Media-te tawh kimuhkhawmna om:Union Minister in uap ding, Tuni’n 3rd World Zomi Convention cheplawkna om

Lamka, Oct-5: Lamka ah Oct 25-27, 2013 sung ‘the 3rd World Zomi Convention(3WZC)’ om ding a Organising Committee makaih in tuni in Sim Veng a SYO Hall ah 3WZC cheplawkna ‘kick-off’ program om a, Rev Lamkhogin Khaute, Executive Director, EOC in hong hi. Huai ah Chief Guest in Langkhanpau Guite, Chairman ADC pang a, Rev Thangkhangin, Director (Inst) in ‘Be a Blessed Nation’chih thupi zangin Pathian thugen hi. LB Sona in Convention Message a genna ah Dist Level, State Level leh State capital level ah Zomi Namni kilawm a, huaite’ tung ah 3rd World Zomi Convention kizang ding hi’n gen hi. ‘3WZC in Zo suante hih kiphawkthakna hontun ding leh Pathian thei kawm a Gam leh Nam itna ban ah ittu hong pianbeh leh’ chih message gen hi.

Chief Guest in Nam vai leh Pathian thu zui a hibang program bawltheih thupi sakthu gen a, Shillong ah Zomi Intellectual-te a kimuhpihna ah 3WZC ah tel asawm thu uh gen hi. 3WZC program lawhchinna din panlak chiat ngai hi’n gen a, khawtang makai tuamtuamte ban ah Saptuam te’n panla khawmvek lehang program lawhching ding hi’n gen hi. 3WZC ah MC Mary Kom ahong teltheihna din amah mimal taka kimuhpih in chial hi’n gen a, amah Bolly Wood film shooting ziakin mun tuamtuam ah zinkhia a, Manipur a om laitak ahih aleh Zomi-te program ah tel ngeingei ding ahihdan MC Mary Kom in theisak chi’n gen hi.

Tuni zinglam in Zomi Council office ah 3WZC tawh kisai in Press Conference om a, Dr R.Sanga, Convenor in 3WZC tawh kisai program taklang a, K.Vungzamoi in Seminar leh Worship tawh kisai taklang hi. Lamka Public Ground ah Oct 25,2013 zinglam dak 10:00 in Cultural Exchange & Cultural Exhibition hun honna om ding a, Chief Guest in Oscar Fernandes, Union Minister (Road Transport & Highway) pang ding a, Functional President in Chief Minister O.Ibobi pang ding hi. Huai ah Guest of Honour in Dy CM Gaikhangam pang ding a, Chief Host in Health Minister Phungzathang Tonsing pang ding a, Special Guests in mi 9 pang ding hi.

Kikhopna ah Nam tuamtuam in mahni pau chiat in ‘Halleluijah Chorus’ akituak in sakhawm ding uh a, cultural exchange ah Naga Cultural Troupes, Meitei Cultural Troupes & Thang-Ta Dance namlam lahna omding hi. Cultural Exhibition hun ah singtangmite laka Nam tuamtuam atamtheipen in akituak in Nam lam(dance) nei ding uhi. Oct 25 & 26 zinglam dak 10:00 apan YPA Gen HQ Hall, Hiangtam Lamka ah ‘Issues, Challenges and Opportunities of the Zomi’ chih pandan in Seminar/Workshop om ding a, Resource Person in 8, Panellist & Moderator in mi 13 leh Planery Speech mi 4 in peding a, nitak hun in biakinn tuamtuam 10 ah ‘Be a Blessed Nation’ chih thupi zangin Pathian biakna omding hi. Oct 27, sunnung dak 1:00 in Lamka Public Ground ah joint fellowship leh Valedictory program om ding a, huai hun ah mipi thumkhawmna om ding a, Special No. 10 vel ngaihkhiat hiding hi.

Huaima Oct 24, 2013 sunnung dak 2 in New Lamka a Dorcas Jubilee Hall ah ‘Role of Community in maintaining Peace & Security’ chih thupi zangin houlimna om ding a, huai ah Tribe leaders, Public leaders, Church Leaders, Philantrophic leader-te telding uh a, Union Home Ministry a Joint Secretary(Northeast) Sambhu Sing, IAS in leng uap ding hi. 3 WZC hun uap ding in gam tuamtuam apan mi tamtak hong paikhawm ding hi’n vaisaite’n gen uhi.

