‘Pu leh Pa Ngeina Daan’ Laibu honna om
Lamka, Oct-3: Simte Tribe Council HQ in a bawl ‘Simte Pu leh Pa’ Ngeina Daan Bu (customary law book)’ kichi tuni in Sim Veng a SYO Hall ah H. Ginzamang Simte, Director (Sericulture) khuallian a pang in hong a, Rev H.Thangliankham, NTBC in Pathian kiang ah lan hi. Huai ah Functional President in T.Seldow, Principal JNV/Tuinom pang a, Guest of Honour in T.Kammuanlal Simte, MCS, AC to DC/CCpur pang hi.
Chief Guest in kum 20 val paisa a Pu leh Pa’ Ngeina Daan kizangte laibu a bawlkhiat ahih kipahthu gen a, laibu sung a daan tuamtuam kibawlte siatni-phatni a zuihchiat ding hi’n gen hi. Manipur ah tawsaw sing (tasar tree) bei hiaihiai a, kuapeuh in kepbit poimawh hi’n gen hi. Tipaimukh road tou, Thanlan A/C huap in sericulture project tungtawn in mipite’n lungnou khawi a, nekmuh theihna din Vungzagin Valte, MLA (Thanlon A/C) panlakna ziakin Rs 1/ 2 crore zang in khaw tuamtuam ah govt in Tasar farm patkhiat sawm hi’n gen hi.
Dist Level Literary Competition om
Lamka, Oct-3: DC/CCpur & Chairperson, SSA & RMSA saina in tuni zinglam apan in CCpur govt College ah ‘District Level Literary Competition 2013’ om a, huai ah DC, Addl DC, SDO te, AC to DC te ban ah ZEO leh DIs of Schools teng in uap uhi. Block Level Literary Competition hun a select a om teng Dist Level competition ah tel uhi. Painting ah sub junior (class III-V) 51 tel uh a, junior ah student 41 leh senior ah student 19 tel uhi. Elocution ah sub-junior 14, junior 20 leh senior 20 tel uh a, Singing/Solo ah sub junior 13, junior 41 leh senior 20 tel uh a, Skit ah school 4 tel in Choreography ah junior 7 leh senior 7 tel uhi.Individual kidemna ah 1st in Rs.1200 + trophy + certificate, 2nd in Rs 1000 + trophy + certificate banah 3rd in Rs 800 + trophy + certificate ngah ding hi. Group kidemna ah kipahman in 1st ah Rs.2000 + trophy + certificate; 2nd ah Rs 1500 +trophy + certificate leh 3rd ah Rs 1000 + trophy + certificate ngah ding uhi.
Minister in hunkhakna uap ding
Lamka, Oct-3: SSA &RMSA/CCpur saina in Oct 4, 2013 zinglam dak 11:00 in Hiangtam Lamka a YPA Gen.HQ Hall ah ‘District Level Literary Competition 2013’ hunkhakna functiona om ding a, Phungzathang Tonsing, Minister (Health &FW, GAD, CADA) in Chief Guest apang in uap ding hi. Huai hun ah Functional President in H.Deleep Singh,IAS,Director of Edn(S) & State Project Director,SSA & RMSA pang ding a, huai ah kidemna tuamtuam result puanna leh kipahman hawmna leng om ding hi.
Kha 1 sungin gari 123 kibehlap
Lamka, Oct-3: Dist Transport office/CCpur ah Sept 2013 kha in gari tuamtuam 123 registered thak in om a, huaite lak ah Truck 1, Bolero 4, Gypsy 2, Tata Sumo 1, Maruti Van 3, Car 7, Diesel Auto Richshaw 15 leh Bike/Activa 90 tel hi. DTO staff te’n Sept, 2013 khasung mahin revenue Rs.8,45,878/- mukhia uh a, April-Sept 2013 sung in Rs 62,23,407 mukhia in challan cut uh a govt ah submit uhi.
SDO in Annual Sports Week hong
Lamka, Oct-3: Leijang khawpi a H.M English High School te’n tuni zinglam dak 9:00 in 15th Annual Sports Week nei uh a, Chief Guest apang LT Puii, SDO/CCpur in flag kaipalh in hong hi. Aman a genna ah student te’n ni 4 sung sports meet a neihding uh taksa ading a poimawh petmah hi’n gen a, khuak(brain) i zat mun leh hiam (sharp) deuhdeuh a, khuak hahzatna dingin taksa damtheihna poimawh a, huai dingin taksa soizoina (exersice) leh Games & Sports a loutheilou hi’n gen hi
Taksa damtheiloute’ lungsim leh khuak damtheilou a, laisimna ah leng Games & Sports education leng 1 mah hi’n gen hi. Sports hunsung in student te’n lungduai taka kimawl ding in hasuan a, taksa damtheihna, lungsim leh ngaihtuahna damtheihna Sports tungtawn a a om deihsakthu gen hi.
