CDSU in mawhpaihthu puang uh
Numei rape sawm om ziakin mipi sousang
Lamka, Nov 26:Uttar Pradesh state Meerut akipan Nafis Malik (27) kichi tulelin Tribal Colony a RK Lane a om in tuni zinglam in Rengkai Vengthar ah nupi 1 rape a sawmziak in mipi sousang a, Nafis leh a lawmte tuanna Maruti van 1 khensia uhi. Rengkai a thiltung tawh kisai SP/CCpur makaih in Police te’n panla pah uh a, tuni nitak mah in CCpur Police te’n main culprit Nafis Malik leng Imphal ah mankhia uh a, Moirang Police ah pekhia in alawmte 2 bel CCpur Police custody ah koih uhi. Theih ngeilouh pasal 1 in Nehemia rape a sawm thu ah CDSU in mawhpaihthu puang uh a, akisaipih thunei tute’n mi 3 te tungah dan(law) tawh kituak a gawtna piak dingin ngen uhi. CUSU in mite kiangah maban ah leng meltheihlouh thil zuakte apan pilvang chiat dingin ngen uhi.
Thusuak kingahdan in Nafis Malik (27) of Meerut, UP state leh alawmpa Paravej (24) s/o Iqbal of Meerut, UP state tulela RK Lane, Tribal Colony om te’n ni 12 vel paisa in Manipur honglut in gas stove zuak ding hunkhop hong pua uh a, lawmta 2te’n Md Thoiba (30) s/o Md Junakhan of Keibung Makha Leikai(Thoubal dist) tulela Old Lambulane a om akipan Maruti Van (MN -04A/8341) hire in Lamka ah gas stove zuak ding in hong kuan in tuni zinglam dak 10:30 velin Rengkai ah lut uhi.
Nafis in Rengkai Edenthar a Nehemia w/o Jessai kiangah gas stove zuak in hawh a, Nehmia kiangah gas stove deih hiam, nungak lai hiam, inn ah kuateng om, chih dong in paikhe nawn a, huai nungin gas stove tawh lutnawn hi’n kigen hi. Huai hun laitak in Nehemia amah kia inn ngak in om a, Nafis in gas stove tawikawm in English leh Hindi in Nehemia houpih a, Nehemia’ puan-ak suahsak sawm kawmin khoih sawm a, huaitak in Nehemia kikouzak in inn kim leh kiang apan mipi’n delh huan uh a, hileleng Nafis matkhat manlouh in taikhe man hi. Mipi thangpaite’n Nafis te’ zat Maruti Van sung apan Paravej leh Van driver Md Thoiba mankhia in Van nunglam glass khensia uh a, Van sunga om Gas stove 8 leng haltum uhi. Thil omdan theihphet in Police te’n Rengkai delh in mipi khut apan Paravej leh Md Thoiba ban ah Van gari la in Police Station ah kem uhi.
Rengkai a thil tungtawh kisai in Hmar Women Assn. Rengkai Unit te’n Police ah report bawl uh a, meltheihlouh pasal khat in Nehemia’ rape a sawm thu ah Police te’n FIR No. 91(11) 2013 CCP-PS U/S 448/354/511 IPC registered uhi.

Minister in YPA Hall hong ding
Lamka, Nov-26: YPA Bungmual unit in Bungmual khua a YPA Hall abawl uh zousiangta uh a, Nov 30, 2013(Kiginni) in Phungzathang Tonsing, Minister(Health & FW/GAD/CADA) in Chief Guest hihna tawh hong ding a, huai Hall Pathian kianga latna a om ding banah YPA Bungmual Cultural Troupe te’n namlam(cultural dance) lahna nei ding uh a, Bungmual khawsung a lasiam tuamtuamte’n avangkim in lasa ding uh chih ahi hi.

Kabul apan New York ah kisuan ding
Lamka, Nov-26:LT Ngaihte,Indian Foreign Service(IFS) Afghanistan khawpi Kabul a Indian Embassy ah First Secretary leh Head of Chancery lenlai US a khawpi khat New York a Consulate General of India ah Consul dinmun a join dingin New Delhi a Foreign Services Board tutkhawmna ah lemsa uh a, official order leng suakta chihthu om a, aman April, 2014 khatawp lama join ding hi’n kigen hi. Ministry of External Affairs y nuaia sem Northeast India mi New York a posting a om kha vang mahmah lai hi’n kigen hi.