Khanglai Pawlpi Golden Jubilee

Lamka, Oct-5: Khanglai Pawlpi (NTBCA) kum 50 chin ‘Golden Jubilee’ lopna Rengkai Bible Hills a NTBCA campus ah Oct 3, 2013 in kipan a, tuni zinglam in Jubilee Monument honna om hi. Huai ah Rev H.Hangzakam, founder Chairman, Khanglai Pawlpi, NTBCA in Khanglai Pawlpi Golden Jubilee Hall hong in Pathian kiangah lan a, Rev S.Kaikhanmang, Executive Secy NTBCA in Khanglai Pawlpi Jubilee suang hong in Pathian kiang ah lan hi. Teltuam te’n Jubilee dakpi khen ging uh a, Jubilee Choir-te a pan phatna lapawl in zui a, T.Pumkhokam, Chairman GC, NTBCA in Golden Jubilee Souvenir hong in Pathian kiang ah lan hi. Golden Jubilee lop hunsung in Rev Dr H.C Stephen, President Baptist Partnership Ministry, Dr Steve Overholt, USA leh Pastor David Sincock, USA te’n Pathian thu gen uh a, Seminar ah Dr Ginlianlal Buhril, Professor, Universal Business School, Mumbai leh Rev K.Hangnung, MA, M.Phil, M.Th te’n sinsak uhi. Oct 6, 2013 nitak kikhop tawp in Rev Sh.Tunzapau, Pastor Thingkangphai, NTBC in Jubilee lopna hun khakding hi.

Nantal Animation Film hongkhia

Lamka, Oct-5: Zoveng a Zogal Memorial Hall complex ah tuni’n James Taithul in 3D Animation Film a bawl ‘Nantal’ kichi Sesei Zou, Chairman, ADC/Chandel in Chief Guest a pang in hongkhia a, James Taithul in khangthu tangthu omte kepbitna dinga film a bawl masawnna thupitak ahihdan gen hi. Aman agenzelna ah a talent hoihtak a kembit dingin hasuan a, amah adinga nektak zonna hithei ding hi’n gen hi. Nantal film pen namkhat in minthanna aneih theihna dinga thil poimawhtak hi a, nam khangtou i chihte’n lam chituam tuam ah midangte sanga tungnun zawkna a neih chiang ua khangtou hi’n gen hi. Mipite’n film leh album kibawlte’ kithuahpih siausiau a, sum tamtak senna ahihman in market hihbuai saklou dingin leng ngen hi. James Taithul in huai tawh kisai agenna ah kum 2011 akipan Nantal 3D Animation film bawlpan a, kum 3 a buaipih nungin zouthei pan hi’n gen hi. Tunung chiangin tangthu poimawh deuhdeuhte leng bawlkhiak zel sawm hi’n gen hi. Tuni a 3D Animation film kihongkhia CCpur district adia amasapen hi a, huai hunah Functional President in Chinlunthang, Gen Secy, UZO pang a, Guest of Honour in T. Goulal, Contractor; Chief Host in Hauminlian, Contractor pang uhi.

Nature Education & Wildlife Awareness
Lamka, Oct-5: Divnl.Forest Office, Southern Forest Divn/CCpur saina in Oct 7, 2013 zinglam dak 10:00 in Dorcas Hall Auditorium, New Lamka ah ‘One Day Nature Education & Wildlife Awareness Campaign’ omding hi. Huai ah Chief Guest in Langkhanpau Guite, Chairman, ADC pang ding a, Functional President in Kh Brojendro Singh, IFS, Conservator of Forest, Southern Circle pang ding hi. Technical Session ah L.Joykumar Singh, IFS,Dy Conservator of Forest leh Kham Suanmung Tawmbing, IFS, DFO/CCpur te’n sinsak ding uhi.

