIV Infection’ chih thupi anei in awareness campaign om ding in thupuk uh a, resource person in SHALOM apan mi 4, HOPE apan 1, LRRC apan 3, DAPCC apan 4 ban ah CMO, DFWO, NYK/CCpur leh MSF te hiding uhi.

Awareness campaign neihna mun dingte - Rengkai Community Hall; YPA Hall, Hiangtam Lamka; Zogal Memorial Hall complex; B.Vengnuom Community Hall; Thingkangphai Community Hall; Chiengkon Community Hall; YPA Hall, New Lamka; SYO Hall, Sim Veng; CYA Hall, New Lamka (G); Hmar Veng Community Hall; Salem Veng Community Hall, M.Songgel Community Hall leh YPA Hall, Bungmual hiding hi. Dec 1, 2013 a World AIDS Day kizang zel pen Pathianni (Sunday) hihziak in Nov 30, 2013 in IB Road a Synod Hall ah zat ding in thupuk uh a, World AIDS Day theme- ‘Zero to HIV New Infaction’ chih hiding hi. DAPCC in activities report bawl a, PLHIV 250 valte kiang ah AAY card piakkhiak hita a, PLHIV mi 83 kiang ah tunung sawtlou in Job Card piak hiding a, mi 32te’ kiang ah Widow Pension Scheme piak ding in Social Welfare deptt in hihfel a, Imphal pansan World Vision te’n tagah(orphan0 270 val sponsored (chawm ding) hi’n gen uhi.

Minister makaih in meeting.
Lamka, Nov-19: Health Minister Phungzathang Tonsing makaih in New Lamka a atenna inn ah Nov 20, 2013 zinglam dak 10:00 in Dist Level Officer-te leh MDC te’n joint meeting neiding uhi. Huai ah Dec 2, 2013 in Ms Jacintha Lazarus,IAS DC/CCpur in pasal a neihding ziaka khakna ding tawh kisai programme leh huai tawh kisai thu tuamtuam genkhawm ding uh chihthu om hi. Minister in tuni’n Dorcas Veng a T. Pumkhanthang’ nu hansuang honna uap hi’n kigen hi.

National Level Monitor tawh meeting.
Lamka, Nov-19: DC/CCpur leh N.G Chatterjee, National Level Monitor (NLM) makaih in tuni in DC office a BRGF Resource Centre ah development scheme tawh kisai in joint meeting om a, huai ah CCpur dist sunga MGNREGS; NRLM, IAY, NSAP, PMGSY, IWMP, NRDWP leh NBA thu genkhawm uhi.
N.G. Chatterjee in CCpur dist a development tuamtuam nasepte enkhe din Nov 17, 2013 in Lamka hongtung a, zanin Zolzam khua pha a, tuni’n Boljol khua pha hi. Nov 20 &21 in Singngat sub-divn a Lungthul T., Hiangtung leh Panglian khua pha ding a, Nov 22 in Tuibuong block leh Nov 23 &25, 2013 in Samulamlan block a nasepnate enkhe ding hi.

S.Minboi in student-te khahkhia.

Lamka, Nov-19: S.Minboi Vaiphei, MDC (Haopi Range) in tuzing dak 7:30 in Tangmual JB school student-te Imphal a Educational Tour dingin khahkhia (flag-off) a, Tangmual JB School a SMDC member hunkhop in leng vazui uhi. S.Minboi in agenna ah kum 2010 kum in MDC election om a,kum 2011 in Mata Mualtam JB school-te Imphal ah Eductional tour in pai uh a,kumlui 2012 in Geljang JB school, tukum 2013 in Misao Lhahvom JB school leh Tangmual JB school-te Educational Tour in Imphal a pai uh hi’n gen hi.