High Court teamte’n Lamka pha
Lamka, Nov 26: Manipur High Court apan Justice Laxmi Kanta Mohapatra; Meena Mohapatra; Alex Muivah; Justice N.Kotiswar Singh;Vijaylaxmi Brara; S.Serto,Registrar General leh Th Saimon, Registrar of Manipur High Court te'n tuni sunnung in Lamka hongpha in Khuga Dam ah lunch nekhawm uh a, nitaklam dak 3:00 in Tuibuong a Court complex enkhia uh a, huai apan Imphal ah kiknawn uhi.

Bolero in dawr leh gari neu phusia
Lamka, Nov-26: Rengkai Vengpui ah tuni nitaklam dak 3:30 velin Muolvaiphei lam apan Lamka zuan a tai Bolero (No. MN-02A/4929) in ICI KTP te’ building luaha dukan bawl Aboi Kom’ dukan phusia a, kong ah kikoih ‘Access -125 (No. MN 04A/5748) leng phusia hi. Mit a mute gendan in Bolero driver Remruot s/o Zachuong of Peacelane, SA Road in zu khamlua a, gari hek nawnlou ding in phatuam ngai bangzah hiam in genpih mahle uh gari hek thouthou in Aboi Kom’ ddukan phusia hi’n gen uhi. Bolero gari in dukan a phutsiat lai in Thangkim w/o Aboi in dukan ngak a om himahleh vangphat huaitak in hihkhalou in midang leng phu khalou hi’n kigen hi.

STC in mawhpaihthu puang
Lamka, Nov-26: Simte Tribe Council(STC) Gen HQs apan thusuakin agendanin
Zou Defence Volunteer(ZDV) cadre te’n Nov 25, 2013 nitak dak 10.00 velin Zoumunnuam ah Zenhang Lamka Area Unit a STC President Th. Dongzalian a soisak ziakun mawhpaihna sangpen puangkhum uhi.Tu in amah Shija Hospital a ICU ah etkol in om a, a dam ding leh dam zawhlouh ding tanpha theihlouh khop a gim hi’n thusuak in gen hi.
STC Gen HQ thusuak in a genzelna ah UG cadre-te galvan tawh zalen taka vak in dan nelhsiah a a gamtat uh patauhhuai sakthu leng puang uhi.Simte community in hibang bawlsiatna tuak sek uh hi a taklang kawm in hibang hiamgam taka gamtangte’n aziak puangkhe ding leh customary law tawh kituak a lut dingin leng theisak uhi.
Thunei tute’n hibanga gamtangte mankhia a a kituahpih gawtna pe dingin leng theisak uhi.

DC office ah interview kipan
Lamka, Nov 26: Integrated Watershed Management Programme/CCpur nuai a Watershed Development team a post 28 semding lakna dingin tuni zinglam in DC’s office a BRGF Resource Centre ah interview kipan a, Sl.No.71-152 kikal interview uh a, Nov 27, 2013 in Sl.No.1-70 kikal te interview ding uhi. Interview ah board member bangzahhiam tel uh a, DC/CCpur leng tuni’n interview ah tel hi.

Ui gu(poison) thahna damdoi
Lamka, Nov 26: CCpur dist ah uikeih(dog bite) kichi thang mahmah a, hileleng Dist Immunisation office ah govt apan ui(dog) gu (poison) thahna damdoi supply omlouh ziakin ui in akeihte buai mahmah uhi. Dist Hospital konga LK Pharmacy ah ui gu (poison) thahna damdoi leitheih dingin om a, uikeih te’n huai munahlei in DIO/CCpur office ah kikaptheih ding hi’n thusuak kingah hi.

Headmaster-te training uh
Lamka, Nov 26: RMSA/CCpur saina in tuni zinglam in ZEO/CCpur office ma a Synod House ah ‘One Day training/Workshop on filling of U-DISE and Importance of U-DISE’ om hi. Huai ah Mary Huaisianmawi, ADPM/RMSA ; Krishnakumari, Sytem Analysist/RMSA leh Biren Singh, DIC/SSA te'n sinsak uhi. Training ah CCpur dist sung a Govt High School leh Hr Sec School apan Head-te tel uhi.

Lou bawlmi te ni (day) ding bikhiah
Lamka, Nov 26: RK Dorenchand, Dist Agri Officer/CCpur in loubawlmite haksatna tuamtuamte deptt tawh kithuzaktuah theihna ding in kalteng a Nilaini office hun sung in loubawlmi (farmer) te’n Agri Officer/staff te kimuhpih theih gige ding uh hi’n gen hi. Loubawl mite’n dotnop leh theihnop a neih ua leh Nilaini tengin Agriculture deptt-te kimuhpih thei gige ding uh chih ahi hi.