Women Fellowship Conference om

Lamka, Oct-5:New Lamka a Rayburn Presbyterian Church ah zan nitakin PCI(R) saptuam nuai a North Lamka Presbytery Women Fellowship Conference 2013 kipan a, Elder S.Thangsuanmang, Moderator, NLPWC in hong hi. Khawmpi sungin Rev.G. Suanzalam,Presbytery Supdt leh Pastor M.Khamlianmang, Adviser NLPWF te’n thugen uh a, Seminar ah Rithanglian Tombing in sinsak hi. Oct 6 nitak in biakna kikhop banah kipahman tuamtuam hawmna om a, kikhop tawpin Elder N.Thangzamawi, Moderator NLP in khawmpi hun khakding hi.

PMEGP interview hunding bikhiah
Lamka, Oct-5: Trade tuamtuama dia PMEGP 2013-14 loan apply-te ading in Oct 7-25, 2013 sung DC office ah zinglam 10:00 apan interview om dingin ahun bikhiah uhi. KVIB tungtawna loan apply-te ading in Oct 7 in Sl.1-150 inteview ding a, Oct 8 in Sl.No. 151-300; Oct 9 in Sl.No.301-450; Oct 10 in Sl.No.451-600 leh Oct 11 in Sl.No. 601-674 hiding hi. KVIC tungtawna apply te’ adin Oct 14 in Sl.No. 1-150; Oct 15 in Sl.No. 151-300; Oct 17 in Sl.No. 301-450; Oct 18 in Sl.No. 451-600 leh Oct 21 in Sl.No. 601-651 hiding hi. DIC tungtawna apply-te ading in Oct 22 in Sl.No.1-50; Oct 23 in Sl.No. 151-300; Oct 24 in Sl.No. 301-450 leh Oct 25, 2013 in Sl.No.451-603 hiding hi.DC office ah KVIB leh DIC tungtawn a loan apply-te’ list kitak khia a, hileleng KVIC tungtawn a loan apply-te list kalnawn sung in takkhiat hidin kigen hi.

Chinremsiam ding hizaw
Lamka, Oct-5: Zana Dist Level Leterary Competition 2013 om a, Singing/Solo Junior a 1st la Joycy Chinglemsiam (class VIII) of L.Foundation school kichi pen official lam te’ gelhkhelh khak hi a, Joycee Chinremsiam ding hizaw chi’n thusuak kingah hi. Min gelhdan official record enkawm a certificate kipia mi 1/ 2 in leng min diklou chi’n certificate gelhthak dingin pekik uhi.

SUUNNA:
Zamkhanvung(62) w/o (late) D. Thangliankhup of Mission Veng tuni sunnung dak 1.30 velin cancer natna ziakin RIMS ah si a, Oct 6, 2013 in Lamka hanmual ah kivui ding hi.
Thangzagin(96) f/o Upa Nengkhai, Chief of New Zouveng tuni nitaklam dak 5.00 velin si a, Oct 5, 2013 in Zouveng hanmual ah kivui ding hi.

IMPHAL NEWS
14th Finance Commission team
tuni’n Imphal hongtung ding
Imphal, Oct-5: Dr YV Reddy, Chairman of 14th Finance Commission makaihna in 14th Finance Commission a member 4 leh official 11 in ni 3 sung Manipur pha dingin Oct 6, 2013 nitaklam dak 3.30 in Helicopter zangin Kohima akipan Imphal hongtung ding uhi.Amau Imphal khawpi sung mun tuamtuam phading uh a, Oct 7, 2013 zinglam dak 10.00 akipan sunnung dak 1.00 tan Manipor Secretariat a Conference Hall ah Manipur Chief Minister tawh meeting ding uh a, huai ah Dy CM Gaikhangam, Forest Minister Th Debendra leh Health Minister Phungzathang Tonsing banah Chief Secretary, Addl Chief Secretary leh top official hunkhop leng tel ding uhi. Meeting ah Manipur a sum-le-pai dinmun,local bodies leh issue tuamtuam banah state govt in memorandum a piak tungtang leng genkhawm ding uh chihthu om hi.

CBI Special Court ah hearting pailel
Imphal, Oct-5: Ukhrul district sung Kashom Khullen Sub-divn a SDO lenlai Dr.Kishan banah a staff mi 2 -Token leh Rajen thahna a kigolh NSCN(IM) Lt Col Hopeson Ningshen tulela CBI khut a om a tungtang thu Delhi a Patiala House a CBI Special Court ah hearing pailel chihthu om hi. Dr Th. Kishan leh a staff 2te Feb 2009 in NSCN pawlin Ukhrul apan pikhia in Senapati district sung Lukhrabi lei(bridge) ah sisa in a luang uh muhkhiak ahi hi.