Kumthak 2014 in Tuikham JB school, Bohlui JB school leh Thingkangphai JB school te ah Educational Tour a paisak hidingin gen hi.Student te’n laibu a simkia hilou in Imphal ah mit a thil muhte uh suizui ding leh teacher te’n student-te hilhsawm ding in hasuan hi. Tangmual JB school student-te’n Imphal ah Zoo, Science centre , Rose Garden telin mun tuamtuam enkhia uhi. Tangmual JB school ah tukum in Nursery-class V tan student 127 om hi’n kigen hi.

Addl DC in mipite theisak.
Lamka, Nov-19: DC/CCpur office ah domicile/residential/tribe certificate leh adangdang zinglam dak 10:00 akipan sunnung dak 2.00 tana application muh(received) a om teng ani mah in zawh hiding a, hileleng sunnung dak 2.00 nungin application kimute bel a ninawn (next day) a issue hiding chi’n Mani Ram Sharma, IAS, Addl DC in mipite theisak hi.

Numeite thumkhawm uh.
Lamka, Nov-19: CCpur Christian Women Fellowship (CCWF) leh Ladies Prayer Fellowship (LPF) kigawm in gamsung a khamtheih leh siatnate awlmawh ziaka thumkhawmna a neih uh tukum adia nanung dingin tuni sunnung dak 2.00 tan EBC Hebron Biakinn, New Lamka ah zang uhi.

school 43 adin training om ding.
Lamka, Nov-19: Manipur State AIDS Control Society, Dist AIDS Control Officer leh ZEO/CCpur saina in tunung sawtlou in ‘Teacher training on Adolescence, Sexuality & Health’ om ding a, CCpur dist ah ZEO nuai a school 43 apan teacher- te telding uhi. Huai ah CCpur block apan school 15; Singngat block apan 4; Henglep blockapan 3; Samulamlan block apan 5; Thanlon block apan 9 leh Tipaimukh block apan school 7 tel ding uhi.

Annual Conference-cum- Council.
Lamka, Nov-19: ESC nuai a Synod Women Society te’n Nov 23-26, 2013 sung Ebenezar Chapel, D.Phailian ah 34th Annual Conference-cum-Council 2013 neiding uhi. Upa L.S Gangte, Chairman ESC in Conference hongkhe ding a, Miss Chiinboi in Pathian thu gen in Nov 26, 2013 nitak in Rev L.Sata, Executive Director ESC in conference hun khak(close) ding hi.

School tengin submit ngai.
Lamka, Nov-19: CCpur district sunga govt school a Headmaster/Headmistress teng in 2014-15 school budget bawl ding leh tukal sung mahin Director of Education (S) ah submit ngai chihthu om a, thuchian kimzaw ZEO/CCpur office ah kantheih ding hi.

 

SUUNNA:

1. Mrs. Rengkhhawn (90) w/o (late) G. Gouzamang of Central road, Hiangtam Lamka tuni zinglam dak 6.00 in Imphal ah si a, tuni’n Lamka hanmual ah kivui hi.
2. Khawlzakim (59) sister of Kamthang of Gangpimuol, tuzing dak 8.00 velin sungna ziakin si a, tuni mah in Gangpimuol hanmual ah kivui hi.
Moithiannem (18) d/o Tlanglem of Mualnuam, Thanlon sub-division, tuni zinglam dak 11.00 velin Lungtang natna ziakin Lamka ah si a, Mualnuam a vui dingin kipua hi.
3. G. Kungzathang (31) s/o Vungzasiam of Sinzawl, sinna ziaka ngaplou Lamka lam zuanlai tuni’n Tuima khua ah lamkal a si in Sinzawl ah pawkik uh a, zingchiang in Sinzawl ah kivui ding hi.

