International Day of Non-Violence
Lamka, Oct-2: Standing Together To Enable Peace (STEP) leh Dist Administration kigawmte’ saina in tuni’n Road a Synod Hall ah ‘International Day of Non-Violence’ zatna leh STEPS-te saina in ni 12 sung om ding ‘Festival of Peace/Jashan-E-Aman’ hunkhakna kithuah om hi. Huai ah Ms Jacintha Lazarus, IAS, DC/CCpur in Dawn School, Happy Heart School leh Soikholal Ideal H/S te ‘Voices of Dreamers’ kichi pekhia a,Kh.Samulel Poumai in ‘STEP & Festival of Peace’ pansan in thu gen hi. Huai atel student te’n projector tungtawn in ‘Gandhi’s Non-Violence Movement’ kichi documentary film en uhi.

DC in a genna ah Bible chi 2 in kikhen a, Jesu pianma teng Old Testament leh leitung a Jesu’ hong piannung ateng New Testament hi’n gen hi. Jesu in, “mi’n na biang hon betleh a langkhat leng dawh in” chi’n sinsak a, Mahatma Ghandhi leng Jesu bang a nunnem a, thagum zanglou in India suahtakna ding in Non-Violence Movement paipih hi’n gen hi. Tulai a mihingte ganhing’ tungah kitatse mahmah a, hileleng Pathian in mihingte Amah bang a bawl in ngaihtuahna hoihtak ban ah sia-le-pha theihna pia hi’n gen hi. Khawlai ah zukham a buaina bawl leh kisual hun hinawnlou a, midangte tawh pangkhawm a nasep hun ahihdan gen in mihingte leitung ah hunsawtlou dam ding ihihman in sihma teitei in khawtang adia thilhoih sepkhiat tumchiat dingin hasuan hi.

Aman a genbehna ah Pathian in Amah bang a honbawl mihingte i taksa kia siangthou lou in lungsim leh ngaihtuahna leng sianthou poimawh hi’n gen hi. Tuhun a tuailaite tunung a nam leh gam adia makai ding ahihman un omdan, gamtatdan hoih zuichiat ding in kuapeuh in panla di’n DC in ngen hi. Tuni a program zatna ah school tuamtuam- L. Foundation school, Mount Carmel school, Happy Heart school, Dawn school, Soikholal Idial H/S, St John school leh Children’s Training Hr Sec school apan student tamtak tel uhi.

Office tuamtuam ah social work
Lamka, Oct-2: Kumteng a ah Oct 2 in Mahatma Gandhi pianni champha ‘Gandhi Jayanti’ kichi ‘National Cleanliness Day’ in zat hi a, CCpur dist ah leng tuni’n govt office, institution leh school/ college asemte’n tuni zingsang in social work nei in amau office chiat hahsiang uhi. Village Authority-te’ makaih in khua/veng khenkhat in leng khawsung hahsiang in social work nei uhi. DC/CCpur leng a staff-te nasepna mun ah oma, 407-gari zangin niin(dust/garbage) tamtak nawnkhia uhi. DC office zotna lampi nawl teng leng hahsiang uhi.

‘Lamka-A Tobaco Free Zone’
Lamka, Oct-2: Lamka College Principal leh staff te ban ah Lamka College Unit a NSS member 70 vel in Gandhi Jayanti zatna in khawpi sung mun tuamtuam ‘Lamka, A Tobaco Free Zone’ kichi poster campaign nei uh a, huai poster campaign bel December 2013 tan sunzom ding uhi.

Shillong SSPP kum 50 chinna lawm uh
Lamka, Oct-2: Tuni zinglam dak 11.00 in Central Library (Usosotham Auditorium), Shillong ah SSPP Joint HQ Shillong kiphuhkhiak nung kum 50 chinna ‘Golden Jubilee’ lawm uh a, Chief Guest in Langkhanpau Guite, Chairman ADC/CCpur pang hi. Huai hunah Shillong akipan SSPP member tamkhop paikhawm uh a, item tuamtuam lahna leng nei uhi.

CDBA te’n Indoor Hall puah uh
Lamka, Oct-2: CCpur Dist Badminton Assn (CDBA) inntekna in Oct 21-25, 2013 sung Hiangtam Lamka a Indoor Hall (Community Hall) ah ‘11th Hills District Badminton Championship 2013’ om ding a, Manipur singtanggam district 6 apan kimawlmi hunkhop telding uhi. Huai adia kisakkholhna in tuni zingsang apan CDBA makaih in Indoor Hall sung leh pua ah social work nei in nasem uh a, Shaktiman gari zangin campus ah suanghum sung in levelling bawl uhi. Indoor hall sung leng rong nuhthak uh a, atuang(floor) leng zutsiang uhi. Indoor Hall a maindoor tuak a sing (wood) kizangteng leng phelkhia in teklei(bricks) in bawlthak uhi.