CMO in training hongkhia
Lamka, Nov 26: Dist Health Society/CCpur saina in tuni in CMO office Conference Hall ah ‘One Day Training on Preparation of Dist & Block Program Implementation Plan (PIP) for 2014-15’om a, Dr HL Liensang, CMO/CCpur in hong hi. Aman a genna ah training a telteng in govt guidline tawh kituak kim kei mahleh dist adia hoih leh zattheih dinga Plan bawlkhe dinn ngen hi.
Training ah Seiboi Mate, Dist Data Manager, NRHM; D.Khuala Vaiphei, Dist Program Manager, NRHM; Dr HL Liensang, Dist Mission Director, NRHM; Dr. V.C Pau, DFWO leh Barya Uddin, Dist Finance Manager, NRHM te'n sinsak uhi. Training ah PHC leh CHC a Medical Officer incharge-te, Block Program Management Unit staff-te ban ah Nurse hunkhop tel uhi.

Training utte’n ngaihven theih
Lamka, Nov 26: Assam state khawpi Dispur ah Psychiatrist tawh kisai kum 1 course training theih ding a, tulela GNM regular a semlel training utte’n CMO/CCpur ah thuchian kantheih ding chihthu om hi.

SUUNNA
M. Pauchinthang Guite b/o M. Thanglianmang Guite of Chinkhothang road, Vengnuam, New Lamka zan in Lumding Railway station ah tuahsia in si a, tuni nitak dak 6.00 velin aluang Lamka hongtung a, Nov 27, 2013 in New Lamka YPA hanmual ah kivui ding hi.
M. Thanglianmang Guite bel DSP/CBI sem hi a, tulelin Guwhati ah posting hi.

IMPHAL NEWS
USA leh India ‘B’ team in final kimawl ding
Imphal, Nov-26:Manipur Sangai Festival,2013 tawh kisai in Manipur Horse Riding and Polo Association-te saina in Mapal Kangjeibung a 7th International Polo Tournament ah Nov 28, 2013 in USA leh India ‘B’ teamte final kimawl ding uhi. Tuni in Semi-final ah India ‘B’ team te’n 16-2 in Thailand zou uh a, USA ten 11-3 in India ‘A’ team a zawh ziakun India ‘B’ team leh USA teamte final kai uhi. 7th International Polo Tourament ah team tuamtuam 5 tel uhi.

NSCN(IM) leh ZUF kikap: ZUF 1 si
Imphal, Nov-26: Tamenglong district sung Noney akipan km. 16 vela gamla Lukhambi mun ah tuni sunnung dak 1:30 velin NSCN(IM) te leh Zeliangrong United Front(ZUF) cadre-te kikaptuah uh a, huai ah ZUF cadre khat naktaka liam in bangtanhiam nungin si hidan in kigen hi. Thusuak in a gendan in ZUF cadre sipen Nagaland a Sanjuram village khawmi hi’n kigen hi. Huai kikapna ah NSCN(IM) te’n binocular khat, lethod bomb leh thauthang bangzahhiam kikaptuahna mun ah mukhia uh hi’n kigen hi. Noney Police ten athu a zakphet un delh uh a, himahleh lampi hoihlouh ziakin dakkal bangzahhiam la hi’n kigen hi.

National Law Day zatna om
Imphal, Nov-26 : High Court Bar Association (HCBA), Manipur ten tuni in High Court of Manipur complex a Conference Hall ah sunnung dak 1:00 in “National law day’ zang uhi. Huai hun ah Chief Guest in Th. Ibohal Singh, Advocate General Manipur n pang a, Functionbal President in M. Hemchandra Singh, Advocate, Vice-President HCBA pang hi. Huai ah HCBA President lui a sisate suunna leh zahna in minute 2 dai dide in om uhi. National Law Day bel Nov. 26, 1979 in zat pat in om a, tua hun in Supreme Court Bar Association ten ana zang masa uh a seminars, workshops leh awareness programme tuamtuam nei uhi.

Bishnupur ah bomb puak; mi 1 kiman
Imphal, Nov-26:Bishnupur district sung Kiyamba Sanglen mun ah tuni zingsang dak 6:50 velin bomb hattak khat puakzak a, himahleh asi leh liam bel omlou hi. Thu kizadan in bomb puahna mun bel DC/Bishnupur office kong hi a, police ten a theihphet un a mun delh in operation bawl uhi. Huai ah N Biromala Devi @ Konika @ Aeengbi (25) d/o N. Biramangol of Bangladesh muanmawh ziakin man uhi. Police thusuak in a gendan in Biromala bel PLA active member hi a, thudotna neih ding a mat a om hi’n gen uhi. Tuni’n Bishnupur a bomb puak bel zan a Keishampat a puak tawh a omdan kibang hi’n kigen hi.