 

**********************************************

 

IMPHAL NEWS:
CM makaih in Quami Ekta Week kizang:
Imphal, Nov-19 :India gamsung pumpi ah tuni a Quami Ekta Week (National Integration Week) zat ahih bangin Manipur Secretariat South Block ah Chief Minister O. Ibobi makaihna zat hi a,huai ah Dy CM Gaikhangam, Education Minister M. Okendro, RD & PR Minister Francis Ngajokpa banah MLA hunkhop leh top civil leh police official-te tel uhi. Quami Ekta Week bel Nov. 19-25 sung sutzop hiding hi. Huai hunsungin National Foundation for Communal Harmony-te saina in Communal Harmony campaign neih hiding hi.

Imphal Airport bawhman fee lak hilou ding –Works Minister:
Imphal, Nov-19: Golden Myanmar Airline in Imphal Airport hong bawh hun ah fee bangmah lak hilou ding chi’n Works Minister Dr Kh. Ratankumar in gen hi. Minister in a gendan in Nov 21, 2013 in Golden Myanmar Airline in Sagaing Region a Chief Minister leh Mandalay Chief Minister banah Myanmar akipan delegate 21 pua in Imphal Airport hong bawh ding a, Civil Aviation Minister in leng International Airport dana Imphal Airport koih ni a gamdang akipan lenna hong bawh masapen Golden Myanmar Airline akipan landing fee bangmah laklouh ding in lemsa chi’n leng gen hi. Domestic hi’n International flight hileleng Imphal Airport bawh flight himhim in Rs. 1,80,000 a piak uh ngai hi’n kigen hi.

Dakkal 24 sung General Strike puang:
Imphal, Nov-19 : Maoist Communist Party, Manipur te’n Indo-Myanmar gamgi a fencing tawh kisai in Nov. 21, 2013 in dakkal 24 sung Manipur pumpi ah general strike puang uhi. Tuni a Maoist pawla Secretary( Publicity & Propaganda) in Press statement a suahna ah gam leh leitang humbitna dinga mipite laka awareness thehzak poimawh sak ziakin general strike puan a om hi’n taklang a, huai general strike pen border fencing tawh kisai a movement masapen hidan in taklang hi.

Leadership development training:
Imphal, Nov-19:Wangjing a Rural Development Society in Ministry of Minority Affairs, Government of India akipan kithuahpihna zang in Thoubal district a Hangul ah Nov 16, 2013 akipan in ni 6 sung om ding Leadership development training programme sai uhi. Huai training ah Thoubal district sung mun tuamtuam akipan numei poimawhdeuh mi 25 tel uh a, tuni in NonibalaNarengbam, Secretary IRDSO, Wangjing in ‘social empowerment of women and women’s rights’ chih thupi zangin sinsak a, L. Londhon in ‘Health education, immunization, food and nutrition’ chih thupi a nei in sinsak hi.Rural Development Society, pawlin Thoubal district sung mun tuamtuam ah tunung in leng leadership training programme tawh kisai tamtheipen neihsawm in panla uhi.

RPF te’n amau thilhih hi’n puang uh:
Imphal, Nov-19 : Manipur ahelpawl RPF ten zan in Ukhrul district a BRTF HQ mun a bomb hihpuak amau hi’n kipuang uhi. RPF thusuak in a gendan in bomb hih puaktute RPF a Special Warfare group-te hi uh a, huai bomb puak ah BRTF personnel 6 liam hi’n taklang uhi..

DIG zuauthu hidan in taklang:
Imphal, Nov-19 : Manipur a Riflemen-te ading Pre-Promotion Selection Test (PPST) om ding tawh kisai in Manglemjao,DIG in riflemen-te laka mikhat zel akipan Rs. 5,000 zel la hidan a thuthang om zuauthu hi’n taklang hi. Aman press-te kiang a genna ah huai tawh kisai a dikloutak a ngawhna hizaw in gen a, kuamah kiangah promotion adin sum lalou in gen a, Manipur police force a promotion muthei ding a chitna neite leh PPST a hihhoihte kia piak hidin gen hi. Promotion muhna dingin PPST ah tel teitei ngai a, huaia telloute promotion piak hilou ding uh hi’n gen hi.