Loktak Lake in khualzinmite hip
Imphal, Oct-5: Bishnupur district sunga Loktak Lake etlawmna in Manipur ah khualzinmite hip hi’n kigen hi. Imphal akipan km 48 vela gamla, kilometre kimkot 312 vel alian Loktak lake kichi leitung a mun poimawhte laka gentel hi a,huai mun apan simlam ah Keibul Lamjao National Park om a, tuitung a National Park kilam(floating) omsun hiding a gintak hi a, huaimun bel Brow Antlered Deer (Sangai) ziakin minthang diak hi.

VDF personnel 2 matkhiak in om
Imphal, Oct-5: VDF personnel 2 in galvan zangin Thangal Bazar a Pharmacy khat ah sum ngenlai Imphal west police- te’n mankhia uhi. SP/Imphal west in a gendanin VDF personnel Salam Rocky Singh s/o S. Anand Singh of Uripok Huidrom Leikai leh Khangenbam Kane Singh s/o Uripok Khaidem Leikai in galvan zanga sum ngenlai matkhiak himahle uh a lawmpa uh matkhiak hinailou a, theihsuah hita chi hi. SP in Pharmacy leh damdawi zuakte’n dawr hong dingin ngen a, Police te’n thil a etzui ziak un lauh ding omlou chi a, City Police Station ah case registered hita chi hi.(UNA)

FCI antang pua Truck-te buai
Imphal, Oct-5: Jiribam leh Dimapur a FCI warehouse akipan FCI antang leh wheat hong pua Truck 300 velin a van puakte uh nawnkhiak ding hun ngak in Sangaiprou leh Koirengei mun ah buai mahmah uh chihthu om hi. Truck 200 velin a vanpuak uh nawnkhiak ding ngak in Sangaiprou a FCI warehouse ah ngak uh a, Truck dang 100 velin Koirengei a CAF & PD warehouse ah a van puak uh nawnkhiak ding in ngak uh chih ahi hi. Sangaiprou a FCI warehouse ah antang leh wheat 10,000 matric tone tan kia koihtheih ahih ziakin kidaih zoulou a, huaiziakin FCI in Koirengei a CAF & PD warehouse hire in zang sawn uh chihthu om hi.

Electricity deptt a semte theisak
Imphal, Oct-5: Chief Engineer(Power) office complex a Manipur Electricity Employees’ Union(MEEU) office ah October 9, 2013 zinglam dak 10.30 in electricity deptt a sem(employee) teng meeting om ding a,huai ah state govt in Electricity deptt tunung zekin privatise dan in company 2 khut a piakkhiak a sawm tungtang genkhawm ding uh a, huai ah employee-te kimtak a telchiat dingin Kh. Nabachandra Singh, Secretary, MEEU in theisak hi.

Oct 11, 2013 in Counselling om ding
Imphal, Oct-5: Directorate of Health Services, Manipur thusuak dungzui in Female Health Worker(FHW) course sin dinga selection a telkha candidate-te adingin seat allocation tawh kisai in October 11,2013 zinglam dak 10.30 in Directorate a Counselling om ding ah kimtaka tel dingin theihsak hi uhi. Huai ah candidate te’n original certificate, entrance examination a admit card leh passport size lemlak 3 tawichiat ngai ding hi.

Dist Level Literary Competition hunkhakna om
Lamka, Oct-4: SSA &RMSA/CCpur saina in tuni Hiangtam Lamka a YPA Gen.HQ Hall ah ‘District Level Literary Competition 2013’ hunkhakna functiona om a, Phungzathang Tonsing, Minister (Health &FW, GAD, CADA) in Chief Guest a pang in uap hi. Huai hun ah Functional President in H.Deleep Singh, IAS, Director of Edn (S) & State Project Director, SSA & RMSA pang a, Dist Level Officer tamtak in leng uap in kipahman tuamtuam hawmna leng om hi.