Peace Poster Contest nei uh
Lamka, Oct-3: Lions Club of CCpur Greater pawlin tuni nitaklam in AG High School ah Peace Poster Contest nei uh a, huai ah student tamkhop tel uhi. Amaute laka kipan mi 2 telkhiak hiding uhi. Telkhiak a omte'n Oct 5 a District Governor Lion LN Agarwalla,PMJF in Oct 5, 2013 a hongzin hun ah sunning dak 2.00 in ICI Centenary Hall ah prize ngah ding uh a, tua nungin Dist. office ah sawl hiding uhi. District level zawh chiang in international level adia kuan thei ding uh hi'n kigen hi.
Skill Upgradation Training
Lamka, Oct-3: Sielmat a ICI Conference Hall ah Oct 4, 2013 zinglam dak 11.00 in IGSSS, NYK leh MAKI saina in ‘Food Processing & Preservation’ tawh kisai Skill Upgradation training programme om ding a, Ksh. Biren Singh(Food Expert), Lecturer, Kakching Khunou College in saulou thugen ding a, Manihar Singh, AIR/ Imphal leh Manohar Adarsh Karma Industrialist in sinsak ding uhi.
Hepatitis B & C detection camp
Lamka, Oct-3: Hmar Students’ Assn(HSA) Gen HQ kiphuhkhiat nung kum 74 chinna lopna kawm in HSA Gen HQ leh MSD Parmaceutical Pvt Ltd pangkhawm in tuni zinglam apan Rengkai a ‘Buonzawl-the arena’ ah ‘One Day Hepatitis B & C Detection Camp’ om hi. Huai ah mi 133 in sisan test uh a, huai lak ah Hepatitis ‘C’ positive 6 mukhia uhi.
JE dalna kaptheih ding
Lamka, Oct-3: Singngat Primary Health Centre ah Oct 2013 kha a kal 3na akipan Nilaini (Wednesday) ten in naupang kum 1-10 kikalte ading in Japanese Encephalities (JE) kichi khuak a khawsik lutding dalna damdoi manbei in kapsak theih ding hi.
PhualvaTimes Anniversary zang uh
Lamka, Oct-3: Internet tungtawn a kithuzak tuahna “PhualvaTimes” (www.phualvatimes.com) patnung kum 1 chin hunah Administrator-te zan nitakin New Lamka a Sauliim Restaurant ah kimukhawm uhi. Huai ah website founder Joy Ngaihte in social networking site leh website poimawhdan gen a, kum tamlou paisa akipan Lamka area a internet zangtu akibehlap ziakin mun tuamtuam a omte adingin poimawh deuh bang mahleh Lamka a omte adingin leng thuthak theihna dingin poimawh hi’n gen hi. PhualvaTimes mi tamtak in phattuampih uh ahihdan theih ahih ziakin administrator 9 velte nasep thawnlou hi’n gen hi. Muan Hauzel in singtangmite society lam ah kichau hi’n gen a, website ichih non-profit ahihman in society bawlhoihna ding leh midangte adia phatuam dinga bawlkhiak a omte ziakin kipahthu gen hi. Huai programme zatzawh in an nekhawm uhi.
Tulai in accident om mun
Lamka, Oct-3: Lamka khawpi ah gari a pun nasatluat ziakin lamlian omte neu hiaihiai a, gari taihat leng a tam ziakin niteng phialin accident omzou gige hi. Tuni nitaklam dak 5.00 velin New Bazar ah Bike(No. MN02A/7831) a tuang te’n Activa(No. MN02/7824) tailai phukha uh a, Police-te’n delhpah uh a, Bike a tuangte liamzek mahle uh serious omlou hi’n kigen hi. Tuni zinglam in Tuibuong ah Activa leh Bolero kiphukha a, Activa a tuangte lakah Mangminsang (5) s/o T. Hechon of Tuibuong liam zek hi. New Lamka a Go Cin Khup Veng ah tuzing in Diesel auto khat in lampi a pailai Kapkhanthang (38) s/o Paukhankham of New Lamka phukha a, alu liam hi. Tulai in gari hattai tamtak om a, Traffic Police te’n a etkai petmah uh poimawhta hi’n kigen hi.
ZRA te’n khamtheih tawh mankhia
Lamka, Oct-3: ZRA Drugs Cell te’n tuni sunnung dak 1:00 velin New Bazar ah Dongkhup (56) s/o (late) Thangchinpau of Kamdou Veng, Tuibuong mankhia uh a, amah apan RP tang 300 mukhia uhi. Dongkhup in a gendan in zan sunnung in Tuibuong bazar a Zion Clinic kong a Nepali Hotel 1 ah Moirang a kipan Meitei 1 in RP tang 300 zuaksawn dingin pia a, Rs 3000 piak a, amet omteng aman tangding hi’n gen hi. ZRA Drugs Cell te’n tuni sunnung dak 3:00 in Media-te muh in RP tang 300 sum atuat in Rs 7500/- vel manding Dongkhup haltum sak uh a, thuhilhna hoihtak nei in khahkhia uhi. ZRA Drugs Cell pawlin khamtheih doudalna ah mipi’n a kithuahpih ziakin kipahthu gen uh a, maban ah leng mipi’n kithuahpih touzel dingin chial uhi.