Pupa’ ngeina leh tawndan Laibu
Lamka, Oct-2: Simte Tribe Council, HQ in abawl ‘Pupa Ngeina leh Tawndan Laibu (customary law book)’ kichi Oct 3,2013 sunnung dak 2:00 in Sim Veng a SYO Hall ah H. Ginzamang Simte, Director (Sericulture) khuallian apang in hong ding a, Rev H.Thangliankham, NTBC in Pathian kiang ah lan ding hi. Huai hun ah Functional President in T.Seldow, Principal JNV/Tuinom pang ding a,Guest of Honour in T.Kammuanlal Simte, MCS,AC to DC/CCpur pang ding hi.

CBYF saina in Jumble sale om
Lamka, Oct-2: Chin Baptist Youth Fellowship pawlin Golden Jubilee Project ading in tuni zingsang apan Tedim Road, New Lamka(G) a CBA office ah Jumble sale nei uhi. Huai ah facial(herbal); sam tanna/colour na, cup set, plate, thousilen, longpant/jean, jacket/sweater, khedap, puanten, bucket, bel (aluminium), numei puan-ak, pasal kamis, hot case, dial/puanza leh thil tuamtuam zuak uh a, mi tamtak in lei uhi.

LIC AAO- 2013 gelhching
Lamka, Oct-2: Life Insurance Corporation of India (LIC) nuaia Assistant Administrative Officer(Generalist) semding lakna ding ah wrriten test a lawhching mi 750 te lakah Letginmonthang Lhungdim (R/No.2040313640) tel a, aman pre- recruitment medical examination neilai ding hi’n kigen hi.

Sum muhkhiakte in panpih ding
Lamka, Oct-2: Tuni in Young Learners’ School (YLS) huangsung ah ‘Reach Out and Touch’ project a dingin van tuamtuam zuakna leh muhnop ding thil tuamtuam lahkhiakna om a, huai ah Games Stall 20 val, Food stall, entertainment leh ice-cream, fruit salad chihte telin thil tuamtuam et theih leh leitheih ding koih uhi. Tuni a vanzuak tungtawn a sum muhkhiakte Nov 14, 2013 a Childrens Day chiang in panpih ngaite kiangah hawm ding uh hi’n kigen hi.

Dist Level Literary Competition
Lamka, Oct-2: SSA & RMSA saina in Oct 3, 2013 zinglam dak 10:00 in CCpur govt College ah ‘District Level Literary Competition 2013’ om ding hi. Painting ah sub junior (class III-V) leh junior (class VI-VIII) te’ ading in atuamtuak in elocution leh singing/solo kidemna om ding a, senior (class IX-X) te’ adin elocution, singing/solo leh Skit om ding hi. choreography ah junior leh senior kidemna omding hi.
Individual kidemna ah 1st in Rs.1200 + trophy + certificate, 2nd in Rs 1000 + trophy + certificate banah 3rd in Rs 800 + trophy +certificate ngah ding hi. Group kidemna ah kipahman in 1st ah Rs.2000 + trophy + certificate; 2nd ah Rs 1500 +trophy + certificate leh 3rd ah Rs 1000 + trophy + certificate hiding hi.
******************************************
IMPHAL NEWS
Manipur gamnuam hihsak sawm ni-CM
Imphal, Oct-2: Mahatma Gandhi pianchampha zatna tuni Oct. 2, 2013 in GM Hall ah ‘National Cleanliness Day’ chi’n zat hi a, huai ah Chief Guest in Chief Minister O. Ibobi pang a, Functional President in Home Minister Gaikhangam pang hi.Chief Minister in a thugenna ah kumteng in India gam pumpi ah Oct 2 in National Cleanlineess kizang a, Gandhi in a hinkhua ah non-violence paipih a, tua tawh kiton in Manipur state leng buaina omlouhna suahsak i sawm uh poimawh ahi, chi hi. Manipur a tengkhawm nam tuamtuam, pawl tuamtuam leh society tuamtuam te’n non-violence pansan a pangkhawm in bandh leh blockades chihte bawl nawnlou ding in ngetna bawl hi. GM Hall a Mahatma Gandhi lem (statue) kibawl ah pak piakna leng om hi.