Chief Guest in agenna ah tuma in school tuamtuam ading in Dist Level Literary Competition om ngeilou a, DC/CCpur felna ziaka omthei ahihziak in pahtakthu gen hi. Kum 2 vel paisa in CCpur dist in SSC exam centre neita a, tuailai laisiam tamtakte’n Lamka mun ah competitive examination tuamtuam pethei uh a, maban ah hong poimawh semsem ding hi’n gen hi. Tuni a paikhawm teng in thupi a kizang ‘Our role in Nation building’ chih theithak chiat ding in gen hi.

Functional President in agenna ah thil tuamtuam ahoihlamte Dist HQ apan kipankhe ding mah hi’n gen a, competitive exam tuamtuam ah CCpur dist mi tamtak lawhching in laisiam leng mi tam hi’n gen hi. State Level ah Nov 2013 in class VIII-X student-te adin Talent search examination om ding a, tukha top lamin dist teng apan asiampente ading kidemna debate, quiz leh essay competition om dingin gen hi. Director of Education leh DC kia in thilteng enzui thei veklou a, school hoihna ding in School Management Development Committee(SMDC) te’n mawhpuakna lian in poimawh petmah hi’n gen hi.SMDC ah Chairman in Headmaster pang a,Senior Teacher khat Secretary hi a,member in khawsung hausa/Village Authority Chairman, educationist, parents leh NGO apan palai 1 tel hi’n gen hi.

SMDC in school kaihoih leh kai hoihlou teacher-te etzuina banah school tawh kidai nasep leh contruction himhim amau tungtawn a sepkhiak ahihman in active tak leh chihtakna tawh kithuah in thilteng a etzui(monitor) uh ngai ahihdan gen hi.
Right to Education Act lawhching hehu naikei mahleh awla lawhching touzel hi’n gen Director in gen hi. Aman agenbehna ah kum 2014 apan zat ding school calendar kichi govt in bawlkhiat sawm a, huai bawlkhiat hunhun in school tengin exam hun, summer leh winter vacation akibang a neithei ding hi’n gen hi.

Tuni a programme zatna ah kidemna tuamtuam a kipahman mute laka piakkhiakna leng om hi. Huaite Painting: (children with special needs 9-13yrs) ah 1st in Kajol Das (class III) of Kingship school, 2nd in Kimneivah (class IV) of Khengjang JB school leh 3rd in Pauminlian (class I) of Dawn school hi a, 14-18 yrs ah 1st in Ngamkhothang(class VI) of St. Mary’s school, 2nd in Thanglet (class VII) of S. Ideal H/S leh Jangngam (class V) of Bethany Christian Hr. Sec. school hi uhi.
Painting: Sub-Junior ah 1st in Kim Jolly (class V) of KGV,Tuilaphai; 2nd in Pauminlal (class V) of Salt Brook school leh Lianmuanlal (class V) of Hermon English school hi uhi.

Junior ah 1st in Kaiminlian (class VI) of Salt Brook school; 2nd in Mangminthang (class-VII) of Sunshine English school leh 3rd in Jackson Chibu (class-VIII) of , Gilgal English H/S hi uhi. Senior ah 1st in Nempineng (class IX) of Salt Brook school; 2nd in Goubiaksang (class IX) of Hermon English school leh Thunkym Lakphieng Gangmei (class IX) of Gilgal English H/S hi uhi.
Singing/Solo: Sub-Junior ah 1st in Hatneichong (class V) of KGV, Tuilaphai; 2nd in Chingthianmuang (class V) of Ebenezer Academy leh Thanglemlian (class V) of Vungzagen govt H/S hi uhi. Junior ah 1st in Joicy Chinglemsiam (class VIII) of L.Foundation school; 2nd in Nemlemkim (class VII) of Ebenezer Academy leh Prissila Lianhoih (class VII) of Ebenezer Academy hi uhi. Senior ah 1st in Tracy Ngaihching (class X) of Phungkhothang Govt. H/S; 2nd in Chiinlianvung (class IX) of L.Foundation school leh 3rd in Vungbiakching (class IX) of Ebenezer Academy hi uhi.