AMWJU team te’n Assam zuan uh
Imphal, Nov-26 : Assam a 5th North East Media Sports Festival atel dingin tuni’n All Manipur Working Journalists’ Union (AMWJU) a member 10 in Imphal nusia in Assam zuan uhi. Huai Media Sports Festival bel Assam Sports Journalists Assn-te saina a SBI, Numaligarh Refinery Ltd. Oil leh Megha Assam Bond saina a om ahi hi. Tunitan in Cricket leh Chess zawh hita a, AMWJU te Table Tennis leh Badminton kia ah tel ding uhi. Amau tuni zingkal in Parl Secy (Info & Public Relations) K. Meghachandra in khakhia hi. AMWJU teamte Nov. 24, 2013 in pang khapan ding uhi. Cricket ah North East apan Media Centre 20 vel tel uh a, amaute group 2 in kikhen uhi.

UNLF in amau thilhih hi’n puang
Imphal, Nov-16: Keishampat a Haipou Jadounang complex kong ah zan nitaklam dak 4:00 vel a bomb hattak khat hihpuak in om UNLF pawlin amau thilhih hidan in puang uhi. UNLF a Publicity Officer M.Sak-Hen in thupuan a bawlna ah UNLF army wing nuaia demolition squad-te thilhih hidan in taklang a, Assam Rifles ten civilian-te tunga thagum a suah utawh kisai a phuba lakna hidan in gen hi. Mi nautangte hihkhak ding laukei le uh Assam Rifles tamsem si ding uh hidan in taklang uhi. Huai huna liamte tungah ngaihdam ngen kawm in poisak thu leng puang uhi.

Hutkhiak a om naupangte Imphal hongtung
Imphal, Nov-26: Bangalore a Christian Missionary School a laizil dinga zolkhiak a om numei leh pasal naupang kigawm 36te tuni in Imphal hongtung uhi. Thusuak in a gendan in naupangte bel Bangalore a tuntak un mun tuamtuam ah na sepsak in om uhi. Bangalore Police leh Social Welfare dept., Bangalore pangkhawmten mun tuamtuam a Manipur mi kum chinglou a nasemte kaikhawm in Nov. 23 in Manipur hong zotpih uh a, tuni zinglam dak 10:00 in Imphal hongtung uhi.
Amaute Manipur Police personnel 3, Social Welfare dept., Manipur apan official 1, Child Welfare Centre (CWC) CCpur; CWC Bishenpur, CWC Ukhrul leh CWC Senapati apan member khat chiat in Nov. 24, 2013 in Guwahati apan Imphal tan hong tonpih uhi. Imphal a hongtun un Takyel a Observation Home tut in om uh a, anu leh pate uh leng Imphal tung vek uhi. Tuni in Social Welfare Minister AK Mirabai in Observation Home ah press conference nei a, tuazawh in anu leh pate uh kiangah piakkhiak hiuhi. Tuni a Bangalore apan Imphal hongtung naupangte bel pasal 25 leh numei 11 hi ua, Ukhrul apan mi 11, Senapati apan 15, CCpur apan 8 leh Bishnupur apan 2 hi uhi.

AIIMS a Nurse semdin ahunkhop lawhching
All India Institute of Medical Science(AIIMS) a Sister(grade-II) sem ding lakna ding in Aug 25, 2013 in written examination om a, Oct 8-14, 2013 sung interview om nungin Lamka lam mi anuai ate lawhching uhi.
302740 Lamneineng Singson
301031 Lhingneikim Kimboi Chongloi
302000 Hoinu Lhouvum
303898 Mary Vungthianmoi
304093 Hatkholhing Haokip
309509 Cathrine Lamkhochin Haokip
312070 Nancy Niangthianhoih
313243 Lalsangpuii
313571 T Chingngaihlun
314378 Nengneilam Kipgen
317792 Themneikim Singson
318801 N Naomi Khongsai
319342 Cindy Lamhoithiem
319770 Grace Nengneikim Haokip
322872 Themneilhing Chongloi
324447 Hmingthanmawii
327159 Priscilla Siambiakching
328822 H. V. Lalnunpuii
330042 Ngaimuankim