Police in investigation hah bawl ding -DGP
Imphal, Oct-2: MK Das,IPS, DGP in mipite adia muantak hihna ding in Manipur police te’n investigation lam hahbawl ding hi’n gen hi.Manipur DGP in local cable te’n a interview hun uah a gendan in police in case tuamtuam omte kintaka suizui in a pholhsuah uh poimawh hi’n gen a, huai dinga panlak hileh mipite’n police kichi muantak hi’n koih theipan ding uh hi’n gen hi.Army leh Para-military te ahihleh state govt panpih dinga om hi uh a, tua ziakin omdan kilawmtak a om uh hoih ding, chi hi. Kuamah dan tungah omlou ua, huaiziakin Army, Para-Military leh police-te leng a diklouhna uah suakta tuanlou ding uh hi’n DGP in gen hi.

CRED leh CRPF te’n RIMS campus hah
Imphal, Oct-2: Centre for Research and Environment Dev (CRED) te leh 86-Bn CRPF kigawm in tuni a Cleanliness zatna kawm in RIMS campus sung hahsiang uhi. Huai hun ah CO Sanjeev Kumar makaihna in 86-Bn. CRPF apan Jawan 60 te’n RIMS kim leh kiang hahsiang uhi. Hibang a RIMS kim leh kiang 4vei a hahsiangna uh hita dan in kigen a, CRPF pawlin damdawi in siangthou theipen a koih sawm uh ahihdan leng gen uhi.

U-morok (Naga Chillies) kichi Sap malta Japan ah kg. 1 ah Rs. 50,000 in kizuak
Imphal, Oct-2: Malta laka thakpen(hottest chilly) hi a kigen Manipuri a U-morok kichi banah Naga Mirch leng kichi Sap malta-te Japan gam ah aman tam mahmah a, kg. 1 Rs. 50,000 in kizuak chihthu om hi.Hiai thu Chief Minister O. Ibobi makaihna a Japan gama zinte laka telkha O. Nabakishore,IAS, Principal Secretary(Commerce & Industries) in a gen hi a,aman Manipur ah hiai malta hahtaka chin hileh Manipur adia sum muhna hoih chikhat hiding thei ahihdan gen hi. Amau Japan gam a phakna ua kipan in Asia gam tuamtuam tuntawn a Manipur in a hamphatpih theih ding hunkhop mukhia uh ahihdan gen hi.Huailou in gawtuai(bamboo shoots) leh gua a kibawl bag(bamboo basket) tungtawn in leng Manipur in sum tamtak lalut thei ding hi’n O. Nabakishore in gen hi.

SSPP Imphal block Conference om
Lamka, Oct-2: SSSPP Imphal Block Annual Conference 54veina, Award hawmkhiakna banah Presidential Election kithuah tuni in YPA Hall, Eimi Veng, Laimanai, Imphal ah om a, Imphal Block nuaia Unit 5 akipan palaite leh SSPP member-te kihel in, Block Level Award tuamtuam hawmkhiakna leng om hi. Huailou in kum 2011-2013 sunga vaipaw ding telna om a, Block Adviser leh Block Committee Member-te kiangah theihpihna Certificate piak hi uhi.
Session masa ah Chief Guest in T. Manga Vaiphei, Chairman, MTDC pang a, Guest of Honour in V. Tualthang, Addl. Director, Commerce & Industries leh V.L. Roui, IFS pang uhi. 2nd Session ah Chief Guest in Health Minister Phungzathang Tonsing pang a, Guest of Honour in Dr. N. Khaizalian, IFS pang hi. Kum 2013-2015 sung SSPP-IB President thak din tuhtu omlou in Khamthianlal s/o (late) VL Siama of Lamphel ching a, SSPP-Gen HQ Standing Committee Chairman M. Jamchinthang in kichiamsak hi.

Disable te’n sports meet nei
Imphal, Oct-2 : ‘The 1st State Level Sports Meet for Persons with disability-2013’ kichi tuni in Khuman Lampak Main Stadium ah kipan hi. Huai ah Home Minister Gaikhangam khuallian hi a, Functional President in Agri Ministerv Md. Abdul Nasir pang a, Special Guest in Fr. Alexander Philips pang hi. Huai hun ah disable persons te’n Chief Guest leh Functional President kiangah memorandum pia uh a, memorandum etzuisak fing uh chi’n Chief Guest leh Functional President in chiam uhi.