Elocution: Sub-Junior ah 1st in Tabitha (class V) of Grace Academy; 2nd in Frida Chonghoihthem (class III) of Greenwood Academy leh 3rd in Kim Dina (Class III) of St. Xavior school, Thanlon hi uhi. Junior ah 1st in Jenny (class VI) of Blue Star Academy; 2nd in Thangsuanlian (class VI) of Hermon English school leh 3rd in Dimzasiam (class VIII) of St. Peter’s school hi uhi. Senior ah 1st in Benjamin (class X) of Singngat Standard H/S; 2nd in Niangthianmuang (class IX) of St. Peter’s school leh 3rd in Akip Kom (class X) of Hermon English school hi uhi.
Choroeography: Junior ah 1st in T.E. Paul H/S, Samulamlan block; 2nd in Sunshine English school leh 3rd in L. Foundation school hi uh a, Senior ah 1st in Grace Academy; 2nd in T.E. Paul H/S leh 3rd in Salt Brook School hi uhi.

Skits: Senior ah 1st in St. Xavior School, Thanlon 2nd in Sundayson and Party, Sagang H/S, leh 3rd in St. Joseph School hi uhi. Dist Level Literary Competition 2013 ah CCpur block; Singngat block; Thanlon block; Henglep block; Tipaimukh block leh Samulamlan block apan student tamtak tel uh a, huai teng lak ah CCpur block in Overall Champion la uhi. Individual kidemna ah 1st in Rs.1200 + trophy + certificate, 2nd in Rs 1000 + trophy + certificate banah 3rd in Rs 800 + trophy + certificate ngah uhi. Group kidemna ah kipahman in 1st ah Rs.2000 + trophy + certificate; 2nd ah Rs 1500 +trophy + certificate leh 3rd ah Rs 1000 + trophy + certificate ngah uh a, kidemna tel kipahman lakhaloute kiang ah leng consolation prize piak hi uhi.

Chairman,ADC/CCpur hongtung
Lamka, Oct-4: Langkhanpau Guite, Chairman, ADC/CCpur in Shillong a programme tuamtuam azat nungin tuni’n Lamka hongtung a, Tuibuong a ADC office tawn masa in office a pending file omteng hihfel hi. Aman Shillong ah Zomi student tuamtuamte tawh leng hun zangkhawm uh a, SSPP Jt HQ Shillong kum 50 chin lopna hunah Chief Guest in pang hi.

Bus tuahsia ah mi 1 si
Lamka, Oct-4: Tuni sunnung dak 12:30 velin Mizoram Champhai area Ruantlang leh Mualkawi kikalah passenger 30 pua Sesih Bus (No. MZ04/4144) a brake fail ziaka accident in amun ah Zamlianthang (43) s/o Nawkdal of Sesih si a, midang 2 liam uhi. Thutut Zamlianthang ahihleh SBI Champhai Branch a Customer Assistant sem hi a, Sesih a Zomi Baptist khawmpi atel dia kuan tuahsia hi’n kigen hi. Bus ahihleh Paukhatlang s/o Hminglianniang of New Champhai hek hi’n kigen hi.

BRTF nasemte’n culvert tuang sung uh
Lamka, Oct-4: Tedim road apan Simveng zotna lampi bul ah BRO/BRTF te’n kum bullam in lampi akimkhat ah culvert bawl uh a, Sept 13, 2013 in lampi kimkhat (tumlampang) ah culvert bawlna nasep pan uhi. Huai tuni’n cement, suanghum leh leingoi zangin culvert tuang(floor) sung uhi. Culvert kisungthak zat ahihna dingin kha 1 vel hunla ding hi’n kigen hi.

3rd World Zomi Convention cheplawkna
Lamka, Oct-4: 3rd World Zomi Convention Organising Committee makaih in Oct 5, 2013 zinglam dak 11:00 in Sim Veng a SYO Hall ah 3WZC cheplawkna kick-off program om ding a, Rev Lamkhogin Khaute, Executive Director,EOC in hong ding hi. Huai ah Chief Guest in Langkhanpau Guite, Chairman ADC pang ding a,Special Guest in Health Minister Phungzathang Tonsing pang ding hi. Huai ah Rev Thangkhangin, Director (Inst) in ‘Be a Blessed Nation’chih thupi zangin Pathian thugen ding hi.