*****************************
IMPHAL NEWS
14th Finance Commission team in ni 3 sung Manipur hongpha ding
Imphal, Oct-3: 14th Finance Commission a Chairman Dr. YV Reddy makaih in member 4 leh officials 11 in Oct. 6-8, 2013 sung Manipur hongpha ding uhi. Amau Oct. 6, 2013 nitaklam dak 3:30 in Ukhrul akipan Helicopter zangin Kangla bawh ding ua, huai apan in NT Theatre a paisuak in programme khat uap ding uhi. Tua zawhin a tunna ding uh Classic Hotel zuan ding uhi.Oct. 7, 2013 zinglam dak 10:00 in CM O. Ibobi Singh leh Council of Minister-te banah state official-te tawh meeting ding uh a, huai ah Addl. Chief Secretary (Finance) in Power Point Presentation pe ding hi. Tuazawh in Loktak Lake leh INA memorial complex pha ding uhi. Oct. 8, 2013 in field visit in pai ding uh a, pawl tuamtuamte tawh meeting ding uh a, nitaklam dak 3:35 in Imphal nuse ding uhi. 14th Finance Commission a team Manipur hongpha dingte Dr Reddy banah Prof. Abhijit Sen, MS Sushema Nath, Dr. M. Govinda Rao leh Dr. Sudeepto Munda hi uhi. Official 11 te AN Jha in makaih ding hi’n kigen hi.
Numei khat amah leh amah kithat
Imphal, Oct-3: Senapati district akipan Nagaland khawpi Kohima a Upper Midland colony a va om numei Monnunhoi @ Lily (16) d/o David Mariam of Phurum Likli village a omna innsung a ceiling ah kikhailum sa a muhkhiak in om hi. Police te’n tuni in siluang vala uh a, ni bangzahhiam paisa a kikhailum hidin ginthu gen uhi.Huai siluang bel tuni a theihkhiak leh muhkhiak a om pan hidan in kigen hi.
NAB ten mi khat akipan in khamtheih Rs. 6 lakhs vel man ding mukhia
Imphal, Oct-3: Narcotics Affairs of Borders (NAB) pawl khat in tuni in Checkon bazar ah mi khat akipan khamtheih Amphetamine kichi tamtak mukhia uhi. Thusuak in a gendan in khamtheih neitu Hemkhomang Haokip (43) s/o Lunkhojang Haokip of S. Moljol village, Moreh Ward No. 7 hi a, tulelin Imphal east district sung Porompat a AAA Ground a innluah a om hidan in kigen hi. Khamtheih matkhiakte a kigawm in Rs. 6 lakhs vel man ding hidan in kigen hi.
Food Security Convention nei uh
Imphal, Oct-3: Human Rights Initiative and International NGO Partnership Agreement Programme-te saina in tuni in Manipur Press Club ah ‘One Day Consultation Meet on People’s Right to Food Security Convention’ kichi om hi. Huai hun ah Aribam Brajakumar, President, Cultural Integration Conference in moderator dan in uap a, Dr. RK Ranjan, President, Human Rights Initiative leh RK Binoy, Officer on Special duty (CAF & PD) ten leng uap uhi.
Manipur ah HIV positive tam
Imphal, Oct-3: Manipur State AIDS Control Society apan thusuak kingah dungzui in India gama state tuamtuam lakah Manipur kichi HIV positive tamnapen hi a, tutan a kithei dan in HIV positive 42,116 om a,huaite lakah naupang leng ahunkhop tel uhi. Huaite lakah ART centre 9 a min pelut teng 19,629 hi uh a,second line ART treatment piaka om numei 34 leh naupang 1 telin mi 49 pha uh chih ahi hi.
Chairman,ADC/CCpur leh NEHU a Zomi student-te kithuah khawm
Shillong, Oct-3: ADC Chairman/CCpur-te laka masapen dingin Langkhanpau Guite in tuni nitaklam dak 3:00 in North Eastern Hill University(NEHU), Shillong campus ah NEHU a Zomi omte tawh kithuahkhawmna hun zang uhi. Huai ah SSPP Jt HQ President, Vice President leh adangdang tel uhi. Student lam apan Research Scholar, Master Students, Professional students leh NEHU staff tuamtuamte leng tel uh a, siamsinna lam leh khawtang vai, gam leh nam khantouh theihna ding leh thu tuamtuam genkhawm uhi. ADC Chairman in amah hihtheihna tan ah a thugente uh bawhzui ding in chiam a, tuazawh in nitak an nekhawm uhi.