CDDU pawl Medal 11 tawh hongtung
Lamka, Oct-4: State Platform for Disable People Orgn-te saina in Oct. 2-3, 2013 sung Imphal a Khuman Lampak Main Stadium ah ‘1st State Level Sports Meet, 2013 for Person with Disability’ om a, CCpur dist ai-oh in CCpur District Disable Union (CDDU) apan mi 35 vatel uhi. Amau tuni’n Gold Medal 4, Silver Medal 4 leh Bronze 3 tawh hongtung uhi. CDDU apan Gold Medel late- Paulginthang (100 metre race), Stephen Sanglun (100 metre race), Kimngaihrem (arm wrestling) leh Tinkholam (arm wrestling) hi uhi. Silver Medal late- Khailet Touthang (arm wrestling), Zenthianngaih (arm wrestling), Lamneivah (100 metre race) leh Dimneinieng (arm wrestling) hi uh a, Bronze medal late- Lalrosang (100 metre race), Ngamzathang Khongsai(100 metre race), Kimnuntheng (100 metre race) hi uhi. CDDU member te’n Bamboo Dance lahna leng nei uhi.

Yamaha FZ bike pekik di’n theisak
Lamka, Oct-4: 3WZC ding tawh kisai a Info&Pub dept –te’ gari zatlai Yamaha FZ-S(Black-Green) zan nitakin Uptown Media, Lamlian Veng, Bungmual ah a kizanglai gukmang in om a, a gutu leng thei uh ahihman in kintak in 3WZC Information Centre a koih dingin Co-Convenor in theisak hi. Gari ahihleh Chasis No. ME 121COE6C2022464, Engine No. 21 CEO22418 hi’n kigen hi.

PMEGP loan apply-te list kitakkhia
Lamka, Oct-4: PMEGP 2013-14 loan apply trade tuamtuam apan applicant 1418 teng category 3- KVIC, DIC leh KVIB a kikhen in Oct 7-25, 2013 sung zinglam dak 10:00 apan in DC office ah interview om ding hi. Tuni’n DC office ah KVIC apan loan apply mi 164 list kitakkhia a, hileleng KVIC leh DIC tungtawna loan apply-te list bel kitak nailou hi. KVIC tungtawna loan apply Sl.1-164 te’n Oct 7-10, 2013 sung interview neiding uh a, KVIC tungtawna loan apply 651 teng in Oct 14, 15, 17, 18 leh 20, 2013 sung interview neiding uh a, DIC tungtawna loan apply 603 tengin Oct 22-25, 2013 sung interview neiding uhi.

Housie Bumper draw
Zomi Football Club(ZFC) panpihna ding in Oct 5,2013 nitaklam dak 3.00 in New Bazar Bus parking area ah ‘Housie/Tambola Super Bumper’ om nei ding uh chihthu kiza hi.

IMPHAL NEWS
Governor leh CM akipan message
Imphal, Oct-4 : Manipur Governor Dr Ashwani Kumnar leh Chief Minister O. Ibobi in Oct. 5, 2013 a ‘Mera Chaoren Houba’ festival tawh kisai in Manipur mipite deihsakna thuchah puang uhi. Governor in Manipur ah kumteng in Mera-tha(Sept-October) lakin Mera Chaoren Houba kichi kipumkhatna leh kituahna latsakna in festival nuamtak zat hisek hi’n gen a, tutung in leng hiai festival zatdan phatuam leh a hoihlam a kuapeuh in zang chiat dingin deihsakthu puang hi. Chief Minister in Mera Chaoren Houba kichi Manipur adin traditional festival poimawhtak hi’n gen a; hiai in Manipur phaijang leh singtanggam a khawsate ki-unauna leh ki-itna langsak hi’n gen hi. Tutunga zatna hun ah leng Manipur mipite laka kipumkhatna hih kipsem dinga deihthu puang hi.

FCI in Nov stock laklut din phal
Imphal, Oct-4: Food Corporation of India(FCI) in November kha ading Manipur antang leh wheat(sapbuh) advance a pawkhe thei ding in Manipur govt a Consumer Affairs Food & Public Distribution(CAF & PD) deptt zasak chihthu om hi. Hibang kalah Targeted Public Distribution System (TPDS) nuaia October 2013 kha ading antang 7791 metric ton leh wheat 2321 metric ton leng hawmkhiak bangmah om nailou in Imphal a FCI warehouses ah omlai chihthu kiza hi’ Huailou in Sangaiprou leh Koirengei a FCI godown ah tulelin antang 13,200 matric ton leh wheat 4,314 matric ton koihsa in om a, huaite Truck 400 valin Jiribam leh Dimapur apan FCI warehouse apan antang leh wheat hong puaktung uh a koihna ding omlouh ziakin Truck tung apan nawnkhiak theihlouh in om lai chih ahi hi.

AGP makaite’n MPP leader-te kimuhpih

Imphal, Oct-4: Assam Gana Parishad (AGP) Working President Atul Boraoh, General Secretary leh ex-Minister Pradip Hazarika te’n Manipur hong pha in Manipur People’s Party (MPP) President Sovakiran tuni’n Imphal a a office ah kimuhpih uhi. Hiai hun ah India a Regional Party te’n maban a Lok Sabha election ah pankhawm ding thu genkhawm uhi. MPP President Sovakiran in press-te kiang a gendan in regional party te’n Oct. 20 & 21, 2013 in Guwahati a Brahmaputra Ashoka Hotel ah political convention nei ding uh hi’n gen hi. Huai ah Pubjab a Akali Dal, Andhra Pradesh a TDP leh North East a regional party tuamtuam tel ding uh hi’n gen hi. MPP te’n Indo-Myanmar gamgi tawh kisai a border fencing thu leng huai hun ah pawlut ding uh hi’n Sovakiran in gen hi.

Phaijang bial ah office suti ding
Imphal, Oct-4: Manipur phaijang mite adia festival poimawh leh minthang ‘Mera Chaoren Houba’ ziakin October 5, 2013 in Imphal telin Manipur phaijang biala govt office-te suti vek ding uhi. Hileleng Manipur singtanggam ah bel Oct 5, 2013 suti hilou ding a, DC te’n amun tawh kituak festival dang suti hizaw dia thusun a bawl uh govt in a pomsak ziakin Lamka telin singtanggam mun tamzaw ah suti hilou ding chihthu om hi.

Dakkal 12 sung General Strike
Imphal, Oct-4: Committee on Protection of Land in Border Fencing,Manipur pawlin Indo-Myanmar border fencing ziakin Manipur gam liankhop tak Myanmar gama laklut hiding chih patauh thu puang kawmin Manipur Governor, Chief Minister leh Principal Secretary(Home) ah memorandum piak himahleh huia tungtang ah govt in tuni tan in panlalou chih ziaka lungkimlou in Oct. 7, 2013 zingsang dak 5.00 akipan in dakkal 12 sung Manipur pumpi ah General strike puang uhi. Bandh om sung in water supply, medical leh fire service khahkol hiding chi’n puang uhi.

Amulspray packet ah ganhing
Imphal, Oct-4: Naungek-te adia bawngnoi powder kigen minthang ‘Amulspray(infant milk powder)’packet kawm ah ganhing(insect) a om ziakin a leite pilvan mahmah ngai chihthu om hi. Thutut kingahdan in Ningthoujam Anand of Tera Yengkhom Leirak in Tera Tongbram Leirak a Oriental College kiang ah zan in Amulspray milk powder (gram 500) packet khat Rs. 146 in lei a,tuni zingsang in singpi bawlsawm in a hon leh bawngnoi powder lak ah ganhing Meitei-pau a “tin kokchaobi” kichi khat a om ziakin mangbang hila hi’n kigen hi. Huai bawngnoi powder bel Gujarat Co-operative Milk Marketing Federation Limited te’ bawl hi’n kigen a, April 2013 a kibawl hi a, March 2014 nungqa ahun bei(expire) pan ding chih ahi hi.

AE akipan EE in kaisang
Imphal, Oct-4:Manipur govt nuai a AE(Civil) 2 tutung in EE(Civil) in kaisang uhi. AE(Civil) akipan EE(Civil) a kaisang mi 2te T. Lamzamuan leh W. Prashanta Kumar hi uhi.